|
أختي بتتزوج مسيار وأن أحاول أقنعها ...ساعدوني بالنصح!
السلام عليكم والله أنا متابعة لهذا المنتدى الرائع من 4 سنوات يعني من يوم انضميت لنادي المطلقات الصغيرات:d والله حبيت تشورون عليّ وتنصحوني في المشكله اللي أنا فيها لأنه على قولتهم"غلب حماري" أختي الكبيرة عمرها تقريبا 37 سنة و هي عاشت مآسي من يوم عمرها 15 سنة ،اتزوجت ولد عمي و أخينا في الله طلع حبيّب و عاقب عشيقته بزواجه من أختي وبس بعد ما صالحته طلق أختي بعد زواج 6 شهور فقط!... بعد تقريبا 6 سنوات اتزوجت واحد مطلق وعنده ولد مريض عقليا ،والله والصدق ينقال الرجال كريم مررة وطيب مرة ،بس بعد تحاليل وحوسة مستشفيات طوال 4 سنوات قلها يابنت الحلال أنا ماأخلف روحي شوفي نصيبك! و طلقها وصارت نفسيتها سيييييئة وبعدين دخلت كلية وكملت تعليمها وبعد 4 سنوات بالضبببط رجعها ووقتها كان توهم طلعوا بأطفال الأنابيب وحاولوا كم مرة وصرفوا آلالالافات المهم بعد 4 سنوات كمان نجحت عملية طفل الأنابيب والحمد لله ...في هذه الأثناء والعائلة في قمة السعادة قام يشك فيها ويقول خرابيط وكلام شييين مرة، وسألت شيوخ ودكاترة كثيير قالولها هذا مريييض وهذا المرض كان فيه من سنييين بس مخبي.. المهم مرت التسعة شهور طبعا من اسوأ ما يكون وطبعا في بيت اهلي ،وولدت وجابت ولد... المهم ما خلصت الأربعين الا وهو راميلها ورقة طلاقها و فوقها المؤخر بعد مية ألف رياااال..... و طبعا هي انصدمت مرة لأنه كل هذي السنين والمحاولات ولما يجي الولد يصير كذا ...المهم مرت السنين و الحين لها 3 سنوات متطلقة و أبو الولد يجي ياخذه في الويكند ويمشيه و يصرفله راتب كويس...و طبعا هي ما تشتغل زي حال المئات من الخريجات.... المهم قبل أسبوع راحت عرس وكان فيه خطابه توزع كرتها ، ودقت عليها وقالتلها مواصفاتها وقالتلها الخطابة صراحة وضعك مرة شين متطلقة ثلاث مرات ولا انتي موظفة ...بعد يومين فقططط دقيت عليها وجابتلها عريس لئطة بس الشرط ايش............مسياااااار و طبعا من مجاميعه بيت و مهر وكلش حتى ولدها بتاخذه معها طبعا انا اتوقعت انها ترفض بس المفاجأة انها وافقت وباصرار والمشكلة الوالد الله يعافيه سلبي مرة قلها انتي حرة انتي مو صغيرة ...وامي مخرجة نفسها من الموضوع و انا متقطعة أحاول افهمها تقول حتى لو تطلقت مرة رابعة عادي علأقل أعيشلي يومين ..12 سنة وأنا في عذاب ما اتهنيت بشباااابي نص عمري قضيته ببيت أهلي.... شوروا عليّ أنا صح ولا هي.... |
لو إنها اختي
بأقول لها توكلي على الله وتزوجي للمرأة احتياجات وأحاسيس والمسيار زواج مجاز شرعاً ولا فيه اي شئ بعدين هذا ما قصر وفر البيت والنفقة وكل شئ بسسسسسسسس حق المبيت مو موجود فخليها تتوكل على الله وتتزوج بوركتم |
والله يا أختي ما تنلام اختك
من الي شافته وذاقت مرارته الله يرزقها بزوج صالح ويسر امورها الله يطعمها ولا يحرمها |
لايااختي انامطلقة مرتين ولاافكربحياتي اتزوج مسيااااااااااار مهماكان ليش مالي حقوق وبعدين حرام اخسر حياتي واخسرنفسي ولااؤيد تتزوج مسيااااااااار نصيحة قوووووليها وحذريها تراهابتمووت قهرزياااااادة خليهاتفكر قبل ماتندم وتستخيرربي وربي يعوضهابالزوج اللي يقدرها ويسعدهاااا
مهماكان لاتياس والحياة حلووووووووة وقوليلهاتتفاؤل وربي يرزقهاا |
بصراحة أنا لا أحب فكرة المسيار ... ولكن حسب شرحكِ فإن أختكِ مرت بظروف صعبة جداً .... و(تبهذلت) في حياتها كثيراً .. ولا أدري حقيقةً هل سيكون المسيار في صالحها أم أنه سيزيد من بهذلتها وتعبها.
في كل الأحوال ليس في يدكِ إلا أن تنصحيها بالسؤال جيداً عن ذلك الخاطب ... والاستخارة مرات ومرات حتى يفعل الله ما يشاء. |
لا لا لا لا ترضى بل سيكون مسلسل الماسأة سيستمر والله العالم ممكن تلقى واحد يأخذها الرابعة أحسن من المسيار
|
المهم ان الزواج شرعي وقانوني خليها تتوكل على الله
|
شوفي حبيبتي المشكلة في كلمة زواج مسيار !!!
بس, لكنه موفر لها بيت وبينفق عليها هي و ولدها يعني بالله وش فرقه عن الزواج العادي ؟ بتقولين انه زواج سري, يا كثر الزواجات اللي بالسر وبيجي يوم و بينكشف وبعدين ترا اغلب اللي يعددون كذا تكون زواجاتهم وانا اعرف بنات متزوجين كذا و لا يسمونه زواج مسيار ! باركي لاختك وادعي لها بالتوفيق... |
لو كانت أختي لوافقت
ياناس اتقوا الله بنت ظروفها تعبانة لهذه الدرجة يعني تكون بين اربع حيطان طول حياتها احسن خليها تتوكل على الله وتتزوج وان شاء الله بعدين الرجال بيسكن معها على طول اذا عرفت تعامله صح |
الله يفرج همها يارب
وربي يكتب الي فيه خير لها بالرغم من اني معارضه لزواج المسيار وبقوه وللاسف البعض استغله خطاء الا اني اجد فيه راحه اكثر ولدها معاها وكمان بيوفر لها بيت ويجيها ايام بالاسبوع متفق عليها وبتعيش مرتاحه شوي لامشاكل ولاقلق ولا واحد يغثها اربع وعشرين ساعه لاكن اهم شي تستخير وتسال الله ان يكتب لها ما فيه خير لها وتسال عنه ووعن دينه |
انا اسمع عن زواج المسيار ولكن ما اعرف كيف طريقته وما هو حكمه ؟؟
اتمنى الاجابه من اصحاب العلم مع الشكر |
وعسى ان تكرهو شيئا وهو خير لكم
دعيها تصلي الاستخاره وتتوكل على الله |
السلام عليكم ورحمه الله
اختي ...صلي الاستخاره ودعي اختك تصلي الاستخاره وعسى الله يهديها لما فيه الخير اخوك |
رأيي الشخصي بما أن عمرها 37عاما ومطلقة ثلاث مرات فعليها بقبول هذا الزوج ولعله يتوفق معها ومن ثم يتحول الزواج المسيار الى زواج حقيقي فعليها بالاستخارة قبل كل شيء
|
انا من رأي الاخوات
خليها تتزوج مادام الزواج شرعي شو الغلط وبعدين لو أنها صغيرة نقول لا بجيها واحد غير بس هي مجربة الزواج وحرمانها من التمتع بحياتها والله حرام الله يهنيها وساعديها ووقفي معاها والله يسعدها |
لا يهم صفة الزواج مادامت شرعية المهم دين و خلق الزوج
اذا كان من تقدم لها من يرتضى دينه و خلقه فدعيها تتزوجه لان هذه حياتها و ليست حياتك و هي بسن تتحمل تبعات قرارها وهي اعلم باحتياجاتها منك وبماذا ستخدمينها في حال عدم زواجها بهذه الطريقة؟؟!! وداعة الله |
ابدا يااختي خليها تتوكل على الله وتتزوج اش بقي من العمر خليها تتهنى لها يومين من جد وبعد الزواج شرعي ولا شئ فيه وهو ماشرع الا لهذه الضروف ومدام اهلك عارفين والي حولكم عارفين ماهي المشكله تتزوج ويجها مره مرتين في الاسبوع احسن من حياتها عازبه طول العمر والله تكبر اكثر من كذا ماحد يجيها خلوها تشوف نصيبها احسن
الله يوفقها يارب ويوفقكم بشرينا |
أسأل الله لك و لها التوفيق
و تيسير الأمور |
اختي انا غير مؤيده لزواج المسيار لكن وضع اختك و حالتها غير اختك كبيره و ناضجه و اكيد عارفه احتياجاتها و مصلحتها.. لا توقفي في طريقها بس ذكريها بالاستخاره و عسى الله ييسر لها الخير.. بس سؤال مو خايفه ان طليقها ياخذ منها الولد لو عرف انها متزوجه؟ الله يوفقها و ييسر لها امورها |
اغلب زواجات المسيار يكون بدون مسكن يعني تبقى في بيتها أو عند اهلها لكن بما أنه بيوفر لها سكن وين المشكلة؟؟
|
الله يكتبلها الي فيه الخير ...
|
الله يكتب لها اللي فيه الخير وعليها بالإستخارة |
لاتدرين عن المستقبل قد يتحول المسيار الى رسمى اذا ارتاح معها والله يوفقها ويعوضها عن الماضي .:22:
|
وش فايدة الظل يوم الرجال مو موجود....اختك انظلمت ما قلنا شي عانت حقيقة من حياتها بس اللي اتضحلي انها هي اللي ما قدرت اتحافظ على بيتها مو على كيفه الرجال بعد كل هذا يجي بكل سهولة يطلق إلا اذا كانت هي من غير شخصية قدامه ....اسمحيلي اختي اذا اختج ما عرفت كيف اتحافظ من البداية كيف راح تنجح في المسيار.....
وبعدين وش فايدة الظل يوم الرجال مو موجود يعني راح اتعيش وحدة * وحدة ما راح يتغير من حالها شي......يا اني اختار زوج يكون عزوتي وين ما رحت واتظلل في ظله متى ما حبيت ولا بلاها لو حلال مهما كان...... وربي يوفقها ان شاء الله خلها تستخير وان كان خير وفي مصلحتها ربي راح ييسر ان شاء الله.... |
أشكر كل الأعضاء و المشرفين اللي ردوا علي الله يجبر بخاطركم وجزاكم الله ألف خير |
اقتباس:
الرجال كان مشكلته الشك و الواحد يقدر يستحمل أي شي الا انه أحد يتهمه في شرفه و على الرغم من ذلك ما طلبت الطلاق على أمل ينصلح حاله بس هو ما منه أمل ... المشكله لو هي وضعها يسمحلها تحط شروط بس مافي فرص ،الا انها تاخذ واحد في ال60 فما فوق وهي وربي مو ناقصها شي بس مالها حظ... أشكرك وجزاك ربي خير... |
أنا مع اختي ام السوسة
وضع أختك عندها ولد يعني محتاجه وقت انها تراعيه وتشوف أموره فهذا النوع من الزواج يناسب ظروفها يعني ما تكون مسؤله عن الزوج طوال الوقت والاهم ان زواج شرعي وبمعرفة أهلها ورضاهم ومن يعلم قد يجد معها الراحة والسعادة وينقلب لزواج دائم بأذن وتوفيق من رب العالمين ربي يوفقها ويسعدها |
عندي سؤال ,, الرجل سيوفر لها السكن و النفقة فلماذا اذا طلب ان يتزوجها مسياراً ؟
كيف يكون الزواج مسياراً مع توفر السكن و النفقة؟ |
مسيار يقصد به يمره مرور الكرام ساعة ساعتين ثم يذهب هذا القصد وليس يوم كامل
|
خليها تتوكل على الله و تتزوج .. لكن يا ليت تعمل حساب انها ما تحمل من اول الزواج لحد ما تتأكد من ان حياتها مستقره مع زوجها .. وربي يسعدها .. |
يبدو أن الخطابة قالت مسيار ... فبدئتوا تكررون كلمتها ... دون علم بالمعاني ... أتحدى أي شخص يثبت أن هذا زواج مسيار ..؟!؟ يسكنها وينفق عليها ... وتسمونه مسيار ... ويبدو أن بعض النساء تجيها حكة وحساسية وتبدأ تخبط في الكيبورد عند سماعها ألفاظ متداولة مثل التعدد والمسيار وغيرها ... وتبدأ بالمعارضة دون فهم لماهية هذا الزواج ... قرأوا كلمة مسيار ... فطاروا على الرد حتى يكتبوا لا تتزوج أختك بما انه مسيار ...!! عجبي من عقليات غريبة .... دمت بحفظ الرحمن .... |
بصراحة حالتك أختك تعور القلب يا عمري عليها ما تهنت بشبابها
وشفيها لو تطلقت المرأة أكثر من مره لا هو عيب ولا حرام المسكينه الله مقدر عليها هالشيئ من قبل لا تنولد ويمكن الله بيعوضها بهاالاخير ... خليها تجرب وبعدين هو زواج شرعي بس لازم بالاول تستخير وثاني شيئ لازم تاخذ الحذر وتختبر الرجال زين قبل لا تجيب منه عيال وسبحان الله يمكن هذا الرجال يكون هو فرحتها ونهاية عذابها |
خلها تتوكل على الله الله يهنيها ويستر عليها تصدقين عاد رجال هلايام ماحد يتحملهم 24 ساعة بالبيت وكل يوم تشوفه
احس التعدد نعمة للنساء اكثر من الرجال على الاقل الوحدة تفتك منهم كم يوم والزواج شر لابد منه |
توكلي على الله وبالتوفيق
|
اقتباس:
أخوي بارك الله فيك ويجزاك خير هو مسيار من ناحية المبيت يعني يجيها أيام محددة بالأسبوع و كمان أهله ما يدرون بالموضوع يعني هو صحيح بيحطلها بيت ونفقه بس ما ينفي أنه مسيار.. |
أختي الكريمة : :: : إذا كان هو ما ينفي انه مسيار ... فهل العبرة بكلامه أو العبرة بالشرع ..!؟! إذا جاءنا إنسان وقال هذا الكأس عصير عنب ... وهو خمر ... ولكن كلامه فيه وجه من الصحة .. فهل نسلم أن هذا صحيح وأنه عصير عنب ويجوز شربه ...!؟!؟ أختي الكريمة ... تعريف زواج المسيار هو .... أن يعقد الرجل زواجه على امرأة عقدًا شرعيًا مستوفي الأركان . لكن المرأة تتنازل عن السكن والنفقة وهذا التعريف نقلا من كتاب الشيخ عبدالملك المطلق " زواج المسيار " ويا أختي الكريمة : ألم تتنازل أمنا سودة بنت زمعة رضي الله عنها بليلتها لعائشة رضي الله عنها ... فهل نقول ان النبي صلى الله عليه وسلم أخذها مسيارا ....؟!؟ ثم مسالة أنه يريد الزواج من غير علم أهله ... فهل من شروط النكاح معرفة الأهل ...؟!؟ لك حرية الإجابة ... دمت بحفظ الرحمن .... |
استحلفكم بالله جميعكم الذي ايد فكره هذا الزواج لو هذه اختكم هل راح توافقون
اللي ايده في الماء ليس زي اللي ايده في النار يعني صاحبه الموضوع كتبت الموضوع وتحس انه معاناه لان هي صاحبة الشأن وبصراحة زواج المسيار بالرغم انه حلال لكنه شوه بصوره بشعه هذه الايام حتى صار اقرب الحرام والعياذ بالله يعني اش بيصير بعد كذا البنت راح تتعود على هذا الزواج المؤقت ومن حضن الى حضن واسم العائله وهذا البيت راح يشاع فيه ان عندهم بنت تتزوج مسيار وعلى كيف كيفك لين تصير مشهوره وانا اعرف قضايا مشابه لهذه الحادثه ، تكون اسماء العوائل اللي تزوج بناتها على لسته والزين والشين يشوف اسامي العوائل المؤيدين ترضون هالشي يحصل لكم |
العسل 22
بسالك طيب سوال انت ووش الي يدريك ويخليك تتكلم بثقه وتقول انها بتكون من حضن لحضن انتم متتاكد من نوايا الرجال وانه بيطلقها الحين والله شي غريب انا احس مدام الرجال بيوفر مسكن ونفقه معناته انه جااد بالزواج ولاوش يخليه يخسر فلوس سكن ونفقه لو هو يبي يلعب كان دور له بنت ساكنه فيث بيت اهلها ولاصرف عليها شي بس يمكن هو عنده ضغووط او اسباب تخليه يتزوج ثانيه وهاذي شي محلله الشرع عادي بس مايبي اهله يدرون يبي يبعد عن المشاكل وعوار الراس ومتى ماجت فررصه بيعلن للناس صديقتي اخوهم متزوج بالسر مااعلن زواجه الا عقب 10 سنوات متخيل واصلا هالزواج مايسمي مسياااار يسمى زواج بالسر لان توفرت شروط الزواج فيه |
ياااااااااااارب اسالك بوجههك الكريم ان توفق اختي بالله في هذا الزواج وتسعدها وتصلح شانها يااارب العالمين
اهم شي تستخير وانا اييد هذا الزواج لان الرجال وفر المسكن والنفقه والله لو هو لعاب كان ماوفر عهالاشياء قال وش لي بالخساير صح ولالا هذا زواج سرر مو مسيار وان شاء الله يعلن عن قريب |
الله يوفقها بس هذا مايعتبر مسيار لوجود السكن والنفقه..ممكن يسمى زواج بالسر والله أعلم..
|
| الساعة الآن 08:40 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©