|
عريس .. وزوجتي سريعة الغضب بدون اسباب .. اريد حلا ..
السلام عليكم ورحمة الله وبركاته ...
احيي جميع الاخوان و الاخوات في هذ المنتدى المبارك , واطلب منكم المشورة و الرأي في مشكلتي اللي هدت حيلي و طيرت النوم من عيني .. انا تزوجت قبل 3 شهور من احد قريباتي , بدأت المشكلة من ثاني يوم كلمتها فيها في فترة الملكة , مع اني ما اسمعها الا الكلام الحلو والطيب الا اني تفاجأت أن البنت تزعل و تغضب من دون أسباب أو على اسباب تافهه , و لما تزعل ترفض تتكلم او حتى تطالع فيني لما اكلمها ,وهذا يحسسني بالاهانة , والمشكلة ان هذا يتكرر يمكن بالاسبوع 5 او 6 مرات , نفسها شينة طول الوقت , واذا اصريت عليها تتكلم فانها تتكلم من دون ادب او احترام , قبل امس كانت كالعادة نفسها شينة , بعدين رحت اراضيها مع اني مااذكر اني اخطيت عليها , تفاجات انها بدال ماتفرح اني جاي اراضيها , رفعت صوتها علي وسبتني , وبين الكلام اللي قالتي لي "انت كذوب ! ". ويشهد الله اني ماقصرت معها بشي و مدللها وكل يوم موديها لاهلها ...المشكلة اني اذا شديت عليها على طول تزعل و ترفض تتكلم , وعندها قدرة عجيبة على كذا , حتى انها مرة ناقشتها بموضوع انها لازم تجلس بالبيت ولو حتى مرة او مرتين بالاسبوع , و لا اعجبها و قامت زعلت و جلست يومين ماتتكلم ,, انا اللي مضيق صدري قلة الاحترام اللي عندها , اضافة الى عدم الطاعة , اذا طلبت منها شلغة ولا اعجبتها تقوم ترفع صوتها وتوصفني باوصاف ماترضيني .. بسبب مزاجها هذا كل شي خرب ,, سافرت معها 3 مرات كل مرة تخرب السفرة بسبب زعلها المتكرر هذا ... كل نهاية اسبوع تسويلي مشكلة وتخرب اجازتي.... والمشكلة انها لما تسوي كذا و ازعل عليها انا ماتفكر تجي تراضيني ... فيه مشاكل ثانية بعد مضيقة صدري , مثلا حبها للسيطرة , تبغى تسوي اللي براسها والا بزعل ,,, ايضا عدم تقديرها و احترامها لاي شي يجي من عندي... البنت هي اصغر خواتها و كانت مدللله يمكن هذا احد الاسباب .... انا بصراحة كلمتها عن هالمشاكل و ماهي راضية تتغير , تقول اني انا السبب ... انا بصراحة مليت و تعبت نفسيا , حتى النوم ماني قادر انام زين بسبتها ووزني نقص من الهم ,,حياتي كانت كلها سعادة قبل الزواج و انقلبت من يوم عرفتها ..... مااخفيكم سر اني مااتصور نفسي اكمل باقي حياتي بها الشكل ... ودي تقولون لي رايكم .. والله يفرج همي و هم كل مسلم الإشراف : تم تعديل العنوان بما يتناسب مع النص .. |
السلام عليكم . . . أخي الكريم ... أنت تقول "بدأت المشكلة من ثاني يوم كلمتها فيها في فترة الملكه" يعني طبعها كان واضح بالنسبة لك هاي البنت إذا من أولها تصارخ وتعاتب وتزعل لأتفه الأسباب ... ليش كملت معها ؟!؟!؟ كيف كنت تحس اتجاهها في فترة الملكة وكملت معها لين تزوجتها ؟!؟!؟ . . . أمّا وإللي صار صار أنا أنصح بشغلتين رئيسيتين أولاً: انصحها ... يا بنت الحلال هذا الكلام كما يصير ... إذا كانت بتزعل من أقل مشكلة ... شو راح تعمل بكره !!!!!؟!؟!؟!؟ ثانياً: اهجرها ... بين لها إنك زعلان منها ومن حركاتها وانت مش راضي ون تطور الموضوع خبر أبوها يا أخي ... بنتك تعمل كذا وكذا . . . أسأل الله أن يفرج همك ويسعدك . . . نسأل الله العفو والعافية والله المستعان |
مشكور اخوي فلسطيني على الرد ... أما مسألة لماذا لم اتراجع في فترة الخطوبة ,,, فترة الخطوبة كانت مجرد 3 اسابيع , ولايمكن الحكم على اخلاق اي شخص من خلال فترة بسيطة , ولم اتوقع ان تتطور المشكلة الى هذا الحد ...
|
ياكثر البنات اللي من النوعيه هذي
............................... اسمي النوعيه هذي انا (المراة النكديه) لاانها دايم تكدر جو اللي معها الله يعينك ويصبرك وبصراحه مااعرف لها طريقه اول حل وان شاء الله يفيدونك الشباب اسيرها |
هذي ومع احترامي لها فاهمه الحياة الزوجيه خطأ تحسب بزعلها ونفسها السيئه بتمشي الحياة.. أول شي لاتعتذر منها الا اذا كنت غلطان واذا هي ماتكلمك بأحترام أزعل انت بس بدون كلام مجرد انك تلتفت عنها في الفراش بتموت قهر انو لسى عروس ومايتغزل فيني ويناظرني خلك كذا لين تجي لحد عندك وتعتذر عندها فهمها انك تحبها بس أسلوبها معك وعدم احترامها لك هوالي مضايقك..خلك واضح وصريح معها في كل الي ودك فيه والي بتبنون عليه حياتكم الزوجيه هذي عشرة سنين مو يوم او يومين بكره بيجيكم عيال الأحترام المتبادل بين الزوجين أساس نجاح أي علاقه فهمها اذا فيه شي مضايقك تعالي وتفاهمي بأسلوب موب تزعلين وتروحين وتستنيني اجي أراضيك..هاذي أخوي مبين ماعندها فهم كافي لمعنى الزواج صح أصبر عليها بس سو الي قلتلك عليه وان شاء الله كل أموركم بتكون كويسه بس نصيحه لاتخلي أحد يتدخل بينكم أبدآ حلو مشاكلكم بنفسكم,,وبالنسبه لأهلها تراك جالسه عنده طول عمرك مايضر لو حددتي لك كم يوم تروحين لهم وبيتك له حق عليك وانت أجلس معها في البيت خلها تحب بيتها ترى فقدة الأهل مهيب سهله وخاصتآ على قولتك هي آخر العنقود,,آسفه عالأطاله بس من جد أتمنى افيدك
|
حبيبي يقولون الفرس من خيالها ..
ما في امرأة تتجرأ على زوجها الا وهي عارفه أنه ماراح يقدر على عليها لو وجدت زوجتك من شخصية الرجل الصارم وحزمهم ما تجرات عليك .. وما في رجل يهين كرامته ورجولته الا بإذنه .. واضح انك لين حتى أتيت على كرامتك ورجولتك , فلا بد م الحزم في لين .. والا أصبحت ألعوبة في يدها .. اهجرها كم يوم ولا تعبرها .. وبين لها أنك ناوي فراقها .. واركد وارزن ترى الرجل اذا أحست المراة بضعفه أمامها أستهانت برجولته |
مع أني اشوف أن الأخ رادع متحامل على النساء في أغلب ردوده إلا أنه صدق في مسألة الهجر والصرامه..وإذا لم ترى القوامه منك الآن فستظل تعاني من تسلطها طوال حياتك الزوجيه..
أغلب بنات الوقت هذا مثل صفات زوجتك لهذا حسسها أن فراقها سهل عندك وأنه بأي لحظه ممكن تتركها وإذا زعلت اتركها ولا تراضيها حتى لو جلست شهر يعني اقلب السالفه وصير أنت اللي تزعل وراح تشوف أنها هي اللي تراضيك.. |
اخي شوف بداية الزواج اكيد يكون هناك شد وجذب
والظاهر انها من النوع المدلل لذا واجب الشدة معها شوية يعني اذا اخطات هي لا تروح تراضها ابداً الا إذا كنت انت اخطات عليها كي تتعود ان تعتذر وانصحك بأشرطة حول كيفية معاملة الزوج وطاعتة واحترامة اهديها لها اجلسو سوياً على النت واقرو مواضيع في هذا الصدد واقولك انة مع الايام بتتحسن خصوصاً لما يصير في اطفال يروح الدلع كلة |
اقتباس:
|
أخي الآن و قد تم الزواج أعتقد انك لا تملك إلا الصبر
عن أبي هريرة. قال: قال رسول الله صلى الله عليه وسلم: "لا يفرك مؤمن مؤمنة. إن كره منها خلقا رضي منها آخر" أو قال "غيره". [رواه مسلم]. |
مع اني متحيزة دائما لبنات جنسي الا انه هالمرة غير
ان زعلت وانت متأكد انه زعلها ماله مبرر خليها لتطق لا تحاكيها ولا تراضيها وكلامك يكون قليل اشرح لها أول انه هيك ما عاد بينطاق وكلام أخي رادع مع انه دائما متهجم على المرأ ة الا اني بوافقه ام وليد |
اذا رفعت صوتها عليك
لاتســــــــــــــــــكت ابداااااااااا ازعل عليها وخليها تعرف ان هالشي يضايقك وان اللي قدامها رجال لازم تادبها من هالناحيه لان القوامه لازم تصير بيد الرجال واذا صارت الحرمه ترفع صوتها مع احترامي وش بقى لك من القوامه؟؟؟؟؟؟ وترى زوجتك مثلها مثل كل البنات وكثير مثلها لكن شخصيه الرجال اللي قدامها هي اللي تحدد تستمر على هالطريقه او لا خلك لين ومرح في وقت انضباطها معاك لكن اذا خربت اخلاقها معاك لازم يصير لك موقف الله يوفقكم ويهدي زوجتك ويسخرها لك |
اقتباس:
أنا فتاة وأعرف أن رد رادع لن يعجب أي فتاه بل سيقولون هو لايقدر لكنني أتفق معه . . نكدها وأنانيتها وقلة مسؤليتها ليس سببه أنها آخر العنقود . . بل لها شخصية غريبة وجدت لديك متسعاً للمزيد من هذه الأنانية .. . . أنت بسكوتك المتواصل كأنما تبني برجاً برأسها حين يلامس الضباب لن ينهد سوى برأسك أنت .. . حين يقبل أي رجل بنكد متواصل دون رد رادع منه ستتمادى أي فتاة سواء أكانت عاقلة أو دون العقل . . ثم مالعيب أن تكون الفتاة مدلله من أهلها أو وحيدتهم بل هذا سبباً لمزيد من الدلال وليس للنكد وإلا لكنت أنا أكبر نكدية لا احد يشتري الشقاء أو يتزوج ليضيف لحساباته مسؤليات إضافية .. ثم تذكر الفتاة النكدية ستنكد على نفسها قبلك ثم يتواصل هذا الشيء للابناء والنتيجة عائلة نكدية أنت منبعها .. أعانك الله |
طنشها كم مرة........
ولاتسمع كلامها وتلبي طلباتها فترة طويلة لين ماتتعود.. هي يمكن متعودة على هالحال في بيت أهلها... سمعها أشرطة عن الحياة الزوجية.. وقلها لازم تكون فيه تضحيات بيناتكم.. الله يسر أمرك...........ويفرج همك......... |
بإختصار..
زوجتك ليست نكدية وليست قليلة ادب وليست عاصية انما هي (( مدللة زيادة عن اللزوم)) انت وجدت فيها التدليل وزدته دلالا بدل ان تغيره..والان حصدت النتيجة!! لاتتضايق مني يااخي لكنه الواقع.. الحل: 1- تجلس معها جلسة صراحة وتكون صارم وجاد.. وتخبرها بأن اسلوبها لايعجبك وانك تريد الاحترام والتقدير..ولتمتلك اعصابها.. 2- تعطيها 3 مرات فقط في الاسبوع تسمح فيها باحتمال عصبيتها وفي الاسبوع الثاني مرتين والاسبوع الثالث مرة والاسبوع الرابع ولامرة.. 3-اذا زعلت منك يوم يومين ..لتكلمها ولتكن قوي في هذا ..وابتعد عن البيت في فترة الزعل اقضي اغلب اوقاتك في بيت اهلك او مع صديق مقرب..حسسها انه لاقيمة لما هي تفعله هي..ستثور وستغضب لأنك لم تعاملها كالسابق..وستخبرك انك لاتحبها لكن ( اعطيها الأذن التي لاتسمع) ستجدها تدريجيا تجلس بينها وبين نفسها.. تفكر لما هي تهدم حياتها وستجدها هي من تسعى لرضاك.. هي الان مستغلة حبك لها في التمادي لكن مجرد ان تحس انه بدأ يتزحزح ..ستخاف.. والمسألة تحتاج وقت اقلا شهر لانها تربت على هذا الشيء والله يوفقك ويسعدك أختك حائزة |
انصحك بأن تهدي لها كتب في فن التعامل مع النـاس وكيفية كسب الآخرين
لعلها تتعلم ان (عصبيتها وزعلها) كلها اخطاء |
كثرة في الاونه الاخيرة المشاكل الزوجيه مع بداية الزواج ياترى ماهي المشكله عدم فهم الزوج او الزوجه للحياة الزوجيه انت الان في بداية الزواج وحصلت معك هذا المشكله وانا كذالك في بداية الزواج وحدثت معي مشكله ماهو هذا السبب؟؟؟؟؟؟؟؟؟؟؟؟ |
الله يعينك اخوي
الاخوان ما قصروووووا بس نصيحتي احزم معها ..صارحها بهدووووووء وإن احسست انها مستخفة بالموضوع اهجرها بالفراش..ولا تكلمها .. الله يعينك اهم شيء لا تبين لها انها كلما زعلت رحت راضيتها حتى لو كانت هي الغلطانة لآنها واضح رح تزعل مرارا وتكرار بغرض انك تجي تراضيها وتكون هي سيدة الموقف نصيحتي شد معها شوي ولا تكون طيب فوق اللزم اللي من هالنوعية يبغى لهم شوية شدة .. مع حكمة والله يهدي سركم |
وداوها بالتي كانت هي الداء!!!
|
صراحه هذه يبغالها تربيه من اول وجديد ... لان اللي ماتعرف قيمة زوجها ماتستاهل اصلا تكون زوجة
شوف ياخوي خلك حازم معها اذا غلطت ابدا ابدا ياخوي لاتتنازل لانها باين من النوع اللي مايقدر هالشيء خليها تتعلم تجيء وتعتذر بغلطها .. وبعدين ماله داعي كل يوم والثاني خارجه من بيتها .. ترى اذا ماعرفت تمشيها من الاول صح انت اللي بتتعب .. |
اقتباس:
كلامك عين العقل اخوي رادع ... |
اخوي
مفروض انت الي تشكّل حرمتك على كيفك من بداية زواجكم وتعطيها شروط وقوانين تلتزم فيها ايضا اوصيك انك ما تخنع وتروح تراضيها اذا هي كانت زعلانه من سبب تافه . يجب الحزم اخوي خاصة وانت في بداية زواجك واذا الامور فلتانه من هالحين اجل شلون بيكون حالك بعد الزواج والعيال ..؟؟ |
أشكر جميع من شارك برأيه حول المشكلة ...
ومؤخرا بديت اشد عليها شوي , ومثل ماقلتوا بدت تقولي "ليش انت متغير ومنت زي أول؟" ويكون جوابي لها "أنا ماتغيرت الا بسبب معاملتك لي وعدم راحتي منها" , بس المشكلة البنت عنيدة , تقوم وترد "طيب انت ماتشوف نفسك؟ يمكن انت السبب في اللي صاير" ..... المشكلة ان طبعها هذا مهو بس معي, و الا كانت سهلة , أغير تعاملي معها وتتعدل ..... تصوروا , تكلم امها بنفس الطريقة ,, |
يا سبحان الله ... نفس المشكلة معي ... زوجتي نكدية بشكل ما يتصور ...
المشكلة عندي منها طفل... والله العظيم يأست منها وكرهت حتى الحياة والله لو الواحد يموت افضل من عيشة مثل هذي.. والمصيبة أهلها حتى لو تشتكي لهم باردين... غير تتفضح عندهم ... وولدي مخليني عاجز عن اتخاذ اي شيء... ما لنا غير الصبر اخوي مع محاولة الإصلاح طول الدهر وإن شاء الله تجيب نتيجة. |
طيب .... ماتعتقدون ان زي هالمشكلة ممكن حلها بالذهاب الى عيادة نفسية؟ مع اعتقادي بصعوبة اقناعها بالذهاب الى هناك , بيكون ردها المتوقع "وش قصدك يعني؟! أنا مريضة؟! " ؟
|
شوف اخوي هذا النوع ما ينفع معاه الا التطنييييييييييييش
هي تعرف انها تؤذيك نفسيا بزعلها فلا تبين لها انك مهتم لزعلها وان زعلت بدون سبب اطلع وتونس مع ربعك ولما راح تحس انه مهما زعلت ما راح تراضيها بترجع لعقلها |
انصحك اخوي لاتمد يدك عليها مهما يصير انت ماللك غير 3 شهور زواج وتمد يدك عليها اجل بعدين اش بيصير وبعدين كل شي راح ينقلب ضدك
ترى تصرفها يمكن يكون غصب عنها انا اول زواجي مريت بهذه الحاله 5 شهور بس المساله نفسيه طول الوقت زعلانه مايعجبني شي بس الحمد لله الحين غير لانه اللي كان ماثر فيني انا رحت لمدينه جديده واهلي بمدينه كانت نفسيتي زفت كمان الحمل اثر والحين تعودت على الوضع بالعكس ماابغى اطلع من بيتي فيمكن هي فتره وترجع لحالتها الطبيعيه وتتعود على الوضع لاتستعجل عليها بس لو تطاولت عليك وماتاسفت طنشها ولاكانها موجوده والله يفرج همك |
لا الضرب حل ولا الطلاق حل واتقوا الله فيما تكتبون لو كنتم انتم لما ارتضيتم لأنفسكم ذلك!!
|
اقتباس:
آسفه اخوي زوجتك دلوعه و ما تحترم غيرها .. تحتاج الي حزم في المعامله .. و هذا الاسلوب يحتاج الي نفس طووويل ... لازم تصارحها بكل عيوبها في جلسه جديه و تخبرها بعواقب ذلك و انها راح تخرب بيتها بعماملتها معك و مع الناس .. وربي يسعدكم .. اميرات .. |
الله يعينك ...........
|
لوسمحتو ياأخوان لازم نحط هدفنا في المنتدى الأصلاح مو الأفساد,,الموضوع مولها الدرجه عشان نتحامل على البنت كذا ونزيد على المحتاار من أوتي الحكمه فقد أوتي خيرآ كثيرا...ربي في سورة الناس تعوذ من وسوسة شياطين الأنس والجن فيه ناس هدفها الهدم مو البناء,,الأخ المحتار هو أعلم الناس بطبيعة زوجته يحاول يفهمها ويتحاور معها ويستعين بربي وبلا ضرب بلا تفاهات
|
هل كانت سعيدة ليلة الزواج ؟
هل كانت سعيدة ليلة الملكة ؟ هل تزوجتك بإختيارها ؟ هل عندها سوابق حب وغيرها..........؟ |
يمكن انت مو من النوع اللي تحسس زوجتك بحبك لهاا وتعلقك فيهاا
او انت من غير ماتتقصد تتصرف تصرفات تزعلهاا ادرس زوجتك شووف وش يضاايقهاا اطلع معهاا مكان هادي ووصارحها وشوف وش تقولك ماافي حرمه نكديه من غير سبب صدقني لاتخسر زوجتك ... |
الحزم وبس
ولا تنتظر النتائج بسرعه يبيلها وقت عشان تفهم الدرس |
الله يعينك اخوي .. بصراحه زوجتك مره مدللــه
لازم احد من اهلها يدخلو بالموضوع دامك كلمتها وفهمتها ان مشاكلكم زادت .. كلم احد من اهلها وخليها يكلمها ويحنن قلبها عليك .. الله ييسر امرك |
فعلا أنت محتار وشقينا 00
حاول تكلم أبوها أو أخوها الكبير ويفهم البنت ولا راح تكون حياتها كلها شق وتعاسه اللع يعينك أخوي الكريم |
يعطيكم الف العافية على المشاركات والاهتمام اللي شفته منكم .... أكيد الضرب والشدة الزايدة ماراح يحل اي مشاكل ,,بالعكس راح يزيدها تعقيد وهذا والله ماهو اسلوبي في حل المشاكل , لأني متعود على احترام الكل صغير وكبير , علشان كذا اواجه مشاكل لما احاول اشد معها شوي . اول الحلول وافضلها اني لما اشوفها زعلانة من دون سبب ماالتفتلها نهائيا , بالعكس , راح يكون عقاب لها و هو اني راح اطلع و اخليها , و اذا سألت ليش , بقولها انك زعلانة و نفسك شينة من دون سبب وانا والله ابغى انبسط بوقتي و هذا اللي مااحصله معك لما تكونين بها الحالة ....
بالنسبة لمسألة انها تحبني والا لا ,, الحقيقية انها تحبني وتقدمني على كل شي في حياتها. مشكلتها في الاطباع الشينة اللي ذكرتها , وللمعلومية , تعاملها هذا ماهو بس معي , لا , حتى اهلها تعاملهم بنفس الطريقة. الرجاء من الجميع الاستمرار بالمشاركة , و ياليت اذا فيه احد مر بمثل هالتجربة يفيدنا بالحلول . |
كم عمركم ؟؟
شكلها للحين جاهل ومو مستوعبه فكرة انها زوجه ولها مسؤوليات وان طاعة الزوج واجبه وراي من راي الاخت حائرة الأمل كلامها عين العقل والله يوفقك اخوي ويهدي لك زوجتك .. |
عمرها 20 و انا عمري 29
|
أخي العزيز .... المحتار
المفروض أقرأ جميع الردود بعدها أرد أنا عشان لا يتكرر الكلام عليك... لكن معليش مرة مستعجل وان شاء الله بعدين أرد على الموضوع بس حبيت أقولك زوجتك والله أعلم صغيرة في العمر ويمكن بدأت تكون شخصيتها المستقلة وفي هذه المرحلة انت جيت وأتزوجتها فهي في مرحلة تذبذب .... تطيعك وتمشي ورى كلامك وأوامرك ولا تبني شخصيتها بنفسها يمكن هذا يصير أكثر للبنات اللي دخلوا الجامعات المهم في رأيي والله أعلم انتي قودها كون أقوى مما هي تتصور لا تكون لين ولا تكون غليظ لكن شد الحزم عليها .... خليها تبكي .... لا تراضيها سوي هذه الحركة لمدة أسبوع تقريبا ( بما انه زواجكم صار له شهور ) كون شدييييييييد عليها وبعدها لمن تنهار زوجتك تعال لها بأحلى هدية وابتسامة وكل كلام يحسسها انه انت تحبها وبتسوي هذه الأشياء عشان ما تبغى تخسرها....... اممم هذا اللي أحب أقوله ... وأتبع أفكارك واللي تشوفه مناسب الله ييسر لك وياريت تطمني عنك لاحقا الله يوفقكم مع السلامة :) |
| الساعة الآن 03:27 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©