|
هل صحيح زوجي شرير ؟!
السلام عليكم ..
جيتكم ومعاي همومي الي ماتخلص.. ياريتني اقوى من الي انا فيه.. ماعرف شو اسوي.. وماعرف من الصح ومن الغلط... انا صارلي فترة في بيت اهلي.. طويلة.. وقبل يمكن 7 شهور اتصلت حرمة على بيتنا .. وكلمت خدامتنا وقالتلها كلام مايسر عننا عشان اتسوي مشاكل.. وكلمنا الخدامة وفهمناها وانهينا الموضوع .. امس جتنا الخدامة تتكلم في نفس المووضوع مرة ثانية .. بس جت بكلام جديد .. بانها سمعتنا وهي صاعدة الدرج .. نتكلم عنها وانقول عنها مجنونة وفقيرة وغبية ومن هالكلام الي مايدش الراس.. واحنا اصلا ماتكلمنا ابد .. وعلى قولة امي هذي نفس الحرمة هي الي متصله .. وعلى كلام امي .. هذي ام زوجي!!! انا حاولت ادافع عنها .. بس عشان اسهل رجعتي لزوجي.. حاولت هني وهناك .. لكن مافي غير ام زوجي... وطبعا مانبري خدامتنا من هالكلام لان هي غلطانه بعد.. تقعد تألف قصص من غير ماتقول كيف سمعت والا من الي قالها .. واناا الحين في فترة امتحانات ... وباجر اجازة .. عشان جورج بوش بيجي عندنا والشوارع مسكرة .. فيعني امتحاني الي بكره اتاجل للاسبوع الجاي واهلي حاجزين على اخر هالاسبوع .. ومن انفتح هالطاري.. تكلمنا عن سفرة الكويت .. وقالتلي شفتي كيف طلع شري... ماجاب الجواز .. خلاص خليه يتم في بيت اهله ..وانتي عندنا.. وانا ماعرف شو اسوي.. وكلمت خالتي بعد .. قالتلي انا احاسيسي ماتخيب خصوصا يوم احس ان في شي يطعن بصدري. وصدقيني يام وداد .. زوجك حطي عليه اكس بيسود عيشتك .. وبينكد حياتك .. وخلاص عليك السلام .. وخالتي صحيح يوم اتحس بشي بصدرها.. دايم يطلع صح .. !!!!!!!! قلبي يعورني.. ابي اعيش نفس العالم والناس.. بيتنا منقلب فوق تحت..!! وين كنا وكيف صرنا.. !! الاشراف / عفوا تم تصحيح كلمة بالعنوان ليفهمها الجميع وشكرا |
ماادري شو اقول بس الله يهديكم و يصلحكم ويجمع بينكم على خير
|
مشكورة يالغالية سوزي على ردك .. ولا تنسيني من الدعاء يالغالية..
اتمنى من الجميع يرد علي .. ادري مشاكلي وايد .. وادري اني ضايعه ومتشتته .. واني شيقت عليكم .. بس والله هالامور النفسية الي امر فيها ماقدر اطلعها الا لرب العباد .. وبعدين انتو .. |
الله يصلح حالك ياختي وكثري من الاستخاره
شاءالله تردي لبيتك وتستقري آآمين |
اختي الغاليه
ابي اساعدج بس ما عرف اشلون لأن ما فهمت شي بس اهم شي انج مرتاحه من زوجك اشعليج من الناس |
استغفر الله العظيم
بصراحة مشكلة، والزوج اللي أمه تسب خدامتكم ما يستاهل ترجعين له أبد خليه يقعد في بيت اهله الى أن تتحقق واحدة من ثلاث أمور: - أمه تطقها عصى الهداية وتصير عاقلة وما تسب خدامات خلق الله - الرجال تطق كبده ويدور على بدائل بالحلال أو بالحرام - تصلحين ابوك على أمك ويرجعها وتخليك تعيشين لحالك هذا اذا كنت فاهم صح أن المشكلة سب مرأة متخفية لخدامتكم |
شمالية مشكورة يالغالية .. على دعائك ..
نايت 2005.. يالغالية ماعلي من الناس والله .. بس يوم ان هالناس هم اهلي هذا التعب.. أبوعزيز .. ياليت اهلي يفكرون بنفس طريقتك .. امي قالتلي خلاص تعبت من سوالف ام زوجك .. ان رجعتي لزوجك قاطعينا هني..!! |
مشكلتك تتأثرين بكلام اللي حولك..
أنتي ارجعي لزوجك وبعدها لو طلع شري بيت اهلك مفتوح لك وأمك أول المستقبلين... |
مشكورة غناتي الغلا كله .. ياريتني بمثل قوتك .. احتاج هالقوة .. ماشاء الله عليك تبارك الله ..
امي كلامها يخوف .. اتمنى والله انها تستقبلني يوم احتاجها بعدين .. وان شاء الله ماضطر احتاجها.. الا لاشياء بسيطة .. |
طيب سبو الخدامه ماسبوها هي ميين اصلا في النهاية خدامه ليش الاهتمام الزايد بموضوعها
والله شكل الخدامه عندكم معززة اكثر من اهل البيت |
اختي الحبيبه اول شي غلط الشغاله ترد على التلفون امنعو هذا الشي عشان المشاكل تقل
ثاني شي استخيري اختي وخلي عنك الاحاسيس ماخاب من استخار استخيري واكثري الاستخاره والدعاء وانا لا املك اخيتي سوى ان ادعو لك بأن يكتب لك الله الخير اينما يكن |
هههه والله الخدامة هذي بالذات معززة ومدلعه .. لان امي الحين اتشوف نفسها كبرت فالخدامة تسرح وتمرح في البيت ..
|
شوفي ياام وداد انا الاحظ من خلال قراتي لمواضيعك ان اكبر اسباب المشاكل عندك هو تدخل الاهل وخصوصا امك
انت لازم تحطي حد علشان تستمر حياتك وهذا الحد يتطلب منك قوة قوة ولا اي مشكلة بينك وبين زوجك يدرون بها اهلك لانك انت وزوجك اصحاب المشكلة وانتم من تسبب في وجودها اصلا لذلك عليكم ان انتم تحلونها بانفسكم انا اعتقد انك كنت دايما تحكي لامك عن مشاكلك وامك كر هت زوجك مرررررررة والحين تح-اولين تصلحين الخطا مو قادرة |
الغالية مياس الحلوة ..
قلنالها مليون مرة لاتردين على تلفونات .. لكن هي اتعاند .. وتركب راسها .. واترد ... وامي ماتشوف الغلط منها .. لكن الحين .. اتشوف ام زوجي هي سبب مشاكلنا كلها .. يمكن لان هي ماتبيني ارجع لزوجي.. ان شاء الله بكثر من الدعاء والاستخارة .. ومثل ماقلتي ماخاب من استخار.. |
لا والله يالغالية .. انا ماكنت اتكلم .. لكن امي وام زوجي كانو صديقات في بدايه زواجي..
وامي طبعا فتحت قلبها على الاخر.. وكل حد تدخل في حياتنا.. وبعدين صاروا يتكلمون عن بعض.. البدايه كانت من ام زوجي.. وامي الي سوته كان ردة فعل.. ولان انا وزوجي كنا صغار ..كل واحد فينا صف مع اهله ضد الثاني.. واتفاقمت المشاكل.. والحين يوم عقلنا انا وزوجي.. بعد شهور طويله .. محد راضي يصدق ان زوجي انسان طيب .. والي يخوف يوم احس باوقات ان محد لي .. وبالنهايه ببقى وحيدة .. ومايندرى شبيصير لي بعدين .. وغير خالتي الي اثق باحساسها كثير.. ويصدق دايم .. اتقول لي زوجك حطيه عليه اكس.. لكن بالنهايه القرار قرارك انتي.. كنت واثقة واحس ثقتي اتزعزعت .. احس اني خايفه من المجهول ومو عارفه اتصرف.. صرت ادافع عن ام زوجي .. بس عشان ارجع لزوجي.. |
ام وداد الان كيف علاقتك بزوجك
|
يعني إيه شري ؟
|
السلام عليكم ورحمة الله
تحياتي اختي ام وداد هداكي الله واراح بالك وسخر لك زوجك واعادك لبيتك معززة مكرمة اميييييييييييييييييين |
ابو ربيعه .. علاقتي في زوجي من احسن مايكون .. بس بمجرد ماسمع كلام عنه ابتدي اشك .. واحس ودي افتح قلبي له .. بس ماقدر حرام .. هو ماله ذنب.. انا مو ماسكة عليه شي..
فرح .. شري يعني فيه شر!! يعني القلب مو نظيف.. |
hsz آمين .. ولا تنسوني من الدعاء في ظهر الغيب.. شكرا على المرور..
|
شوفي يااختي الحمدلله كنت شايلة هم تقولين علاقتنا مش ولابد بس الحين الحمدلله
طيب الحين وش اللي يمنعك تروحين بيت زوجك وما عليكم من الناس مصيرهم راح يرضون خلك قويه وقومي ضفي عفشك وان احد حاول يمنعك قولي ر جلي وانا ابييييييييييييييييييييييه مستحيل اعيش بعيدة عنه اكثر من اللي عشت رجلك الزم عليك من امك لازوم وانا اختك تحطين حل يا تعيشين له يا تعشين لاهلك الى متى بنتك تكبر احسن انها تكون وسط امها وابوها انا صار لي نفس وضعك بداية زواجي امي كلام ورجلي كلام واهل رجلي ما قصروا لكن الفرق اني وقفت كل عند حده الحين رجلي يقول ماشاء عليك قليل من الحريم يكون تصرفهم مثلك انت صبرت كثير والحين جينيناالنتيجة والله اني احس باللي تحسين به في هالوضع الحين ماحد يتجرا يتدخل في حياتي مهما كان |
اختي انتو شنهو تحسين زوجك
طيب او لا استخيري الله وشنهو فيها لو رجعتي له وجربتي حظك معاه |
يالغالية اتمنى اسوي هالشي اليوم قبل بكره ... بس يالغالية .. في بعض المواقف بودي اذكرها لكن تفشلني.. امي تصرفاتها غير متوقعه .. بمرة من المرات وقفت بوجهها ومعاي اخوي.. لا تشوفين شو سوت ... تخيلت اترك البيت واطلع مع زوجي.. ماستبعد اتموت .. اتشوف ان هذا كله فيه اهانة لكرامتها .. واهم شي ارضاء لكرامتها اني اروح الكويت اول مرة انا وبنتي وهي بدون زوجي.. واذا مارضى زوجي فهو شري.. زوجي طبعا مارضى .. وعند اهلي هو شري.. لكن كلامه في نوع من الصحة .. يعني كيف اسافر وبعدين ارجع مرة ثانية لبيت اهلي.. امي لها شروط غريبة عجيزية .. تقتلني انا فكيف هو؟ وبعد .. قال لي اقنعيني ووعد مني بخليك اتسافرين ماقدرت اقنعه من غير ماطلع امي غلطانه ولا في تصرفاتها شي غير طبيعي.. فطلعت نفسي انا ماعرف اتصرف... لان الصراحة انا الي اشوفه الحين وبعض الناس يشوفونه بعد ان امي الي واقفه بدربي خصوصا .. ان الكل تقريبا يدري ان علاقتي بزوجي مافيها شي.. مشكلتي معقدة حيل.. وانا وزوجي اكثر من كبرها في البدايه لان ماعرفنا نتصرف وخلينا الكل يتدخل.. وهم تدخلو على اساس انا وهو صغار بالعمر للعلم هو عمره 22 وانا عمري 21 الحين .. واتزوجنا من سنة ونص ... يعني حسبي كم كنا.. هذا مو عذر ..بس والله هذا الي حصل.. انا احس زوجي يحبني.. لكن اهلي يتكلمون بالمنطق ويشوفون المعطيات وهذا الي مخوفني.. واكثر مامخوفني ان يصدق كلامهم وظنهم بزوجي خصوصا انهم ماراح يستقبلوني بعدين .. حسب كلامهم يعني... بعمري وحياتي ماحسيت اني ضايعه ومتشتته نفس الحين .. دايما قراراتي ثابته .. لكن الحين للاسف..!!
|
نايت انا عمري ماوثقت فيه كثر هالمرة .. الحمدلله .. لكن مادري ليش الكل واقف ضدي..
انا بقولك شو الي يشوفونه سبب مايخليني ارجع .. بالله حملتي للمرة الثانية وطلع هو مو زين .. قلتلهم ماراح احمل .. قالوللي مو على كيفك .. يمكن يغير بكلامه .. يبوني احط شروط بالمحاكم .. وانا مابي .. لاني اخاف اتصير العلاقه بيني وبين زوجي غريبة ومو حلوة .. |
بسم الله الرحمن الرحيم
اختى الفاضلة احساس خالتك ليس وحي وقرآن منزل " أى انسان يمكن ان يصح حدسه في بعض الامور " ولكن يبقى مجرد توقع وتخمين وفي نهاية الامر هي انسانة لم تطلع على الغيب أو ماسيحدث لك في المستقبل والله اعلم بنية زوجك لا خالتك ولا غيرها يعلم ما تخفي الصدور . خالتك متأثرة كما يبدو بتفكير ورأي أمك . المفروض على اقاربك يقولون كلمة خير تطمن قلبك أو أن يلتزموا الصمت لأنهم اعوان الشيطان عليك وعلى زوجك والشيطان حريص على ان تبقي على هذا الوضع (( قلق وبعد وتشتت)) والله اعلم الى متى يبقى هذا الوضع . ضعي حد لأي انسانة تتكلم بنصائح بمستوى نصائح خالتك لأنك ستخسرين استقرارك النفسي تجاه زوجك ولن تستقري نفسياًولا فكرياً وفي النهاية انتي من يتجرع الم هذه النصائح والآراءو هم عائشين حياتهم وأنت تتعذبين . لماذا لايتدخل مصلحين لإرضاء جميع الأطراف وبالتحديد أمك لأنها تأثم بهذا الموقف ، أما إن كانت امك لاتريدك ترجعين لزوجك ابداً لااضنها سوف تقتنع برجوعك حتى لو بقيت العمر كله عندها تحاولين اقناعها فارجعي لزوجك بعد الإستخارة ودعواتك أن يحنن قلبها عليكم عليك بالثلث الأخير من الليل . و قولي لأمك افصلي حياتي وعلاقتي مع زوجي بخلافاتك مع أم زوجي وصفي حساباتك معها بعيد عن حياتي ومستقبلي غاليتي حياتك ليس تحت رحمة كلمة او حسابات من حولك احسست من خلال كلامك أنك حتى الآن لاتثقين بزوجك وهذا يجعلك مهزوزه امام ادنى كلمة .ثقي بالله ثم بأختيارك وطالما انكما عاى علآقة جيدة انسى الماضي لتعيشين حاضرك اما عن كلم اهلك اذا رجعت يمكن تحملين ويمكن هو يتغير فأقول لك (( ومن منا من يضمن حياته كيف ستكون بعد سنه أو شهر أويوم أوحتى بعد ساعة من يضمن اي انسان بالله عليك لا زوج ولا اب ولا اخ ولا ابن ولاابنة الضمان الوحيد هو الله عز وجل بالتوكل والدعاء والواحدة منا تتعامل مع الله عزوجل في التعامل مع زوجها ))أما مغزى هذا كلام يا عزيزتي ليقنعوك بعدم الرجوع لزوجك اما عن سؤالك عن زوجك إذا كان شري . "مجرد طرح هذا السؤال يدل بالفعل على صغر سنك وعدم نضوج تفكيرك بالله عليك " رجل حماته تضع شروط تعجيزية لرجعة زوجنه وينمنى رجوع زوجته اليوم قبل بكرة .. بدل ما ترجعها لزوجهاتأخذها وتسافر وهو يدفع ثمن خلافات امك مع امة بغض النظر عن البادىء انا لاالومة ابداً . وامك اكيد بتقول شري فرصتها تؤكد لك وجهة تظرها امامك . في النهاية عزيزتي امك لها البر وزوجك له الطاعة وبرضاة الجنة لك . اسألي أي شيخ عن علاقتك انت وزوجك الآن من رغبتكما في الرجوع وعن موقف امك . وأسأل الله ان يجمع بينكما ويبعد عنكما التدخلات ويشرح قلب أمك يخلي لك بنوتكك آمين |
حبيبتي يمكن خالتك الاحساس اللي فيها هذا عشان جورج بوش جاي و اختلطت عليها الامور و قالت زوجك
الله يهديهم بس ما عليكي منهم انتي الله يوفقك يا رب و يرجعك لرجلك عاجلا غير اجل و اذا هذه بنتك ودوود اللي بالصوره باسم الله عليها الله يحفظها تجنن ما شاء الله اقري عليها دايما |
اقتباس:
مشكورة يالغلا .. على ردك الي فتح عيني.. والله يبعد عنك كل هم وغم |
حلا الأيام .. هههه ضحكتيني.. على سالفة بوش.. امي اتشوف زوجي اسوأ انسان في الدنيا ...
نعم يالغالية.. هذي صورة بنتي وداد الغالية .. الله يحفظها من كل شر.. |
ان شاء الله دوم تضحكين يا قلبي
المهم انتي استخيري الله مالك غير ربك و اذا حسيتي براحه توكلي على الله و ارجعيله و اذا زادت الامور تعقيدا ابعدي فتره و ارجعي استخيري يعني مثلا قوليله بعد الامتحانات بالتوفيق |
ام ودوووده الحلوة .. الله يعيينك يا رب ..
اسمحي لي اشوي الحين اشوي بهاوشك ... صراحة انتي وزوجك سلبييين واسمحي لي على هالكلمه ... يعني الحين ابي اعرف ليش زوجك مايجي البيت ويكلم امك ويقول لها والله يا خالتي هاذي زوجتي وانا غلطت في حقها صح وتعاقبت ببعدها سنه كامله ... وانا تغيرت في هالسنه والله يا خالتي خلاص انا ابغى زوجتي الحين وماراح اطلع من بيتكم الا معاها واذا صار شي مرة ثانية بيني وبينها خلاص هاي اخر المطاف بينا وانتو معاكم الحق بس اكثر من جي انا ماقدر اعبش من غير زوحتي وبنتي ولا ابي ادخل المحاكم بينا لانه علاقتنا وقرابتنا اكبر من المحاكم ... وخلاص ياخذك ويطلع لو امك اش سوت ... مهما كان اختي لازم يكون في احترام لزوجك من قبل والدتك والعكس صحيح ... يعني خلاص انا صبرت على زوجي وهي زعلت وانا جاي اراضيها .. قضي الامر ولو زعلت امك وعصبت مصيرها ترضى صدقيني خاصة لو شافتك مرتاحه مع زوجك ومب غلط انه زوجك وهو جاي يجيب هدية لامك وهديه لك ويقول هاذي الرضوه بس خلاص ابي زوحتي وبنتي ... وبالنسبه لخالتك فمثل ماقالت ام سفانه كلامها مب وحي ولا قران ... توكلي على الله يختي وخلي عنك السلبيه انتي وزوجك ترى الحيااااة واااايد قصيره ولو لا قدر الله لا قدر الله لاقدر الله حصل شي لواحد فيكم بعيييد الشر وفارق هالدنيا بعد عمر طويل ان شاء الله لكن لو صار هالشي الحين صدقيني بتتدمين اشد الندم الله يبعد عنك وعنه الندم يارب تعوذوا من ابليس وخلوا عنكم السلبيه وارجعوا لبعض يلااا !!! |
ام وداد لي عودة بس لا تزعلين شكلي ابهاوشك هههههههههه
|
حياتي ام فطومة الله لا يحرمني منك .. زوجي قال كم مرة ابي ايي عند امك واحل المشكله وخلاص انهي الموضوع .. حرام ماقصر .. ونوى .. بس المشكله في الوالدة الله يهديها .. تعطي كلام مثل السم ... يخوف واتمنى زوجي يتحمله .. والمشكله ان كل ما خلاص نحدد يوم .. يصير شي مادري ليش..
نويتها قبل كم يوم.. وطلعت خالتي مسوية مفاجأة وجايه عندنا.. وكنت اتمنى لو ايي يوم الخميس من بعد ماخالتي اتسافر على طول لكن امي بتسافر وراها .. هذا الي يصير والله .. كل ما وحدة منهم اتروح الثانية تجي.. مابيه يحي وخالاتي هني.. لان مادري شالكلام الي يدور بينهم .. خايفين علي بزيادة .. |
جينز ... حبيبتي .. هاوشيني قد ماتبين .. هزئيني.. فتحو عيني .. مادري شو فيني .. والله بحياتي ماصرت جذي..
|
السلام عليكم ورحمة الله وبركاته ....
أختي العزيزه أم وداد أنا متابعه لمواضيعك دائما...لكني لااستخدم معرف زوجي.. لكن الحاله التي وصلي لها استفزتني كثيرا فاسمحي لي بهذه المداخله... انتي متزوجه وتحبين زوجك ولو لاسمح الله في المستقبل حصلت بينكم مشاكل أخرى ... فبيت أهلك مفتوح لك يعني أكيد الملامه موجوده لكن اين ستذهبين ليس لك الا بيت اهلك...أنا أتكلم هنا لطمئنتك من خوفك من المستقبل بس ان شاء الله يكون خير *** اذا كنتي خايفه من ردة فعل أهلك ستجلسين طول عمرك معلقه وامالذي يضمن لك ان زوجك لن ينقلب ضدك وهو الذي يسبقك للمحاكم؟؟ بنت الله يحفظها لما يوصل عمرها سبع سنوات سيطالب بها والدها,وهذا حكم الشرع فهل ستعوضك أمك عنها؟؟ والله ثم والله اني أتكلم من واقع تجربه ... وسأحكي لك مختصرها..وأعرف أن زوجي ربما يقرأ هذا الرد لكن خير ان شاء الله.. في مرحله ما من زواجي زعلت مع زوجي وكان هو المخطئ ولم اكن قد حملت بعد... فتح لي اهلي أذرعهم بكل ود وصار وضعي احسن مما كنت بنت ... والله لكن مع أول اتصال من زوجي فكرت فيه وفكرت بأنه رغم مكابرته لو لم يحبني لما اتصل... والدي صار يفتش بجوالي ولا كأني متزوجه وهذا زوجي...كنت ضعيفه جدا أريد زوجي ولا أريد أن اغضب والدي... فجأه طرق زوجي الباب(وهو كان قد جاء من مدينه أخرى) قال اريد زوجتي قال له الوالد واحنا ماعندنا زوجه لك... أنا لا ألوم والدي فلو حدث مع ابنتي ماحدث معي لربما أخذت موقفا أشد... يومها جا والدي وقلت له نعم اريد زوجي... صحيح أني مازلت صغيره وصحيح أنك لاتبالي بنظرة المجتمع للمطلقه وصحيح أنك فتحت لي ابوابا كانت مقفله... لكني مع هذا اريد أن اعطي نفسي وزوجي وزواجي فرصه أخرى... كان رده انا مسافر غدا وانتي روحي مع زوجك لكن انسي أن لك اب؟؟؟ في اليوم التالي جا زوجي اخذني والله بعبايتي والملابس التي ارتديها... ومسك جوازي واغراضي كلها ومنع اخواني واخواتي من الاتصال بي او حتى يجيبوا اسمي امامه... سافرت الى مدينة زوجي ...كم تمنيت ان تعرف امي بحملي كأول وأقرب شخص... ستة اشهر وانا اعاني من هذا الضغط النفسي والاحساس ربما بفقد والدي وعائلتي وهم احياء يرزقووووون سافرت مره مع زوجي الى مدينة اهلي ولكني لم أجرأ على زيارتهم مع ان الهدف هو زيارتهم؟؟؟ واعود ادراجي بخفي حنين... بعدها بشهر زوجي قال لي لازم نروح لهم هذا الوضع لايسكت عنه ذهبنا... الوالد حبس نفسه في غرفته...طلع له زوجي حب راسه ويده... تعرفين ايش أول كلمه قالها لي ابوووووووي؟؟؟ الحين تذكرتي ان لك أب؟؟؟ كان يعاني مثلي وربما أكثر...وأنا اليوم لي ست سنوات متزوجه وحصلت معي ربما اعظم من المشكله التي خرجت من اجلها لاهلي... لكني تعلمت ان مالي الا زوجي وبيت أهلي مفتوح لي لو مهما قالوا..انتي اللي اخترتي..انتي ماسمعتي نصايحنا...انهم الاهل من شدة خوفهم يقسوووون علينا... أن أقول لك يمكن خيره امك بتسافر وانتي عندك اختبارات...خليها تسافر وبعدها بكم يوم روحي لها انتي وزوجك وبنتك اذا كنتي مقتنعه بالعوده ارجعي طلبتي النصح ومعظم الاعضاء اتفقوا على هذا الحل ارجعي وتحملي الصد من امك وكلها فتره وترجع الامور... والله اني لأخاف ان يطلبك زوجك ببيت الطاعه... ويحصل بعدها شرخ عظيم بعلاقتكم حياتك وحياة ابنتك مرتبطه بقرار حاسم منك ياأختي لاتضيعي أكثر مما فات لا احد يضمن لك أن ثقتك بزوجك تكون بمحلها... ولا احد يضمن ايضا ان لا تكون الله سبحانه وتعالى هو علام الغيوب ولولا لا سمح الله لم تتفقوا انتي وزوجك وتركتيه للابد(مع اني لا أتمنى-لكن لنضع أسوأ الاحتمالات) عندها لن تلومي نفسك على الفراق ولن تلومي نفسك على تربة ابنتك بعيدا عن والدها لكن تعلمي الصبر على المشاكل... تعلمي أن تكبري مخك وقت العصبيه ولا تقفي عند اي مشكله تحدي نفسك وتحدي كل من توقع ان علاقتكم لن تنجح..اصنعي نجاحك ونجاح زوجك وابنتك بنفسك ماذنب هذه القمر الله يحفظها أنها اول ماتنطق بكلمة بابا لا يكون والده بجانبها ثم بأي حق والدتك تقيم الدنيا ولاتقعدها في العيد لانه رآها؟؟!!! هو والدها ومن حقه ان يطلبها وقت يشاء لاتتركي ابنتك لتتأُر بموقف والدتك من زوجك ربيها على حب والديها بعيدا عن مشاكلكم... أعرف والله أني أطلت ... لكني كلما أرى معرفك اقووول يااااااااااااااااارب تبشرنا برجوعها الله يجمعك مع زوجك قريبا... ويحفظكم من كل شر ... أختك أم الجوان |
والله يا ام وداد كلام اختي ام جوان عين العقل ... توكلي على الله وبعد سفر الوالده دام انها خلاص مسافره ان شاء الله توكلي على الله وارجعي لزوجك ولاتقولين اخاف على اخواني تعاملهم بقسوه والا اخاف تصد عني اصبري كلها كم يوم وامك يوم تشوف تغير زوجك ترضى وصدقيني هاذي كلها اعذار ايحطها لك الشيطان حتى يبعدك عن زوجك ماهو همه التفريق بين الزوجين ...
توكلي على الله وروحي الصالون تعدلي تغيري وتكشخي وارجعي لزوجك وعوضيه عن كل اللي صار موفقه اختي |
ياختي ام وداد الله يحفظها لك يارب ...
اولا اختي كيف تسمحو لخدامتكم تتكلم عليكم براحتها ... وتقول اللي تبيه ... هي شغاله وتاخذ راتبها ولا شافت منكم شي حتى تتكلم كذا !!! وثانيا مو كل اللي نحس فيه يصير ... وعلشان ماجب الجواز يصير شري .. كيف هالتفكير ... دامه يفكر فيك وببنتك ويفكر يرجعك له ليش يجيب الجواز ؟؟ يا اختي انتي اللي تعرفين زوجك وتعرفين كيف يفكر محد ثاني .. لاتسمحي لأحد يخرب بينكم ... وحتى لو كانت ام زوجك هي اللي داقه .. لاتعطيها ولا تعطي امك فرصه للتخريب بينكم ... هم لأنهم يكرهو بعض يسوون كذا ... وحده تدق والثانيه تتهم !!! صدقيني اختي اذا جلستي تحطين اي كلمه ببالك وبتسمعي كل كلمه تنقال لك وبتحطيها في بالك من غير ماتفكري .. انتي اللي راح تضيعي والله ... انا غبت عن المنتدى كم اسبوع ولكني قريت موضوعك اللي قبل ... والله انك على باللي ولا انساك من الدعاء بكل صلاه .. الله يسعدك ويريح بالك يارب ... هموووم |
البعيد عن العين بعيد عن االقلب
ارجعي لجوزك وابدأي بداية قوية وكوني واثقة من نفسك وحافظي على بيتك ولاتسمعي كلام خالتك لانها ماتعلم الغيب ومافي شي اسمه احساسها دايم صح الا لو كانت كاهن او عراف هدا شي ثاني وصدقيني امك ماتبغاكي ترجعي لجوزك لانها مستانسة فيكي عندها وماتبغاكي تروحي عنها وتفتقدك وهدا دليل على حبها الشديد لك وترى الظفر مايخرج من الحم معناته انها تحبك ومهما زعلت منك ماراح تتخلى عنك بمشالك وان شاء الله ماتكون عندك مشاكل |
بسم الله الرحمن الرحيم
غاليتي أم وداد اقتباس:
طالما انعم الله عليك بحب زوجك .. فلما الإنتظار بسبب ضغوط امك وخلاتك وآراءهم اصبح لديك شعور بأنك مكتفة غير قادرة على التصرف هذا الشعور من صنع يدك وانت الوحيدة القادرة على التخلص منه وهذه في الأصل رسائل سلبية ترسليتها لعقلك ومع تكرار هذه الرسائل تؤثر على معالجتك لأمورك وتجعلك سلبية تجاة ضغوط اهلك " وأنا على يقين أنك قادرة على التصرف وانت تقولين انك" لست هكذا " يعني ليست طبع فيك أو عيب من عيوب شخصيتك " والحمد لله " . اقتباس:
اقتباس:
انت اخذت وعد من زوجك بعدم تدخل امه في حياتكم صح ولا انا غلطانه . وهذا مع ثقتك فيه يكفي ، وخذيها من اختك وصديقتك " اهل الزوج لن يرضوا تمام الرضا عن زوجة ولدهم " وهذا لايهم طالما انت وزوجك راضيين عن بعض البقي يأتي بالدرجة الثانية افصلي اهله وعلقتهم فيك عن علاقتك بزوجك لانه غير مسؤل عن تصرفات اهلة " وانصحك ليس كل ما يحدث بينك وبين اهله تقولينه له تجاوزي عن بعض التوافة وخليها للشديد القوى وإن شاء الله ما يجي " إذا ما فيه احراج قولي الأشياء اللي تحدث لناقشها قد تكون تافهة وانت بسبب اوضاع البيت ترينها كبيرة . اما بشأن السفر هناك عدة امور هل سفرك وامك مع محرم لكما هذا من جهه من جهه اخري اشعر ان بقاءك اولى من سفرك فرصة لتأخذي راحتك مع زوجك وتعلقيه اكثر واكثر ببنوتتكم " دودي" حياتي : امك بتقول شري عطاك الجواز ولا ما عطاك وأنت بيني لأمك أنك انت ما تبغين السفر وقولي لها ماله داعي اطلبة طالما انا ماراح اسافر .. اوؤيد ام الجون في كل ما قالته (( والسعيد من اتعظ بغيره)) واخيراً الشرع معك في حقك للرجوع لزوجك حتى لو زعلت امك لن يكون عقوق ابداً اما من ناحية خوفك من كلام امك لزوجك إذا جاء للصلح انت قولي له تحمل وطول بالك عليها لأنها مازلت مجروحة من اللي حصل وخايفة عليه " ومن هذا الكلام " عشان ما ينصدم من ردة فعلالما يجي عندكم وخلي في بالك (( ان القرارت الكبيرة تحتاج إلى شجاعة وقوة وتضحية )) وتذكري ان وداد لن تسامحك ولن تسامح جدتها ابدا إذا كبرت ولم تأخذ حقها من رعاية والدها بسبب سلبيتك و تشدد امك " ويمكن تحقد عليكم بعد لأنها حرمت من حقها بغير ذنب . ولا تتوقعين انها ماراح تدري عن محاولات ابوها وقناعتك بالرجوع . وضعي في بالك انك انت الخاسرة أو الفائزةالوحيدة في هذا الأمر تخسرين حياتك واختيارك وشخصيتك وزوجك ونظرت الناس لك بأنك تحت تأثير أمك وهي واقفة في طريقك.والناس ما ترحم . وأنت الفائزة برضا الله عليك .. كسبتي معركتك ضد عدوك الذي يحاول افساد زواجك وهو الشيطان دافعتي عن اختيارك وقرارك كسبتي نفسك وثقتك فيها كسبتي زوجك وغنمتي حبك في التهاية لن يلومك احد على رجوعك لزوجك ولن يقولوا إلا هذا عين العقل وراح يدعولك ومثل ما قالوا لك الأخوات امك مصيرها ترضى لأن موقفها على باطل ومن ماتت وزوجها راضي عنها دخلت الجنة يعني رضا الله عز وجل من رضا الزوج ومن ارضى الله بسخط الناس رضي عنه وارضى عنه الناس ومن ارضى الناس بسخط الله سخط عليه الله واسخط عليه الناس . وعشان ترتاحين نفسياً دقي على شيخ واستشيريه بخصوص امك ولن يقول لك إلا ما قلناه لك وتعلقي بلله سبكفيك همك . ولك خالص تقديري |
لا حول ولا قوة الا بالله
بصراحة مو كاسر خاطري الا هالامورة الحلوة الله يبارك فيها اللي قررت أمها تيتمها وأبوها عايش بس علشان جدتها ما تصارخ طيب ما أسمي هذي أنانية؟ قررتي مصير بنت بريئة وحكمتي عليها باليتم بس علشان أمك ما تعصب وأصبحت في حكم الناشز فقط علشان أمك ما تزعل؟ الله يعينك على اثم بنتك بصراحة صورتها تقطع القلب!!!!!! |
د. ياسر.. خلاص قررت ان شاء الله برجع لزوجي بأقرب فرصة ... سواء الوالدة رضت ولالا.. ومثل ماقلتي.. مستحيل تزعل مني على طول.. وبفصل حياتي انا وزوجي وعن حياة اهلي للابد .. وبتكون العلاقه عادية لاني كبرت وعندي بنت ..
حاملة الهم .. ام فطومة .. ان شاء الله بعزم على الطلعه من هني.. هموووم يالغالية .. هلا برجعتج يالغلا .. لكن ياريت لو كانت رجعتج على اخبار غير هذي.. ماتغير شي في حياتي ابد .. ان شاء الله يارب تتحسن اوضاعي واكون اقوى واطلع من هنا ... وامي ترضى عني مع الوقت .. نينا انا .. صدقتي يالغالية الي بعيد عن العين بعيد عن القلب.. وهذا الي احسه بيصير انا وزوجي نحب بعض صح .. لكن والله قبل الواحد منا مايقدر ينام الا والثاني جنبه الحين لا .. صارلي سنه واسبوعين يمكن على هالحال.. أم سفانة صدقتي ياختي.. كل هذا تخويف.. وخذيت وعد من زوجي بان محد من اهله يتدخل في حياتي.. وانا واثقه منه والمفروض اكون اقوى وماخلي احد يزعزع هالثقة ... مشكورة حبيبتي... أبوعزيز: ماعرف شو اقولك .. انا بعد معورة قلبي هالبنت .. وان شاء الله برجع لعند زوجي واخليها اتحس فيه ... مابيها تفقد ابوها .. مشكورين كلكم .. ان شاء الله المواضيع الثانية اتكون احسن |
| الساعة الآن 01:40 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©