|
خالفت والدي وتزوجت .. وزوجي لم يلمسني ..
بسم الله الرحمن الرحيم
السلام عليكم ورحمة الله وبركاته... والله ماأدري من وين أبدأ بس مشكلتي مشكله أنا وحيدة أهلي أمي وأبوي أنفصلوا وأنا عمري 6 سنوات عشت مع أبوي صح كنت مدلله وأللي أبيه يجيني لكن كنت مخنوقه أحس بوحده ومرت الأيام وكبرت وصارعمري 17 سنه وبدوا الناس يخطبوني وكنت مبسوطه بنفسي لكن أكتشفت شي وهو أن أبوي مايبيني أتزوج وكل ما جا أحد يخطبني طفشه مرت سنه وأحنا على هذا الحال إلا أن تقدم واحد وخطبني عمره 36 سنه وكنت مقتنعه فيه صح فيه فرق بالسن بس أنا كنت مقتنعه بابا حاول يطفشه بس هو كان ولا همه شرط أبوي أن مافيه ملكه ألا بعد شهرين ووفاق الخطيب ومروا الشهرين وتملكنا بعد أسبوع من الملكه خلق بابا مشكله وقال لخطيبي طلقها هي معد تبيك بس أنا أبيه ومنعني أني أكلمه أخذت جوال الخدامه ودقيت على خطيبي وقلت له أنا ما أبي أتطلق عرف أبوي وحاول يقنعني ويقول أنتي وش ناقصك أنتي مرتاحه ومبسوطه وش تبين بزوج يضيع عمرك رفضت وتمسكت بموقفي وجا يوم زواجي وأبوي مايكلمني وتزوجت وهو مايكلمني وزعلان زوجي قعد شهر واحد يعاملني زين وبعد الشهر عذاب حاولت أعرف السبب يقول ضغط العمل صرنا كل يوم هواش وطقاق ألحين كملنا سنه ونص تصدقون أني لين ألحين بكر بنت ما لمستني شعره علما بأني والحمد الله مو ناقصني جمال ولازين ودلال بس ما أدري وش صار أحنا أنخطبنا شهرين وتملكنا 6 شهور وكان يتمنى يلمس يدي بس ألحين أنا عنده والله يدي مايلمسها ويغار علي غيره مو طبيعيه لدرجه أني في بيتي ويقول لي لا ترفعين السماعه حقت التليفون أبدا تخيلوا مافيه مره رحنا لسوق ألا وتهاوشنا كسر شخصيتي بعد ما كان مافيه أحد ألا ويعجب بكلامي وبأسلوبي صرت معد أعرف أتكلم وأخاف وأبوي بعد ماتحديته وتزوجت قال لعد تعتبين باب البيت أبدا وألحين زوجي طايح في شي جديد صاير يتسمع علي وأنا أكلم لدرجه أني مره شغلت العين حقت النار بحرق وجهي والمشكله أنه هو مايبي حتى يلمسني والله تعبت وبعد يقول لي أنسي فكره الأطفال مره والله أنا تعبت وماأدري وش أسوي أبي أحد يشور علي.... تم تعديل العنوان ليتناسب مع المضمون .. |
عزيزتي بصراحه ماعرف اش انصحك فيه بخصوص زوجك بس ابوك لازم ترجعين وتستسمحين منه مايصير تقطعينه هذا ابوك حتى لو قال لا تجين روحي له مو عشان تشتكين له لا بس عشان يرضى عليك ولو طردك ارجعي له مره ثانيه الين يسامحك .. حتى زوجك لما يحس ان اهلك معك بيعمل لك حساب .. والله يكون بعونك .
|
اسئل الله العظيم رب العرش العظيم ان يفرج همك في هذى الشهر الكريم
اول شئ حاولي باسرع وقت بالسلام على ابوك مهما يكون ومهما يقةل ابوك لازم تروحين حتى لو يقول لاتجين الشئ الثاني لاتنسين تقرين سوره البقره في بيتك والمعوذات عشان الحسد والسحر لاسمح الله استعيني بالله ثم الصلاه ادعي ربك في السجود والله كريم كريم كريم ان شاء الله ينفرج همك بعدين ليش مايروح زوجك اكلاكم للشيخ يقراء او تسمعون القرآن بشكل يومي وليلي الله ييسر امورك ابو فهد |
ومين قالكم أني مارحت لأبوي وأستسمحت منه وطردني وهاوش زوجي وطردنا وكم مره عزمته وجهزت كل شي وماجاء
|
السلام عليكم
الأخت الفاضلة / ظلام نجد بداية نرحب بكِ عضوة جديدة بل أخت وسط أخواتها . و الله يعينك على ما بلاكِ . أختاه .. أستعينيِ بالصبر والصلاة . حاولي تراعي ظروف زوجك على قدر المستطاع وعليكٍ التحمل . وقبل كل شيء هو أن تعودي وتراضي والدك . نعم يجب أن ترضيه ربما ما أنت فيه من أحوال غير مستقرة هو لعدم راضى والدك عليكِ . اصلحي علاقتك معه بالسؤال الدائم عنه ولا تنسي إن هذا الرجل لم يتخلى عنكِ ولم يحرمك شيئاً وهو الذي أحتضنك من الصغر فهو أصبح لكِ بمثابة الأب والأم . والأهم من هذا كله جددي إيمانك مع الله وأقتربي أكثر وأكثر عسى الله أن يبدل الأحوال والقلوب في ليلة وضحها . وأسأل الله لكِ أن يصلح حالك ويوفقك لما يحب ويرضى ودمتِ في حفظ الله |
أبوي مايبيني أتزوج والدين يقول إذا جائكم من ترضون دينه وخلقه فزوجوه
|
الله يعينك يا اختي
بالنسبه لوالدك اتصلي واسالي عنه حتى لو طردك او سوى ماسوى اما بالنسبه لزوجك حاولي تتقربين منه وحاولي تتكلمين معه بالتي هي احسن شوفي وش يرضيه وقولي له هالكلام ((اللي يرضيك انا بسويه)) حاولي تعرفي وش سبب بعده عنك وضحي له انك انسانه كتومه وتحفظ الاسرار وانك شاريته لاخر لحظه واكثري من قراءة سورة البقره والاستغفار حاولي اذا كان نايم تقراين سورة البقره بجانبه بصوت منخفض جدا اقرائيها كامله والحي على الله بالدعاء في هذا الشهر الكريم |
اكثري الدعاء واللجوء الى الله
|
الله يفرج همك ويصلح حالك
ويصلح ما بينك وبين ابوك موفقه ان شاالله |
حياك الله غالييتي ظلام نجد
اعانك المولى وفرج همك ربما مابينك وزوجك حسد او سبب يجعله لايقترب منك اذ من غير المعقول سنه وزياده لم يلمسك وانتما زوجان في بيت واحد وان ضاقت عليك الجاي للواحد القهار وابتعدي عن وساوس الشيطان ا |
في هذا الشهر الكريم
حاولي باسرع وقت ان تستمحين من ابوك حتى وان كان ابوك يبين عليه انه ما يريد مصلحتك بس لانه له نظره في ذلك اني ما تشوفينها. قراءة سوره البقره في والمعوذتين عسى الله ان يخفف عليك مع الاكثار الاستغفار ان شاء الله ينفرج همك بعدين حاولي التقرب من زوجك وتتحدثي معه الين تتوضح الك لامور ان شاء الله يكون في ذلكخير |
أنا حاولت معه يا ناس سنه ونص وأنا لين ألحين مثل ما أنا لدرجه أني قلت له أنا لو أنحرف فأنا في ذمتك أنك ماعطيتني حقي الشرعي...
|
السلام عليكم ورحمة الله وبركاته
أسأل الله العظيم رب العرش العظيم ، أن يلهمك الصبر على الإبتلاء وأن تحل مشكلتك عاجلا غير آجل ...آمين أختي الكريمة : أبقولك كلام ، وأتمنى إنك تسمعينه زيين زيين أول شي : في مثل هذه المشاكل والإبتلائات اللي تصيب الإنسان ، مالكِ إلا إنك تدعين الله كثيييير وتلحين عليه خاصة بآخر الليل ، ولا تنسي إننا هالأيام برمضان شوفي يا أختي ، أنا جازم ومتيقن إنكِ إذا دعيتي الله بيستجيب دعوتكِ ، 100% مهو بس إنتي لحالكِ ، كل الناس ، والله سمى نفسه مجيب الدعاء ، لكن حنا ما علينا إلا إننا ندعي الله كثييير كثييير وهو راح يستجيب لنا بعدين شوفي ياأختي ، أنا لما قريت موضوعكِ رحمتكِ وتمنيت إن بيدي حل أدلك عليه ، أجل كيف لو قلتي هالكلام لله بشكل دعاء وتضرع ، هل تتوقعينه ما راح يرحمكِ أو ما راح يسعدك ( لا تنسي أن الله ارحم الراحمين) ثاني شي : أنصحك تروحين للمراكز الإجتماعية التي تعتني بحل المشكلات الإسرية ، وإذا ما تبين تروحين لهم كلميهم بالتلفون ، أنا أجزم إنهم راح يفيدونك فايدة كبيرة . أنا أذكر أني كلمتهم في مشكلة عندي ، وبصراحة عطوني لها أكثر من حل بعد ما تفاعلت معهم لأنهم متخصصين في حل المشاكل الأسرية ، وتذكري أنهم حلوا آلاف المشاكل الأسرية قبل ما تكلمينهم في النهاية : أسأل الله باسمه الأعظم الذي إذا دعي به أجاب ، وإذا استنصر به نصر ، وإذا سئل به أعطى ، أن تجدين حل لمشكلتك ، وأن يبدل الله غمك بسعادة |
اسأل الله العظيم الحي القيوم ان تنحل مشاكلك ويسخر لكي زوجك ووالدك
والله احزنني ماقرات لكن انصحكي بكثره الاستغفار بعد كل صلاة استغفري مئه مره والدعاء اكثري الدعاء وداومي على قراءة سورة البقره بأذن الله تنحل مشاكلك...... |
طبقي كلام الاخ زوج في المستقبل 0000وبعدين مافكرتي ليش انت بكر الى الان ودايم هواش000
لايكون بس فيك سحر ربط ليش ماتروحين لقراي |
اقول روحي عند ابوك وسلمي على يده وتاْسفيله باْذن الله رايح يحن عليك وتركي زوجك.
وخليك عند ابوك والرزق بيجيك بس لا تستعجلين وزوجك انسيه ما يستاهلك. |
اسئل الله العظيم رب العرش العظيم ان يفرج همك في هذى الشهر الكريم
|
اسئل الله العظيم رب العرش العظيم ان يفرج همك في هذى الشهر الكريم
|
اسأل الله ان يفرج همك
الزمي الاستغفار |
يا هلا ...
الله يعينك اختي على هذه المصيبه ... الاب و الزوج زعلانين و انت و سطهم .. بعض الازاج الله يهديهم ياخذون بنات الناس و يبهذلونهم .. كأنهم عبيد عندهم .. ما يخافون الله .. اختي زوجك عنده عجز جنسي او ضعف اللي لحد الان ما لمسك ؟؟ او عنده حاله نفسيه مأثره عليه ؟؟ اختي ما لك اي اتصال بامك ؟؟ اما عن ابوك فحاولي اختي و لا تيأسي حتى لو طردك مره و اثنين و عشر .. ما عندك اعمام او خوال .. كأنك مقطوعه من شجره .. يا ابوك او لا يوجد احد ؟؟!!! ربي يفرج همك .. طمنينا عن اخبارك .. |
الله يفرج همك أأأأأأأأأأأأأأأأأأأأأأمين
|
عليكي بسهام الليل (((الدعاء)))
|
اقتباس:
اعتقد ان ابوك كان له وجهة نظر لم يبينها لك أو لم تستطيعي فهمها منه لا الومك على شيء ولكن اوصيك بالصبر والصلاة والدعاء لأبيك بظهر الغيب أن يحن عليك ولزوجك أن يشفيه الله ويهدي سره |
اسئل الله العظيم رب العرش العظيم ان يفرج همك في هذى الشهر الكريم
|
الله يفرج همك
أختي اسمحي لي أن أقول لك ممكن صار معك هذا لأن عصيت والدك حاولي تصلحي والدك لأنه مو لازم تنقطعي عنه حاولي تصالحيه و خليه يتدخل و يساعدك الله ولي التوفيق |
ابوك اتصالحي معاه
و زوجك اساليه و اتكلمي معاه بصراحه قولله انت ليش تعاملني كذا ؟ انا منقصه عليك بشيء ؟ المهم تكلميه بصراحه الله يفرج همك |
أختي ظلام نجد
الله يكون في عونك أنصحك بالدعاء في آخر الليل خاصة |
السلام عليكم ورحمة الله وبركاته
أسأل الله العظيم أن يفرج همك ويزيل كربك اسمعي حبيبتي هذا الشهر فضيل وربنا دايم الدوم كريم في هذا الشهر او غيره لكن فضائل هذا الشهر زايده عن كل الشهور انتي الآن مالك أحد غير الله إلجأي له واشكي له همك وحالك وكل الكلام اللي كتبتيه هنا اشكي لرب البشر وهو أعلم بحالك صلي واكثري من الدعاء والاستغفار قولي يالله يارب ياسميع يامجيب صلي ركعتين آخر الليل فسهام الليل لا تخطيء أبداً إرقي نفسك وزوجك بالرقية الشرعية إذا كنتِ من سكان المملكة على وجه الخصوص الغربية أكثري من شرب الزمزم بنية إصلاح حالك وغيرة زوجك عليه دليل حبه لك لكن اكسري انتي بذكائك الشك اللي في نفسه حاولي ترجعي لابوك وتتوددي له روحي له حتى لو صدك مرة واثنين وثلاثه هذا ابوك ومالك غناة عنه اهلك سلمي عليه بوسي راسه ويدينه بشوق وطمنيه عليك وعلى حالك وصحتك وشو عرفك يمكن كل اللي انتِ فيه بسبب غضب أبوك عليك ومجرد ماتصلحي علاقتك مع الوالد إن شاء الله ربنا يصلح الحال مع زوجك الله يسهل أمورك ويصلح حالك ويهدي سرك اللهم آمين |
فديت قلبج الله يعينج على ماابتلاج
..... اختي .. اصبري ان الله مع الصابرين وغيري اسلوبج معاه .... وحاولي تتقربين من امه او احدى خواته وتخلينها تنصحه من بعيد لبعيد عشان نايحس انج انتي اللي مطرشته واكثري من الدعاء والاستغفااااااااااااااااااااااااااااااااااااااار وتاكدي ان ربج يريد يختبر مدى صبرج وتؤجرين عامليه بدبلوماسيه ان قال لج شي قولي له حاضر من عيوني ... حتى لو مايستاهل ان طلب اي شي اركضي ونفذيه طلباته ان اراد شيئا جهزيه على اكمل وجه وسترين النتيجه شخصية زوجك ليست من النوع التي تاتي مع التحدي والرفض انما بالدبلوماسيه والله يوفقج ولاتنصحينه ترى زوجج يشوفج ضعيفه في نظره ولن يهتم لكلامك قوي شخصيتك وبنفس الوقت اتركي له المجال ليعجب بك اهتمي باناقتك وبثقافتك وببيتك وسترين الفرق بعدهاااا والله يهنيج |
الثلث الاخير
عليك أختي بالثلث الأخير من الليل اكثري من الدعاء
|
أنا ماعصيت أبوي أنا شفت الأصلح لي أنا أبوي دائما مسافر وبعيد وما يبيني أتزوج قبل بنت عمتي أللي أكبر مني وأللي رفضت أخوها يوم خطبني...
أما بالنسبه لعماتي فكانت وحده من عماتي خاطبتني لولدها ويوم رفضته قلبت علي وقلبت علي عماتي الباقيات... وعماني كل واحد يقول أنا يالله أحل مشاكل عيالي.. أمي بعد طلاقها صارت تشوفني بنت طليقها وماتواطني في عيشت ربي وخوالي وخالاتي متضامنين معها مع أني ماعشت معها.. أنا صح من عائله كبيره بالرياض بس عائله متفككه أمي متزوجه وعايشه حياتها وأبوي دائما خارج التغطيه وأنا ضايعه ويوم قلت بدت الدنيا تضحك يوم أنخطبت طلعت الدنيا سودا تخيولوا وربي أنه من 4 أيام وزوجي مايكلمني وإذا كلمني قعد يصارخ علي والله إني حتى إذا مرضت مايرحمني ولا يوديني المستشفى والله واللي رفع سبع ونزل سبع أني قبل أسبوع فجأه أختنقت وكأنه الموت خاني قمت على مغاسل الحمامات ألله يكرمكم كانت أقرب شي عندي أحاول أشرب مويه منها وماقدرت أتنفس رفعت راسي شفت وجهي أزرق وعيوني جاحضه رحت أزحف لغرفته تخيلوا كان قاعد على السرير ويسمعني وساكت يوم دخلت أللي سواه ضربني على ظهري وجاب لي البخاخ والله أني لين اليوم مافيه صوت بحلقي من كثر ماتجرح قعدت أبكي بغرفتي أقول لهدرجه لو أموت مافيه أحد بيحس فيني .... |
لا وبعد أول ماتزوجنا قعدنا شهر ماسافرنا لا شهر عسل ولا شهر بصل علما أنه كان في إجازه هو ويوم ترجيته نسافر شهر عسل سافرنا 4 أيام ورجعنا أخوه كان متزوج قبلنا بأسبوع وماشاء الله سافروا شهر العسل أول ماتزوجوا يوم قلت لجدتي قالت يابنيتي حتى زينك مارحمك ...
|
وبالنسبه لمسأله المراكز الإجتماعيه أنا كلمت دكتوره وقالت لازم نقعد مع زوجك ونقعد معك قلت له أنا أبي أروح قال لي مافيك شي ليش أنتي مهبوله وش تبين الناس يقولون عني ورفض حتى النقاش بالموضوع
|
الله يعينك ياقلبي ولاتحرقين وجهك ياقلبي مافي احد يستاهل
|
استعينى بالصبر وعليك الذهاب لمصالحة ابيكى.
الله معاكى |
الله يجزاكم خير
تصدقون أني مع كل أللي يصير لي أحبه وأرحمه والله أني أحيانا إذا ناظرت ثوبه وأنا قاعده أغسله أوأكويه أضمه وأقعد أبكي.. |
اختي عليك في الصبر والدنيا كلها زايلة ولاتسوى عندالله جناح بعوضة هل سمعتي بمن قال لرسول الله انت رسول الله تنام على الحصير وقيصر وكسرى ينامون على الديباج فقال اما ترضا ان لهم الدنيا ولنا الاخرة خلي بالك في الجنة لافيها سقم ولاهم ولا0000ويبدل الله لك زوج في الجنة \\الله يفرج همك
|
اختي الفاضلة
السلام عليكم ورحمة الله اولا اسال الله ان يفرج همك , ويهدئ سرك مع زوجك , وينيلك رضى والدك الذي هو الباب الى رضى الله عز وجل اختي ارجو ان تكوني قوية في مواجهة هذه المشكلة , وان تستمعي النصائح الموجهة اليك بعقلك لا بقلبك وان تتخذي منها ما له شأن في اصلاح حالك واحوالك , اختي الفاضلة هذا الموضوع لا يحتاج الى عواطف ومثاليات , انما هي مشكلة اسال الله ان يعينك على حلها لا شك انك تعترفي بارتكابك خطا عندما تزوجتي شخصا صارفة النظر عن قبول والدك لك اود ان اسالك سؤال وهو : كيف عرفت ان والدك لا يريد تزويجك؟ اختي الفاضلة لا يوجد والد يكره الستر والاستقرار لوالده يجب يجب يجب عليك اصلاح حالك مع والدك هذه بداية الطريق لكي تحلي مشكلتك ويجب ان يعينك زوجك ال1ي تحديتي والدك من اجله ان تنالي رضى والدك وان يبادر هو ايضا لكي يرضي والدك اعتقد انك متوكلة على الله في مشكلتك ومن شروط التوكل ان تاخذي بالاسباب لا تياسي من رحمة الله وادعيه خصوصا في هذه الايام الفضيلة ارفعي اكف التضرع الى الله تعالى ولا تقنطي الحي عليه بالدعاء وبالرجاء حتى ترين استجابته في عينك فان الله يحب ان يرى الحاح عبده بالطلب قفي مع نفسك قبل الدعاء واسالي نفسك ماذا قدمت لله .؟ هل انا ملتزمة بفرائضه؟ هل انا ملتزمة بالسنن وبقيام الليل وبقراءة القران ؟ اختي الفاضلة استعيني بالصبر والصلاة ولا تترددي باصلاح حالك مع والدك حتى لو طردك او شتمك او ضربك اصبري حتى تكبري في عينه وترجع مكانتك في قلبه كما كانت ولا تترددي بعد ذلك في ان يطلب منك المساعدة اعراض زوجك عنك لا يوجد له اي عذر انت عذراء واحمدي الله انك ما زلت عذراء فقد اعطاك فرصة لتقرري البقاء او الذهاب وتكون خسارتك بسيطة باذن الله حاولي وحاولي مع زوجك ولا تنسي الدعاء اسال الله لك التوفيق والعفاف والستر تقبلي فائق احترامي اخوك |
كيف عرفت ان والدك لا يريد تزويجك؟
أبوي لمن أصريت على موقفي قعد بجنبي وقام يصارخ يقول لي ليش تبين تتزوجين أنا ماقصرت معك بشي أنا حاط كل شي تحت حسابك ليش تبين تتزوجين واحد يذلك ويهينك أنا رجال وأعرف الرجال وش يسوون كان يقول إذا تبين تتزوجين تتزوجين ولد عمتك لأن شخصيته ضعيفه ويقول أنتي أللي بتشكلينه على يدك وتمشينه مو هو اللي يمشيك وانا ماأحب ولد عمتي لأن رخمه أبوي لمن تملكت على زوجي راح وركب قاطع إرسال في البيت عشان ما أقدر أكلمه .. أبوي الله يهديك عايش دنيته ومايدري عني بشي حتى مصروفي يجيني بتحويل... |
كلامك ياصاحب الظل الطويل أثر فيني وبكاني بس أمنتك بالله الذي لا إلا إلا هو هل أنا غلطت لمن فكرت أصون نفسي وما مشيت مشي البنات الحين وقلت أتزوج وأستر نفسي أنا صح عمري على مشارف 19 لكن الدنيا علمتني أشياء كثيره والله يستر من الجاي..
|
| الساعة الآن 10:24 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©