|
علاقتي مع زوجي في تدهور ، مالحــل ؟
السلام عليكم انا اول مره اكتب عن نفسي بمنتدى بس الان خلاص مو قادره استحمل تعبت تعبت من المشاكل ابي اعيش مثل ما غيري عايش بسعاده وهنا لو مو عشاني عشان العيال انا متزوجه من 10 سنوات وعندي ولد وبنت زوجي كان من احسن الناس طيب جدا وخلوق والكل يحبه من اول ما تزوجنا كان يحب يشوف الافلام الاباحيه وبشوف الصور كنت ازعل واتضايق من الشئ هذا وهو عنده لا عادي والمفروض ما تزعلين منه وكنت انصحه واقوله العين تزني وحرام الي يسويه بعد فتره صار ما يشوف عندي شئ وقالي انه تركهم عشاني انا صدقته وقلت الحمد لله بعد كذا اكتشفت انه يشوفهم من وراي لما اكون مو بالبيت اسكت وخليته على راحته لاني ما قدرت عليه ولو قلت له شئ صارت مشاكل بيننا فقلت اشتري راحتي وهو مو بصغير رجال كبير وعارف انه شئ غلط وحرام المهم من خمس سنوات تقريبا تغير علي بشكل خيالي ما يقعد بالبيت الا للنوم بس ما يقربني بفراش الا نااااااااااااااااااااااادرا كل ما قلت له ليش يقولي انا رجال ومن حقي اطلع وما احب اصوات العيال وصار كل شوي يعايرني بالبارده والثلاجه وانتي اصلا ما تحبين الجنس؟؟؟؟؟؟؟؟؟؟؟ مع اني ما اشوفه ولا يتكلم معاي الانادرا ولا بيننا اي اتصال فكيف حكم علي بالبرود انا اسكت وتحملت قلت يالله فتره وتعدي حملت مره ثانيه وبفتره الحمل كنت جدا تعبانه وطول وقتي عند اهلي وبامر منه هو ولما كنت ابي اروح للبيت يرفض وهو يجيب لي اغراضي؟ مره جيت للبيت وانا كنت بالسابع حامل لقيته مغير بمكان الكمبيوتر وجايب كاميره ورقم سري ما اقدر افتح الكمبيوتر سالته ليش كل هذا اعطاني اعذار ما تتصدق وانه ناسي الرقم السري ذاك اليوم صارت سالفه ما بيننا طقتي وسحبني مع شعري يبي يطلعني برى البيت وهو دايما يقولي انا بطلعك قدام الناس عريانه عشان يقولوا انك مجنونه ومو صاحيه بعد ما شافني مو قادره اتنفس رماني بالارض واخذا البوكس تبع الكمبيوتر وطلع من البيت لمده 6 ايااام مدري عنه شئ وانا من النوع لو اموت اهلي ما يعرفون بمشاكلي ويحسبوني عايشه بنعيم بعد كذا جاي للبيت ولا كان اي شئ صار ولا حتى كلمه اعتذار وانا هبلا سامحته على اللي صار وصارت بيننا مشاكل بعد كذا لحد الولاده بعد ما طلعت من المستشفى وداني لبيت اهلي وما شفته طول الاربعين يوم ومكالمات بالقطاره ومن غير نفس بعد جا اخذني ورحت لبيتي عشان العيال ودست على كرامتي |
ونفس الشئ رجعنا للمشاكل كل يومين ثلاثه مشكله من سنه تقريبا اكتشفت عن طريق الصدفه ان زوجي العزيز كان على علاقه باكثر من وحده بالمسنجر والجوال شفت كلام ما بينهم بالمسن وكلام لصديقه او بمعنى اصح لعدوه لانه هو اللي ينصحه بالبنات كان يسبني ويكلمه عن المشاكل اللي بيننا كلام يقوله لبنات الهوى ولا فكر بيوم بقوله حق زوجته جاني انهيار تعبت مرضت كرهت كل شئ البيت الدنيا كلها عرفت ليش كان يطلع طول اليوم برى البيت ليش يتهمني بالبرود الجنسي مع انه ما يجيني عرفت وعرفت وليتني ما عرفت بعده بفتره اعتذر وان الشئ هذا قديم وخلاص بطل انا سامحته وقلت له الله يغفر لعباده فكيف حنا ما نغفر لبعض بعد كذا صار معي من احسن ما يكون لا مشاكل ولا شئ .........من فتره رجعت لنا المشاكل صار يقولي ليتني اخذ وحده ما معاها الا الابتدائيه صديقي كذا زوجته ما تقوله شئ لو يجي للبيت بعد اسبوع ما تقوله وين كنت؟؟؟؟؟؟؟؟ متاثر باللي معاه بالدوام ومشاكلهم يجي يطبقها علي ما يبيني اقوله وينك؟مو معناه اني 24 ساعه معلقه التلفون واشوف وينه لا والله من كثر ما يقولي هالكلام صرت اشك بنفسي لا يكون انا بشخصيتين اموره ما يقولي عليها اي شئ يخصه ممنوع اعرفه بالاول زعلت بعدين قلت بكيفك انت رجال ما تبيني اعرف شئ عنك براحتك زوجي من النوع اللي لا يمكن يجيني بالجنس انا اللي لازم اجي له؟؟؟؟؟؟؟؟؟؟؟؟؟؟؟ اقوله طيب مشتهيه يوم انت تجيني حسسني اني مرغوبه لو يوم بس يقولي لا ما ابي اجي لك مزاجي ما ابي انتي تجين ازعل واحلف ما اجي ولا اقربه تجي على راسي؟؟؟ اتهامات وانتي بارده وانتي ثلاجه خخخخخخ ارجع واقول يا بنت ربي عيالك وسوي اللي يبيه ودوسي على نفسك عشان اللي عندك ثاني رمضان صارت سالفه ما بيننا ورفع صوته علي مع نهديد بالضرب وطبعا قدام الاولاد (يا قلبي عليهم) واخوي كان فيه وسمع كل الكلام والسب وانواع الشتائم واختك ثلاجه وبارده وما اعرف ايش يعني فضيحه درجه اولى انا طلعت كل اللي بقلبي عليه ما خليت شئ رحت باخذ ملابسي وبطلع برى البيت لحقني ويضمني وما اعرف ايش وخلاص خلي نتفاهم دخلت الغرفه صليت الفجر قلت لو جا واعتذر وربي لا انسى كل شئ لكن للاسف جا للغرفه وهات يا حساب ليش قلتي انا ما ابغاكي ولا احبك ليش قلتي اني اقول كلام حلو للبنات بالمسن وانتي لا قلت هذا اللي صاير وانا بشر واحس مثلي مثل غيري مع انه يقولي دايما انتي مو مثل باقي الحريم انتي ما تستاهلين شئ ولا تستاهلين تسافرين قلت له انا تعبانه ومو قادره اتكلم بعد كذا نام واسكتنا على الموضوع لحد فجر السبت اللي فات طلع من البيت لليوم ما شفته اتصل مره سال عن العيال وصك السماعه بوجهي مع طبعا كلام زي العسل :29: وارسل مسج يقولي اني ما اهتمك ولا شئ وعاجبني الوضع؟؟؟؟؟؟؟؟؟؟؟؟؟؟؟؟؟؟؟؟؟ .................................................. .........ز من ولادتي بولدي الثاني لليوم وانا ما اناااااااااااااام الا بحبوب كرهتي الحياه كلها يقولي انا سبب المشاكل كلها مع اني محافظه على بيتي ما ارفض له طلب كل شئ انا اسويه معتمد على بشكل كلي لو يخرب شئ بلبيت انا اروح واجيب احد يصلحه شايل يده من البيت سوق ملاهي تمشيه للعيال علي انا هو لا يمكن بزعم ما يحب الازعاج وصجه البزران يطلب مني اشياء حرام وكم مره وافقته عليهم لكن الان تبت لرب العالمين والله ما ارجع لاي شئ حرام ولا بطيعه بشئ والله العظيم واللي خلق السموات والارض انا بشر وكلنا نخطئ بس والله خلاااااااااااااص حياتي مستحيله كذا تحملت كثير مشاكل واتهامات وبلاوي حتى اهله ما سلمت منهم اول الزواج لكن الان لا والله ما اظلمهم ارجوكم اعطوني حل انا ما ابي الطلاق ابي عيالي يعيشون مع امهم وابوهم للعلم محد يدري بمشكلتي الان من اهلي حرام الناس رمضان وما ابي اضيق خلقهم الإشراف : توضيح العنوان . |
وجعتي لي قلبي ياأختي الله يعينك ياخيه تبين الصدق؟ أنا ألومك في حاجتين أول شئ أنك سكتي عليه لما ضربك؟ وانك طلعتي اهلك من الموضوع ع الأقل أخ من أخوانك الفاهم فيهم والمتزن.. مو دايما الحل الأهل يطلعون من الموضوع بالعكس بعدين أنتي قلت أخوك سمع ما قلتي لنا وش ردت فعله؟ ما سألك؟ زوجك تفكيره مشحون من أصدقاء السوء والبنات إللي يعرفهم:( وانت أسمحي لي شايله عنه المسؤليه ليه؟ الوحده مناإذا شالت هم البيت وتصليحاته والأطفال ومسؤلياتهم وش بقيتي له؟ تقولين حتى المعاشره أنتي تطلبينها! وش دوره بحياتك؟ ممول ؟ مايقدر على إزعاج الأطفال هذولي أولاده مثل ماهم أولادك! زوجك صدقيني حاله ممكن ينصلح بس يبغى له قرصه جامده شويه من أهلك توقفه عند حده:18: لأنو باين عليه أنه متمسك فيك بس شايفك صابره عليه فتمادى.. اناإللي مستغربه منه كيف هلك ما حسوا وانت تقولين في النفاس ماشفتيه؟ أنت ما شاء الله عليك حرمه عاقله وفاهمه والدليل إنك صابره على اللي سواه فيك صلي ركعتين قضاء الحاجه كل يوم الفجر وادعي له من كل قلب وإن شاء الله ربي يصلح حاله ويرجعه لعقله والله يتمم عليك بعقلك ويحفظ لك أولادك يارب أختك دلوو24ووعه |
اقتباس:
لا اختي انا اهلي تدخلوا مره بعد ما اكتشفت علاقاته بس ما قلت لهم عن البنات عشان مهما يكون هو ابو عيالي واللي يمسه يمسهم تكلموا معاه بعد ما تركني عند اهلي شهر ولا حتى سأل عن اولاده ورجع زين بس برضوى اصدقاء السواء مو تاركينا بحالنا وانا عندي قدره على الصبر عجيبه جدا كنت امثل على اهلي لما كنت بالنفاس انه يكلمني وانه مو قادر يجي عشان شغله واسبوع سيارته خربانه يعني اجيب له اعذار وهما يشوفوني معاهم كويسه وما ابين لهم شئ و يصدقوني! المشكله الان هو يبيني اكلمه واعتذر له على شئ ما سويته هو اللي غلط علي وقال لي كلام زي السم يبي يضربني ويقولي كلام زي السم ويطلع يقعد بال5 وال7 ساعات برى البيت ما يكلم ولا يسأل عنا يجي للبيت يقولي انا نسيت اللي صار انتي انسي؟؟؟؟؟؟؟؟؟؟؟؟ هو ينسى عشان هو الجاني بس انا كيف انسى ذله واهانته؟؟؟؟؟ والله تعبت خلاص وما وجع قلبي الا العيال بس |
اسمحي لي اختي الغلط منك انتي ماقصرتي معه بشي جيتي له بشتى الطرق مانفع بس احسك مره هاينه نفسك ترى الرجل مايحب المراءه ضعيفة الشخصيه ولاالمتسلطه كوني وسط بين هذي وذي لاتكوني جبانه مره شفتي لمن زعلتي وجيتي تخرجي من البيت كيف جاء يجري وراك حاولي اهجريه عشان يحس بقيمتك مو تتحملي الضرب ولإهانه وتقولي عيالي تقبلي مروري والله يعينك ويصلح حاله يارب
|
عليكم السلام ورحمة الله وبركاته
عفواً .. يُنقل للمكان المناسب . |
السلام عليكم
يخيتي اول شي غلطانه لانو تعود منج تسامحينه ويرضيج بكلام زائف واصلا الرجل يوم يعاير زوجته بكلام الشارع او غيره هذا دليل على انو مافي احترام وانا متاكد مليون في الميه انو بنات الشارع مو بس المسينجر او البالتوك ضعيف وياهم شخصيا ومحتقر مبينهم وهذا سبب كافي يقول لج كلام اصلا مافي داعي يقول ريال لزوجته ام اولاده انا رايي اذا عندج اخو يوقفه من الاحسن قبل فيوم مايجيب لج بنت شارع ويدخلها لبيتج وبعدها يمكن يصير فيج شي وتخلي اولادج عرضة للشارع تداركي بيتج وخلي احد من اهلج يوقف المهزله هذي وقلبي وياج خيتي تحياتي صقر المغرب |
End love
الله يعينك أختي ويصبرك...ليه ما تدخلين أهله في الموضوع وتقولين لهم عن كل شي يسويه فيك...و ان شاء الله بيوقفون معكِ... اختي أكثيري من الاستغفار لمدة أسبوعين واصبري صدقين ربي راح يعوضك الأحسن... |
السلام عليكم
(اسئل الله العظيم رب العرش الكريم في هذا اليوم أن يفرج كربتك ويزيل همك) حاولي البحث عن شخص في العائلة يتحدث معه ويناقشة... لكن أقول من كلمك عنه إنه مريض نفسي الله يعينك علية |
أختي الاصلااااااح ويكون بالدين
أختي زوجك أيمانه ضعيف وأتوقع والله أعلم أنه لا يصلي أختي أدعي ربك وحاولي تدعيه للاصلاح وتزوري مكه والمدينه معاه لو أمكن كثري من القرآن والاشرطه الداعيه في البيت عن الاشياء الي يسويه يشوفها مرى مرات وفي الاخير لازم يسمعها حاولي ترمي شي في سيارته وهو ما يدري من هذه الاشرطه ولا تهتمي لو يرميها كرريها في البيت وفي كل مكان شغلي القرآن لما يجي على الايات التي فيها عضه عن الفاحشه والزنا ووووو صدقيني قلبه راح يستجيب بإذن الله |
السلام عليكم
اقول والله اعلم ( يجب ان تهتمي به اكثر من جميع النواحي ) وان لا يشغلك البيت البيت والعيال عنه اهتمي بنفسك وبه اما بالنسبة للمشاكل فلا تعليق وللكن يا اختي طول العشرة يسبب تراكم السلبيات فلا تجعلين لتلك السلبيات اثر على حياتك لانها تمر على كل زوجين على وجه البسيطة تحياتي لك |
أختي الفاضلة سكوتك وعدم إيجاد حل جذري طور المسألة إلى ما ترين الآن .. أظن أن زوجك قارب عمره من الأربعين أو أقل ، وهذه الفترة يشعر فيها الرجل بقوة الشهوة وهذا معروف بداهة ..
سكوتك عن مشاهدته لأفلام الجنس جعلته يستغني عنك بالكلية فأنت لست بجمال ممثلات الجنس ولا تصلين في مستواهم في الإثارة وهن أكثر من واحدة ، وبعض الخبيثات كفانا الله شرهم يحادوثه ويرينه أجسادهن العارية عبر المواقع المرئية كالبالتوك ( والصحيح البلاء تك ) ، أنا لا اتنقص منك أختي الفاضلة ولا أشمت بك معاذ الله ، لكن الذي حصل نتيجة طبيعة لشخص لم يراقب الله .. ولم يفكر بأنه سيلقى الله وهو عليه غضبان هذا إذا كان يصلي ، فإذا كان يخشى الله لم يمتع نفسه إلا بما أباح الله زوجته ..لذلك قال النبي صلى الله عليه وسلم : « انظروا إلى من هو أسفل منكم ، ولا تنظروا إلى من هو فوقكم ، فهو أجدر أن لا تزدروا نعمة الله عليكم » .. على العموم الحل في نظري أن تخبري الوالدين وخاصة الوالدة بكل ما يجري خوفًا على الأولاد ونفسك ، حتى لو اضطر الأمر لإخبار أهله ، أنت تطالبين بحق شرعي أن يتقي الله في بيته الذي فرط فيه وفي حقك الشرعي ، اما يخشى الله أنه كما أذى بنات الناس ، أما يخشى عليك من الفتن ـ أعاذك الله منها .. وفقنا الله وإياك .. ثم إياك أن تتراجعي .. صدقيني يا أختي بعض الرجال لا ينصلح حاله إلا بالقوة والكلام معه بشدة ، ولو هدد بالطلاق فلا تنساقي لما يقول ، والله هو سوف يتضرر أكثر لأنه تلزمه نفقة وبيت شرعي لك ولاولادك ، أسال الله أن يصلحه لك وأن يجمعكما على ما يحب ويرضى .. وفقك الله لرشدك . آمين . |
اختي حاولي ان تتجاهليه وشوفي رد فعله ايه
|
أختي الكريمة End Love
السلام عليكم و رحمة الله . هل زوجك يصلي ؟ في الوقت ؟ هل هو يصوم الآن ؟ أختي الكريمة : هل حاولت أن تكونين كما يريد ؟ مثل بنات الهوى لكن بالحلال؟ !!! في امان الله. |
لا أملك غير الدعاء لك في هذا الشهر الكريم
يااااارب فرج هم اختنا End Love ورد اليها زوجها ردا جميلا و انزل المودة و الرحمة بينهما و باعد عنهما شياطين الانس و الجن انك على كل شيئ قدير |
ربنا يهديلك زوجك اختى اكثرى من الاستغفار وادعي لزوجك بالهدايه
والله قطعتى قلبى ربنا ينتقم من اصدقاء السوء واختى اعتبرى اللى بيجرى معاكى بلاء وانتى ولله الحمد انسانه صبوره وان شاء الله لكى بيت فى الجنه وربنا يرذق بنتك وابنك بالزوج والزوجه الصالحه ويعوضهم ربنا بالحنان منك انتى بدل اهمال ابوهم واشجعك يااختى على الصبر لكن اتمنى انك تعملى بنصائح الاخوات لانها فعلا هاتفيدك ربنا معاكى وطمنينا عنك يااختى |
لا حول ولا قوة الا بالله !!!
اختي الحبيبه اسأل الله ان يصبرك اختي الحبيبه زوجج تمادى لانه شاف سلبيه منج اولا: وين كرامتج يا اختي...( ولحد يقولي مافي كرامه بين الزوجين...ما ودانا في ستين داهيه الا هالكلام)...كيف تسمحين لزوجج يضربج ويوقولج ثلاجه وبطلعج عاريه جدام الناس؟!! كان المفروض تخلينه يكره حياته ليما يعتذر!!!! ثانيا: ليش ساكته عن حقوقج؟؟؟ لا علاقه مثل الناس؟؟ لا احترام؟؟؟ لا وانتي حملتي عنه واجباته بعد!!! ثالثا: هل تتوقعين انه تركج له يعربد بالنت كانت نتايجه ايجابيه؟! لا يا خويتي...الا زاد بعده عنج !! اختي الحبيبه من اليوم....لا تتنازلين عن كرامتج ....لا للضرب...ولا للكلمات الجارحه... اهتمي بنفسج اكثر ببيتج وعيالج لا تخلين له مجال ينتقدج بشي اختي انصحج بالتجديد في علاقتكم...تجرئي اكثر بالحركات واللبس.. |
لا حول ولا قوة إلا بالله ..
أقسم بالله تأثرت و أعجبني صبرك وأسأل الله لك ألأجر والمثوبه وأن يعوضك في زوجك ويرده لك أحسن مما كان .....ويحفظ أولادك من كل سوء ......... حبيبتي ...تأثرت جدا وذكرتيني بأخوات في الله شهدت قصصهن المماثله تماما لقصتك ومنهن من تدخل الأهل ومنهن من كانت صامدة قويه محاربه ساحره (بالحلال)لزوجهااستطاعت بأسلوبها (بعد الله )أن ترده لها ... صدقيني أنا لاأحبذ أن أحمل أحد الطرفين المسؤوليه...فالكلام في العلاقات الزوجيه خطير لابد فيه من التأني لأنه ما يصلح لزيد قد لا يصلح لعمر ...ولابد حتى أن نحكم أن نسمع من الطرفين ونسمع كلام مستفيض وفي جميع الحالات اللتي يكون الشخص بها(الغضب الرضا الهدوء ...الخ) حتى نستطيع أن نعطي حلا... أما ان نحكم بمجرد السماع من شخص وبسرد قصه قصيرة ل10 سنوات زواج تحمل ترسبات 10 سنين ثم نقول ونقول ,,...وقد نكون سبب في وقوع الطلاق والعياذ بالله ... لذلك اختي رأييالشخصي..... 1- أكثري من الأستغفااااااار والدعاااااااء ولا ترددي أن تشكي بثك وحزنك إلى الله ولن يردك فأنت من سترتي على زوجك ولن يخيبك ويضيع صبرك فهو كريم قادر على كل شيء ... 2-إن كنت ولابد مستشيرة أحد فأدخلي أحد الثقات الذي يكتم سرك ولا يجعلكم قصة للأقارب والجيران يتسلون بها ....وتذكري عندما يصلح الله حالك وتحل مشاكلك أنتما تنسون الماضي لكنا لبقيه يظلون يتذكرون كل التفاصيل ولا ينسونها ..... 3-زوجك يحتاج تقوية الجانب الديني لديه لذلك هو لا يتورع عن ارتكاب المعاصي ... 4-أختي حبيبتي تذكري أنك في كربه وأن مع العسر يسرا إن مع العسر يسرا وان الفرج مع الصبر وانه بحول الله غمه وستزول وغيرك كثيييير مروا بمثل ما انتي به الآن واصلح الله حالهن فلا تيأسي ويخرب الشيطان عليكي بيتك...ويهول عليك مصابك ...فتعقلي وزني الأمور بالميزان الصحيح... أختي أهمس في أذنك هذا الشهر الكريم استغليه بالدعااااء في الأسحار ومناجاة الكريم الجبار ان يجبر مصابك في زوجك ويفرج ما أهمك ويعوضك في الدارين ............ أختك زهور الدعاء |
| الساعة الآن 11:54 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©