|
ساعدوني كيف أتعامل معه ( آخر التطورات )
بسم الله الرحمن الرحيم
السلام عليكم انا عندي مشكلة تعبتني كثييييير بصراحة ماادري شقول لكم...بس ارجووووكم لاتلوموني..لأني عارفة نفسي اني غلطاااانة...بس ابي احد يوجهني ويفهمني ويعلمني اشلون اتصرف لأني بصراحة تعبت ومالقيت اللي يفهمني..ويقدر يساعدني..فقلت مالي غير الله ..ثم انتم.... انا عمري 23 سنة صارت بيني وبين واحد يقرب لي علاقة حب اتفقنا على الزواج..بس هو الى الان مابعد يتوظف...((تندمت لأني حبيته...بس انا الى الان احبه)) استمرت علاقتي به سنة وعشرة شهور...والى الان مستمرة... كان بالبداية يراعي مشاعري ويحبني ويفهمني ومايزعلني بس الحين للاسف....تغير كثييير بدون سبب...شاف صورتي وسافر معنا مع اهله واهلي وشفنا بعضنا بس ماصار بينا شي ...بس نظرات وابتسامات... هو بصراحة احلى مني ...يمكن لاني احبه اقول كذا ...بس صحيح هو وسيم...فيه وحدة من خواته كبري تدري بسالفتنا....هي حست اني في علاقة بينا...وبعدين انا استخرت ربي اني اصارحها ..طلعت لي الخيرة ممتازة...فقلت لها كل شي... والموضوع بيني وبينها سر.....هي زوجة اخوي.....وهو اخوها.... تغير علي فجأة ...وقررنا ننفصل عن بعضنا...بناءا على رغبته...اما انا ماادري شلون اعيش بدونه.....انا اعتبره هو كل شي بدنيتي....اموووووووووووووت اذا تزوج غيري شقول....بس بعد ماقرر انا احنا نترك بعض..انا بكيت لين جفت دموعي..وقلت له..اذا كان هذا يريحك خلاص..اهم شي راااحتك..... وبعدها تراجع في كلامه....بعدماقلنا هذي اخر مكالمة....رسلت له مسج اني ابقي اكلمه للمرة الاخيرة....بس في قلبي كلالالام... وافق....رسل لي رسالة ...بكلمك ولي اخر مرة انا طرت من الفرح....ماعرفت شسوي.......نسيت اقولكم انا من عائلة غنية نوعا ما....وهو بعد بس كان مو ذاك الزود بس كان لسا مابعد يتوظف...كان يرسب في المتوسط...صار عمره الحين 24 سنه وهو في ثالث ثانوي..باقي عليه هالاسبوعين ويخلص دراسة وياااااااااااااااارب ينجح ويتوظف.....هذي السنه... المهم اتصل علي وكلمته و قلت له انا حبيت اهديك هديه ...وهو كان في هذي الفترة توه بايع اخوه سيارته...وانا كنت اخطط اني اعطيه من عندي عشرةى الاف ريال عشان يزيدهم ويشتري له سيارة... المهم كلمني وقال لي قبل مااقوله شي..رسل لي مسج ((انا اسف ..ادري والله ماتستاهلين)) اوفي رسالة ثانية رسل لي((ادوس على قلبي واتصل بعد شسوي)) المهم انا قلت له عن فكرتي اني بعطيه عشرة الاف هدية مني مساعدة عشان يشتري السيارة... بالبداية وافق..وقال لي بشرط اني ارجعهم لش.....وافقت... بعدين......3 شهور عطيته اياهم .... وبعد فترات قام يطلب مني فلوس مساعة (سلف)عشان الاكتتابات...والاسهم...هو بصراحة يحب الفلوس.. وانا استخدمت معه نقطة ضعفه....بس تحسفت لأني حسيت انه تعود.....وكان مايكلمني الا قليييييل اذا رسلت له رساله قلت له بعطيك هديه....بس ماكان يتصل على طووول....دايما يأجل... على فكلرة هو صديق اخولني الاثنين....صداقة قويه لدرجة انهم يسافرون مع بعض بالليالي والايام ويتعشون مع بعض يوميا.... هو ماعنده سوالف ولاخرابيط انا عارفه تفاصيل حياته بالضبط بس المشكله طلع لي من العام بموال جديد وهو ((انا ماابي اقولش انا احنا لازم نكون لبعض...خليها على كتبة الله اذا كان الله كاتبنا لبعض بنتزوج واذا لا....خلاص,,بس انا ماراح انساك..بس ماابي اخليش تعيشين في وهم...أنا تحسفت انا احنا عرفنا بعض,,,,لو متزوجين بدون مانتعرف كان احسن والحمدالله ان ماصار بينا شي....بس ابليس شاطر...خلنا نشوف بعض....ونتكلم ونستمر كذا.....انتي خوش بنت وكل واحد يتمناك بس ماابي اقولش اكيييييد بنكون لبعض ...يمكن ويمكن خليها للأيام ....وعلى كتبة الله ....)) وانا موعارفة شسوي اخاف اتركه ينساني ويتزوج غيري...واخاف اظل على طول وياه وهو كذا تاعبني ومعذبني معاه... على فكرة:::امه ودها تأخذني حق ولدها...يعني له ..تحبني ودايما تمدحني وامي كأنها حاسها قلبها..دايما تقول انتي تنتظرينه يتقدم يخطبش صح.. ..بس اقولها لا زوجة اخوه::::اول مرة تشوفني وعلى طول قالت (ليش ماتخطبونها له احس انها حليوه وكل واحد في هالعائلة كانه حاسه قلبه يقول اخذوهم لبعض.... اخته الكبيرة قالت له انت كل مع هالعائلة تبقي نخطب لك من عندهم ....مارد عليها بس ابتسم بس انا موعارفة شسوي اتركه ولا اتمسك به....... على فكرة/////انا اللي بديت واتصلت عليه اول مرة ////بس ماكان قصدي الزواج...كنت بضيع وقت وماكان يعرفني ابدا.....لمدة 2شهرين ومرة من المرات دقيت عليه من جوال اخوي ...نسيت انه يعرفه...وطلع رقم اخوي...وقال لي من رقمه....قلت له اخوي... وبعدها عرفني ..وقال انا عرفت منهو انتي... انا خفت وقلت التوبة ...قلت له سامحني...بس لاتقول لأحد... قال : لا اكييييد انا من زمان عارفك بس ساكت... وفتح لي موضوع الزواج ......وبعدها اللي صار صار ...شافني وشفته بالصور.... وشافني بيت اخته بالصدفة ... وقالي ماتوقعتك كذا....طلعتي اجمل بكثيير من الصورة ..واحلى من اخوانك... بس الحين تغير....واااجد من يقدر يساعدني..........مو عارفة شسوي ؟؟؟ تكفووووووووووووووووووون ساعدوني لاتبخلون علي برايكم....شلون اتعامل وياه؟؟؟ لأني احبه حد الجنون ومااقدر اتركه...اموووت |
بنات ....
شباب.... لاتبخلون علي بالنصيحة....تكفون ... مالي غيركم |
علاقتك بدايتها اصلا غلط بغلط ... كيف ترضين تاخذيه وهو مايفكر يوم من الايام يخطبك حتى لو من اخته
يقول لها .. ولين مايتوظف تمشي اموركم ... ترى هو حاس انك متمسكه فيه وجالس يلعب بقلبك ... ياختي اقطعي علاقتك معاه ... والله يعوضك باللي يحبك ويتمناك زوجه له ... مو لعبه... فيه شي قهرني وهالكلمه اصلا بانت فيها نيته بس انتي مو منتبهه لها زين (أنا تحسفت انا احنا عرفنا بعض,,,,لو متزوجين بدون مانتعرف كان احسن والحمدالله ان ماصار بينا شي) هالكلمه حطي تحتها الللف خط واقريها زين ... اتركيه اختي والله يرزقكك بأحسن منه هموووم |
هذا مو حب هذا ما يحبك هذا مصلحجي وانت شكلك صغيرة واول حب بحياتك ومتعلقة فيه لانه اعطاكي اهتمام بس تأكدي ما يحبك
|
والله يا خيتي لو تطيعيني انا مع الاخ هموم
ياعيني علاقتكم مناساسها غلط اجل كيف بتكملون على الغلط وبعدين شنو اللي يستغلك لا تعوديه على اشياء تتحسفي عليها والبنت مننا لازم تثقل وتحط على قلبها صخرة لو امكن وبعدين كلامة نار شنو هذا يتكلم كذا ماعليه ياستي اصرفي نظر عنه والله بيعوضك خير دمتي |
استخيري
والله ييسر امرج ويفرج همج اللهم امين |
اختي سامحيني على كلامي ولاتزعلين مني
بصراحه باين من كلامك انه مايحبك وانه متحسف على كل الايام اللي عرفك فيها |
العلاقة غلط في غلط .. والواضح انه مو مقتنع فيك والا ماكان تردد في خطوبتك من أول ماعرضو عليه أهله..
|
اقتباس:
لكن للعقلاء فقط ما للاطفال الذين يلهون وما يدروا بماذا يلهون بمستقبل بحياة بأسره بدين بكل شئ بكل شئ الله بيعطيك العافية ويكملك عقلك ويسترها معاك الى ان تعقلى وتبصرى الامور زين اسأل الله العظيم رب العرش العظيم أن يهديك |
أختي الكريمة ...أنا أعتقد أنك جعلتي نفسك في وهم الحب والتعلق وأنتي الآن تعانين منه؟! أقترح أن تنسي هذا الشخص الى أن يتقدم رسميا واذا تقدم غيره شخص مناسب فلا تترددي في قبوله وأما بقائك على هذا الحال سوف يجعلك تشعرين بالذنب طول عمرك!!
|
للأسف اختي واضح من كلامه انه مايحبك لكن خايف يجرح مشاعرك وبنفس الوقت جالس يستغلك ماديا وانتي الي عطيتيه الفرصة لهالشي هو مستمر في علاقته معك كتسليه وواضح من كلامه انه مايبيك والدليل انه قالك خليها على كتبة الله يعني يلمح لك علشان لا تتعلقين فيه ...
عزيزتي دوسي على قلبك وفكري بعقلك ولا ترخصين نفسك قدامه وقدام اخته .. عارفة ان هالشي صعب عليك لكن حاولي واضغطي على نفسك واشغلي نفسك بأشياء ثانية صدقيني الفراغ بيخليكي تفكرين فيه وتضعفين وتتعذبين علشان كذا لازم تشغلين وقتك .. الله يوفقك |
أختي العزيزه اي نوع من الحب هو يتعامل به او يؤمن به!
الا ترين ان كل الحقائق متجليه امامك؟؟ انتِ من عائله معروفه و مرموقه ترتبطين بشخص هامل!!! رسب 20 مره و مازال بالتوجيهي!! يا سبحان الله عمره 24 سنه من المفروض ان يكون موظفا في هذه الفتره او على اسوأ الأحوال ان يكون قد انهى الفتره الجامعيه... أختي العزيزه لقد غلطتِ غلطه كبيره عندما استهويته بالنقود... كثيرا من بناتنا يستهوون الشباب بمغريات الحياه و عرض اجسادهم الخ من المحرمات لكنك انتِ لم تفعلي كذلك بس جعلني شيطان النقود هو الذي يحدد علاقتكما... انتِ تعرفين تماما بأنه مادي فما الذي يجبرك على البقاء معه؟؟ عندما تتزوجينه سترين الجحيم امامك لأنه شخص غير مؤهل ولا كفؤا للعمل و تحمل المسؤوليه... يعتبركِ البنك المنتقل ... وقت ما شاء تمدينه بالمؤونه... استيقظي يا اخي فهو لا يحبك ولا يستحق كل هذه التضحيات منكِ...التفتي الى حياتك و تأكدي بأنك ستقابلين غيره الكثير الكثير... و اجعلي هذا درسا لك... عذرا اختاه ولكن عظمك هش... و تذكري ان الله سبحانه و تعالى اعطانا نعمه النسيان... تقبلي مروري |
هذا ياخذ فلوسك وتقولي تحبيه !!! على ايش ؟؟؟
يا اختي الغلط غلط ،،، تعاملي معاه بانقطاعك عنه وانقطاعك بالاتصال به ،، اعلم بأن هذا صعب عليك وانتي تحبينه ،،، ولكن دوسي على قلبك كما هو داس على قلبك انتي وليس قلبه ،،، فهو أصلا لا يحبك ولم يعد بالزواج بل كان حب طائش من شخص لا يقدر حياته ولا يقدر مستقبله فكيف تبنين حياتك على شخص لم يكمل حتى الثانويه وهو في هذا العمر !!! عاله على المجتمع وعاله عليك وعلى فلوسك !! اتركيه بارك الله فيك وستجدين من هو أفضل منه مليوووووووووووون مره |
الجواب على حيرتك من نفسك كلاااااامك أخيتي
المهم كلمني وقال لي قبل مااقوله شي..رسل لي مسج ((انا اسف ..ادري والله ماتستاهلين)) هو ماقال كذا لأنه مايبغى يخسرك بس لانك الخزنه اللي تدر عليه فلوس اوفي رسالة ثانية رسل لي((ادوس على قلبي واتصل بعد شسوي)) تعتقدين وش قصده من هالكلام أدوس على قلبي وأكلمك يعني يكلمك بالغصب مو عشانك الا عشان فلوسك وبعد فترات قام يطلب مني فلوس مساعة (سلف)عشان الاكتتابات...والاسهم...هو بصراحة يحب الفلوس.. هذا يثبت الكلام اللي قلته لك قبل بس المشكله طلع لي من العام بموال جديد وهو ((انا ماابي اقولش انا احنا لازم نكون لبعض...خليها على كتبة الله اذا كان الله كاتبنا لبعض بنتزوج واذا لا....خلاص,,بس انا ماراح انساك..بس ماابي اخليش تعيشين في وهم...أنا تحسفت انا احنا عرفنا بعض,,,,لو متزوجين بدون مانتعرف كان احسن والحمدالله ان ماصار بينا شي....بس ابليس شاطر...خلنا نشوف بعض....ونتكلم ونستمر كذا.....انتي خوش بنت وكل واحد يتمناك بس ماابي اقولش اكيييييد بنكون لبعض ...يمكن ويمكن خليها للأيام ....وعلى كتبة الله ....)) ألحين عرفتي هو متحسف انه تعرف عليش وأكيد من كلامه مو من نيته الزواج ولكن حصل من وراك مصلحه قال يالله أنا وش خسران فهمتي وأبغى أقولك شي هو أنه أي رجال حتى لو كان أطيش واحد بالدنيا مايرضى يتزوج وحده كانت تكلمه بالتلفون من ورا أهلها حتى لو كانت المكالمات بريئه وأكيد في باله انها زي ماكلمتني أكيد تكلم غيري وبيظل يشك فيج حتى لو حصل نصيب أكيد أختي أنتِ كانت نيتك طيبه وكانت مكالماتك عفويه لكن الرجل ماراح ياخذها على هذا المنوال أنا أنصحك أنك تبتعدين عنه مهما كانت درجة حبك له لأنه واحد لعب بمشاعرك ولايستاهلك أبتعدي عنه وأن شاء الله الله يعوضك بما هو أهل لك ويعوضك خير لاتزعلين من كلاااااااامي وأني كنت صريحه معك واجد بس أكيد هذا لمصلحتك وحنا بنات ونفهم على بعض وهذا من خوفي عليج الله يوفقج |
والله يقول خلاص بنفترق وتركضي وراه هذا واحد ما يعرف الحب واحد مستمر معاك عشان المصلحة بس لا ادوسي على كرامتك لان حتى لو تزوجتوا ما بدير لك بال لان يدري انك ما تقدري تستغني عنه خليه عنك والله يعوضك بواحد احسن منه
|
فشلتي أخوانك كيف ينظر لهم وهذا اسلوبك
|
ما بني على باطل فهو باطل
|
هذا اهانك داس على كرامتك و اخذ فلوسك و بعدج وياه يا سلام عليج و بيقول ادوس على قلبي و اتصل فيج!!! و بعدج وياه! اني حزينة فقط على اخوانج لانج ما شرفتيهم و ما احترمتيهم و طلعتيهم صغار قدام هذا حبيبج اللي ما يحبج و كل اللي يسويه هو انه ياخذ فلوسج و الله العالم اذا هو ناوي يرجع فلوسج ما اعتقد راح يرجع المبلغ اتركيه و حافظي على شوية كرامة من اللي تبقت عندج اسفة على قساوتي معاج لكنها الحقيقة و لازم تفتحي عيونج عليها الله يوفقج |
إن ماخاب ظني انة ما يحبك يحب فلوسك فقط إنسية لانة لو جاد كان اتقدم وخطبك
|
أخيتى
أولا العلاقة من بدايتها غير جائزة شرعا...حتى ولو لم يحدث بينكما شىء ثانيا..لا يمكن يتزوجك وهو كان على علاقة بك وسوف يظن أنك كما عرفتيه فأنك عرفتِ غيره من الشباب ثالثا وهو الأهم اقتباس:
حبيبتى هو اللى استغلك ولست أنتِ من استغلتيه هو الذى عرف نقطة ضعفك وضحك عليك أنت حبيبتى نفسك بحب فى خيالك انتِ فقط...............وهو إذا أراد أن يتزوج لن ينظر لكِ كزوجة ولن يختارك كزوجة..والله أعلى و أعلم اقطعى العلاقة...... لأن الله لا يرضى عن ذلك أبد.....أبدا .......أبدا....... لا يجوز اتخاذ أخدان للمرأة أو للرجل توبى و أكثرى الاستغفار و إن شاء الله نصيبك فى رجل أحسن منه ألف مرة قومى بزيارة قصيرة لقسم المتزوجين..................وسوف ترين مآسى بسبب سوء الاختيار فى بداية الزواج وفقكِ الله حبيبتى إلى كل ما يحبه ويرضاه . |
أختي ابرتاج،،،وفقك الله عزوجل لكل خير،،،اولا انا ما انصحك بزواج زي كذا بالنهاية انتي الخسرانة بعتبار ان اساس العلاقة مبنية على خطا(والقاعدة تقول ما بني على خطا فهو خطا) اقول هذا الكلام اذا تقدم لخطبتك وانا اشك انة يتقدم،،اختي الغالية العلاقة الغير شرعية غالبا ما تنتهي بنهاية مؤسفة والضحية البنت،، اختي بحكيلك تجربة انا مريت فيها سابقا//كان لي علاقة مع وحدة واستمرت العلاقة اكثر من خمس سنوات تقريبا انا حبيتها لدرجة الجنون وهي حبتني وربي لدرجة الجنون وثقتنا في بعض مالة حد،،تدرين اني صارحتها من ناحية زواجي منها اني مستحيل اتزوجها لسبب واحد لاني اموت فيها ومابي اكون سبب بالم وشقاء الانسانة اللي ضحت بحياتها عشاني///اللي اقصدة لو تزوجت هالبنت اول واحد راح يدخل بيننا هو الشيطان وراح يقولي اللي تعرفت عليك بتعرف علي غيرك ومن هالكلام ولو وجدت الجوال او التلفون مشغول راح يوسوس الشيطان براسي والشيطان حريص بمثل هالامور وبعدها بدل منت بسعادة راح تدخل بمتاهت او مشاكل انتم في غني عنها،،،ومن هالمنطلق ابديت وجة نظري لها وفهمت الموضوع ان كل قصدي عشانها وربي كان عشانها،،،الحمدالله البنت اتزوجت وابعدت عنها برغبتي ولاجلها،،ودعوا الله عزوجل بان يوفقها ويوفقني ويوفقكم لكل ما فية صلاح ديننا ودنينا،،،ليس عيب ان نخطي فالله غفور رحيم والكن العيب هو التمادي بالخطاء،،وكما قال (ص)كلنا خطاؤن وخير الخطاون التوابين،،اختي الغالية سردت قصتي لكي لا تقعي بخطاء تندمي طوال حياتك علية//اسال الله سبحانة وتعالي بان يرزفك الزوج الصالح وان يهدينا واياك وجميع من بهذا المنتدي لكل خير انة سميع مجيب//اللهم امين
ختاما اختي الغالية وجميع الاخوات الغاليات اتمني من ربي ان يستر اعراضنا ويحفظ ديننا ويثبتنا على طريق الحق،،،اتمني من الجميع بالدعاء لي بان يوفقني ويرزقني ربي الزوجة الصالحة التي تعينني على الدنيا والاخرة،،،،،،،،مع خالص تقديري واحترامي للجميع |
اختى ابعدى عنه هو مش بيحبك هو حسب مصلحته وبس ابعدى انتى عنه الاول احسن مايسيبك ويخطب غيرك وانت قاعده ويبقى شكلك وحش اتخطبى انتى الاول احس ليكى ويردلك كرامتك
|
[align=center]
لاحول ولاقوه الابالله ...نصيحتي عليكِ بالابتعاد عنه ...والضغط على مشاعرك تجاه لتركه ونسيانه ...ومع احترامي لكِ لاارى فيه اي صفه من حديثك عنه قد يجعل الارتباط به فماديا وعلميا انتِ افضل منه ودينيا فواضح انه بعيد عنه... وليس جمال شكله سوف يسمنكِ ويغنيكِ من جوع في الحياه الزوجيه ...ويبدو انه انسان انتهازي وصاحب مصلحه وهذا يتضح من حديثكِ عنه ...ولاتنسي انكما تعيشان انتِ وهو فتره مراهقه الشباب وخاصه هو فجميع مشاعر تلك الفتره غير صادقه...اتقي الله وراقبيه يوم لاينفع الندم ...وفقت لكل خير [/align] |
عن قناعه اختي انا متأكده انه ماراح يخطبك ...وانا ما اقول كذا عشان احطمك بس صدقيني حتى لو تزوجتوا والله ماراح تكونوا مرتاحين ابد...بس احمدي ربك ان الموضوع انتهى على خير وانه ماصار شي بينكم تندمين عليه ...ادري انه صعب عليك تنسينه بس حطي في بالك انه( من ترك شي لله عوضه الله بخير منه) يعني انتي راح تتركين معرفته وتليفوناته كلها لأنها معصيه واحتسبي الامر لله وتشوفين راح يعوضك الله بأفضل منه .. |
اختي لا تضايقين من اللي بقولة
انصحج من كل قلبي انج تنسينة لان اذا هو من الحين ما يسويلج سالفة فكيف عقب الزواج وحطي في بالج ان هذا مب حب اذا كان يحبج جان من زمان خطبج على الاقل يخبر اهلة وخاصة هم اللي يشجعونة حبيبتي لا تدمرين حياتج مع انسان بديتي وياه بالغلط لانة اكيد بينتهي بشي بنهاية مو زينة ارجو انج تاخذين نصيحتي ولا تذلين عمرج حق انسان ما يستاهل لاتنزلين مستواج ومن متى استوى الحب مصلحة عشان يطلب منج فلووووووووس الله يساعدج ويسر لج امورج وانا قلت هذا الكلام لاني ما ابغي تمرين بانواع الهم والغم والضيق والندم ايضا واسمحيلي |
ماراح يكون زوجك اذا جاءك عريس توكلي على الله نصيحة من اخ يتمنى لك ولجميع المسلمين الخير مريت بموقف مشابهة
|
والله مصيبة
شلون يرضى يسوي علاقة وياك وهو صديق لأخوانك ..؟؟ ماستسغتها ابدا ..؟ ................................................ والله اشور عليك تشيليه من بالك لانه بكره ولا بعده ما راح يتحمل مسؤولية بيت ولا يصرف عليك . أخي الفاضل الرجاء الإلتزام بقوانين المنتدى وعدم التعرض للمذاهب الدينية تفضل بمراجعة هذا الرابط http://www.66n.com/forums/announcement.php?f=59 البند رقم 7 دمت بحفظ الرحمن تحياتي |
الأفضل يا أختي تقطعين علاقتك به....وهو انتهازي كما بين الأعضاء
وعليك بتغيير رقم جوالك.... وأول ما يجيك خاطب وذو خلق ودين وافقي عليه ...ولا تضيعين عمرك تنتظرينه.... إذا خطبك كان بها ..ولين ذاك الوقت...حاولي تنسينه وتشغلين نفسك... |
اشكر كل اللي ردو علي واتقبل منكم النصيحة بصدر رحب....وماازعل لأني انا اللي طالبة ارائكم ...هذا اولا
ثانيا: لاتعصبون علي اذا طلبت منكم طلب صغيييير......بعد كل الكلام اللي كتبتوه طلبي هو::((ابقي اختبار اختبره يبين لي لو بنسبة 50% انه حاطني في باله كزوجة......)) ادري بتقولون بعد الكلام اللي سمعتيه منه ومو مقتنعة....بقولكم : يمكن الواحد وقت اللي يتضايق من الطرف الثاني يقول كلام لأنه منقهر ...او كردة فعل من كلام هو سمعه)) على فكرة: هو طيب معاي بس اسلوبه احيانا مايعجبني... انا احيانا احس اني قاسية عليه..لأني اغلط عليه وقت اللي اكون معصبة عليه او متضايقة منه ارسل رسايل يمكن لو واحد غيره مايفكر انه يتصل فيني ولا يرد علي....هو لا والله مجرد مااتصل عليه يرد ..وبدون مااعتذر ينسى اللي صار ويكلمني عادي...لاتقولون عشان فلوسك ..لأني وقتها ماكنت اعطيه ولا شي...وماكان في ذاك الوقت يطلب مني.. بالنسبة للي قالت استخيري......انا استخرت 3 مرات في خلال سنه كل ما ازعل منه ويضااااايقني ..استخير اني اتركه واقطع علاقتي فيه نهائيا..وفي كل مرة تطلع الخيرة نهي مشدد.... ممكن احد يفسر لي ليش الخيرة ان اتركه تطلع نهي؟؟؟؟ واللي قالوا لي لو انو جاد كان تقدم يخطبك...!!! كيف يخطبني وهو يدرس ...ماخلص الثانوية بس باقي له هذا الاسبوع ويخلص....وبعد كم يوم النتايج ....وبعدها ان شاء الله الوظيفة انا قلت انتظر واشوف اذا خلص وحصل وظيفة وش راح يسوي.......وين راح يهرب...اهو جارنا...!!!!!! بس ابقي منكم كيف اقدر اختبره واعرف لو كان عنده رغبة في الزواج مني ولا...لا لأني حسيت من كلامه انه في امل.....مدري احساسي صادق ولا انا اتوهم واربط الامور ببعضها... لأني قلت له ابي اروح مشغل ابي اقص شعري...وهو يدري انه شعري طويل واسود ...وهو حسب الكلام اللي سمعته من اهله(حتى قبل مايعرفني) كان دائما يقول اذا بتخطبون لي زوجة ابقي وحدة شعرها اسود وناعم وطويل ... طبعا الحين اهو يدري ان شعري طويل وناعم ولونه اسود ..ولمن قلت له ابي اقص شعري...على طوووول قال لاااااا....لا تقصينه...انا مااحب الشعر القصير.. ويوم قلت له طيب ابقي اصبغه اغير لونه ...بعد قال لي..لا...انا مااحب الاالشعر الأسود..حتى البني مااحبه.. عااد انا فرحت لأني حسيت انه فيه شوووية أمل...في انه يأخذني.. بس تتوقعون ماله علاقة ؟؟... وفيه شي ثاني بعد.... مرة من المرات كنت اتكلم واسولف وياه...قلت له انا احب هذا الشكل (اقصد نوع من انواع الاثاث) رد علي وقال لي :نشتري بعدين حق شقتنا... بعدين قلت له انا احب اجلس دائما على الكرسي الهزاز....قال لي ...حتى هذا نشتري مثله حق غرفة النوم.. وبعد انا في هاليوم فرحت حيييييل لأنه قال لي نشتري...حق شقتنا... هذا الكلام بعد عطاني امل..حتى لو بسيييط وفيه بعد موقف ثالث.. بصراحة هو بعد مايقصر معاي....انا كل ماخلص الرصيد اطلب منه يشتري لي بطاقة شحن طبعا مش كل مرة عليه...لا...احيانا...واحيانا هو يتعذر يقول ماعندي... انا مااحب اضغط عليه لأني ادري انه ماعنده...واللي عنده يخليهم للجميعات والاكتتاب...عشان كذا ماازعل اذا قال مافي.. مرة من المرات شرى لي بطاقة ..وعطاني الرقم خطأ...ويوم ثاني قلت بشحنها اتصلت قلت له..عطيتني الرقم خطأ عيده...طلع البطاقة من الدرج في غرفته..وعطاني اياه.. قال لي شريت لش بطاقات وااااجد...كلهم مخليهم في الدرج في غرفتي...قلت له ليش ماترميهم ...؟؟ قال لاااا....وهو يضحك خليهم بجمع بكم شريت لش وبخصمهم عليش من المهر...بخليك تدفعينهم من المهر.. وهذا الكلام عطاني امل ...حتى لو كان يمزح.... على فكرة: قبل فترة بسيطة..هو قالي اذا خلصت الاختبارات بشتري لك هدية (جوال وخاتم ذهب وساعة) وانا قلت له ماابقي خاتم عادي..ابقي دبلة ..قال لي بشتري لك دبلة وبكتبلك فيها عبارة حلووة تعجبك..بس مارضى يقولها ..يقول مايصلح مفاجأة... عاد انا قلت بستنى وبشوف النهاية وياه هذا الحين مابقى على الاختبارات شي,,, بس في شي يمكن يخرب السالفة اني هاليومين زعلانة عليه... ها وش اسوي بنظركم ...شنهو الاختبار او المقلب اللي يناسب اسويه واتطمن؟؟؟؟ وليش الخيرة دائما في تركه ((نهــــي))؟؟ وبرأيكم ماانتظره هالايام الجايه يمكن اذا خلص....يتغير شي.. لأني اخاف اتركه وانا اردري ان مايحبني بنفس الحب اللي انا احبه,,,فأخاف اذا تركته ..وهو الحين بيخلص..واخوه عنده واسطة عشان التوظيف...وهو اصلا مشترك في جمعيه..عشان الزواج ..واهله دائما يقولون له بس تتوظف ..اخذ الجميعة..ونكمل لك الباقي واتزوج...هذا غير فلوس الاكتتاب والمساهمات...يعني احيانا اقوله اذا تركته..وهو الحين يدرس..بس يخلص..يصير عنده مجال..وبتتغير اشياء كثييرة..وفي ذاك الوقت اذا استعد للزواج وانا تركته ..اكيد راح يقول انها نستني...وراح يخطب غيري..وانا اظل بحسرة....مع اني انا اللي ساعدته...في كل شي...وهو بنفسه كان يقول دائما والى اليوم.((انتي غيرتي في حياتي اشياء واجد..وانا كنت قبل مااعرفش ولا شي..)) وانا دائما احب اسأله...(بعد ماعرفتني شنو الي تغير في حياتك...؟؟)ويقول..كل شي..للأفضل.. يعني اقول بهالسهولة..اتركه لوحدة غيري...وانا اللي عزيته ورزيته...شلون اسمح لغيري يأخذه.. وابقي رايكم في حاجة ثانية... عشان انا مااظلمه ومااظلم نفسي... افكر اني اقلل مكالماتي معاه ...بصورة اكبر.. بس مااقطع العلاقة ...لأني اخاف يفكر اني نسيته...واذا خطب غيري وقلت له شنهو السبب اللي خلك تختار غيري...بيقول...مادريت انك الى الان تحبيني..فكرتك نسيتيني.. لأني دائما أسأله ..فيني شي مو عاجبك...يقول لا...اقوله يمكن انت تفكر تأخذ وحدة كذا ...ولا كذا...يقول... لا...بس لو تطولين اشوووي...وهو يمزح...لأنه هو طويييل...بس عادي متقاربين في الطول..انا اوصل حق كتفه.. المهم ..قلت له مافي شي معين عشان اذا انت في بالك شي او صفة معينه تبقيها تتوفر في زوجة المستقبل ..يعني انا انسحب من الحين غصبن علي رضيت ولا زعلت,,لأنه كل واحد من حقه يختار شكل الزوجة اللي بيعيش معاها.....قال..لا...انتي مافيك شي...بالعكس..حلوة ..وعاقلة...ودارسة...ومثقفة...عشان تربين عيالك زين.. فماأبقي اذا قال بخطب...يقول انا كنت ابقي وحدة كذا.. يعني اقول مااطلع من حياته نهائيا لأنه لو فكر بيخطب...بيقول اكيد نستني... على فكرة انا من الاشياء اللي...عطتني امل كبير... اني يوم من الايام حلمت حلم ...وفسرته عند ناس يعرفون حييييل يفسرون احلام... ((راح ارمز له برمز عشان اعرفه احكي لكم..)) A: هذا الشخص اللي احبه B : هذا انا حلمت اني جالسة انا مع امي في بيت A مع اهله ، نادتني اخته ، قالت لي تعال نصعد انا وياك فوق.. انا استأذنت من امي ..ما رضت لي اصعد...بس انا من حبي له ابقي اصعد لأني ادري انه غرفته فوق..فحبيت اني اروح...طنشت كلام امي..ورحت مع اخته (هذي أخته هي اللي تدري بالسالفة وهي تصير زوجة اخوي وعمرها من عمري ) المهم رحت بصعد فوق معها..شفت على الدرج طماطم كبار حلوو ولونه احمررررر...مصفوف على الدرج كله.. ويوم جيت اصعد امشي على الطماطم بشووويش...خايفه عليه يخترب... المهم اني صعدت و الطماطم ولا وحدة اختربت.... وانبسطت لأنه ماصار فيه شي وصلت الى غرفته(A)وفتحت اخته الباب قال لها وش تبين ..وهو مابعد يشوفني... لأني كنت واقفة جنب باب الغرفة ..قالت له..ما ابي شي بس B(اللي اهي انا) تبقي تشوف غرفتك.. التفت علي وهو كان جالس قال لها..وهو مبتسم ..خليها تدخل لأنه هذي الغرفة اصلا غرفتها...ودخلت الغرفة وانا مبسوووووووطة.. وبعدها كأن امي رضت اني ابقى في بيتهم خلاص...ورجعت امي البيت اهي مع اهلي الموجودين..وخلوني في بيت اهله(A) وبقيت معهم,,, بسسسسسسسسسس.. فسرت لي الحلم وحدة شاااااطرة جدا بتفسير الاحلام..عندها خبرة مع انها ماتقرا ولا تكتب ..بس انا طلبت منها تفسره مع اني ماكنت اهتم بتفسير الاحلام ...بس لأنها من زمان فسرت اكثر من حلم وصار كلامها مضبوط...والاشياء اللي قالتها صارت .. فقلت هذا الموضوع لأنه داخل فيه الشخص اللي احبه ...ومدري شسالفة الطماط...وامي ..فقلت مافيه الا اهي... المهـــــــــــــــــــم.. تفسير الحلم... على فكرة اللي فسرت لي الحلم ماتعرف ان بيني وبين هذا الشخص علاقة.... قالت ان اخته راح تكلمك بموضوع زواج وامك راح ترفض ماراح توافق (هو بصراحة انا بعد احس ان امي مش مقتنعة فيه لأنها تقول فاشل لانه ماخلص دراسة وماتوظف الى الان) وانتي راح تتمسكين برأيك ...حتى لو امك مش موافقة وهذا الطماط :هذي حياتك اللي بتخافين عليها كثييير ..راح تكون حلوووة لأن الطماطم كبار ولونه احمر.. بس في الاخير بتقدرين تحافظين عليها صح.. وهذا اللي قال هذي غرفتك راح يخطبك وتكونين زوجتـه.. واهلك وامك راح يرضون في الاخير بعد مايشوفونك متمسكة فيه..بيوافقون... ملاحظة: هذا الحلم من زمان ..صار له تقريبا 6 شهور....وقتها امي كانت علاقتها بأمه مش طيبة ...بس الحين ...ياسلاااااام ...حبايب...وامه تلمح عن هالسالفة... بس ينتظرونه يخلص....... آآآآآآآآآآآآآآســــــــــــــــــــــفــــــــــــ ـة لآني طولت عليكم الكلام.... ابقي ارائــــــــكم في كل اللي كتبته ....تأيدون ...ولا ...وش الحل؟؟؟؟؟ ولكم مني الف شكر..لأنكم عطيتوني من وقتكم.... |
سامحووووووني على الازعااااج بس ساااعدوني تكفووون...ولكم الاجر من الله.....
انا ماطلبت ارائكم الا لأني عارفة انكم تفكرون احسن مني....وتفكيركم صح... |
حبيبتي
أبدأي حياتك صح اذا كان يحبك وتحبيه ودام أهله وأهلك يدرون بالموضوع خلاص توكلي على الله أنتظريه يخلص دراسته ويشتغل على شرط تكون وظيفته ممتازة عشان يحس بكيانة معاك وأنه الرجال ومايكون هذا السبب في خلافاتكم بعيد الشر ... وشجعيه على ان يواصل دراسته الجامعية عشان تكون حياتكم أفضل بإذن الله... تحياتي |
الله يوفقك اختي
وينولك الي في بالك وان شاء الله الاعضاء ينصحونك |
شذرت نور اشكرك على الرد...
|
همسة وفا
شكرا....لأنك دعيتي لي.. |
ياخيتي انا عندي فكرة
كلميه وقولي له ( انا انخطبت وش رايك ) إذا قال وافقي معناته مايبيك كزوجة وقصده يتسلى!! وأنا من رائي أنك تبعدين عنه أحسن خليه هو اللي يركض وراك وقولي له )(نفسي عزيزة ومن بغاني بغيته ) |
الاحظ في كلامك انك تقولين ما تبين تقطعين المكالمات اللي بينك و بينه علشان لا يفكر انك نسيتيه و بعدين ما يتقدم لك صح ؟
طيب ليش ما توضحين له و تقولين له انا ضميري يأنبني لإنه اللي نسويه حرام (تكلمون بعض) وانت خلاص مابقى شيء و تخلص الامتحانات و انشاء الله بتتوظف خلينا نقطع المكالمات الحين و لمن اصير خطيبتك بالحلال نرجع ...!!!! بكذا بيكون يدري انك تبينه بس لمن يكون نفسه و يمكن هذا يكون حافز له بإنه يجد اكثر في الدراسة علشان يخلص و يخطبك اذا كان يحبك... وانتي استني وشوفي و بتعرفين الاخبار مثل ما قلتي هو وين بيروح جاركم و قرايبكم يعني بتعرفين كل شيء جديد في حياته لو هو يحبك بتكبرين في عينه على الحركه هذي الله يوفقك انشاء الله وفكرة قمر مش بطاله جربي مارح تخسرين شيء نصيحة: لا تبينين له انش قاطه روحش عليه ، خلي عندش كرامه |
اعرف ماتشعرين به جيدا ولكن... ان كان هذا حاله معك وانتم غير متزوجين <<< (يتسلف) فماذا سيكون حاله بعد الزواج !!!! اتعلمين ان كان يتسلف منك حتى وانت زوجته بهذه الطريقة لقلت لكِ هذا خطأ في خطأ افيقي سريعا حتى لا تجدينه يأخذ نقودك ونقود اظفالك وثيابكم رثّة ويعطيها لعشيقته يوما... ويلقي بك في الشارع ستبكين بدل الدموع دما .. حزنا على حالك واطفالكالذين لا ذنب لهم سوى انك امهم و التي ظلمتيهم بيديك الآن افيقي انت غالية عند نفسك واهلك .. لا تنزليها الى هذه الدرجة مشكلتك انك الآن عمياء بسبب الحب الوهمي ومتعلقة ببعض تعليقاته التي قالها ربما دون قصد او حتى بقصد تعليقك وتعليق نقودك اي رجل حر عنده ذرة رجولة لن يقبل هذا .... للأسف انت من عرضت عليه نفسك ومالك ... من سيرفض!!! وربما يقبل من تعطيه مثلك او اكثر منك من رأيي اختبري نزاهته واعتقد ان هذا اختبار فشل فيه مسبقا معك من يريدك يأتي اليك مقدرا أخلاقك ووجودك معه ويصونك ويقدم لك الغالي والنفيس للجوهرة المكنونة وليس العكس !!!!! انت غالية ... انت فتاة ... انت مسلمة ... لا تنسِ رجاءا |
شلون بالله عليك تقولين انك استخرتي وكانت نتيجة استخارتك ما تتركينه ومالك قلبك للنتيجه ذي .؟
اول مره اشوف احد يستخير الله في شي حرام وغلط ..؟؟ عجبي والله ثم عجبي .. اعتقد انك شخصية متأرجحه مره تحطين فيه صفات مو كويسه وبعدين ترجعين تقولين انه طيب وعسول وانك انتي الي قاسيه عليه وتعصبين عليه . مره تقولين تعطينه فلوس وأخرى تقولين انه يشحن لك بطاقات ..؟ عجبي والله لأمرك . انا لو منه وربي مارتبط فيك .. كذا ما حبيتك من الله ... |
اختي الكريمة نصيحة مني انسيه والله ما يستاهل دوسي على قلبك والله يرزقك باللي فيه الخير ويعوضك خير منه
|
اقتباس:
هي ما حطت مشكلتها علشان تتمسخر عليها ممكن تعطيها الفكره بأسلوب ارقى من كذا بكثير الله يهديك بس |
| الساعة الآن 11:59 PM. |
Powered by vBulletin® Version 3.8.12 by vBS
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©