|
مشكلتي في البحث عن الزوجه !
السلام عليكم عندي مشكله وياليت ألقى منكم ردود تريحني وترفع من معنوياتي شوي .. ومااستغني عن دعواتكم أنا موظف من خمس سنوات ومستعد للزواج مادياً ومعنوياً بس المشكله في إن امي لين الحين مالقتلي البنت المناسبه وطال انتظاري وصبرت لين مليت ولهـا سنه تدور ولا حصلت البنت المناسبه !! على ان امي اجتماعيه كثير وعندها علاقات بس سبحان الله كأن البنات اختفو يوم جات تخطب لي !! على انها يوم زوجت اخواني الكبار ماقعدت اكثر من شهر بس جات على حظي انا والحمد لله على كل حال يمكن يجي في بالكم اني اطلب منها مواصفات معقده في اختيار الزوجه وانا با العكس ماطلبت منها الا انها تكون على دين وجمال مقبول والعطله قربت وانا لين الحين ماخطبت ولا حصلت البنت المناسبه وانا صبرت وحصنت نفسي كثير على امل اني بتزوج وانا بحكم وظيفتي عندي تذاكر مجانيه سنويه والشيطان يلعب براسي كثير من ناحية اني اسافر وانبسط وانتو تعرفون الواحد إذا سـاافر مع شباب وشي الاشياء الي ممكن يسويها ! والله يثبتنا على طـااعته بس اني مع مرور الايام اتعب وبنفس الوقت يقتلني الهم وتذبحني الهواجيس .. واسف على الأطـاله بس اتمنى تعطوني حلول لها المشكله على ان امي ماهي مقصره لدرجه ان ابوي امس سألها عن السفر في الإجازه وقالت له ماني مسافره وطالعه الا لين ازوج ولدي وارتااح .. |
أخي عليك بالثبات على ماأنت عليه
من نعمة الستر وحفظ الله ورعايته ثانيا /عليك بالدعاء بأن يرزقك الله بالفتاة المناسبة في كل شيء (الجمال - الدين - المرح - الطيبة ) الله كريم جواد وخزائنه ملئ أكثر من الآستغفار والتوبة وتصدق بنية أنك تلاقي لك زوجة مناسبة وبأذن الله أسبوع بالكثير وأنت خاطب والله يوفقك وتزفك أمك عريس في الصيف يارب موفق أخي |
شروق
اسعدني مرورك وكلامك رفع معنوياتي كثير والله يسعدك ويوفقك |
بالنسبة لوضعك فأنصحك بالإقتراح على والدتك دخول أطراف أخرى تثق فيهم والدتك لكي يساعدوها في البحث سواء الأخوات أو الأقارب .... الخ
وإذا لزم الأمر خطابة تعطى المواصفات وشروط التكافؤ وكل شئ وربما تجد ضالتك عندها أخي الكريم ، شكرا لتعاونك ، يبقى الموضوع هنا لاختصاص القسم به كون الأخ من المقبلين المشرف / شاطئ المحبة |
الله يوفقك ياخوي ويرزقك اللي تتمناها يااارب
كل شي بالدنيا نصيب ربي ماكتب لك للحين تلقى البنت اللي تتزوجها اكثر الدعاء والاستغفار |
الله يرزقك الزوجه الصالحه عاجلا غير اجل
وانتبه تضيع دينك اولا وتربيتك ثانيا باشياء تندم عليها طول عمرك لاتعطي الشيطان مجال يسهل لك المعصيه خلك ثابت ومتمسك مثل ما انت وصدقني ربي بيعوض صبرك خير اختك بالله جينز |
اخي الكريم00
خمس سنوااااات !!! فتره طووووووويله جدا بحكم خبرتي00>>>> مزوجه اخواني الله يحفظهم00 يا اخي ما عليك 00إلا ان تقول لأمك 00اعزمي وتوكلي00وماهي جايه وحده على الكيف ابد00لا بد من تفاوت المزايا00 ولكن معقوله في هذه الفتره ما خطبت ولا بنت !! الله يسهل امرك00 |
الزو اج قسمه ونصيب و يااخي كل تاخيره فيها خيره ان شاء الله ربما ربي ما اراد لسه
ثانيا ادعي ربي يسخر لك الزوجه الصالحه مافي زي الدعاء والاستغفار والفرج من عند الله ثالثا احرص اخي الفاضل على تقوى الله وتمسك بدينك واخلاقك فربما يكون اختبار من الله يرى مدى تحملك وصبرك اخي لاتسافر ولا تجعل للشيطان مدخل عليك اسأل الله العلي القدير ان يرزقك بالزوجه الصالحه عاجلا غير اجل ويثبتك على الخير والصلاح امين |
الله يوفقك يارب وان شاء الله تلاقي بنت الحلال الي تتمناها..
بس نصيحة لاتجرب خطابات.. لان احنى جربنا اكثر من وحدة لمى جينا نخطب لاخوي كلهم نصابات..او لاغلبية هدفعم مادي..ويمدحون لنا في بنات ولمى نروح نلاقي الي قلنا شرق والي شفنا غرب.. يعني تحرجنا معاها ومع البنت ومع اهلها... يعني لاتورط حالك معهم الا اذا كنت واثق فيعم.. والله يوفقك يارب. |
الله يكون بعونك ويوفقك ويرزقك بالزوجه الصالحه المناسبه الي تخاف الله فيك
وتسعدك وتهنيك يارب بس فعلا سبحان الله بعض الناس تتيسر لهم بسرعه جنونيه والبعض يجلس بالسنين يدور ادعي الله في السر والعلن وخلي الوالده واذا عندك خوات يكثفوا البحث احنا لنا فتره طويييييييييييييييييييييييله ندور لخوى ووعلى كثر ماشفناله ومره نقول هذي لا هذي ولكن لاهو الي شجعنا والا احنا الي تقدمنا مره هو يقول يالله وبعدها يسكت معقول مستحي ترى الموضوع يبغله صبر ودعاء والله يحفظك استمر على ما انت عليه وحصن نفسك يوميا وابعد عنك وساوس الشيطان وتوكل على الله فمن توكل على الله فهو حسبه |
اخي الكريم عليك دائما بالدعاء لنفسك بالزوجه الصالحه مثل اللي في بالك في كل وقت
مثلا( بين الاذان والاقامه _ في السجود _ الثلث الاخير من الليل ) ثانياً : لايضيق صدرك لانك الى الان لم تجد الزوجه لعل في ذلك خيره ( دائما اجعل نظرتك تفائليه ولاتنظر من زاويه سوداويه ) بالنسبه ان اخوانك تزوجوا بسرعه حسيت ان امك يمكن تعجبها صفاتك واخلاقك وخايفه تخطب اي وحده ويمكن تكون غير مناسبه لك ولاتظن انك الوحيد اللي تعاني من هالمشكله بالعكس كثير مثلك ومنهم اخوي تعب من مسالة الزواج وكنا ندور له حتى امي تعبت تبي وحده مناسبه له خصوصا انه والحمدلله جامع بين حسن الخَلق والخُلق ويوم جاء النصيب خطب وتزوج في اقل من 4 اشهر والحمدلله توّفق في زواجه .. اسأل الله ان يرزقك الزوجه الصالحه عاجلاً غير آجلاً |
يالغالي .... احس ان الوالدة تدويرها يعني فيه تردد ... او يمكن ما تجزم وتتخذ القرار
بإمكانك يالغالي تجد الفتاة بخلال ساعة واحدة .. نعم !! الاخوان والاخوات قالوا خلال اسبوع لكن انا اقول لك خلال ساعة واحدة فقط !! خل الوالدة الله يحفظها ترفع السماعة ... او اختك ... وتتصل على وحدة من قريباتكم مثلا ... من عائلتكم .. وتقول للها مين فتيات في سن زواج و و و .. وتقول لها مواصفاتك المطلوبة العامة.. الجمال والدين راح تقول لها بنتين او 3 بالكثييير ونفس الشي خل تتصل على عائلة الوالدة مثلا - يعني قبل عائلتك والحين عائلة خوالك - وتسال .. وراح تحصل 2 او 3 على القلييييل الآن انت صار عندك خياراات .. وصارت الكرة بملعبك وليست بملعب الوالدة ... لازم عاد تحاول كيف تختار من بينهم ... قرار جدا صعب لكن ان شاء الله ان الله بيوفقك للخير ... عليك بالدعاء والتوكل :) |
صباح الخير
اخوي لاتشيل هم كل الدعوه ماجاء نصيبك للحين وترى انا مثلك بعد .. من كان عمري 22 الى الحين 25 وقريب نخلص 26 وانا ابحث لي اكثر من ثلاث سنين ابحث ومالقيت .. واذا لقيت وحده .. تمشي الامور عكسسس واخر وحده طلع ابوها مايبيني اشوفها "نظره شرعيه" *_* ترى مليت مثلكـ من حوالي سنه .. بالاصح خف الحماس .. وانا متأكد ان هالشئ من ابليس اعوذ بالله منه لكن .. مع ذلكـ صابر ..وباقي ابحث .. وانتظر متى النصيب يجي يعني لاتخاف .. غيري وغيرك كثير .. والنصيب باقي ربي ماكتبه .. وحط في بالكـ (من توكل على الله فهو حسبه ) ومادام تريد العفاف الله راح يعينكـ .. الصبر مفتاح الفرج .. اصبر ولك اجر اهم شي لاتستسلم لملذات ومغريات الحياهـ والله ان المغريات في كل مكان .. وبأسهل مايكون وانا اخوك لكن من ترك شيئا لله عوضه الله خيراً منه وتأكد ان هذي خيرهـ من رب العالمين اكيد انت قد استخرت قبل كذا فلاتنسى ان من ضمن دعائكـ " فأختر لي الخير حيث يكون " يعني مالك نصيب في اللي لقيتهم .. باقي الخير ماوصلت له واصل بحثك ..والله ثم والله ان ربي ماراح يخيب ظنك فيه .. ان شاء الله راح يختار لك اللي فيها الخير بس انت حط املك بالله .. وماراح تندم الله يوفقنا واياكـ يارب >> خلنا نواسي بعض وانا اخوكـ ^_^ << |
الله يرزقك بالزوجة الصالحة
اذا انت مستعجل قول لأمك انها تخلص موضوعك.والله ييسرها |
الله يوفقك و يبعتلك بنت الحلال اللي تسعدك. بس حبيت ادعيلك و انبهك من خطورة الكلام اللي قلته عن السفر. اعلم يا اخي ان كل عمل منعمله سوف نجني ثماره عاجل ام اجل و تاكد اننا بني البشر لا نضر الله شيئا باعمالنا. من عمل صالح فلنفسه و من اساء فلها. و كمان تذكر من يتق الله يجعل له من كل ضيق فرج و من كل هم مخرج. الله يفرجها عليك و علي و على جميع بنات و شباب المسلمين.
|
غريب جداً الشاب مستعد ماديا و معنويا و طلباته قليلة و البنات العوانس عم بكتروا يوم بعد يوم
حسب عاداتنا و الله ما بعرف اذا ممكنة عندكم و لا لأ ممكن امك تتصل بصديقاتها و تحط عند كل معارفها خبر انها تبحث عن عروس لابنها بهذه المواصفات و انه اي وحدة بتعرف بنت بهذه المواصفات تعلمها فوراً ممكن تروح على المناسبات و الأفراح و تشوف البنات أكتر منهم مافي بعرف ناس بروحو للجامعات و بشوفوا بنات ههههههههه مو مزح فعلاً في نساء بتدور بهالطريقة عندنا خلي أخواتك و خالاتك و نساء العائلة كلهم يشتغلوا مع أمك كثفوا الجهود ما سمعت المتل (الكترة بتغلب الشجاعة ) :) ممكن اذا صديقة من صديقات أخواتك البنات ممكن زميلة لهم في العمل ممكن جارة من الجارات البنات أكتر من الهم ع القلب متل ما بقولوا الله ييسرلك يا رب و تلاقي بنت الحلال و اصحك تفكر بالحرام لأنه عمرو ما يغني عن الحلال |
سبحـــــان الله ..
البنـــات كثير لكن إذا أراد الواحد إنه يتزوج مالقى ولا وحده.. أعرف كم واحد مثل حالتك ... على سنتين وثلاث وهو قاعد يدور هو وأهله.. لكن ما نقول إلا الله يعينك وييسر لك الخير.. دمت بود.. |
الله يرزقك الزوجه الصالحه اللي تسعدلك
عليك بالدعاء والاستغفار |
الله يجزاكم خير ويسعدكم
والله كلامكم يبري الجروح وزرع التفائل فيني الحمد لله على كل حال وان شاء الله ماضاقها ربي الا عشان يفرجها علي بس والله خفت يوم شفت بعض الردود الي تقول بعض الناس لهم اكثر من ثلاث سنوات يدورون ..!! الله يكتب كل ماهو خير وصالح لساني يعجز عن شكركم .. الله يسعدكم ويوفقكم |
| الساعة الآن 06:05 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©