|
التفاهم والانسجام بالزواج هو الأساس ... وهذه مشكلتي
السلام عليكم
اول شئ احب اقول اللهم بلغنا رمضان واعتقنا من النار انا عندي مشكله وودي استشريكم فيها ...... انا عمري 26 سنه متزوجه من سنتين من ولد عمي اكبر مني بـ 3 سنوات وعندنا بنت عمرها سنه مشكلتي مع زوجي هو انسان طيب واجتماعي لكن مافي تفاهم بيننا ومن اول زواجنا وانا اعاني من هذه المشكله لكن كنت اتنازل عشان الحياة تمشي لدرجه انه اذا حصلت اي مشكله يفضل الهروب سواء يخرج من البيت مباشره او اذا كنت عند اهلي يرجع للبيت ويتركني من دون ما يسأل فيني وعادي ممكن يضل بلأيام يستناني اكلمه واذا تكلمنا يمشي الموضوع عادي ولا كأنه في شئ صار ويرفض يرجع يتكلم بالموضوع وهذا الشئ متعبني لانه بهذه الطريقه مستحيل نفهم بعض وحبه لحياة العزوبيه متأصل فيه لوقتنا هذا يحب انه يعيش كعازب سواء من ناحية اكله او لبسه او نومه مع اصحابه والدليل على كذا انه بعد ولادتي ببنتي سنه كامله قعدتها عند اهلي وهو مجرد كل ويكند يجيني وامنا السكن عذره انه ماحصل شقه و انه الاجارات مرتفه وكنت امشي الموضوع لكن بعد الحاح مني اظطر ياخذ سكن والحين بعد ماصار عندنا سكن يفضل انه يخليني عند اهلي دايما ومستحيل يرجع ياخذني غير لما اطلب منه بعد الحاح كمان والحين نفس الوضع رافض ارجع معاه البيت بحجة الظروف الماديه وانه افضل لي اجلس ببيت اهلي وغير هذا هو من النوع الي مايجلس معاي ابدا غير وقت النوم وكلها ساعه وبس دايما عند التفزيون او على النت ولما اطلبه نجلس نسولف مع بعض يطنشني وحاولت كثير اشد انباهه بكل الطرق من لبس او كلام واغراء ووووووو لكن من دون فايده وحاولت كمان نطلع مكان هادي عشان نكون مع بعض يتحجج بانه مشغول ولو طلعنا مكان يقعد مكشر او ساكت وكل شوي يقول يلا نرجع البيت والله العظيم انه ماعاد صرت احس بشئ معاه ولا احس اني احبه لانه دايما يخلق الحواجز بيننا وهذا الشئ قاعد يبعدنا عن بعض واليوم حاولت معاه بتلميح وبالكلام اننا نجلس مع بعض جلسه رايقه لكن هو عينه على الاب توب وبس واخر شئ بعد مرور 7 ساعات من غير مبالغه انفجرت وقلتله انه في حواجز بيننا انه حاولت افهمك وحاولت اكسبك لكن مافي فايده ولا انت قادر تفهمني على طول فضل انه يهرب وقال يلا خلصي كلامك لأني ماشي ( طبعا انا عند اهلي لانه رافض يوديني بيتنا الفتره هذه بحجة الماده ) طبعا انا طفح فيني الكيل وقلتله اذا تبغى تمشي روح بسلامتك بس انساني لانه ماعمري حسيت انك تحبني ولا حسيت بشئ معاك من اول زواجنا وانا الحين مشوشه وما ادري ايش اسوي معاه والله تعبت دايما احاول اخفي مشاكلنا عن اهلي و اهله لكن الحين خلاص افكر بشكل جدي يا يحس فيني يا بلاش العيشه هذه ياليت تساعدوني |
صلى الله عليك يا سيدي يا رسول الله
..............قال صلى الله عليه وسلم إني أريت الجنة فتناولت عنقودا ولو أخذته لأكلتم منه ما بقيت الدنيا وأريت النار فلم أر منظرا كاليوم قط أفظع ورأيت أكثر أهلها النساء . قالوا بم يا رسول الله ؟ قال بكفرهن . قيل يكفرن بالله ؟ . قال يكفرن العشير ويكفرن الإحسان لو أحسنت إلى أحداهن الدهر كله ثم رأت منك شيئا قالت ما رأيت منك خيرا قط" متفق عليه أختي الكريمة لا تفهمي من كلامي اني اريد أن القي بكل اللوم عليك لكنك شريكة بلا شك بهذا الوضع وعلى زوجك المسؤولية الاكبر بذلك لا توجد له حجة أن يتركك ببيت اهلك كل هذه الفترات بحجة المادة فهو مطالب شرعا وعرفا وقانونا بالانفاق عليك وتامين بيت شرعي يأويك وأن يؤدي كل واجباته تجاهك ما لم يعقه عائق اشعر أن معاناة زوجك بسبب قلة ذات اليد نوعا ما وتعوده على نمط معين من الحياة لم تستطيعي تغييره وتذكري ان التغيير بالشريك امر لا يمكن حدوثه بين يوم وليلة تقولين زواج عمره 3 سنوات منه سنة قضيتيها ببيت أهلك يعني سنتين قد يكتشف الانسان شيئا بشؤيك حياته غفل عنه 10 سنوات الحياة بحاجة الى جهد وتصميم والخروج بنتيجة يحتاج الى جهد فامساك بمعروف وتسريح باحسان يستخدم معك اسلوب التجاهل داوه بالتي كانت هي الداء ما المانع لو طنشتيه شهر شهرين زمان يعني غيري من اسلوبك لا تكوني انت المبادرة لكل شيء دائما حسسيه بسامك منه ومن حجياته ومن روتينه الممل لكن حذاري ان تتركيه وحيدا يصارع ويلات الزمن كوني له السند لكن غيري من طريقة تعاملك معه وتعالي حيث يريد للتجربة فقط واشعريه بانك ترحبي بموضوع تركه وحيدا وانتظري لا تنسي الدعاء ولا تنسي الكلمة الطيبة لا توجد وصفة سحرية لقلب مزاج الرجل الوصفة السحرية خليط من تصرفاتك الحكيمة وتوددك اليه مع الدعاء الصادق بان يوفقه الله في رزقه وفي حياته معك والمعذرة لم اكن لاضع الحديث في بداية الموضوع لولا مبادرتك له بالقول انه اقتباس:
فلا تكوني كافرة للعشير كوني العاقلة وتحملي بسبيل ابنتك واستقرار حياتك حتى تستنفذي كل المحاولات عندها لا يسعك الا ان تسلمي امرك كله لله تعالى انه هو اراد لك هذه الحياة فحسبك الله ونعم الوكيل كل التقدير |
زوجك يشتغل؟
|
مشكور اخوي صاحب الظل لطويل على ردك واسلوبك الجميل بالتخاطب
كلماتك ابكتني وخصوصا بقولك اقتباس:
انا ما احب اني اجرحه بشئ ودائما كلامي معاه بهدوء والله اني حتى لما اطلب انه يهتم فيني ويجلس معاي باسلوب لطيف زي ايش رايك اسويلك شي دافي تشربه ومقصدي منها انه يكون مروق واقعد اوضحله حاجتي له جنبي وكيف انه يحسسني بالقوة واحس بالامان بجنبه لكن على طول تفكيره يميل للشئ الي براسه واذا سألته تفكر بشئ او في شئ مضايقك مخليك ساكت يقولي لا ولا شئ وعلى هذا الحال بس ماقلت هذه الكلمات غير من النار المشتعله بصدري والله انه لو مسك يدي بس او ابتسملي وقت ماقلتله احس بحواجز بيننا كان تلاشى كل شئ وانطفت النار الي بصدري ودي يفهم هذا الشئ انا عرضي لمشكلتي .....ودي تدلوني على الخطوه السليمه بعد الي صار من غير مايكون فيها تنازل مني لاني تعبت من التنازلات |
اختي بنت غامد13
ايوه زوجي يشتغل بمرتب متوسط صحيح نسيت اذكر انه ما اعطاني مصروف من شهور لا لي ولا لبنتي غير اوقات مو دائما يجيب الحليب والحفائظ وبس ومصروفي اخر مره اظطريت اخذه من ابوي وكان يطلبني اوقات واعطيه ولما اقوله على المصروف يقولي اصبري وان شاء الله ربي يفرجها |
اقتباس:
اختي الكريمة حاولي ان تبعدي موضوع التنازلات وما قدمت انت مقارنته بما قدم هو فهذا والله انها سوسة تنخر بحياتك دون ان تدري عنها قد تأخذنا العزة بالاثم احيانا فلا نتنازل حتى بكلمة طيبة سواء الرجل او المراة فتهب عواصف قد تهدم ما بنيناه طويلا بكلمة تخرج حين غضب اختي الكريمة لا سبيل لك الا ان تعامليه بنفس الاسلوب (التجاهل )مع الاحتفاظ بمستوى عالي من المودة يعني ما تخلي جفاء فقط غيري الاسلوب ولا تجلسي معه الا ذاا هو اراد ذلك وموضوع التنازلات هذه نافذة فتحها الشيطان الرجيم في راسك حتى يتسنى له الدخول منها كلما اراد ان يعكر صفو حياتك فيقنعك بان لا تتنازلي ولا تتكلمي معه وان تغضبي وقولي ما كتمته طوال هذه الفترة التي يقنعك انها طووووووويلة لكنها فعليا قصيرة جدا جدا 3 سنوات ولا تنسي ان ارفع الشياطين منزلة هم من يفرقوا بينك وبين زوجك !!!!!! فلا تمنحيهم هذه المنزلة ان كان حل مشكلة بينكما مسكة يد او نظرة حنونة فبادري بمسك يده مرة على مرة سيدرك-صدقيني- ان المشكلة التي يراها بحجم الجبال قد تحل بلمسة حانية او بنظرة رقيقة ابو بكلمة حلوة وانتهى هذا ما اريد قوله لك ولو كان زوجك يرى ما اكتب لكتبت له رد خصيصا لا تشعري باننا نلقي اللوم على كاهلك فالامر ببساطة اننا نتكلم من جانبك انت فقط لان زوجك غير معني بالنقاش هنا اسال الله لكما التوفيق والسداد |
طيب ماحاولتي تعرفي راتبه وين يروح؟؟
بما انكم ماعندكم سكن وساكنه عند اهلك هذا السؤال تبادر لذهني على طول بالنسبه لمشكلتك حاولي تتقربي منه مثلا تبيه يكلمك روحي له واحضنيه وحطي فمك عند اذنه وتقولي له ممكن نسولف شوي طبعا بكل طريقه حاولي انك تسولفي معه وتكوني انتي مجهزه جلسه حلوة من حلى وعصير وهالشغلات يعني ربي يوفقكم |
انا عانيت بالبدايه مثلك
امكن انا اخس منك لان زوجي معاق وتعرفين كيف التعامل معاهم صعب بس مع الايام قدرنا نوصل لحل وسط ونتفاهم سويله اكله يحبها وبعد ما يخلص سويلي شاهي او قهوه واجلسي تكلمي معاه وفضفضي اجذبيه بالاشياء اللي يحبها |
اخوي صاحب الظل لطويل شكرا لك مجدادا وعلى تواصلك معي بمشكلتي
انا عارفه انك ماتلومني انا بس عشان النقاش موجه لي وبس وياليت زوجي يسمع هذا الكلام او حتى يناقشه احد بهذا الموضوع لكن للحين ماقلتلي ايش اسوي بالخطوه الي تجي ؟؟؟؟؟؟ |
اختي توته وزوجها شكرا لردك
حاليا احنا عندنا سكن واما الراتب انا اسأله وين يروح يقولي ما ادري ونكون بداية الشهر اقوله كيف ما تدري يقول كذا طار ما ادري بس فواتير وما ادري ايش اما على الي قولتيه كله سويته وكل مره اتفنن بشئ جديد وكل الاكلات الي اعرفه يحبها اسويها له واحاول افتح مواضيع بعيده عن الاشياء الي تضايقه لكن هو مجرد يرد علي بكلمه وبس ترا انا من النوع الصبور وما امل على طول واحاول مره واثنين وثلاث ولا ايأس طالما احس انه في فايده لكن الحين حسيت انه ابداااااااااااااااااااااااااااااا رجال شايل المسؤوليه عنه ما يبغى يتحمل شئ |
اقتباس:
في رجال اذا حسوا ان زوجاتهم على طول يهتموا فيهم ويسالوا يهملوا زوجاتهم مايحبوا هالحركه لذلك اهمليه وطنشيه وعيشي حياتك وبما ان عندكم سكن وقفيه عند حده وقولي له ابي ارجع بيتي ليش البيت موجود ع الفاضي واذا رفض ارجعي للبيت وهو راح يتفاجئ وراح يعرف انك جاده بالموضوع في البيت طنشيه قد ماتبي لاتردي عليه الا ه قد السؤال انا استخدمت هذا الاسلوب مع زوجي اللي هو اسلوب التطنيش في امور تخص دراستي وتعالي الحين شوفيه والله ما اكذب عليك مايستغني عني لدرجه انه تحمل مصاريف شقه مفروشه اللي تجاوز ايجارها 4000 ريال بالشهر بس عشان اكون معاه بمكان عمله في رجال ماتمشي معهم الا معاملة التطنيش |
يعطيكم العافيه على تفاعلكم معاي
بس للحين محد قالي ايش اسوي الخطوة الي تجي هو الحين مشي من امس بعد ما تزاعلنا وعليها |
اتصلي عليه وقولي له انا راجعه البيت
هذي اول خطوه تسوينها ولاتقولين له اي كلمه اشتياق انا راجعه البيت وبس وما ابي اي نقاش في الموضوع وارجعي لبيتك |
طيب برأيك انا ادق عليه ولا استناه يدق
وانا كان ببالي اكلم ابوي بالموضوع واوضحله تفكيره وهو يكلمه لانه دايما احاول اني انهي الموضوع بيني وبينه من غير تدخل من احد لكن المره هذه قلت اخلي ابوي يكلمه عشان يعرف ان الموضوع جد وهو عاد يقوله تعال خذ زوجتك !!!! مو احسن كذا ؟؟ |
اي كذا تمام التمام
وياليت تقولين لنا بجديد التطورات |
فيه زوجات هي الي تخرب بيتها بدون ما تعرف يا اختي تنازلاتك من البدايه هي الي خلت الرجال كذا ليش متزوج اجل مادام لا امن بيت ولا مصروف ولاحاجه قوليله انا تغيرت تامن لي بيت ومصروف ولا كل واحد يروح لحاله اذا حس وقتها انك جاده صدقين راح يحس بالمسوليه الله يكون بعونك
|
اقتباس:
اختي لا تكلمي ابوك لانه زوجك راح تحطي زوجك في موقف حرج . الافضل انك تكلمي ابو زوجك او امه او احد اخوانه اللي تحسين انه راح يساعدك .. اذا ما نفع الكلام مع اهله بعدين كلمي اهلك .. |
شكرا لكم اخواتي
توته وزوجها صمت وسكون أميرات انا عشان عند اهلي وابوي الي موجود عشان كذا ممكن يكون اقرب شئ لي واما اهله بعيد واحسها ثقيله اكلمهم على شئ مثل كذا غير هذا كله هو علاقته مع ابوه مو قد كذا يعني مكهربه وبتصير قويه عليه لما ابوه يكلمه او اذا عرف اني لجأة لأبوه هو |
حبيبتي اتكلي على الله وكلمي ابوك
عشان يعرف ان اهلك ماراح يخلوك بهذا الوضع اذا كلمه ابوك راح يحس علة نفسه شوي ويعوضك ان شاء الله |
حتى انا افكر بنفس كلامك اختي توته وزوجها
بس حاليا ما اقدر اكلمه لان ابوه قاعد مع ابوي بالبيت عندنا ويمكن لما يروح عمي اتكلم معاه |
اختي الكريمة
ارجو نمك اعادة قراءة الردود مرة اخرى لاني الاحظ تشوش عقلك اثناء القراءة حيث لم تستخلصي ولا فكرة مما قلناه لك وبما انك تقولين انكم تقيمون ببيت مستقل فلماذا بقائك ببيت اهلك؟ عودي لبيتك حتى بدون علمه بس حطي عنده خبر لما توصلي البيت وكما قلت لك سابقا استخدمي اسلوب التطنيش قليلا وشوفي النتيجة وعلى فكرة هذا الاسلوب مو عصا سحرية يعني تؤتي أكلها بين يوم وليلة الامر يحتاج لصبر وما تدخلي احد بالموضوع بتاتا دام انه تحت سيطرتك لما تستنفذي كل محاولاتك وقتها وجب عليك اخبار اهلك بمعاناتك انا شخصيا لا احبذ تدخل الاخرين بحياتي حتى اهل زوجتي واعتقد اغلب الرجال مثلي هذا والله اعلم |
صاحب الظل الطويل
بعد اذنك طبعا انا اخالفك الراي انا خليت اهلي يتدخلوا في موضوع اهانات زوجي لي ووقفوه عند حده عشان كذا انا شجعتها ولها الحريه |
اقتباس:
لا داعي للاستئذان اختي فنحن اخوة باذن الله ولك حرية ابداء رايك كما لي ايضا وها انت تقولين ان اهلك تدخلوا لوقف اهانة زوجك لك والعلاج الذي نغع بحالتك ليس بالضرورة ان ينفع بحالة الاخت لم تذكر انه يهينها او يضرب او من هذا القبيل هي ذكرت انزعاجها من سلوك زوجها البارد ومن تقصيره في حقها كثيرا وبعض الامور التي تزعج بلا شك وخصوصا المراة بكونها مخلوق يحتاج للعاطفة اكثر من الرجل وهذا غيرمتوفر بزوجها والسبب برايي عرضي يمكن التخلص منه باتباع بعض الاساليب التي تساعدها على تغيير تفكيره وان عجزت عن ذلك تستطيع استعمال الورقة الاخيرة وهي اخبار اهلها واهله معا حتى يضعوا له حلا جزاك الله خيرا |
صح كلامك بس هي صارحته من البدايه انو مهملها ومحتاجه لحنانه وشغلات ثانيه بس مانفع معه
وبصراحه احنا ماندري شنو بالنفوس وكل شخص منا له تفكيره |
انا معاك اخوي صاحب الظل الطويل بكل كلمه قلتها
بس انا مرت علي فتره استخدمت وسيلة التطنيش والي اكتشفته انه هذا الشئ الي هو وده فيه وكان ماخذ راحته على الأاااااااااخر لا ويساعدني كمان زي مثلا الفتره الي صرت ابادله نفس التطنيش كنت اذا طلع مع اصحابة ورجع البيت لازم اكون صاحيه واستقبله واذا ماتعشى احطله عشى وغيره لكن مع التطنيش كنت ما ادق عليه وهو برا واذا جا مو بالضروره يحصلني صاحيه وكنت انام تخيل كان اذا شافني نايمه وهو عارف انه مو موعد نومي يحاول يسكر علي الباب بشويش عشان ما احس فيه وياخذ راحته ياعند التلفزيون او النت وهذا الشئ وغيره هو الي مو محسنني بأهميتي عنده او مهتم بالجلسه معاي بالبداية كنت اقول يبغى راحتي مسكين لكن اكتشفت انه يبغى راحته ووناسته وبسسسسسسسسس واذا على البيت انا ذكرت انه رافض يرجعني للبيت بحجة الماده ومو اول مره يسويها وبيتي عشان مو بنفس المنطقه الي فيها اهلي يصير صعب اروح من دون مايجي ياخذني واشكركم اخوي صاحب الظل الطويل واختي توتهو زوجها على اهتمامكم وكل نصحيه قدمتوها لي بأخذها بعين الأعتبار |
ياليت تقولين لنا حبيبتي بجديد التطورات
|
انا قبل شوي تكلمت مع ابوي بالموضوع
وقلتله على كل شئ لكن كانت كلمته (اصبري ...الصبر زين ) لكن قلتله انا صبرت بما فيه الكفايه وما لجأت للتدخل غير لما ما حصلت نتيجه قعد يفكر بكلامي من غير ما يتكلم بس يسأل سؤال معين ويسكت وقلتله ترا المره هذه لازم يصير تدخل منك ولازم يكون في حل نهائي يا انه ينصلح حاله ويحس بالمسؤليه ولا بلاها العيشه هذه طلع وبعدها بشوي رجعلي ويقول انه ما يقدر يكلمه بيكون صعب عليه لكن بيشوف احد يكلمه ويفهمه على اني اصريت عليه انه هو الي يكلمه عشان يحس بأهمية الموضوع لكن ابوي راافض يكلمه بحجة ايش يقوله وكيف يفهمه يحسها ثقيله تجي منه بس انا قلتله اهم شئ ينتهي الموضوع |
أختي
اسأل الله تعالى أن يعينك و أن يفرج همك أختي في المشاركات السابقة ذكرت كثير من الطرق ما أردت أن أضيفه لا تيأسي من رحمة الله و اسأليه سبحانه في أوقات الاجابة و ألحي في الدعاء وفقك الله تعالى |
وعليكم السلام ورحمة الله
أختي الكريمة R M A أسأل الله أن يحنن قلب زوجك عليك ويصلح حالكما أختي أنا مع كلام أخي صاحب الظل الطويل والأخوات الكريمات بالعودة للبيت وإخباره بذلك ،،فلن تستطـيع التأثير في مشكلتك وأنت بعيدة بل بعدك قد يفاقم المشكلة لأطوار اصعب ولا يمكن تداركها مما لو كانت على وضعها الحين... عندي بعض الأسئلة تكرماً لو تجيين عليها من باب التوضيح لأمور قد تخفى... أنت قلت أنك بترجعين لبيتك ، تقصدين أنتم ساكنين بيبت أهل زوجـك؟ أو ساكنين لحالكم..؟ هل عند زوجك طموحات وظيفية أو أكاديمية ؟ ما ذكر لك يوم مثل كذا ؟ سواء قبل الزواج أو بعده؟ وما مستواه التعليمي ؟ من الأيام الأولى من بدايات زواجكم ، هل كان بارد تجاهك ، مهمل ، يعني لاحظت أو استنكرت شيء من تصرفات وتغير معاملته تجاهـك؟ ذكرت أنه ما في تفاهم بينكم وأنه إذا حصلت مشكلة بينكم يطلع برا البيت؟ تذكرين أول خلاف بدر بينكم وطلع زوجك من البيت ولا عاد كلمك؟ إيش المشكلة وكيف كنت تفتحين مع الموضوع؟ أختي الكريمة ذكرت طرف من مكالمتك لأبيك - حفظه الله - : وهذا النقطة اقتباس:
مشاعرك دون انصات أو تفهم لما يقول أبيك ؛ فهل انتبهتي لما قال أبيك ..؟!!! وفقك الله أختي أخوك عزوبي:21: بس:d رجل:30: دمتم بحفظ الرحمن |
هلا اخوي عزوبي بس رجل اول شئ احب اذكرلك اني ببيت اهلي وما اقدر ارجع بيتي غير اذا هو جا اخذني لان بيتي مو بنفس المنطقه الي فيها اهلي وغير كذا هو الي رافض ارجع للبيت بحجة الظروف الماديه الي لها فتره ولا انتهت على اني ما طلبت منه شئ وقلتله عادي نمشي نفسنا بأي شئ الفتره هذه لكن القهر لما اشوفه يصرف بأشياء ثانيه ويقولي ماعندي اما بالنسبه لسؤالك اقتباس:
اقتباس:
اقتباس:
يعني الي اقصده اهتمام سطحي جدا مو زي اهتمام اي زوج بزوجته اقتباس:
وعادي اذكر كنت اتكلم معاه بهدوء ولما جابلي موضوع الماده قلتله ما يهمني قد ما يهمني راحتنا مع بعض على فكره في نقطه ودي اذكرها في ذيك الفتره واحنا بشهر العسل بعد الخلاف طلب مني اقعد عند اهلي لمدة اسبوع حتى يتحسن وضعه وبعدين ياخذني بس طبعا انا رفضت بشده لانه صعبه وانا توي متزوجه اتركه واقعد عند اهلي على انه هو الي طلب هذا الشئ وانت ذكرت كمان اقتباس:
وانا احساسي انه ما أخذ الموضوع بجديه خلاني اتكلم معاه بأنفعال حتى يتخذ القرار الصحيح على العموم اشكرك على اهتمامك بموضوعي ..... ويارب يبعد عننا المشاكل والاحزان |
ابوك راح يعرف الحين يحل المشكله
اما بالنسبه للسكن اطلبي احد من اخوانك يوصلوك للبيت او روحي بباصات النقل الجماعي او الطائره واتصلي عليه وقولي له تعال اخذني انا بالمكان الفلاني يعني تكوني بنفس المنطقه |
توته وزوجها
ان شاء الله ابوي يقدر يحل المشكله لأنه رفض يكلمه ولا أدري ايش راح يسوي اما من ناحيه اني اروح للبيت ماودي غير لما نحل الموضوع لانه مستحيل اكلمه لأني اخر مره وضحتله ان اذا هذا اسلوبه خلاص مافي حل بيننا والحواجز مستحيل تروح |
اختي لازم تروحي بيتك اذا رحتي للبيت راح تحطينه امام الامر الواقع وراح يهتم فيكم وراح يحس بالمسؤوليه شوي لانه حاليا يحس بانه عزوبي اما اذا رجعتي للبيت راح يحس انه متزوج وراح يحس بالمسؤوليه والطلبات اللي انتو محتاجينها
بالنسبه لي لازم ترجعي للبيت واهلك لازم يشوفوا لك حل معاه |
انا كلمت اخوي كمان بالموضوع عشان اذا ابوي ما تصرف يتصرف اخوي
وعلى البيت اذا رحت راح ياخذها انه تنازل مني ويستهين بالموضوع لكن انا ودي يحس بحجم المشكله |
لا ماراح ياخذها انك تنازلتي بالعكس راح يحس بالمسؤوليه غصب
تهورتي انك قلتي لاخوك كان انتظرتي شوي وشغتي ابوك وش راح يسوي |
انا سألت ابوي هل كلمه ولا لا ؟؟؟؟؟
قالي لا لسه قلتله متى طيب قالي خلاص متى ما جا وقتها اكلمه ولا ادري متى بيجي وقتها يمكن الحين يمكن برمضان او يمكن بعد رمضان ....... الله اعلم انا عارفه ان ابوي رافض يكلمه وقاعد ينتظر يحسبه بيجي او يتصل وعشان كذا مافي غير اخوي يكلمه واعرف ايش تفكيره |
الله يعينك وبانتظار جديد التطورات
|
مشكوره اختي توته وزوجها على اهتمامك بموضوعي
والله لا يحطك بمشاكل انتي وزوجك وتصير ايامك كلها سعاده بس حبيت اقول ان ابوي اليوم صدمني بكلامه ..... لأنه قرر انه ما يكلمه ومنتظر جيته وقتها ممكن يكلمه انا اتوقعت ابوي ياخذ موقف صارم ويتصرف لكن خيب املي واتضايقت كثير وحاولت معاه انه يكلمه لأن الأخ مستحيل يفكر يجي اصلا إلا بحالة انا كلمته وهذا الشئ مستحيل كفاية الي جا منه وكفايه الي انا استحملته من اهمال وعدم مسؤوليه الحين ما ادري ايش اسوي املي بأبوي راااااح ولازم اخذ طريقه ثانيه أحل المشكله فيها وما ادري عن اخوي اذا قرر يكلمه ولا بيسوي مثل ابوي |
اسئلي اخوك عن موقفه
ولو انا مكانك كان يمعت ابوي كلمه عشان يحس فيني مثلا كان قلت له ماتوقعت هذا ردك ماتوقعت تخلي بنتك تايهه مو عارفه وين تروح وبكل بساطه تخليت عنها سوري بس انا من مجتمع مفتوح يعني عادي اقول هالكلام لابوي انا ما اقصد اني احرضك على ابوك بس انا بعد انصدمت بردة فعله حاليا شوفي ردة فعل اخوك شو راح تصير |
شوفي يااختي الكريمة - جربي هذه الحركة - وباذن الله بتنجح ارسلي له رسالة على الجوال وقولي له - يازوجي الحبيب العزيز انا احبك حب كثير جدا حب يفوق حبك لي - ولكن صدقني ياروحي ماقدر اتحمل انك تتجاهلني كثير وسامحني لو دخلت احد في مشاكلنا لكني ماقدرت اصبر واكتبي له ترا يازوجي انت رجل عظيم بين الرجال ولا فيك اي شي يعيب بس ياليت يازوجي تفهمني من المشاعر والاحاسيس والحب ووالعاطفة 0 واكتبي ( أسأل الله ان يحفظنا بحفظه ويبعد عنا المشاكل) انا صح عزوووووووووووووبي - لكن افهم - بهذه الاشياء - جربي اختي هذه الرسالة وشوفي الرد كييييييييييف |
| الساعة الآن 03:06 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©