|
اليوم أنا عند والد البنت ولكن للأسف" ضقت ذرعا بنفسي" !!
السلام عليكم ورحمه الله وبركاته
صباح او مساء الخير خلونا ندخل بصلب المشكله على طول...! تقدمت لبنت من اقاربنا البعيدين بتوصيه من اهلي ومباركه من الله ثم منهم .. وصار اول خطوات الخطبه هو ان اهلي اتصلوا على اهل البنت وفاتحوهم بالموضوع ووافقوا تقريبا وماهو اكيد لكن تقريبا .. طبعا اخوي راح لابو البنت وكلمها وجلس معه وقال ابو البنت والله مانقدر نرفضكم بالعكس هذي الساعه المباركه لكن ابغى اشوف الولد انا بعدها بثلاثه ايام رحت لابوها وجلست معه وفي نيتي ان المسأله ان شاء الله انتهت وانهم وافقوا !!طبعا هالاجتماع الصغير كان بحضور بعض اخوانها وقريب لهم المهم دارت الجلسه بكلام ماله اي دخل بالزواج نهائيا يعني كأي جلسه من الجلسات واستمرت الجلسه حوالي 3 ساعات وبعد الغداء بربع ساعه انا استأذنت طلع معي ابو البنت وقالي ياولدي شوف انا ماعندي مانع والبنت والام والاهل ولكن المشكله في البنت تبغى تكمل دراستها !! قلت انا ماعندي مانع انا الي راح اسعى لها بتكميل الدراسه ولا راح اوقف واصير حجر عثره بالعكس انا ابغاها تكمل .. قال الاب طيب البنت لك ان شاء الله بس تبي تصبر سنه !!؟؟ قلت انا لا والله انا ماعندي استعداد اني اصبر انا مليت من العزوبيه وابي اتزوج باسرع وقت سنه يابو فلان طويله قال هذي المشكله بس بالدراسه لكن بكلمهم (يعني البنت وامها) وارد لك .. قلت اوكي ماعندي مشكله طبعا الكلام هذا كله كان امس .. بس انا ضايق صدري وللعلم هذي ثاني خطوبه الاولى كانت برفض من الام وهالمره تقريبا من البنت عشان الدراسه وللعلم الحمدلله مابي امدح نفسي انا مالي لا بالدخان ولا الطلعات ولا غيره وموظف والحمدلله راتبي يكفيني وفوق هذا كله الحمدلله حريص على الصلاه لكن وش سبب هالمشاكل انا كل ماتقدم اروح لابو البنت وبعدها بكم يوم يقولون ماعندنا لك نصيب وش الحل ياجماعه انا مليت ودي اكنسل فكره هالزواج من الاصل مادري هل البلا مني ولا من غيري انا ضايق صدري ان مارد علي هالمره انا بتحطم صراحه ولو كان فيه رفض اكيد برضوا بتحطم مادري ياجماعه لو لم يكتب الله لي نصيب مع هالبنت هل النصيب الى الان ماجا ولا كيف ...!! وعساها خيره يارب تحياتي الاشراف : لفظ المشيئة يكتب إن شاء الله ,بالتوفيق . |
اخي عساها تكون خيره لك
استغفر الله ترفض الزواج من اجل دراسه اخي عساها تكون خيره لك استخير الله ان كنت تستطيع الصبر عن البنت اوممكن تملكون وبعد سنه تتزوجون واذا لم يوافقو لاتحزن ،ادعي الله بالزوجه الطيبه اللي تسعدك الله يرزقنا من فضله يارب |
وعليكم السلام ورحمة الله وبركاته
أنت قلتها عساها خيره يارب ,,, والله يكتب لك الزوجه الصالحه اللي تسعدك وتهنيك ويرزقك منها الذريه الصالحه لكن لاتستعجل الأمور وانتظر ردهم بإذن الله اتمنة لك التوفيق يارب |
مدام انها من الأهل ممكن توسط احد يقنعها
لان في بنات يتخوفون من عدم التوفيق بين الدراسه ومسؤوليه الأرتباط من كثر اللي يسمعونه حواليهم اذا فيها خيره لك هالبنت الله ييسر امرك معاها وان كان شر الله يرزقك بمن هي افضل |
وعليكم السلام ورحمة الله وبركاته
يا هلا والله بوليد يا هلا والله ببني عمي...:22: موضوعك وقته كتابته 1:49 AM يعني نقول صباح الخير...:d شكل الهواجيس والأفكار ما خلت تنام .... على أني أنا ما عندي خبره في هالأمور لكن أحب أعلق على ما كتبته من باب التعاطف وإلا أعضاء المنتدى لن يقصروا معك بأرائهم واقتراحتهم أحب أقول تعليقاً على ما كتبت اقتباس:
بالنسبة لتضايقك و لتضجرك وأنها الخطبة الثانية ، أقول ما جاء نصيبك حتى الأن ويمكن بعد كم يوم توافق البنت وأمها على الزواج ...فلا تخلي الهم يجعلك تفكر أنك تتخلى عن فكرة الزواج...(تعلب على مين.؟:d) أخوي بالنسبة لكلامك مع الأب أتمنى أنه توضح لهم وضعك وحالتك ثم هم يردون عليك والأخوة والأخوات ما يقصرون معك في مشاركاتهم الله يرزقك الزوجة الصالحة الحنونة ويرزقك منها الذرية الصالحة أخوك عزوبي:21: بس:d رجل:30: دمتم بحفظ الرحمن |
اختي نايت ماشاء الله استفدت منك الكثير وجزاك الله خير طبعا ممكن اني ادخل بمعرفات قبل واكتب مشاكلي لكن ماتروح المشكله الا وانسى معها المعرف وكل شي ^_^ واضطر اني ادخل بمعرف جديد
المهم انا الى الان مادري هل هو يبني بصدق ولالا .؟؟ ولو كان البنت تبي تكمل دراستها ليه ماقال لاهلي من قبل ليه بناديني ويعزمني ثم يقولي هالكلام مع ان انسان تقريبا كبير بالسن ومادري وش الحل انا عاشرت كبار بالسن واعرفهم لازم التدقيق وخاصه بالشباب اختي روز السعوديه شكرا لك وماقصرتي تحياتي |
اتوقع بما أن الاب مقتنع فيك وارتاح لك ممكن يأثر على قرار بنته
وفي النهايه الله يكتب لك الخير ويرزقك بالزوجه الصالحه وبالحياة السعيده |
سبحان الله الله وحده هو العالم بالخير وما يندرى وين الخير فيه توكل على الله واسع في موضوع الزواج ولا تقول الناس ليش ردوني انت رجااااااال وما يضرك شيء تخيل لو ان البنت ترد اكثر من مره كيف راح يكون شعورها وطبعا البنت اكثر حساسيه من الولد غير كذا نظرة الاهل لها والناس واللي عرفوا بالخطبه يا اخي عادي جدا وكثير تحصل والحمد لله انك شاب صالح ترى هذا ما يعيب الرجل انه يرد ويرفض طلبه
الله يرزقك بالزوجه الصالحه |
كتبت رد وللأسف ماطلع طلع لي سبيد تتش !! ^_^ << مقطع النت تقطيع !!
هلا ابن عمي عزوبي الظاهر انا وياك نبي نقلبها مزاين <<< تذكر مزاين الهيلا ^_^ بس تراني حضري اصلي :22:مالي بالبعارين تبي مزاين بقر مايخالف هههههه ^_^ اولا اخوي عزوبي شاكر لك ومقدر بس انا بصراحه ضايق صدري ابغى استقر انا والله مليت مليت بكل ماتحمله الكلمه من معنى والله الاستقرار هو الحياه غيره كنسسسسسسسل ^_^ بحر الاماني والله انتي صادقه الخيره فيما اختاره الله ومايندى مع اني مادري كذا نفسيا ارتحت للعائله وانا مابعد شفت البنت ^_^ الله يكتب الي فيه الخير يارب وادعو لي لاتخلوني تحياتي الاوزون والله ياختي انا بصراحه مادري هل هو مقتنع او بس مجرد كلام !! |
اتصل بيهم بعد يومين و شوف الموضوع
كلامه لا يدل على الرفض و إذا أتاك الرفض لا تيأس دور على بنت مخلصة تعليم عشان ترتاح من المشاكل دي مش لازم بنت صغيرة قوي تاخدها و تتعب معاها في مشاكل المدرسة أو الجامعة |
اختي نوران صادقه مشكله هالمدرسه يعني احد امرين اما انها تتفرغ لي وتهمل دراستها او انها تهملني وتتفرغ لدراستها والامر الثالث الي هو التوفيق بين الزوج والدراسه ممتاز بس اغلب البنات يالزوج يالدراسه وهنا المشكله مع العلم اني انا بالعكس حتى لو ماتتفرغ لي انا راح اتفرغ لها بتكميل التعليم الى ان تخلص الجامعه
تحياتي |
لم ترفضك لشخصك انما كان لديها سبب وهو اتمام دراستها
موفق |
اختي منى انا ادري لم ترفضني لشخصي وحتى ان مسأله الدراسه ماردوا علي الى الان يعني مساله وقف ولاصار رد منهم ابوها قال مشكله الدراسه انا قلت ماعندي مانع انا اعينها على الدراسه قال ارد لك بس انا خايف يرفض بعد هالتعب كله
تحياتي لك |
ممكن يستحوا يكلموك و ينتظروك تتصل لتسئل
اسئلهم بالغد أو بعد يومين و إن شاء الله لو فيها خير لك يكون فيه نصيب |
هههههه نوران اضحكتيني اضحك الله سنك (:
ماعتقد مثلا المساله مسأله حيا المسأله مصيريه يانعم يا لا وابو البنت مثل ماقلت لك انسان كبير بالسن لكنه فاهم وراعي دين ملتزم لكن انتي تعرفين الكبار يعني مستحيل ياخذ قراره بهالسرعه تحياتي |
وعليكم السلام ورحمة الله وبركاته
اهنن وسهنن ما شاء الله عليك ثاني خطبة صابك اليأس اجل وش اقول انا يالي خاطب خمس حريم وكلها تمت بالرفض من قبلهم ماعدا وحده من قبلي ومازلت ابحث فلا اعلم اين نصيبي والتوفيق من الله ويوجد لدي اثنين من الزملاء واحد من جماعتي والثاني زميل مقرب لي يعلم الله انهم لم يتزوجو الا بعد الخطبه السابعه ,والثامنه كانت هي النصيب فلا تعلم اين يذهب بك نصيبك ولا هو بشرط انك ماتاخذ الا بنت فلان بالتحديد يمكن مالك نصيب عندهم ايضا فابنات منصور مالي الصور كما يقال اخي العزيز لاتجعل هذا الامر هو العاق لك في اكمال نص دينك ولا تنسى ان المزوج هو الله سبحانه وانما ولاة الامور هم اسباب بعد الله سبحانه فانت ابحث والتوفيق من الله |
اخوي اذا ربي كاتب انها بتصير زوجتك فهم بيوافقون
واذا ربي كاتب لك وحده غيرها فبيرفضون اهم شي انت استخير والله يكتب لك الي فيه الخير ويزوجك بالزوجه الي تسعدك وتهنيك وتسعدها وتهنيها دنيا وآخره اللهم عاجلا غير آجل |
أخوي الكريم
ذكرت في أحد ردودك المدرسة، هل البنت تكمل التعليم العام ؟، أم تكمل تعليم جامعي. . .؟ أعرف واحد جلس 3 سنوات، وهو يتقدم ويرفض ،سبحان الله لم يكن نصيبه في القريبين منه وكان نصيبه عند عائلة كريمة لا يعرفها ولا تعرفه، وتعيش في مدينة بعيدة ،لكن الأن مرتاح وسعيد ومستقر من جميع الجوانب . . فأنت احسن الظن بربك وترقب فضل الله وكرمه لك وأسأل من بيده - سبحانه وتعالى - كل شيء ... وإن شاء الله قريب تبشرنا بخبر زواجك ،وتستقر وتقر..:d أخوك عزوبي:21: بس:d رجل:30: دمتم بحفظ الرحمن |
زعلان ليــــــــة , ده حتى أنت ما شوفتها كل شىء سابق لأوانه ولكل حادث حديث
لما تشوفها الاول الشوفة الشرعية ياترى هيبقى في قبول نفسي ام لا مرتاح معها ام لا متفاهم معها ام لا بعدان فكر واستخار وشوف هتقدر تتحمل اهمال زوجتك ليك واهتمامها بالدارسة الزواج عشرة عمر مش مجرد عايز تتزوج وخلاص كان الافضل تتقدم لاسر بناتها مخلصيين جامعة او حتى تعمل بوظيفة فضلا .. يرجى الابتعاد عن اللهجات المحلية قدر الإمكان المشرف / شاطئ المحبة |
أبد وأنا أخوك مالها سنع ضيقة الصدر ! والأمر اللي صار معك يصير مع 95% من الشباب انهم يتقدمون ويتم وضع حجة الدراسة او رفضهم بدون سبب ! طبيعي الامر هذا ولا يعني ابدا ان حظّك سيء أو انك ما ااحد يبيك أو من هالكلام اللي مصدره ابليس ! عادي، الأمر خيره لك ان شاء الله، يمكن اللي رفضوك المره الاولى بنتهم لو ماخذها كان كل يوم طقاق وهوشه ! يعني احمد ربك على ماقدّر لك، واستخر ثم استخر ثم استخر، وانتظر الامر يسر ان شاء الله وادع لي معك فضلا .. يرجى الابتعاد عن اللهجات المحلية قدر الإمكان المشرف / شاطئ المحبة |
لا تضايق ولا غيره صدقني غير نصيبك ماراح تاخده واللي كاتبه ربنا بيصير
الله يوفقك ويرزقك بالزوجة الصالحة |
مو كأنك كبرتها شويتين ؟؟!
وسّع صدرك لاأنت الأول ولابتصير الأخير ،، معروف الشباب عندنا يالله يتزوجون عقب خامس خطبة وياااااالله بعد .. ادع ربك بالخيرة وإن كان بهالبنت خير لك فربك بييسرها ولاالله يرزقك بخير منها .. ننتظر تبشرنا بإذن الله ... |
لا أدري ستخطب حورية من حور الجنة أم ماذا ..؟!؟! أخي الغالي طيعني وأنا أخوك .. لا تأخذ أناس غير مقتنعين بك 100% ... لا تجهد نفسك بالركض خلفهم ... حتى لا ينعكس ذلك بالمستقبل على علاقتكما ... أبحث عن من يقدرك ويعرف قيمتك ... لأنك رجل ... والناس تشتري الرجل ... وفقك الله لكل خير ... وتذكر أن أكثر ما كثر الله في هالدنيا الحريم ... دمت بحفظ الرحمن ... |
اقتباس:
اخوي وليد الف مبروك والله يكتب لك اللي فيه الخير اخوي الكريم انا خطبتي والله استمرت فترة طويلة من رمضان الماضي وزوجتي ملكت عليها قبل تقريباً 3 شهور :14: بس فيه بنات يفكرون انهن تعبن طول هالسنين والزواج بالنسبه لهن مثل العسل وزوجتي على كلامها تقول بنات متفوقات ازواجهم يحاولون فيهم يكملون ولا كملوا وتركوا الجامعه واعتبرها فترة انك تجمع فلوسك زوود على اللي معاك علشان تنظم امورك انا كان معاي مبلغ للزواج والحمد الله مع الانتظار سنه صار معاي فوق ميزانيتي بكثير والحمد لله السنه هذي اعطتني احساس بالمسؤولية وامساك المصاريف والتحكم فيها بشكل جيد اما بالنسبه لأبوها وانه عزمك وجلس يسولف معاك مو شرط يسولف معاك عن الزواج انا لما خطبت البنت ابوها سأل عني بالحارة وامام المسجد والعمل والدخان وكل هالامور بعدها بأسبوعين قال حياك الله ودي تتغدا معي ونسولف شوي وجلست انا وابوها وعمها نسولف بشوارع الرياض وزحمتها والحفريات ولا جبنا طاري الزواج الا لما جيت اطلع قال بنرد لك خبر ان شاء الله بس البنت تعبت بالجامعه وودها تكمل دراستها وكلها سنه وافقت صراحه لاني شفت البنت النظرة الشرعيه وعجبتني وتعلقت بأهلها وطيبتهم اهم شئ تفكر بنفسك هل انت مبسووط انك بترتبط بهالبنت واهلها ناس طيبين ؟ والبنت طيبة واخلاق توكل على الله وانتظر صدقني لو تدور بسرعه بس تبي تتزوج ومستعجل على العرس ماراح تختار زين العجلة بتعميك عن عيوب كثيره خذ وقتك وخذ راحتك وخل البنت تخلص جامعتها وبكره ان شاء الله تتخرح بتقدير حلو وتساعدك بالبيت وتتوظف وتكون معاها حياتك وبيت العمر والله يوفقك ابعد عنك الشيطان الرجال يبي يضمن مستقبل بنته والشيطان يوسوس لك انهم ما يبونك وان شرطهم ماله دااعي وانك مستعجل صدقني بتاخذ وقت اطول وانت تدور على غيرها وبيخلونك تنتظر اقل شئ 6 شهور فشوف انت اذا مرتاح للبنت وشفتها توكل على رب العالمين |
ياخي باين على الأب إنه شاريك
بس الضنا غالي و إنت بكرة بتجيك بنت و ودك تتطمن عليها و على مستقبها |
اقتباس:
فلا داعي لاخذ الموضوع بحساسية زيادة لو كنت انت السبب كان رفضو من اول مو يعزموك و يطلبو منك توافق على شرطهم البسيط واخي الكريم اذا كانت البنت كويسة اصبر عليها خلي الخطبة طويلة اعقد على نص السنة وجهز كل شي على نهاية السنة تكون هي عندك "تفائلو خيرا تجدوه" |
وليد ... ساااااااااامعني ...
وسع صدرك وانا اخوك .. شوف رد الاخ عاشق ماقصر والاخوان كذلك .. حبيبي خلها اخر سنه ملكه ههههههههههه .. حلوه سنه ملكه .. ومادام انك تبي تعرس منهم .. وعاجبينك .. ترى سنه والله ماهي كثير تمر مر السحاب .. حلو مر السحاب >>> شاعر الاخ .. .. |
خطبتين وضاق صدرك وتبي تضرب عن فكرة الزواج ؟؟؟؟؟؟؟؟
اجل البنات وش يسوون اللي تنخطب اربع وست وعشرة ولا يصير نصيب ... تو الناس بدري على اليأس .... توك في أول المشوار وماتدري وين الله حاط لك الخير فيه ... أهم شي ... اوصيك بالاستخارة يوميا ...سواء للبنت هذي او غيرها ليبارك الله لك فيما يسره لك .. خيرة ربي لك احسن من خيرتك لنفسك موفق ,,, |
الاحظ الشباب عندكم بالسعوديه يروح يخطب وحده او ثنتين وطبعا مايصير نصيب ويياس من الله ويقعد يفكر انه يشيل من راسه فكره الزواج ليش جدي
حنا عندنا بالبحرين عساه لو يخطب عشر ومايصير نصيب ماايمل ولايفل عزمه لان هدا نصيب والمفروض ماتصير حساس في هاالامور لان الانساان ممااساخد الا نصيبه ويحمد ربه بعد انت مااتدري يمكن هالبنت اتصير نصيبك لان ادا هالانسان من نصيبك لو تقومك القيامه تاخده تاخده واالامو من نصيبك لو تجري جري الوحوووش ماتاخده اي على قوه المثل لو تجري جري الوحووش غير رزقك ماتحووش اتصبر .. هدا انت صبي واتقول جدي .. شحال البنات الا يجون لهم خطاطيب ومايصير نصيب !! عجبي فضلا .. يرجى الابتعاد عن اللهجات المحلية قدر الإمكان المشرف / شاطئ المحبة |
الف شكر للجميع ويعلم الله انكم اثلجتم صدري وبالنسبه لم قالوا انك رايتها انا مارأيت البنت ولكن ان شالله لما اراها الرؤيه الشرعيه سيكون لكل حادث حديث
تحياتي للجميع بدون استثناء وليد |
عودا حميدا ^_^
اتصل علي ابو البنت وقالي حنا مافاتحنا البنت وش رايك بعد الاختبارات؟؟وقال ان سبب المشكله تكميل التعليم الجامعي وكان فيه كذا واحد تقدم لها قبل سنه وعرفنا مشكلة الزواج عندها لكن عنك انت مافاتحناها !! خلها بعد الاختبارات طيب وش رايكم؟ |
الراي ياااخوووي
انو هذي فرصة لك انت .... واختباراتها اكيد كلها اسبوعين... يعني بعالفتررررة احرص عالدعاااااااااء ولاتصير متشاااااااائم واضح من ابوها انه شااااااريك واطلب ربك كثثيرر اذا هالزواج فيه خير لك انت والبنت فالله يتمم ويوفق واذا فيه شر الله يرزقك باحسن منها واللي فيه الخييير بعديين خليك متفائل غيرك تقدم للزواج مره وثنتين وعشر لحد ماكتب لهم ربي نصيبهم وربي يوفقك يارب |
السلام عليكم ورحمة الله وبركاته
اخوي الله ييسر لك امرك ويصلح حالك ويؤنس وحدتك اما بالنسبه لابوها فالرجال شاريك وحابك ومعاه حق مو حلوه يشغل بال بنته في الزواج قبل الاختبارات ودامك متصربع ع الزواج للدرجه هذي فلازم تقنع اهلها بالزواج العاجل واذا ما رضو حاول ان تكون لست شهور فقط وانت شوف نفسك تقدر علي كده ولا لاء واذا انت حاببهم وشاريهم توكل علي الله وحاول تصبر سنه بس بشرط الملكه وانك تشوفها وتشوفك والله يوفقك يارب |
لا أعرف تخطيطهم لكن أمي في العام الماضي طلبت من أحد العرسان أن ينتظر بعد امتحاناتي و تحججت بها لتعطيني فرصة للتفكير و لتثقل عليه
طول فترة امتحاناتي كنت اعلم لكن لم اصدر قرار الا بعدما انتهيت من الامتحاناتي و تفرغت للتفكير و صلاة استخارة يعني قد يكون تأجيلهم اما ثقل أو رفض أو فقط يريدون فرصة للتفكير |
ربي يختار لك اللي فيه الخير
|
الله يختارلك اللي فيه الخير واللب ترضاه أخي حتى لو ما وافقوا لا تيأس فما أكثرهم بنات حواء اللذين يرغبون بالزواج والستر
|
اهلا بك أخي الفاضل
لماذا الخوف والانحطام !! هذه الفتاة الثانية يعني لسى بدري على أنك تتحطم وتتعقد الزواج قسمة ونصيب وإذا أنت مرتاح لهذي البنت عادي ياخوي إصبر سنة أحسن من إنك تدور على واحده ثانية الله سنه والا سنين إذا فيه نصيب تحاول تملك بدري وكلمها وتشوف بعدين إن ماقالت لك ماعندي مانع نتزوج بين الترمين :d هونها ياخوي وتهون زوجي جلس مو سنة :24: اربع سنوات لين خلصت دراستي والحمدلله لعلها خيرة بإذن الله وفقك الله |
| الساعة الآن 06:01 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©