ساعدوني و ساعدوها ..محتاجة رايكم الليله ضروري
 

اخواتي و اخواتي .. محتاجة رايكم و نصيحتكم الليه ضروري في موضوع تتوقف عليه سعادة انسانه هي و عيالها .. الموضوع هذا يخص وحدة من اعز صديقاتي و قريبتي بعد .. و هي امنتني و اختارتني اشاورها و انا عارفه انها بتاخذ بشوري لان مالها حد اقرب مني تفضفضله

بدخل في الموضوع

صديقتي هذي امراة مطلقه عندها و عندها ولد ضغير .. و مشكلتها باختصار انها برغم الطلاق اللي مر عليه اكثر من سنتين بعدها متعلقة بزوجها و عايشه على امل انه يردها .. و المشكلة الاكبران العلقة بينهم مستمرة بالمكالمات اللي ما انقطعت من وقت الطلاع و طبعا ماحد يدري عنها

خلوني اقولكم حكايتها باختصار بس حاولو تحسون فيها و ما تتسرعون بالحكم عليها

صديقتي (م) اتزوجت و عمرها 25 سنه و هي الزوجة الثانية .. ما كانت كبيرة وايد بس زوجها كان الوحيد اللي طلبها بعدين هي كانت في وضع صعب لان اختها اللي اصغر منها انخطبت قبلها و طبعا ما سلمت من التغيزات و الكلام الجارح من اللي حواليها .. المهم يوم زوجها اتقدم لها وافقت خاصة انه ريال طيب و من معارف اهلها و الكل يمدح فيه .. و تم الزواج


و عاشت مثل كل زوجة ثانية في الظل .. زوجها يجيلها زيارات و بس اما حياته الاصليه فكانت مع الاولى و عياله بس هي صبرت و صبرتني انا بعدها يوم انحطيت في نفس الوضع

المهم بعد الزواج بثلاث سنين زوجها طلقها و نحن للحين ما نعرف السبب .. هي تقول ان ما صار شي بس الله اعلم .. هي تحطمت بعد الطلاق و لولا رحمة رب العالمين و محاولتنا اننا نخفف عنها كانت ماتت من الحزن لانها حبت زوجها بشكل مرضي .. انا اللي اقول ان مافي وحدة تحب زوجها كثر ما انا احب زوجي اعترف اني يوم اسمعها توصف احساسها ناحية زوجها و طريقتها في الكلام عنه احس ان حبي انا ولا شي .. فيوم تطلقت الكل انصدم و انا اولهم لاني كنت اعرف تفاصيل وايد عن حياتهم و كنت احسب انهم عايشين في جنه بس شو نقول نصيب

المهم هي تمت فترة بعد الطلاق متدمرة حتىولدها اهملته و هدت شغلها و قاطعت الناس كلهم .. بس الحمدلله شوي شوي بعد كم شهر لقيناها هدت و ردت لطبيعتها الاولية .. خبرتني بعد فترة ان زوجها (طليقها) رد اتصل فيها و يوم سالتها اذا كان قالها بيرد قالتلي بكل هدوء ان زوجها قال انه مابيردها لاسباب خاصة فيه هي ما تعرفها و هي نفس الاسباب اللي خلته يطلقها لكنه يحبها و ما يقدر يستغني عنها.. انا والله حاولت اقنعها انها تبعد عنه بس ما قدرت و في الاخر سكت لاني اقتنعت انها موقادرة تستغنى عنه مهما صار

طبعا مكالماتهم ماحد يدري عنها من اهلها .. و في الدوام هي مو مخبرة حد انها اتطلقت عشان تقدر تكلم زوجها في اي وقت بدون ما حد يشك فيها او يتكلم عنها ..

قبل 5 شهور تقريبا جتني فجاة و هي طايرة من الفرح تضحك و تبكي في نفس الوقت و قالتلي ان زوجها طلب منها انه يردها .. و على حسب كلامها هي كانت متاكدة من الاول انه يحبها و بيردها و هذا اللي خلاها تكلمه بعد الطلاق .. و فعلا راح و كلم اهلها عشان يرد بس طلب منهم ياجلون المساله عشان عنده ظروف يبغي يعدلها .. و بما انه ريال محترم و ثقه في عين الكل وافقوا و من بعد ذاك اليوم للحين ما جد شي في مشاله الرجعه

نجي الحين للمشكلة اللي صايرة و اللي هي طلبت رايي فيها و انا ما عرفت شو ارد عشان ما اتحمل ذنبها و اطلب رايكم فيها ..

زوج (م) على كثر ما يعبرلها عن حبه وقت الرضا لكنه وايد يهمله على حسب قولها .. يعني مرات يكلمها بالاربع و الخمس مرات في اليوم .. و احيانا يمر اسبوع ماتعرف شي عنه و طبعا هي ما تقدر تتصل فيه عشان زوجته بما ان المكالمات بينهم للحين سريه .. وغير هذا هو من بعد ما كلم اهلها ما رد فتح معاها موضوع الرجعه .. حتى يوم هي تساله وش صار و متى بنرد يتهرب منها او يعصب لدرجة انها بدت تشك في نيته انه يردلها

هي تقول انها تعبت من البعد يعني سنتين فراق مو شوي .. بعدين هي كملت ثلاثين يعني مو صغيرة و زوجها اكبر منها ب 15 سنه يعني على حسب كلامها ما عاد فيه وقت للدلع .. لكنه مطنش و هي مو عارفه هو بعده على نيته و لا غير ..

اخر اللي صار انه في رمضان ما اتصل فيها الا اول يوم يباركلها بالشهر و من بعدها ما سمعت صوته و يوم كانت تتصل فيه ما يرد عليها .. و لو كنتوا شفتوا حالها في رمضان و الله تكسر الخاطر بتجن مو عارفه شو اللي صار ليش ما اتصل هو بخير والا صار فيه شي .. و كل ما اشوفها تحضني و تبكي تقول اعصابي احترقت احسه يتعمد يعذبني و شوي تقول انه خايفة عليه و مو عارفه كيف اتطمن .. و الله لدرجة اني فكرت اسال زوجي عنه يمكن يعرف اخباره بعدين اتراجعت ..

و تمت المسكينه على هالحال لين العيد و يوم العيد ما جات زارتنا مع اخواتها و يوم سرتلها لقيتها بالمرة رايحه فيها و لا طلعت و اشترت شي لها و لا لولدها مع ان زوجها رسل فلوس بس هي من كثر الحزن اللي فيها من عدم اتصاله ما جهزت للعيد .. و ثاني العيد كلمتني قالتلي انه اتصل فيها يهنيها بالعيد بس ما طول و يوم سالته ليش كول ما اتصل قالها كنت صايم و ما ابغى اطيح في الحرام في رمضان ..و هي عذبتها فكرة انها تكون بالنسبة له علاقة حران بعد ما كانت زوجته بالحلال .. بعد هالمكالمة ما اتصل و لاهي اتصلت فيه عشان على قولتها ما تزعجه و هو يمشي عياله فيزعل منها ..بس هي بالمه اعصابها تعبانه و يوم اكلمها والله احسها مو في وعيها ما تدري شو تقول ..

مشكلة الليله .. اتصلتلي الساعه 9 تبكي تقول انها خلاص تعبت من هالوضع و مو قادرة تتحمل .. لاهي مطلقة و لاهي متزوجه .. ما تعرف هو يبغيها و لا ما يبغيها .. و عمرها يمر بدون معنى .. و قالت انها رسلت لزوجها مسج تطلب منه يكلمها باجر ضروري .. و تقول هي يوم رسلت المسج في نيتها انها تقوله خلاص كفايه لين هني و كل واحد يروح في طريقه لانها تعبت من انتظار وهم ما بيصير .. بس في نفس الوقت تقول انها تدري انها بعد كم يوم بتندم و بترد هي تتصل فيه و تترجاه يتم معاها لو بس عالتلفون .. فتسالني يوم يكلمها باجر شو تقوله؟؟ تنهي اللي بينهم و لا تخلي الوضع مثل ما هو .. هي تقول ما تقدر تفتح معاه موضوع الرجعه مرة ثانية لانه بيعصب و طلب منها قبل انها ما تفتحه لين هو يرتب اموره فشو الحل؟؟ بشو انصحها؟؟ و الله حيرتني و عذبتني دموعها و ما اريد اعطيها راي لو نفذته تندم و اتحمل ذنبها

عطوني رايكم ارجوكم .. شو الحل .. حطوا نفسكم مكانها لحظة و فكروا بعقلها و مشاعرها قبل ما تحكمون و قولوا شو الحل.. كيف المفروض تتصرف معاه خاصة انها مو عارفه صدقه من كذبه بس مو محصله مبرر يخليه يكلمها و يكذب عليها بدون سبب .. عطوني رايكم و نصيحتكم جزاكم الله عني و عنها كل خير

الى مستى ستظل حائرة تحت الظل
اما آن لشمسها ان تشع !!!!
الله يعوضها خير ونفسي والمسلمات

السلام عليكم
انا مش عارفه اقولك ايه الوحيده صاحبه القرار هى صحبتك لانها ادرى الناس بظروفه ومدى صدقه او كبه فى كلامه معاها وكمان هى اكتر واحده عارفه هى تقدر تبعد عنه ولا لا

تستخير وتتركة ماترد على مكالمتة واذا يبيها بيدورها ويعدل ظروفة لصالحها واذا للاحين متردد خلة يواجة نفسة لانها كذا تموت كل يوم..الافضل لها الاستخارة وكثرة الدعاء بالصالح لها

الموضوع لايحتاج للتعقيد و حرق اعصاب.
ليدخل ذات البين بينهما للتاكد من نية ووضوح الامر. فاما الرجع او الانقطاع. وربنا يصلح الحال.....امين

اختي العزيزة ابغى اسالك هل زوجها طلقها بالثلاث والا طلقه وحده؟
الله يكتب لها اللي فيه الخير وييسر امرها لما يحبه ويرضاه........اتوقع لو من ساعة ماحصل الطلاق وهي قاطعه اتصالاتها معاه حتى لو هي مشتاقه له او لسى تحبه لان هذا الشيطان جالس بيدفعها لمكالمة رجل صار غريب عنها كان مااحتاجت لهذا السؤال ولا اتعلقت فيه وتستنى اليوم اللي يرجعها فيه 0000الله يعينها ويصبرها

لا حووله ولا قوووه الا با الله ..

لاهي مطلقة و لاهي متزوجه
شلون هي مطلقه
واختي انا اشوف مكالماتها معه خطاء ومضيعه للوقت ليه كل هذا سنتين علاقه على التلفون

شكرا على ردودكم اغالية جزاكم الهه خير

ريمال ... الله يعوضها و يصبرها الله آمين

الكونت سمسم .. هي لو قادرة تاخذ قرار كا مانت اتعذبت لهالدرجة بس هس بين نارين .. نار حبها له و املها انه يرجع حتى لو الامل هذا مو واضح و نار بعده عنها و هذا شي انا بعيني شفت انها مو قادرة عليه .. دعواتكم لها بالصبر

ayad88 .. والله ما صلت ركعه الا و دعت انه يرجع لها .. والله كنت اسمع دعاءها بهمس في الايام اللي نفطر فيها مع بعض تدمع عينها و تقول يا الله رجعلي (فلان) و لا تطول بعده عني ..هي مو شايفه في الدنيا غيره

love3.. اللي ايده في الماي مو مثل اللي ايده في النار .. هي الله يعينها قلبها احترق مو اعصابها و بس .. و لو في مجال حد يتدخل و الله ما كنا بنقصر و زوجي الله لا يحرمني منه حاول مع طليق (م) بعد الطلاق بس الريال الله يهديه ما يفتح قلبه لحد بعدين هم كبير في العمر (45 سنه) اكبر من زوجي و من اخوان (م) الذكور .. و غير هذا كبير في مكانته الاجتماعية فصعب حتى على (م) انها ترضى حد يدخل ما بينهم

roneroro.. يمكن بس هي كانت تبغي تحافظ على اي شي يربط بينهم و انا متاكدة حتى لو ما كان عرض عليها يرجعها كانت تمت للحين معاه .. قلتلكم في اول موضوعي تحبه حب مرضي .. الله يعينها

اختى صدقتك غلطة انها سمحت لنفسها انها تتكلم مع طليقها من ورا اهلها اخاف يكون زوجها استسهلها
وقال بدام انا اشبع رغبتى العاطفيه بسهوله مع طليقتى ليه اتزوجها وازيد مصاريفى

و الله انا محتارة و مو قادرة انام .. ادري انها من الصبح بتتصل فيني تعرف ردي لاني وعدتها افكر في وضعها عدل (لانها تقول انها ما عادت قادرة تفكر بوضوح او توصل لقرار و كل ما فكرت اكثر تحتار اكثر) فادري بتتصل من الصبح عشان تعرف الرد قبل ما هو يتصل فيها

و انا والله محتارة .. لو كنت مكانها كنت جنيت .. خاصة انها وحدة عاطفيه زيااااااااده عن اللزوم و عقلها يختفي بالمرة يوم الموضوع يتعلق بزوجها .. والله ما ادري ودي اساعدها بس مو عارفه كيف

السلام عليكم

اختي لو بغيتي رايي فإن تواصل ( م ) مع زوجها هو السبب في عدم ارجاعها حتى الآن!! والله اعلم

لان الرجل يشعر بانه متى ما اراد يستطيع ارجاعها ولكنه لو شعر ان ( م ) صعبه المنال ولا يمكن ارجاعها بسهولة بل عليه ان يقوم بمجهود كي يرضيها فهو سيسعى لارجاعها. اختي الرجل لا يحب المراه التي لا تحترم نفسها وتحترم مشاعرها.

بل عليها ان تثق بنفسها وان تقطع الاتصالات معه وان تتوب لله لانه ليس محرم لها، وقولي لها يجب ان تراعي الله وترضيه حتى يرضيها.

دعيها ترجع لله وسيرجعها زوجها بإذنه

ما يبيلها تفكير خلها تقطع مكالماتها معاه ولو يبيها صج يعرف طريجها مثل ما قالوا لانه من اهلها وبينهم بيبي ويعني هو يمكن قاعد يلعب عليها وعلى مرته الثانيه لان المكالمات بالسر يعني حرام وهو عارف وهي بعد ان لو اي واحد عرف عن هذي المكالمات راح يعاتبهم علشان كذا خاشينها وهم عارفين ان اللي يسوونه غلط .. خلها ترجع لنفسها وولدها وتهتم فيه لو تحب زوجها لازم تهتم بولدها لان في من ريحته مو تهمل الطفل اللي ماله ذنب بكل اللي يصير .. والله يكتب لها الخير

عزيزتى ممكن يكون كلامى صعب بعض الشىء بس بعض الرجال من انانيتهم حتى بعد الطلاق يصعب عليهم تخيل زوجاتهم السابقات يمارسن حياتهن بعيد عنهن ومرات حب الزوجة المطلقة لزوجها يبقى زى الادمان للطرفين هذا الرجل لايريد ارجاع زوجته وستظل هكذا لعشر سنين وسايبقى الحال كما هو عليه وهو مستمتع بحبها وعذابها وعايش معاها حركات المراهقين حب واتصالات وتلفونات سرية ويسمع كلام حلو من غير اى التزام انصحيها بترك هذا الرجل لانها بتضيع فى زمنها وحرام عليها نفسها وشبابها

عارفه يا اختي انه الحب اعمى
وانه الزوجه اذا حبت زوجها يهون عليها تفقد روحها ولا تفقده !!

بس هل هي راضيه انه يتلاعب بمشاعرها بهالطريقه؟!

منو اللي يتعب وتذبل سنين عمره؟؟؟ هي طبعا
ولا هو عنده عايله وزوجه ومب ناقصنه شي

انا اشوف انه الدور الكبير عليج انتي الغاليه
انج تصحين صديقتج وتساندينها

اول شي تكلمه بجد
خل يقولها الحل النهائي
تكلمه بصرامه وبجد
اذا عصب تقوله اذا هذي النهايه كل واحد في طريج
واذا قالها قريب تقوله خلاص لا تكلمني لين يتم الموضوع

وانصحها علشان ما تضعف تغير رقم تلفونها
ولو هو ما يستغنى عنها بيركض بيت ابوها يطلبها
واذ هي مب فارقه عنده ما بيهمه الموضوع

ساعدوني و ساعدوها ..محتاجة رايكم الليله ضروري ... آخر الاخبار
 

أول شي شكرا لكل من شاركني برايه و نصيحته في هالموضوع .. جزاكم الله خير عني و عن صديقتي (م)

اخر اخبارها ..

الصبح مثل ما كنت متوقعه اتصلتلي و انا اجهز بنتي للروضه .. قالت انها ما رقدت طول الليل تصلي و تدعي و تفكر في الموضوع بس بعدها مو قادرة تقرر و حاسه انها بين نارين

المهم انا عطيتها رايي و كان انها تحاول تهدا عشان ما تسوي شي تندم عليه او ما تكون مقتنعه فيه .. و قلتلها تكلم طليقها و تفتح معاه الموضوع بهدوء بس بدون تهديد و لا عتاب .. بس تطلب و بشكل حاسم انه يقولها بصراحة شو نيته ناحيتها و هي ساعتها تقرر موقفها من هالنية و لو كانت بتكمل معاه و لا لاء .. المهم تكلمنا قريب ساعه و انتهينا على اساس ان هطا اللي بيصير

و كلمتني العصر قالت انه ما اتصل بس هي ما قدرت تصبر و حست ان مع الوقت بدت تتوتر و تعصب فرسلتله مسج تطلب منه مره ثانيه انه يتصل فيه عشان تبغيه في شالفه

و كلتمني مرة ثانيه في الليل (انا كنت زعلانه مع زوجيو ابكي و مو متحمله حد بس الحمد لله قدرت اصبر عليها و اسمعها)

المهم قالت انه اتصل فيها و هو من نفسه اول ما اتكلم قبل ما تقول اي شي اعتذر لها انه انشغل عنها في الايام اللي فاتت و كان عذره ان ناس من معارفه جوهم من السفر و كانوا عنده في البيت فانشغل معاهم و كان يادوب يقدر يطلع و حتى يوم يطلع حد يكون معاه فما قدر يكلمها ,, طبعا سالها شو السالفه اللي تبغي تكلمه فيها و هي قالتله عن مشاعرها و انها تعبت من الوضع اللي بينهم و تبغي تعرف شو اخره .. و كان رده بكل بساطه انه بدون ما تتكلم عارف انها تعبانه و مضايقه و عارف انه مقصر وايد معاها و موضوعهم طول وايد بس هو بعده علي نيته و متمسك فيها لاخر العمر لكن ظروفه الحين ما تسمحله يردها و طلب منها تصبر عليه و تتحمله شوي لان اللي يسويه الحين و الترتيب اللي هو مشغول فيه (واللي هي لين هاللحظه ما تعرف شو هو) هالترتيب لحياتهم مع بعض

و الظاهر انه عطاها جرعه كلام حلو لانها اتصلت و حالها غير الحال .. و هي تكلمني عنه ما تقول الا فديته و ياقلبي عليه و حبيبي فلان و من هالكلام

يعني باختصار ردت ريما لعادتها القديمه .. انا ما قدرت اقولها الا الله يهنيكم اذا انتي مصدقه كلامه اصبري عليه و ان شاء الله انه صادق

و انتهت السالفه على هالحال .. بس انا عارفه ما بيمر شهر و الثاني الا السالفه بتتكرر

ما يبيلها تفكير خلها تقطع مكالماتها معاه ولو يبيها صج يعرف طريجها مثل ما قالوا لانه من اهلها وبينهم بيبي ويعني هو يمكن قاعد يلعب عليها وعلى مرته الثانيه لان المكالمات بالسر يعني حرام وهو عارف وهي بعد ان لو اي واحد عرف عن هذي المكالمات راح يعاتبهم علشان كذا خاشينها وهم عارفين ان اللي يسوونه غلط .. خلها ترجع لنفسها وولدها وتهتم فيه لو تحب زوجها لازم تهتم بولدها لان في من ريحته مو تهمل الطفل اللي ماله ذنب بكل اللي يصير .. والله يكتب لها الخير


كلام سليم 100 %

فرج الله همها وهمك يالغاليه

ارجو كتابة رساله باسمي في الخاص