|
زوجي طفشني وقررت ازعل وش رايكم؟
السلام عليكم ورحمه الله وبركاته
زوجي الله يهديه في صفات زينه وفيه صفات سيئه وصفاته الزينه تطغى على السيئه بس انا تعبت ولا قدرت اتحمل وقررت اني اروح بكره لاهلي وازعل عندهم والاسباب هي كالتالي. من سنتين اطلب منه يغير غرفه النوم وهو راضي بس يقول اصبري مع العلم ان راتبه 13 الف هو عنده محل ومديون بس ما يسدد الدين من راتبه يسدد من مبيعات المحل ثاني شي ساكنين في بيت ملك ماعنده عذر السنه هذي كنا بنسافر والتذاكر بمبلغ 15 الف وكان متحمس للسفره بس انا رفضت لان زواج ولد اختي في الاجازه وما اقدر اسافر شفتو يعني يدفع 15 الف لسفره بس مايدفع 10 الاف على غرفه نوم! المهم لما زهقت من سنه عطيت امي غرفه النوم قلت عشان يتحمس ويشتري غرفه هو كان راضي ويقول ان شاء الله تعجب امك الغرفه وهو الي حملها لهم وعطاها امي تخيلو من سنه نايمين على فرش على الارض والسبب كل يوم بكره بعدين مو الحين!! حتى غرفه ولدي انا شريتها وهو مايدري ولما شافها انبسط وعجبته بس لما كنت اقوله خلنا نروح نشتري غرفه للولد يقول ماله داعي تو الولد صغير وش غرفه وش خرابيط الحين ولدي عنده غرفه وانا لا!! من تسع شهور شلت الموكيت حق غرفه الجلسه ونقلت الجلسه في غرفه النوم لانها سيراميك وفاااااضيه وحطيت الموكيت في غرفه في السطح غرفه الغسيل وارتحت كثير لما رتبت غرفه الغسيل تخيلون من تسع شعور وانا اطلب منه يشتري موكيت جديد للجلسه وكل يوم بكره والحين البيت حوسه الجلسه فاضيه ومغبره وغرفه النوم فيها الجلسه ولا عنده نيه يشتري غرفه وكل يوم اقوله اشتر موكيت للجلسه قبل رمضان عشان اهلي بيجون يفطرون عندي واكيد اخوانك بيجون لان اخوانه كثير يجون في رمضان وابي بيتي يترتب وهو يقول طيب مايقول لا يقول طيب من تسع شهور يقول طيب ولا شفت شي المشكله سافرت انا وامي واخواتي في العطله للشرقيه وحجز لنا بفلوسه 6 الاف ريال غير الفلوس الي عطاني للسفر ويشتري كل شي من الغالي الا البيت مايحب يسوي فيه شي الا مره ما اظلمه عجبني مره كنب في محل صديقه وكل مارحت للمحل شفته ودايما اقوله ان الكنب هذا يجنن مره سوا لي مفاجئه وجابه للبيت وانا ما ادري و موكيت بسعر 600 ريال مستخسرها مدري ليه انا محتاره ليه يسوي كذا؟ وهذا السبب خلاني اتسلف من اخواتي واهلي عشان احط غرفه لولدي صارت علي ديون من سبايبه لاني كل ماقلت بنحط شي في البيت قال وشوله ماله داعي خرابيط الحين معي فلوس وودي اسدد لو جزء من ديوني بس افكر اني اروح اشتري موكيت للجلسه بس اخاف يتعود لان كل شي انا الي اسويه كنب الصاله انا سحبت منه فلوس وهو مسافر وشريته وسكت لاني كنت زعلانه من سفرته وغرفه ولدي انا الي شريتها ودايما اروح ادور غرفه نوم انا لحالي مايروح معي ودي مره يشاركني في شي لو بسيط حتى اغراض رمضان يقول ليه ماله داعي اي شي ينقصك اتصلي على البقاله واطلبي على الحساب واللحم انا بشتريه كل شي عنده خرااابيط مافي اي مشاركه بيننا تعبت وكل ما اروح لسوق واشوف وحده هي وزوجها يضيق صدري واقول الله يخلف علي انا الي يقهرني احيانا يصرف مبالغ كبيره على اشياء تافهه وعادي عنده هو ماتهمه الفلوس كريم حتى مع اهلي مايقصر بس مدري وش قصته حيرني الحين ماعاد ابي غرفه ولا موكيت كثر ما ودي اعرف ليه الى الان ماشرا غرفه وموكيت وش السبب؟؟ لازم اذا بغيت شي اطلب منه واجلس اترجاه فتره تعبت الحين اقوله راتبك زين ماشاء الله عطني مصروف 1500 اسدد ديوني واشتري الي ابغى وماعليك مني واذا طلبت منك شي بعدها لا تعطيني هو مايقصر يعطيني فلوس بس انا ما اعرف اجمع وكم مره اخذت منه وقلت متسلفه من هذي وما خذه من هذي ويعطيني بس يقول انتي ديونك ما تخلص والله كله منه ابي ازين بيتي وهو كل شي عنده مو لازم وخرابيط عشان كذا انا قررت ازعل ابيه يشوف الحريم ترا مافي احد مثل طيبه وساكته ونايمه لي سنه على الارض تكسرت جنوبي وهو الله مغنيه الي قاهرني انه كريم وماتهمه الفلوس بس ليه يسوي كذا وش رايكم تكفون شوفولي حل معه ترا زوجي طيب بمدحه شوي لكم عشان ما اكون ظالمته يخليني اروح للي ابغى مايمنعني من شي سدد مره فاتوره لاهلي من النت وصارت كل ما تطلع الفواتير تجيه وكم مره يسددها وماياخذ منهم فلوس وقدم شغاله لاهلي على حسابه عشان امي كبيره ويقول حرام خلها تساعدها البنات عندهم مدارس وامك كبيره وحتى صار فتره يعطيها الراتب بس في الاخر امي حلفت انه مايدفع اطبخ والا ما اطبخ مايهمه يقول اي شي من يدك حلو مايعصب ولا يعلي صوته علي دايما يقولي يا بعد عمري ودايما يطلب مني اجلس بجنبه ويمسك ايدي ويبوسها حتى اذا كان يشوف التلفزيون ما عمره انتقد اي شي مو مرتب في البيت حتى لو مايلاقي ملابس نظيفه مايعصب واذا شافني ارتب يقول ليه تتعبين نفسك بس انا اقول لازم يعاملني كذا لاني ساكته وطيبه ونايمه على الارض من سنه ونص ولا قلت شي ودي زوجي يتغير للاحسن يشاركني في البيت يحترم طلباتي ويعطيني مصروف عشان يفتك مني ولا عاد اطلب منه شي وش رايكم وش اسوي ؟؟؟ |
كل هذي الصفات الحلوه وتريدين تزعلين عند أهلك؟؟؟
يا شيخه....والله اني أشوف ان حسناته غطت على عيوبه ... روحي معاه مشوار مثلا ..ومري على محلات الأثاث...وقوليله خلينا بس نشوف.. ولما تدخلي علقي على الغرفه اللي تعجبك..وحاولي تقنعينه...وإذا عندك ألحين فلوس... ادفعي انت عربون مثلا والباقي دبسيه فيه...وان شاء الله ما يقصر أو مثلا تحججي انك تعبانه من النوم على الأرض...بس اسمحيلي انت تسرعتي لما عطيتي امك غرفة النوم قبل ما تشترين غيرها...وهل هذا التصرف كان راضي عنه زوجك...يمكن هو غير راضي في نفسه قوليله..ايش رايك أرجع آخذ غرفتي من عند أمي يمكن انت ما كنت راضي ..من باب الدعابه فقط.. علشان كذا انت ماشريتلي غرفه.. وشوفي ايش ردة فعله... كثير من الزوجات معهم أزواجهم كذا الدفع صعب ويقولون ليه الخساير..فدبروا أنفسهم بجمعيات مثلا واستلموا ..ورتبوا أمورهم.... |
بعد كل هالمدح في زوجك .. وصفاته الحلوه .. الله يخليه لك ويحميكم من العين .. تبغين تزعلين ببيت اهلك ؟؟؟ اكيد غلطانه اختي العروس ولا عندك حق .. ما يستاهل زوجك .. حرام عزيزتي .. ليش تبغين تغيرين غرفة النوم ؟؟ يعني يمكن زوجك يشوف انها جديدة ومالها داعي للتغيير .. انتي تعملين ؟؟ يعني لك راتبك ؟؟ إذا جوابك لأ .. يعني كل مشترياتك ومصاريفك من خيره هو .. اقتباس:
فكري عزيزتي .. يمكن تكونين ذات طلبات كثيره .. يمكن تكونين محبه للتغيير وخاصة في اثاث البيت .. وهو يشوف ان الاثاث توه جديد وما يستحق التبديل .. هذا زوجك تخلينه بعيونك وتسكرين عليها .. انتي تقعدين معاه لمن يناديك وهو مشاهد التلفزيون ويقبل يدينك وتقولين له .. يا زوجي يا حبيبي ياللي ما منك اثنين .. انا ابغي " تمشيلي مصروف كل شهر .. هو اكيد ما راح يقصر .." الله يخليكم لبعض .. لا تخربين بيتك بيدك .. |
لاتدورى لنفسك الزعل وعيشى معاه على البلاطه دام انه يحبك وشاريكى
غيرك يدور راحة البال وانت تدورى الزعل |
ماشاء الله تبارك الرحمن لا حول ولاقوة الا بالله ..
أقوول ورى ماتسكتين الله يهديك ههههههه :25: ............................. على العموم الله يهنيك ولا تشيلين هم أبتعدي عن الزعل أيضاً :29: الإشراف/ يمنع طرح الأسئلة الشخصية بارك الله فيك .. |
تفوه تفووه تفوووه <<<اتفل عليك عليك علشان لا احسدك
اعيذك بكلمات الله التامه من كل شيطان وهامه ومن كل عين لامه اختي انتي في نعمه كبيره احمدي ربك ليل نهار زوجك تتمناه الف بنت الله يخليه لك وحدك ومايطالع غيرك انصحك ثاني مره لاتكتبين صفاته الحلوه كلها في نساء محرومات يمكن يحسدونك انتبهي |
والله بصراحة مادري امك شلون تستقبلك في بيتها بعد معاملته هذه لهم بصراحة زوجك ينحط فوق الراس وحرام عليك تزعلي و انت بصراحة شكلك مو مضبطة امورك المادية مدام يعطيك فلوس وبدل السفرات الي ب 6 الف اجمعيهم وروحي انت اشتري لبيتك وحلي المشكلة
اذاا كان حبيبك عسل لا تأكله كله وما في احد 100% زين |
يا هلا ..
لست الوحيده التي تعاني من طبع زوجها .. اذا كنت تعتقدين ان الزعل راح يجيب نتيجه مع زوجك ... اوكي زعلي .. بس اوعي تتركين البيت .. اوعي يا اختي اوعي .. زعلي بس ظلي في بيتك .. بعض الازواج يحتاجون هزه قويه شوي عشان يوتعي و يلبي طلبك لكن ترك البيت مو هو الحل .. وربي يسعدك ... طمنينا اختي عن تطورات الوضع معك .. |
أكيد اختي مالج حق تزعلين ابدا بعد كل هالمدح لريلج واضح جداً انه انسان طيب وكريم ما شاء الله عليه ولكن يبدو انه ينقصك الأسلوب في نيل ما تريدين وين سلاحك الأنثوي في مثل هذه الحالات فمن الواضح انه يحبك ولا يقصر مع اهلك فكيف سيكون معكي؟؟!! ما عليك سوى ان تأتي له بأسلوب الدلع والمسايره كأن تقولي له ايرضيك ان يتكسر ظهري من النوم على الأرض وبأسلوب ناعم وحلو ولو ما نفعت كل وسائل الدلع عند أول الشهر أحضري له محفظته وقولي له ياللا حبيبي خلنا نسير نشتري غرفة النوم
لكن اهم شي لا تزعلين عند هلج ترى الريال ما شاء الله عليه موب مقصر بشي |
حبيبتي العروس ماله داعي تزعلين وتكبرين السالفه انا بعطيج خطة وبتكون برضا الطرفين .. مو انت قلتي لما شريتي غرفه الولد هو فرح مع العلم انك لم طلبتي منه قال خرابيط .. خلاص انتي اطلبي منه فلوس ولا تقولين له ليش يعني اذا كان لازم تقولين طلعيلج اي شي ولم يصير عندج مبلغ غرفه النوم روحي واشتري الغرفه وفاجئيه فيها وكذا تكونين ضربتي عصفورين بحجر الفلوس منه والمفاجاه له :) ونفس الشي مع الموكيت وغرفه الجلوس واي شي تبين تسوينه مدام هو ما يقصر معاك بس مشكلته ما يشارك فهذا شي عادي حتى انا زوجي ما يشارك يعطيني فلوس ويقول سوي كل شي بكبفك وانا ابتلش ادور اثاث واغير كل شي بروحي وهو بس يجي ويشوف كل شي جاهز مع العلم ان انا ما ادل شي في بلد زوجي لان انا من بلد ثاني فبالشه اخت زوجي مسكينه تروح وتجي معاي لان زوجي مايبي يروح ماله خلق .. فنصيحه لا تكبرين الموضوع وقوليلي شنو بصير معاك .. واسفه على الاطاله
|
نفس مشكلتي مع زوجي
|
اختي اذا زعلتي ورحتي لبيت اهلك يمكن ترجعين وتحصلي عروسة في بيتك !!!!!
لان زوجك الله يحفظه ويخليه لك لقطة وراتبه زين ماشاء الله تبارك الله !! ترا الشبابا الان رواتبهم ماتتعدا 3000 ريال وعايشين وزوجاتهم شايلينهم على روسهم !!!!! ولايتشكون مثلك !!!! وزوجك مو امقصر معك ابدا !!!! اختي اسمعي نصيحة اخوك حافظي على زوجك وخليه بعيونك !!!! |
قــال النبي صلى الله عليه وسلم (( لا ينظر الله تبارك وتعالى إلى امرأة لا تشكر زوجــها ، وهي لا
تستغني عنه )) رواه النسائي وصححه الحاكم والله يا أختي مثلك لن تعرف قيمة زوجها الا بعد ان تذوق مرارة الفراق , عندها تعرف قيمته لكن لا غرابة فأنتن كفيرات العشير , ما رأت منك خيرا قط .. لو كنت مكان زوجك ما تقعدين عندي لحظة , لأنه اذا غارت على زوجك نوائب الدهر , وفلس لا قدر الله , فأكيد تتخلين عنه .. |
أول مرة اشوف وحده تفكر انها تقرر إنها تزعل:d |
يا اختي انتي بتعترفي انه كريم اولا سددي اي دين عليكي الاول ولا تعودي نفسك تستلفي لاشياء ممكن تنجاب في وسع زوجك من النوع الي بيحب هو يعمل من غير ما تقولي له وممكن تجنبي شيء للتوفير من الي ممكن تطلبيه منه مدام موش بيمانع وتشتري الغرفه وبرده من ماله هو ربنا يهديكي احمدي ربنا علي النعمه الي انتي فيها يهدنا ربنا
|
ياحبكم للتزعل ههههههه
اختي باختصار زوجك عجاز بس يعني يعتبر بعض المشاوير الي ماهو مقتنع فيه يعتبرها ثقيله طيب جربي قولي عطني فلوس وبروح انا واهلي وبشتري وبشتري وتاكدي انه راح يعطيك يعني هو ماهمه كم بيدفع هو همه كيف بيروح علشان يدفع تحياني |
ياعزيزتي...انتي في نعمه..اقول امسكي في زوجك..بصمغ..
معاملته..طيبه..معك..ومن طيبه..مع اهللك..كمان.. الله يحفظك من كل شي.. ودك..زوجك..يحس..ماراح..يحس خلالالالالالالالالالالالالاص تعود.. انتي من سنتين.. وانا من اربع سنوات..وغرفتي..ب3لاثه الالاف..ومو الغرفه اللي كنت احلم فيها ايام الزواج والحين فيها..دولاب متكسر..و واتمنى يغيرها..وراتبه..قريب من راتب زوجك..بس عليه دين.. ومع ذلك..عايشه..ربي..لك الحمدولئن شكرتم لازيدنكم.. وصابره..لعل الله يفرجها.. ..والله يهنيني..بزوجي..وانتي..وجميع بنات المسلمين |
[SIZE="5"][COLOR="Blue"]عجبني العنوان كثيررررررررررر..............زوجي طفشني وقررت ازعل وش رايكم؟؟؟؟
راينا نقولك ازعلي ونشد على يدك. والله ياختي الكريمه مدري وش خليتي للاطفال اللي عمرهم سنتين !!!! والله احترنا كيف نرضيكم....... ........................... الإشراف/ أخي الفاضل أرجو أن تكون ردودك بعيدة عن التجريح بارك الله فيك .. |
حرام عليك والله الرجال مو مقصر انتي خذي منه الفلوس وعلى طول روحي جيبي غرفة نوم زي ماجبتي غرفة ولدك عادي يمكن يكون مشغول لاتكبري الموضوع يكفي انه كريم معاك وهذه احسن صفة بالرجال ترى زوجك يحبك ماشاء الله والله يوفقك
|
الله يعطيكم العافيه على الردود الحلوه والردود القاسيه
الي ابيكم تعرفونه اني انا ماعمري زعلت منه وحاطته بعيوني في اشياء كبيره حصلت بينا ورغم هذا سامحته ولا فكرت ازعل عند اهلي بس المشكله هي اني مليت من بروده ويمكن مثل ماقال البعض زوجي عجاز نعم هو تقريبا عجاز بس شي في الشغل يروح مليون مشوار ولا يتعب الا لما اطلب منه انا اني اروح اشتري غرفه او موكيت وانا متاكده ان اهلي ماراح يوافقون على زعلي خاصه امي لانها تحبه كثير ودايما توصيني عليه بس انا زهقت علي ديون وزوجي بخير هو كريم نعم بس رافض انه يعطيني مصروف وانا اشوف ان المصروف هو الحل عشان اجمع واشتري الي في نفسي مليت وانا اطلب منه غرفه لي سنتين والموكيت من تسع شهور عجزان يشتريه وهو رافض فكره المصروف مع انها راح توفر عليه كثر ماراح اطلب منه اي شي لما يعطيني مصروف حاولت اقنعه بكل الطرق وعلى فكره انا مؤدبه معه في الكلام ولا اعلي صوتي علي دايم لما اطلب منه ادلعه باحلى الاسماء الي يحبها ولو يطلب مني ايش ما اقصر معاها بس مانفع معه اي اسلوب انا الي قاهرني ليه مايحب انه يشتري شي للبيت الا بطلعه الروح الله يهديه |
ههههههههههههههههه قصةحلوة اسمعي لا تتركي بيتك بس خليه يحس انك زعلانة منه
|
كأنك تكلمين عني بس موكل شي يتأخرفية للعلم راتبه 5الاف ومايبقى منهم الا الف ديون
بس مومقصر انا اذابغيت شي وماسواةاخلية يوديني ازور اهلي وانام عندهم ومارد عالجوال اقفلة يحس بنفسة ويرجعني بنفس اليوم ويسوي اللي ابية |
اولا لا تتركى بيتك
ثانيا يمكن هو اتعود على انه لا يشترى للبيت والمرء اسير عاداته ذى ماقالو الاخوه والاخوات ازعلى منه بحنيه وخدى منه مصروف وخدى معاه موقف لكن وانت فى بيتك يمكن اسلوبك الطيب زياده اعتقد منه ان الحجره غير مهمه لهذه الدرجه اظهرى حزنك بأدب وابكى له على موقفه من المصروف مادام يحبك ما هيتحمل دموعك |
اقول
روحي سوي لزوجج سحور حلو وادعي الله انه يخلي لج ولا يحرمج منه انا قلت الحين طاقج ولا زفج!! اثاري غرفة نوم!! الله يهديج بس هه |
الله يهديج ويصلح حالج ويريح بالج
|
الله يعطيكم العافيه ماقصرتو والله
بزعل في البيت وبشوف وش بيسوي واذا مانفع بروح بيت اهلي يمكن ينفع معاه |
اهااااااااااااااا ..
يعني انت لين الحين ما زعلتي ؟؟؟ هذا ان دل على شيئ يا اختي يدل على طيبة قلبك و طووولة بالك و هدوئك .. ورجاحة عقلك.. الله يسخّر لك زوجك و يلبي طلباتك .. انصحك لا تروحي بيت اهلك .. خلي الطابق مستوووور أميرات .. |
هههههههههههه زوجك بارد ويرفع الضغط
|
الحمد الله في احد مئيدني اي والله باااااااااااااااااااااااااارد ويرفع الضغط
|
زوجك شبه زوجي
تدري ايش اتبع معاه اسلوب لما يتعجز ... زي اليوم مثلا .. انا اعرفه بعد التراويح بيكون مشغوووول مره ولا اطلب منه شي كسبتها فرصه العصر وسويت الفطور بدري ولما صلى العصر جيته بجديه شوي وقلتله يالله انا اصلي الحين ونروح (كنت بافصل دواليب زياده للمطبخ ) هو طالع في باستغراب قلت ايوه الحين مافي مجال بعدين خخخخخخ وفعلا رحنا وخلصنا شغلنا وشكرته وهو كمان انبسط لأني ماعطلته عن شغله |
شكلي بسويها بس اخاف يقول انا الحين ابي ارتاح الاقي لي فرصه للراحه وانتي ماترحميني
|
ماشاء الله لاقوة الا بالله
كل ذا وتبين تزعلين وشخليتي لنا يا اختي هههه الله يهديك يالغاليه وسعي صدرك وبس الله يسخره لكم اختك بالله جينز |
ااااااااااااااااااااااااااااخ يالقهر
اسمعو وش صار رحت ازور اهلي ولما اتصل بيمر ياخذني قلت مانيب رايحه معك الا اذا فرشت الغرفه وعطيتني مصروف كل شهر هو ماعجبه الكلاموحاول يقنعني انه مو مقصر وانه مشغول وسكرنا وحنا ما اتفقنا |
يا هلا ..
هااا يالعروووس انت يعني الحين في يبت اهلك ؟؟ يا ويلي .. طمنينا عنك خيتو أميرات |
اسفه بكمل السالفه
اليوم الثاني اتصل وقال انه جاي يفطر عند اهلي وبياخذني وبنشتري الفرشه قلت طيب جى افطر وطلعنا من عند اهلي متاخرين وقال الحين مايمدي نمر مع ان فيه وقت قال بكره العصر قلت طيب مومشكله العصر كنت اجهز الفطور وهوماجاب طاري انا قلت ماراح اطلب منه هو وعدني نروح العصر لازم هو يقول يلا نروح ولا حياه لمن تنادي بعد صلاه العشاء قلت له يلا نروح نشتري الفرشه قال عندي امتحان في المعهد بكره العصر إن شاء الله نروح قلت طيب اليوم الثاني بعد صلاه العصر انسدح ورجعت لقيته نايم قلت حرام يمكن تعبان ماراح اصحيه بعد صلاه العشاء لبست وسويت له حلى لذيذ وعطيته ولبس بيطلع عنده شغل هو دايم عنده شغل قلت اروح معك قال لا قلت ليه انت تبي تجنني لازم يعني تذلني عشان فرشه حرام عليك ماصارت قال بكره العصر قلت بكره بروح نفطر عند اهلي ومايمدي المشوار طويل وانا ما ابي اشتري فرشه وانا مستعجله قال بيمدي ان شاء الله وماراح اشتري فرشه الا على ذوقك وماراح نستعجل عصبت دخلت لغرفه ولدي وهو راح والحين قلت اكتب اعلمكم وش اسوي معه جنني تو كلمته على الماسنجر قلت له ما عاد ابي فرشه استانس افرح مبروك ماراح ازعجك عقب اليوم قال يا بنت الحلال وش بتفرق اليوم عن بكره قلت له ما ابي وخلاص مليت وسكرت الماسنجر ااااخ والله قهر |
يعني كيف كانت رده فعله
ياخوفي يقلبها على راسك ويخلي السالفه تحدي |
اصبري اختتتي العروس
بس قوليله ان رجال وخليك عند كلمك بكره العصر يعني بكره العصر |
اقول احمدي ربك
مو مقصر معك وخلى الاسراف ياختى مو مقصر معك ومع اهلك وسفر ويعطيك بدون احساب ياحرررررررررررررررريم شوفو غيركم لاتكونون طمعات تبين كل شيء آآآآآآآآآآآآآ ةةةةة صدقين لو مكان زوجك تزعلين علشان هذا وربي ماسائل عنك المفروض تحطينا فوق راسك وين الرجال الى كذا اقوووووووووووووووووووووووول لاتزعلين زوجك ماتضمنى الحياة علشان شيء زي هذا وبرمضان بعد افضل |
والله انا حاطته فوق راسي ويكفي اني صابره على نومه الارض علشانه مع انه يقدر يجيب بدال الغرفه عشر
|
واذا نمتي في الارض ياقلبي مافيه شيء
نام على الارض افضل خلق الله انتى الى ارسالتى غرفتك الامك هو ماقصر شاري لك غرفه بالبدايه ياعمري شوفي غيرك الى يدخل عليه سكران الى يطقه الى مايصرف عليهم ولا يدري عنهم الى خاينه احمدي ربك بس كثر الشكر يزيد في النعمه |
| الساعة الآن 10:55 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©