|
أعتقد أن طليقتي سبب مشاكلي مع خطيبتي ..أود الاتصال بطليقتي وتهزيئها !!
بسم الله الرحمن الرحيم
معليش يااخواني واخواتي تعبتكم معي بكثره المشاكل لكن انتم اعتبركم اهلي وناسي... القصه بختصار ... للي يعرفني بمواضعي الاوله اني خطبت بعد ماطلقت زوجتي الاولى وانتهى كل شيء بيننا .. طلعت اليوم ابتمشى مع خطيبتي وتمشيت انا وياها بالفيصليه والمملكه ومرينا على التحليه وتعشينا ...... الى الان والوضع اوكي .. بعد ماطلعنا من المطعم وركبنا السياره سألتني سؤال غريب.. قالت انا احس انك ماتبيني ؟؟؟ انا بصراحه انصدمت قلت وش هالسؤال اللي مادري وش يبي .. قالت انا خايفه منك بصراحه انك تسوي مثل ماسويت مع زوجتك الاولى .. قلت زواجي بالاولى غلطه وصححتها بزواجي منك ياقلبي المهم بدت تسالني عن امور استغربت منها بس عرفت انها جايها حكي من طرف الزوجه القديمه بخصوص سمعتي لدرجه انها تسالني انت تشرب او تسافر لبرا؟؟ .. انا ناوي ادق على الاولى واهزئها وش رايكم لان هالشيء صار فيه خراب بيوت عفوا .. تم تعديل العنوان .. كما نرجو الابتعاد عن التصريح بأسماء المطاعم ونحوها المشرف / شاطئ المحبة |
لما قالت لك انت تشرب او تسافر
على طول جا في بالك زوجتك الاولى ليه؟؟ وبعدين طليقتك خلاص ماتحل لك مايصير تكلمها وفرضا لو كلمتها يمكن ينفتح لك باب مسكر وتصير سالفة وتشك زوجتك بأن لك علاقة بطليقتك ومشاكل الحل انك تتناقش مع زوجتك ليه قالت كذا وتريحها وتقنعها وبس وحط في بالك نقطة مهمة زواجك الاول ماضي وانتهى خلاص انت فتحت صفحة جديدة لاترجع للقديمة ابدا لأنها انتهت |
أشين شي اشووفه أن الطليق يذكر طليقته بسوء عشان يقنع الثانيه
كيف تبيها تأمنك كذا ؟ |
قول حسبي الله والنعم الوكيل في كل من يتهمك بسوء الله اعد ل العادلين وكفيل بان ينصرك
ادعي الله ان يجعلك قره عينها فوض امرك لله اثبت اخلاصك لها والله يوفقك يارب |
نصيحه اخويه لاتتعرض للاولى نهائيا وابتعد عن سوء الظن لانك قد تفتح عليك باب مغلق وتعرف كيد النساء الان حاول تطمن خطيبتك من ناحيتك واطلب منها ان تعتبر نفسها الاولى في حياتك ونسيان مامضى |
اتفق مع رأي الأخ
ومن رايي اقعد جلسة صريحة مع خطيبتك بمكان هادي وصارحها انك تضايقت من كلامها وفكرت فيه وايد وضروري تعرف سبب كلامها هل اهو مجرد احساس او سامعة حجي من ناس بدون ما تحدد ان من زوجتك الأولى او اي احد ثاني لانه احتمال مو واقع المهم واذا ما رضت تقول وقالت مجرد احساس ومن خلال كلامها حسيت ان احد قايل لها شي حاول تصر عليها انك تعرف صدقني ترى احنا البنات ما نقدر نسكت واجد واذا اهي سامعة كلام بتقول ويمكن فعلا بس مجرد احساس نتيجة لأنك مطلق وخصوصا اذا ما قلت لها أسباب الطلاق يمكن فسرت على كيفها وخافت انك تطلع مثل شباب اليوم فسألتك اذا كنت تشرب او شي من هالقبيل واذا طلع احساس حاول تطمنها بأسلوبك وتوعدها انها راح تكون أمانة بعيونك ووو ما يحتاج انقلك كل الكلام الي راح تقوله بالتوفيق |
لا يا اخي الكريم لا تتصل في طليقتك ......حتى وان تاكدت ان الكلام صدر منها
مع الوقت زوجتك ستعرفك اكثر .........ولن تكن بحاجة للدفاع عن نفسك الله ييسر لك امورك ويبعد عننك كل من اراد بك السوء |
والله العظيم
انك قبل شويه كان موضوعك في بالي واتفاجأت لم شفت لك موضوع جديد اولا مبروووك على الخطوبة وثانيا لاتتصل على زوجتك الأولى ولاشيء اهم شيء الجديده تصدقك وهيا مع الايام بتعرف انها كانت غلطانه انها صدقت كلام اي احد الله يوفقك ويسعدك ويعوضك خير يارب |
,
, أخي سوالف الحريم لاتنقطع حتى لو تروحلها البيت وتكسر راسها أنت أثبت لخطيبتك عدم صحة الكلام بأفعالك وأنا خابرك رجال حنين وراعي تدليع وحركات بس لاتلوم المرأه الثانية ترا الي تاخذ مطلق لازم يكون بقلبها كم سؤال تبي إجابتهم والأفضل هو إبعاد الشك عن قلبها عن طريق الإجابه عن الأسئلة وحتى تبقى القلوب نظيفه وخاليه من الشوائب التي تفسد العلاقه إترك الأولى خلااااااااااص حتى لو تظل تتكلم زوجتك الثانيه حينما ترا معاملتك سترد هي على الأولى ( إن كان حقا الكلام منها ) وتذب وتدافع عنك أمام الكل , , |
بقولك قصتي
انا تزوجت من شخص مطلق زوجته الاولى جننته في حياته وماتوقعت انه يطلقها على طول طلقها وقبل لا تنتهي العده خطبني وهي جن جنونها وصارت تتصل عليه وعلى اهله تحاول انه يرجعها بس هو كان خلاص كرهها ويبيني وبعد الخطبه اتصلت علي وحده وقالت انا ابي مصلحتك وقالت كلام في زوجي بس انا على طول رحت قلت له وهو عرف انه من طرف زوجته الاولى واكد لي ان الكلام كله كذب وانها تبي تخرب وطلب مني اني انسى طلقيته ولا اجيب طاريها وهو بعد ماراح يجيب طاريها ابد والحمد الله تزوجت والحين لي اربع سنين وماشفت من زوجي الا كل خير اهم شي انك تكلم خطيبتك بصراحه وتقولها تنسى سالفه انك كنت متزوج قبلها ولاعاد تجيبون طاري طليقتك مهما كانت الاسباب ولا تتصل هلى طلقيتك ولا شي لانك يمكن تكون ظالمها ويمكن تكون هي فعلا السبب وبكذا تفرح انها سببت لكم مشكله خليكم كذا وكان شي ماصار والله يوفقكم |
الاخوان ماقصروا
اهم شي لاتسب الاولى قدام الثانيه حتى ماتقول بنفسها مع الايام بيسوي فيني كذا اخوي انسى الاولى وطاريها عشان تنساها الثانيه حنا يالبنات ترا عندنا ترمومتر طبيعي من كلمتين مع الرجال نحس وش بقلبه وانت يمكن الاولى مازالت بقلبك انسااااااااااااااها عشان ترتاح مع امورتك الجديده وبدا حياتك وتقرب منها وبافعالك معها ستذوب كل الشكوك الي بداخلها ولوسالها احد عنك بتوقف بكل ثقه وتقول حنون احسن الرجال الله يسعدكم وعجل بالزواج والحمل لان لو واحتمال يكون شكك غلط لو طليقتك لها يد سوف تياس منك حينما تسمع بحمل زوجتك واذا رزقكم الله بنونو انتبه تسميه اسم كنت متفق مع طليقتك عليه اكثر ماكثر الله الاسامي خل الجديده تختار اسم مولودها وحسسها انها الاولى والاخيره عشان المسكينه ترتاح والله اني حاسه فيها فقبل كم شهر خطبني مطلق ومع اني مطلقه واسبابنا الاثنين واضحه لبعض بحكم قرابتنا لكنه للاسف ماقدر مخاوفي ولااثبت ذلك بل اثبت لاهله قبلي صحه ادعاءت طليقته الحمدلله رب اني لما نزلت لي من خير فقير |
لا تكبّر صغير
|
أشوف أنك تسائل خطيبتك عن سبب أسالتها بس مالك تعوه في طليقتك ولا تدخل أحد في مشاكلك حتى ما تكبر
وتريا أكثر في هذهي الامور |
ابتعد عن الشك.. وفي ناس همها تخرب...
وبكون صريحة معك... انا سبق تقدم لخطبتي مطلق.. سألت عن كل صغيرة وكبيرة ليش طلق.. وبالنهاية رفضته.. لانه قلبي ما يطاوعني اتزوج واحد سبق عاش مع غيري... ولانه بيبقى في بالي افكر ليش طلقها.. وهل صحيح انه برئ.. وهل وهل..وهل ممكن يحن لها ويرجع لها؟؟؟ يعني لا تلومها,.. |
السلام عليكم
اخي الكريم استهدي بالله وتعوذ من الشيطان ولاتهتم لكلام الناس ولاتهزء ولاهم يحزنون خليك المثل اللي يقول ( ياجبل مايهزك ريح) اخي الكريم احنا البنات سواء سبق له الزواج او مازال طازج نشعر بالخوف خصوصا هذه الفتره ياترى هل اعطيه نفسي؟ ياربي كيف أأمن له؟ ياترى وياترى وكيف ؟ وووو فالخوف موجود في كل بنت في بداية ارتباطها وكلام الناس ماينتهي فما بالك لما يكون سبق لك الزواج كل اللي عليك انك تطمن زوجتك وتريح بالها والله يألف بين قلوبكم ولايغير عليكم |
اعتقد السبب انك طلقت من قبل....ومن خوفها بتسأل وبتحاول تطمن نفسها ..؟؟
كما هو معروف اهم ما عند المرأه الامان .وبما انك سبق وطلقت...فهذا يعتبر بالنسبه لها هاجس مخيف وهو ان تقع هي الاخرى بهكذا موقف..... واتفق مع كلام الفاضله روح الغالي.... |
مشكورين اخواني .. انا بصراحه جلست مع خطيبتي وقلت لها فيه احد موصلك هالكلام عني؟؟ قالت ان امها فيه وحده
اكثر من مره تدق على بيتهم وتقول ابتعدو عن هالرجال نصيحه لوجه الله لانه فيه وفيه وكلام كثير.. انا استغربت لاني ماني متوقع تتطور ويكون الواحد يحقد الا هالدرجه بعدين حتى لو هالشيء صادر من زوجتي السابقه كيف جابت رقم بيتهم وهي ماقد شافت البنت ولاتعرف اهلها؟؟ هاذا يدل ان فيه ناس متعاونين معها مساله ان تجيب رقم بيت خطيبتي الحاليه اكيد داخل رجال بالسالفه ومساعدها يعني ابوها معقوله او واحد من اقرابها؟؟ شيء يجنن بصراحه يالله في ناس تحقد الا هالدرجه.. |
مافى داعى تتصل بطليقتك
وان فيه عتب فهو على زوجتك ان سمحت لطليقتك بالتدخل بحياتكم |
وليه جا في بالك زوجتك الأولى؟؟؟؟؟؟؟
اكيد انك كنت تسافر برا وتشرب .. وزوجتك الأولى ما غلطت ابدااااااااااااااااااااااااا.. والمفروض اي وحده تتطلق من زوجها بسبب الشراب والسفر وتسألها اي وحده انخطبت منه تخبرها الحقيقه عشان ما تتورط معاه .. بالعكس اذا خطيبتك سألت زوجتك الأولى وهي قالت لها الحقيقه بكذا تكون برت ذمتهااااااااااااا. مو قصدها تهدم سعادتك هي لو ناويه كذا كان فضحتك عند الناس من غير ماحد يسألها .. بس هي سؤلت وجاوبت بذمه .. وانا بصراحه احييييييييها اذا كان جاوبت الصدق وقالت الحقيقه لخطيبتك .. |
انا من راي اختي العرووووس وضح لخطيبتك رايك في الموضوع و انك ما تبي تسمع نقاش بطليقتك مره ثانيه و عيشوا حياتكم بسعاده و الله يوفقكم
|
نصيحة منى لك لا تتصل عليها ولا تعبرها
الحقران يقطع المصران لو اتصلت فيها والله بتبلشك في حياتك اجلس مع خطيبتك وفهمها ان الوضع فيه حسد وحقد من البنت الى طلقتها والكلام يروح ويجي في الهوا |
لالالالالالالالالالالاتتصل عليها ...أهم شي كون صريح مع زوجتك ...و قلها أي كلام يوصلك عني تأكدي من صحته ...وحاول ماتجيب طاري لزوجتك الاولى عندهانهائيآ....والله يوفقك ويسعدك...
|
السلام عليكم ورحمة الله وبركاته
كل الي قالوه الاخوان والاخوات كلام ماعليه غبار بإسثناء رد واحد المهم إني ماراح اعيد الي قاالوه الاخوان والاخوات بس طبعا بأيد انك تنسى شئ اسمه تتصل او تتواصل مع طليقتك الاولى لانك صدقني حتفتحلها مجال وبيجي ببالها انها نالت مرادها وعمرها ماراح توقف عن هالشئ لانك مالك سلطه عليها ولاتقدر تردعها وبالعكس بتتأكد انها الي تسويه يجيب نتيجه وحتزيد وتزيد وتزيد ولا بتوقف الين يخرب كل شئ انت وجه نظرك لشئ واحد تثبت لزوجتك انك تحبها وانك معاها مهما صار واهم شئ الامان مثل ماقالوا الاخوات بقولك اقتراح ولو كان مناسب ياليت تنفذه واتمنى اشوف رد الاعضاء اذا يأيدون الفكره او يرفضونه والي هي انك تخلي زوجتك تطلع على جميع مواضيعك الي هنا بالمنتدى ابتداءاً بأول مشكله بينك وبين طليقتك خليها تحس بالمعاناه الي كنت عايشها مع طليقتك الى هذا الموضوع ...!! واتمنى اشوف الارااااااااء والله يوفقك اخوي ..!! |
مادري بس كاسره خاطري طليقتك
مومصدقه انك تركتها الله يسهلك امورك يارب ونصيحه لاتتصل عليها وتتعلق فيك من جديد مشكلتكم يالرجال انكم تحسبون المرأه مثلكم تقدر تنسى بسهووووووله مع انه العكس تماماااااااااااااااااااااااااااااااااااااااااااا رجاااااااااااااااااااء لاتقلب عليها مواجعها وترجع تكلمها عشان تهزئها بعد فهم خطيبتك وخلااااااااااااااااااااااااااااااااص |
اخوي شيل من راسك فكرة الاتصال بطليقتك او انك تجرها بأي طريقة
واقول زي ما قول د. عائض القرني في كتابه لا تحزن انك اذا رديت على اللي يكرهونك ابدا ما راح يتوقفون بل راح يزيدون ايذاء لك والعلاج هو خصرانهم احنا قضيتنا الاساسية اخوي هي البنت اللي عقدة عليها (خطيبتك) انا اقول حاول تطمنها وما تثير عندها مشاكلك القديمة مع طليقتك واسأل الله لكم ولطليقتك السعادة في الدنيا والاخرة واخوي لا تلوم طلقتك تراها انسانه ومن حقها ان تغضب عليك مو لأنك غلطان لا لكن من باب انها تحس بغلطتها عليك ارجو ان الله يوفقكم اجمعين واذا فيه امل اخوي انك تتزوج خطييبتك بسرعة وحاول وفكر واستخير انك ترجع طليقتك وانت معاك زوجتك الثانية واكيد راح طليقتك اذا رجعتها راح تصب اهتمامها عليك لكن فكر وشاور بترجيع طليقتك من غير ما خطيبتك تلاحظ اهتمامك بطليقتك اسأل ان الله يكتب لك ولزوجتينك الخير |
| الساعة الآن 02:48 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©