|
مهري 150 الف ووصلوه الى 80 الف هل ارفض العريس؟
السلام عليكم شباب وبنوتات
بصراحه انا عجبني هل منتدى وايد لاني لقيت فيه روح المحبه والاخوه واتمنى تساعدوني في مشكلتييييي وحيرتييييييي بصراحه انا ملكتي قريب بس قبل الملكه جو يبون يحددون معانا اهل المعرس المهر والقاعه وجذي علشان مانختلف بعدين ويشوفون اذا قابلين ولالا وبصراحه الرجال محترم وخايف ربه يعني احس ان طيب وايد بس احس اني مب مرتاحه حق اهله مادري ليش بس بعد اقول اني راح اعيش مع الرجال حتى لو معاي اهله بحاول اني اتئقلم معاهم المهم ان يوم جويبون يحددون المهر احنا شروطنا ان يكون المهر 150000 مع العلم ان هاي مهرنا الطبيعي حق كل بنت من عائلتنا بس يوم حسينا ان الرجال زين واهله على قد حالهم قلنا معليه بنخليه 120 الف بعد قالوو لا صعبه لان هل ايام كل شي غالي قامت امي قالت اوكي 100 وافقو على هاي الشي بس اختارولي قاعه موب شي يعني حدها رخيصه ومب عن الثمن يعني الصوت الوسع كل شي مب زين فيهاا ومحد مدحهاا قلت مستحيل اقبل في هذي القاعه وبعدين انا ابي قاعه تكون في فندق على اساس ان لما اخلص العرس اطلع فووق في الغرفه اسهل حق كل عروس قالو اوكي بس يكون المهر 80 وانا محتاااااااره ماعرف شاسوي انا قلت لااااا والريال قال انا بتناقش مع هلي وبرد لكم الخبر بكره انا رفضت لان كل شي غالي هل ايام و80 ماتكفي حق اغراضي انا محتااااااره مادري ارفض الرجال او ولااا استخرت وكل شي بس بعد محتااااره وبكره الرد بيوصل الرجال قال بتفاهم مع هلي لاني للحين ماعرف انهم نزلو بالمهر ولا اعرف بشي يوم كلمه الوالد مادري اذا قال ان 80 اوافق ولالااااااااااااا تكفون انصحوووووني انا مب عارفه شاسوووووووي انتظرررررر ردكم تم تعديل العنوان |
اقتباس:
لاتضيقي على زوجك فقد ياتيك من يعطيك مهر 150 الف ولاترتاحي لها نفسيا مادمت راضيه بهذا الزوج فلا تكثري عليه الطلبات بصراحه كنت اظن صالة الزواج عليكم ضمن المهر لكن مهر مبالغ فيه وتشترطين فندق لقد ضيقتي على زوجك واهله فكل عائله ولها تقاليدها وقد يكونوا تفاجوا بطلبكم هذا المهر |
اذا جاءكم من ترضون دينه وخلقه فزوجوه
الماده مهمه بس الاهم معدن الرجل وكمان اشوف اذا وافق على تغير الصاله خلاص ارضي بالمهر الي يقرره وصدقيني الزواج كلها ليله وتعدي اهم شي يكون مكان كويس ونصيحه لك في كل امور حياتك ((وحفلة زواجك ))ارضي الله يرضى الله عنك ويرضي الناس عليك ولاتطلبي رضى الناس بسخط الله الله يكتب لك الي فيه خير لك ويسر اموركم ويتتم لكم على خير |
انتي تقصدين مائه وخمسين الف انا اغمض وفتح مني مصدقه هذاحرررررررررررررررررررررررررررررررام غيرك في مجاعات ويش ذا البذخ احنا مهورنا 20 30 40 الف صدقيني هذا منكر ولاتنسين قول الحبيب المصطفى صلى الله عليه وسلم(افضل النساء ايسرهن مؤنه)
ومين احسن من بنت الرسول وسألي عن مهرها وضن كلنا ذنوب ومانستحق بعدها شيء تقبلي مروري وآسفه اخذني الخوف عليك من الله |
غاليتي اذا كنتي راح تهتمين بالشكليات وابي قصر كبير ،، ابي وابي فماراح تخلصين من المشاكل الرسول يقول اذا جاءكم من ترضون دينه وخلقه فزوجوه ،،،
وبعدين 80 الف ماشاء الله نعمه وخير من ربك غيرك مهورهم وبدون مبالغه ال 15 الفمااقولك انها تكفي ل او ل ولكن والحمد لله عايشين افضل عيشه ومتهنين اذا كان الشخص اللي بياخذك اخلاقه تمام والحمد لله واستخرتي وارتحتي للشخص ذاته فلا تحطين هالامور عائق بينكم لانك بتتعبين اولا واخيرا غير كذا لما توافقين على هالمهر ولو باقل منه بيكون لك مكانه وتقدير في نظر زوجك ،، راي والقرار اولا واخيرا بيدك،، موفقه اوخيه . |
حبيبتي لايهمك المهر وكلام الناس عن القاعه آهم شيء الرجل وآخلاقه وآستخيري الله وفكري زين ..
|
الله يوفقك
انتي موا سلعة للبيع المهم الرجال اخلاق |
أختى اهم شىء اخلاق الرجل وكيف سيكرمك ويعاملك ولا تنسى قول الرسول الكريم صلى الله عليه وسلم أقلن مؤنه (مهرا) أكثرهن بركة او كما قال عليه الصلاة والسلام وتذكرى قصة أمير المؤمنين عمر بن الخطاب رضى الله عنه وبائعة اللبن وكيف انه زوجها الى ابنه وقال الى ابناءه اذا لم يقبل بها احد منكم تزوجتها انا وكان من ثمار هذا الزواج المبارك خامس الخلفاء الراشدين عمر بن عبد العزيز راضى الله عنه أختى اتقى فى نفسك ولا تجعلى المال هو الفيصل فى علاقة أهم اركانها المؤدة والرحمة وفقك الله لما يحب ويرضى |
نعم كما قالوا الاخوات و خافي من الله اذا رفضتيه لهذا السبب فهذا ليس سببا شرعيا.. انت صغيرة و تريدين ان تشتري اشياء كثيرة و جميلة ولكن والله مش بكم المال ولاكن بالبركة التي في المال... و موضوع العرس يمكنك ان تبحثوا عن فندق و سعره هين... و الرجل باين عليه انه طيب و يريد اسعادك فهذا بكنوزز الدنيا كلها و بارك الله لك...:14:
|
إذا كنتي تريدين صالة افراح فخمة وراقية
تنازلي عن المهر المرتفع (عشان خطيبج المسكين) او العكس , إذا كنت تريدين المهر ,, تنازلي عن الصالة الفخمة .. يجب أن تتنازلي عن شيء ,,, ما يصير اثنينهم بالعكس هذا بصير زوجج بالمستقبل المفروض تراعينه وتتفهمين ضروفه .. وخصوصاً إنه داش مخج ومرتاحة له ... يعني مو معقولة ترفضين الخاطب عشان صالة والا مهر !! ماتحسينه سبب مضحك ؟ (عذراً) اتمنى أن تكون نظرتك أكثر بعداً يعني لا تفكرين بس بـ يوم (الزواج والحفلة والصالة والخ..) فكري ما بعد الصالة والزواج والكشخة والخ ... يعني تفضلين تعيشين براحة وبعيداً عن الديون ؟ والا تحبين تعيشين مع زوج مهموم بالديون الي فوق راسه ؟؟ |
وربي لو ما خلق الله الا أنت .. ما أدفع هذا المهر .. كسر ظهر .. وزوال بركه .. وفي الأخير ماذا ؟
أختي الفاضلة .. لا تجعلي من نفسك سلعة تباع وتشترى .. لكن ما أدري هذا العريس كيف يفكر ؟ |
يعطيكم العافيه على ردودكم الي ريحة قلبي يمكن لاني اول مره انحط في هذا الوضع وتدرون ان كل من حولي يقولي ان 80 ماتكفي ومادري ايش يعني انا ماعرف بس طمنتوني وان شاء الله بستخير وارد على الرجال بالموافقه وتسلمووون ويجزاكم الله كل خيــر
|
من جدك انتي وله تمزحين ؟؟؟؟
من زمان الناس بطلت هالمهور .... انا ثمانين اشوفها كثير مرة والمفروض العرس عليكم موتتشرطون بالقاعه بعد ... وياحليله زوجك بعد بيشاور اهله ؟؟؟ انا لومنه ماشاورت وش هذا في سوم بالمهر ؟؟؟ الله يهديكي وافقي واحمدي ربك والله غيرك 30 الف والعرس عليهم ... الناس تشتري رجال. |
اشوا اني منب من عايلتكم
مع احترامي |
ليش ياقلبي وأذا ترا المهر مو دليل على قيمة البنت يعني لاتقيمين نفسك بفلوس
أنا مهري 30ألف و الحمد لله يكفي وزيادة أهم شي القناعة .. |
لماذا غلاء المهور ؟؟؟؟؟؟
|
طيّب ممكن نسأل .. إيش اللي بعد 80 أو 150 يعني ريال ولا عملة ثانية ؟؟ ما أتوقع ريال !! |
معقولة
أختي يمكن أنتي مو عارفة كيفية غلاء الأسعار و كيف ان الرجل يتعب و يكد علشان يطلع راتبه لاتجعلي المظاهر تستحوذ على تفكيرك و حاولي تنسقي أمورك و أمور عرسك بالتوفير و بالشيء الطيب و الأرخص لأن يبدو أن من قال لك ان 80 ما تكفي يدور على الغالي بس ترى والله حرام , ليلة وحدة اصرف عليها و تزول البركة و اكسر ظهر زوجي ما تسوى بعد لو تققلي مهرك , أحسن موب استرخاص في نفسك و العياذ بالله بس رغبة في البركة و ان تبدأ حياة زوجك من غر ديوووون و يحس بقيمتك الحقيقية , في سمو نفسك وعدم اهتمامك بسفاسف الأمور الحمد لله أنا مهري قليل و في ترتيبات عرسي دورت على الزين و غير المُبالغ فيه انتقدني بعض القريبات اللي يحبون الفشخرة الزايدة و البعض أثنى علي و في النهاية كنت في غاااية الرضا عن نفسي و الحمد لله و رضا الناس غاية لاتدرك الأهم الآن هو رضا الله و التبذير و الإسراف غير مقبوول بتاتا وضعي نفسك امام زوجك تحياتي ام فاطمة |
اختي وحبيبتي في الله ....
الرجال في هذا الزمان عملة نادرة الوجود...... إن طالبتيه اليوم بهذا المهر المرتفع فغداً ستدفعين الثمن ..... أتقي الله يجعل لك مخرجا ويرزقك من حيث لاتحتسبين .... أنا بالذات مهري 30 ..... بدون شروط ...... وبنت عني مهرها والله اللذي لاإله إلاهو 10 الأف ..... وبنات عمي الكبير كلهن يأخذ عمي نصف مهورهن وريرجعها الى رجالهن قبل الدخله ويعوض بناته بالمبلغ لقدرته الماليه الكبيره ...... أسئل الله بمنه وكرمه أن يلهمك الصواب ..... أختي في الله ... |
اشكركم خواتي واخواني على ردودكم وتعاونكم معاااااااااي بصراحه احنا بالدوحه شي الاغلبيه ياخذون 100 الف ويقولون اذا ولد عمها يعطيهاا 60 او 70 الف علشان جذي انتو شايفيني ابالغ لان وصلت الرواتب عندنا 30 او 50 الف والي قبل لايتخرج من الثانوي يشتغل بالعسكريه اقل شي ياخذ 15 الف او 16 وبعد الزواج ياخذ 25 الف واذا متخرج ياخذ اعلى فالمهور عندنا غاليه بس انا باخذ على شوركم وان شاء الله بكره اقول الموافقه واتوكل على الله ودعواتكم لييي واسمحولي على الاطااااااله يالغاليييييييين والله يوفقكم ان شاء الله
|
انا في البداية تفاجأت لكن اذا رواتبكم كذااا والمهور متعارف عليها كذا عندكم
مافية مشكلة يجمع ثلاث روااتب ويعطيكي يااهم احسن من اللعب فيهاا يااعيني علينا الي رواتبهم اذا وصلت مررة مرررة 10 الاف كل النااس حسدوهم عليهااا وكأنها مليوووووون الله يوفقك ويكتبلك الي فية الخير |
اقتباس:
ههههه والله انك صادق |
السلام عليكم ورحمة الله وبركاته .. سبحان الله والله من قريت موضوعج حسيت انج من قطر ..
والله الصراحة انا اشوف اذا الولد يستاهل وخلوق ودين .. فممكن ترضين بالمهر 80 الف .. انا عرسي قبل 4 سنوات وكان مهري 80 مع اني ماشترطت لكن هم قالوا انهم بيعطون 80 .. والله المهر ايطييير طيراااان .. لكن صدقيني اذا اول ماستلمتي مهرج وكتبتي الاشياء الضروريه وقسمتي كل مبلغ واش بتشترين فيه صدقيني بيكفي وبيزيد .. اختي دايمند واخوي في الله .. لا تستانسون على معاشاتنا .. ترى الراتب يرتفع من صوب .. الاسعار تصير الدبل من الصوب الثاني .. ابسط مثال ,, العبايه اللي مافي بنت تقدر تستغنى عنها .. سادة بدووون شي وفي الاسواق العاديه مش المولات او الماركات ارخص تلاقيها 200 او 300 .. مستحيييل اقل .. هذا اذا مب اكثر .. بالله عليكم العروس اللي تبي تسوي لها عباة كشخه حق زيارات ... بكم بتصير وكم وحده بتسوي ؟؟؟ الله يعيين بس .. اختي الغاليه . انا اقول لج استخيري وتوكلي على الله اذا الله الريال خلووق وفيه خير ... ومثل ماقلت لج قسمي المهر على اولوياتج .. ولا تشترين واايد ثياب .. لانه مابيتمون عندح وايد واكيد تبين تشترين غيرهم عقب فتره اهم شي لا تفسفيين فلوسج ع الخرابيط .. ولا تنسيين تتبرعين بمبلغ منهم :) اختج ام فطومه :) |
الله يهديكم بس ادعي الله كثبرا واستخيري والخيره فيما اختاره الله |
اختي الكريمة ,,
المهر مبلغ رمزي لاثبات الجدية في الزواج و لمساعدة الفتاة في شراء بعض حاجيات الزواج ,, عمر المهر ما كان قيمة للفتاة و الا في هذه الحالة تصبح الفتاة مثلها مثل اي بضاعة تباع و تشترى ,, و زوجك كما ذكرتي لن يتكفل بالمهر فقط بل سيتكفل بالعرس و السكن و شهر العسل ...الخ و كل هذه الأمور تتطلب مبالغ طائلة منه !! اما كون خطيبك راتبه مرتفع فلا يعني ذلك انه مرتاح مادياً فقد تكون عليه التزامات او ديون لا يعلمها الا الله ,,, |
,
, كوني لزوجك معينه له على الإحصان واقبلي بالقليل فالمظاهر يا أختي لن تنفعك النساء الآن يأخذون أغلى الصالات من أجل الفخشرة وفي الآخر إما تطلع معيونه قد أصابتها العين أو تخرج وفلانة مب عاجبها البوفيه وفلانه تعلق على النفنوف حق العروس وانه مو حلو وكلام وكلام وكلام كثير وفي الأخير الزوج هو الي ماكلها بالديون والعفسة بالله عليكِ كيف سيحب رجل إمرأة أثقلت كاهله بالديون وجعلته يسدد لفلان وفلان ..!! , , |
تفكيرك عين العقل ......
والحمدالله اللذي اعادك الى صوابك ..... وأسئله بمنة وكرمة أن يوفقك ويحميك من شر حاسد اذا حسد ...... ويكتب لك الخيرة اينما كانت.... |
من اول ما قريت العنوان توقعتج قطريه
انا عن نفسي كان مهري 100 و لا شرطت و لا شي اغلب الناس مهورهم 100 و في ناس 80 و في ناس يشرطون 200 بس سبحان الله الله ما يوفقهم انصحج انج ترضين بالمهر اللي بيعطونج اياه 80 اوكي بس مب اقل لان و الله كل شي غالي انا مهري 100 و القاعه و كل شي على المعرس و بعد ما كفى المهر و زدنا عليه 100 عشان اخلص اغراضي بس نصيحه لا تكثرين من الثياب و العبايات لان معظم البنات يمتنون بعد الزواج و بيتغير مقاسج فحرام و العبايات بعد كل يوم في شكل يديد انا سويت لي عبايات وااايد عالفاضي بعد عرسي ب3 شهور يات موضة الملون و الفصوص فعباياتي صارت موضتهم قديمه (و كنت مسويه عند المتحجبه العبايه الوحده ب2000 او 2000 و شي) و الله حرام و الفساتين لا تكثرين خذي لج للهديه و للصباحيه و فستان ناعم احتياط و خذي الاولويات مثل ما قالت لج الاخت حاملة الهم و اذا انتي موظفه ممكن تزيدين من عندج و تخلصين شغلج انا كنت طالبه يوم اتزوج فالاهل الله يخليهم زادوا من عندهم و الله يوفقج |
ايييي والله كل شي غااااااالي عندنااااا بس انا طالبه وان شاء الله ابوووووووووووي وامي مب مقصرين قالولي انهم بيعينوني لو نقصني شيييي وانا وافقت وان شاء الله الملجه بعد كم يووم والعرس شهر 2 الله يوفقكم على تعاونكم ويااااااي وشاكره لكممممممممممم ردودكمممممممم :) وتعاونكم ونصيحتكممممم لي
|
الله يوفقج حبيبتي
عاااااد اعزمينا :d و لا تقطعين المنتدى ترى وااايد بيفيدج انا من اول ما تزوجت لين الحين ادمان عليه :22: |
ياجماعه البنت من قطر عندهم اقل شاب راتبه 20 الف ريال علشان كذا مهورهم عاليه
حنا بالسعوديه نفس هالشاب راتبه الفين ريال وطبعا بالتالي المهور المعقوله عندنا 30 -40-50 لاتقارنون السعوديه بقطر والكويت والامارات هناك فيه رواتب ضخمه ودعم حكومي واعانات زواج وبيوت مجانا للشباب |
انا من اهل الامارات .. واعتقد الحال من بعضه
بصراحة انا طلبو مني الذهب 60 الف .. و المهر 80 الف شامل الزهبة يعني المجموع 140 الف وانا اشووف هالسعر معقول جدا جدا خاصة ان نحن في ديرة غلاء وطبعا حفلة الملكة في البيت عليهم صحيح ما انكر ان راتبي عالي .. لكن خاصة في هالوقت والاسهم طاحت .. يمكن تكون حفلة الزواج بسيطة جدا .. للاهل والاقارب المقربون فقط .. لاني انا شخص بس عايش على راتبي وبس لا غير نصيحتي مهما لو كان لاتبيعين زوجك عشان مهر .. بكره لو حبيتيه وتفاهمتو.. هو راح يشتري لك الي تبغينه بعد الزواج خلاص مثل ما قالت الاخت منت عاجبني .. يا تتنازلي عن المهر يا تتنازلي عن العرس والله من رأيي انكم اتوفرون فلووس العرس واتروحون اماكن حلوة مثل اوروبا وله امريكا .. ميامي والاماكن الجميلة جدا هناك.. وتركبون الكروز .. اكبر سفينه في العالم .. تعيشوون نفس قصص الافلام والخيال في هالسفينه .. وافضل مليووون مرة من العرسسس .. مليون مرة لو عرفتي بس ايش فيها هالسفينه مش تخسرون فلوسكم كلها عشان حلفه العرس وفي النهاية اتروحون ماليزيا :(:( تحياتي |
أخيتي لايهمك المهر وكلام الناس عن القاعه آهم شيء الرجل وآخلاقه وآستخيري الله وفكري زين
|
الله يهني سعيد بسعيده ...
150 :d |
والله ياشيخة ..ايش تبغي من مهر عالي وقاعات وهبل ....والله ...
يعني استري على نفسك وعلى الرجال ...ولاتضيعيه .... بس هذا مو معناته تقبلين بأي شي ....يعني شوفي الحل الوسطي ...!! الله يوفقكم ويسعدكم ... السموووووووووووحة |
والله كلام اخوي الفهدي عييين العقل .. انا ماكنت اتمنى اسوي عرس كبير .. كنت اتمنى اسوي شي بسيط في البيت .. لكن ام زوجي كانت مصره لانه ام ولد لها .. وبالتالبي ماكان فيه شهر العسل حتى ما اثقل على زوجي الطالب :)
اشتري زوجك يا اختي وصدقييني بكره يعوووضك ..على البركه ان شاء الله :) |
ياحبيبتي خلي الفلوس على صوب لاتكون اكبر همج
وابن الحلال هذا تمسكي فيه "الكميه محدوده" |
فعلا خااااااااااااااااااااااااااااااااافووووووووووووووو ووووووووووووو الله
حراااااااااااااااااااااااااااااااااااااااااااااااا ااااااااااااااااااام عليكم وش ذا البذخ وبعدين كيف تقولين 80 ماتكفي اجل انا وش اقول اللي توي مستلمه مهري 30 الف وربي باركلي فيه بالغلا والله لو انا من العريس انا اللي ارفض مو انتي بعدين مع احترامي ااهلك عيييييييييييييييييييييييييييييييب تتشرطون على الرجال بالمهر اللي يقدر عليه المفروض والفندق مو عاجبك بعد هذا كله يعني تبين تقصين ظهره من كل جهه مايكفيييييييك المهررررررررررررر الله يعينك اختي انا ماادري كبف ذولي اللي يزوجون بالمهور المرتفعه يحسسونا انو احنا بنات عاديااات وهم بنات من ذهب الله يعينك وييسرلك |
وشو الموضوع هذا زواج ولا بيشتري شي ثاني
ثم 150000 وين قاعدين انتو والله ما له داعي هالمهر يعني الشاب ما يتزوج الا لما يدفع هالمبلغ الضخم ...... |
انا بصراحة ما اقدر اكتب من قوة الصدمة ....... لاتزعلين يا اختى من كلامى
بس اقولك شى انا فى بلادى اغلى مهر ممكن حتى الان لم يسجل فى بلادى اغلى مهر بس نحن مهورنا اقصى حد 3 الاف دولار يعنى هذا اعلى مهر عندنا والعادة هو الف دولار وفى اقل من ذلك بكثير صدقينى ما عندى كلام اقوله الا ان الله يهديك انت واهلك ويكون فى عون اهل زوجك المسكين |
| الساعة الآن 11:51 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©