والد زوجي ينصحني بعصبية !
 

مرحبا


مشكلتي ابو زوجي واللي دايما نصايحه ما تكون الا بالعصبية والتهزئ

اللي جرحني انه نصحني أمام زوجة اخو زوجي وهذي عادته دائماً ولا مرة هزأ وحدة من زوجاتهم أمامهم ليش انا بس هل اهو مايقدر عليهم او لاني في كل مرة اسكت

سواء كان الشي يخصني او يخص اعيالي دائماً أتهزء رغم اني اكبرهم ليش مايراعيني

من البارحة مانمت محتاجة لحد يساعدني مقهورة خصوصا من نظرات سلفتي مع انها ما تقصد شي

وانا احب اللي ينصحني بهدوء وبالسر مايمون أمام فلان وعلان


اه قولو لي ماذا أفعل ؟

حبيبتي طولي بالك صدقيني انتي الاقرب لقلبه لانه عارف قلبك طيب وناصحك انا معتبرها تهزيئ بالعكس اكسبي وده واذا عصب قدام سلفاتك خذيها برحابة صدر وقولي له امر يابو الغالي اللي تامر فيه
واحتسبي الاجرمن الله وترى هم الخير والبركه
الله يسعدك ويسخرلك

أبدا لا تهتمي أنا أقوللك ليش

لأن هذا أبو زوجك ولا تقدري تغيريه فأتقبليه مثل ما هو وكيفي نفسك

ولا تزعلي أبدا

وبالعكس بإحترامك له راح يرتفع قدرك قدام مرت أخو زوجك

يمكن مطيح الميانه معاك
قصدي انه عارف انك مارح تزعلين
عندك مثلاً عمي ابو زوجي حبووووووووب مره بس عصبي لكن ما يعصب على ولا وحده فينا
الا الكبيره لإنها لها عمر معاهم و متعود عليها حييل و يعصب عليها عاااادي وهي ما تزعل
و بعد هي ساعات ترد عليه وهو ما يزعل منها
اصلاً يعزها حييييييييل و اتوقع هذا السبب اللي يخلي عمك ما يتحسس انه يقول لك اي شيء من غير ما يفكر انك بتزعلين او بتحطين في خاطرك

الله يعينك هو الموقف محرج بس هذا ابو زوجك ولازم تتحملينه و صدقيني كل ما سكتي و احترمتيه بيحبك اكثر

مشكورين اخواتي بس مش قادرة انسى نظرات سلفتي مدري ليه

واحب اضيف انه صار مرات يسكر التلفوون في وجهي ويعصب علي جدام الناس في المطار وبنته تغلط وانا اللي يعصب عليها وكانه زوجي

وزوجي ما يحب يتدخل وانا ما ابيه يتدخل ابي احل المشكلة خصوصا اني الوحيدة في سلفاتي اللي يصير لها هالشي

ابي حل

طيب انتي جاوبي
شمعنا انتي من بين سلايفج؟

مدري ليش كلنا مثل المعاملة ماعدا هذي يخصني فيها

ما يقسو عليك الا من يحبك، وتذكري انه كبير السن

اختي وين زوجك عنك خليه يكلم ابوه ويفهم انك تضايقي لما يحرجك امام سلفتك

ولا كلمي ابو زوجك علشان مايتكرر الاحراج

الله بيكون في عونك

صدقيني اختي الكبار ماينوخذ عليهم كلام عااااادي وخذيها برحابه صدر ولاتفكرين فيها لان لو فكرتي فيها بتتعبين

انتي مثل اختي تفكرين في الكلام الي انقال وتوضيعين الف تأويل وتأويل عشان كذا بتتعبين

لكن خلك جدا عــــــــادي ولكنك سمعتي شي واهم شي لاتفكرين بكلامه

والله يوفقك اختي

اشكر كل اللي ردوا


بس ليه حكمتوا انه كبير هو في نهاية الخمسينات رجال عاقل وفاهم وحكيم عشان كذا استغرب تصرفه معي

تخيلو وانا في المطار فلت من عندي ولدي غصبا علي مع اني ماسكاه زين عصب علي وتعالو شوفوني ما عرفت وين احط وجهي العالم كلها تتطلع فيني

انا احبه واعزه لكن هذا الاسلووب مو عاجبني يعني اذا كان في شي يقولي بيني وبينه وانا اتقبل

واللي يقهرني ان سلفاتي ما يصير لهم اللي يصير لي وبنته اللي هي 16 يداريها ويحسب احسابها

وانا لا ليش انا مو مثلهم :(


اتصل امبارح وقال تعالي احنا ناطرينك على العشا قلت مهب رايحة واصريت على رايي وقعدت في بيتي
وزوجي ما يتدخل يخاف يصطدم مع ابوه

احينا اقول مشيها وخليكي عادي واحيانا العكس

الريال كبير في السن والسن له احكامه .. صدقيني هو اكيد ما يحط في باله انه يهزاج جدام الناس لكن مثل ما قالوا الاخوات والخوات اللي قبلي انه متعود عليج وما حاط فباله انج بتزعلين ..

ماجوره الغاليه ..

اختي عااااااااااادي الشيبان كذا مال اول
حقين ياهيش ويابنت ويمال الذهاب عمرك سمعتي واحد ينادي بنته يقول ياهيش يامال الذهاب
عطيني القهوه عاااااااااااااادي ياختي خذيها برحابة صدر

شوفي يااختي..حاولي تعرفين السبب.. ليش اهو حاط عليك وهل هالشئ شئ جديد والا من اخذت ولدهم..وهل انتي بتعملي اشياء تضايقه والا ليش يعصب ويهاوش..
طيب لو خالتك ام زوجك موجودة..اسأليها عن السبب ..او قولي لها ما تلاحظين انه دايم يهاوشني قدام الباقي..وشوفي رأيها..
وترى ممكن يصير هالشئ والواحد يطنش..
انا زوجة اكبر ولد عند اهل زوجي ومرات خالتي تهاوشني قدام الباقين لو صار شئ غلط..بس انا ماازعل اعذرها لانها تكون معصبة..ممكن اخذ بخاطري شوي ..خصوصا ان هالشئ قدام حريم اخوانه الصغار وقدام عيالي..بس اللي يبردها ان خالتي تسوي هالشئ مع الجميع لو غلطوا..ما تفرق معها..

؟؟؟اذا تكلم عليكي قولي له بزعل ياعمي كلامك علي عيني وراسي بس الي يبي ينصحني ينصحني

لحالي مو قدام الناس وسوي انك زعلانه وبعدين طنشي

( حاولي ما تغلطين وتفتحين باب عليكي )

كلام صن رايز صح 100%
أنا عمي كان معي كذا فامرة صارحته وقلتله ياعمي أنت ليه تسوي معي كذا انا أضايقك بشي
وقتها قعد يبرر وأنه مايقصد وماكان يدري أني أزعل بس بعدها ماكررها أبد

شوف حبيبتي افضل شيء تسوينه لمن ينصحك حتى لو بعصبية خليك مبتسمه وغيري الموضوع بطريقه لطيفة

قولي ( اسوي لك شاي يا عمي هههههه ) تبي قهوة ... قدوع ... احسني له ولا تاخذين على تصرفاته خاصة لو كان كبير بالسن ..


نصيحة مهما زعلتي لا تبين زعلك حاول تتفادين الزعل وخلك واثقه من نفسك مهما نصحك حاولي انك تتقبلين النصيحة بدون زعل


حاولي تتكلمين معاه بمواضيح تهمه او إسأليه عن ايام قبل مثلا ( راح تلاقينه كل ما يشوفك يجلس يحكي قصة وينسى النقد )


هو اكيد يحبك ويبغاك تكوني احسن وحده بس مو عارف كيف


ربي معاك يوفقك

طولي بالك يااختاه