|
زوجي وانا والجوال
السلام عليكم ورحمة الله وبركاته
بعد غياب طويل رجعت للمنتدى والسبب علشان أفضض عن مشكله لي من عدة مشاكل تخصني وزوجي ومو معناته أني أعاني بس هي أمور بزوجي وكوني شريكة حياته أتأثر وأتضرر بسببه ولكن حياتي تمشي واوضاعي مستقره وباقي أموري جيده المشكله اللي ماقدر أبوح فيها لأي حد هي زوجي العزيز دائما يصورني بالجوال يطلب مني أهيأ له جو وأرقد عيالي أو أطلعهم وأفضي البيت وأسوي له جو وأتفاجأ فيه ماسك الجوال يصور رقص سوالف دلع ولمن أقوله ترى الصور حتى لو مسحتها يقدرون يطلعونها ، يقولي ماراح ابيعه واذا قلت له ماتخاف حد يشوف صوري يقولي الجوال عندي على طول والمصيبه انه مو حاط له رقم سري يعني اي حد يقدر يتعبث فيه ويشوف الصور والمصيبه انهم على طول في الاستديوا اي حد يقدر يفتح عليهم ويشوف بسرعه ياليت حتى حاطهم بحافظه نوعا ما ماتبين علشان يمديه ياخذ الجوال قبل تنشاف المقاطع وياليت حاط رقم سري على الاقل انا احس انه حريص علي لكن للاسف ولاشي أحسه يتعمد يشوفوني انا مسكت الجوال مره ولقيت صوري وفيديو حذفت كثير بس خذا مني الجوال زعلت عليه وقلت له شلون للحين ماحذفتهم انا بسهوله تفرجت عليهم ماتتخيل حد من ربعك يشوفهم يقولي لا محد بيشوف الجوال عندي على طول !! واللي يخوفني ومايطمني انه من مده طويله متعرف على شله جديده خايسه صيع وكلهم عزابيه ومخربينه صاير مدمن تدخين ويسهر كثير معاهم وهم ماشاء الله كل واحد يفرجه في جواله على الصياعه والفساد والبنات الخيس أحياناً تفكيري يروح لبعيد وأتخيل أن زوجي يبي يتفاخر مثلهم أنه عايش جو الوناسه ذيه ويقوم يصورني وأنا ارقص له أو لبسي قصير اتخيل واتروع واتمنى اكذب نفسي أنه ممكن في يوم يسمح لهم يشوفون جواله بتسألوني ليش اتخيل هالشيء او اشك فيه رغم انه استحاله اي زوج يسمح بهالشيء والسبب انه ماصار غيور منهم واكثر من مره وانا بلبس كاشف وقصير اكون مجهزته لزوجي وابي اقعد معاه قعده لوحدنا في المجلس اتفاجأ باصوات رجال وهم شلته الصايعه والعزابيه واللي سنهم إما بعمري او اكبر مني بس اصغر من زوجي لان الفارق بيني وبين زوجي 15 سنه ولولا اني الحق على عمري بأخر لحظه واركض واقفل الباب وراي واطالع زوجي بنظرات وانا معصبه من حركته السخيفه لانهم كانوا بيدشون علي وانا غافله وكاشفه ولمن المح تعابير زوجي اللي عيونه اتابعني وانا طالعه من المجلس الاقيه يتفرج علي وعليهم ووده انهم ألمحوني!! وبوجهه ابتسامه عريضه وكأنه تمنى لو انهم شافوني!! وكل هذا علشان فسرته لانه يبغي يشوف نفسه جدامهم ان اللي هم يتكلمون عنه ويحصلونه بالخش وبالحرام هو عنده بالحلال ويستمتع مثلهم بس بدون معاناه احس عقليته سخيفه ماكان جذي وكان يغار علي بس صاير شخص ثاني مادري شفيه يبيني اطلع كاشفه يبي يستعرض فيني مادري وين غيرته ودينه بعد ما زوجه ابوي مني وانا ياهل لانه التزم وكل فرض في المسجد وانقطع عن التدخين وصار ملتزم لسنين طويله بعد زواجي منه وهو ملتزم ولكن للأسف تغير حاله تدريجياً وصار يصلي في البيت ويأخر الصلاه وصار مدمن تدخين (والله واعلم اذا فيه غير التدخين) وصار بعد اللحيه بدون حتى شنب !! أحيانا احس عيالي اعقل منه !! وفيه اشياء كثيره طويله وعريضه بخصوص زوجي بس اهمها موضوع الجوال يعني هو موحريص علي ولو لا اني انا حريصه على نفسي واراعي الله واعرف اني بنت ناس وقبايل والا كان سايرته وكملت معاه خاصه وان شلته اصغر منه في السن وبعمري يعني مثل افكاري بس زوجي مايفكر احيانا في السياره اذا وقفوا وكلمهم ممكن حد يكلمني وزوجي مايمانع واحس زوجي متشقق والابتسامه شاقه الحلج !! واحيانا وانا اتكلم مع زوجي في الجوال فجأه الاقي واحد منهم يكلمني وكاني قريبته والا اعرفه وممكن يمدحني بشي سويته مثلا اكله او تغيير في المجلس او حتى عن زوجي وانا مصدومه وحاسه باحراااااااااااااااااج ومو قادره اتكلم عدل وأسأل نفسي شلون سمح له زوجي ياخذ الجوال منه ويكلمني؟؟لهدرجه يمون عنده وعادي عنده يكلم زوجته !! مع ان زوجي يغار علي من أقاربي وعيال عمي وخاصه اللي بسني حتى لو متزوجين وشلته عادي عنده يسمح لهم يكلموني وهم الله بالخير لادين ولا غيره مع ان صديقه للاسف لو حصل مني إشاره بس ماتهاون وماقال هذي زوجة صديقي ولا راعى حرمته لان للاسف صداقتهم مبنيه على معصيه وين يغارون على زوجة صديقهم والغريب ان زوجي بين فتره وفتره يشك فيني يعني اكثر من مره صدته ينبش في جوالي أو يسألني من كنت أكلم وأقول بنفسي والله غريب وعجيب طلعت تشك وتغار ؟؟ المهم والخلاصه انا عالجت عدة امور وتهاوشت معاه ودخلت هلي بخصوص شلته اللي يسهرون عندي في البيت واللي يبون يحسسونه انه عادي يسولفون معاي والحمدالله خفت هالمشكله تقريبا ونادر يجون البيت بس لازالوا ودهم يخلون البساط احمدي بينهم وبيني وهذا مستحيل اسمح فيه والحمدالله حسستهم بنفوري منهم وخليتهم يعرفون أن وجودهم يسبب لي مشكله فكثير منهم انقطع وخفت كثير جرأتهم وقل وجودهم في بيتي آخر الليل وصار نادر وحليت مشكلة التصوير منعته يصورني وقمت اسوي له جو بس في غرفة النوم وفي ضوء خفيف علشان مايقدر يصورني بس باقي تصويره لي وصوري في الجوال واغلبها فيديو ماقدرت امسحها كلها ولا قدرت امنعه من هالطبع لاني مو قادره اسوي مشكله وافاتح حد بهالموضوع حاسه باحراج ادخل ابوي في هالموضوع ادري فيه الوالد الله يحفظه ملقوف يعني مستحيل يقوله احذف الا بعد مايشوف صور بنته المصون وادري زوجي وحلالي وعادي ارقص له او البس له بس انا بنظر ابوي مؤدبه ومحتشمه ومايدرون هالشياب ان الواحده عند زوجها كل شيء حلال ترقص وتلبس له خاصه في هالزمن وبنفس الوقت ادري ان ابوي يشوف اهون ولا غيره مع اني بعدين مالي ويه يشوفني ابوي علشان جذي ابي طريقه اني حتى لو قدرت امسحهم اوقفه عند حده وينتهي من تصوير زوجته بدون تدخل حد واللحين ابي مشورتكم شلون اتصرف معاه بخصوص الجوال خاصه بعد ماشرحت لكم نبذه بسيطه عن تصرفات زوجي وهل فعلا انا في خطر من وجود صوري في جوال زوجي والا مثل مايقول زوجي: ( محد بيشوفهم غيري )!!! وفي نقطه مهمه وابي رايكم انا لمن الاحظه ينبش بجوالي استانس وتجيني افكار شيطانيه وافكر اني اخليه يشك زياده لانه بعد مايشيك ومايلقى شيء يتطمن ويقعد فتره طويله لين يرد يشوف جوالي وهو يعرف اللي اكلمهم فحابه احفظ ارقام خواتي وبعض صديقاتي واحذف اسمهم علشان يبين كرقم غريب ولو جاتني رساله منهم بعد تكون كرقم غريب علشان يشك زياده ويتأدب وارتاح نفسيا... شريره صح :) انتظر رايكم |
أختي
الصراحة بعد ما قرأت جملتك هذه بالذات اقتباس:
|
احذفي الصور ولا اقولك كسري الجوال احسن اذا نام او قولي احد الاطفال رماه من الشباك
اختي تخلصي من الجوال فورا |
بالنسبه لزوجك (لاتعليق)
افضل شيء سويتيه الى الان انك علمتي اهلك الجوال لابد تاخذينه اشتري له هدية جوال وخذي القديم واحتفظي فيه او اكسريه لان من كلامك ماعنده اي مانع ان اي شخص يشوفك والله يحميكِ من كل شر |
لاحول ولا قوة الا بالله نصيحتي لكي الدعــــــــــــــــــــــــــاء له بالهدايه ربك اعلم بحالك
|
الله يهديه ...
بالنسبة للجوال ... أخرجي يوم للبحر مع زوجك ... وأمسكي الجوال كأنك تصورين ... وسريعاً ارميه في البحر... وحطي نفسك ندماااانة ... وأعتذري وتأسفي.... وبعدين جيبي له جوال هديه .... وحاولي تكوني صارمة من ناحية علاقة زوجك بهذي الشلة ... وأحرصي قدر الامكان تبعديه عنهم .... وشجعيه على ترك التدخين وساعديه إنه يرجع ملتزم زي ماكان.... ولا تنسين الاستغفار والدعاء طيلة الليل... وتعمدي إنه يقوم آخر الليل ويلاقيك تصلين وتدعين له ..... وكل ماجات فرصة حاولي توضحين له غلطه..... وحسسيه إنك ماترضين منه الغلط... زي ماهو مايرضاه منك.... وقولي له بصراحة .... لو شفت في جوالي صور رجال وأرقام غريبة,,, راح تشك فيني .... وأنا نفس الشيء ... و أخاف عليك من الحرام .... أسأل الله أن يهديه إلى الصواب..... |
الله يحميك يا اختي نصيحة امسحي صورك من الجوال بس لمن يكون نايم
وانتبهي على نفسك |
لو زوجك غيور ماصورك في جواله ؟؟؟؟ لاتخلينة يصوركي ابدا , ان شفت صورة وحدة في البلوتوث يصورها زوجها وهي تقول
لاتصورني ( بعنوان عروس مسيار ) ويقول لها والله امسحها هل يرضى زوجك يحصلك مثل كذا كل الناس تشوفك ؟؟ |
الله لا يبلانا صاير ديوث زوجك
استهبلي وكبي مويه على الجوال او سوي له فورمات وهو نايم لأن الفورمات تاخذ تقريبا الى ربع ساعه لحد ما تكمل اذا كان نوكيا ..اي نوع ثاني ما اعرف..وخليه لما يمسكه يلقاه ممسوح ويدوخ وين راحت المعلومات!! وانتي انكري انك سويتي شي ولا عاد تتركينه يصورك وتنبهي وتحرزي منه ومن اصحابه الله يستر عليك هذا اللي جا في بالي ويارب تلقين احد يفيدك .. |
لاحول ولاقوة إلا بالله ..
قال النبي صلى الله عليه وسلم ( لايدخل الجنة ديوث ) والديوث هو الذي لايغار على محارمه .. أختي المسألة هذه لايمكن التهاون بها .. إذا كان يعطي الجوال لأحد أصدقاءه ليكلمك فمن باب أولى أنه يعطيه إياه ليرى مافي الاستديو .. أختي أحسمي الأمر أو اذهبي إلى أهلك واتركيه ليحس بالخطأ .. والله إن زوجك مريض والعياذ بالله .. |
لاحول ولا قوه الا بالله العظيم
اختي الموضوع موسهل ابداا والله خوفتيني يوم قلتي يبتسم وينبسط لمن احد يكلمك من اصحابه ولافيه غيرة ويستعرض قدامهم صدق ديوث زوجك اختي ترا الموضوع كبير مايدريك وش يصير بالجلسات بينهم وفي جمعاتهم مابي اخوفك بس ممكن يحششون ممكن يعطونه شي بدون لايدري ممكن وممكن وممكن لكن بعض الظن اثم لكن الاحتياط واجب وخاصه انه كبير بالسن يماشي شباب اصغر منه ب 15 سنه ترا الغلط منه مو من الشباب ولا رجال كبير يماشي شباب اصغر منه لانه مو سوي حنا عندنا لو شافو رجال كبير يماشي اصغر منه بالسن ويجلس بجلستهم ويشيل الحيه ويحف شورابه ويصغر سنه يستحقرونه لانه بتاكيد وراه بلاوي... الله يستر عليك وخيتي بس انتبهي لااتتهاونين معاه ابدا وصورك بالجوال سوي المستحيل علشان تمسحينها مايدريك واحد زي زوجك مايستبعد يوريهم الصور وياخوفك في يوم يخلونه غافل او راح دوره المياه واخذو جواله ونقلو تصوير الفديو لجوالتهم كل شي توقعيه دامهم شلة فاسده مايخافون الله اختي كله الى الفساد انتهبي انتهبي انتهبي فتحي عيونك عشره على عشره@@ لاتحسنين النيه ابدا ابدا اذا زوجك في الدين عنده اى كلام |
لا حول ولا قوة إلا بالله
هو يتعمد حفظ الصور في الأماكن البارزة لغرض في نفسه وشكوكك يبدو أنها أصابت كبد الحقيقة ستر الله عليك أختي أخطأت عندما أطعتيه نعم طاعة الزوج واجبة لكن في غير معصية ما حصل قد حصل ولكن تخلصي من جواله فورا الأمر خطير جدا يا أختي لا تقفي مكتوفة الأيدي أوقفي تصرفاته المتهورة حتى وإن احتاج الأمر إلى تدخل أطراف أخرى الأمر خطير خطير خطير لا حول ولا قوة إلا بالله |
لا حول ولا قوه الا بالله .. وين وصلنا صج زمن يخرع .. الله يستر عليك يا اختي وينور بصيرة زوجك .. حاولي تخربين الجوال وتجيبين جوال ثاني هديه لزوجك او اي شي المهم تتخلصين من الصور الموجوده ولا تسمحين له يصورك من جديد .. ولم احد من ربع زوجك ياخذ الموبايل يبي يتكلم معاك على طول قفلي الموبايل في وجهه و زعلي على زوجك ولو عصب او زعل قوليله انا اللي المفروض ازعل مو انت .. والله لو ابوي ولا اخواني دروا شوف شنو بسوون فيك .. وخليك حازمه بامر اصحابه علشان لا يتمادون وهو يتمادى معاهم والله يكون بعونك ان شاء الله ويبعد اصحاب السوء عن زوجك .. ومن كلامك زوجك كبير مو صغير المفروض انه كبر على هالسوالف .. تحياتي لك والله يستر على المسلمات
|
الله يعينك ..
انا زوجي مستحيل يخلي صوري بتلفونه ... سوي له فورمات .. ماياخذ وقت . |
لا حول ولا قوة الا بالله هذا يعتبر ديوث
شوفي اختي لازم لازم تمسحي صورك من التيلفون حتى لو خفتي ان يسويلك مشكله واحد مثل زوجك ما ينضمنله واتوقعي منه اي شي ومو بعيده ولا غريبه ان يراوي ربعه صورك لا تستغربي زوجك مافي غيره يعني اتوقعي ان يسوي هذا الشي ويمكن يكون راو ربعه الصور استغلي فرصة نومه لما ينام خذي التيلفون وامسحي كل الصور والفيديو كليبات ولا تخافين هذا شرف ...... الله يهديه ويصلح حاله يا رب |
لا حول ولا قوة الا بالله
وش صاير في هذه الدنيا ... زوجي ينصرع اذا شاف ولدي اللي في اولى ابتدائي يبغي يصور شي و نكون انا وبناتي الصغار جالسين ... يطير من مكانه ويسحب الجوال مع ان ولدي يعرف انه ممنوع انه يصورني او يصور خواته او حتى ان احنا نطلع في الصورة بالغلط لان زوجي يعرف ان اي احد ممكن انه يفتح الجوال ويتفرج على الصور ..خاصة ان زوجي مو حاط رقم سري على جواله واي احد ممكن انه يفتح الجوال اختي ضروري ضروري تمسحين الصور ...خليه يزعل له يوم او اثنين وبعدين يرضى يا اختي ما تخافين صورك تنتقل بين الشباب بالبلوتوث ؟؟؟ اما بالنسبة لانك تثيرين الشك في قلب زوجك ..ما انصحك ..انت الخسرانه وراح تفقدين راحة بالك والله يهدي زوجك |
إسمحيلي زوجك هذا مريض والذي يظهر أنه يعيش في هراهقة متأخرة
أرى أن تكوني حازمة معه في هذا الشيء ... إحذري فهذا مستنقع لو إستطاع أن يدخلك فيه فلن تجدي من ينتشلك أخبري أهلك وضعيه أمام الأمر الواقع ... لامجال للعبث في مثل هذه الأمور .. |
اختي صريحه جدا
الموضوع جد خطير وماينسكت عليه .... رغم انك اصغر منه ب15 سنه بس اعقل منه سبحان الله الخطوره الآن مو بس في التصوير الا عدم غيرته عليك توصل لدرجة يخلي احد من ربعه يمدحك في الجوال !!!!!!!!! ويحاول يخليهم يشوفوك لما يجوا عنده البيت وكأن الموضوع عادي !!!!!!!!!! لا اختي لازم تتناقشي مع زوجك عن حرمة هالأشياء وسلبياتها بهدوء وعدم عصبيه .... واهم شي يمسح الصور كللللللللها وبعدين سوي الحركه اللي قالت لك عليها حمامة الوادي ارميه في البحر تراها فكره جهنميه حلوه ...... الله يصلحه ويهديه .... |
تخلصي من الصور
وبسسسسسسسسسسسسسسسسسسسسرعه بل من الموبايل كله ارمي الموبايل(وانتي بكرامه)في الحمام وقولي ان العيل رموه لان حتى لو حذفتيهم في حال البيع يمكن استرجاع الصور الممحيه ولا انصحك ان تضعي ارقام غريبه كي يشك(لا تلعبي بالنار كي لا تحرقك) والله يعينك (اختي الزمي الاستغفار) |
اقول ترا كارثه التصوير انتبهي على نفسك لو انسرق جواله وتصير عادي اي واحد ينسرق جواله او يضيع لو انسرق او ضاع يمكن يطلقك لأنه يبدا يشك في الكل ان جواله معاه ويتخلص منك بأسرع وقت ترا الغيرة تشتغل في حالات زي هذي مهما كان ديوث ومين الضحيه انتي فيه خطوط حمراء في الوناسة الزوجيه ماحد يتعداها ابداً حتى ولو كان ماتبينه يناظر لغيرك ترى نهايتك معاه شينه حتى اذا كبر في سنه شوي تعدى الخمسين يبدا ينظرلك نظره مو حلوه أول شي يصير تفكيره تفكير شيبان وانتي باقي شباب ويتشمت فيك بعد.
تحياتي لك. هذا خبل مو بصاحي ماينظرلك نظرة زوجه ينظرلك نظره ثانيه. انتبهي على نفسك منه. |
اختي الكريمة نصيحة لا تنتظرين اكثر من كذا
انهي صورك ولا تنتظرين اكثر اسأل الله الكريم ان يكون مااطلع احد على صورك الأمر ماينسكت عنه جوال زوجك بكل برود وبدون مشاكل لا تتهاوشين معاه لا ابدا خذي الجوال وكسريه انهيه عن بكرة ابيه طبعا قولي لزوجك ماادري عنه كسر احد اطفالك فيه كذا عذر لكن صورك لا تتركينها اكثر من كذا وراح نحسن الظن في زوجك ان قصده بريء طيب حتى صورك في جوال زوجك وربع صيع مثل ماذكرتي ومو شرط يبيعه يسرق منه يضيع بعدها حليها الله يحفظك بحفظه ويسترك دنيا وآخره يارب والله يهدي زوجك ويرده الى الصواب |
أختى دلتى الصور سريعا
وخدى موقف من المهزله دى وخافى على نفسك بدام هو مابيخافش عليكى ربنا يستر والاخوات يفدوكى ربنا معاكى |
انا كنت جالسه اليوم مع اخوي وحكيت له قصتك وسالفه الصور بالجوال
فعطاني احسن فكره وهي انك تجبين كاس ماء وتحطين الجوال فيه وينتهى امره :22::22: وبعد ماينتهى امره طلعيه من كاس المويه ونشفيه ولا كأنك مسويه شي:30: شوفيه بعدها يشتغل ولا مايشتغل واتوقع انها اسهل طريقه خبيثه للقضاء على جوال زوجك :dبدون تكسيره او حتى تسوين له فورمات او تقطينه في البحر ماكأنك سويتي شي:o |
يا جماعه نحن نعاني من امراض نفسيه???? هذا ينسج قصه من خيال وذاك يصور زوجته بالفيديو او موبايل...الي اي هاويه يا امل الامه ستهون بنا. يا زوجات , يا اباء اتقوا الله وامروا بالمعروف. ولا طاعه بمعصية الخالق مهما كان...
|
يا جماعه نحن نعاني من امراض نفسيه???? هذا ينسج قصه من خيال وذاك يصور زوجته بالفيديو او موبايل...الي اي هاويه يا امل الامه ستهون بنا. يا زوجات , يا اباء اتقوا الله وامروا بالمعروف. ولا طاعه بمعصية الخالق مهما كان...
ملاحظه الشريحه الداخليه تحوي كل المعلومات يجب كسرها او مسح الصور قضيه تكسير الهاتف او وضعه بالماء لا يفيد. يجب كسرها او مسح الصور . |
اخفي الجوال حتى يظن انه ضاع
|
السلام عليكم ورحمة الله وبركاته ....اخوتي في الله
روح الطير .. منتظره فرج ربها ... أبو البراء .. زوجة أحمد .. حمامة الوادي .. al farash .. صن رايز .. مشكلتي أصدق .. ( أبو فلان ) .. بنفسج .. شاطئ المحبة .. nweerh .. أم وداد .. nenja .. fafi .. الغالب .. سابرينا .. رئبال ..seher algharam .. لذة عشق .. المصرية .. love3 .. صبا نجد .. أشكركم على ردودكم اللي فادتني وخلتني احس بعدة مشاعر اثرت فيني بالسلب والايجاب ... منها انها طمنتني وأكدت لي أن تصرف زوجي غلط واكبر غلط واني مو شكاكه وغلطانه اومكبره الموضوع مثل مايقول زوجي وبنفس الوقت زعلت وحزنت على نفسي لاني الوحيده بس اللي عندها هالمشكله وانها مشكله معدومه بين الازواج لحرصهم على زوجاتهم وبرغم اني توقعت ان فيه غيري بيذكرون لي انهم مروا بمثل مشكلتي وكان موضوع عادي او انحل علشان اتطمن وبنفس الوقت حمدت الله ان ولا واحده قالت لي انها تعاني مثلي او مرت بمثل حالتي وفسرته ان زوجي ماتهمه كرامتي وعرضي وشرفي ومع اني ماتمناه لغيري بس شعور احزني كثير على نفسي لاني الوحيده واخر شعور شعرته من بعض الردود هو الخوف والرعب الكبير لخطورة الوضع واللي المفروض هذي الحقيقه اللي اعرفها ومااتهاون فيها بس حابه اقول لكل من يقولي امسحي الصور واللقطات بسرعه وهو نايم والا غافليه والا قولي العيال رموه لو كان سهل بهالطريقة ماذكرت لكم مشكلتي وكنت حليتها مثل كثير من مشاكلي اللي احلها بنفسي او بتدخل اهلي وخاصة ابوي الله يحفظه واللي اعتبره اب واخ وصديق بس انا ماكتبت لكم الا بعد ماعانيت من مشكله ماقدرت عليها وهي صعوبة اني القى الجوال وحرصه على انه يبعد مني جواله ومن احساسي بالاحراج من الموقف لو تكلمت عنه كمشكله علنيه عند اهلي وخاصه الوالد اما جوال زوجي فهو يختفي وقت ماينام او يدخل الحمام وانتوا بكرامه وماألاقيه عند السرير مثل قبل ولا بجيب ثوبه .. انبش بهدوء وماألاقيه وزوجي نومه خفيف ويصحى بسرعه وبنفس الوقت يحطه على الصامت احيانا أهله لو في شي مهم يدقون علي يقولون لي وينه فلان ندق عليه مايرد واقوم انا اصحيه واقوله وين جوالك هلك يدقون عليك ماترد يقولي ايه حاطه على الصامت! انزين ليشششششششش ؟؟ والرد منه يكون علشان ماتزعجني الاتصالات وقت النوم ... وطبعا هالوضع حتى اذا قيل وماشاء الله قيلولته طويله من الساعه 2 ونص بعد العصر لين بعد صلاة العشاء وبعدين يقضي الصلاة واحيانا لو بدل ملابسه وبغى يطلع من غرفة النوم فجأه يرد بسرعه لانه تذكر انه ماخذا الجوال اللي يكون خاشه بجيبه يعني مو معطيني فرصه وان حصل وخذيته خذاه من يدي بالقوه واذا قلت له بهدوء ابي احذف صوري يرفض قبل كان عنده لقطات فيديو لبنات ليل مع شباب في الجوال خذاها من شلته الفاسده ويعطيني اتفرج على باله بستانس او بستثير بس يلقاني ازعل واعصب وبدال مايحصل جو مني يلقى العكس وفي الاخير خليته يحذف اللي عنده وقلت له عيب عليك وترى عندنا عيال ماتخاف يشوفونهم وخليته يحذفهم وصار جواله نظيف بس للاسف بدى يصورني انا !! وبدت مشكلتي معاه بتصويره لي ورفضه حذف صوري اما بالنسبه للي انصحوني ارمي جواله أواشتري له جوال جديد فابي اعلمكم انه شرا حق عمره جوال ثاني كامرته اوضح !! والسؤال اللي وجهته له انزين وجوالك القديم وينه ليكون بعته ؟؟؟؟ والرد منه كان: لا مابعته ....! انزين وينه ؟؟ خاشه عندي ... ويييييييييين ؟؟؟ عندي وبس ... انزين عطه حق حد من العيال.. يرد علي: لا انا احتاجه ..! وليومكم ماشفته بس هو يأكدلي انه عنده وانا ماشفت له اثر !!!! تبوني اجيب له جوال جديد!! مستحيل اصلا انا لو يصير بيدي جواله مو بس ارميه في البحر الا اكسره واكسر الذاكره قبل ارميه بس مو معطيني فرصه صاير مثل الياهل خطر عليه الجوال بكاميرا!! والبلوتوث عنده مفتوح على طووووووووول ..! انزين ريال شكبرك ومتزوج وابو عيال وبسن الرشد ليش تفتح البلوتوث ؟؟ انا عيالي عندهم جوالات بكاميرا بس مايفتحون البلوتوث الا وقت مايبون يرسلون شيء بيناتهم بطريقه طبيعيه وجوالاتهم مرمية في الصاله والا فوق التلفزيون وبمتناول الكل واقدر اتبادل معاهم واخذ جوالاتهم وياخذون جوالي مو مثل زوجي !! أما بالنسبه للدعاء والله اني مستمره بالدعاء له في صلاتي وفي سجودي وفي رمضان واصلي ويشوفني اصلي عادي عنده واحيانا يتطنز ويقولي اتصلين القيام واذا قلت له كنت ادعيلك في صلاتي وسجودي بالهدايه يقولي لا لا لاتدعين !!! اقوله ماتبي تنهدي يقولي لا خليج بعيد عني !! ولمن قلت له وصيت هلي هالسنه في الحج يدعون لك بالهدايه وانك ماتدخن وتكره التدخين زعل وقالي ليش !!! حتى الدعاء له مايبي ؟! تصدقون حتى وانا اقوله بالعلن يارب تنهدي وتترك الدخان يعصب ويقولي اسكتي بس هالكلام مابي اسمعه .. وارد عليه انا اخبر ان المدخنين يقولون ودنا نترك التدخين وادعولنا بالهدايه وانت تزعل اذا دعيت لك!! ماودك تتركها ؟؟ ويرد علي ايه ! وطبعا بعد ماياخذ شفطه دخان عميقه ويطلع الدخان من خشمه وشكله دايخ ومنفر... وبنفس الوقت كأنه يحاكي سجارته ويقولها مستحيل افارقج .. ! واذا حاولت اكرهه فيها بتنفيره منها القاه يطلب مني اجربها ويقعد يعلمني واذا قلت له خنقتني بريحتها وقف على الاقل وقت ماكون عندك يقولي انتي جربيها بتتعبين في البدايه وبعدين بتتعودين (( مسوي الاخ ينصحني)) مايخاف علي يبيني اصير مثله علشان جذيه انا ماقمت انصحه يترك التدخين لاني ان نصحته يتركها نصحني اجربها !! ولمن اكلمه بهدوء واكون الناصح الامين له يرد علي بنفس الاسلوب ولمن اسكت واطالعه بنظرات يأس يظن اني لنت له وبديت اتأثر بكلامه ويبدا يزين لي التدخين ويلح علي اجرب بس مره واحده ويقول صدقيني في البدايه بتتعبين بس بعدين عادي ومن هالكلام علشان جذي صرت ادعي له بس بالهدايه وادعي لنفسي ان الله يعصمني ويثبتني وللعلم موضوع التدخين دخلت هلي فيه وخجلت اقولهم انه يلح علي بالتدخين وذكرت انه يضر عيالي وانحلت هالمشكله وصار يدخن بعيد عني وعن العيال وبمكان واحد في البيت وهو المقعد بس وطبعا لازال ينصحني اجرب ويستمر بالمحاوله علشان اكون مثله وماخرب جوه ولازال الله عاصمني ومثبتني وبالمقابل أكره زوجي وهو يدخن بطريقة مغززه لدرجه صرت أكره كل مدخن اشوفه يدخن لانه يذكرني بزوجي واحسبه مثل زوجي مع اهله .................................................. ... اما سؤالك يا اخ صن رياز اللي قلت فيه هل يرضى زوجك يحصلك مثل كذا كل الناس تشوفك ؟؟ لو سالتني عن ابوي او اهلي او عيالي او انا نفسي ممكن اقولك بتجيني جلطه او سكته قلبيه اساسا سؤالك يخوف! بس لمن تخيلت السؤال لزوجي في هذي الفتره واللي وصفوه لي بانه ديوث .. !!احترت كثير في ردة فعله تخيلت انه ممكن تجيه نشوة غرور ويضحك من السعاده والا يتشقق من الوناسه ويمكن حتى يقول ايه هذي زوجتي على باله الناس مثل شلته وبيقولون من قده !! وبصراحه....... مادري وش ردة فعله بس ماظن بيكون رجولي .....................! .................................................. .......... أما نصيحتج يااختي مشكلتي اصدق وانتي وكل من نصحني بالفورمات فارتحت لها كثير بس شلون يعني اسويله لانه لو افترضت وقدرت احصل على الجوال فهل ممكن اسوي له فورمات في البيت؟؟ وبالنسبه لنوع الجوال فهو نوكيا ......................................... اخوي ابو فلان كلامك مرعب طيح قلبي بس بآخر كلامك قلت :أختي أحسمي الأمر أو اذهبي إلى أهلك واتركيه ليحس بالخطأ .. اروح لاهلي صعبه انا عندي عيال وانت تدري الناس بتسال وبيكبر الموضوع فإذا كنت بحسم الامر فانا بحسمه وانا في بيتي ويصير لي مع زوجي حرب ودمار والا صلح وسلام فانا في بيتي واللي المفروض يطلع من البيت هو زوجي مو انا .. وزوجي مستحيل يحس بخطأه ولو حس فهو احساس مؤقت مجرد ارجع لبيتي يرجع مثل ماكان ومو سهله كل شوي اروح لاهلي لكن حل المشكله وانا في بيتي اسهل لي بكثير وقلت يا أخ ابو فلان هذي الجمله ((والله إن زوجك مريض والعياذ بالله )) اول مره اسمع هالكلام عن زوجي وافكر فيه !! واظن انه صحيح دام ولا واحد فيكم قالي العكس وبرر تصرفه اذا هو فعلا مريض والنصح معاه مايفيد ولازم له تعامل خاص ........................................ اخوي الغالب صدقت فعلاً أشعر انه يعيش مراهقة متأخرة بس على حسابي أنا !!! ......................................... وللاخت fafi ورئبال ولكل من نصحني بعدم جعل ارقام غريبه كي يشك بي فاشكر كل من نصحني بعدم اثارت الشك بقلب زوجي ...انا كنت اظن اني بحرق قلبه شوي وبعلمه يغير علي ومايظن اني ملاك او معصومه من الغلط لانه دايما يكرر لي انه واثق مني واني شريفه فحبيت ابين له ان كوني احافظ على نفسي مو معناته اني ماراح ازل او اغلط ومو معناته انه يعرضني للفتنه وبنفس الوقت يثق فيني اني ماغلط ... مهما يكون النفس اماره بالسوء وانا خايفه على نفسي وحاسه اني بعد ماكنت مصونه ومحميه من غيري وعندي زوج يعفني من الحرام وعيال يشغلوني .. صرت اكافح علشان احمي نفسي وعرضي .. فحبيت ازرع الشك بقلبه واخليه يشك فيني اني مثل غيري اغلط علشان يحافظ علي ويحميني ولكن باخذ بنصيحتكم لاني فعلا مابي العب بالنار ولا ناقصه افتح على نفسي باب مشاكل .............. اختي seher algharam مبين عندج خبره في الحياه تعليقك فادني وانظر له نظره جاده ....................... واشكرك اختي بنفسج على النصيحه ماتقصرين انتي واخوج بس ماتفيد هالطريقه لانه مجرد مايجف الجوال من الماي يرد يشتغل من جديد انتي بسخليه يوصل يدي وانا اوريج فيه ..................... عزيزتي ام وداد اللهم اجمع بينك وبين زوجك على خير .......................................... واشكر كل من علق على مشكلتي ونصحني وفادني في الموضوع حتى ولو ماخصيته بالاسم بس فعلا كل كلمه انكتبت اثرت فيني وفادتني ووضحت لي الامور جزاكم الله خير انا بستخير وبطلب من الله الطريقه اللي تناسب زوجي المريض على قولة البعض والخبل على قولة اختي seher algharam سبحان الله لمن تزوجته وانا ياهل كان دين وملتزم ومتشدد وفاهم كل شيء وانا الخبله ياهل ومادري بشي واللحين لمن كبر وصار بسن الرشد وعمره 45 سنه صار بسن مراهقه متاخره ( وانا وش ذنبي ) وصار ديوث ( الله يهديه ) وصار مريض ( الله يشفيه ) وصار خبل مو بصاحي ماينظرلي نظرة زوجه ينظرلي نظره ثانيه .. والمثل يقول (لمن شاب ودوه الكتاب)وزوجي لمن دخل سن الرشد عاش سن المراهقه بحذافيرها بس مع زوجته وأم عياله................ اختكم / صريحه جداً |
عزيزتي ... أسأل الله أن يهديه للصواب...
ويفرج همك .... وعليك بدعاء يونس.......... لا إله إلا أنت سبحانك إني كنت من الظالمين.... |
ماتوقعت وضع الجوال بهذي الصعوبه
ونصيحتي لاتسكتين على وضع الصور (في اشياء لها حدود اذا تعدتها خلاص لابد الواحد ياخذ موقف) وزوجك تعداااااااهااااااا بشكل غير طبيعي ماعندك خيار غير تعلمين اهلك او اذا في احد تثقين فيه من اهله افضل لان من اهله راح يستمع (هذا رأيي) وان شاء الله تلقين حل افضل والله يستر عليك وعلى بنات المسلمين |
نصيحتي أحذفي صورك فورا سواء كان راضيا أو بدون رضاه فمن يضمنه فلربما نسيه يوما ما في السيارة وتم تكسير زجاج السيارة وتم سرق الجوال ، أو ربما سقط منه ، أو نسيه في العمل وربما يشاهده أحد العابثين ومن ثم نشر صورك في مقاطع البلوتوث أو على مواقع النت نصيحتي أحذفي صورك فورااا بدون تردد، وغذا زوجك غير راض فأحذفيها أثناء غيابه أو في نومه وهو سوف يقتنع برأيك إذا ذكرتي له الأسباب أنفة الذكر
|
السلام عليكم ورحمة الله وبركاته
بعد التحليل اللي خذته منكم عن زوجي بأنه مريض ومراهق تعاملت معاه اليوم بطريقه ثانيه بدون كلام كبار وبدون عقلانيه وبدون دين وتوجيه وتخويف من الرب لاني جربتهم قبل ومافادوني ابداً فقررت اتعامل معاه بنفس طريقته ويارب ماصير مثله ادعولي اليوم قعدت عنده بعد ماخذت نفس اكسجين طويل لاني راح ادخل على ضباب من دخان السجاير وكان يشفط كالعاده ويتفرج على قناة ام بي سي اكشن من فلم لفلم ومن قناة الاكشن لقناة روتانا السينما والاغاني ( بس بإذن الله بيجي اليوم اللي اتخلص منهم مثل ماخربت عليه القمر الاوروبي اللي كان مركبه وقنوات خلاعه وسويت له سالفه ودخلت الوالد لان باللين والنصح مافاد وكالعاده تحججت بخوفي على عيالي لاينحرفون .. المهم ماراح ادخل في ذاك الموضوع ) كان يشحن جواله وانا قربت منه وسويت نفسي اتفرج مع انه يفرفر بالقنوات وبالذات هالقنوات اللي ذكرتهم لكم ففتحت جوالي وقعدت ادور صوره لعيالي وقلت بطرشها له بلوتوث ( ابي اتحرش وبس ) قلت له استقبل قالي وشهي استقبل وبس واستقبل بعدين قلت له ليش ماتغير نكك البلوتوث مو شي ( بالعاده انتقده واقوله غير النك ولاتشغل البلوتوث وهذي حركات مراهقين والخ ) بس هالمره قلت بتعامل معاه كمراهق وبصير مراهقه ( ادعولي الله لايبليني وانعدي منه واصير مراهقه ) فقعدت حذاه وخذيت الجوال وعيونه عليه وقلت له بحط لك اسك بلوتوث حلو وكتبت له اسم بلوتوث بالانجليزي يصلح لمراهق عمره 14 سنه واستانس عليه يفشل وربي زوجي فرح مع انه يفشل !! واستانس علي اني انا اللي اسويله نكه !! بسسسسسسسس رد خذاه مني !!! ابتسمت له وقعدت اتفرج عليه وانا مبتسمه وبقلبي اقول عااادي اصبري وبداية الألف ميل خطوه .... وخلال هالفترة القصيره اللي انا عنده يمكن خمس مرات دخن اختنقت وقلت له بسويلك نسكافيه علشان اطلع واخذ نفس نظيف !!!!!!!!! وبنفس الوقت علشان افكر مره ثانيه وش الطريقه الثانيه اللي اخليه يعطيني جواله بدون مايكون مراقب لي وبنفس الوقت افكر شلون اخليه يثق فيني ... خلصت اسوي النسكافيه وقبل ماادخل عنده خذيت نفس طويل من الاكسجين النظيف ودخلت إلى (( ساونا كثيفه من دخان السجاير )) !! حطيت له الكوب وقعد يشرب شوي ودق عليه واحد وآخر المكالمه قاله زوجي اوكي جايك... قلت له : من؟؟ قالي واحد مواعدني نطلع (( هذا وقته )) !! وانقهرت وحسيت ماسويت شي ... قعدت استغفر واطلب الله يلهمني بأي طريقه تفيدني .... وطلع يشغل سيارته ورجع لبس غترته وعقاله وقعد يعدل فيهم لين تسخن السياره .. قلت له تعال اعدل لك شوي الغتره .. جذي ارتب.. وقلت له تصدق يبيلك صوره .. تعال بصورك بجوالك ترى حلو يكون لك صوره حلوه بالجوال ... وطبعاً لانه مراهق استانس وصدق كلامي وانا ودي اصطره مو اصوره ( صج مايستحي ) وصورته صوره ... وصوره ثانيه يعني اني ابي احلى صوره له وشوي قلت له شرايك انزلهم لك في اللابتوب بتطلع صورتك كبيره وحلوه اوريك ... قالي اللحين مافي وقت قلت له دقايق ماياخذ وقت بنزلهم على سطح الشاشه وشوف بنفسك.. وقلت له بخلي ولدي يجيب اللابتوب وينزلها لك ثواني بس .. ناديت ولدي وانا ادري انه بغرفته فقلت له انا بروح صالتي فوق وبنزلهم ومديت يدي للجوال وعطاااااااااااااااني جواله لاول مره !! طلعت من عنده وركضت لصالتي فوق وقلبي يرجف يارب صار الجوال تحت يدي وكنت خااااايفه يطلع لي فجأه وانا احذفهم وتوني اقعد قريب اللابتوب طالعت الجوال وقبل افتح جواله الا والقاه واقف يطالعني !!!!!!!!!!!!( بسم الله الرحمن الرحيم) !!! طالعته وابتسمت له وفتحت اللابتوب وقلت له ثواني بس .. وطلبت من ولدي ينزل الصوره وقلت له شرايك وكبرتها طالعها وهو مستانس وقال اوكي حلوه بس عطيني الجوال مستعجل اللحين بطلع وبرد عطيته وانا ماودي اعطيه وقلت ان شاء الله اذا رديت بسويلك حركات حلوه بتعجبك يا ( ............ ) وناديته بالانجليزي باسمه اللي في البلوتوث وهو متشقق ( صج العقل زينه )!! وطلع وانا حزينه وحاسه اني ماسويت شي....! ودعيت وقلت يارب احفظ زوجي وجواله وخلهم يردون لي الاثنين سالمين كاملين بلا نقصان ..!! وهذي ثاني محاوله ماستفدت منها بس حسيت انه استانس علي وامن علي شوي ويارب المره الجايه تضبط ... اما صورته حذفتها على طول من الشاشه واللحين انتظره يرد بخطه جديده اكون فيها مراهقه وخبله مثله علشان اكسب فيها ثقته واقدر احذف صوري وادعولي بالتوفيق والستر إن شاء الله اختكم / صريحه جداً |
صراحه
بموت ضحك الله ياخذ عدوينك مسلسل اشوفه والله تخيلتكم بس ماشاء الله نفسك طويييييييييييييييل ولازم تطوليييييييييييييييييينه زياده ننتظرك تبشرينا |
الفورمات ايوه ممكن تسوينه في البيت بس لازم يكون الجوال مفتوح مو مقفل بالقفل
وكمان ياخذ منك تقريبا ربع ساعه حسب قد ايش ممتليء الجوال طريقته بسيطه جدا اطفي الجوال اضغطي الازرار التاليه في وقت واحد: رقم 3 والنجمه وزر الاتصال الاخضر ( السماعه الخضراء) واضغطي الان زر تشغيل الجهاز ...كل هذي الازرار في وقت واحد وخليكي ضاغطه الان بيشتغل الجهاز ...وتظهر لك كلمة فورمات ..بعدها يا ينطفي الجهاز او يكتمل التشغيل عموما بعدها يصير الجهاز نظيف بس تأكدي ان الذاكره فيه علشان تنمسح هي كمان بالنسبه لطريقة زوجك فشكله مستحيل تاخذين الجوال وهو مفتوح ..بس مالك الا تستغفلينه وتاخذينه وتسوين نفسك رايحه تاخذين دش وتفرمتينه وانتي بالحمام الله يعزكم وخليه يدوره ...واطلعي ورجعيه مكانه واطفيه خليه طافي وكأنه تعطل ولما شغله يلقاه ممسوح مو مشكله بيزعل بس في مصلحتكم |
ريلج هذا وضعه ما يطمن أبـــــــــــــــــــــــــــــد
روحي يا قلبي خذي جواله و احرقيه بالناااااااااااااااااار عشان تفتكين ، لأنو مهما مسحتي يمكن يرد الصور عند خبير جوالات و بعدين لا سمح الله انسرق جوال ريلج منهو الضحية ؟!! و انتي وش دراج ان ريلج أمين لدرجة تتطنين فيها على صورج و أهو يخلي ربعه يتحجون وياج !! أنا ريلج موقفه ما أبرره أبدا أبدا ، لأني ما أثق في تصرفات رجال يخلي ربعه يكلمون حرمته روحي احرقي جوال و اشتريله جوال جديد يكون بلا كاميرا ، و لا خرابيط و لا تسمحين له يصورج و هدديه و وضحيله انج ما تبين تستوين انتي و بنات الليل الموجودة صورهم عالبلوتوت ، قوليله يرضى انج تكونين مثلهم ؟؟؟ و بعدين فهميه لو مثلا انسرق جواله أو نساه في أي مكان أو صارله خلل و جا يصلحه عند أحد المحال و شاف صورج ،، أو شي من كذا ، و بعدين خليه يفهم انج مو بواثقة فيه من هالناحية لأنه أهو الغلطان ، و ربعه هاذيلا احرميه منهم بأي طريقة و دايما ذكريه بيوم القيامة و عذاب القبر و الحساب عند شديد العقاب ، هذا وين وازعه الديني ؟؟!! تخافين لو لا قدر الله صار ديوث ، أتمنى لو تشاهدين برنامج الدكتورة فوزية الدريع على قناة الراي لأن وضع ريلج مررررعب ، و الله يسترج و يحفظج يااااااااارب و يثبت عليج العقل و الدين *ميار الحلوة* |
حبيبتي
اذا ما قدرتي تاخذيه .. ارسلي له فيروس بالبلوتوث و خليه يقبله على باله صورة و لا شي . الفيروس كفيل بتدمير الجوال ... لا تسأليني من وين تجيبي ملف الفيروس لاني ما ادري .. بس اسالي احد من اخوانك او اولادك ماشاء الله على اولاد هذا الوقت يدرون كل شي واذا سالوكي عن السبب قولي انك تبيه عشان تخربي جوال وحدة تعرفيها بينكن مشاكل :) بس انتوا الان تحلوا نتيجة من نتائج المشكلة الاساسية نفترض انك اخذتي الجوال و مسحتي كل شي ,,,و ان شاء الله تقدري ما انحلت المشكلة .. ممكن يصورك و انتي نايمة مثلا :( و لازالت مشكلة اصحابه قائمة !!!! الموضوع يبيله حلول جذرية اولها التخلص من شلة السؤ الله يوفقك و يعينك حبيبتي |
متابعه
واسأل الله الكريم ان يسهل امرك وينيلك مرادك اللهم آآآمين |
الله يهديه
|
مايبي لها كل ها السالفة
خذي جواله وهو نايم ... |
احظفى صورك فورا لان زوجك مريض وممكن احد اصحابة يشاهدها ويرسلها لنفسة وتبقى مقطع فيديو
|
هههههههههههههههه
والله تجنني اختي صريحه هانتي قلتيها طريق الالف ميل تبدأ بخطوه من جد طلعتي ذكيه وعرفتي تجاري مراهقته الله يسعدك ويوفقك ويهدي لك ابو الشباب مازلت متابعه فلمك .... كملي معاه تراك نجحتي بنسبة 50% |
| الساعة الآن 02:46 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©