|
انخطبت ابشركم لكن يافرحة ماتمت !!!
السلام عليكم .. انا انخطبت من واحد مطابق للمواصفات والمقاييس :d يعني باختصار حرام ينرد :25: لكن يكبرني بعشر سنين مو هنا المشكله !! هو ( مطوع ) :25: طبعا المشكله مو مشكلته المشكله مشكلتي انا.. لاني انا ابد غير ملتزمه ولاعندي نيه الصراحه اني اغير نفسي ! اهلي يقولون لي فرصه تلتزمين ! وانا اقول لهم مستحيل اتغير عشان شخص ! انا لو بتغير بتغير من نفسي وبقناعاتي .. وبعدين انا ما اشوف اني اسوي شي غلط يعني زيي زي خلق الله اشوف تي في واسمع ميوزك عبايتي على كتفي مثلا والبس قصير وبناطيل :d ( طبعا في المجتمعات النسائيه ..لكن الحمد لله اخلاقياتي محافظه عليها وعندي خطوط حمرا كثير محترمتها .. لكن باختصار (...................) ماودي اطولها وهي قصيره انا قررت اكلم الرجال عشان افهمه انا وش وضعي بالضبط بدون اي كذب او تدليس بس خفت انه ما يرضى يكلمني لانه ملتزم ويمكن يشوف هالشي حرام ! بس تفاجأت انه هو اللي طلب يكلمني :22: وكلمته قلت له كل شي عني وتفاجأت انه كان عارف ! بس يقول انو ممكن نوصل لمناطق ترضي الطرفين وترى انا مو من النوع اللي يدقق كثير حتى قال لي لاتخافين عندي تلفزيون ولو تبين تلبسين عبايه كتف ماعندي مانع لين ما تتعودين على عبايه الراس! يعني حسيته مرن شوي بس انا خايفه ان هالشي يتغير بعد الزواج صراحه :14: كل اللي يعرفوني يقولون لي ما نتخيلك مع مطوع ابدا :11: هالشي مخوفني من المشاكل اللي بعد الزواج :19: انا استخرت كثير واحس الامور متسهله ومو بس كذا الا بديت اتعلق فيه صراحه :15: خصوصا بعد المكالمات تعرفون قلب البنت ما يبيله شي :17: بس مدري ليه احس اني امشي للموت برجلي :eek: ابي شوركم |
يا اختي الفاضله
هذه فرصه وجتك الى حدك لاتفوتينها وعلى كلامك انه مطوع هذي ما اتوقع انها مشكله لانه كثير من البنات يتمنون الزوج الصالح . المشكله ان الناس ماخذين في الملتزمين انهم متشددين وانهم لايتفرجون الى التلفزيون وغير ذلك ممايراه الناس فيهم . لا والله يااختي العزيزه انه من السعاده العيش معهم وانا اعرف ناس ملتزمين والله العضيم ان زوجاتهم في قمة من السعادة الزوجيه . يااختي انا نصيحتي انك تقبلين فيه لانه وانا متأكد انك راح تتغير صورته عندك اللي تعتقدينها فيه . والله يسعدك في حياتك الزوجيه ويجمعكم في خير ويرزقك الذريه الصالحه . |
بتقولي المشكله ان هو مطوع!!
بالعكس المفروض تحمدي الله على هكذا عريس وكمان حسب ما قولتي انه شخصيته مرنه ومارح يفرض عليكي شيء وانتي استخرتي وقلبك ارتاح له يعني ماشاء الله كل شيء تمام الله يوفقك ويسهلك امورك والف مبروك مقدما وربي يتمم لكم بخير |
قيسي بينك وبين نفسك ... ضعي مميزاته من منظورك الخاص وفي المقابل ضعي عكسها ..
تخيلي تقدم لك واحد مايعرف ربه ومايخاف ربه .. مايصلي عينه زايغه كيف بكون حايتك معه ؟؟؟ مارح تحسي حتى بالبركه لا في المال ولا في الولد والله اختي انتي في نعمه لا تقدر بثمن لو لا سمح الله جاكِ واحد لا يعرف الله ولا يخاف الله ساعتها رح تتمني انه يهتدي ورح تصيري تدعيله ورح تتركي شغلات كثير وتغيري بنفسك شغلات كثير لحتى ربنا يتقبل دعواتك ويهديه احمدي ربك ياغالية انتي في نعمة ولعله يكون سببا في هدايتك بعد الله والحمد لله هو ماضيّق عليك وبدأ يؤمر وينهى ويجبرك بالعكس كان لين معك وهذه ميزة حطيها في الإعتبار اقرأي يااختي في المنتدى عن مشاكل ومشاكل للأخوات بسبب أزواجهم وعدم مخافتهم لربنا اللي ينظر لغيرها ... واللي يخونها ... واللي يضربها ... وغيره وغيره انتي ياغالية لا تهتمي بالشكليات الفترة هذي أهم فترة بحياتك حاولي تعرفي طباعه .. سلوكه .. مزاجاته .. تفهمي نفسيته .. تعرفي كيف يفكر .. ساعتها أي شيء ممكن تختلفوا عليه رح تعرفي كيف تتفاهمي معه .. وبأي أسلوب تكلميه وبأي وقت.. اقتباس:
الحمد لله انه فهم وضعك وعرف نفسيتك وماطلع قاسي معك في بعضهم يجي باسلوب كله أوامر هو تفهمك وجاك باللين .. بعدين ياغالية .. ماحد يقدر يمعنك من شي إلا برضى من صميم قلبك انا اقولك .. شو بيرضيك انتِ ... ان حياتك تكون مافيها بركة .. وماترضي ربنا وتسمحي للشيطان بالوسوسة لك وتفتحي له عليك باب ينكد عليك ويكدر حياتك بوساوسه ولا بيرضيك ان ربنا يبارك في حياتك .. وزوجك .. واولادك ويملأ أيامكم بالراحة ؟؟ الأغاني ياغالية تجيب الهم للواحد ... ومهما سمعها مارح يرتاح زي مابيتوهم الواحد في أناشيد حلوة .. ليه مافكرتي تسمعيها ..؟؟ في منشدين رااائعين جدا هذه الأيام بدأوا يظهروا كتير حاولي تغيري من حياتك للأفضل التلفزيون حلو .. ومو حرام انك تتابعيه .. بس المهم انتي شو بتتابعي .. وشو بتشوفي فيه لانه سلاح ذو حدين في برامج مفيدة وحلوة .. وفي برامج تخلي اللي يتابعها سطحي وسخيف .,,. لا تقولي يافرحة ماتمت قولي الله يباركلي في زوجي .. ويتمم أموري على خير ويقر عيني به ويقر عينه بي .. ويآلف بين قلوبنا ويصلح مابيننا صلي في جوف الليل وادعي الله ان يسهل أمرك ويرضيك ويقر عينك بزوجك أسأل الحي القيوم ان يهديك ويصلح حالك ويبارك في أيامك ويقر عينك بزوجك ويآلف بين قلبيكما ويصلح مابينكما |
اختي ترى مو كل من حط دقن وصل بالمسجد صار مطوع
اي مطوع هذا اللي يرضى على اهله يلبسون عباة كتف يمكن مطوع دنيا فيه كثير كذا |
الرجل مناسب من وجهة نظري , حتى وإن كنتِ غير ملتزمة ..
والسبب مرونته وتقبله لكِ بالرغم من تباين الصفات على حد قولك .. وعموما الملتزمين يختلفون , كما أن غير الملتزمين يختلفون .. استخيري وأقدمي , والله يوفقك . |
سؤال...ليس له موقع من الاعراب لكن
شو يعني مطوع ؟! |
أحمد ربك زوجك ملتزم ما راح ينظر لاحد غيرك و لا راح يخونك باذن الله
عجييييييييييييييييب امركم يا بنات حواء ... ما يعجبكمعجب و لا الصيام برجب |
اقتباس:
زواجك من شخص ملتزم تسمينه مشي للموت!! لو اتعضتي بالموت الحقيقي لعرفتي انك مخطئة.. شوفي اختي.. إذا أنتي عندك استعداد للتغيير وفيه اشياء مو مقتنعه فيها فاقبلي به ليكون عونا لك.. |
لاحول ولا قوة الا بالله
انا نصيحتي الشخصيه ان تصارحي خطيبك بعدم استعدادك للتغيير وتطلبي منه ان يساعدك اذا رغبانه فيه اختي الرجل الصالح عمله نادره الللي يحب تسر زوجته دليل على غيرته وحبه لزوجته وليس تشدد الصالح هو اللي بيسعدك في الدنيا والآخره |
بالعكس الرجل الي فيه دين هو المطلب الحين الشباب الحين سهر وشيشه وسفرات مع اصدقاءه بس الملتزم ماشاء الله اذا طلع كشت في البر ومحافظ على الصلاة وبيربي عيالك ان شاء الله صح بترتاحين نفسيآ صدقيني انا كنت مثلك أبي واحد عاقل بس مومتشدد والله تحسقت أختي تزوجت ملتزم ماشاء الله متفهم وكل شي بالأقناع عنده عشانه فاهم الدين صح الله يوفقك يارب واهم شي انك مرتاحتله
|
على فكره في وجك خصله جدا مميزه
هو تفهمه لكي ومعرفته بطبيعتك وصبره عليكي قليل الا مثل هاذا الشاب لاتضيعي النعمه نصيحه والله يكتب اللي فيه الخير |
أنا نصيحتي لخطيبك أنه يشوف وحده ملتزمه , تعرف قدره ودينه , لأنه واضح عليك أن عكس خطيبك
|
الحمدلله متزوجين من ملتزمين انا وكثير من صديقاتي وقريباتي <<<< مطوع على قولك بس عايشين والحمدلله في احسن ما يكون اش الافضل انك تتزوجي رجل ملتزم يعرف الحلال من الحرام وتعينيه ويعينك على أمور دينكم ولا تزوجي انسان عادي امكن حتى الصلاة ما يصليها وكل يوم وانتي تشكي وتبكي منه نصيحتي لك ما زال حسيتي براحة بعد الاستخارة اقبلي فيه وعسى يكون التزامك وتغييرك على يده وتعيشي وانتي مبسوطة في ظل رجل ملتزم بتعاليم دينه موفقه يا خطيبة مطوع |
واضح من اسمك انك فرحانة فيه :)
دامك كلمتيه وسمعتي كلامه وتفكيره فهذا شي طيب وانا اشوف انه فرصة كبيرة ولاتفوتينها عليك وانتهي لبعض الفاظك تراها قوية خافي الله لايعاقبك في كلامك ويجي يوم تتمنين اي رجال يجيك وبعدين من قال عباة الكتف حرام لاكتف ولاراس ولاغيره الهدف من لبس العباية الستر اذا زوجك شاف عباتك واسعة وساترة ومافيها الوان ولمعات ماراح يقول شي سواء كتف او راس00 واذا عباتك ملفتة فهالرجال خير لك يصحصحك من هالفغلة اللي انت فيها انا زوجي رافض عباة الكتف نهائيا يوم شاف عباتي قال اول مرة اشوف عباة كتف كذا انا ماخذ فكرة عن الكتف مثل المتبرجات بالسوق علما بأني البس الراس في السوق والاماكن اللي كلها رجال والكتف من السيارة للبيت فكري قولي رجال يخاف الله ومحافظ على الصلاة ومايدخن 0000 يالله من فضلك وش تبيغين اكثر من كذا المهم اسألو عنه زين موملتزم خلاص يعني تمام التمام اهم شي مايصير شديد مررررة بس صدقيني دامك كلمتيه وارتحتي استخيري وتوكلي على الله |
اقتباس:
واضح أن خطيبك مطوع على نفسه يعني مو انسان فاعل يغير ألي حوله والأهم أهل بيته والدليل أنه خطب وحده مو ملتزمه بالدين هذي مصيبتنا هذا الوقت المفروض تتغيرين خوف من ربك مو تتكبرين على النعمه |
أختى انا شايفه ان لبسك محترم مفهوش اى مشاكل
كفايه اوى انك بتخرجى بعبايه دى لوحدها تدين والتزام عايزه ايه اكتر من كده:) |
شاكره لكم تفاعلكم
رغم ان بعضكم فاهم الموضوع غلط :16: راحل بلا عنوان والله ان كلامك يشرح الصدر وفعلا يدل انك فاهم مشكلتي بشكل صحيح وكلامك مطمئن بدرجه كبيره الله يجزاك كل خير ومشكوووووور على النصيحه بقايا امنيه اكيد احمد الله على كل حال .. وانا اكيد مابي انسان فاسق ولكن اخوف ما اخاف منه المتشدد اللي يحول حياتي الى سجن :( ويضيق علي في كل شي مع ان الامور بالنسبه لي تساهيل وماعمر اهلي ضيقوا علي وانا من الشخصيات اللي تحب الحياه بشكل جنوووني واحب اعيشها بكل لحظاتها واجتماعيه بشكل كبير بالاضافه الى اني ما تعودت اني اتعامل مع مطوع وخوفي هالشي يأثر في زواجنا !! اتمنى تكون فهمت الفكره ومشكور على دعوااااتك وعسى الله يستجيب cute_baby ياقلبي انتي مشكوره على كلامك طمنني كثير اقتباس:
وبصراحه انا كنت ابي شخص وسطي لا يضيق علي وفي نفس الوقت عاقل اقتباس:
حتى لو افترضنا جاريته شهر شهرين مصيري برجع زي ماكنت لان هالتغير ما حصل بقناعه مني ... عموما انا ماكتبت مشكلتي عشان تقولون لي التزمي ! ( انك لاتهدي من احببت) رغم اني مو كافره عشان اتلقى هالهجوم من بعض الردود انا مجرد فتاه زي بقيته الفتيات ! عايشه حياتي وما انكر ان علي هفوات عسى الله يسامحنا وعفو عنا ! ولا اظن ان احد معصوم عن الخطأ لكن سؤالي هل حياتي مع هالشخص مستحيله اذا افترضنا اني بحافظ على شخصيتي واهتماماتي ؟؟ والا لازم انسلخ من نفسي عشان اقدر اتعايش معه ؟ وهل ممكن اني انسلخ اصلا؟ اقتباس:
اللهم آآآآآآآآآآآآآآآآآمين شاكره لك ردك الطويل المفيد متوهق بعمره اقتباس:
ensaaan اقتباس:
طيف من نور اقتباس:
تتنهام وبس والا انتم يعني اللي يعجبكم العجب !! كلن فيه حقه :d كل الغلا اقتباس:
وش يدريني بعدين يمكن يكبلني بقيود بحجه انها من الدين وانا انسانه اكره القيووود واصير اتحسر على ايامي في بيت اهلي واقول ليت اللي جرى ما كان اخاف كل شي يقول لي لا لا لا لا حرام حرام حرام لا لا لا :eek: انا بنهبببببببببببببببببببل :16: افهموووووووووووني :( انا احب الصالحين ولست منهم :( night2005 اقتباس:
قال لي ما رح اجبرك على شي لكن ان شالله انتي من نفسك بتتغيرين :o ادري ان الرجل الصالح عمله نادره جزاك الله خير |
:) صح مشكلة ....... لان المستوى الديني يختلف ....
انا مشكلتي عكسك بالضبط .... انا ملتزمة بس مب متشددة و زوجي انسان عادي وسطي يعني عايش حياته مثلك وانا دوم احاول اغيره...... مو لاني اشوف غلط او استحقره ... لالا.. بس لاني اتمنى له الخير يعني للحين توصلنا لنقاط بسيطة حلوة .... يعني تغير طفيف و شكله مو ناوي يتغير بس الامل موجود :) بالرغم من كل هذا .... الحب و التفاهم موجود .... و عايشين حياتنا كأحلى خطيبين .... في النهاية دينا واحد والفرائض الاساسية نأديها.... انتي صلي استخارة اكثر عن مرة ... وسلمي امورك لله .... ما تعرفين يمكن يكون لك فرصة تلتزمين .... وتحسين بالنعمة بعدين ان شاء الله من نفسج بتتغيرين |
منوووووله
كلامك ريحنييييييييييييييي والله حببتوني في الملتزمين تصدقون :p رادع اقتباس:
كذا الردود الجميله والا بلاااااااااش اجل تنصحه يشوف غيري والله ردك هذا لو كان خطيبي هو اللي كاتب الموضوع يشتكي مني من حقك ترد هالرد .. بس الحين انا اللي كاتبه الموضوع وتجي تنصحه ! مادري تبيني اعطيك رقمه تنصحه والا تبيني انا اقول له ان رادع يسلم عليك ويقول شوف غير خطيبتك تراها ما تصلح ؟ وبعدين انا عارفه قدره ! وعارفه دينه وان شالله اني بحطه في عيوني س انا خايفه اظلمه لان توجهاتنا مختلفه بعدين لو كان الموضوع العكس وكانت الخطيبه هي الملتزمه والشاب عادي اكيد بتبارك له وبتدعي له بدل هالرد البارد :( عموما اشكرك الهدى 10 يازين كلامك اثلج صدري والله لكن انا اتسائل .. هل بيكون بيننا مشاكل كثير وتصادمات بسبب اختلاف التوجهات ؟؟ والا بتكون حياتنا طبيعيه ؟ فعلا ما عندي اي تصور كيف بتكون حياتي مع هالرجل احس كل شي بيشوفني اسويه بيقول حرام ما يجوز لاتلبسين هذا وخلي عنك هذا وبتصير هذي حياتنا شيل وحط :( مادري والله !! شوبارد ههههههههههههه ايه فرحانه فيه اقتباس:
ربنا لاتؤاخذنا ان نسينا او اخطأنا عبير الرياض اقتباس:
لا انا ولا هو نستحق هالكلام منك المصريه اقتباس:
ليت تفكير خطيبي زي تفكيرك كان تمام عندنا ناس لو يشوفك حاطه عبايتك على كتفك قالوا هذي مش كويسه ههههه شفتي التفكير ازاي :( |
اقتباس:
طيب ممتاز ماشاء الله لا قوة الا بالله انتي عطيتيني امل انه ممكن يكون فيه حب وتفاهم رغم هالاختلافات الكبيره في التوجهات والاهتمامات والمستوى الديني مثل ما ذكرتي وبالنسبه للالتزام انا اتمنى طبعا!! بس ما اقدر ابني قراري على امل اني التزم!! لاني هالشي احتمال يصير واحتمال لا فلازم احط اسوأ الاحتمالات وعلى اساسها ابني قراري شكرا لك ياحلوه |
اخ بس يا اختي
مطوع ومصلي وخايف ربه في احسن من كذا؟؟؟ الله يهديك جلسي معا نفسك وفكري بعل جعل ربي يهديكم ويهدينا |
حبيبتي من كلامك حسيت أنه مو مطوع يمكن يكون محافظ بس لازم تستخيري لأن في كثير من الرجال الناس تنخدع فيهم
بأنهم ملتزمين بس معاملتهم مع زوجاتهم في البيت جدا سيئة أهم شي الأستخاااااااااااره |
انخطبت ابشركم
اختي العزيزة يجب على كل امراءة عند الزواج ان يكون العنصرين متكافئين فانت صح لان من المستحيل ان تاخذي رجل وانت غير متكافئة معة ارجوك لان هذا زواج وليس سلعة يمكن استرجاعها فكري بل مو ضوع جيدا ولا تاخذيه من باب الندم ********
|
لاحول ولا قوة الا بالله .. صدق رسول الله صلى الله عليه وسلم في قوله : (( من كان يؤمن بالله واليوم الاخر فليقل خيراً او ليصمت ))
البنت مشكلتها ببساطه انهاخايفة انها تظلم الرجل معاها بسبب اختلاف نظرتهما للحياه ... البنت ماحبت تخذع الرجال اللي خطبها وتوافق عليه وتعيشه في جحيم وتخليه يقول بعدها ياليت اللي جرى ماكان .. البنت وسطيه لاهي اللي متشدده ولا هي اللي منحله الله يحفظها .. سمعت من الناس " لانه طبيعي انه يسالون الناس عن الرجال اللي يتقدم لهم " انه الرجال متشدد وطبيعته غير عن طبيعتها وحبت تعرف من اعضاءنا اذا هالشي راح يؤثر على حياتهم في المستقبل والا .. هل أخطأت البنت في شي ؟ !! هل أخطأت حين استشارت ورسولنا الكريم يقول " ماخاب من استشار " .. قد يكون قصد البعض منكم النصح ولكن بالشده لكن نسيتوا " ولو كنت فظاً غليظ القلب لانفضوا من حولك" باللين على البنت ترى ماكان اللين في شي الا زانه .. اسمحي لي اختي خرجت شوي من موضوعك .. بس احزنتني والله بعض الردود .. الله يعوضه بخير ! .. شكله مطوع على نفسه !! .. والادهى انه البعض قام يفتي على كيفه !! لاحول ولا قوة الا بالله ... عموما أختي ... نصيحتي لك .. استخيري الله اولا واخيرا ... والحمدلله انك بعد ماكلمتيه ارتحتي وباين من شخصيته انه مب متشدد .. لكن اسالوا عنه اكثر ... الناس اللي معاه في الشغل ... اصدفائه .. المسجد اللي عند بينتهم . جيرانه .. وبتتضح لكم الشخصيه اكثر من كلامهم .. ما اعني الخطيب بهالكلام لكن الكلام بالهاتف يمكن الانسان يغير فيه من شخصيته وعسى خطيبك ان مايكون كذا .. بس للاطمئنان ... الله ييسر لك الخير يارب وين ماكان ويرضيك به :) اسمحي لي على الاطاله وموقفه باذن الله .. اختك ام فطومه :) |
الله يختار لك الخير يارب وييسره لك
صدقيني صاحب الدين مايعوض.. بيراعي الله ويخافه فيك.. والدنيا مهما طالت نهايتنا الموت وش أحلى من إنك تعيشي مع زوج صالح يذكرك بالله..يدلك على الخير..يدعي لك في صلاته.. استخيري الله وتوكلي عليه والله يسعدك دنيا وآخره.. |
اختي ما لج الا الاستخارة و الاستخارة لين يرتاح قلبج
و اسالي عنه .... واعرفي عنه كل شيء ...حتى لو عن طريقه هو مباشرة وشوفي كيف يفكر بكل اموره يعني كمثال بسيط زوجي و هو مثل ما قلتلج انسان عادي كان يحلم انه يسير شهريا السينما مع زوجته :) بس انا رفضت ( لاسباب دينية + لاسباب الغيرة) النتيجة تنازله هو عن ها الحلم و انا مثلا كنت احلم اني اسير مع زوجي لمحاضرات دينية و دروس في المساجد في ايام الملكة :) بس زوجي ما يحب ومو مقتنع ...و يبي يقضي ايامه كلها في طلعات و سوالف النتيجة تنازلت انا عن ها الحلم يعني السالفة فيها تنازلات من الطرفين بس اهم شيء الاساس محد يفرط فيه و اللي اهي الصلاة شوفي شو هي احلامج اللي ممكن خطيبج ما يلبيلج اياها .... و لا تنسين تصلين صلاة الحاجة :) |
حبيبتي اخلي قسم المشاكل الزوجيه في النت وشوفي البلاوي
اقل شي يكلم بنات ويطلع معاهم وافلام اباحيه احمدي ربك انه جالك ملتزم وساعديه على الثبات انتي تو تفكيرك سطحي اهم شي عندك عبايه وقصير لاكن لمى تتزوجين راح تتمنين الملتزم الي ماراح تزيغ عيونه لوحده غيرك وراح يحاول يحفظ نفسه لك انا اول ماتزوجت كان مضايقني انو زوجي ملتزم وقعدت احن عليه لمى لبست عبايه ودخلت ستالايت وخليته يشوف افلام ويسمع اغاني زوجي تغير علي وصرت اتمنى انه يرجع لالتزامه والحمدلله الطيب يرجع لاصله الحين ملتزم وحياتي ممتازه معاه |
دام انتي فهمتيه عن طبعك واسلوبك من البدايه وهو وافق توكلي على الله والف الف مبروووووووك الله يهينكم ويسعدكم |
أهلين خطيبة مطوع كيفك بصراحة لو كنت مكانك برضو كنت ححتار لأني تقريبا زيك متوسطة في الدين ورافضة فكرة الزواج من مطوع نهائيا لأنو إحنا الإتنين حننظلم مع بعض
الموضوع صعب صراحة بس في النهاية لازم يكون في توافق بين الزوجين من جميع النواحي إستخيري أكتر والله يختار لك الخير إن شا الله |
السلام عليكم ورحمة الله وبركاته
اختي الكريمه وعروستنا الحبيبه الله يحفظك ويحميك ويهديك الي مايحبه ويرضاه الله لك استمري بصلاة الاستخاره وتوكلي على الله والحمدالله مادامك كلمتيه وارتحتي له فهذي بشارة خير فكما قلتي اسلوبه حلو ومرن ماشاء الله تبارك الله الله يجعله سببا في هدايتك وهداية من حوله عزيزتي حاولي تتعرفي عليه اكثر اسأليه ماهي ميولك؟ كيف تقضي وقت فراغك؟ كيف ماذا تحب ان تشاهد في التلفزيون؟ ماذا تحب ان تقرأ؟ اين تحب ان تسافر؟ هل تحب الرحلات البريه؟؟ وكيف تستمتع بها؟؟ وحاولي تستنجي من اجوبته اسلوبه وطريقة حياته حاولي تتكيفي معاه ابغاك تعرفي شي واحد والله ثم والله ثم والله حتى لو جاك الشخص اللي تقولي انه متوسط مثلك الا انك راح تلاقي اختلافات بينكم اكبر دليل انت واختك او اخوك اللي من ام واب ومتربين نفس التربيه ماتلاحظين ان هناك افكار مختلفه عن بعض انا بصراحه الاحظ اختلاف كبير بيني وبين اختي في بعض الافكار<< وهذا مو عيب بالعكس يعطي توازن في الحياة:) اهم شي لاتكوني جامده ومتعصبه في التعامل مع الامور وحاولي تتكيفي في الامور اللي ممكن تتكيفي معاها وتساعدك على مشي مركب الحياة والله يألف بين قلوبكم ويهديكم الي مايحبه الله ويرضاه ويهدينا ويستر علينا حصنتكم بلا اله الا الله |
طيب حاولي توضحين له طبعك وطريقة حياتك قبل كل شيء وقبل الإرتباط..... تفاهموا من الحين قبل يطيح الفاس بالرأس ... وتأكدي إنه يكون مقتنع بوضعك تماااااامااا ً, يعني مو ياخذ المسألة عناد ويقول : " إذا جتني أنا أعرف كيف أربيها وأمشيها على السراط المستقيم " .... فهميه وأفهميه قبل كل شيء .....
|
أنا عندي سؤال قد أستطيع من جوابك عليه أن يكون لي رأي يناسب موضوعك ..
ما طبيعة أهل هذا الخاطب ؟؟ هل هم من النوع المنفتح؟؟ هل عائلته مثله ( ملتزمين ) ؟؟ هل هو الملتزم الوحيد بين أهله ؟؟ متى كان التزامه من قريب سنه سنتين.. أو هو ملتزم من يوم إنه صغير ؟؟ يحبذ لو فصلتي .. والله يكتب لكم اللي فيه الخير .. |
الله يعينك أختي أنا أرى إن حياة الاعتدال التي تعيشينها وتمتعك بالحياة أفضل مزاياك ولذلك لوكان خطيبك مو زي باقي المطاوعة الذي يحرمون كل شيء حتى يحولوا الحياة لسجن كبير وجحيم في الأرض قبل جحيم السما فلا بأس وقد تستطيعين أنت تغييره للأحسن صارحيه بكل شيء --- وأتمنى لك السعادة
|
الله يوفقك و يسعدك و يكتب لك الخيرة من أمرك
|
ما رح اقلك كويس و لا مو كويس ربنا بالاستخارة بخترلك الخير
لكن حابة أحكيلك قصتي مع زوجي من هالنواحي زوجي اول مرة شاف انه بان شي قليل من ظهري و انا منحنية حس بالغيرة الشديدة و بعد كتب الكتاب نبهني للموضوع و كان الاسلوب عادي جدا بعد الزواج كل ما تحرك الحجاب شوي و بان (بالخطأ) شي ولو ميلليمتر من رقبتي تقوم الدنيا و تقعد و يعصصصصصصصصصصصصصصب و يقلي انتي متى بدك تغيري ستايل لباسك يوم رقبتك ويوم ظهرك و يوم ما بعرف شو .... و انا و الله حاولت كتير انتبه للأمور هذه و أغير لكن الا ما يصير شي بالخطأ و زوجي مو راضي يتقبل هالموضوع حتى الآن من سنتين و هالموضوع موتر حياتنا كل ما بدنا نخرج بصير مشكلة و بمر ساعات و نحن ما منكلم بعض فقط من أجل هالموضوع زوجي طيب القلب و بعد ما تمر هالساعات بجي لعندي و بصالحني و بنصحني بهدوء غير ستايلي لكن لازم أول مرة بنصحني تكون بعصبية و صرااااااااخ و بعدها كل واحد منا معتكف بغرفة لحاله ما بدي عقدك لكن كوني مستعدة لأي شي من هالمشاكل هي مشاكل بسيطة بيني و بينك لأن لا بد بين الأزواح من مشاكل بسيطة كهذه لكن حطي ببالك انه لو صبر عليكي شوي و ما دقق رح يجي يوم يريدك تصيري من راسك لرجلك على كيفه الرجل عايش بمجتمع معين و ما بقدر حتى لو هو مقتنع انه يصبر عليكي ما بقدر يصبر كتير لأن رح يخاف من كلام أهله أو أصحابه أو الناس و يبدأ يدقق عليكي و يريدك تكوني مفصلة على مزاجه هو . طبعاً انا بنصحك بالزواج من من يخاف الله و يتق الله فيكِ أفضل بمليون مرة من الرجل اللي مو ملتزم و اجعليها فرصة حتى تبدئي تغيري نفسك و انا متأكدة انه رح تتغيري . لكن أكدي على أخلاقه و اسألي عنه كتيييييييير قبل ما تعقدو القران الله يوفقك يا رب و يوجهلك الخير |
اقتباس:
انا بجاوبك على اسئلتك قبل ارد على العالم عشان تعطيني رايك ماهي طبيعة اهل الخاطب؟لا مو منفتحين ملتزمين اصلا هو ماعنده الا3 اخوان يعني ماعنده خوات عشان اعرف بس كل اخوانه مجال عملهم يدل على التزام يعني اللي يشتغل في الافتاء واللي امام مسجد ماشاءالله متى كان التزامه ؟ والله ملتزم من هو صغير يكفيك انو دارس المتوسط والثنوي في معهد الامام محمد والجامعه من كليه الشريعه ومعه ماجستير ودكتوراه في الفقه من المعهدالعالي للقضاء |
ماشاء الله تبارك الله هنيئا لك به ..
وعليك بالاستخاارة .. وان شاء الله يكون سبب في هدايتك .. واذا انتي تحبين الخير ومتقبلة ان شاء الله بترتاحين معه |
السلام عليكم
اهلين خطيبة مطوع.. انا لالحظت في ردك على الاعضاء انك تخالفين الي مايوافق رأيك وما عنده سالفه والي يوفق رايك هو البطران وصاحب الحكمة لذلك لا داعي للاستشارة ما دامك مقتنعه برايك ونا افضل رأيي لنفسي لانه لا فائدة منه... |
غاده
وعليكم السلام بالعكس والله انا يمكن لاحظت اني ارفض الردود السقيمه ! اللي ما منها فايده بس لكن صدقيني انا ما طرحت مشكلتي الا وانا متردده وماعندي موقف محدد عشان اشكر اللي وافق رأيي واشجب اللي مخالفني! صدقيني كان عندي خوف اني ارتبط بشخص ما يناسبني بس ردود بعض الاعضاء مطمئنه وافادتني كثير الله يجزاهم عنا كل خير واذا عندك رأي مخالف قوليه بس يهمني يكون طريقة الطرح فيها احترام لي وماتقلل من شأني .. دمت بود |
| الساعة الآن 10:38 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©