|
فيها كل المواصفات اللي أريدها ولكن !
سلام عليكم لقد قام احد اصدقائي جزاه الله خير باعطاءي نكه هذا لطرح مشكلة لدي بعد ان اقنعني بما اثرت فيه ردوكم المشجعة مشكلتي تتلخص انني شاب في بداية 20 تعرفت منذ فترة على احدات بنات خالتي لكي اساعدها في موضوع ما وانتهى الموضوع و بعد مدة زرت خالتي و احنا عندنا عاد نجلس جميعا سوا لانهم بنات خالي مع انو انا اعرف انه هذا غلط المهم ما ابي اسوي قلق عندنا عادي المهم لا شعوريا بدا الكلام بينا و صرت اسأل و اهرج و اسال خالتي ببراءة عن البنت ما ابي احسسهم انه في شعور تجاها المهم رجعت البيت والبنت ماني قادر اشيلها من راسي البنت ما تتعوض حقيقة كل ما ابغاه فيها ربي يحفظها وحمدلله انو كل هذا التفكير لم بيعده الشيطان ابعد من الزواج لكن المشكلة اني طالب جامعي توني في البداية اخذ مصروف من ابوي و صعبة اني اخطب الحين لكن والله مو بيدي قلبي في جهة و عقلي في جهة قبل يومين سمعت انو في احد من العايلة حاط عينه عليها بس للحين ساكت ما تكلم في موضوع البنت وانا من يومها زاد همي يا اخوان الارواح جنود مجندة والله مو بيدي وانا عارف انو بعضكم بيقول هذا اعجاب بس صدقوني انا مريت من خلال دراستي بالخارج بالاعجاب والانفتان بس الشعور ذا جديد انا يوميا اصلي وادعي انو البنت تكون من نصيبي بس الواقع غير طبعا هذا بعد ارادة الله لو تقدم ذاك متوظف له مستقبل اما انا لسه بنظرهم ورع و هذا فقط شعور مراهقة اليوم وانا اصلي استغفر الله ماني قادر اخشع البنت قدامي وش الحل ،،، انسى واسكت ولا استمر بدعائي مع ان الهم واحد بالله ادعوا لي من قلبكم ربي يكتب لي الخير |
ربي يكتب الخير لك ويجعلها من نصيبك اذا كانت فيها خير لك
|
جزاك ربي الجنة على هذه الدعوة |
أخي الفاضل ***
أنت في بداية المرحله الجامعية *** كم سنه باقي لك وتتخرج ؟؟؟ ومتى تجد وظيفة مناسبة ؟؟؟ ومتى تكون نفسك ؟؟؟ وقد يتغير رأيك في بنت خالتك بعد كل هذه السنين *** أنا لا أريد أن احطمك *** ولا أريد أن ابعث في قلبك الأمل *** أنا اقول لك القول الصريح *** الذي يجب أن تفكر فيه *** لا تغالط نفسك *** مسئلة الزواج ليست سهله كما تتوقعها *** يعني هل أهل البنت بيرضون تخطبها الآن وتتزوجها بعد ست أو سبع سنوات ؟؟؟ أرجو أن تكون منطقي وعقلاني *** والأنسان لا يدري أين نصيبه ومتى يكون هذا النصيب *** أنت اتكل على الله *** وإن شاء الله إذا كانت من نصيبك سوف تسعد بها *** وإذا لم تكن من نصيبك فهذا قدر الله وحكمته *** ولابد من أن نرضى بما قسمه الله لنا *** والخيره فيما أختاره الله *** بالتوفيق إن شاء الله 0 |
اقتباس:
كفى و وفى والله كلامه دخل راسي 100% والله يكتب لك الا فيه الخير وان شاء الله تكون من نصيبك واذا البنت من نصيبك راح تاخذها لو بعد 100 سنه والله يوفقك في دراستك ولا تشيل هم الزواج الحين |
انا معاك اخي زوج عتيق بس والله مو بيدي البنت ما تفارق خيالي حتى والحمدلله مع اني في غربة بعيد عن الحرام انا عارف انو شبه مستحيل اهل البنت يعلقونها 7 سنوات او 6 عشاني بس وش اسوي حكمة الله انو على كثر البنات اللي مروا علي سواء الجامعة او قرايب هذي غير تعدت كل المقاييس هي كل ما كنت احلم فيه من زوجة لكن ليس لي الا الدعاء و لا تنسوني بدعائكم |
هلا2004 Joker
الله يعينك و الله حالتك صعبة في البداية حاب اقول لك اجمل ما في الكون هو الحب وقد ينقلب الى كارثة اذا لم نستطع السيطرة عليه بس في بالي اسالة قد تفعك وتعيد النظر في هالموضوع ايش السي الي عجبك في ابن خالتك هل شكلها الخارجي ؟ ام اخلاقها؟ ام تدينها؟ هل حقا انت تحبها يعني مستعد تعمل كل شي لاجلها؟ ام هي نزوة او مراهقة ام سميها كيف تشاء؟ هل انت تعرف معناة الزواج ؟ هل انت قادر على ان تدير حياتك الدراسية بجنب حياتك الزوجية؟ فكر في الشي صح ولا نخلي قلبك يغلب عقلك لانك قد تندم في بالي قصة قد تنفعك احد اصحابي كان همه كله ان يتزوج من احد البيوت فكنت اتناقش معاه واريد اعرف ايش المعايير الي خلته يبي تلك البنت اكتشفت انه كانت اول يشوفها او كانت امه تتكلم عنها فكنت اقول له انا ما اعرف البنت بس انت لازم تحط في بالك تصور الى البنت الي تبيها و الرسول قال اختارو الى نطفكم هل هي ستتفهمك اذا كنت في حاجة الى شخص يقف لصفك ويدعمك ام انها فقط وفقط تنتظر الدعم منك وعندما تراك في حال صعبة تتخلى عنك او تقف صامته نصيحة لك حاول تسمع محاضرات الدكتور جاسم المطوع ( الحب و الخطوبة) تقدر تشوفها في youtube يقدم في محاضراته اسس ونظريات وافكار رائعة لم تفكر فيها واذا اقتنعت انك ما زلت تحبها وتراها زوجة صالحة كلم اقرب شخص لك من العائلة وخذ منه النصيحة حاول توصل الى نفس البنت وشوف ايش مشاعرها فيك وهل تريدك زوجا ام انها غير مقتنعة واذا كانت موافقة عليك ابدا مشوارك مع امك حاول تقنعها بانها تحجزها لك على الاقل ويمكن تواجه منها معارضة او رفض حاول اكثر من مرة فيها ولا تياس فالامهات قلبهم رحيم وانشاء الله تتوفق لما يحبه الله ورسوله ولا تنسى قوله تعالى ( الطيبين للطيبات) |
اقتباس:
والله يا اخوي البنت كانت جالسة معانا اانا وخالتي والوالدة وكان هناك حديث ومن الحديث والنقاش اكتشفت اشياء مشتركة كثير بيننا غير كذا كنت اسأل خالتي اسألة بريئة عن البنت بدوون ما تحس بشيء و انا ياخوي لو مو مقدر معناة الزواج ما كان صابر للحين لاني عارف اني لازم اكون قد الكلام اللي قاعد اقوله لكن المشكلة اني ماني موظف توني طالب اخذ مصروفي وانا مستحي بعد من الوالد خل اقوله بخطب بفلوسه :17: بحس كانه هو اللي بيتزوج مو انا بعدين لو جا اطفال كيف بصرف عليهم بعدين ابو البنت لو جاه موظف راتب اوكي معاه بيت و جاه طالب توه يشوفه ورع من بيعطي اكيد يدور مستقبل بنته اما بالنسبة اني اكلم البنت مستحيل طبعا بنت خالتي موقف بيكون قمة في الاحراج و ما اخفيك اخوي اني خاف انصدم لو طلع انها ما تبغاني مع اني والله ما افكر الا فيها وانا في غربة و و و الله يا خوي اني اجلس بالساعات افكر كيف بحل المعادلات هذي المشكلة انها لا هي فيزياء ولا رياضيات ما لنا الا الصبر والله والدعاء دعواتك ربك يفرجها |
يارب يكتب لكم الخير ..
بس بعد لا تنسى " حبك الشئ يعمي و يصم " عندكم حد كبير في العايلة تقدر تستشيره في الموضوع و ممكن يساعدك ؟ |
سبحان الله ماحرم شئ الا لمنفعتنا
لا املك الا ان اقول لك ان كل ما انت فيه نتيجة التساهل في شرع الله وحل ما حرم وانت مقر بهذا تذكر ان رأيتك لها ورؤية ما جعلك ترغب فيها وانت في زيارة عادية جدآ لا تنوى منها الزواج او النظرة الشرعية امر محرم وحتى النظرة الشرعية التي امر بها الله لا يحل الا الوجه والكفين وان قال بعض العلماء وجزء بسيط بعد الكفين ولا ادرى صحة ذلك تماما فأنتم خالفتم امر الله وتركتم سنة نبينا واتبعتم سنة الغرب في الجلوس شباب وفتيات وربما كشفت عن بعض محاسنها او تساهلت في الحديث او رققت صوتها وحسنته او اظهرت صفات غير ماهي عليه حقيقة بغرض التجمل واظهار صورة كاملة مثالية عنها لشد الانباه واظهار المحاسن وهو ما حرمه الله لحكمة وما تعانيه يظهر عظمة هذه الحكمةوهي عفة الشباب ةالفتيات وحفظ الفرج والادهى ان الشيطان دخل لك من هذا الباب حتى في صلاتك نسأل الله السلامة والعافية فلم يعد هناك خشوع واصبح قلبك معلق بفتاة بدل التعلق بالله والشيطان يعظم لك الامر وان تركها سيؤدي لضياعك ونهايتك لانه بدء اول خطوة وهي عدم خشوعك في الصلاة فلن يتركك لانك حققت له ما يريد حتى ان رسولنا الكريم صلى الله عليه وسلم قال ان المرأة تقبل في هيئة شيطان انت تستطيع العيش بدونها بدليل انك كنت تعيش حياتك قبل ان تراها فكر ان حبك لها وتخيل محاسنها والتفكير الدائم بها امر محرم ستحاسب عليه واتجه لله ولاتمام علمك فمن يتقى الله يجعل له مخرجآ ويرزقه من حيث لا يحتسب وحينما يحين الوقت المناسب للاقتران يوفقك الله لانسانة تصون عرضك وتكون اهل لك هل فكرت كيف سيجيب الله دعائك وانت لا تخشع في صلاتك وقلبك معلق بشئ لا يحل لك الان ؟؟؟؟؟؟؟؟؟؟؟؟؟ |
وفقك الله اخوي ورزقك الزوجه الصالحه اللي تسعدك
انا حالتي كانت مثل حالتك بالضبط عندي بنت خالي اصغر مني بثلاث سنين ماشاءالله عليها يمكن ما ابالغ اذا قلت لك هي اجمل بنت شفتها بحياتي والاجمل منها كرم اخلاقها وطيبتها وخفة دمها .. والاجمل من هذا كله انها كانت صديقتي ايام الطفوله . وكانت تلعب معي وكثير ترتب اغراضي وتنظف غرفتي من غير ما اقولها. وكنت دايم اغششها بحل واجباتها من غير ما اهلها يعرفون بعد ما تغطت عني وصارت حرمه ولا اقدر اختلط معها. صرت احبها حب فوق الخيال.. الي درجه اني كنت احلم اني خطبتها ومرات احلم انها زوجتي يعني مستحيل اتخيل زوجه لي غيرها وكنت مثلك في بداية الجامعه يعني عايش على المصروف من ابوي اللي يجزاه خير ودايم خايف ان البنت يتزوجها غيري وكنت دايم ادعي ربي واستخير سبحان الله عدت الايام وانا ما زلت متعلق فيها . وكنت اقول مستحيل اخطبها او اعلقها فيني وانا توني ما عندي دخل خلال دراستي بالجامعه جاء واحد وخطبها. صراحه خفت مررهـ وضاق صدري بس وقتها صرت دايم ادعي ربي يختار الخيرهـ للبنت وادعي لها بالتوفيق والخيره وانها ما تتزوج الا الرجال اللي يسعدها . سواء كنت انا او غيري عدت الايام و وصلني خبـر موافقتها من هالرجال وموعد الملكه سبحان الله ضاقت بي الدنيا. لكن كل ما اتذكر انه ما راح يصير الا اللي كاتبه ربي . ارتاح شوي وافرحلها وبعد الملكه صرت ادعي ربي ان زوجها يسعدها ويستر عليها ويخاف ربه فيها مرت الايام وتزوجت البنت والحمد لله ربي رزقها بزوج قمه بالطيبه ودايم اقول ماشاءالله عليه رزقه ربي بأحسن البنات وهذا يدل على حسن نية الرجل. الله يوفقهم المهم عدت الايام والسنين . وتخرجت من الجامعه . والان صارلي سنتين متخرج وموظف وراتبي محترم الحمد لله والان امي وخواتي يدورون لي بنت الحلال .. وبنت خالي ما اذكرها الا بكل خير وادعي لها بالتوفيق .. وماشاءالله جاها بنت و ولـد يشبهون لها :) وعلى فكرهـ اكتشفت فيني شي .. اني كل ما اكبر كل ما صرت قنوع اكثر وما اتشرط كثير بالزوجه اهم شرط انها تكون اخلاقها عاليه وجمالها معقول .. يعني تسعدني بحياتي معها من زمان اول ما دخلت الجامعه كنت اذا شفت عشر بنات صغار ما تعجبني الا وحده بينهم .. كنت ادقق بالمواصفات الحين اذا شفت عشر بنات صغار كلهم يعجبوني. البيضاء والسمراء والسمينه والنحيفه.. كلهم يهبلون :) ما ادري بس اتوقع كل انسان اذا كبر تزداد قناعته وبنهاية السالفه ابي اوصلك اني انا الان مب نادم اني بنت خالي راحت .. لانه هذا اللي كاتبه ربي انت اهم شي استخير قبل ما تسوي اي خطوهـ بالتوفيق لك يارب .. وعقبال ما تنجح وتتخرج وتتزوج الله يوفقك اخوي |
بنت خالتك كم عمرها و باي مرحله دراسيه ؟؟ بعدين فيك تكلم امك و تقول لها عن مشاعرك تجاه البنت و خلها تجس نبض خالتك و شوف يقبلون ينتظرونك الي حد ما تتخرج ؟؟بشرط يكون الكلام سري للغايه و مو لازم يوصل الي الرجااال .. يعني الكلام بين الخوات قفط .. و كل وحده فيهم لازم تكون ستر و غطا على الثانيه .. طمنا عن اخر الاخبار .. بالتوفيق ان شاء الله .. |
احجز يعني اخطبها قبل ما تطير عليك وتندم وكمل دراستك
|
اقتباس:
بالنسبة لي ما ادري حاسس اني ما راح اتزوج اللي هذي البنت قصتك شبيها لي تقريبا ما لي الا الدعاء والله كل يوم ادعي ان ربي يكتبها لي لو فيها خير |
اقتباس:
بنت خالي في نفس عمري و هي الحين خلاص اخر سنة وباقي كم شهر وتتخرج اما انا تأخرت في الدراسة بسبب والدي الله يهديه وتوني سنة اولى مخلصها دخلت ثانية يعني حكاية حق 3 سنوات واتاخرج بالنسبة اني اكلم امي علاقتي مع الوالد والوالدة ليست مبنية على التكلم مع البعض يعني مشاكلي احلها بنفسي و كل شيء انا بروحي اسويه فصعبة جدا المشكلة اني كم مرة قلبي يقولي ارفع السماعه وكلم البنت وقولها اني احبها بس احس راح اسوي غلط فظيع الله كتب اني اتاخر كم سنة بس قلبي وش اسوي فيه |
اقتباس:
صعبة انا كتبت الموضوع بس حتى افرج همي لاني مو لاقي احد اشاركه في الهم الله المستعان العائلة كل واحد نفسي نفسي ربي لك الحمد بس |
عذرا اختي اميرات انا ضد رأيك تماما
يا أما يكون فيه ارتباط رسمي او ما يكون فيه ارتباط كلام الحريم في هالأمور مايجيب الا المشاكل الموضوع غير أي موضوع آخر لازم يكون فيه جديه أكثر حتى بين الاخوات والا بين الاخوان تفاديا للمشاكل وليه يكون سر مايدرون عنه الرجال نفرض ان الامهات اتفقو مثل ماقلتي وكتب الله وتقدم للبنت رجال كفو وعاجب والد البنت وش بيكون رد أم البنت صدقيني هالطريقه ما تجيب الا المشاكل سواء بين العائلتين أو بين الأم والأب وانت اخوي اشوف انك تفاتح امك بالموضوع مباشره وتبين لها مشاعرك للبنت ومانت خاسر شي ان وافقو اهلك وكلمو اهل البنت فهو الخيره لكم وان ما رضت فهو ايضا الخيره لكم وتوكل على الله مع الأخذ بالأسباب ولا تتوقع ردة فعلهم وانت ماجربت لان هذا الموضوع غير عن كل المواضيع وفي مجتمعنا اختي وخالتي وانا انخطبنا لفتره اقل شي 3 سنوات مع العلم ان هذا الشي مو بالعاده يصير عندنا لكن الي يخطبون رجال ينشرون ويكونون بمثل حالتك الي يدرس والي توه ماكون نفسه والحين كلنا متزوجين والحمدلله وما فيه احد مننا ندم على طول فترة الخطوبه وانت من موضوعك احس نيتك حسنه وضميرك حي وربي يعطي على قد النيه وكويس انك ماكلمت البنت خل موقفك سليم ولا تطيح في المحظور وخلك رجال بنفس كبيره الله يوفقك اخوي ويرزقك باللي تسعدك وتسعدها دنيا وآخره سواء بنت خالتك أو غيرها وبالنسبه للأخ البراء مااقول الا الله يرزقك بالبنت الطيبه مثلك وأحسن الي تسعدك وتسعدها دنيا وآخره ويرزقك بذريه طيبه مثل امهم وابوهم ويفرحك فيهم يارب والله من ردك احسك رجاااااااااااااال والله ونعممممممممممممم ولو عندي بنت عرضتها عليك :) الله يوفقكم أجمعين ويشفي مرضانا ومرضى المسلمين دعواتكم لابني بالشفاء العاجل |
كلن بيأخذ في الدنيآ نصيبه .. اذا كانت البنت لك صدقني قصر الزمن والا طال بتكون لك .. الحين كمل دراستك .. وتوظف .. بتقول احبها !! كلنا حبينا وصبرنا وراح هالحب مع الايام ..وهو شبه اعجاب يعني توك ماغطست بالحب .. اتمنى لك الخير .. وعساها تكون من نصيبك لو كانت خيره .. دمت بحفظ الرحمن .. |
اقتباس:
انا اتفق معاك تماما عشان كذا ما ابي ادخل امي في السالفة يا إني اكون رجال و اروح من عند الباب مثلي مثل غيري اما كلام الحريم بيجيب مشاكل والله يشفي ابنك ان شاءالله |
اقتباس:
المشكلة يا اختي الكريمة دراستي في الخارجي تضغط علي عاطفيا ومعنويا يعني انا اعرف ناس ماشين بالحرام خويات و سوالف الله لا يبلانا عشان كذا قاعد افكر في الحلال الزواج اما بالنسبة للحب فصدقني هناك قعدت سنتين واول ما رحت عانيت مع البنات لاني رايح مجتمع منفتح يعني البنت تسولف معاك مرات انجبر اني اسوي مشروع دراسي مع جروب فيه بنات وانا طالع من بيئة ما اعرف فيها بنات غير الوالدة و اخواتي فلا تتخيلي حجم الضغط الموجه لي اما بالنسبة للبنت فوالله والحق يقال هي كل ما اتمناه فيها و الله يكتب لي و يكتب لي اللي فيه الخير لو هي لي باخذها و لو مو لي ربي كاتبي لي شيء ثاني بسب حاليا شعوري نحوها من جد عجيب جدا مع اني شفت بنات كثير اما هذي ما ادري كيف ربي يسترنا برحمته بس جميعا شكرا لكي على المرور على مشكلتي |
اقتباس:
آصبرٍ .. صدقني ربي معك .. او على الاقل اخطبهآ .. سووا ملكه .. لحد ماتخلص هي وانت تخلص .. واذا اجبرتك الظروف اخذها معك للخارج .. وكملوا دراستكم سوا .. واذا تشوف انه صعب الارتباط بها حاليا .. فمالك الا ربك والدعاء والاستغفار .. باليوم استغفر 100 مره وبعدها اطلب من ربي طلب عسى ان يحققه لك .. حاول تشغل نفسك بقراءه قرأن تريح بالك .. سو لك مشروع ,او اي شي يرضه به ربك ويشغلك عن التفكير اللي بيخرب حتى مستواك الدراسي .. بتهمل بدراستك من كثر التفكير .. وصدقني صدقني صدقني .. قالوا هالكلام قبلي وبكرره لك لو هي لك ومن نصيبك وربي كاتب هالشي بتكون لك لك .. الحين حط كل تركيز على الدراسه والله يوفقك ويهنيك .. .. |
شنو المشكلة تخطبها مبدئيا وتنتظر حد ماتخلص دراستك كم هي الفترة اللي ممكن تبقى البنت بيها متعلقة يعني احسن ماتروح من ايدك وانت تحبها انت تقدم لخطبتها او خلي والدتك تفتح الموضوع مع خالتك مابيها شي
والله يقدملك اللي بيه الخير |
أكيد اذا هي ما عندها نفس المشاعر تجاهك فأنت لن ترضى الزواج بها
و لذلك عليك أن تعرف هل يمكن ان تقبل هي فيك أو لأ و ما في حدا ممكن يساعدك في هذا الشي إلا أمك أو أحد خواتك اذا عندك اخت كبيرة ممكن تحكو مع أم الفتاة و تعرف منهم هل يمكن ان ينتظروك او يقبلوا فيك على وضعك الحالي و لا لأ |
اقتباس:
|
اقتباس:
هذا اللي ابغى اتاكد منه الحين مشاعر البنت لانه لو البنت ما عندها مشاعر لي او ما تقبل في على الاقل ارتاح شوي و اترك الموضوع المشكلة ما عندي اخت كبيرة وصعبة اقول لامي اسألي البنت و الله قمة الاحراج والله احترت وش اسوي الموضوع معقد احس و عقدتكم معاي مشكورين كلكم على الردود و الاقتراحات لكن والله ما تنحل هذي ابد :( حتى انا عجزت |
حتى ولو كنت غير جاهز حاليا
اخطبــها بشكل رسمي وتوكل على الله .. واكمل دراستك ثم تزوجها الامر قد يكون عاديا بالنسبه لهم لكن انت متردد بشكل كبير... وان لم يوافقوا حاول ان يكـــون زواجكما مختصرا واطلب من ابيك المساعده.. وبين لاهلها انك متمسك بها وتريدها لك زوجه بشكل كبير.. لماذا تضيــع على نفسك فتاة بها جميع ماتريد!!!! |
ما قاله الأخوة و الأخوات مما سبق كله طيب و كله جميل.. و يبقى عليك أن تتخذ أنت الخطوة الأخيرة لتضع النقاط على الحروف و تعيد الأمور إلى نصابها.. و ذلك بأن: 1- تخبر أهلك و بالتحديد والدتك بحقيقة مشاعرك و رغبتك في تلك الفتاة و ذلك كي 2- تقوم الوالدة بمهمتها في جس النبض و معرفة رغبة تلك الفتاة فيك من عدمها 3- بناء على الخطوة رقم 2 يمكن الاستمرار في المشروع ( إن تأكدت والدتك أن الفتاة راغبة فيك أيضاً) أو التوقف عن المضي فيه (إن تأكدت الوالدة أيضاً أن الفتاة لا تفكر فيك على الإطلاق) 4- على افتراض أن الخطوة رقم 3 كانت محصلتها هو أن الفتاة راغبة فيك فهنا يتوجب عليك التقدم فوراً و بشكل رسمي لتوضيح الأمور بكل دقة من قبيل أنك لا تستطيع أن تتزوجها إلا بعد السنين التي ذكرتها في مطلع موضوعك.. 5- تطلب من أهل الفتاة إبداء رأيهم بكل وضوح في هذه النقطة: هل بإمكانهم أن يتفهموا و يقبلوا ثم يصبروا أم لا؟ 6- إن كانت الإجابة: بأنهم قد وافقوا على عرضك و حالتك التي ستبينها لهم بالتفصيل الممل ( وهو ما سنعده التزاماً شخصياً يكون موتك أهون من الغدر به).. فعليك أن تتقدم رسمياً و تخطبها.. أتمنى لك التوفيق و السعادة.. سلام |
عادي هي بنت خالتك
اخطبها وملك عليها ..والزواج بعديين اذا توظفت |
| الساعة الآن 12:47 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©