|
ماضي زوجي يلاحقني هل انا ظالمه ام مظلومه ( حُلت و لله الحمد )
السلام عليكم ورحمة الله وبركاته
بصراحه ما ادري من وين ابدأ احس اني ضايعه وقلت مالي غيركم افضفض لكم وتساعدوني وتوقفون معاي انا تزوجت وعمري 18 سنه وزوجي كان اول انسان بحياتي حبيته بجنون لدرجة اني نسيت نفسي وهو ماكان مقصر معاي بالرغم من عصبيته الزايده وانا بحكم سني وبيئتي كنت اجهل امور كثيره بس كان يحاول يتفهمني وبغرض اننا نمشي المركب ربي رزقني منه بنت وبعدها بفتره بسيطه حملت وجاتني البنت الثاني لب الموضوع هو الله يسامحه من فترة الملكه كانت وحده من صديقاتي تبيني لاخوها وخلاص عشمته وامها وابوها وكلهم موافقين تفاجات بخبر خطوبتي وملكتي وماتت قهر كنا مع بعض في يوم طلبت جوالي عشان تتصل بامها وكانت تبي تاخذ رقمه وبالفعل حصلت على رقمه واتصلت عليه وهو ماقصر مشى معاها فتره طويله وصار يراسلها بكلام بذيء وتعمقت العلاقه وفجأتني يوم بالرسايل وكانت مسجله صوته وسمعته انصدمت ومع ذلك استخرت واهلي وقفوا معاي وقالو هذي حاقده وانتي لا تاذينه لانك لسه مادخلتي بيته وسمعت كلامهم واقنتنعت فيه بعد ماتزوجته ولسه في الاربعين في اول مولوده لقيته يكلم وحده يعرفها من اول وقلت له وكان حريص على علاقتنا ووعدني انه راح ينهي كل شي و فعلا عمري مافكرت اذكره وعطيته الثقه من جديد مع اني من داخلي مازال جرحي ينزف بعد ثاني بنوته صارت بيننا مشكله هو من النوع العصبي جدا بالعربي يغسل شراعي وبقوه وما يحب ارد او ارفع صوتي هو بس يعني اكبت غضبي مع اني ساعات ارادد بس طوالي يكتمني رحت بيت اهله كم يوم اغير جو وعيت ارجع ابي ابعد شوي كان وقته يصل يهدد ويوعد وفعلا رجعت مجبوره ومقهوره وتصالحنا في البيت اكتشفت انه مطلع جوال ثاني ويراسل قنوات شات وكلام بذيء ويرقم وهلم جره ساعتها انجنيت طبعا السالفه الاولانيه زرعت فيني طبع التنبيش وصرت اشك فيه مشينا الموقف بعد نقاش ووعود بعدها بفتره سافر سفرة عمل ولقيته بعد مارجع مرسل رساله لوحده كاتب صباح الخيرات حبيت اطمنك اني وصلت بالسلامه لذلك لاتتصلين انا ادق عليك انهرت لما شفتها هزتني بقوه عرفت انه مدمن علاقات بالذات ان ماله علاقه معينه بوحده كل مره شكل عديت الموضوع برغبتي بعد صراع نفسي مرير ابي اشوف ايش تاليتها مع العلم اني احاول بقدر الامكان اني املى حياته وكل من شافني شهد لي باشياء كثير قطعت على نفسي عهد اني ابعد عن المشاكل واعيش بثقه وما ادور وراه فعلا عشت فتره مرتاحه جدا لاني ما انبش في اي شي يخصه بالصدفه تعطل لاب توبه واستخدم جهازي وانحفظت له محادثه مع وحده وكانت شايفه نفسها عليه وهو طايح ويرسل قبلات ويناديها سويتي وغيره قفلت الدنيا بوجهي وريته الجهاز وقلت له انا مادورت وراك هي جتني الى عندي وبعدين حسيت من جد اني اكرهه وقتها وقلت له الثقه معدومه مالي قعده حاول يلم الموضوع وحريص جدا اني اقعد معاه بس انا خلاص مافي ثقه صرت شكاكه بكل شي انهارت حياتنا الزوجيه وهو اللي دمرها مو انا ليته صارحني بشي يبيه فيني حتى لو كان صادق انا ما اصدقه ابي حياتي تمشي لاني لسه احبه بس كل شي محفور في ذاكرتي هو تغير صار دايم معاي ومهتم فيني ومايترك المسجد محتويني بكل شي ما شاء الله قريب مني بس انا الشيطان مو تاركني مو قادره انسى ماكنت اذكره باي شي ن الامور السابقه عكس الحين صارت هي مسيطره على تفكيري واتفه مشكله صرت اعيد له اخطاءه وماضيه اللي صار ماصرت اتقبل منه اي شي احس انس عايشه معاه بس امشي اموري وعشان بناتي فقط وساعات احس انس مازلت احبه ومع ذلك ما اتحمل يصرخ في وجهي اثور وانقلب وحده ثانيه اتوقع حبوب منع الحمل لها دور بعد بس ماضيه مسيطر علي البارح صارت مشكله انا غلطانه فيها ميه بالميه بس ماتحمل منه شي صرت دايم اكرر بوجه ما احبك اكرهك وانا اعنيها بوقتها ما ادري ايش اللي فيني بالضبط ابي حل لنفسي ابي انسى ماضيه لانه بجد تغير واتمنى انه يكون صادق ونفس الوقت احس اني مو قادره اعطيه فرصه خلاص بالذات انه صار يقولي دايما انتي انسانه مريضه يقصد بالشك طيب هو اللي جاب لي الشك والحين صار يعايرني فيه حياتنا على وشك انها تنتهي بالذات اني صرحت له باني اكرهه وقرى لي كذا شغله كنت كاتبه فيها اني اكرهه وما اطيق اعيش معاه وانا بنفسي مو عارفه هل هذي حقيقة مشاعري من ناحيته والا ردة فعل فكرنا جديا بالنفصال لكن بناتي مو قادره اعيش من غيرهم وهو عنيد اكيد بياخذهم مني دلوني الله يرضى عليكم سامحوني طولت عليكم واعذروني اذا في اخطاء في النص تم تعديل العنوان الإشراف |
للأسف ماعندي أي حل لك
لأن اللي تعانين منه أنا عانيته وللحين مشاعر الغضب تتملكني أحس أوقات إني أكرهه وأوقات لسه أحبه :( بس الفرق بينا أنه خطيبي مو زوجي ولما حسيت أن علاقتنا كل مالها وأسوأ لأني مو قادره أنسى اللي سواه ولأن ثقتي فيه وتسامحي خلاه يتمادى صرت على أتفه مشكله أذكره باللي راح ولا أقدر أتقبل منه أي شي ولا أي كلمه تركته بالرغم من إني لسه أحبه وفاقدته :( بس مافي شي قوي يربطنا ببعض لازواج ولا أطفال عشان أضطر أتحمل نصيحتي لك أصبري وأدعي ربي يهديه لأنك لو بعدتي عنه ماراح ترتاحي وبتندمي وبتشتاقين له :( خليك معاه والله يهديه ويصلح من شأنه حاولي تقوين الوازع الديني فيه لأن الرجال لو خوفه من ربه مامنعه يخون مافي شي صدقيني بيمنعه ويااارب يوفقك حبيبتي |
انا مالومك ... بس انا كان عندي امل ان مع الوقت الوحده ممكن تنسى او تتناسى وتعيش بسلام ...
انا نفس مشكلتك بس انا موخيانه ... تخيلي بعد عشرة 8 سنوات يمد ايده علي وقاللي كلام احس لو اعيش دهور ماراح انساه ... اللحين هو يحاول يكسبني بس انا موقادره ... احس اني مجروحه واحس ان في شي انكسر وموقادرة اصلحه ... احسك نفس مشكلتي بس الفرق بيننا سبب الانكسار ... |
مشكوره ضيعتني العاطفه وكويس منك انك تركتيه من البدايه والله يعوضك
وانتي ابل قرين انكسار الزوجه مو شي سهل بالذات الخيانه هي طعنه بخنجر سام في ظهر الزوجه والسم كل ماله ينتشر من غير ماتحس الوحده الا متأخر اشكر مروركم ادعولي |
شفتي اختي اللي تكون قوية وتبين قوتها تخلي زوجها هو اللي يخاف ويراجع نفسه ويصلح اخطاؤه انتي سويتي الصح وصحيتي من ضعفك اللي خلاه في البداية يتمادى لكن لما حس انه بيخسرك صحي وفاق ...
نصيحتي لك الحين اهدي وحاولي انك ترجعي لزوجك زي اول بس بالتدريج مو مرة وحدة واجلسي معاه وقولي له شوف انا ماضيك راح اتناساه لكن ماراح انساه نهائيا بس تحمل لين ارجع لك زي اول لان جرحي لسه ينزف اذا تبغى معاملتي لك ترجع لك زي اول واحسن اصبر لين يبرى جرحي بس هذه اخر فرصة اعطيك هي اذا حاولت او رجعت ونكفت جرحي صدقني راح تكون اخر مرة تشوفني فيها يوم ما اكشفك وانسى وحدة اسمها (.....) مفهووووووووم وبناتي لهم رب يرعاهم .... خليك حازمة وقوية في كلامك عشان يخاف ,,,, وانتي اختي مادام اه تعدل خلاااااااااااص انسي انا متاكدة انك ماراح تنسي بس حاولي احمدي الله واشكريه ان زوجك رجع عن تصرفاته حاولي اختي عشان بناتك وابداااااااااااااا لاعاد تذكريه بالماضي لان الظاهر ان زوجك شمالي تذكريه بالماضي يحننه له بالعكس جددي في نفسك وفي حياتك وخليك له كل شي كوني له زوجه وحبيبة وعشيقة وصديقة وحتى ام واخت كمان لاتخلي يدور على وحدة فيهم برى اي وحدة يحتاج لها يلقاها فيك انتي فاااااااااااااااهمة ... وعشان ترتاحي اكثر لاتنسي الصلاة اخر الليل والدعاء والاستغفار ورددي(اللهم سخر لي زوجي واجعله سكنا لي وسخرني له واجعلني سكنا له واجعل بيننا مودة ورحمة ) |
الله يعينك يا اختي
لكن دام تقولين انه فعلا تغير هذه المره أعتقد يحتاج فرصه واحتسبي الأجر هو صعب عليك لأنه النفس اكسرت والقلب انجرح لكن استعيني بالله وربي إن شاء الله بيغير حياتكم للأفضل ولا عاد تقولين له أكرهك وما أطيقك كذا أكثر بتحسين نفسك تكرهينه وما تبينه وكلما حسيتي بهذا الشعور تذكري الله وتذكري مغفرته لعباده وكرمه ولطفه والأجر اللي بتحصلين عليه من احتسابك لكتم غيظك الله يسخركم لبعض |
اختي العزيزة فعلا مشكلتك عويصة جدا وقد صارت من مشاكل عصرنا
نصيحتي لك أن لا تتسرعي ولا تطلبي الطلاق بل تروي وحاولي مراجعة اسلوب حياتك معه والوقوف على النقائص ومحاولة تلافيها وتساءلي لماذا يلهث زوجك وراء الاخريات ربما تكونين منشغلة عنه بالبنوتات حفظهم الله والرجل حينها يشعر بالغيرة ويبحث عمن يدلله حاولي ايضا الاهتمام بمظهرك ومفاجأته بسهرات رومنسية بالبيت. واحرصي دوما على ان يشاهد معك بعض البرامج الدينية وهي عموما تتطرق الى مثل هذه المواضيع. شغلي القرآن في بيتك وخاصة سورة البقرة واقترحي على زوجك ان تجريا منافسة حول حفظ القرآن الكريم وبالتالي يكون ربحك مضاعفا دينا ودنيا. اختي العزيزة الحلول كثيرة فلا تيأسي وثابري وبحول الله ستحضين بالزوج المحب الرائع |
حبيبتي ما لك إلا بيتك .. حتى لو وصلت العلاقه لدرجة النفصال الروحي و الجسدي ... عشان بناتك ..
هدي بالك و اكثري من الدعاء له و لك بالهداية و التسخير و الألفة .. الله يهدي سرك و يريح بالك و يفرج همك .. بالتوفيق |
معلش اللي فيه طبع ما بيغيرو
وهو في بعض الاحيان ما بيكون انو في تقصير منك لانو في رجال زوجة واحدة لا تكفي بعين الله شو بدك تعملي اصبري بركن هو يوم يحس و يبطل علاقتو اقعدو معو وفهميه انو انتي حترجعي الثقة فيه هو كمان لازم يساعدك بهيك يعني مش معقول انا اثق فيك وانتا تخوني ويا رب يتصلح حالو بس هاي مشكلة كتير منتشرة في ناس بتقدر تتحمل وفي ناس بتطنش وبتعيش زناس بتترك الله يستر علينا |
اقتباس:
وانا ماصرت اذكره بماضيه الا لانه صار عالق بذاكرتي ومو قادره انساه وبالفعل حاسه اني بايعته وهو كمان حس بكذا الله يكتب اللي فيه خير صعبه كسرة النفس |
colorsاشكر لك مرورك وادعي لي ياقلبي
|
عزيزتي يورنا اتمنى انه يتغير لكن ابو طبيع مايجوز عن طبعه
نورا ماودي بالطلاق عشان بناتي لكن مافيه حل وانا بعد الطلاق صعب علي بس من جد مافي حل حبيبي دوما اشكرك وادعي لي |
انتي ماتكرهينه انتي تكرهين تصرفاته وخياناته
قوليله خاف الله عندك بنات مثل ماتسوى ابنات الناس الله يوريك في بناتك وعندي رأي ثاني بس ما اتوقع انه راح يعجبج لاني انا بعد مو عاجبني لكني ساعات اقولها لزوجي وهذا شرع الله مانحرمه مع انه صعب لكن الخيانه اصعب بكثييييييييير اذا كنت انا موتارسه عينك ونفسك تبي بعد بنات هذا حقك لكن اخذه بالشرع مو بالخيانه اقدر اخطبلك اللي تبيها بس لاتخووون أسأل الله العظيم أن يألف بين قلوبكم ويبعد الشيطان عنكم ويسعدكم ويهنيكم ويحفظ بناتكم من كل شر ويستركم فوق الارض وتحت الارض ويوم العرض الله يهدي زوجك ان شاء الله ,, |
الله يخرب بيتهم مثل ما يحاولون يخربون بيوتنا :(
لو الحريم محترمات انفسهم وما يسون علاقات مع كل من هب ودب ماصارت كل ها المشاكل والرجال يظنون انا اذا تزوجونا ملكونا بسوون اي شي ويظنون انا بنركض لهم ركض علشان رضاهم :( والل هما عندي نصيحة لج اختي غير انج تصبرين وابلعي غيظج ولا تقعدين اذكرينه بأخطاءه لأنه لو قعدت كل دقيقة وذكرتيه باللي سوا بيطفر وبكون اللي سواه شي عادي جدا كوني حكيمة ورزينة واصبري ربي العزيز وضع الصبر في الحرمة والحيلة بعد فتسلحي بالصبر والحيلة وخذيه بهدوء بس لا تعطيه وجه مثل اول لكن بعد لا تقطعين علاقتج به الله يعينج اختي بس لا تنسين الزمن كفيل انه يصلح اللي انكسر صدقيني لو بعد سنوات |
لي عوده اختي مس فاربي .. |
الله يهديه وييرجعه لصوابه...........اصبري وادعي له وان شاء الله ماراح يضيع ربي صبرك بس نصيحه لا تكوني ضعيفه خليه يحس بخطأه ويعرف قيمتك |
سبحان الله اشكر لك مرورك وفعلا انا ما اكرهه لشخصه اكره تصرفاته اللي ماتنطاق
عزيزتي غارقه في همي امين الله يقطع نصيبهم ويخرب بيوتهم مثل ماهم يخربون بيوتنا حسبي الله ونعم الوكيل عزيزتي اميرات في انتظار ابداعك |
كيكه فراوله مشكوره يالغاليه وربي يسمع منك امين
|
يا أختي ...00 لقد إكتشفت خيانته منذ البداية (الملكة ) ومع ذلك تزوجتيه
طب ماذا تنتظربن منه الله يهديه ويهدي جميع المسلمين |
إلزمي ذكر الله والإستغفار والدعاء له بالثبات ولاترددي كلمة أكرهك بل أذكري محاسنه والأيام الجميله معاه حافظي على بيتك من أجل بناتك أسال الله أن يتمم عليكم نعمة الإستقرار |
الله يصلح الأحوال...........
ياأختي هذا الشيطان يبغى يخرب حياتكم ..... تعوذي بالله منه ........... واسعي إن حياتك تكون مثالية ............ وابدئي صفحة جديدة .......... الله يعينك |
الله يصلح حالكم ويوفق بينكم على خير
ويخزي الشيطان اللهم امييين |
كان الله في عونك اختي مس فرابي .. الاخوه ما شاء الله كفو و فوا ... بس واضح انك لسه ما سامحتي زوجك ..قدر ما نتسامح تكون الحياة أجمل.. التسامح مبادرة ليست من أجل الآخرين فقط .. بل من أجل أنفسنا.. لأننا حينما نتسامح نسمو ونتصالح مع ذواتنا.. التسامح فن يكتسب مع التعود والإرادة .. ويجعلنا أكثر تفاؤلا في الحياة .. وأكثر تقبلا للآخرين. التسامح دلالة قوة وثقة .. وليس مؤشرا للضعف والسذاجة... نحن نتسامح لأننا كبار من داخلنا.. اختي مس فرابي احيانا تمر علينا مشاكل تظل محفوره في ذاكرتنا و في وجداننا و في قلوبنا و تسيطر على تفكيرنا و تكدر صفو عيشنا بل تؤثر تأثير سلبي على مسيرة حياتنا .. و لا نستطيع ان نتجاوزها بمفردنا .. لابد لنا من يد تعيننا على تجاوز هذه الازمه بعد الله سبحانه و تعالى .. اختي اذا كنت تعتقدين ان حياتك راح تتدمر بسبب الشك انصحك انك تزوري معالج نفسي عشان يساعدك على تجاوز هذه الازمه فهؤلاء المتختصين لهم طرقهم الخاصه و في جلسات خاصه تجعلك تتخطين هذه الصعاب و تعودي الي حياتك الطبيعيه .. بالتوفيق ان شاء الله .. |
اشكركم اخواني واخواتي في المنتدى لكن فعلا اشعر باحباط شديد ونفسي اني اتسامح مع نفسي مثل ماقالت الاخت اميرات وفعلا الشك لاعب فيني مو قادره اثق باي رجل شوفوا كمان المشاكل اللي في المنتدى كل وحده تصيح من جهه
الله يعين |
حصلت اليوم تطورات كبيره في الموضوع
حسيت انه يبي يتقرب مني وانا بصراحه ودي بقربه لكني مشحونه منه قررت اني اتكلم معاه بصراحه وقلت له في جو هادي جدا حبيبي فلان انا ما اقدر اكذب عليك ولا ابي اظلمك انا تعبت بصراحه انا صحيح سامحت وعطيتك الثقه من جديد لكن من داخلي جرحي ينزف ومو قادره انسى ابدا ابيك تساعدني اني انسى انا ابي انسى تعبت من الشي هذا والتفكير فيه ردات فعلي معاك على شغلات تافهه تكون قاسيه بسبب هالذكرى الاليمه انا وانت كان همنا اننا نقفل الموضوع هذيك الايام لاننا تعبنا من البعد ودفناه بطريقه غلط لدرجة انه مازال يألمني كثير مابي اوصل مرحله اني اشك بكل شي انا تعبت ابي الراحه لي ولك ابي اقفل الموضوع هذا مهما كلفني حتى لو كلفني حياتي معاك ماعندي مشكله ابي ارتاح باي شكل من الضغط والشحن النفسي المرير وفي نفس الوقت ابيك تاخذ بيدي وتساعدني اذا انت مهتم فيني من جد الله يهديه اخذ بعضه ومشي ودخل مود المظلوم والمكتئب هذا مو حل لازم نواجه المشكله مع بعض عشان ندفنها صح من جد محتاره لا تبخلون علي بردودكم او على الاقل دعوه لاختكم بظهر الغيب اخت اميرات يهمني ردك بعد |
خلاص اختي اكيد هو حس بغلطه وكويس منك انك صارحتيه باللي في قلبك هذا راح يريحه شوي ...
لكن لاتزيدي في انفعالاتك لانه اي ردة فعل منك بزعل وانفعال بتفكره بالموضوع وراح تبقى كابوس في حياتكم وممكن تنقلب حياتكم مشاكل ونكد .. تعوذي من ابليس وخلاص انسي او تناسي(لان الخيانة ماتنسي بسهولة) ربك غفور رحيم ,,, وانتي اغفري له غلطه وارحميه من غضبك مادام تعدل وحسن تصرفاته الدنيا ماتسوى واذا مل الرجال من كثر النكد يهرب من البيت ويمكن تجبريه يرجع لافعاله مرة ثانية اذا كان ايمانه ضعيف ,,, |
اختي مس فرابي خير ما فعلتي انك صارحتي زوجك بكل ما في داخلك .. لكن يا عزيزتي ارجع و اقول لك اذا الشك لا زال يضايقك و ينعكس على ردات فعلك و تصرفاتك مع زوجك لازم تزوري معالج نفسي ممتاز عشان يساعدك على تجاوز هذه الازمه لان من الصعب جدا انك تتخطيها لحالك .. صارحي زوجك بانك محتاجه لمعالج نفسي اكيد راح يتفهم وضعك .. بالتوفيق ان شاء الله .. |
اشكركم كثير ماقصرتوا
عزيزتي جناين ورد بالفعل هذا اللي سويته خفت اني ازيدها ويهرب انا وصلت للي ابيه وصارحته وابدى اسفه وحلف لي ان ثقتي في محلها غاليتي اميرات تصالحت انا وياه ولله الحمد وراح اروح لمعالج نفسي لاني فعلا محتاجه بالذات انه كرر خياناته معاي كذا مره الله يسامحه ودعواتكم لي ولكل اخت تعاني مع زوجها ان الله يسر لها ان شاء الله |
اقتباس:
نسخه للمشاكل المحلوله |
ربي يفرّج همك و ييسر لك امرك و يريّح لك بالك و يسعدك .. |
مايلام الرجال بهل الوقت المعاكسات كثيييييييييييييره ..
خاصةٌ اللي متزوج عربجيه يموووت بالحناان ويدوره مع نسمة الريح ... ولكن بالاخير خطأ الرجل يعد ذنب .. وتاب منه .. ان شاء لله وصدقووني الصبر زين والعشرة ما تهوووووووووووووووووون ... |
الياس الروح ومن قالك اني عربجيه بالعكس كل اللي يتمناه وزد الا من الفضاوه الزايده والعين الفارغه وقلة الدين بقلوب الرجال
|
يغلق
|
| الساعة الآن 07:25 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©