|
أريد التزين لزوجي ... ولــكن !!!!
السلام عليكم ورحمة الله وبركاته ...
يمكن تكون هذي المشكله ليست مشكلتي أنا وحدي .. ولكن الكثيرات يعانون منها في دولتنا نحن بالذات ... أنا أعيش مع زوجي في بيت أهله ...جميعنا في فله واحده ( ليس لدي ملحق خاص بي) ... في غرفه واحده .. ولدي طفلان .. ونحن مجتمع نلبس العبايه والشيله في الخارج .. وفي المنزل بحكم تواجد أخوان زوجي , يجب أن ألبس الجلابيه والشيله ........... الجلابيه يجب أن تكون ساتره وإيدها طويله والشيله كبيره وطويله للبيت .... وغرفتي مقابله لغرفه والدي زوجي وبجانب غرفة أخوه وطبعا لا تنسون غرف باقي الأخوان وعددهم 5 .. زوجي يطلب مني التزين له .. ولدي أبناء طالعين وداخلين ... والباب لا يقفل بالمره ... وإذا صار الليل أحاول أنوم الأطفال بسرعه علشان أبدأ أشوف نفسي ... وما تصير خمس دقايق إلا وبو العيال نايم قبلهم ... والله كل يوم على هالحاله ........... تعبت .. وأحس إن زوجي مضايق من هذا الشي .. لا تقولولي طلعي بيت روحك ... لأن زوجي لو يقدر ما قصر فديته ... ما أقدر أطيق حركات الشموع والورود والعشاء الرومانسي .. ما أقدر ألبس قمصان النوم .. ولا حتى أحط ميك أب ... حتى في الإجازات ما أقدر .. لأن أبنائي صغار والولد متولع فيني وما ينام غير معاي .. والبنت ترضع ... نروح شاليه بين وبين .. بس أنا ماريد يوم أريد كل يوم أتزين له .. :( :( خايفه زوجي يروح مني |
حبيبتي إنت تقولين زوجي فديته :22: لكن لاطقت برأسه مب قايل الا روحي فديتها :( تسنعي ياحبيبتي ومب شرط تطلعين بزينتك قدامهم خلي زوجك مايفارق غرفتك وبكيذا هو يشوف إنك مب مقصره وأهم شي نظمي وقتك نومي عيالك بدري لازم الابناء يكون نومهم مبكراً علشان الرجال يلاقيلها مره تقابله مره تتزين له تدلعه ترى كل هالاعذار ماهي شي عند زوجك ولا هو شايف إنه فيه مشكله في الوضع هو شايف المشكله فيك إنت للاسف دبري أمورك حبيبتي والله يسهلك ويسعدك |
ليتني أسلى ...
مشكوره حبيبتي على نصايحج ... ولا تقولين دبري أمورك ... أنا ما حطيت مشكلتي في النت إلا لأني مو عارفه كيف أدبر أموري ... وعلى فكره أنا وهو طول وقتنا في الغرفه .. ولــــــــــــــــــــــــــــكن ( العقبات ) .. عندي أطفال طالعين وداخلين ..ما أقدر ألبس قميص نوم أو عاري .. إشويه وأمه داخله الغرفه .. ربع ساعه وإخته الصغيره تسأل عن ولدي . وبعد ساعه إخته العوده تباني أفهمها الإنكليزي .. وبعد ساعتين الخدامه داقه الباب ... والله العظيم حالتي حاله .. جربت مره ولبست شورت لتحت الركبه وقميص بناتي ( شي حلو ) وإستانس .. وإشويه الولد طايح ويصيح برى وبسرعه بسرعه بدلي وروحي شوفي شو السالفه ورجعت ولبست الشورت وبعد 10 دقايق زوجي يبى أجيبله شي من برى ... وردي بدلي مره ثانيه ... ورحت وجبتلها ورديت ولبست الشورت مره ثانيه .. والله العظيم يومي كله بدلي ولبسي .. وإذا قتله روح إنت شوفني شو لابسه ... قالي دبري نفسك وروحي إنت ........ تعبت وماعدت ألبس حتى الشورت ..... شو الحل في رايكم أنا الغلطانه ولا هو المفروض يساعدني ويعذرني ........ |
حبيبتي بالنسبه لامه وخواته عادي خلهم يشوفون لبسك وبعدين نظمي نفسك وخلي الناس يحترمون هالتنظيم يعني بليز لاجا زوجي لاأحد يدخل علي بلا مذاكره بلا إنجليزي عيوني محد بينفعك وعيالك ليش ماينامون بدري ترى من حكيك أنا شعرت بضيقه مب زينه تلبسين وتفسخين بيتملل وبقولك لاعاد تلبسين شي وإجبريه يساعدك قوليله يا أطلع كيذا يا تطلع تشوف الولد بعد مب حاله بس برقه عليه تغنجي الين يصير هو مشاركك حل المشكله وكل الاشياء اللي يحتاجها حطيها عندك حطي ثلاجه صغيره وغلاية شاهي وغيره ماقلتيلي ليه عيالك ماينامون بدري :15: |
انا اعرف وحدة في مثل حالتك بس مهتمه بنفسها .. شلون ؟؟!
تعرفين عباية الكتف .. البسي اي لبس تبين قصير وتزيني بس لما تطلعين من غرفتك البسي هذه العباية واذا دخلتي غرفتك اخلعيها .. ولا تشيلين هم .. |
بقليل من اعادة التنظيم تستطعين
1. يجب ان يكون حرمة لغرفتك وان تعودي الموجودين على اغلاق الباب بالمفتاح كذلك يجب ان تصبح عندك عادة وقت القيلولة وهي فترة من اليوم تغلقي فيها الباب وتختلي بزوجك واذا اردت تدريس اخت زوجك فلتكن في وقت زوجك غير متواجد في البيت 2. بالنسبة لاولادك مو مهم خليهم فايتين طالعين على الغرفة ولكن الوقت الذي اقترحت عليك تخصيصه لك ولزوجك من الممكن ان تقومي بالاتفاق مع اخت زوجك الصغيرة ومع الخادمة بالعناية بهما وطبعا لا تنسي الهدايا التشجيعية 3. من الممكن ان تقومي بالعناية بشعرك ووضع مكياج ناعم وخفيف ( ماسكرا كحلة جلوس ..) وتلبسي اللي بدك اياه وتقومي بتعليق العباية عند الباب لسهولة لبسها عند الخروج ان شاء الله تتهني بزوجك وهو يتهنى فيك يا رب وطمنينا اذا امورك انتظمت وتحسنت |
اختي البسي الي ودك تلبسيه ولا تحرمي نفسك بس تعودي
تشتري شي واسع ينلبس فوق الثياب ان احتجتي مثل الروب اوعباة الكتف وبتكون افضل كما ذكروا لك .. ولازم اختي تعودي اولادك من بدري ان هم يكونوا في غرفه مستقله كم شهر وراح يكبروا مو معقول تضلوا كلكم في غرفه وحده ! والأطفال اذا ماتعودوا من الصغر صعب تفرضي عليهم فرضيات لما يكبروا .. كذلك اختي اضم صوتي لمن ذكر عند حضور زوجك لازم تعودي الكل ان يقتحم خلوتكم .. اولهم الشغاله ويجب ان يكون لكم استقلاليه وتقفلين الباب على طول عودي الكل على هالقاعده يمكن يتضايقوا اول الأمر .. بس بعدين بيتعودوا ويعذروك .. ولو سألوك قولي زوجه وتبي تآخذ راحتها مع زوجها لأن اختي على حسب ماذكرتي مالك غير هالغرفه يعني ماحد راح يلومك .. وبعدين بعد بقول لك شي مهم لا تعودي زوجك ان يعتمد عليك في كل شي في تربية اولادك لازم تعوديه على المشاركه .. وحسسيه ان هو بعد ابوهم مو بس بالأسم .. يعني مره انتِ مره هو .. الحياه الزوجيه اشتراك .. ومشاركه .. اتمنى اكون افدتك .. |
بالإضافة للي قالوه الأخوات
من إنك تلبسي العباية أو حتى الجلابية فوق التياب استعيني بروب حرير تلبسيه فوق قمصان النوم القصيرة عشان إذا احد من خواته أو أمه يبوا يدخلوا طبعا أكيد بيدقوا الباب عليكي قبل مايدخلوا وإذا كان لا اطلبيها منهم بأسلوب حلو وعندي اقتراح ممكن تركبي ستارة حلوة على باب الغرفة بجيث لما أولادك يفتحوا الباب تظل الستارة ساترتك لبين ماتقفليه دمتي بحفظ الرحمن تحياتي |
والله حسيت فيك يا اختي اذا ما فاداتك افكار الاخوات لازم تصبري لغاية ما تتنتقلون بيت بروحكم ولازم هو يقدر الوضع بنفسه ويتفهمك ...
ولكي مني هذه الفكرة خلي زوجك ياخذ القيلوله لحاله ويشبع نوم علشان في الليل يسهر معاك ونيمي العيال بدري وهما بالذات ما تخليهم ينامو بالنهار علشان في الليل ينامو بكير والبسي على كيفك وتمكيجي بعد ما تاخذي كل شئ تريديه من برة الغرفه حتى ما تضطري تخرجي ..ولما تروحو لبيت لحالكم راح كل شئ يتغير وكانك غيرتي الروتين وراح يكون تغيير حلو في حياتك ..مع تمنياتي لك بالسعادة |
مثل ماقالت ناديتك هلا..
البسي عباية كتف وااسعه ودائما تصير قريبة منك للحلات الطارئة,,اريح من التبديل كل شوي.. |
تزيني له بالغرفه ولا تطلعين خليه هو الي يجلس عندك وقولي له العذر ان اخزانه موجودين لا تسطعين ان تتزيني وهم موجودين
|
اقتباس:
حبيبتي تزيني لزوجك وإذا طلعتي مثل ماقالت الاخت ناديتك هلا البسي العباية اما بالنسبة للمكياج عادي اذا انتي ماتبغين اخوان زوجك يشوفونك بالمكياج البسي نقاب او حطي الطرحة على وجهك وإنتهى الموضوع وبالنسبة للباب قفليه وحاولي تخلين جلستكم مو قدام الباب او جيبي والله مدري إيش إسمه الي هو الحاجز حطيه قدام الباب بحيث الي يفتح الباب ويسكره مايشوفوا الي في الغرفه الله يعينك أختي ويفرج لك يارب |
***** هــــــــــــــلا وغـــــــــــــــــــــلا00 شوفي حبيبتي00 أوراق خريف00 أنا بسألك زوجك متى وقت عمله .. هذا أولا ؟؟ ثانيا 00 يجب إنك تتفاهمين مع زوجك ( إذا كنت تقولين انه متضايق من هالشي) إذا كان دوامه اعتيادي يعني بيروح الصباح ويرجع في الظهر 00 حاولي تقومي أطفالك الصبح يعني قولي الساعة 9 00 وتقومين أنت وتفطريهم وتخليهم ليعبو حتى ينسو النوم 00 لأنهم يمكن مع الظهر يجيهم النوم00 وبعدين قبل مجيء زوجك من العمل 00 بنصف ساعة حاولي تعطي أطفالك وجبة الغداء وتنوميهم 00 وبعدين روحي شوفي نفسك وتجهزي 00 حتى لوكنت بتطلعين برى غرفتك 00 حطي مكياج ناعم وخفيف (مناسب للنهار ) 00 ورتبي شعرك ،، وجهزي لك لبس مناسب لزوجك ورتبي الغرفة و و و و و البسي الجلابية اللي تناسب تطلعين فيها برى 00 وبعدين بعد ماتتغدون (أعتقد إنكم تـتــغدون سوى أنت وخواته والرجال لوحدهم مع بعضهم ،، صح ولا لأ) بعد الغداء على طول طييييري لغرفتك00 والبسي اللبس اللي جهزتي 00وانتظري الحبيب 00لين يجي غرفته 00 وبعدين بدلي له ملابسه 00 وريحيه وحاولي تـتحسسي اماكن تعبه لين ينااام وهو ناسي التعب00 وحاولي تنامي معاه00 وبعد العصر 00سوي له كاس شاي00 و رتبي نفسك 00وحطي مكياج ناعم حتى لوكنت بتطلعين برى 00لأنك مثل ماتقولي الشيلة معاك 00 خلاص يعني اخوانه مراح يشوفوك 00وبنفس الوقت إذا شافك زوجك تكوني بأبهى حلة 00 وأيضا حاولي تغيري لبسك 00 عن الجلابية 00 يعني تنور ة وبلوزة يكونو حلوين وساترين00 والبلوزة مرة ضيقة ومرة واسعة ومرة تكون قطن وشاربة للجسم نوعاما ومرة تل و و و و 00 والتنورة مرة ضيقة ومرة واسعة و و و و ومن هالحركات 00 ورتبي البيبي00 وكذلك طول يومك 00 يمكن بتحسي بالتعب أول مرة وثاني مرة 00 لكن مع الوقت بتتعودين 00 كل شيء من أجل زوجك يهووون 00 وفي الليل 00حاولي تنومي اطفالك قبل 11 00 يعني 10 أو 10:30 لا تصير 11 إلا وأنت بغرفتك00 استعدي أنت لزوجك 00 باللبس والدلع والشموع ولو بغيت بحركات رومانسية و و و أما بالنسبة لكلامك إنو أحيانا أمه داخلة00 أو أخته00 أو أو أو ياحبيبتي 00 وين مفتاح الغرفة ؟؟؟؟ شو الفايدة منه 00 قفلي البااااااااااااااااااااااااااااااااااااااااب 00 واللي بيدق الباب00 موعلى طول تــفــتحين اسألي أول 00 مين عند الباب وشو اللي يبغى 00!! يمكن أحيانا تفتحين ويصير أي شيء مايسوى 00 أنا معاك إذا كانت أمه فعيب إنك تكلميها من ورى الباب 00 أما أخته الصغيرة أو الكبيرة أو الخادمة أو أو 00 عادي كلميهم من ورى الباب00 وإذا شيء يسوى افتحي 00 وحاولي تتفاهمين مع زوجك بهدوء وحب 00 انو إذا كنت بها البس يحاول يفتح الباب هو 00 ويتفاهم مع اللي عند الباب إذا كان هو يفي بالغرض00 أو أذا طاح طفلك يحاول يجيــبه و و ( طبعا إذا كان مو مرهق او جاي من الدوام ) واذا كنت مشغولة عادي قولي مشغووولة00 كل انسان وخصوصياته 00 وخليهم يتعودو على نظامك 00 بعد ياعيني 00هذا ولدهم إذا مايبون سعادته وش يبون 00 !! وزوجك إذا طار من ايديك محد بينفعك 00 وطلباتهم مثل اللي تبغاك تــفهميها انجليزي وغيره 00 فهميها تجيك بوقت محدد تكوني أنت مو مشغولة مع زوجك أو أي شي ثاني00 وحددي لها وقت معين يوميا مثل العصر ( يعني ماتكوني مشغولة ) وطفلك اللي متولع فيك 00 إذا كان عمره سنتين 00 نصيحتي لك عوديه من الآن الآن الآن أنه ينام بسريره وإذا حصل ينام بغرفة 00 وتكون قريبة منك يعني بجناحكم أو ماشابه 00 لأنك بعدين إذا كبر بتتعبييين معاه ومابيرضى يطلع لوحده 00 وإذا عندك طفلين فرصة حلوة إنك تطلعيهم سوى وأسهل لك 00 حتى يكونو سوى ومابيخافو ويتعودو على طول00 بس حاولي وماتيأسي00 وشوفي حبيبتي إذا تعود زوجك على كذا بيحس باهتمامك فيه ورعايتك له 00 وبيحس انو مافي تقصير منك 00 بس أهم شيء خليك بغرفتك وبرى00 مــرتــبـة 00ومتجملة 00 وكل مكان له ضوابطه00 وشي مهم انك تحطي بغرفتك ثلاجة صغيره مثل ماقالت اختي ليتني اسلى تحطي فيها بعض الأشياء ( عصير ، كيك ، موية ، و و و ) يعني للحالات الطارئة لك ولأطفالك ولزوجك حتى ماتطلعي وتـتبهذلي00 أتمنى أكون أفدتك 00 وسامحيني على الخطأ والزلل00 تحياتي لك ِ***** |
هلا
بقولج شي شو علاقتج مع عمتج وخوااته اذا علاقتج فيهم اووكيه خلي عياالج عندهم خليهم هم يرقدونهم وخبريهم انهم يسااعدونج تعرفين انا اقول حق خواته انه انا جي بسوي فلازم يعذروني لأنه انا ما بيلس معاهم اليوم ويتفهموني أما عن شكلك فلا تهملين عمرج عاادي ما فيها شي اذا كنتي لا بسه وكااشخه في البيت في أشياااء حلوة تقدرين تلبسينه جدام إخوانه وهو سااتر أصلا مب لازم جلابيه عااديه تقدرين تااخذين لج من رااجو أو شيتل أو اليشمك أشياء حلوه خفيفه تلبسينه وتتكشخين فيها وحطي اشوي ميكب خفيف المهم في شي في ويهج وبعدين أنا سألت حد من الشيوخ وقلت له شو الي اعاني منه يعني شراتج بضبظ بس ان ما عندي عيال قالي اذا ريلج يباج تتزيين له عاادي ما فيها شي ومب حرام وفي الليل رقدي عيالج من وقت أو مثل ما قلت لج خلي حد من البيت يهتم فيهم وانتي سوي الي تبينه في الغرفه واذا فخااطرج شي او تبين اي مسااعده انا موجوده وفالج طيب |
حاولي انك تجدي وقت لزوجك اكبر بتنييم اولادك باكر شوي والزينه ممكن تكون خفيفه وحاولي احضار كل ما يلزم زوجك قبل دخولك الغرفه واذا اضطريتي خلي العباية قريبه او روب واسع وممكن تسهليها لو حبيتي ترضي زوجك وتسعديه بزينتك. وربنا يسهلك الامور
|
نقل الى عالم المتزوجين
|
مشكوره ليتني أسلى على المداخله القويه ....
العيال ينامون 7:30 أو 8 يكونون نايمين .. من الساعه 6:30 أبدأ أعيشيهم وأحميهم وأعطيهم رضعتهم ... ولــــــــــــــكن للأسف لين ما أخلص معهم يكون أبوهم من التعب نام ... (ما يحب ينام بعد الغداءإلا نادر ) والله العظيم إن إطفاء الأنوار عندنا يكون أحيانا على الساعه 8 أو 9 وخلاص ينام بو العيال وينامون وأدخل ألبس بيجامه عاديه وحط راسي ونام ناديتك هلا ... ocesndream ,,,, أطياف الخليج أشكركم جميعا على المداخلات الجميله وراح أحاول أنفذها إن شاءالله ... للأسف زوجي من النوع الإتكالي 100% والله العظيم هذا الشي تاعبني ... معتمد عليه في كل شي .. في مره كنا نايمين وما حسيت إلا أحد يقعدني من النوم ويناديني ولما فتحت عيني إلا وبو العيال يبي يشرب ماي ... والله العظيم إن الثلاجه ف يالغرفه وما تبعد مسافه خطوتين بس خلاص حتى وهو نايم ما يحس بنفسه ... :( |
اقتباس:
سهل وعملي وبيريحك ربنا يوفقك لمرضاته |
أمة البديع ... دنيا الروح ... كل الغلا ... دكتور حنون ... لحن السعادة ...
مشكورين على المداخلات وإن شاءالله أحاول أطبق شي من اللي قلتوه .. لأن في هذي الحالات يسهل الكلام ... ويصعب التطبيق والله ... وبالنسبه لأهله وأمه وخواته مو لهالدرجه ... يجون للضروره وطبعا بعد ما يدقون الباب وخلاص راح أمشي على رايكم وما راح أستحي منهم وخل يشوفو اللي يبون يشوفونه ... :d على رايكم وعلى فكره نحن في بيت لازم الكل يتجمع ... يعني إذا قعدت كم ساعه في غرفتي طالت الأعين وكثر الكلام من ..... ليش منخشيه في غرفتها ؟؟؟؟ ليش ما تطلع ؟؟؟ 24 ساعه في حظن ريلها ؟؟؟ والذي منه ... لأن هالكلام طلع قبل لا نجيب الأطفال وللأسف زوجي ألحين هو اللي يقولي خلينه نطلع برى نجلس مع العايله .. ما يصير قاعدين في الغرفه كله ... ومن هالكلام ... للأسف أهله تفكيرهم قديم يعني الست تطبخ وتنظف وتربي العيال ... ماعندهم المره لازم تتعدل وغيره وغيره .. بس طبعا أنا ما أعطي هالشي أي إنتباه وأشوف نفسي .. |
اختي حاولي تطلعي في بيت لحالك
هذه احد مشكلات السكن مع اهل الزوج |
مجرد رومانسيه ... أشواق ...
والله أحس إنكم إنتو حاسين فيني أكثر .. مشكورين على المداخله...وعلى فكره أنا ما ألبس أي جلابيه في البيت .. كل جلابياتي من اليشمك وشيتل .. والهند والكويت .. وألأبسهم مع شيلة تكون نفس اللون نوعا ما ... وأرتب نفسي وأحط بودره ومسكره وجحال وقولس وأتعطر وألبس إكسسوارات خفيفه أو ذهب خفيف للبيت ... بس اللي قاهرني مو عارفه أرتب نفسي .. يعني ألبس لبس له هو .. مثل الشورت والجينز وقميص النوم .. إذا هو ينام قبل أبناءه من الساعه 8 أو 9 هو نايم ... والله تعبت وأنا أحاول برجولي وإيدي راح أحاول أطبق نصايحكم إن شاءالله من اليوم وياليته ينام الظهر عشان أعرف أترتب إشويه الجدول وأنا معاه الظهر والأطفال يكونون برى عند الخدامه |
sabareena >>>>> gmuhanna >>>> بوبو 80
إن شاءالله أحاول اليوم وأقوللكم الأخبار إن شاءالله ... وعلى السكن لوحدي ما أقدر ... لازم أقدر ضروف زوجي ... |
حبيبتي والله ما حبيت اطلع وانا مو راده تدري ليش لاني مريت بنفس الظروف الي مريتي فيها وانا اكتر شوي كنت اغطي وجهي بعد تخيلي المأساه زوجي قالي نسيت كيف شعرك
لكن كثير كنت احاول انيم العيال واجلس اجهز نفسي قبل ما يرجع اهم شي حبيبتي زوجك ممكن تتزينين وتبقي جالسه خلف الباب مثل ما كنت اسوي:d وممكن تشغلي نفسك بغرفتك يوم كامل ابقي بغرفتك وتجهزي ونبهي عيالك اذا يبون يدخلون يدقو الباب الله يعينك يا اختي والله اني احس نفس شعورك لانك وانا اقرأ كأني اتكلم عن نفسي صبرا حميل وبالله المستعان في امان الله |
فتحي الباب ...
مشكوره أختي من جد ... فعلا هي مشكله الكثير يعاني منها ... قبل لا أجيب العيال كنت أقدر أسوي أي وألحين وخاصه العيال بعدهم صغار اللي توه يمشي والثاني توه يحبي ... جبتهم ورى بعض الله يحفظهم لي أن شاءالله .. يعني شغلتي شغله ومتولعين فيني وفي أبوهم ومو وايد مع الخدامه ولا مع أهله .. يعني لازم أباشرهم بنفسي وأباشر أكلهم ولبسهم وطلعتهم .. إِشويه واحد طايح والثاني يصيح والولد جوعان واللي واللي .. جبت الخدامه .. صح ساعدتني كثير .. بس هم لازم وراها .. وللأسف إذا قعدت بغرفتي يوم كامل الكل راح يتكلم ... لبش منخشه في غرفتها وليش ما تطلع وليش وليش والذي منه .. عايله بدائيه ماعندهم كلام التزين والتعدل والشموع .. يبون ست بيت وبس .. خليها على الله .. وإن شاءالله بحاول ومن اليوم بس مو اليوم كله في الغرفه .. :11: وإن شاءالله أرد عليكم التطورات اللي راح تصير ... |
اقتباس:
وسرت اجلس بغرفتي صدقيني كنت اسمع كلااااااااااام الله عاني الحمد لله لكن حبيبتي تقدرين تلهين عيالك بألعاب بالغرفه ولو خلتيه يوم عطلت زوجك علشان هو يرد عليهم ويقول لهم متزينه وما تبي تطلع من الغرفه وحطي ببالك (الناس مارح ترضى عنك ولا بشي لو قدمتي عيونك) الواحد بعمل لله فقط لكن حبيبتي اعملي الي تبيه ماحد هامه شي كل واحد اللهم نفسي فأنتبهي على نفسك حبيبتي والله اكتب وانا احس بقلبي يعورني من الكلام لاني مررت بنففففففففففس التجربه والله كأنك تتكلمين عني الله يعينك ويفرجها عليكي قريبا ببيت لوحدك يااااااااااااااارب في امان الله حبيبتي وطمنينا عليكي |
يا اخواتي المشكلة مو بعباية الكتف او اللبس ما شاء الله كل الاخوات مرة هجوم عليها لا تنسون مشكلة الاولاد وربشتهم
اختي في الله انا ما انصحك الا بتنظيم وقتك وزوجك صارحيه انك تريدي منه يشاركك بس بدلع عشان يفهم انك تريدين هذا الشي عشان تتفرغين لراحته وتتزيينين حقه هو " ما ادري كيف هاذول الرجاجيل جافيين في المعاملة باسثتثناء زوجي" |
.............
اولا لابد من تصليح قفل الباب وبعدها تفاهمو على الباقي
|
إحساسي جمال ... مشكوره عزيزتي على الإطلاله ....
وجدونه ... المشكله مو بالقفل .. المشكله بالأطفال الطالعين والداخلين .. وأهله يستأذون قبل لا يدخلون ... ومشكوره ... |
أشكر الكل على أفكاركم الحلوه ومساندتكم لي ... وأنا اليوم جايبتلكم بشاره حلوه ...
صحيح إني ما قدرت أضبط نفسي طول اليوم .. ولـكن والله حاولت قدر المستطاع ... أول أمس وبعد ما أكلت الصغاريه ولبستهم ونومتهم .. كان زوجي نايم الظهر ( معجزه لأنو ما ينام ) فرحت وأخذت شور وإستعملت صابونه معطره وبعده البودر .. ( والله ريحة جسمي كانت جنان جنان ):23: ... المهم وبعدين طلعت وإخترت أجمل قميص نوم عندي علما بأني ما لبست قمصان نوم من قرابة 7 أو 8 أشهر .. :( والقميص اللي لبسته في هذا اليوم صارلي سنتين ما لبسته ( يعني نسى شكله بالمره ) جديد :d وتعدلت على خفيف .. وطفيت النور وولعت الشموع .. وهو كان شبعان نوم ... ورحت ونمت جمبه وووووو .. والله هذي الليله ما راح أنساها .... حسيت بالفرق لما الزوجه تلبس بيجامه ولما تلبس قميص نوم ..:22: وأمس طلعني وتمشينه ولعبنا الصغاريه ورحنا تعشينا ورحنا البحر .. وحسيت بحنانه بحبه .. والله حسيت بفرق كبير .. أشكركم جميعا .. وإن شاءالله من اليوم وطالع ... حتى إذا ما لبست أحلى اللبس في النهار أقلها راح أحاول بأي وسيله إن أنوم الأطفال وأخليه ينام الظهر علشان أسهر معاه لو ساعه أو ساعتين لوحدنا .. ( الله يخليه قرة عين لي ويخليني قرة عين له ويبارك لنا ويوفقنا ويحفضنا من كل سؤ .. آآآمين ) أشكركم مره ثانيه .... |
العفو اختي الكريمه الله يوفقكم ويسعدكم ويبعد عنكم المشاكل ويارب يرزقك بيت مستقل وتأخذين راحتك اكثر
في امان الله |
اقتباس:
|
فاغر ... فتحي الباب ...
أشكرك مروركم :17: |
الغاليه انا عانيت مثلك كنت في غرفه وحده في نفس البيت سنه كامله لكن الحمد لله بعدني معهم في البيت لكن لي قسمي الخاص خارج الفيلا .. غرفه و صاله مع مطبخ تحضيري .. لو في استطاعه انكم تبنون في ساحة بيتهم بيت صغير لو غرفتين وصاله نقول الحمد لله منه انك معهم في البيت ومنه انه لك استقلاليتك و حريتك في لبسك و كل شي ..
والسموحه منك ... يرجى الابتعاد عن اللهجة العامية ليكون الكلام مفهوم للجميع وشكرا / البتول |
أوراق الربيع :22: مداخلتي قويه :29: يعني ضايقتك صح والله من حرتي حبيبتي عليك كثير أعرف يعانون مثلك والنهايه يكون الغلط منهم ويبدأ الزوج يتشكى مع إنه سبب المشكله آسفه لو أزعجتك والسموحه ومبروك صباحيتك وردي :17: |
اقتباس:
|
| الساعة الآن 09:21 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©