|
مشكلتي مع أختي
السلام عليكم وحمة الله وبركاته
العقل الموزون رجعت لكم من جديد انا عارفه اني مقصره مع المنتدى ولكن العالم الله اني مشغوله بالي مشغول في البدايه أحب اعيد على كل الاعضاء كل عام وانتم بألف خير والله يعيده علينا أعوام كثيرهمدري كيف ابتدي بس كل الي أعرفه أني بمشكله وابيكم تساعدوني بنصيحه او دعوه في ظهر الغيب المهم ببتدي اني ابشركم بزواجي الي قرب وهو بالصيف بعد خطوبه طويله مررررررررررره والحمد لله وقاعده اجهز له واستعد من الحين ولكن فرحتي ما أكتملت والسبب اختي مشكلتي الي تعبت نفسيتي ان في العيد كانت أختي المتزوجه عندنا وكان في رابع يوم بالعيد زواج وحده من صديقاتها وكنا متفقين اروح معها الزواج بس قبلها بليله تعبت من بطني ونفسيتي كانت تعبانه بسبب ((الدوره الشهرية )) وعرفت انا خطيبي جاي عندنا في يوم الزواج بيزورنا ويتودع من اهلي لانه مسافر وقلت مالي مزاج اروح الزواج وخطيبي جاي ما راح اروح الزواج المهم زوج اختي كان عندنا وكان رايح لاهله ومكان اهله قريب من مكان القصر والزواج ناديت اختي وقلت ترى ماراح أقدر اروح معك الزواج لاني اخاف أكون تعبانه بكره وما اروح قالت وليه تقولين لي قبل زوجي مايروح تبيني اروح معه عند أهله قلت كيفك بس قلت يمكن يكون أقرب لك وعشان ماتقعدين عشاني على اساس بروح الزواج معك القصر أقرب لك في بيت أهل زوجك وحبيت اعطيك فكره.................. المهم زعلت وقالت: أنا البارح نزلت معك السوق عشان تشترين والحين ماتبين تروحين معي الزواج معي ونادت زوجها وقالت له اني خلصت مصلحتي منها وما ابي اروح الزواج أنا بغيت أموت من القهر كيف فسرت موقفي وأنا ما قصدت رحت دخلت غرفتي وقفلت الباب على نفسي من القهر جلست أبكي لاني حسيت بظلم بعدين أمي جت قالت أختك راحت مع زوجها واخدت كل أغراضها عرفت انها زعلت وشوي ويدق جوالي رساله وتطلع منها كاتبه لي ((من اليوم ورايح انسي ان لك اخت والله والله والله ياهدا الموقف لارده لك ولو بعد مية سنه وفي اقسى الظروف وبيني وبينك الايام)) انتهى المسج انهرت حسيت اني مخنوقه بكيت بكاء ما بكيته في حياتي ليش تسوي كدا ليش وش غلطتي الي جنيتها في حقها كله عشان ما ابي اروح الزواج و ضاقت الدنيا بعيني وحسيت بظلم وان ما احد ظلمني من قبل كدا وقمت كتبت لها مسج ابي ارد عليها يمكن تحس ان الي سوته غلط وتتراجع كتبت في المسج((هدا الكلام لأختك الصغيره والوحيده ليش الظلم كيف تجراتي تقولين ليه زي هدا الكلام بتردينها لي وفي اصعب الظروف ليه يا....... نسيتي ربي وربك من دا الكلام في موقف صغير زي هدا لازم تفكريني بأي شي تسوينه لي حتى ولو كان القليل لكن انا عمري ما منيت عليك بشي وياما نزلت معك السوق من دون تعب وكنت لك العون من دون منه عليك وياما وياما ويعلم الله وانا نا قلت لك اني مش رايحه الزواج الحين الى لاني خايفه يشتد علي الالم بكره وابطل فجاءه وتزعلين وتقولين ليش ما قلتي لي من البارح اروح مع زوجي واروح من هناك اقرب قلت اقولك الحين وطلع منك تزعلين وتفسرين على كيفك وتقولين ما أنتي اختي الله وأكبر عليك الله وأكبر عليك كيف قلتي وارسلتي الله الغني يا,,,,,,,,,,,, والله يغنيك عن اخوتي وعني...)) انتهى المسج. ارسلت وما ردت ثاني يوم الي هو يوم زواج صديقتها جاى خطيبي ومسكوه أهلي يتعشى عندنا وأخد واجبه وراح والفجر جت أختي وزوجه عشان بيسافرون على مدينتهم وجو يتودعون منا كنت بالغرفه مقفل على نفسي ومشغله التكيف دقت علي الباب أمي ما فكرت انها تبيني اطلع اسلم على اختي فكرت عادي مافي شي وانا ماكنت ادري ان اختي جت المهم شوي وخرجت قالت أمي أختك كانت هنا سألت أمي جيت ناحيت غرفتي قالت لا قلت خيره اصلاً قلبي تعبان ما كان لي نفس أشوفها بعد المسج والموقف الي البارح وبعد ساعه جاني مسج منها على الجوال تقول فيه((طيب ياوحيده كان قلتي ما ابغا احظر الزواج معك عشان خطيبك بيجي يتعشى عندك ويتودع ماله داعي اللف والدوران وانا وصلت لحد باب البيت وما كلفتي على نفسك تتطلعين تتودعين مني ترى حتى انا ماشيه سياره بر زي خطيبك.. افتكري هدا الموقف زين زين واعتبري نفسك من هدي الدقيقه وحيده والى الابد وبيننا الايام ونشوف)) انتهى المسج.. قريت المسج وانا فيني قهر الدنيا وابي اعرف وش صار عشان هدا كله والله قعدت ابكي وماعرفت ارد ومدري مين ينصفني حسيت بظلم وحسيت اني عمري ماحد قد ضرني زي ماضرتني بكلامها وتصرفاته انا طنشت ومادقيت عليها وتركتها وهي بعد ماعد دقت علي بس انا مش مرتاحه أحس اني ابي احكي لاحد ابي راي احد ساعدوني وش اسوي أنا يتيمت الاب وأمي لا حول لها ولا قوه وما ابيها تدخل بيننا واخواني مساكين ما ابيهم يدخلون في سوالفنا وأنا محتااره قلت مالي غير الله ثم منتداي الغالي وأعضائه الي ثقتي فيهم مالها حدود قولوا لي وش اسوي والله لا يوريكم مكروه تحياتي وآسفه على الاخطاء في الاملاء والعاميه في كتابتي بس اتمنى تفهمون علي وشكراً الإشراف : توضيح العنوان . |
بسم الله الرحمن الرحيم
حبيبتي الغاليه لا تضايقي نفسك يمكن اختك صحيح مالهاش حق في رد فعلها ده لكن يا حبيبتي مش يمكن هي كانت محتجاكي فعلا معاها ويمكن علشان بتحبك اوي صعب عليها منك اوي ماتزعليش وصدقيني الايام بتنسي اي شئ مهما كان انا حصل بيني وبين اخوتي موقف ربنا لا يعيده كنت متخيله اننا خلاص مش هنعرف بعض تاني بعد كده ومع ذلك يومين ورجعنا متعلقين ببعض زي ماكنا يا حبيبتي الاهل بالذات سبحان الله مابيدمش بنهم زعل واكيد دي حكمه من ربنا سبحانه وتعالي معلش يا حبيبتي بس انتي استني يومين كده وحاولي انت كلميها وراضيها معلش انا عارفه انك حسه بالظلم بس ابدأي انتي مش ربنا سبحانه وتعالي بيقول ادفع بالتي هي احسن والرسول صلي الله عليه وسلم بيقول وخيركم الذي يبدا بالسلام اصلح الله ذات بينكم وهداكم وجمعك مع خطيبك علي خير وبركه يارب :) روقي بقي |
ترى الموضوع عادي جدا ومايحتاج هذا الزعل كله انتم اخوات
ومصيركم ترجعون لبعض 00خليكي كم يوم واتصلي عليها واعتذري منها لانها الكبيره ومسافره وبعيده عنكم اكيد هي تستنى منك اتصال وعشان ترتاحين انتي وهيه الله يخليكم لبعض و مايجعل بينكم قطيعه وزعل ارسلي لها كم رساله حلوه بعدين اتصلي عليها وشوفي النتيجه واعطينا خبر |
السلام عليكم ....
يمكن ما اكون فهمت الموضوع تمام .... بس الشي اللي متأكدة منه ان اختك مرررررررررة مكبرة الموضوع على شي ما يستاهل ،،(شكلها هي اللي عندها الدورة مو انتي)ومالها مزاج الا للخناقات ... انتوا خوات ومالكم الا ترجعوا لبعض .. اشرحي لامك وجهة نظرك وخليها تفهمها ايش اللي صار لشان تتصافوا على بعض .. الله يهديكم ... أم حمزة |
الله يهديها ويصلح اموركم ان شاء الله .
|
اختك راح تزعل وقت بسيط ومهم وصل الامر بينكم ماراح تقطع العلاقه لانكم اخوات وحطي موقفك مكانها يمكن تفسري الموقف تفسير سيء بس لا تشيلين في خاطرك شيء ان شاء الله تتصفى القلوبكم وخيركم من بدا بسلام والله يحنن قلوبكم على بعض ان شاء الله
|
شوفي يالغاليه...من البدايه انتي ماغلطتي وانتي مو مجبره تجضري الحفل معها..ولكن انتي غلطتي في شي واحد..
وهو المفروض يوم دزت لك مسج دقيتي عليها وتفهمت منها احسن من الرسايل لانه بكلامك رح تمتصين غضبها وتشرحين لها وجهت نظرك.. بس لاتزعلين انشاءالله كم يوم وتنسي وترجع المياه لمجريها..وانتي حاولي انك تراضينها ولا تطنشينها.. وسلامتك وبشرينا اذا تراضيتوا |
كبري عقلك اختك تحبك تحبك تحبك وهذا مبين من مسجها الثاني المبطن بعتاب المحبين هي زعلت كثير لانها كانت عشمانه فيك وماتوقعتك تخذلينها, كبريها تكبر صغريها تصغر مالكم غير بعض وبلاش الحساسيه الزائدة مع الاخوات ارجعي بذاكرتك الى الوراء واذكري مواقفها معك مافي حد بيحبك في هذه الدنيا قد امك واختك لاتتسرعي في الحكم عليها الله يرضى عليك.
|
اختي العزيزة
واضح من كلام اختك الك انها تحبك كتيررررررررررررررررررررررررر انتو خوات و ما الكم غير بعض احكي على جوالها وقوليلها انك اسفة حتى لو انت حاسة انو الحق عليها ما هو بمشكلة بيظل اختك الكبيرة وانتو بالنهاية مالكم غير بعض بعدين مو غلط تقولين لخطيبك وتسمعين وجهة نظر ة الله يوفقك |
عادي والله الموضوع عادي انا و اختي دائما نتهاوش و اقول ليها كلام زي كدا يعني اقول ليها( بعد هالموقف الا سويتيه لي ما راح اساعدك في اي شي ولا تكلميني بعد اليوم و مهما سويتي لي ما راح انسى و اذا طلبتي مني طلب لا تحاولي او لا تفكري ان انا راح اساعدك ) و انا اقول ليها هالكلام مو من قلبي و اليوم الثاني بس اقول هالكلام لانها قهرتني و سوت لي شي ما توقعته يعني على طول اكلمها و انسى الا صار انا اتوقع ان اختك قالت لك هالكلام من القهر و من كثر ما تحبك و انا افضل انك تسامحيها و تكلميها و تشرحي لها موقفك و تقولي ليها ان احنا خوات و ما يصير كدا ...
|
اقتباس:
الله يجزاك الف خير شكراً لك ياأختي والله يخليك كلامك ريحني كثير والله يعطيك العافيه.... |
اقتباس:
والله ادري ان الموضوع ما يحتاج زعل وهدا الي زعلني تكبيرها للموضوع وكلامه في الرسايل وجعني كثير وان شاء الله اعمل برايك بس خوفي تفسر لي الموضوع مصلحه منها او انها تكسفني مدري انا حيرانه لكن الله يجزاك الف خير |
اقتباس:
الله يخليك أختي ويوفقك والله انك ضحكتني لكن الله يصلح الامور ويخليك.. |
اقتباس:
والله يسعدك ويخليك ويقبل منك مشكوره حبيبتي ع الدعوه |
اقتباس:
بس خايفه تكسفني الى أنا مش مرتاحه مع الي صاير لكن الله يسهلها مشكوره حبيبتي.... |
اقتباس:
مشكوره أختي ع المرور وأنا بحاول أنا اني أكلمها وما اطنشها طبعاً الله يجزاك الخير.... |
والله بتحبك بتحبك جدا جدا ياريت كانت اختى تعمل معايا صدقينى العتب بيكون على اد الحب
مش احسن ماتكونى مش فارقه معاها خالص؟تروحى ماتروحى ماتفرق انتى اهم واحده عندها |
ارسلي لها (((يااختي تعوذي من ابليس..انا مالي بهالدنيا بعد الله ثم امي غيرك..
لاتفرحينه علينا..انتي فهمتيني خطا.))) صدقيني بتستحي. |
لاتتضايقين حبيبتي والله العظيم يالاخوات يصير بينهم مشاكل ماتنتهي بس يظلون خوات مهما كان
وعلى فكرة ترى عندي اخت اصغر مني وياما حصلت مشاكل بيننا بس والله نموت على بعض وانا متزوجة وهي مثلك مخطوبة وبصراحة حطيت نفسي مكان اختك وحسيتها كانت متعشمة فيك وخذلتيها بس ردت فعلها كانت قوية شوية وباين عليها عصبية حبتين وشكلها تموت فيك بس انت اللي لازم تبدين تكلميها وتاخذي بخاطرها مالكم غناة عن بعض وترى بتفرح باتصالك الله لايحرمكم من بعض |
شوفي حبيبتي لا تزعلين نفسك عشان اختك ترى بتسبب لك مرض نفسي ومرض جسدي او يصيبك القلون او الضغط ربي يحفظك انا ما اعرف هل حكمي على اختك صح او لا ؟
هي قاسية جدا سريعة في اتخاذ القرارات لا تلقي بال للكلمه الي تقولها عصبيه سريعة الغضب تحب السيطره وان كلمتها تكون مسموعه و استغفر الله واتوب إليه اشياء كثيره في شخصيتها سيئة هكذا شعرت انا صدقني رحمتك وانكسر خاطري عشانك ياشين الظلم ومرارة الاحساس فيه الي عليك الان تخلين علاقتك رسميه معها وفيه ادب واحترام والمهم انك تكثرين من الدعاء الدعاء الدعاء وان الله يسخرها لك وان الله يحنن قلبها عليك وحاولي انه تكون لك شخصيتك المستقله ولا تتدخل بحياتك بشكل مباشر يكفي ان يكون بينكم حب واخوه اخوات ومعليش سامحيها على الكلام الي قالته لك والقسوه الي صارت منها الله يهديها سامحيه وادعي ربك وحاولي انك تشعرينها انك تحبينها وتحترمينها بدون ان تقحمينها في حياتك في بيت اهلك والله يوفقك ان شاء الله مع خطيبك ويسعدكم اعذريني ردي كتبه مختصر وعلى عجل الله يفرج همك وان شاء الله ازمة وتعدي وترجع المياره لمجاريها وترجع علاقتهم مثل اول او احسن بس انت اشعريها بحبك واحترامك لها . الله معك مُبتسمة وكلي جروح (: |
طرشيلها هديه على البريد
وفيها رساله حلوه منج وقوليلها انا كنت تعبانه نفسيا هذيك الفتره و افعالي تصدر مني بشكل غير مباشر |
السلام عليكم ورحمة الله وبركاته
الى كل من مرى على صفحتي وكتب لي حلاً لمشكلتي شكراً وسامحوني مقدر ارد عليكم وحده وحده لضيق الوقت ولو انكم لم تبخلو علي بوقتكم بس سامحوني وجزاكم الله الف خير المهم اليوم مسجت لأختي مسج وبعدها دقيت عليها لقيت جوالها مقفل وانا بستمر في الاتصال الين ترد وأكلمها والله أني خايفه من الله ما ابي القطاعه ولكن الله المستعان وان شاء الله خير مع خالص حبي وتحياتي،،، |
ياعمـري ربي يتمم لك زواجك عـلي خير يارب وتكمل فرحتك مع أختك
شوفي ياستي أنا ماقريت الردود ولا عندي حل بس نفس القصة صـارت لي شوفي ياستي بداية السنـة هذي أخويا وعدني أنو يوديني مكان عشان آشتري أشياء وأخـويا ساكن مدينة ثانية جلست أعد الأيـام عشان يجي ولما جاء اليوم انبسطنا وكل شئ بس أخويا في آخر شئ مانفذ وعده معايا طبعا أنا ماخليت بقلبي أي مكان للعذر هو تقريبا عذره نفس عذرك التعب ومو مشكلة أسبوع تأخير بس أنا زعلت منه مرره نفس أختك وكبرت الموضوع ماصرت اكلمه والاكل اتجنبه إذا هو موجود وجلست على هذي الحاله شهر زعل وحركات دلع هههههه نفس أختك تمام بس ماأرسلت مسج وأنتي مكان أخويا هو كمان فرحه كان بالصيف بس لما شفت تجهيزات الزواج وفرحته حسيتها ناقصه صرت اتكلم معاه يعني كلمه ورد غطاها شوي هو يتكلم بعدين نسينا اللي صار بدون مايقدم أي أحد عذر وفرحت معاه وانبسطنا والأن آضحك على تكبيري للموضوع .. بس بوصل لك أنتي ماغلطتي بس أختك عشـان تغليك مرره يمكن تحبك لدرجه ماتتصوريها زعلت كذا لو أحد عادي مشت الموضوع ولا زعلت حز بخاطرها أنك ماتشاركيها شئ أنت أعطيت وعد أو كلمه فيه حست أنها ولا شئ بس ( ترى بكتب اللي حسيت فيه ) يمكن أختك تكون زي بس أفرحي والله ترى هذا كلو من محبتها مااعرف حل غير أن الايـام تنسي بس أنتي أبد لاتشيلي بقلبك ولا تزعلي ترى الأخـووه أبدا مافي زيها وياستي حلو كذا تتغلو على بعض . |
| الساعة الآن 11:57 AM. |
Powered by vBulletin® Version 3.8.12 by vBS
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©