|
نصيحة ابوي غريبه علي وبنفس الوقت فيها حكمه؟
السلام عليكم ورحمة الله وبركاته يااخوان انا جايكم ومعاي موضوع صغيرون وبنفس الوقت فيه نصيحه اعتبرها من ذهب لانها فعلا دقت في خاطري حيل الموضووع وما فيه كنت قاعد مع ابوي علي قهوة العصر وابوي من النوع المتدين جدا وبنفس الوقت شبابي ومتفتح رغم عمره الكبير .. الله يطول بعمره وماحب اقول رجال عنده حكمه ومتدين إلي ابعد الحدود وامدح فيه ! لكن كل من شافه قالي ابوك يذكرني بالصحابه ؟ يالله انك تثبته بس وتتقبل منه المهم وانا قاعد معاه واناقشه عن امور الزواج والزوجه والزوجه شنو وكيف وشلون قالي اسمعي ياوليدي قلتله تفضل قالي كل الارشادات والتعاليم اللي تحتاجها مني كونك مقبل علي الزواج يمكن تترك 50% وتطبق منها 50% لان هالشيء يعتمد علي طبعك زين قلتله وبعدين ؟ قالي ثنتين لاتتركهم ولاتنساهم من بالك قلتله شنهو ؟ قالي الاولى لاتدخل علي حرمتك بأولى لليله ؟ قلتله وبعدين؟ قالي وله حتى ثاني لليله ؟ قلتله وبعدين يايباا ؟ قالي وله بعد ثالث بعد لليله ؟ قلت مصخت ! قعد يبتسم وضحك ؟ قلتله يايبا هذا الشي يختلف من بنت لي بنت وهاذي الامور مانقدر نحكم عليها اللي بوقتها ( يعني علي حسب تجاوب البنت معاي ) قالي شفت شلون انك مدوج ! قلتله اجل شتقصد يعني ؟ قالي ياوليدي البنت اللي بتاخذها بنت ولا هي مطلقه او ارمله ! قلتله ادري يايبا انها بنت قالي انا اقصد انك تترك عنك غريزتك اولا يوم وثاني يوم وثالث يوم حتى تتأكد ان البنت عاجبتك !! وهي البنت اللي ممكن او اكيد انك متقبلها بنظرك لانها بتكون بأحلى صورتها اولى يوم وثاني يوم وثالث يوم يمكن للاسبوع كامل ! فلا تستعجل علي الحكم عليها وبقبولك بجمالها وحتى لو قلبك مال لها يمكن نظرتك تقوى علي قلبك وتتندم ؟ فكون حريص علي هالشغله ولاتستعجل بالدخول عليها حتى تتأكد انها عاجبتك مو تشوفها اولا يوم وتنبهر بجمالها المزيف وغريزتك تغلب علي نفسك وتبتدء تفض بكارتها ؟ لان هالشيء راح يكون لها جدار حاجز لها بالزواج مره اخرى من غيرك لو تم طلاق لاسمح الله لانها ماعجبتك بعد ايام واكتشفت انها فعلا مو الجمال اللي كنت تبيه ؟ انصدمت اهني واذهلني تفكيره ! وتذكرت قصص كثيره بمثل هذا الموضوع منها من دخل علي زوجته اولا لليله وطلقها بعد ماشافها بدون مكياج ثاني يوم والبنت اصبحت عاله علي اهلها وعلي نفسها ! بسبب هذا الزوج المتهور ؟ فعلا انه تهور ؟ قالي بعدها موضوع العيال ياوليدي قلتله وشفيهم يايبا لايكون مستعجل عليهم بعد مو مكفينك الروضه اللي في بيتنا من احفادك :) قالي لا العيال امرهم عند الله سبحانه وتعالى .. لكن بمثل هذا الوقت وهاذي التغيرات صار الانسان متشتته افكاره واشغاله والخ... ولكن لاتستعجل علي العيال ! قلتله علي طول اصلا انا مابي عيال ابي استانس بعدين افكر بالعيال ان شاءلله قالي احرص علي هذا الشيء اكثر من الاولى قلتله شمعنى ! قالي الاولى راح فيه ضيحه وحده فقط واما العيال الله اعلم كم راح تكون فيه ضحيه ! قلتله شلون مافهمت ؟ قالي الزوج والزوجه حالهم واحد كلً منهم يجرب الثاني في اولى سنه فهل تظمن ان زوجتك بأمكانك ان تعيش معها طول حياتك ؟ قلتله لا قالي اجل لاتستعجل علي موضوع الانجاب .. يجوز انك تشوف بكره زوجتك صعب العيش معها مهما كانت الحلول للمشاكلكم ويحصل بعدها طلاق وتشرد اطفالك مابين امها وابوهم ؟ فاانصحك تنتظر سنه من زواجك حتى تشوف زوجتك متقبلتك وانت متقبلها من الناحيه المعيشيه او لا وبعدها الله يوفقكم واللي يجي من الله حياه الله فعلا انصدمت بالشيء هذا ايضا كيف ماطرت علي بالي هالافكار او سمعت فيها وانا كان كل تفكيري وين اسافر وين اروح وياها بشهر العسل ؟ اسف يااخوان علي الاطاله واعذروني علي سؤ التعبير لكن بصراحه نصيحتين اعتبرهم من ذهب ليست لانها من والدي ولكن لانها لم تطرئ علي بالي وهي شيء مهم بالنسبه لي ولها وللاولادي ؟ |
ماشاءالله على ابوك شكله فاااهم وبصراحه والله ماتوقعت ابد فيه
اب يتجرأ مع ولده لهاالدرجه الله يخليه لك ونصائحه رائعه بس غريبه يعني انت ماشفت زوجتك وقت الملكه على طبيعتها؟ |
الله يخلي لك ابوك ويكرمه
صدق ماشاء الله علية نظرته للمستقبل بعيده الله يحفظه لكم ويحفظكم له جزاك الله خير |
صادقة الاخت الاميرة الهادئة
فعلا يعني ما تعرفها ولا تعرف اطباعها ايام الملكة؟؟!! يعني صراحة نصيحة ابوك الثانية حلوة و فعلا صحيحة,, بس نصيحة ابوك الاولى ما احس اني استوعبتها,, لان احس فيها خلل او شيء خطأ,, والله يوفقك و يوفق جميع المقبلين على الزواج يارب والله يكون بالعون ان شاءالله |
السلام عليكم ورحمة الله وبركاته
يا أخي شلون هذا قاعد مع والدك في "مقهى" وتشبهه بالصحابة رضوان الله عليهم، والله عشنا وشفنا، سامحك الله. لاحول ولا قوة إلا بالله. الإشراف: ارجوا تغير الصوره الرمزيه لمخالفتها لقوانين المنتدى |
نصيحت والدك فيها وجه من الصحة ،، لكن مو كأن والدك ،، ركز على (( الجماال )) !!!
|
يعني برايك اخي الكريم اذا الواحد تزوج بنت واكتشف ايو الشباب انها مو حلوه يطلقها !!!!!
ليش نلعب كيرم حنا !!! وين عيونه وقت الشوفه ليش البنت مالها احساس ,,, مالها اهل ,, ولا لعبه نشتريها ويوم اكتشفنا انها مو حلوه نرميها اذا هي ماعجبتك اكيد بتعجب غيرك فهالحاله ليش تلقف وتزوجها الزواج ياخوي كلمه كبيره جدا جدا اوكي انسحب وقت الرؤيه الشرعيه اول بعد الرؤيه او الخطوبه بس بعد الزواج مستحيل وليش !!! عشان هالسبب |
ماله دخل الجمال ياناس
قصد ابونا الله يطول بعمره ان انت ياشاب تكون متلهف ان هذي زوجتك وحلالك وماتكرز كثير او تتغاضى عن شي معين في اعتقادك انه شيء غير مهم وفي الأساس هو شيء ترغب فيه ولكن مااكتشفته وبعد فتره تقول لآ موهذي اللي ابغاها وكنت اتمناه وبعدين ياجماعه قصد ابونا التوافق الروحي يوم الشوفه والملكه لاتوافق ولايحزنون يادوب اعجاب وراحه نفسيه وبعدين مو كل العوائل ترضا للمخطوبين بأنهم يجلسوا مع بعض ويتعافوا ويتألفوا اخوي ابراهيم سلم لي على الوالد وقوله ام سعود تسلم عليك وتدعيلك الله يطول بعمرك ويزيدك من فضله ونعيمه ويرضا عليك ربي وانت اخوي ابراهيم الله يوفقك وينور بصيرتك ويسخرلك الزوجه الصالحه اللي تخاف الله فيك ومااصيك البر بوالديك وحصنتكم بلا اله الا الله |
مشكور اخوي عالموضوع والنصائح الرائعه والله فعلا ابوك حكيم
|
الله يطول بعمر الوالد ويحفظه لكم 00
ويخليه لك وان شاء الله قهوة العصـــر ( للي عباله مقهى) طول العمر تجمعكــم ويا اخوان مو كل الناس تشوف الزوجه وتقعد معها فتره قبل الزواج 00 في عادات وتقاليد تختلف من عائلة لعائلة 00 و الموضوع جدا قيم 00 يدل على ان الوالد مشاء الله متفتح وحكيم ومايحب الظلم لحد 00 الله يوفقك اختك :: مشاعر |
السلام عليكم الأخ الفاضل / إبراهيم لكل شخص فكر ونهج و أسلوب ونظرة في الحياه و الحياه هي أكبر جامعة نتعلم منها . و كما ذكروا أخوتك أن الوالد قد ركز على الجمال الشكلي ونسى الجمال الداخلي ، فهو حكم على كل فتاه ضئيلة الجمال ان تنتظر الحكم عليها بعد أيام من الزواج بالطلاق الفوري .. و النصيحة الثانية و التي هي يفضلها الكثير من النساء وبعض الرجال، وهي عدم التسرع بالإنجاب . فأنا ضد هذا الرأي .!!!! أتدري لماذا ؟؟ لأن بها من الأماني و طول الأمل ,,, فهل يضمن أحد أن يعيش غداً حتى يفكر أن ينجب بعد عام من الزواج ، و بعيد عن السمعين وما حد يشوف شر ،، إن وهب الله طول العمر ، فهل منا من يضمن بأنه لن يصيبه مرض أو حادث ، يعوقه عن الإنجاب .!!!! بل و هناك الكثير و العديد من المشاكل بين الزوجين، يشاء الله إنها لا تُحل إلا بقدوم أول مولود فتزول المشاكل و الهموم وتسود المحبة و المودة عن ذي قبل أختلاف الرأي لا يفسد في الود قضية وكلاً منا له وجهه نظر قابلة للصواب و الخطأ حفظ الله والدك ، ودمتم في حفظ الله |
الله يحفظ لك الوالد نصائحه فيها حكمة وغريبة كما ذكرت الله يخليهم لنا فهم مدرسة في الحياة
بس اعتقد الرؤية الشرعية وفترة الملكة فترة تعارف أعني على الأقل يتعرف كلا المخطوبين على شخصية الأخر بنسبة كافية من خلال المكالمات والزيارات طبعا من ناحية الشكل انا اقول فعلا الماكياج يلعب بالجمال دور كبير لكن من حقه يطلب يشوفها بدون ماكياج وقت الرؤية الشرعية فينبغي ان تكون ذلك والشكل ليس مقياس للسعادة فسوف تعتاد عليه المعيار الاهم الراحة النفسية عند رؤية كلا المخطوبين للاخر والاستخارة قبل ذلك وصدق التوكل على الله تذكرت نصيحة لجدي الغالي رحمه الله انه لابد في الحياة الزوجية ان يصبر احد الزوجين على الاخر اي ان يصبر عليها ويحتملها او هي ترضى بعيوبه وتصبر عليه اذا كان بينهما حب والفة طبعا فالمراحل التي تسبق الزواج اعتقد انها كافية تمنياتي بالتوفيق والسعادة لكل المقبلين والمقبلات على الزواج |
والدك هذا يستاهل بوووووسه على جبينه
الله يسعدكم و يوفقك مع بنت الحلال يارب |
الله يحفظ والدك
ونصائح رائعه |
ماشاء الله على والدك الله يديمه فوق راسكم
والله نصائحه من ذهب وفي ناس يا اخواني ما بيسمحو لبناتهم يجلسو مع ازواجهم ايام المالكه ==================وهيذا الشي حاصل معي يعني كلام في الموبايل بس طبعا مارح اقدر اعرف اشياء كتير =============== حسبنا الله ونعم الوكيل على هالعادات والتقاليد |
اقتباس:
|
باااك رجعت لكم :)
يااخوان هدوووو اعصابكم اي مقهى واي خرابيط ؟؟؟ ااقصد اللي فهمو كلمة قهوة العصر علي انها ( مقهى) لاياخوي وشدعوه ؟ وبعدين يوم تقول مايجوز نشبه احد بالصحابه اذكرلي دليل واحد علي هالشيء.؟ لاتفتي من عندك جزاك الله خير وبالعكس الرسول (صلى الله عليه وسلم) حثنا علي التشبه فيه وليس فقط الصحابه رضوان الله عليهم المهم ماعلينا عندي تعليق بسيط بالنسبه للتعليقات الاخوان والاخوات بخصوص والدي ركز علي الجمال الشكلي انا اقولكم ليش لانه شايف بلاوي سوده هالايام حريم في بيوتهم مطلقات من اولا ايام زواجهم بسبب هذا الجيل من الازواج اهم شيء يفكر فيه هو ان تكون زوجته حلوه وبعد مايخلص منها في اولا لليله او اولا اسبوع يقول البنت مو عاجبتني ؟؟؟؟؟؟؟؟؟؟ فعشان جذي هو خايف ارتكب هالخطاء مثل هالجيل من الازواج او الشباب طبعا مو الكل لكن الوالد يحتمل كل احتمال ويعطيك نصائح للتجنب هالاخطاء حتى تطلع بأقل ضرر لك وللزوجتك اذا تم طلاق لاسمح الله وموضوع السعاده مش بالجمال وهالكلام كلنا عارفينه بخصوص الاعجاب وغيره للاسف احنا ماعندنا نشوف الخطيبه قبل العرس اللي بالخش والدس وعن نفسي نسيت اقولكم اني شايفها واقعد معاها دايمن لكن الوالد مايدري عشان جذي يعطيني نصايح وانا حبيت اطرحها اهني عشان اللي ماشاف زوجته ياخذ احتياطاته ويتقى الله في نفسه واشكر كل من تفاعل معي بالموضوع |
ماشاء الله بارك الله حتى لو إقتنعت أو ما اقتنعت لكن يعجبني فيه مصارحته لك وتقديره لك كرجل :30: وهذا يندر في زماننا ونفتقده صراحة الله يخليه لك ويطول عمره ويشوف عيالك دعواتك للرجل العزوبي دمتم في حفظ الرحمن |
السلام عليكم
أسعد الله يومك أخي الفاضل جميل جلوس الوالد و مصارحته لك في هذه الأمور لا أعرف ما هي تقاليدكم أو أي المجتمعات أنت أخي الفاضل لكن كما أرى من اللهجة المجتمع خليجي ..و ربما مجتمع محافظ و لكن بعض المجتمعات الأخرى لا نستطيع أن نطبق عليها هذه الأمور ..بسبب الإختلاط و ما إلى ذلك حيث يمكن أن يرى الشاب خطيبته و يحادثها في وجود أهلها و يكون فكرة عن تفكيرها و هناك مرحلة (عقد القران) أو ما تدعونه بالملكة بحيث يمكن للزوج أن يجلس مع زوجته و يتعرف عليها أكثر لذلك لم أفهم الحكمة من عدم الدخول بالزوجة لمدة 3 أيام ربما الليلة الأولى بسبب التعب و ما إلى ذلك و لكن بالنسبة لليالي الأخرى لم أفهمها جيدا و ما هو السبب الذي سيجعل الإنسان يغير رأيه بعد توفر فترة كافية لمعرفة المرأة التي اختارها ربما قد يكون جميل في بعض المجتمعات التي لا تسمح للزوج بأن يرى زوجته إلا في ليلة الدخلة ! احترم رأي الوالد و لكن لا أتوافق معه كليا |
جزاك الله خير أخي إبراهيموه
بس ماأدري ليه الموضوع مميز من قبل الإداره أما بالنسبة للنصيحة مع أن نظرة وجه أيك محترمه ولها موقع إلا أنها تبقى نافعة وجيده خصوصاً مع بعض القبائل التي تمنع الزوج من رؤية مخطوبته إلا ليلة الزواج أما مع من رأى مخطوبته وتحادث معها فترة عقد القران ففي الغالب ليس لها نفع إنما حرمان وظنون يعطيك العافية على الموضوع |
ما شاء الله...
فعلا نصائح حكيمة... من أب حكيم.. |
يسلموو عالموضووع الحلوو
|
ماشاء الله تبارك الله الله يحفظه ويخليه لكم يارب ويطول بعمره
وانت الله يوفقك ياخوي ويسعدك وفعلا نصائح من ذهب |
|
| الساعة الآن 09:57 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©