|
والدته ستاتي لرؤيتي وانا لااريد...مارايكم؟
السلام عليكم
حابه استشيركم بموضوع من فترة مسبب لي قلق نفسي وهو انه وحده خاطبتني لولدها وناويه تجي تشوفني وانا براسي الف سيف وسيف مابغى اطلع لها لأني مليت من كثرة اللي اطلع لهم ومافية نتيجة عارفه بتقولون خيره بس صدقوني والله اتعب اذا قوبلت بالرفض منهم حتى هالموضوع صار يسبب لي حرج عند اهلي لدرجة حسيت ان فيني عين او شي يردهم عني بس والله مو مدحآلنفسي وبشهادة الجميع مقبوله وحبوبه وجامعيه ومن حموله طيبه ولله الحمد ومفكره اقول لأمي تقولها تجي تشوفني بمكان دوامي وتبلغها اني ماادري عن شي وبكذا اسهل المهمه لها ان ماعجبتها وانا مايصير لي احراج وش رايكم تحسونها كويسه الفكرة ولا فشيله من الناس تكفون ابغى رايكم بصراااااااااااااحه تامه تم تعديل العنوان |
عادي حبيبتي
توكلي على الله صحيح الفكره حلوه بس مايسير ماتزوركم صعبه جدا وربما تاخذ فكرة عنكم سيئه وانتي في غنى عنها ......؟!! افضل شي اذا وحده تخطبك لولدها لاااااااااااااااااااحد يدري الا بعد القعد حتى لو قبل الملكه باايام من جد كثر العيييين والحسسسسسسسد حسبى الله عليهم اكثري من الإستغفار والدعاء وقراءة سورة البقرة واحسن الظن بالله وحصني نفسك وخليك واثقه واعتبريها اي وحده تزوركم زياره عاديه حتى تكوني مرتاحه نفسيا خذي امور ببساطه وان شاء الله الخاطب محافظ على صلاته طيب وحبوب واخلاق ويكون من نصيبك اللهم آمييين وفقك الله لكل خير |
والله ياأختي الله يرحم خطوبه أيام زمان كانوا الرجال يخطبون واذا تمت الموافقه صارت النظره الشرعيه واذا وفق الله تم النصيب..
أما هالوقت الله يخلف علينا بخير تغيرت الطرق والمفاهيم وصار في موضه اسمها كلام الحريم بالأول ثم الرجال.. الله يوفقك وأتمنى لك كل ماهو أجمل بالوجود..اسأل الله ان كان فيه خير لك الله يتمم لك الموضوع على خير وان كان فيه شر لك الله يصرفه عنك ويعوضك بأحسن منه..في رعايه الله |
اقتباس:
بس وش بتستفيد اذا جت لمنا وانا ماراح اعجبها تشوفني بدوامي احسن وينفك الاحراج عني وعنها وتقولها امي الله يحييك لنا بس نتعرف بس البنت ماراح تطلع يالله والله احس اني في حيره من امري |
.
. ياحبيبتي والله حاسه فيك ، والموقف من جد مو هين ، بس هذه هي الحياة تلزمنا أننا نتنازل ونتحمل شوي حتى تسير الأمور ... قريبتي قوبلت بالرفض لما جت أم خطيبها تشوفها ، وبعدها بفترة إنخطبت ورفضت ان الام تجي تشوفها لإنها متعقده (مثل حالتك ) بس اللي صار ان الولد جاء وشافها وقال: ماشفت زين وابغى الوالدة تجي تشوف ...... فما كان من قريبتي المسكينة الا ان رضخت للأمر واستسلمت لإن بعد شوفة الرجال كل شي يهون ، وبالفعل جت ام خطيبها واخته وشافوها ، وماشاء الله الحين هي متزوجة -الله يوفقها ويتمم عليها- وأنا أشوف إن فكرتك مش بطاله في انها تجي تشوفك بالدوام ، بس الأفضل انها تجي للبيت وتقابلينها بكل ثقه وان قبلت اهلا وسهلا وان رفضت بيعوضك ربي خير منها ومن ولدها.... حبيبتي خوذيها نصيحة مني خليك واثقة ولاتفكرين في تجاربك السابقة وتخلينها عائق ، بالعكس استقبلوا الحرمه ببيتكم واكرموها واكشخي واطلعي لها وربك يدبر الصالح ... ملاحظه ... اقري أذكارك في ذاك اليوم ، وادعي ربك والزمي الإستغفار وماراح تشوفين شر -بإذن الله- الله يوفقك ويرزقك الزوج الصالح ، ويعوضك عن ماسبق كل خير |
اقتباس:
من جد هالزمن بايخ ومعد فيه رجال شاكرة لك اختي مرورك العطر ودعواتك الاحلى |
اقتباس:
ومشكورة اختي ع المرور الله يوفقك |
.
. طيب خلاص خلي الوالدة ترفض وتقول لها: الشوفة للرجال بس ... اذكر لما خطبنا لأخوي كثييير قالوا لنا كذا وعادي احترمنا رأيهم ... لاتضغطين على نفسك لإنه باين انك كارهه جدا للأمر ، سوي اللي يريحك وتوكلي على الله |
اختي الشوفة في الدوام ماتفيد
الام ماتبغي بس تشوف شكلك الام تبغي اتكلمك .. اتشوف كيف تتكلمين .. لبقة دفشة .. انيقة في المنزل .. وتحاكيك وتتعرف عليك يمكن رب العالمين يشرح صدرها من شوفتك وتصير تبغيك ؟ ويمكن انتي ماراح ترضين في الخاطب ومايعجبك اختي انتي عارفة ان الزواج قسمة ونصيــب ك جملة تنقال لكن ما تعرفينها حق المعرفة لو تعرفينها كنتي آمنتي فيها واقتعتني ان كل الي مروا عليك ماكان الله كاتب لكم نصيب انكم ترتبطون في بعض توكلي على الله وقابليها .. وانتظري نصيبك من رب العالمين .. انتي ماعليك إلا انك تدعين ربك وتتبعين الاسباب شكرا تحياتي |
اقتباس:
الله يسلمك ياعمري الله يهديك كيف وش بتستفيد بالعكس ربما خير لك ونصيبك وش يدريك وبعدين ليش تعقدين نفسك وتحطين على نفسك اشياء مالها داعي ياقلبي اختي .. عن نفسي محد قد جاني الا مره وحده وماصار نصيب وهذا من زماااااااان صحيح اتعب نفسيتي بس انسى اللي صار واعيش حياتي والباقي مجرد كلام لأمي وياليتهم يجون حتى مافي نصيب عادي اختي الحبيبه اقووووووووو ل لاتعقدين نفسك وتكوني ضعيفه شخصيه ..........!! عادي توكلي على الله واعتبريها هم اول ناس يجوكي وعادي اعتبريها مثل صديقاتك او خالاتك مجرد زياره اعتبرها مجرررررررررررررد زياره او ذهابك للمناااااااااااااااسبه لاتكوني محطمه من الماضي انسي الماضي وارميها بسلة المهملات خليكي اعقل من كذه فلا تجعلين الشيطان يستغلك وتندمين اذا كان هو صاحب دين وخلق ........!! هو صحيح نصيب بس كل شي سبب فاانتهبي سوي اللي عليك والباقي على الله اكثري من الأسغفار والدعاء وحصني نفسك كل يوم بالأذكااار لاحيرة ولاشي عادي استقبليها قولي حياكم الله تفضلي ياخالتي كيف اخبارك وكييف بناتك والللخ وفقك الله في حياتك طمنينا |
رد خاطئ
|
والله أنا اشوف انك تتوكلين على الله وتخلينا تجي تشوفك
انا من وجهة نظري ان الأم تجي هي قبل افضل عدي تعليق بسط بهذا الموضوع للأخوات بنسية لي انا كنت اقول للوالدة اي ناس يرفضون جيتك وشوفتك انا اعتبر اني رافضهم حتى لو بتنهم قمر وفعلا فيه ناس رفضوا شوفة الوالدة فرفضت اني اشوف بنتهم حتى امي حاولت تظغط علي بأنه اغلب الناس عندهم الشوفة الشرعية من دون شوفة الأم وانها هي راضية لكن اصريت على رفضي وقلت حتى لو الغيت فكرة الزواج ولي في ذللك عدة اسباب ١- امي الي تعبت وربت وشقت وحملت هي اخر من تشوف من سوف ارتبط بها في بقية حياتي الصراحة قلبي ما طاوعني اني اسويها ورفضت حتى اني قلتها من باب المزاح انه فيه معنا قي العمل اناس من الجنسيات البريطانية المسلمين قلتها خليهم يدورن لي بريطانية مسلمة اصرف لكن الحمد لله الله يسر وحصلت الناس الي استقبلو امي قبلي وعسى الله يتمم فأنا اشوف انها احترام للأم اكثر من اي شئ ثاني ٢- في هذا الوقت الشباب مهب زي اول اي شئ ممكن يدخل مزاجه يعني معليش الان القنوات و الانترنت والسفرات خاصة سفرات العمل الاجبارية لازم تشوف من هنا وهناك لذلك انا كنت طالب مواصفات شكل معين وكنت موضح هذا للوالدة لكي تجد شئ قريب مما وصفت لذلك الرجل اليوم ليس رجل الامس اي شئ ممكن يوافق عليه لا ممكن يكون بمزاجه شئ معين لذلك اذا اعطى امه او اخته نوعية الشكل الي يريد يساعد هذا على الإختيار الانسب له طبعا افضل من انه يشوفها ولا تأكد ويوافق وهو ما شافها زين وقد يندم بعدين ويظلم نفسه ويظلم البنت بعد هذي النقطتين التي حبيت ذكراها والله اعلم |
حبيبتي انا من راي انك تخلينها تجي لبيتكم وتشوفك مثلها مثل غيرها واغلب بنات الناس يصير لهم مثلك يجون ولايردون صارت لي انا واخواتي من قبل يشوفون ولا يردون بس عادي الحمد لله يمكن ماردو خيره لنا والحمد لله ربي عوضني انا واخواتي وتزوجنا بس انتي خليك وووواثقه من نفسك مب يعني ماردو انه عيب فيك بالعكس يمكن خيره لك فلا تكرهين
والله يوفقك ويكتب لك الي فيه خير اهم شي لاتخلين الرجال يشوفك قبل امه لان امه ماترد عليكم اهون بكثير لو هو شافك ومارد |
الله يوفقكم ويرزقكم من حيث لاتحتسبون
والله ردودكم اثلجت صدري وقوت ثقتي بنفسي ورميت ماضيي ورا ظهري بس المشكلة طفشت وطفشت بس بضغط على نفسي واطلع لأني احيانآ اقول بنفسي حرام اردهم خلي الرفض يجي منهم عشان مااحس يتأنيب الضمير دعواتكم لي اذافيه خير يقربه لي واذا فيه شر يبعده عني شااااااااااااااااااااااااكرة للجميع مروركم العطر |
ايوه خليك كده
كوني مطمئنه واعطي لنفسك الثقه والله يوفقك لكل خيرا اللهم اذا شر لك فاصرفه هو عنها واصرف هي عنه واذا كان خير لك في دينه وخلقه فاللهم اجعله من نصيبها يارب ياحي ياقيوم اللهم آميييييييييييييين طمنينا ياعسوله |
ان شاء الله وشاكرة لك حرصك واهتمامك
الله لايحرمك الجنة يارب |
اي والله للاسف عن تجربه اذا الموضوع فيه حريم مو بالسهوله يتم
الله المستعان الله ييسر امورك ويوفقك ويكتبه لك اذا هو الصالح |
هلا اختي .... ايه كذا ياحلوه خليك واثقه من نفسك وحتى لو رفضوك وش بيصير بتوقف الدنيا لا طبعا ... المهم الله يوفقك ياااااااااااااااااااارب وان كان فيهم خير بترتبطين فيه الله يوفقك للي فيه خير لك ياقمر ... |
شوفيها يا ختي بكره بتقولي الحمد لله انو افتكروني للخطبه
تعلقي بالله سبحانه قبل لا يجوو طلعي صدقه تدفع البلا واقري سورة يس وسورة البقره داااااااومي على سورة البقره فيها شفاء وبركه قال عليه الصلاه والسلام أخذها بركه والرقيه والأذكار شغلي بالبيت سورة البقره بالبيت استر لك ومش كل الدنيا تعرف وادعي للنفسك وللكل بظهر الغيب فدعوه المسلم لاخيه المسلم مستجابه واجعلي لي نصيبا |
| الساعة الآن 08:56 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©