|
زوجـــي ،، قــهــررررررنـي
مساء الخير
مشكلتي في زوجي ابو عين طويله مع اني و لله الحمد حلوه ومو مقصره معاه في اي شيء كل الحركات و الرومانسيات اللي موجوده بعالم الحياة الزوجيه مسويتها له و يطنش و ماكأني سويت له شيء قلت يمكن انه ما يحب هالحركات و لكن يجي يمدح وحده مو حلوه ابدا هذا اللي يقهر امس شفت في جوال زوجي صورة وحده و هي (( ليست جميله )) عاديه يعني الحمد لله والشكر العين لاصقه في الحاجب،، لكن يقول والله انها قمر مع اني جمييله و الكل يحكي عني الا هو وش اسوي له ,, اطنش و اقهر نفسي من جوا والا اجلس اسوي مشاكل معاه <<<<مالي خلق للمشاكل قولوا وش اسوي |
حتى لو قال حلوة قولي انا ماعجبتني
ولو فعلا حلوة الله لايحليني هالحلى واطلع مثلها قليلة حيا مابقى رجال ماشافني الحمدالله ماحد شافني غير رجال واحد بهالدنيا وانا له لحاله <<< كبري راسه وصدقيني بيعجب بكلمتك كثير و بيستحي من نفسه وبعدين لاتخلين الأمور هذي تأثر بينكم في الآخر وحدة وماتسوى وعارضة نفسها بجوال ليه تزعلين نفسك عشانها انا مالومك انك تتضايقين بس هوني على نفسك شوي والله يسخر زوجك لك يارب ويشوفك احلى وحدة بعينه |
فعلا كلام شوبارد صح ,,, :22:
الله يحنن قلبه عليــــــــكي |
ياحبيبتي عبوره
الله يهديه لك هذا طبع وابو طبيع مايجوز عن طبعه مع الأسف الشديد حبيبتي صارحيه واجهيه ولكن حذاري من العصبيه واختيار الوقت الغير مناسب صارحيه بكل حنيه وهدوء رتبي كلامك قبل ماتكلميه قولي له انا يافلان.....بإسم الدلع في شي مكدر خاطري وودي اصارحك هو انك تحب تطالع الحريم والبنات وانا مولشي لاحبيبي انا خايفه عليك من غضب الله انا اخاف تاخذ ذنوب من لاشي علىاسباب تافهه والسبب عينك الحلوه اللي ماخلت احد ماصورته وبكره تندم ان حلالك واطلب وتمنى ايش اعملك بما يرضي الله علينا يرضيك حبيبي لو انا عيني طويله وطول وقتي اطالع بالرجال واقولك هذا حلو وهذا جسمه حلو وهذا وهذا اكيد مايرضيك وانا مايرضيني اشوف غيرك يانظر عيني. واذا هو من النوع اللي يحب احد يستفزه يعني مزح برزح ولو اني مااحب هذي الحركه بس جربي يوم تكوني جالسه معاه على التلفزيون او حتى الإذاعه واذا جات صوره لواحد رجل لو حتى المذيع او اي واحد دوري فيه شي وطول وقتك سمي عليه واذكري الله بصوت خافت وقولي ماشاء الله عليه الله يحفظه لشبابه بصوت خافت اذا سمعك وحس انك تمدحي في الشخص بيغير القناة انت على طول فزي وقولي له ليه غيرت القناة وقومي واذا رجع القناة ارجعي وخليك مبحلقه :eek:بالتلفزيون واكيد بيعصب عليك ويقولك ايش عاجبك فيه ويصرخ عاد انت هنا ابتسمي ابتسامه بااااااااااااارده وصفرااااااااااااااااااااه وقولي له حبيبي اضايقت؟ جاوبك او ماجاوبك ردي انت وقولي حبيبي ايش اقول انا اللي كل يوم اشوف عيونك يمين ويسار ومتعبني ترا انا هذا مو عاجبني او شي بالعكس ماجاب ظفرك بس حبيت اعمل التجربه عشان احسسك باللي انا اعانيه وتحس فيني وانا مالي غيرك واحبك وووووو وراضيه وافتحي الموضوع بكل هدوء وناقشيه وان شاء الله ربي يسعدكم ويفرج همكم وينولكم مرادكم ويألف بين قلوبكم وعليك بالدعاء له ان الله يهديه ويغض بصره |
اقتباس:
انا قلت له هذي جالسه بمرقص و وانها انسانه تافهه و قلت هالكلام بهدوء بس هو عينه طويله يقول عادي ان شاء الله تكون بالشارع بس والله هذي البنت حلوه لو هي حلوه كان عادي بس مو حلوه و الفم شاق وجهها والحاجب لاصق بالعين بس عشانها ترقص و تسوي حركات يسلموووو شوبارد على هالكلام الحلو والمفيد |
اقتباس:
آمــيــن يارب يسلموووو يا عسل على مرورك |
رووح الغالي اشكرك على مرورك
والله انك صادقه بو طبيع ما يجوز عن طبعه هذا اللي ذبحني زوجي يكره شيء اسمه مصارحه و والله اني اذا جيت اصارحه اداريه زي طفل لأنه من النوع اللي يـكـرهـ المصارحه تخيلي حتى الكلام الحلو ما يحبه يقول انه كلام مسلسلات صدق ما يستاهل النعمه مشكوره اختي على مرورك و انا راح اجرب كلامك و اشوف تسلمي يالغاليه |
مادام هذا طبعه ..مالك الا انك تدعي له ان ربي يهديه ان شاء الله..
|
الله يهديه لك ياعبوره...
والله ماعندي شيء اقوله لك غير الله يهديه ويسخر قلبه لك ويحنن قلبه عليكي......... واسمعي كلام الاعضاء صحيح حاولي تنفذيه ويارب يمشي الحال معاك.... |
عذراً أختِ الكريمة ... وكانَ ربي في عونك ...
لماذا لا يكون زوجك متضايق من أمرٍ فيكِ ... وحاول معكِ دونما استجابة منكِ .. فأحب أن يتبع هذه الطريقة ليلفت نظركِ ويوصل لكِ الرسالة ؟ لستُ أدافع عنه ... ولكنا هنا نطرحُ جميع زوايا المشكلة ما استطعنا إلى ذلك سبيلا ... فما قولك ؟ |
السلام عليكم , , , اختي الكريمة عبير هناك مشكلة نعم , ولكنها قهرتني انا , مع أحترامي الكامل لأحاسيسك. أذا كان زوجك كما تقولين ( أبو عيون طويلة ) فهذة مشكلة ولكن ما شد أنتباهي وأثار حفيظتي ( قهرني ) هو طرحك لأوجة المشكلة والجوانب التي غضبت منها , فأنت يا أختي الكريمة لم تتلمس جوانب الخطورة بالموضوع , فأذا كان زوجك ينظر لما حرم الله فهذا يعني نقص الوازع الديني ويعني أيضا أستسلام نفسه لهواها وهذا أمر لا يليق بمسلم ولكنك تضايقت ليس لأانه ينظر بل لأنك جميلة ومو مقصرة معاه . طيب لو كنت قبيحة ومقصرة فهل يحق له النظر ؟؟ الغريب في الأمر أنه يخبرك بما يشاهد وهذا يدل على أنه وانت لا تهتمون بالجانب الديني فالشاعر يقول :30: :30: أن الرجال الناظرين ألى النساء , , , مثل الكلاب تطوف باللحمان :30: :30: كما أن العين تزن وزناها النظر فهل تقبلين بهذا الذنب ليتحمله زوجك وانت ( كما أفترض تحبينه ) وتشاركينه حياتك وهو رب لأبنائك بأختصار لا تنقهري من نظره ألى أمرأة قبيحة وأغضبي عندما تنتهك محارم الله فهذا خير لك وله وفقك الله يا أختي الكريمة |
فعلا ً مثل ماقال أخوي النور والحنان
يمكن يبغي يثير غيرتك عليه !! لأنه لو فعلا ً البنت عاجبته ماأتوقع يجي ويقولك هذي حلوة وهذيك أحلى بيشوفها ويسكت مثل أي رجال مايحب مشاكل لكني أشوف إنه له قصد من إنه يقولها لك بكل صراحة شوفي إنت ِ هل هو قد طلب منك شي وإنت رفضتي ؟ هل إنت مثلا ً مقصرة من الإهتمام فيه من ناحية الشي اللي هو يبيه ؟ الرجل ياعزيزتي خذيها مني في بعض الأمور يحتاج لأقل كلمة منك علشان يحس بقوته ومكانته عندك شوفي إذا إنك معطته حقه من هالناحية أو لأ ومع ذلك كله لاتنسين تدعين ربك يسخره لك ويبعد عنه كل شي بالتوفيق لك |
كبري راسك
مافيش حل |
عادي بوكس بعينة المرة الجاية ما يحكي جذي ههههههههه طبعا أكيد مرة جاية مافي لنك تكوني :16: ...
ترى انا امزح مو تصدقي و اتساويها :d |
عبوره
كبري مخك .... عاجبته وحده طيب حتى إنتي بيعجبك كثير عادي النظره بحر بالأخر مالك غيره وربي يديمه لك .... تقولين أنا ماقصرت طيب أضيفي لها أنا ماصغرت ولا تصرفت بجهل .... الكبير كبير في كل شي ومن يقدم لاينتظر الثناء .... وفقك الله |
اعتقادي ان زوجك غير جاد فيمايقوله لك وانما يريد ان يثير غيرتك لا اكثر صدقيني ان الزوج طويل العين لايريد ان تعرف عنه زوجنه ذلك بالنسبة للتطلع على تلفونه انصحك بعدم فتجسس المراة على زوجها يضايقه والعكس
|
الساعه كم
اشكرك اختي على مرورك و هذي انا ادعي له عسى ربي يهديه |
عتبة البيت
اشكرك على دعواتك و عسى ربي يهديه |
الــنــور والـحـنـان و الاخت الــغـالـية
الصوره لم يريني هو و لكن انا قمت بفتح جواله و هو جالس و نظرت لها و سألته عنها و هو لازال مصر على انها جميله سؤالك مهم دائما احرص على ان اكون كما يريد صدقيني اختي اني غير مقصره معاه في شيء اهتم به من ناحية البيت والاولاد و من ناحية اناقتي و رومانسيتي و اهتم ايضا بشخصه في كل اموره صغيرها و كبيرها و لكن هناك شيء اعتقد انه ضايقه مني لأنه هو يحب يطالع أغاني الفيديو كليب و انا ما سمحت لهذه القنوات تعرض في بيتي مسحتها و كل ما رجعها امسحها بدون مشاكل و لا صراخ يزعل يوم امسحها ولكن يكون ردي اني(( لا أريد أن ينشأ أطفالي وهم يرون هذه القنوات )) و صار يطلع مع اصحابه في شقه فيها جميع القنوات حتى الاوربيه كل ما نصحته يرد علي برد مميت اختي غاليه كان سؤالك هل إنت مثلا ً مقصرة من الإهتمام فيه من ناحية الشي اللي هو يبيه ؟ أبدا بالعكس هو مبسوط من هالناحيه اظن ان السبب هو صاحبه و هو رفيق سوء دائما انصحه منه و لكن مازال متمسك فيه ما ذنبي ؟؟؟ اذا كان نشأ في بيئه تسمح له بفعل ما يشاء و لا تنهاه عن أي خطأ ابدا |
Majed960
جزاك الله خير على كلامك انا اختصرت المشكله قدر المستطاع زوجي فعلا عينه طويله و هذا شيء لا يرضيني ولا يرضي الدين و انا و الله هو العالم كم مرة نصحته و كررت عليه ان العين تزني لانه يرى ماهو اكبر من صورة هذه المرأه القبيحه ولكنه يتذمر من نصحي مع اني انصحه بأسلوب حلو لكن ما نفع اشكرك على مرورك |
ام جوري وجنى
والله انك صادقه لأن بو طبيع ما يجوز عن طبعه راسي تعب من كثر ما كبرته |
Man2oosheh
يسلمووو حبيبتي على هالطله وربي انه يستاهل اكبر بوكس |
t3b2006
الله يوفقك اختي الغاليه كلامك رائع و يريح فعلا انا غلطت لأني قارنت نفسي بإنسانه رخيصة زيها شكرا لك و على كلامك الحلو |
صقر الجنوب
انا فتحت جواله وهو جالس معاي ما اعتبر هالشيء تجسس اشكرك على مرورك |
عبورهـ كم مر على زواجكم ؟
هل جربتي تزعلين عليه يوم يومين ثلاثه وتوضحين له السبب ؟ لازم يبدل صديقه لأن اصدقاء السؤ بلوى وطولي بالك عليه وعليك بالدعاء والصبر ××× تعليق على كلام أختي روح الغالي ماعتقد أن فكرة البحلقه في التلفزون ومدح الرجال تنفع لأني أخشى من هذي الطريقه فرجالنا لا يتقبلون من المرأة أي غلط لو مزح ..!! وماراح ينساها لها أبدا فلا تتهورين وتسوينها تراهي قوووويه الله يوفقك ويهدي زوجك لك |
هلا والله عبير الرياض
المصيبه ان صاحبه ذا له سنين صحبه من يوم هم صغار وهم اصحاب و يوم نصحته يقول والله ودي اتركه بس ما اقدر انا مو جديده على الزواج اواجه مشاكل اكبر من هاذي معاه هي اللي ازعل فيها عسى الله يصبرني عليه و الحل الوحيد على قولتك الدعاء |
الله يعينك اختي واتمنى من الله العلي العظيم ان يهدي زوجك...
|
الله يكون بعونك أختي
ذكرتيني بوحده من صديقاتي كان زوجها مصادق واحد (الله يهديه)مرررره سيئ وتقول صديقتي تعبت وانا انصحه ومرات أزعل بس تدرين وش سوت الدعاء ثم الدعاء وفي كل وقت وكل سجود بعد سنة رزق الله زوجها بغض هذا الصديق وتحمد الله ان زوجها رجع لها مثل اول واحسن:22: |
إذا كان زوجك يفيد معاه الطيب ، جربيه !!
معروف إنه أغلب الرجال مايحبون شي إسمه نصــح وخاصة لما يكون من زوجته لذلك حاولي ماتنصحينه أبدا ً وخليه على راحته حتى التلفزيون خليه يشوف اللي يبيه لكن حاولي تبينين قدامه إنك ماتحبين هالشيء بحيث إنك ماتشوفين معه التلفزيون مع إنك جالسة معه بنفس الجلسة إذا كان بيفيد معه الطيب أكيد راح يسأل وش فيك ، وش اللي مغيرك ؟ وين النصايح ومن هالاسئلة .. دورك الآن إنك تبينين له إنك أنت الرجل وإنت اللي تفهم وتعرف الصح من الخطأ تعرف مصلحتك ، وتحب تكون سمعتك طيبة أنــا ودي أوقف معك وأخليك تكون أفضل الرجال لكن إنت ماتعطيني فرصة إني أقولك عن كل اللي في خاطري وأبدأي تكلمي معه عن كل شي لكن بأسلوب العطف والإقناع وابتعـــدي عن الأوامر أو حتى الإنتقاص من إهتماماته أتمنى تكونين فهمتي قصدي ؟ الرجال إنت ِ أعلم أكثر بأنهم يحتاجون لمسايسه أكثــــــر وأنصحك بالأول والأخير بالدعـــاء له ولك ولأبنائكم بالتسخير والهداية الدعـــــــاء مخ العبادة والإلحاح فيه بإذن الله يرزقك كل ماتطمأن به حياتكم وفقك الله ويسر أمرك وسخّر لك زوجك وأبعد عنه كل شر . |
وحده اعرفها زوجها كان يموت على سولاف فواخرجي وهي مره تنقهر لانه يتغزل فيها قدامه
قامت مره وهي تشوف المسلسل شافت تيم حسن الممثل وقالت يااااااربي يجنن هالرجال سبحان الي خلقه:) بعدها بطل زوجها يشوف المسلسل خخخخخخخخخخخخخ سوي نفس الحركه في حطي صورة تاركان مثلا في جوالك وقولي انه حلو وجسمه حلو خخخخخ |
شىء صعب انك تلاقى زوجك دائما يعاكس ويبص لماة غيرك والاصعب لماتكون اقل منك جمال
ربنا معاك ويصبرك علية |
تلقيته يقول هالكلام يبي
يرفع ضغطك ويثير غيرتك |
الله يهديه لكي
واحيكي على فكرك وحرصك على ابناءك .. والقيام بمسح قنوات الاغاني .. وفقك الله في الدنيا والاخره .. |
| الساعة الآن 08:03 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©