|
افكار للمخطوبات و المملكات حديثا
السلام عليكم ورحمة الله وبركاته
كيف حالكن عزيزاتي؟؟هاذا اول موضوع لي في هالمنتدى اتمنى انه ينال اعجابكم... حبيت موضوعي هاذا يكون غير ويتكلم عن الرومانسيه فترة الملجه لان اغلب المواضيع تتكلم عن الرمانسيه بعد الزواج لكن فترة الملجه مسكين ماله نصيب؟؟ طبعن الرومانسيه اهني تكون غير يعني بحدود و الهدف منها الآتي: - اقربه مني اكثر - أخليه يتعلق فيني وما يستغنى عني - أخليه يحبني و املي عليه دنيته - أسعده و أرضيه انزين الحين كيف نحقق كل هاذا وكيف نكون رومانسيات هالفتره اول شي اعتبري زوجج هو كل شي في دنيتج الحين >>>مثلا انا مرات صدق احس اني مرتبطه و مقيده (ما اقدر اطلع الا بشور، مرات اكون مندمجه في التلفزيون فجأه يتصل لازم احاسب على كل شي وكل كلمه وكل حركه اسويها، انفذ اوامره وطلباته و اسمع كلامه) تحسون هالامور مرات تخلي الوحده تتضايق خصوصا ان كنا عايشين على راحتنا وفجأه يدخل شخص ثاني حياتج >>بس لاازم تتعودين على هالشي و تتقبلينه و تستانسين بعد فيه و الحين خلونا نشوف بعض الافكار الي ممكن نطبقها هالفتره: - انكم توعون بعض على صلاة الفجر و يوم يرد عليج كلميه بأنعم وارق صوت وأحلى كلام (فديت روحق قووم الغالي عشان تصلي يلا حبيبي الله يرضى عليك) - الهدايا بين فتره وفتره اهديه شي وان كان بسيط و اذا قالج ليش و جذي قولي دخل خاطري وحبيت آخذه لحبيبي وقوليله فديتك تستاهل و من لي غيرك و من هالكلام - يوم تطلعين وياه اتركي شي في السياره مثلا اتركي رساله حطيها في احد الادراج الي في السياره و اكتبيله فيها كلام حلوو >>بس كوني متأكده انه دايما يفتح هاذي السده (مثلا الي يحط فيها نظارته) - وبعد ممكن يوم تطلعين وياه تخلين شي مثلا سلسله كنتي لابستنها او حلق وشوفي شو بيسوي (ممكن يقولج نسيتي سلسلتج في السياره و بييبلج ايها و ممكن يقولج انه حاب يحتفظ فيها ، اذا اتصرف التصرف الاول انتي قوليله خلاص حبيبي احتفظ فيها رهينه وعطني اياها يوم بكون في بيتنا واضحكي بدلع) - يوم يزورج استقبليه بشووق ولهفه و اخدميه بعيونج وابدا لاتخلين الخدامه تدخل المجلس انتي الي شيلي وحطي و كل شويه اسأليه اذا مرتاح واذا محتاج شي و مثلا تقدرين تبخرينه قبل ما يطلع - يوم تاكلون مع بعض خلي الاكل و اسرحي فيه وهو ياكل و اذا قال شو فيج ليش ماتاكلين قوليله الاكل لاحقه عليه بس ابا اشبع من شوفتك وبعدين اتنهدي ونزلي راسج وقولي بس حسافه انته ماينشبع منك اصلن وبعدين طالعيه بعينج وابتسمي >>والله بيذووب وقتها - اذا اكل وشبع قوليله لا حبيبي كل هاذي من ايدي و عطيه اللقمه الاولى و الثانيه و الثالثه و شربيه عصير >>>صح بتصيبه تخمه بس بيستانس مرته مهتمه فيه - اذا يوم بغيتيه يطول الزياره وهو مستعيل بيروح شاغبي مره خبي مفتاح السياره و مره اصرقي النعال و خبيه او مثلا تقرين تلبسينه و تشردين و صيري طفله صدقيني بتعيبينه - تقدرين تاخذين تذكار منه مثلا الغتره او القحفيه او الفروخه الي تكون في الكندوره هههه اي شي واذا قالج شو تبين فيهم قوليله اباه عشان فيه ريحتك و نزلي راسج وقولي بحطه يمي يوم انام بكل حياا و خجل - يوم تطلعون في السياره و اذا كان زوجج من النوع الي يسمع الاغاني قوليله حبيبي شو رايك تحط هالشريط نستفيد شوي و حطي شريط محاظره اهم شي اختاري شريط يكون شيق و مفيد لكم هالفتره اتكونين سمعتيه من قبل وتعرفين انه بيعجبه - كل يوم كلميه قبل النوم واذا يوم ماتصل وانتي اتصلتي ومارد او مثلا كان زعلان طرشي له مسج (حبيبي صدقني ماقدر وماعرف انام بدون ما اسمع صوتك) اصبري مده ولو صار الوقت واايد متأخر >>>عادي لو تنامين وحطي المنبه في وقت معين وقومي عشان تطرشين المسج وارجعي نامي ههههههه، اذا كان نايم من يقوم ويشوف المسج بيتصل واذا كان واعي بيتصل فيج على طوول - دايما رددي هالدعاء قدامه (ربي يحفظك ويخليك لي او عسا الله لايغير علينا) - دايما انتي اطبخي له اذا يا يزوركم وسوي كيك او حلى بسيط او اكله عشان يوديها لأهله - تفنني في العصير الي تقدمينه اول ما يدخل يعني مب دايما يكون عصير جاهز انتي سوي العصير بنفسج مره ليمون بالنعناع مره برتقال فريش مره موز بالحليب مره كوكتيل - اذا شفتو اطفال في مكان وزوجج يلس يلعبهم ويكلمهم قوليله عقبال ما تلعب عيالك او عيالنا - ممكن تسوين له مساج خفيف يعني تهمزينه لو كان تعبان مثلا تهمزين ايده او ريوله او كتفه - دايما قوليله (اتحمل على عمرك حبيبي، دير بالك على روحك عمري، الله يحفظك لي يارب) - اطلبي منه صوره وخصوصا صوره يوم صغير و شوفيهن قدامه وقولي فديييتك وفديت عيالي يوم بيطلعون حلوين جذي شراتك - دايما قوليله انا اسعد انسانه في الدنيا لانك زوجي - اذا زعل اتفنني في ارضاءه - خلي خواته يساعدونج لو كان في امكانيه انج تعطينها اغراض انتي اشرتيتيها لزوجج تخلين اخته تحطهم في غرفته و تكتبين رساله انها منج >>>بيستانس بيحس ان زوجته معاه وهي بنفسها جابت الاغراض - استغلي اي فرصه عشان تعقين عليه كلمه حلوه او تعبرين له عن حبج مثلا انا مره سويت حركه ان جاب لي جوازي وتعرفون يوم وحده تتزوج يصير اسمها متبوع بإسم زوجها فمره طلب مني اني اعطيه الجواز حطيت له رساله داخل الجواز وكتبت له كلام حلوو مضمونه اني فخوره اني زوجته (باختصار طبعن) - امدحي عطره قوليله ريحتك حلووه شو هالعطر ماشاءالله عليك ذوقك حلوو في العطوور - دايما امدحيه و حسسيه انج مجنونه عليه - اكتبي مسجات من تأليفج حتى لو كلام عادي مثلا يوم يطلع تقولين له ماتصور اشكثر كنت مستانسه اليوم لانك موجود عندنا واحس ان الوقت يمر بسرعه ، مثلا قولي دووم اتمنى يوم اكون وياك ان الزمن يوقف و الوقت يمر ببطء اذكر مره كنا في الزحمه طالعين انا وياه و كان هو متضايق عشان الزحمه حطيت ايدي على ايده و طالعته بنظره كلها حناان وقلت له حبيبي ودك الزحمه تخف؟؟جان يقولي هيه رديت عليه وانا ماتمناها تخف ابدا هو استغرب بالبدايه بعدين فهم وضحك ونزل راسه جان اصد الصوب الثاني انا وقلت هيه عشان اتم وياك اكثر وبعدين اطالعته وابتسمت. - يوم تطلعين وياه مثلا وانتي في السياره وهو مندمج في السواقه طرشيله مسج اكتبيه احبك او اي شي فخاطرج مثلا مره كتبتله ربي لايحرمني من وجودك جمبي .. - حاولي بين فتره وفتره تطرشين له احاديث كمسجات يعني لو كان متضايق طرشيله الدعاء الي يقال عند الكرب لو غضب طرشيله ادعيه تنهي عن الغضب طرشيله مثلا اذكارات و استغفارات هالامور خليه يتعود ان يكون لسانه رطب بذكر الله - من ناحية اللبس لما يزورج داايما غريري ستايلج مره البسي تنوره مره فستان ناعم مره جلابيه ومره بنطلون خليه كل مره يشوفج بشكل عشان يعجب فيج اكثر تسريحة شعرج على طوول غيريها لاتخلينه يتعود انج تسرحين شعرج بطريقه معينه اكيد كل وحده منا ترتاح لتسريحه معينه بس عشان زوجج غيري و حاولي تتعودين على التغيير حتى عقب الزواج الله عطاج هالشعر نعمه وزينه استغليه و خليه يكون عامل لجذب زوجج - دايما اسأليه حبيبي تغديت حياتي تعشيت؟؟اذا قالج لا قوليله،الحين عمري تروح تاكل لاتتم باليوع عشان خاطري - دايما اسأليه عن اهله حسسيه انج منهم ويهمونج و ادعيلهم و دووم قولي الله لا يغير عليكم الله يخليكم لبعض الله يسعدكم - اذا عندهم يهال دووم تذكريهم بهدايا لو شي بسيط - حاولي تفتحين له قلبج في بعض المواضيع حسسيه بأنج تلجأين له وقت الشده و انه هو ضهرج وعضدج و بعدين قوليله الله يخليك لي ولا يحرمني منك منو لي غيرك فديتك يا اعز الناس ومن هالكلام - كوني عفويه وعلى طبيعتج ولكن لاتدفشين زياده عن اللزوم - اسمعيه يوم يتكلم و انصتي له - اهم شي تخلينه يثق فيج ثقه عمياء يعني مرات الشباب تييهم شكوك وظنون مب منهم ومب لانه مب واثق فيج بس من الي يشوفه برع فلو طلب يفتش تليفونج عادي عطيه لو طلب باسوورد ايميلج عطيه لاتكبرين الموضوع وتهاوشينه وتقولين له لييييش وماتوثق فيني و شوو شايفني عشان تشك فيني ،ترى هاذا مو شك هاذا حب وحرص وغيره - نصيحه قالتها امي لمرت اخوي من زماان وانا سمعتها وحطيتها في بالي كان اخوي يطلب من المطعم و يكلم الهندي من الدريشه وكانت مرت اخوي صاده ويهها عليهم وهم يتكلمون فلما رجعنا البيت امي قالت لها ابدا لا تلتفتين للرياييل في الشارع وفي اي مكان خلي عينج في الارض او في زوجج بس هالشي بيخليج تكبرين في عينه مرات بادري انتي بانج تمسكين ايده في السياره اسرحي فيه وهو يسووق قبلي ايده وقوليله لاخليت منك يارب - طرشيله كلام حلوو في الايميل طرشيله محاضرات واكتبي نك نيمات تعبر عن سعادتج بأنج حبيبته وعن حبج له - اهم شي خلي القرار بإيده و الشور شوره لاتدخلين لاتقولين كلمة لا او مابا دايما قولي الي تشوفه الي تامر عليه الي يعيبك يعيبني الي يريحك يريحني على راحتك وممكن بعد هالكلام تقولين شو رايك لو مثلا نسوي بطاقات العرس عند المكان الفلاني او شو رايك نروح عند المكان الفلاني بعد نشوف يعني اتركي القرار بإيده >>>>اقولج ليش/ لان هو الي بيدفع من انتي،هو مابيقصر فيج وبيسوي الاحسن بس انتي لاتحاولين تفرضين رايج، يوم بيشوفج قنوعه و ماتتسلطين صدقيني هو الي بيهتم اكثر منج وبيدور الافضل - لو شوو كنتي تسويين ردي عليه اذا اتصل و لاتضايقين منه ولا تحسسينه بها الشي - قولي الصدق دايما ولا تجذبين صح ممكن يعصب بس بتكبرين فعينه وبيعرف انج مستعده تقولين الصدق دايما - دايما اسأليه اذا هو راضي عنج ولاتخلينه يبات وهو زعلان منج - صح نسيت اقولكم ان هاذا مب من اول يوم تملجين فيه يعني بين فتره وفتره وانتي بتحسين متى الوقت الملائم عشان تطبقين هالشي - و اهم شي اول ايام الملجه اسأليه عن الاشياء الي يحبها و الاشياء الي يكرهها وشو صفات الزوجه الي يتمناها دايما,وشو من هالصفات لقاها فيج..اكيد بيحاول يجامل بس انتي سحبي منه الكلام واعرفي شو يحب ويكره - ونصيحه هالفتره حاولي تعتمدين على نفسج في كل شي غسلي ملابسج بروحج وكويهن،ساعدي في البيت في المطبخ وفي باجي الشغل،دوري لج شغل من تحت الارض عشان يتعود جسمج على التعب لان يايينج تعب واايد واذا الحين ماتعودتي مابتقدرين بعدين - العبو بعض الالعاب مع بعض مثلا مسابقة المعلومات اسأليه اسأله وخليه يجاوب وشوفي كم نقطه يجمع وبعدين خليه يسألج وشوفي كم نقطه تجمعين ممكن تيبين العاب تلعبونها مع بعض يوم يزورج مثلا منوبولي ولا اونو او لعبة الورق(البته) او شطرنج اي شي جذي - اتصلي فيه الصبح وعيه للدوام اذا نام بعد الظهر اتصلي فيه وعيه لصلاة الفجر كوني مهمه وخليه يتعود عليج ومايقدر يصبر عنج |
آآآخ تعبت وانا اكتب
هاذا الي قدرت عليه للحين وياريت البنات يفيدونا ويضيفون رومنسيات حلوه عشان صدقوني هالفتره وايد مهمه ومهم انكم تستغلونها صح ولاتستوين شرات بنات اول تقولين استحي وماقدر لا الحين ماينفع هالكلام خليه الي ممكن يلاقيه برع بالحرام يلاقيه عندج بالحلال واقصد بهاذا الحنان و الحب و الاهتمام والله يوفقكم مع ازواجكم ويتمم لكم على خير و يسعدكم و ييسر لكم و بلييز يا بنات شاركوني بأفكار و حركات وانا كلما ادخل بحاول اضيف اشياء بعد يلا في انتظار مشاركاتكم الشيقه |
ربي يكتب أجرك حبيبتي ماقصرتي
موفقة ياعمري |
تسلمين يالغلا على الافكار الحلوه والعجيبه:17:
|
شكرا على الموضوع
بس في تعقيب بسيط وأتمني أنك تتقبلينه بصدر رحب هاذي الأشياء اللي أنتي كاتبته حق الزوجه لما تروح بيت زوجها لكن وقت الملكه يجب أن يكون الحياء هو المطلوب وليس الجرأه في الكلام والتصرفات إذا فعلت كل هذا أيام الملكه ماذا تركت لوقت الزواج الله يوفق الجميع ويهديهم ويصلح بنات المسلمين |
اقتباس:
|
اقتباس:
|
جزاك اله خيرا الموضوع حلو وكتر الله خيرك
في نقطة عجبتني جدا يوم تطلعين وياه مثلا وانتي في السياره وهو مندمج في السواقه طرشيله مسج اكتبيه احبك او اي شي فخاطرج مثلا مره كتبتله ربي لايحرمني من وجودك جمبي ..احبك موت ،، .... |
اقتباس:
|
اقتباس:
|
اقتباس:
و اكيد اقبل مادري اختي انا الي اشوفه ان زوجي مايحب البرود يحب المره الي تدلعه وتهتم فيه لاني جربت البرود و الجمود و أثرت على علاقتي فيه واايد و للحين في رواسب من ايام ماكنت جامده وخجوله و كل البنات الي اعرفهم مملكات الحين نفس حالتي اصلن الشباب هالايام يتزوجون و يخطبون عشان هالرومنسيات و السوالف آمين الله يوفق الجميع و خاطري اعرف انتي الحين مالكه؟او متزوجه؟ |
اقتباس:
بعدين الشباب يقارنون يعني يشوف صديقه متدلع آخر دلع مع خطيبته و هو مسكين خطيبته تكلمه كأنها تكلم ضابط مخفر بعدين عشان يتعلق فيج وجذي انتي بتسيطرين على عقله الباطن لان الشباب يتخيلون كل شي فمثلا لو شافج جذي بيقعد يتخيل شو ممكن تسووين لو كنتي عنده وبيحبج اكثر بس اهم شي لاتغفلين ان تستمرين تدلعينه طوول عمركم مب الحين وبعد الزواج تتغيرين ديري بااالج ترى بالشاكوش على راسج:29: هههههههههههههه شاكره مرورج اختي و الله يوفقج |
اقتباس:
حياج الله |
اقتباس:
حبيبتي أنا متزوجه منذ خمس سنوات وزوجي أكثر ما يحبه فيني ويجعله يعطني الحريه المطلقه هو خجلي منه ومراعاة الحدود وأن لا نعمل كم تعمل امسلسلات الذي ننظر لها وكأنه حقيقة أرجو أن تفهمي قصدي وشكرا لتقبلك كلامي |
اقتباس:
وانا ينقهر مني اذا كنت بارده وحتى ينقهر مني ادعولي والله اليوم سكر عني وهو متضايق و العفو اختي وادري انج قلتيلي هالكلام من خوفج وحرصج بس شسوي هو يبا جذي الله يوفقج ويا زوجج |
شوقتني ارجع لايام الملكه بس انا كنت مره خجوله واتعودت ابقى خجوله
على العموم ما فاتني شي ممكن اسويها الحين لان بعض الاشياء جريئه ومبالغه لو نخليه لفترة الزواج احسن ولكن جزاك الله خير في نقاط ممكن يستفيدو منها المخطوبات وكلن على حسب عاداته واطباعه |
الموضوع ما شاء الله جدا جميل
قرأته نصفه و سأحتفظ به كله عندي لأهميته يا جماعة , البنت قالت المملكين لماذا كلكم كلتوها و اتضايقتوا منها أصلا السبب في كثرة الطلاق وقت الملكة هو الجفاء اللي حاصل و البرود و التغلي اللي حاصل بين الزوجين ثم هم حلال بعض يعني مهما عملوا فكيفهم , لم يذنبوا ذنبا أو يقترفوا جريمة جزاكِ الله خيرا على النقاط المفيدة و أعدك أن أكمل القراءة اليوم أو غدا بإذن الله |
وفقك الله يالغاليه
موضوع مفيد لكل عروس |
افكارك جميلة
اندمجت مع الموضوع وكما ذكرتِ .. فلكل زوجين عادات واختلافات والذكية من تحاول التوفيق بين رغبة زوجها وبين المصلحه التي ستجعله يتعلق بها بارك الله فيك اختي الفاضله واصلح مابينك وبين زوجك .. وحفظك من كل شر .. ويسر امورك ووفقكما لكل خير .. ورزقكما الذرية الصالحه المصلحه فقط لي تعليق احببت لفت نظرك له من خلال ردود بعض العضوات وهو في توجيهها لنقطة "السينما" اكيد ان بك من الخير الكثير بارك الله فيك .. واجمل نقطة كانت في موضوع الايقاظ للصلاة والتذكير بالأدعية لكن اعتقد ان قصد الاخت انه لاشك ان كل واحده منا لها من الذنوب والمعاصي .. التي نسأل الله ان يتجاوزها عنا ويسترها علينا فكان من باب اولى اخفاء مثل هذه النقطة .. وعدم ابرازها في موضوعك " رغم انه قمــــــــــة في الجمال والفائدة" استفدت منه الكثير بارك الله فيك فليس الخطأ فقط في كون الناس ينظرون .. لأنك كما ذكرتِ لايشترط ان يراكما احد لكن اعتقد ان الخطأ .. واعذريني .. هي مشاهدة او دخول هذه الاماكن اسأل الله لي ولكِ التوفيق والسعاده والصلاح تقبلي ودي |
يارب يوفقني الله والقى وحده تعيشني هالعيشه
امه داعيه له الي يحصل كل هذا |
تسلمي على هالكلام إلي افدتينا به وإلي يثلج الصدر ،
عسى الله يجعلنا جوهرة في أعين أزواجنا ويرزقنا بالسعادة دنيا وآخره |
الله يسعدك مع زوجك يارب
مشكورة .. نصائح تهبل .. بعضها اطبقها و البعض عن جد ما اقدر عليها بس مع الوقت ان شاء الله |
انتي تعبتي وانتي تكتبينـ
أنا تعبتـ وأنا اقرى هع هع هع بس كلام مررررررررررررة حلو ومفيد إن شاء الله وله مفعوله للي تعرفـ تتصرف في الأمور والمواقف... شوووووووووووووووووووووكرنـ عزيزتي |
أفكار حلوة ورائعة جداً يحتاجها الزوجين لزيادة العلاقة الزوجية
|
مشكووووورة على الافكار الحلووووة
الله يعطيج العااافية .. :) |
| الساعة الآن 08:52 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©