|
تزاعلت مع زوجي مو عارفه اتصرف ممكن تساعدوني الله يوفقكم
السلام عليكم ورحمة الله وبركاته
لو سمحتواا صديقتي محتاره طلبت مني اطرح مشكلتهااا وان شاء الله تساعدونها فيهاا تناقشت هي وزوجهااا وتشادوا بالكلام بالاخير قالها اطلعي لبيت اهلك وهي ع طول راحت لان كرامتها ماتسمح لهااا انها تقعد لحظه وحدة قبل لاتطلع من بيتها قالها خلاص اقعدي بس هي رفضت وراحت بيت اهلها لان الكلمة قويه بحقها ابي شوركم اتصل عليهاا مره وحده ع الموبايل وماردت عليه هل هذا الي سوته صح ؟؟؟؟ ولا تخبر ابوها بالسااالفه ؟؟؟ واذا اتصل مره ثانيه ترد ولا لا مدري الرجال يعتبرونها اذا ردت ورضت بسرعة ان هي ماتهتم وممكن مره ثانيه يسوي الحركة ومايهتم بالعواقب ايش الحل الثقل مرررره وعدم الرد ؟؟ ولا ترد وترضى بسرعة نفسي افهم لو اي رجال رضت زوجته بسرعة ايش يعتبرهاا ؟؟؟؟ وترا عندها طفلين وهذي اول مشكلة كبيرة تصير لهم عشاان كذا مو عارفه كيف تتصرف افيدوووهاااا الله يساعدكم |
خل تتعوذ من ابليس تره الريايل ما يحبون الحرمه اللى تعاند
|
الحل أن تستعيذ من الشيطان وترجع لزوجها
ونصيحة نصيحة نصيحة ألا تخبر أهلها .. فإن تدخل الأهل في الغالب ( يعميها ولا يكحلها ) إذا تدخلت الأطراف الخارجية فإن المشكلة ستكبر وتتفاقم وهذا ليس في صالحها أبدا أختي الكريمة .. الحياة الزوجية يلزمها الكثير من التنازل والضحيات وها هو زوجها قد تراجع في كلامه وأوصاها بالبقاء ثم اتصل أيضا ولم ترد .. أعتقد يكفي إلى هنا ! لا داعي لخلق مشاكل أكبر (( وأن تعفوا أقرب للتقوى ولا تنسوا الفضل بينكم )) |
الدنيا رمضان
خليها تتعوذ بالله من الشيطان وترجع بيتها ولاتكبر السالفه |
الله يهديها ترجع وتتعوذ من الشيطان
|
الله يهديها ويصلح أحوالهم ......... أنا ما أعرف شو أشور عليها بس أهم شي ما تخبر أهلها بأي شي وتحاول تتفاهم هي وزوجها بينهم من دون تدخل الناس ............ |
يقول المثل اسال مجرب ولا تسال طبيب انصحك اختي صاحبة الموضوع ان تتعوذ من الشيطان الرجيم وتعود الى بيتها قبل ان تكبر المشكلة وحاولي ان تكسبي زوجك بالكلمة الطيبة قبل ان تتفاقم المشكلة عندها لاينفع الندم على مافات |
زوجي دايم يقول ( لا كرامة بين الزوجين )
و كرامتها من كرامته و العكس صحيح و أهم شئ يستفيدوا من المشكلة هذه و لازم الزوجين دايم يخلو هناك ( خط للرجعة ) أو مدري إيش يسموها ؟ |
وهي ع طول راحت لان كرامتها ماتسمح لهااا انها تقعد لحظه وحدة
هذي الكرامه اللي مالها اصل بين الزوجين اصلا سبب من اسباب المشاكل بين الزوجين...كرامتي وكرامتي...يعني لو نجي نتكلم عن الكرامه ودققنا على كل شئ في الحياه الزوجيه ما راح نخلص من كرامتي وعزتي ...اتقوا الله .... وكن حسنات المعشر مع ازواجكن يكن لكن عبدا ودودا كريما... لا كرامه اللا في دين الله...وفي حق من حقوق الله....اذا ما اهين ديننا هنا نقول كرامتنا ما تهون ..عزتنا... يعني خليها ترد على زوجها وتتعوذ من ابليس وتكون إمرأه رجوعه ..رحيمه..حنونه...بلاش الكلام اللي ما منه اللا وجع الراس...لا تنسي هي كمان شدت في الكلام والله يعلم شو ردت على زوجها حتى تطلع منه هذه الكلمه.. اذا ارادت عيشه هنيه وسعيده...لا تكبر السالفه...وترجع لزوجها..بكل هدوء ..يعني اعتذار منه واعتذار منها وترجع المياه الى مجاريها...اقل مكان تقدر تبتعد فيه عن زوجها هي غرفة نومها... يا اختي اذا اراد الزوج هجر زوجته ينام معها في نفس الغرفه وبنفس السرير اللهم يقلب وجهه بس....والصراحه قد مرت علّي انا وزجي اننا مره زعلنا...بس ننام بنفس الغرفه والله ثواني واحنا اصحاب.. : ) ....لانه ما دام حنا جنب بعض كل واحد بيتقرب من الثاني شويه اشويه وبعدها كلمه ثم ضحكه ثم....... والله يوفق الجميع وهذه نصيحه للجميع.. من وجهة نظري الزوجه اللي تخرج من بيتها وحنق في بيت اهلها..تنكسر في نظر الزوج.....وتبدأ بينهم جفوه....وامكن يبقى في قلب شئ.... |
اقتباس:
شكل صديقتك عايشه مع زوجها والسلام مافيه شيء اسمه كرامه بين الزوج وزوجته لأن كرامتهم وحده |
أي رجل مآيحب آلعنآد
لأن آلرجآل قوآمون على آلنسآء وآي رجل يعصب آو يرفع صوته آو يخطئ على زوجته وتسكت آول مرهـ وتتحملهآ صدقيني أنه بيشيلها بصدره ولا يكررها لأن كل طقه بتعلوومه وأنا أقول آن صآحبتك ترد لبيت رجلها وتتعوذ من ابلـيس ..00.. |
اقتباس:
|
اقتباس:
وإذا اتصل مره ثانيه ترد عليه الله معك |
ماضيع بيوت كثيرة غير انه مافيه كرامة بين الزوجين
لا فيه كرامة لما الزوج نفس الشي مايدقق على التوافه ولا يكبر الامور وقتها نقول صحيح مافيه كرامة بين الزوجين اما لو شخص دايما يغلط ويتوقع الطرف الاخر بيجي ويستسمح منه ولا كانه شي وهو لو غلط مستحيل يعتذر لا اسمحوا لي حتى الطفل لتعودوه على الانضباط يعاقب ولو نفسيا انا كنت ممن يقولون لا كرامة بين الزوجين واكتشفت ان هذه اول خدعة تنسف الحياة الزوجية من حقوق الزوجية ان الزوج يحفظ كرامة زوجته والزوجة تحفظ كرامة زوجها وان مايتعدى احد على احد وان يعتذر المخطا او على الاقل يقدم اعتذار ضمني واذا كان الامر تافه يتغاضوا عنه ويكبروا عقولهم لكن معا وليس طرف على حساب الاخر وكلامي هذا حتى للرجل الذي يتزوج بزوجة متعبة وعنيدة ومتسلطة كثير رجال ايضا يكبرون عقولهم ويطنشون لحد مالزوجة تتمادى وتصدق نفسها وتكبر المشاكل خصوصا لو الزوج عنده كرامة يمكن يتغاضى مرة ..مرتين يطنش لاجل موقف لاجل فلان وعلان لاجل الابناء لكن ان يستمر وضع سيء لانه مافيه كرامة بين الزوجين وبعدا بيجي يشكي الحال والكل بيقول له ليتك وقفتها عند حدها من البداية وللزوجة ايضا يقال لها ليتك وقفتيه عند حده من البداية بقول لك ايضا تجربتي ومن واقع زوجي عملها لي اول مرة طنشت وزعلت لكن راضاني بانه قال لا تطلعي مثل صديقتك بالضبط ورضيت بنفس مبدا لا كرامة بين الزوجين وكلام غضب بعدين احلوت الكلمة بفمه وصار يستسهلها يوم طلعت من البيت وكبرت الامور وقتها فقط وعى ان الكلمة هذه مابتمشي له وكثير مواقف كل وحدة اعرف الناس بزوجها وهي تقدر تقدر الكلمة هذه من غضب وهو احمق وهل تراجع عنها بشكل مرضي او لا لو انا منها لانها اول مرة وانه كانه استسمح منها تقوم بكل واجباته وتحط له اكله حتى وتبات معه بغرفته لكن ماتكلمه ولا كلمة وتبين انها زعلانة لحد مايراضيها وتعاتبه وتقولها له صريحة ان كلمتك لي جارحة كيف تطردني من بيت الزوجية حتى لو انت تهورت وحمقت لو اني بعد تهورت وحمقت وسمعت كلامك واخذتني العزة وعلمت اهلي بالامر كيف حيكون وضعنا مافكرت بعيالنا لا تسكت عنه خله يتادب ويعرف حدوده بنات الناس مو لعبة وصدقيني يااختي انا ندمانة اني لاني كنت ايضا ضحية لكثير من النصائح التقليدية والوم نفسي قبل لا الوم زوجي لان زوجك لين ماتعوديه والزوجة اللي تعلم زوجها وتوقفه عند حده انه مايغلط عليها تحفظ خط الاحترام بينهم لكن النصائح الدائمة واقولها لك اهيل وامي واخواتي ينصحوني بنفس النصائح اقول لك الرجال انواع فيه رجل تاخذيه بالطيبة وفيه رجال مايجون الا بالشد وتوقفهم المراة القوية اللي عارفة حقوقها وفيه رجال تجيهم بالسحر الحلال والحيلة كل زوجة عارفة زوجها اكثر من اي شخص ثاني وخويتك هي اعرف بظروفها انصحيها ترد بيتها بهدوء لان البعد يولد الجفاء ومرة ثانية لو قال اطلعي بيت اهلك تقول له مثل مااخذتني من بيتهم تردني انت بنفسك لهم لكن الحين بيقول هي طلعت من نفسها وترد من نفسها خليها ترد بحجة العيال والافضل انها تتلكك يعني تقول العيال محتاجين شي معين وترسل له رسالة لاجل يجي هو وياخذها بنفسه |
نفس مشكلتي مع زوجتي لأنها (تعاندني)00
|
زوجها وهي أقرب منا له وتعرفه
انا حصلي نفس الموقف و السبب الرئيسي هو استمرار المشادة معه وانت معصبة وهو معصب هذا خطا صراحة قلت له بروح لهلي قال روحي مع السلامة والله الحمدالله قلبتها في رأسي شوي وقلت ما تسوى اشمت في الناس زوجة اخوي من هنا واهله من هنا ومعي طفلين بعد اروح اسحبهم ..والله تعوذت من الشيطان ويوم واحد ورحت اتسامح منه وقعدت ومن يومها ما أناقشه وأنا معصبة وحتى اذا أخطأ هو أنا اروح اتسامح منه وارتحت لا عاد يرفع صوته علي والحياة ماشية والبيت امتلاء اطفال .. الرجال يبي اللي تسايسه ما هو اللي تحط راسها براسه خذي نصيحة مجربة ترد على زوجها وتتفاهم معه وتعتذر منه على مشادتها معه في الكلام واذا كان رجال ويخاف الله بيقدرها . |
خليها تتعوذ بالله من الشيطان
وترجع بيتها ولاتكبر السالفه ترى الرجال ما يتعاندو ولا يحبون الحرمه الى تعاند زوجها |
الله يسامحها زميلتك المفروض من الاصل انها ماتطلع وضروري انها تقدم التنازلات يعني لما قالها زوجها لاتطلعي ماتطلع وكانت المشكلة انحلت لكن الان اذا اتصل زوجها ترد عليه ووتأسف ولواتصلت يكون افضل لانها تشعر الزوج وقتها باهميته في حياتها وتتاسف ومن كلامك اتوقع انه الزوج بيسامحها
كان الله بعونها |
الله يهدي القلوب نصيحتي مثل كل الي قبلي خليها ترجع لبيتها ولزوجها
ولازم تقدر انه كان غضبان ومتظايق ودامة اتصل فيها هذا يعني انه راظاها وصالحها وصحيح ما فيه كرامة بين الزوجين تحدث في افظل العائلات حتى انا صارلي هالموقف تعرفي شو قالي؟ قالي روحي بيتكم خلاص ابا ارتاح من المشاكل ورحت البيت طبعا هو اللي وصلني وبعد ما سلم على اهلي وراح جريت وراه وقلت له حبيبي لا تتاخر علي انتظرك وجهي لوح اعرف ويوم وما قدر اتصل وقال انا كنت متضايق وخلاص تعالي بجي اخذك والله اني بكيت عليك يوم انتي مب موجودة مع الملاحظة اني ما اتصلت فيه ولا كلمتة |
اختي العزيزة اخزي الشيطان وارجعي الى بيت زوجك لانه لا يوجد كرامات بين الزوجين وبعدين احنا على وجه عيد لا تشمتي فيك الاعداء والمسامح كريم وحنا هيك الحريم قلبنا طيب ودايما منتنازل و مهما كانو اهلك مناح بس الوحدة منا بس تتزوج ما الها الا بيت زوجها هو مملكتها وبعدين بتقولي انه الك منو اولاد ازن خلص لازم تسامحيه لانه ما بهون عليكي اصلا لانه ابو اولادك وبضل حبيبك وبعدين قصتك عاديه جدا يعني صايرة معنا كثير يعني هي الوحدة بس جوزها بحكيلها روحي من البيت بتروح لا انت غلطانه قوليله هزا بيتي وما بطلع منه هيك بضطر يطلع هو بروح شويه وبرجع هادي انشاء الله ولا عكنه صاير شي وبعدين انت بتكوني هديتي وتزكري اختي انه خيركم من بدا بسلام والله الموفق
|
| الساعة الآن 08:20 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©