|
خطيبتي وطلباتها (( هل الانفصال حل ؟؟ ))
السلام عليكم اعضاء الموقع ترددت كثير قبل ان اطرح هذا الموضوع لكن بصراحة يئست من حالي مع خطيبتي (معقود القران) اولا انا من اسرة عادية جدا والحمد لله لا ينقصنا شيء وخطيبتي ايضا المشكله اني اوجه مشاكل مع خطيبتي مدري هي بسبب صغر سنها عمرها اللحين (17) سنه أحبها اكثر من المعقول وتعلقنا في بعض كثير كانت تطلب مني اشياء عادية وانفذها لها بدون ما اتردد لكن بحكم ان زواجي قريب فصرت اصرف كل راتبي على تأثيث الشقة وتكاليف الزواج وطلباتها اللي اقدر عليها انفذها لها واللي اشوف انه مالها داعي بقولها اجليها بعدين ما افتكر اني شريت شي للشقه وقالت عليه حلو او مدحت فيه كل شي عندها مو حلو حتى قصر الافراح بحكم ان زميل لي عنده قاعه واعطاني هي بسعر مناسب هي رفضت تقول ابى القصر الفلاني وانا طبعا رافض هالفكرة لان فوق امكانياتي وقاعة زميلي تعتبر ممتازة وكبيرة وفي الاخير اتفقنا على قصر محدد وضغط على نفسي عشانها بعد ما نكدت علي وتزاعلنا تقولي (متى طلبت منك شي وسويته لي ؟؟) هذا السؤال يخليني اتجنن يعني معقوله كل اللي سويته لكي وفي الاخر ماسويت شي . - كمبيوتر وعطيتها - جوال وعطيتها - فلوس كل ماتطلب عاعطيها بس اذكر مرتين اللي رفضت - بطاقات شحن كل يومين تطلبها واعطيها بكل طيبه نفس لاني احبها - تماشي وخرجات لما نطلع مع اهلها ما اقصر معها في شي (رغم انها نادرة يمكن مرتين او ثلاث) - المكله واللي المفروض انها تكون على اهلها تحملتها انا وكل تكاليف تجهيزها اهلها ما تكلفوا بشيء حتى تكاليف الكوافيرا علي ان كان في الزواج او الملكة . - هدايا ومو مقصر معاها فيها وفي الاخر تقول لاختها (نفسي في يوم يجيبلي هديه عدله (يعني هدية حلوه) ) وهذا الكلام سمعته من اكثر من واحد مو منها وكنت اتمنى اسمعه منها . غير كذا تقولي انت ماتعطيني مصروفي ولا مو من حقي ؟؟ وتقول اذا منت قادر تصرف عليا قول يعني بعد هذا كله تقولين هالكلام ؟؟؟ غير كذا تحملت كثير من اهلها عشان خاطرها اهانات واسلوب زي وجههم لكن كل هذا ماثمر فيها اذكر في الملكة ما عطيتها طقم ذهب ماغير الدبل لان ماقدرت لان وقتها حفل الملكة كلفني كثير وغير كذا يوم شفتها عطيتها طقم صارت كل بين كل فترة وفترة تسألني عنه وتقول ( هذا حقي ومن حقي اسألك عنه ) واخر موقف معها امس كنت اكلمها عالتلفون وكانت اختها المتزوجه جنبها وعلى ما اعتقد ان زوجها كان حيجي ياخذها قالتلها خطيبتي (قوليله يجيبلي معاه (حلاوة .... ما اذكر اسمها ) انا سمعتها قالت كذا قلت مع السلامه بروح انام (الظاهر انها حست) والله حسيت الدنيا من جد ضاقت بي معقوله لها الدرجة ماتعرف تميز بين الصح والغلط غير اسلوبها احيان ترفع صوتها وتنافخ (لكن في الاخير صكيتها في وجهها ونبهتها) وحست بغلطها البنت حبوبه وقلبها طييييب لكن انا متأكد ابصم بالعشرة ان في حد وراها يمك (امها - زميلاتها) وهذا الشي يخليني افكر الف مره اني انفصل عنها لان اذا هي اللحين تفكيرها كذا كيف حيكون بعد الزواج حتكون تزعلني وتنكد علي على اي طلب تطلبه وما انفذه او ما اقدر عليه الواحد مايضمن ظروف الايام والزوجه اللي ماتقدر زوجها بيت ابوها اولى بيها ارجوا منكم المشورة والنصح لان من جد تعبت معها |
السلام عليكم ...
أخي الفاضل ،،، المفروض أنت من أول تكون صريح في كل شي معاها ومع أهلها،، من ناحية المصاريف ومن ناحية التكاليف كل واحد يعرف إللي له وإللي عليه ،، يعني الملكة معروفة أنها على أهل البنت والزواج على أهل الخاطب ،، ومن ناحية تصرفاتها أخي المفروض أنك سألت وتقصيت عنها تمام من ناحية الأخلاق والطباع ،، لأن ترى مو بس الشاب إللي يُسأل عنه ،، لازم تصارحها يا أخي الكريم علشان تكون على نور وتوضح لها أمكانياتك وأنك قاعد تسوي كل هذا علشانك أنت وإياها واستقرار بيتكم مبني على التفاهم والصراحة إلى جانب الحب والمودة ... وصارحها بشكوكك بطريقتك الخاصة وقولها أتوقع نبدأ حياتنا بتفاهم يعني لها شخصيتها اللي انت لازم تفهمها ولك شخصيتك اللي لازم هي تفهمها.. وقول لها تفكر في الموضوع وأنك شاريها وتبغاها او غير كذا انك ما تقدر تستمر بهالأسلوب .. والله يوفقك ويسهل أمرك وبالتوفيق ... أختك ,,, أم حمزة |
اختي ام حمزة
اشكرك على مرورك ونصيحتك وعسى الله يجعلها في موازين حسناتك ********************* اما بالنسبه لردك =========================== المفروض أنت من أول تكون صريح في كل شي معاها ومع أهلها،، من ناحية المصاريف ومن ناحية التكاليف كل واحد يعرف إللي له وإللي عليه ،، يعني الملكة معروفة أنها على أهل البنت والزواج على أهل الخاطب ،، ////////////////////////////////////////////////// من البداية ما اتفقنا على مصاريف واشياء من كذا الا بعد الزواج وابوها بنفسه قالها لي مالك دخل في مصاريفها انا اتحملها وتفاجأت انها يوم تطلبه شي يقولها خذي من زوجك يعني حتى (( طلبات المدرسه )) قالها خذي من زوجك وما اعتقد انه هي من عندها جت طلبتني (( والله اعلم)) انا مو زعلان على شي عطيتها هو هذي زوجتي وافرح يوم انها تطلب مني واحسها معتمده علي لكن اللي يزعل انها تنكر هذا كله وتقول (( انت اش سويتلي )) او تزعلني اذا مانفذت طلبها اما بالنسبه للملكه من البداية اتفقنا عليها ان انا اتحملها ورضيت بالشي هذا لان كانو يمدحون في البنت وفي اخلاقها وانها راح تساندني وفعلا اخلاقها الحمد لله البنت مايعيبها شي لكن انها تساندني ( هذي تحتها الفين خط) الا تبهدلني ====================================== |
ماشاء الله عليك انت مو مقصر معاها بشي.. مادري هي بالضبط شو تبي..
اقعد معاها وفهمها بهدوء لا تصرخ عليها ولا تسكر في وجهها... في البيت اقعد معاها وقول لها اني اسويلك الي اقدر عليه .. |
اختي ام حمزة
اشكرك على مرورك ونصيحتك وعسى الله يجعلها في موازين حسناتك ////////////////////////////////// اما بالنسبه اني اجلس معها وافهمها كثيييييييييييييييير تكلمت معها في هالمواضيع وافهمها ان لازم توقف معاي واني مو مقصر معها احيان يكون ردها ايجابي وتعتذر واحس في وجهها انها غلطت ومتأسفه واحيان تتمسك بكلامها لا وترد بوجه مدري احترت معها |
أخي الكريم ...
حاول مرة و2 و3 ،،، وقول لها ما أبغى نتزوج وانا تضايق من بعض الأمور اللي تكلمتوا عليها .. وقول لها أتوقع انك تكونين واقفة معاي قولا وفعلا وما أحد يأثر عليك برأيه (أي أطراف خارج أطار علاقتكم) وحدد لها ايش تتوقع منها .. وأمدح اللي عجبك فيها والكلام اللي سمعته عنها اول ما خطبتها وانك متمسك فيها وبعدين صارحها انها تجرحك لما تقول(ايش طلبت منك وسويتلي) وقول لها انها تخليني آخذ منك موقف يضاريقني ووضح لها من كثر طلباتها وعدم تقديرها انك فركت بالانفصال لان طلباتها فوق طاقتك ... والله يسخرها لك قلبا وقالبا ... وبالتوفيق أخي الكريم ... أم حمزة |
كان الله في عونك
|
السلام عليكم ورحمه الله وبركاته هي من جهه صغر سنها فهي صغيرها ...ومع احترامي الشديد لك من العيب ان البنت تشترط او تاخذ شي من الرجل وخاصه قبل الدخول عليها...اخي ان كان اهلها بالشكل التي تتحدث عنهم فاارجو ان تراجع نفسك في الزواج لان تدخل الاهل مشكله المشكلات وخاصه ان كانت البنت في طوعهم ولن تنتهي مشاكلك معهم بعد الزواج ..فبعض الاسر هداههن الله عيونهم شره لايستحون من طلب اي شي من زوج ابنتهم كأنهم لم يرو خيرا في حياتهم وهولا النوعيه من الاسر اقدر اقول عن من تزوج منهم (راح فيها )وفي النهايه طالما انك استشرت فلابد من الاستخاره قبل فعلا اي عمل واطلب من الله الخيره في امر زواجك... |
الله يكون في عونك ،، بس انا اشوف صغر السن يمكن يكون السبب الرئيسي .. ويا اخي لازم اتشد اشوي عليها مو كل شي تطاب تعطيها انت الي دلعتها في البداية ...
والله الموفق .. |
نصيحه لك يااخي لا تتهاون وتلبي كل طلباتها اعرف لك شخص نفس حكايتك في ايام الملكه كل يوم زن عليه سو وفلانه عندها .. في الاخير طفش وطلق قبل الدخول وقبل لا يحطها في بيته .. عرفها قبل وصارت له خيره .. خلك حازم وعلى قد ماتقدر سوه والا ماتقدر ... لا يكلف الله نفسا الا وسعها ماهي معقوله وانا اخوك ان الحريم يجرن الرجال للتهلكه وهو الله الله خلك حازم واقطع الاتصال بها الى يوم الزفاف .. ترى مضار التعارف قبل الدخول اكثر من الايجابيات مع مثل نوعيات اختيارك فكر جيدا تراها صغيره ولا بد ان تعودها على نمطك وليس على نمطها .. فان وقع الفاس بالراس لن يبقى لك الا امرين : اما طلاق او رضوخ وديون وعذاب الزواج يااخي بركه للي يقدره ويلقى وحده تعينه على الدنيا ماهو تعين الدنيا عليه |
ترا صحيح كلام العازم .. تدخلات الاهل تؤدي الى هدام البيت .. اسالني انا .. من التدخلات الحين بتطلق..
فلا تخلي اي احد يتدخل ... وخلك شديد مع البنت وقول لها .. انا زوجك ومو مقصر معك .. ومابي احد يتدخل في حياتنا.. لا من اهلي ولا من اهلك .. خلك شديد معها |
اتوقع اخوي ان اول واهم سبب في مشاكلك مع خطيبتك هو صغر سنها يمكن هي ما تعي تصرفاتها انها غلط بسبب صغر سنها وقلة الخبرة في امور الحياة يبغى لك شوية صبر وهدوء معاها وان شاء الله تنحل الامور بينكم ويمكن السبب الثاني انها تسمع كلام اللي حولها سواء امها او اخواتها او صديقاتها تفاهم معها بهدوء وحاول تشرح لها وضعك وامكانياتك المادية خصوصا في فترة التجهيز للزواج المفروض ان طلباتها ما تكون كثيرة في فترة الخطوبة مهما كان حتى لو كان زوجها البنت تظل خجولة من انها تطلب فلوس او هدايا او ما شابه من خطيبها واللي محتاجته منك خطيبتك منك هو طولة بال شوي يمكن بسبب صغر سنها ما تعي ان مو اي كلام تسمعه من اللي حولها معناه انه صح وحاول انك تخليها ما تتاثر كثير بكلام اللي حولها في كل شي والله يوفقكم ويسعدكم ان شاء الله..... |
والله غريبه يااخي
انا في الخطوبه كنت اخجل وافكر 1000 مره قبل ما اطلب من زوجي طلب يعني جرأة ما شاء الله عليه |
والله يخوك يقولون الفرس من خيالها ..
والمرأة ما تتجرأ على زوجها الا وهي عارفه أنه راح ينخ ومهما يزعل بيرد مكانه .. ولا تتوقع أن رومانسيتك هذه بتصلح المراة , فهل أنهن يكفرن العشير .. لقد أهدرت من شخصيتك الشي الكثير , وقيمتك في شخصيتك , وشي بديهي أنها راح تنافخ عليك وترفع صوتها , لأنك انت اللي خلقت ذلك فيها .. رجولتك وشخصيتك خط أحمر , لا فرطت فيها , تحمل من زوجتك اكثر من ذلك .. لا تلومها أ امها , بل لوم نفسك , أنت من بين لها ولهك عليها , شي بديهي انها تستغل لهاثك , وأنت يخوك مثل قيس ليلي , وما تدري أنها ف يلحظة تكفر عشرتك كلها .. اركد وارزن يخوك , وبين لها أنك منت راضي عن أفعالها وبين لها بحزم الرجال أنها اذا ما تعدلت راح تبيعها ببلاش .. |
السلام عليكم
أخي الكريم ... هذه الأحداث التي تحكيها .... قريبه جدا من الأحداث التي حدثت معي خلال الأيام الماضية ... هذا رابط موضوعي ... اقرأه وانظر إلى ما صار إليه الحال ... http://www.66n.com/forums/showthread.php?t=131129 وإن شاء الله لي عودة مرة أخرى معك عشان أقلك ايه ال تعلمته من تجربتي |
هذي ضريبة اللي يتزوج من صغيرة!
الله يعينك ويوفقك اسيرها |
الله يصلح مابينكم اخوي ..
بصراحه انا استحي مررررره اني اطلب اي شي من خطيبي .. يعني احس اني باقي عند ابوي الله يخليه لي وما احب اطلب من خطيبي مع انه هو دائما يسألني اذا ناقصني شي بس انا انحرج واقوله سلامتك .. بس انا اتوقع ان خطيبتك مشكلتها في اللي حولها يعني في احد جالس يعبي راسها وبعد لاتنسى ان خطيبتك صغيره في السن واكيد تقارن نفسها بغيرها .. مع اني اشوفك ماشاءالله مو مقصر معاها ابدا !! وحاول انك تكون شوي حازم معاها يعني اتركها فتره بدون اتصال او سؤال وبعدين وضح لها سبب الانقطاع انك متضاق من كثرة طلباتها.. الله يهديها بس .. |
أدري الكثير بيقول ليست قاعدة
لكن الأيام هذي أم 17 صغييييييييرة وش فيهم اللي فوق العشرين والخمسة وعشرين ؟!! إذا كان عمرك كبيــر عليها وإنت أخترت برغبتك ... تحمّل إختيارك وإذا أقل الله يكون بعونك وخلك أشد من كذا البنت ممكن تصير تحت أمر زوجها بالكلمة الطيبة والهيبة اللي على أساس يعني حكمـة وتقدير وكل شي له حد مايتجاوزه . |
الله يهدي زوجتك ويصلح حالك اللهم امين
شد عليها شوي والانفصال مب حل لان اذا وراها احد الحين عقب الزواج بتكون عندك والحال بيتغير يعني ماراح تكون عند امها عشان تترس راسها ولا عند ربعها |
والله يابختها فيك انت عريس مافي زيك استحملها تراها صغيره والله يصلح الحال
|
اقتباس:
وكان الله في عون الجميع |
اقتباس:
اشكرك اخي الكريم على مرورك ونصيحتك اخي العازم انا ماني معترض انها تطلب مني شي لان في البداية هي ماكانت تطلب لكن انا اللي طلبت منها انه اذا ناقصها شي تكلمني وهذا الشي يحسسني انها معتمده علي لكن اللي مزعلني انها دائما تنكر اللي اسويه لها وتسمع كثير من الناس وتزعل اذا مالبيت طلباتها وهذا الشي ماكنت انتظره منها ومشكلتي ومصيبتي هي (اهلـــــــــها) يتدخلون في كل شي حتى يوم اروح عندها ابوها يسألها وش جابلك ؟؟؟؟ :( برأيك هذا منطق ؟؟ بدل مايعلم البنت كيف تساند زوجها لا يعبي راسها ويحسسها انه زوجها مقصر معها تحياتي |
اقتباس:
صح انه عمرها صغير بس المفروض انه اهلها يعلموها الصح من الغلط وفعلا انا من البداية مارفضتلها طلب لكن ان شاء الله اني اقدر اوزن الامور وشكرا |
اقتباس:
وفعلا اللي يطاوع زوجته في كل شي راح تسحبه للتهلكه لان مو كل وحده راح تفكر بعقل فتلاقيها ماتفكر ابعد من 5 دقائق مستقبلية والله يكون بالعون |
اقتباس:
وفعلا من الاسباب صغر السن بس من وين تجي طولت البال وحنا كل يومين وطالعتلي بسالفه جديده وتنكد علي (الله يعطيني طولت البال ويصبرني عليها) |
اقتباس:
والله يوفقك مع زوجك ويسخركم لبعض اللهم امين |
اقتباس:
اشكرك على مرورك اخي فارس مصر وفي انتظار تعليقاتك وشكرا |
اقتباس:
مانقدر نقول ضريبه لان في بنات اعمارهم صغيره لكن عقلها اكبر من الف رجل والله يهديها ويوفقها اللهم امين |
انصحك ان تصلى استخارة مرة اخرى
|
جريئه وطمعت فيك
وكثير ناس مهما تعطيهم مايبين فيهم يمكن احد يأثر فيها حاليا وزي ماقلت انك اذا اقنعتها اعتذرت لك والله االعالم ان بعد الزواج راح تكبر وتعقل وتتغير معك للاحسن وانصحك ماتوقف استخاره انت وياها والله يكتب لكم اللي فيه الخير |
اخي الغالي وربي ضاق صدري من قصتك اذا كل هالاشياء وما سويت شي على قولتها اجل بعد الزواج وش بتقول والشرة مو عليها على اهلها بكل صراحة اللي ما ربوها كيف تتعامل مع الزوج لانها راح تكون زوجة وراح تتحمل مسؤلية بيت وتربية اولاد وزوج وما اعتقد بوجة نظري ان البنت بطريقتها وتصرفاتها راح تكون مسؤلة عن بيت بهالعقلية السطحية وعدم تقدير الزوج رغم عدم تقصيرة ،،،الواحد يتزوج عشان يرتاح مو يتزوج عشان يشقي ويتعب مع انسانة مو فاهمة وش حق الزوج وكيف طريقة التعامل معاة،،،انا بكل صراحة لو قلت تاخذ هالبنت بقولك لو اعطيت مال قارون لن ارتبط بنسانة بتلك العقلية ولو عندها حيا ما تطلب من زواجها طلبات وهي توها متملكة منة لا ومن شين الطبائع تنتقد زوجها وتقول ما شفت شي منك،،،،في اعتقادي الشخصي ان هناك من يسير البنت بطريقة خاطئة والسبب والله اعلم حتي تسيطر عليك من البداية،،اخي زمام الامور بيدك والقوامة ليست لها القوامة لك،،،تصيحة لك اخي الغالي غير من وضعك 180 درجة اتجاة هذة البنت واذا تعدلت كان بها وعرفت حقوق زوجها والتادب معة وافرض شروطك عليها بحدود الشرع واذا لما تتعدل هذة البنت عن تصرفاتها اتجاهك اري بان بيت اهلها اولي بها وهم المسئولين عنها وعن تحمل تصرفاتها،،،،اللهم ان كان في هذا الزواج خيرا لك فادعو الله عزوجل بان يتمة وان كان فية شر لك وعدم راحة لك فادعو ربي ان يصرفك عن هذا الزواج ويبدلك خيرا منها،،،،اخي دع عقلك يتحكم فيك لا عواطفك اتجاة هذة البنت وكما قيل النزول من اول الدرج افضل بكثير من النزول من اخر الدرج،،،،الله يوفقك اخوي،،،وادعو لي بان يرزقني الله عزوجل الزوجة الصالحة التي تعينني على ديني ودنيتي،،،، اخي نسيت نقطة مهمة تاكد من التزام البنت ومعرفتها حق ربها لان من عرف الله جيدا وعرف الشريعة الاسلامية عرف حقوق الزوج ،،،،ربي يكون بعونك اخي الغالي
|
اخوي
كااااان الله بعوونك ، ونصيحتي انك تفكر الف والفين مره قبل الدخله وان حددتوا الوقت انت الحين وقفه ،، وقول لهم احتاج وقت افكر ،، الا ان وزعتوا الكروت فالله يستر ،، وحاول انك تشوف حل من بدري ايش يعني بالأول ابوها يقولك مالك بمصاريفها انا اتحملها وعقب يقول لبنته اي شي تبينه على زوجك هذا لعب عيال صار والمفروض انت تحدد القاعه اللي مقدورك ،، ولازم هي تتفهم هالشي ،، خليها من البذخ والفشخره قدام الناس والله بعدين بتتعبك بالموديلات والخياطه والمكياج والسهرات والطلعات والملاهيات وفلانه عندها سواق وعندها وعندها يا خوي انت تبي الستر وتبي زوجك تصونك وتكمل معاك المشوار يدك بيدها مش وحده تركض وراها وورى مطالبها تصدق انه كان بامكان والدي يحجز لي بأفخر قاعه بس زوجي أصر انه يتقاسم تكاليف الفرح نص بالنص (عاداتنا) فوالله اني اخترت باستراحه تضم عدد معقول وحاولت قد ما اقدر اني ما اتكلف بشي وان شاء الله اني فعلاً ما اكون كلفت على زوجي.. عسى الله يرزقه من واسع فضله والله انه ما يبخل بشي بس انت الحين اتكلم مع البنت ووضح لها اشلون تطلبين من زوج اختك وانتي معاي على الخط ؟؟ وخليها تجاوبك ،، وبهدوووء لا تستعجل بالكلام عشان هي بعد تحس انك فعلاً جاد حاول تضبط امورك ،، اتفاهم معها ، روح لمهم واجلس معها وشوف ، قول لها بصريح العباره انك تبي مين تشاركك وتساندك ، لكن ان كانت تشوف نفسها لسى دلوعه وتوها على المسؤوليه فخليها تقول هالشي من بدري وان كبر الموضوع (عساه ما يوصل لهالمواصيل) مادري هل من الصحيح انك تدخل ابوها وتتفاهم معاه بس بصراحه استغربت من رده ،، ترى احتمال قال كلامه من باب المزح وهي خلاص اعتمدت وغريبه ماقالك شي على اللي جبته لزوجتك يعني ماقال لسى بدري على هالأمور ولما تجي بيتك جيب لها اللي تبي وووو عليك بالاستخاااره وعسى الله يوفقك لللي فيه الخير والصلاح ان شاء الله |
مع كل احتراماتي بس خطيبتك الظاهر انها مادية
و هذا النوع يا أخي جد صعب الله يكون بعونك و يهديها |
شوف البنت توها صغيره تتوقع الحياة كلها مظاهر وخاصة انها يمكن تتظاهر اما صديقاتها في المدرسه
وخاصة في هذا السن يعتمدون في الزواج على المظاهر والبنت لانك موضح حبك لها درت انك ما تقدر ترفض لها طلب وانت تحاول انك ترضيها البنت في سن العشرين تصير فاهمه وعاقله وتبدا تفهم الحياة ههددا بالانفصال حتى تعرف انك خاضع لها حسسها بقيمتك ولاتفعل اي شئ تطلبه منك لانها تعرف انك لاتقدر ان تستغني عنها وانك تلبي كل طلباتها اثقل عليها حتى تعرف قيمتك |
اخوي الله يكون بعونك ويتمملك على خير
اعتقد 17 سنه مو صغيره ماشاءالله تبارك الرحمن بس اعتقد في احد بالبيت يقولها ان زوجك هو مسؤول عنك وعشان كذا انت تشوف طلباتها كثيره واي مناسبه تكاليفها كثير فما بالك بزواجها انت اذا عطيتها المهر فهمها انها تشتري منه ولا تطلبك ابد و ان شاءالله متى ما استقريت فبيت واحد بأذن الواحد الاحد تفهمها على ميزانيتك ولازم تقدر والاشياء الغير اساسيه لازم تستغنى عنها وبالتوفيق ان شاءالله تحيتي |
يعني خاطب بنت ماتجاوزت مرحله المراهقه وش تتوقع يعني
تبغاها تكبر غصب .. هذا اختيارك وانت تتحمله |
| الساعة الآن 11:12 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©