|
يشك ................!!!!!!!!!!!!!
السلام عليكم ورحمة الله وبركاته ..
قبل أسبوع تقريبا كان الجو جميل جدا .. وحبيت أني أتنزه مع بناتي الثنتين ونغير جو .. زهقنا من البيت ومن الحيطان .. أتصلت بزوجي وقلت له بروح ( اسباير ) .. وهذا المكان حول الاستاد .. مساحات وااااااسعة خضراء .. فيه مرتفعات صناعية كالهضاب .. واقسام كثيرة .. ففي كل ناحية ملعب .. كما أنه يحتوي على ممشى طوييييل جدا .. بصراحة مكان رائع وفوق الوصف .. ومع أن هناك الكثير من المرتادين إلا أني لا اشعر بالإزدحام فيه بسبب حجمه الكبير ووسع مساحاته .. المهم .. زوجي ماوافق .. ليش ؟ المكان كله شباب ومشاكل .. مع إن نصف مرتادي اسباير من النساء .. وحتى الرجال الذين يرتادونه فيقصدونه للمشي والرياضة والتمارين .. يعني محد فاضي لحد .. وهو بنفسه يشوف إن فيه الكثير من المساحات والملاعب الفاضية .. مرة رحنا اسباير معاه وجلسنا وسط أحد الملاعب الخضراء لوحدنا .. ولا أحد جلس جنبنا أبدااااااااا .. ولا حتى قريب منا .. المهم سكت عنه .. اليوم الجو أكثر من رائع .. وميتة أبغي أطلع .. أتصلت له قال لي لا .. ونصحني بحديقة ثانية .. قلت له ما أبغي أروح الحديقة اللي تقول لي عنها مليت منها لأني أروحها كثير وودي اغير .. سألني .. يعني إلا اسباير ..؟ قلت له والله أحب هالمكان لأنه شرح وواسع وترتاح نفسيتي فيه .. قال لي وش عندج في اسباير ؟؟؟؟؟؟؟؟؟؟؟؟؟؟ قسما بالله أحس بغصة من كلمته هذي .. يعني أيش بيكون عندي ..؟ اقول له الجو حلو وودي أطلع والمكان حلو وانا أنبسط فيه .. العبرة خانقتني .. طول يومه بره البيت .. صار له أسابيع ذبحنا مع الصقر .. صار ضرتي وأنا مدري .. أقول له لو تتزوج وتجيب ضرة كنت عدلت أكثر .. يرجع الظهر وأنا أكون في دوامي يبدل ملابسه ويطلع قبل عودتي للبيت .. ومايرجع إلا بالليل 9 أو 10 ..يعني باليوم أشوفه قبل النوم بسسسسس .. وانا ساكتة عنه أقول هوايته ما أبغي أحرمه منها وإلا يلجأ لأمور أخرى .. بس كثير كثير قصر في حقنا أنا وبناته .. يعني مايطلع معانا .. ولا يخلينا نطلع .. حكم القوي .. فضفضة مغتربة .. |
رجاجيل آخر زمن !! أختي بحرينية الله يعينك على أبو بناتك وحبيب قلبك بس تصدقين هو غلط ، بس غلط شائع بين الرجال وهو أنه يخاف على زوجته من النسمة الطايرة وعندما يراها تصرّ على الذهاب إلى مكان معين وخاصة أنه شبابي وله سوالف مع البنات فسيشك فيها ولو بالكلام . بمعنى أنا متأكد أنه لايشك فيك من قلبه وإنما من برة برة ، اقصد لو كان يشك فيكي ماكان سألك وإنما يراقبك من بعيد لبعيد . وبالتوفيق . |
اهلا حبيبتي
شوفي اقلك الرجال مابفكرو متلنا يعني لما مابدو اياكي تروحي خايف عليكي وشوفي صراحة احنا بنشوف الامور غير هما بخافو علينا وبحسبوها من ناحية الغيرة والخوف والمعاكسات واحنا بناخد الموضوع بساطة فاحيانا بكون معهم حق يعني كل الرجال هيك والله احنا بنزعل من الغيرة او الخوف لكن مشي وعدي يعني مااظن انو الغيرة تبعتو زائدة عن اللزوم ازا بقدر المعقول اتحملي وطنشي فماتزعلي كتير اما لما بقلك وش عندك هناك صدقيني انا متاكدة مش قصدو حبيبتي الرجال احيانا برمو كلام مابقصدوه بمعناه العميق يعني زوجي احيانا بقول كلمة عالماشي انا بتعمق جواها وحالتي حالة وبسالو حبيبي انا فهمت هيك هيك هيك انت هيك قصدك بضحك وبقلي ماتعمقي الامور اكتر مما تستاهل بسطيها فهما هيك بياخدوها معنى ظاهري يعني ماقصد انو في شي غلط هناك بعيد الشر عادي كلهم هيك صدقيني بالنسبة لهوايتو الصقر فاقلك اتركيه شوي عراحتو بزهق ماتدقي كتير بتلاقي مل منها اكم يوم جربي وازا استمر وطول احكي معو بهداوة ورومانسية وصبي كل حديثك انك بتحبيه وبتحبي تقضي الوقت معاه وبتموتي فيه ومالك غيرو بهالدنيا ودمعي هيك بس بالهداوة اهم شي عشان ماتتخانقو وتزعلو موفقة ياقلبي |
اقتباس:
حرام أنا بموت أبغي أطلع ..أحس روحي بسجن لا أهل ولا أصحاب .. وين اللي يقول لي أنا بعوضك عن هلك .. وانا باكون لك أمك وأبوك وصاحبك وووووو .. كله كلام فاضي .. |
اقتباس:
خوف وغيرة .. خلاص يعني تخاف علي تحبسني بالبيت ؟؟ عطني من وقتك وطلعني .. أنا صار لي على هالحال أسابيع أو اكثر من شهر .. ويقول لي موسم القنص لي شهر فبراير .. لا تسمعوني تفتكرون إنه بعد شهر 2 بيتفرغ لنا .. لا .. يمكن شوي يهون ويقلل طلعاته .. بس ماراح يعوضنا عن هالأشهر اللي قضاها بعيد وحارمنا من الطلعات والوناسة .. عياله في ذمته .. بكرة الله بيسأله عنهم .. أنا خلاص .. صبرت كثير .. وألحين أحس روحي أنفجرت .. |
اختي بحرينية
أنت كبيرة الشخصية ما شاء الله عليك أختي من الواضح جدا أن زوجك لم يعني شي بكلمته يعني الا اسباير فلا تخلين الشيطان ينفخ فيها ويضخمها في قلبك كلمة عادية جدا ويقصد فيها اقناع الطرف الاخر مسألة هذا المكان بالذات وأنا لا أعرفه مع أني أعرف البحرين جيدا ربما زوجك يكون له نظرة فيه أنت لم تنتبهي لها فنظرة الرجال تختلف عن نظرة النساء بعدين اذا زوجك ما له حق يمنعك من الذهاب لبعض الاماكن - غير المريحة من وجهة نظره- اذن زوج على شنو؟ خاصة أنه ما منعك من الخروج واقترح عليك مكان آخر مسألة ولعه بالصقور وغيرها فهي والله ولع عند بعض الرجال يقارب المرض نسأل الله -واسأليه- له الهدايه موقف ويفوت ولا حد يموت كبري عقلك دمتم بخير وطاعة |
اقتباس:
وهي كلمة .. باكبر عقلي وبافوتها بإذن الله .. اصلا تعودت أنا على هالنوعية من التلميح .. لكن مشكلتي الأساسية الحبسة في البيت وعدم إعطائنا من وقته .. اسباير هذه في قطر أخي الكريم .. في غربتي .. |
اقتباس:
المفروض أنه يطلعكم ولكن . . هو لايحب الطلعات العائلية والله أعلم . لذا حاولي أن تبحثي عن شيء يسعده عندما يطلع معاكم . والله أنا أشيل هم لما تقول لي أم لجين طلعنا . ولعلمك هي " محبوسة" أكثر منك . بس الحمد لله سجلتها في تحفيظ القرآن من العصر للمغرب والحمد لله انبسطت لأن عندهم نشاطات ومحاضرات وغيره . |
اقتباس:
وبعدين تحبسونهم في البيت وماتبون تعطونهم من وقتكم وتطلعونهم ..؟؟ بس تعرفون حقوق الزوج على الزوجة .. الباقي مو مهم .. أمركم عجيب .. |
معليش أخي في الله ..
بس أنا أوجه الكلام لزوجي .. وإنت في وجه المدفع .. أعذرني ما أقصدك بس مقهورة .. |
|
اقتباس:
معاكِ حق في كلامك 100% وهذه طبيعتنا للأسف إلا من رحم ربي . ولكن كل شي بالهداو وطولة البال ينحل بعد توفيق من الله . إيش رأيك تبحثي في النت عن معلومات عن الصقور وتبحري وتعلمي أكثر وأكثر وعندما تسنح لكِ فرصة تكلمي معه عن الصقور وأريه ماعندك من معلومات ، أعتبريه صديقتك وسولفوا في هالموضوع . وبعد فترة من السواليف ( كم يوم) قولي له بطريقة أو أخرى : أنا ماأحب الصقور ولكن من أجلك أحببتها ، وبعد أن تبحرت وتعمقت فيها عجبتني ن فما هو رأيك كرماً منك بأن تتطلعنا اليوم أو الوقت المناسب لك الطلعة اللي تعجبني أنا . |
بحرينيه يالغاليه لا تدققين بكل كلمه صدقيني بتتعبين
انا زوجي كذا من النوع الي يسأل يعني مثلا اذا طلعت مع اهلي يقول من وداكم ومن طلع معكم بس والله ماقصده الشك يعني تقدرين تقولين شفاحه :D الله يسخره لكم ويحنن قلبه عليكم اللهم آمين |
اقتباس:
الزوج يجد من هي تشابه صفات زوجته فيناقشها بكل شفافية ومن غير محد يطلق أحد أو أحد ينضرب . والعكس صحيح . :d |
هلا اختي بحرينيه
والله اسباير يشرح الصدر واطلع اتمشى فيه انا وكثير نسوان كل اسبوع وما فيه كثر رجال هذا اللي يعجبني فيه واحلى ما فيه مساحته الشاسعه عاد انتي كلميه بطريقة حلوه وهاديه الرجال يبغى لهم مسايره |
اقتباس:
خلاص إن شاء الله .. ماراح أزعل على هالكلمة .. أمس قلت له بأسلوب حلو والله .. أقول له كل يوم مع الطير عندي أمور ضرورية أبيها من السوق عطني من وقتك شوي .. وهو حس بالذنب والتقصير <<<<<<< أو هكذا ظننت .. قال لي إن شاااااااء الله بكرة المغرب باوديك تاخين اللي تبينه .. يعني المفروض ألحين أنا بالسوق ..:29: |
اقتباس:
صدقني .. هو طلعة على ذوقه ماطلعنا .. تبيه يطلعنا طلعة على ذوقي .....؟؟؟؟ |
اقتباس:
من عيوني .. بانسى هالكلمة وماراح أفكر في قصده .. بس يعني شنو شفاحه ؟؟ |
اقتباس:
والله ما أدري من وين يجيب هالأفكار .. http://www.66n.com/forums/images/icons/cry3.gif آبي أروح اسباير ..http://www.66n.com/forums/images/icons/cry3.gif |
اقتباس:
|
اقتباس:
|
طيب ليش ما تؤوحي معه رحلة صيد
ومثل ما قال ابو لجين ثقفي حالك شوي بالصقور واتفقي معه انك تطلعي معه على الصيد يعني مو ضروري كل طلعات الصيد مع صحابه خليلك مرة وانت اختي مرة على مرة رح يشوف انه حمله ثقيل بعد هيك اسالي الله الرحمة يعني ان تذمر من رفقتك له عالصيد اطلبي منه انك تطلعي على مكان عائلي مثل اسباير ورح اكيد يتذمر من انه يضيع رحلة الصيد عندها اطلقي الصاروخ النووي :d طلبي منه تطلعي لوحدك وسيبك اختي من افكار الشيطان يعني قصة الشك بعيدة ان شالله اكيد هو يتقي الله بك وعارف انك او متاكد انك ارفع واسمى من هالامور هذه خصوصا انك مو ببلدك يعني انت بالغتي بموضوع الشك والموضوع زي ما ذكروا الاخوان موضوع غيرة والله يوفقك |
اقتباس:
اللي يقنصون يروحون المقناص في مجموعة .. أقل أقل شي 4 إلى 5 سيارات .. وكل سيارة فيها على الأقل شخصين .. ماينفع يصيد بروحه لازم تكون اكثر من سيارة تتابع صيد الطريدة .. هذا فقط للأصحاب .. غير سيارات الشباب اللي مايعرفونهم اللي يحبون يتابعون المقناص .. هذا حل غير وارد أبدا .. بل ومستحيل .. وأتخيل نفسي اقول له بيضحك علي .. جزاك الله خير .. |
بحرينيه حبيبتي مشكلتج نفس مشكلتي انا متغربه وقالي نفس الكلام بعوضج وكل نهايه ويك اند لو الله قدرني عند اهلج ومن هالكلام الفاضي والحين والله ولا يدري عن هوى داري حتى الجمعيه يقولي روحي بروحج ماله خلق كله ما عنده وقت وتعبان طبعا اكثر وقته بالدوانيه هو الصبح بالشغل والعصر كليه وبالليل دوانيه وعايشين .. ولم اقوله بخاطري اطلع معاك وحرام عليك ولدك ما تطلعه يقول مالي خلق وانتي ما يبين في عينج ولم خواته جزاهم الله خير يبون يطلعوني مع ولدي يقول لا في شباب وزحمه وانتوا كل يوم بره وما اعرف شسوي على قولتك لا اهل ولا اصحاب ولا شي وساكته ومالي الا الصبر
|
اقتباس:
لنا الله يا أختي .. محد يحسن في لوعتي إلا اللي مجربها .. والله لا يبلي احد .. |
بحرينيه عن الدلع عاد ههههههه
يعني زوجج سامح لج تطلعين والدليل قالج روحي الحديقه بس هالمكان انتي بروحج قلتي انه في شباب ريلج خايف عليج |
اختي بحرينية بلاها روحة اسباير روحي دحل الحمام والله المكان حلو هناك ووناسه |
إيدي في إيدك يا بحرينية
إنت صادقة في كل اللي تقولينه بس أبغ أقوللك شي ترا اللي بيسووه الرجال هذا راح يحاسبو عليه يوم القيامة إحنا حريم ما في إيدنا نسوي شي ولما الزوج يقول لزوجته مو ناقصك شي أكل وعندك وشرب وعندك أقول طيب السجين نفس الشي عنده أكل وعنده شرب بس مسجون .... لأنه أرتكب جريمة طيب أنا ليه ساجنني بدون وجه حق ليش حارمني من إني أطلع وأتمشى لكن لا تقلقي يابحرينية ولكن والله محاسبين الرجال على اللي بيسووه يعني الزوجة لما تطلب من زوجها إنها تطلع تتمشة في مكان حلال يعني ما طلبت أروح سنما ولا مرقص ولا ملهى طلبت أروح منتزه أو سوق تقول لأ ليييييه ؟؟؟ لا وإنتي شوفي الأعذار اللي يقدمها الزوج لزوجته ... مره يقول والله إنتو كثير ويغالكم إنتباه ومسؤلية سبحان الله يعني يهون عليك نجلس بين الحيطان عشان إنت لا تتعب بالك وتنتبه علينا عجييييييييب لكن يا بحرينية راح يسألهم ربي يوم القيامة علينا إحنا أمانة في أعناقهم وكون الرجل يتزوج زوجه ويحبسها بين أربع جدران هذا مو دين والدين المعاملة ....... وصدقيني أصبري وربي يعوضك بإذن الله يجي يوم وتطلعي فيه وتنفهي عن نفسك أنا الان لو تسأليني هل ممكن أطلع مع زوجي حتى لو هو وافق أقولك لأ ...ساعتها أنا أرفض لأني ما أحب أطلع مع شخص مغصوب علينا يقوللك الجار قبل الدار وأنا أقول الشخص اللي أطلع أتمشى معاه يهمني قبل التمشية وكلي أمرك على الله والله كريم |
اختي الكريمه بحرينيه....الله يجزاك الجنه...كان وافقت تروحين الحديقه
اللي قالك عنها ...وبعد يومين رحت محل ما بغيتي هنا لا يمكنك الجزم اختي انه بيشك او ان الكلمه كانت بالقصد او بقوة المعنى الذي تبادر الى ذهنك هو بيكون من الخوف عليك والاكثر هو من الغيره والغيره تخليه المكان اللي تختاريه ...يغيره لا تزعلي ولا على بالك هي كلمه وليست بالمعنى المفهوم الله يهنيكم ويسعدكم |
بحرينية ..يا هلا اختي باهل البحرين
ديرتي ومسقط راسي ومكان ماترعرت وتربيت ودرست وقضيت فيها احلى الايام لكن اصلي مو بحريني ...اناخليجية ...بلد قريبة جدا من البحرين ...اكيد عرفتيها بعد ما تزوجت وانا صغيرة جدا انتقلت الى بلد زوجي ...واغلب اهل ابوي وامي فيها . يا ويلي على السجن اللي في ذيك البلد ..مووووووت والله اختناااااااااااااااق بعد ما كنت متمتعة بالحرية اللي في البحرين ... الطلعة والروحة والجية ..لا تفتكرون اني متحررة ...بالعكس انا من اللي كنت البس غطاء الوجه وعباة راس .. المهم ..جيت هذا البلد ... ما فيها مكان تروحين فيه .. ابدا ابدا ابدا لي الان فيها 23 سنه ..ولم تتطور الا قليل جدا ..يعني الى الان اذا حسيت اني بمووووووووووووووووووووت اقول له حتى لو اركب السيارة ...يقول لي ما ابغي احرق اعصابي بسبب الشباب المتهورين اللي في الشوارع كنت سابقا اتخانق كل ست او سبع شهور عشان يطلع مع الاولاد يوديهم ملاهي صغيرة جدا يمكن ما فيها غير كم لعبة هو 24 ساعة مشغول ...الان بطلت اقول له ابغي اطلع ... اذا بطلع من بيتي يعني اروح اسوي زيارة بيت ثاني ...يعني ادخل من بيت واطلع من بيت ... على الاقل انت عندك وظيفة ..عليك اللي في البيت 24 ساعة اخير الحمد لله اتفقت مع جارتي ان احنا نطلع نمشي لمده ساعة على رصيف طويل جدا تعالي شوفي المضايقات اللي حصلت لنا...لكن استمرينا لان هو المتنفس الوحيد لنا الحمد لله صار لنا اكثر من سنتين نمارس الرياضة ...عاصرنا التغيرات ..صاروا كثير من النساء تطلع تمشي .. وهذا انا اولادي كبروا ودخلوا الجامعات والوضع على ما هو عليه ...اختنااااااااااااااااااااااااااااااااااااااااااق الله يعين لكن زوجك لو كان يشك فيك ما كان اقترح عليك مكان ثاني الله يسعدكم ..طولت عليكم |
الله يعينك يالغاليه ويقويك على الغربه اولا وعلى زوجك ثانيا بس عاد وش تعملين اصبري وتحملي وفكري انك احسن من غيرك ماشاء الله لااله الاالله بالف مرة يعني الحياة ماراح تضل على وتيرة وحدة مصيرها تتغير وتتبدل وتتعدل ويكبرون بناتك :15: وابو بناتك ان شاء الله وتحلى الحياة باذن الى ماتنام عينه:22: يالله عاد هونيها وتهون وش رايك تاخذين بنوتاتك الله يحميهم لك وتطلعين للمكان الى قالك عنه واتفضوا واستانسوا مو لازم المكان الى انتي تبغينه وعلى قوله ابوي كلمه دايم يكررها علي انا وخواتي (اذا مطاعك الزمن طيعه ) دام زوجك مطاع تروحين لااسابير روحي للمكان الى قال عنه :d :d |
يالغاليه هو صادق
مكان فيه اختلاط خطر عليك تروحون له لحالك مع بناتك أكيد هو سامع شيء عن هذا المنتزه حاولي فيه يوم بالكلمه الطيبه اذا كان فايق ورايق أنه يروح معاكم و مره ثانيه لا تصرين على أمر مثل كذا عشان ما تشككينه بالقوه!! |
بعد قرائتي لموضوعك اختي البحرينيه .. لم يكن لدي أي توجيه او نصيحة يمكنني أن أوجهها لك .. لـــــذا .. خرجت من المنتدى لتأخر الوقت .. ثم .. وقعت عيني على موضوع يحمل عنوان " سنن مهجوره عند النساء " للعلامتين ابن باز والألباني .. نصائح وتوجيهات .. فعدت بها لعل الله أن ينفعني بها وينفعك بها .. وكل من قرأت هذه الكلمات .. سأذكر ما يهمنا فقط .. من السنن المهجورة : 1- الخضاب للمرأة 2- إرخاء ذيل النساء شبراً إلى ذراع 3- قرار المرأة في بيتها ومن هدي نساء السلف الصالحات القرار في منزلهن , والمبالغة في التستر , وعدم الخروج إلا لحاجة , وذلك لسلامة المجتمع من فتنة النساء , والتي تعد من أشد الفتن . قال تعالى : (( وقرن في بيوتكن ولا تبرجن تبرج الجاهلية الأولى )) سورة الأحزاب 33 قال ابن كثير : أي ألزمن بيوتكن فلا تخرجن لغير حاجة . عن جابر أن رسول الله صلى الله عليه وسلم قال : (( إن المرأة تقبل في صورة شيطان , وتدبر في صورة شيطان , فإذا أبصر أحدكم امرأة فأعجبته فليأت أهله , فإن ذلك يرد مافي نفسه )) رواه مسلم وأبو داود. وفي الحديث : (( أن المرأة عورة , فإذا خرجت استشرفها الشيطان . وأقرب ماتكون بروحة ربها وهي في قعر بيتها )) . رجاله ثقات ابن خزيمة والترمذي. قيل لسودة رضي الله عنها : لم لا تخرجين ولا تعتمرين ؟ قالت : قد حججت واعتمرت , وأمرني الله أن أقر في بيتي . فما خرجت حتى أخرجت جنازتها . وفي رواية : فما حجت زينب ولا سودة وقالتا : لا تحركنا دابة بعد رسول الله صلى الله عليه وسلم . أحمد وأبو داود بسند صحيح 4- لاتتعطر المرأة إذا خرجت لحاجة 5- خروج النساء للمساجد ليلاً فقط منقول .. . . . . . . اختكم / بنان |
ما قصرو الشباب في الرد جزاهم الله خيرا
|
والله يالغاليه حتي انا الاحظ زوجي كانه يشك
قلتله باخذ اطفالي بروح سوق شرق اتمشي واتسوق وامشي الجهال قال لا اخذي اختك او رفيجتك بس روحه بسيارتك مع الجهال لا ؟؟؟ شالفرق احس تفكيرهم غريب بس ممكن سوال انت وين باي دوله غربتك ؟؟؟ |
أخواني وأخواتي ..
ماقصرتوا جميعا على مروركم .. ريحتوني جزاكم الله خير .. أختي عذوب .. مش شباب يعني .. والله أغلبهم فوق الثلاثينات ورايحين يتريضون في الممشى .. والحريم هناك كثير .. وعااااادي تشوفين الحريم كل وحدة تمشي بروحها تمارس رياضة المشي .. ولا أحد يكلمها أو يتحرش فيها .. يعني شباب ومصبنة مافيه .. وفيه رجال أمن يحافظون على سلامة المرتادين من هالمواضيع .. وأنا كنت باجلس في مكان خالي بعيد عن الممشى .. ومساحته كبيرة وخالية .. أختي الهدى .. دحل الحمام هي المكان اللي نصحني فيه زوجي .. وأنا تمللت كله الدحل والدحل .. أبغي أغير .. وبعدين اسباير أقرب لي .. والدحل زحمة وحشرة .. أنا كنت أبي مكان هادئ أرتاح نفسيا فيه .. خلاص عافت نفسي من اسباير من كثر ماحنيت عليكم ابي أروح له .. والله والله يالهدى إن حديقة البدع عمري مارحت لها .. ولا حديقة اللقطة .. علاء الدين يمكن من تزوجت 4 مرات إذا مو أقل .. يعني وين أروح أتنزه ..؟ ماعرف إلا هالدحل .. سمو الأميرة .. إنتي امانة في رقبته .. وأكيد ألحين هو يقرا ويشوف معاناتي .. ويقرا فضفضتك .. مع إني ماظن الرجال يتغير بسهولة .. بس يمكن يمكن الله يهديه ويحن قلبه عليكم .. أمس لما كتب لي اعترافه بأن الرجاجيل مخطئين .. والله والله قعدت أدعي لك .. أقول إن شاء الله يقول لك قومي بنطلع .. ها ..؟؟ طلعتوا ؟؟ أخي العربي .. عشان تتأكد إنت والأعضاء إنه كان يشك .. تابع ردي للآخر .. وجزاك الله خير على مشاركتك .. فافي .. الله يعينك ياقلبي .. والحمد لله على الأقل كل يوم تطلعين تشمين هوا .. حال أحسن من حال .. أختي غموض السنين .. تسلمين على مشاركتك وكلماتك الطيبة اللي تريح النفس .. عبير الرياض .. إذا مايرضى أطلع بروحي .. ليش مايطلعني ..؟؟ يفضى حق طيره .. ويفضى حق ربعه .. وحق طلعاته .. ووناسته .. ماعنده ساعة بالأسبوع يطلعني أنا وعياله .. حرام إحنا في ذمته .. وبعدين أنا قلت له ليش أبي أروح المكان .. ماله حق يشك .. وأنا تاكدت إنه شك مو غيرة .. تابعي ردي للآخر عشان تشوفين اللي صار البارحة .. أشكرك أختي الحبيبة بنان على ماذكرته .. جعل الله في كل حرف حسنة في ميزان حسناتك .. اخي ahyat .. اشكرك على مرورك الكريم .. أختي مها الكويت .. قلت له باشوف إذا خواتك يبون باخذهم معاي .. قال لي لا .. :( .. الجواب على سؤالك في ردي رقم 7 .. حديثي معه بالأمس .. 7 7 7 7 7 7 7 7 7 7 7 7 7 7 7 |
وي بحرينية لاتعورين قلبي
أنا بنت البلاد ..سمعت عن سباير وماشفتها ..خااااااااااااااطري اروح مو لاقيه حد فاضي لي ويوديني الله يعينج ويفرج همج ويرزقج ماتتمني ياارب |
بعد مارجع زوجي البارحة ..
وشافني متحطمة وقلبي ( يتشفشف على الطلعة ) .. قال لي قومي بدلي بنطلع .. قلت له وين .. قال لي مادري بنشوف ..<<<<<<< وهو داااااااايما بدون مبالغة إذا قال هالجملة يعني قصده في السيارة بس .. قلت له طيب .. قال لي بس بنروح في سيارتك .. قلت له لا مابي خلنا نروح في سيارتك .. قال لي ليش ؟؟ قلت له تمللت كل يوم أروح الدوام في سيارتي .. وأرجع من الدوام في سيارتي .. وسيارتك من أخذتها وهي كله واقفة بالبيت مانطلع فيها إلا نادرا ..ودي أطلع فيها .. ( عنده سيارتين .. وحدة قديمة يروح فيها الدوام والمقناص .. والثانية جديدة مايطلع فيها إلا نادرا ) قال لي (((((((( وش معنى ماتبينا نروح في سيارتك ؟؟؟؟؟؟؟؟؟؟؟؟؟؟)))))))))):(:(:( ليش ماتبين نطلع في سيارتك .. والله ضحكت في وجهه وتذكرتكم تقولون لي مايشك ............ قلت له تعال .. إنت من الصبح << أبالغ ..... تقول لي أش معنى وإش معنى .. يعني ايش حاط في بالك ..؟ هو ضحك .. لأنه عارف إني فاهمته .. قلت له خلاص تبينا نطلع في سيارتي ماعندي مانع .. بعدين كنسلنا الطلعة لأن كان عندهم في البيت شواء في الحوش ( باربكيو ) .. فقلت له خلاص بنجلس نتعشى مع أهلك .. وكنت أدري إنه خاطره يبقى معاهم للشواء لأنه من زماااااااان ماجلس يتعشى معانا .. وسويت شي عشان أأكد له إن ماعندي شي لما قلت له ما أبي نطلع في سيارتي .. عطيته مفتاح سيارتي .. وعطيته فاتورة المغسلة <<<<<< أنا اللي وديت المفارش المغسلة لأنه مو فاضي .. وقلت له الله لا يهينك جيب المفارش من المغسلة .. <<<<<<< مقابلة بيتنا بينا وبينها شارع .. بس لازم سيارة عشان يشيل فيها المفارش .. بس بغيت أأكد له إني واثقة من نفسي وماعندي شي أخبيه في السيارة .. وش رايكم .. يشك ولا مايشك ؟؟ |
اقتباس:
والله عشان طول الاسبوع في البيت ومسؤلية المدرسة احس بظغط عجيب ما اصدق ويجي يوم الخميس لازم انا ارتب واسوي كل شي واقول يلا نطلع بالعيال عشان يستانسو بعض اوقات نطلع وبعض اوقات لازم يكون فيه عذر وتتكنسل الطلعة صح معك حق الدحل زحمه كثييير وانا السباير قرب بيتي يعني اقدر اروحه حتى مشي بس ما اقدر اطلع بروحي اخاف وبعض اوقات نجتمع انا وكم وحده من اللي اعرفهم ونروح السباير بصراحه وناااااسه هناك بعدين الايام هذي الجو حلوووووو مرررررررره الله يكون في عونك |
اقتباس:
نصيحتي روحي لما هالأيام لأن الجو روعة .. في الصيف حر ورطوبة .. وفي الشتا برد .. إذا مارحتي هاليومين أنتظري السنة الجاية ..:d |
| الساعة الآن 02:47 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©