|
أتوقع البنت ما تبغاني والنار ما تحرق إلا رجل واطيها، ما رأيكم ؟
بسم الله الرحمن الرحيم
أخواتي واخواني السلام عليكم ورحمة الله وبركاته صار لي شهر من املكت وانا الآن خايف ومحتار ولا أقدر أشكي لاحد مما سبب لي ضغط نفسي كبير ما راح اطول عليكم السالفة بعد رابع يوم من الملكة أو خامس يوم من الملكة وفي المكالمة الثالثة او الرابعة بمعدل مكالمة واحدة في اليوم وأول مكالمة اربع دقايق تفاجات بزوجة المستقبل (الحب المنتظر) تقول لي بالنص هذا (منت ملاحظ إن مكالماتنا كثير شوي) الموقف الثاني (في اثناء واحدة من المكالمات اتفاجاء بها تبكي بحرقة فقلت لها ما ودي اشوفك تبكين أو اسمعك وإنتي تبكين عسى ماشر؟؟؟؟؟؟؟؟؟؟ وإذا بالرد ((((((((((((( ما أتوقع عيني توقف دمعها طالما إني معك))))))))))))))) الموقف الثالث في أخر مكالمة قبل يومين أسالها تبغين نقفل((بعد ماحسيت في برووود في المكالمة))؟؟؟؟ وكاااااان الرد ((((((والله يالـــــــــــيت))))) والله ثم والله لو إنها أجنبية وبعيدة عني ما شلت همها وما كان شكيت لاحد وكان ارتحت ؟؟؟؟ طبعا لا سؤال ولا إتصال من طرفها والرسايل بعد كل ثلاث رسايل رساله(((جبر خاطر)))) مرة اقول لها يمكن اتغلى مثلك جربي التغلي قالت لي بالنص هذا>>>>>> لا ترى بأموووووووووت |
معقوله ..
تفاهم معاها وقلها بصريح العباره ( يابنت الناس في احد غاصبك علي او اانتي متضايقه مني بشي ).. بصراحه هذي المواقف مايبغالها الا المصارحه .. الله يسهل امرك |
أخوي لازم تصارحها ..
ياخوفي تكون مغصوبة عليك .. سم بسم الله وتجرأ وأفتح معاها الموضوع .. وإن شاء الله مايصير إلا إللي فيه الخير .. |
من كلامها اتوقع انها حاولت تلمح لك انك تهتم فيها اكثر ( ما تلاحظ انه مكالماتنا شوي!)
بس الظاهر ما فهمت عليها فشالت عليك موقف ورا موقف ليتن ما صارت ما تتحمل منك اي موقف هذا رايي لازم تبدا تحسسها انك شاريها وتخليها تصارحك |
اخوي زي ماقالو مالك غير المصارحه
وان قالت مافيني شي.... طنشها يومين وشوف هي تدق وتسأل ولا لا الله يعينك... |
بصراحة وبصريح العبارة وعلى الناشف
لا تزعل مني وحده من الثنتين يا انها مغصوبة عليك أو انها تحب واحد غيرك هذه الزبده خذها مني * ملاحظة أخت عذوب اهي قالت له (منت ملاحظ إن مكالماتنا كثير شوي) انتي ما انتبهتي لكلمة كثير واخيرا الله يعينك اخوي شي يعور القلب ويصدم الواحد مع اني لا أؤيد المكالمات الهاتفية قبل الزواج |
أنت أسألها وخلك صريح
أنتي مستعده نكمل مشوارنا مع بعض والا مغصوبه علي وتبين نترك بعض عادي في كثير تمت ملكتهم وبالنهايه ماتفاهموا من البدايه أحسن من أنك تتزوجها وهي كارهتك وتنشبون بحروب وطقاق ومشاكل ما لها أول ولا اخر |
شوف وكلك نظر كلمها كلمتين واذا صار الجو حلو من ناحية السوالف بين لها وبالنص هذا أنك باقي في بر الأمان وأسسسسسسسسسسسحب عليها لو أن شاء الله سنة وشوف النتيجة ولا تتجاوب بعد على طووول خلها تجيك على نفس النغمة الي أنت جيتها وعلى نفس الأحساس ووسع صدرك والله أنا أنقهرت بيني وبينك
|
أشكر جميع الأخوات والأخوان على المشاركة وإبداء الرأي وبجرب نصيحتكم المصارحه وأشوف
ويالله باللي فيه الخير واكرر ألف ألف شكر لجميع اللي شاركوني |
مثل ماقالوا الإخوان مافيه الا المصارحة
الله يوفقك |
صارحها وباين من كلامها عندها شي في قلبها.. لا تتركها الا واتعرف ايش عندها.. والله يوفقك.. |
هاذي شكلها بتفقع قلبك من التغلي والدلع ...
وحده من الثنتين .. اما تكون مغصوبه عليك وتحب غيرك ... او تكون من النوع الي يحب يتغلى ويتدلع الين يطلع روح الي معه .. وفي كلا الحالتين الله يكون في عونك ... |
عاود صلي الاستخارة
وانتظر ما ياتي من امر الله |
حرام عليكم انا بنت وامر بمرحلة خطوبة ..
يمكن انت من البداية كثرت عيار المكالمات يعني المفروض بالتدريج ثاني شيء حسيت من كلامها انها وحدة من الثنتين ياماتعرف تتعامل مع الجنس الاخر او ان التعبير خانها .. طيب عادي واذا قال الخطيب لزوجته تبغين نسكر عادي تقول ياليت مو قصدها انه يوم المنى يوم افتك منك لا قصدها انها طولت بالمكالمة بعدين ليش ماسألتها بوقتها يوم قالت طول ماني معك الدمعة ملازمتني المفروض ماظل هالشيء بقلبك واستفسرت منها مو تجمع المواقف كذا ماينفع لكم الاثنين انا من رايي تجلس معها جلسة مصارحة وبلاش العصبية ولا تستخدم اسلوب اسحب عليها مثل ماقالوا البنات ترى البنت ماتحب هالاسلوب واذا سحبت عليها مارح تهتم فيك وتحس انها غير مرغوبة .. الله يوفقك ويكتب لك الخير |
الأخت رهوفة أولا شكرا على المشاركة
ثانيا انا اقول المكالمه الاولى اربع دقايق أو ثلاث واطول مكالمه نقول ساعه (((ما صارت وما حصل))) شكرا إختي بنت امورة على النصيحة الطيبه مع العلم إني قبل أخطب صليت ولله الحمد حسيت براحه وكذلك قبل وبعد الملكه ((((لكن حسبي الله ونعم الوكيل))))) شكرا" يا رب لا تحرمني وضايعة في هالدنيا {{{ويارب توصلين}}} |
و لا تنسى علمنا اش صار معك
الله يوفقك |
يا اخوي انصحك انك لازم وضروري تصارحها او تسألها
ترى هذي راح تكون شريكة حياتك ودمتــــــــــــــــــــــــــــــــــــــــــــــ ــــــــــــــــم |
اقول يالحبيب اللي خلقها خلق مليارات غيرها
واذا هذي تعتقد انك تحمد ربك انها وافقت عليك ورضيت بك ..............................ترى بنات الناس الطيبات في كل البيوت ويتمنو الرجل الصالح طيب الاخلاق اللي انت منهم ان شاء الله وبعدين الواحد صراحه مايدري وش يسوي مع بنات هاليومين :::::: تكون على علاقه مع واحد في التلفون او النت ويتقدملها واحد وتوافق علية وتتزوجه وهي لازالت على علاقه سابقه .........................هالاشكال المفروض تنحرق حرق مو بس تتطلق. كثير من الشباب يكونو على علاقه ببنات لكن قبل الزواج بفترة طويلة يقطع كل شي وينهي ويصفي حقوقه تماما. بس المشكلة في غباء البنات اللي لازالت مصرة على ان اللي يكلمها يحبها ويموت فيها طيب لو يحبها ليش ماتقدم لها طبعا يهمه انها تتزوج ويحافظ على العلاقه معها الى مابعد الزواج عشان ياخذ راحته " كلها " معاها. نسأل الله السلامه الهداية والستر والعفاف لابناء وبنات المسلمين ــــــــــــــــــــــــــ يرجى مراعاة النصح السديد واختيار الالفاظ المناسبة وشكرا / البتول |
اقتباس:
إذا ماعندك كلام عدل تتكلم به .. يفضل السكوت .. الله لا يهينك .. أختي البتول .. ليش ماحذفتي المشاركة ..؟؟ عجبتك ؟؟ |
صارحها ياخي اشوف من كلامها انها مهي حاسه فيك
صارحها انا لو سوت معي كذااااا يمكن يطلع مني كلام يجرها مثل ما جرحتني اجل بالله عليك تقول لك ما دام انك معي راح ابكي قويه |
اقتباس:
والله انك صادق والكلام ايضا ينطبق على الرجال الله يهدي الجميع ــــــــــــــــــــــــــــــــــــــــــــــــــ ــــــ نعود للموضوع الأساسي مشكلة أخونا mansour_ba شوف ياعزيزي لاتحكم على البنت انها ماتبغاك صدقني ياأخي البنت في مثل هذه الظروف تمر بمراحل نفسية وتقلبات مزاجيه أقولها لك من واقع خبره وتجربه خلك معها وسط باعتدال ولاتنفعل ولاتعصب ولاتزعل اياي واياك ثم اياك انك تتنرفز خليك بااااااااااااااااااااارد ترى البرود والثقل يجيبها عند رجولك الشيء المهم انك ماتكون ثقيل طينه تطفشها الاعتدال مطلوب ولاتحس منك بأي تغيير خلك مرح معها ورومانسي وصريح الظاهر والله اعلم انها شافت منك شي يزعلها او يخليها تتضايق ؟ صارحها بهدوء وبأسلوب لطيف عن نفسك ترى أغلب البنات يغريهم الكلام العاطفي الدافيء يااخي والله كلمتين على بعضها تضيعها بين ايديك اغسل مخها بكلمات الحب اكذب عليها مو مشكله جايز اذا جيت تكلمها حاول انك تخفف وكلمها عن فرحك فيها وسعادتك وانك سمعت الناس يتكلموا عنكم وانكم ماشاء الله احلى اثنين وللمعلومية يهمها كثير نظرة الناس لكم !! حتى لو قالت لك انا مايهمني احد ماعليك منها لااوصيك بالهدايا والاتيكيت والتفنن في المعاملة والكشخه إملي عينها وذكرها بالله بين الفترة والاخرى وانصحها لو شفت منها شي وقول لها لازم نعين بعضنا على طاعة الله لاتستغرب اخوي والله ان الكلمات هذي لها تأثير عجيب جدا جدا على العروس سبحان الله تحس البنت انها في أمان معك البنت في فترة الخطوبة خاصة تحب زوجها يميل الى التدين وذكر الله واعمال الخير اشتر لها كتب عن الزواج واشرطة ورسائل اشعار حب وغزل خلاصة الكلام انها تبغاك بس يمكن فيه أحد حاسدكم ومعبي راسها لذلك حاول تلمح لها ان بعض البنات تطلقوا بسبب حسد الناس وحقدهم وعليك بالصبر ثم الصبر ثم الصبر وفقك الله |
اذا عرف السبب بطل العجب.....
حاول تسألها وتجس نبضها |
الأخ الفاضل .. mansour_ba هناك احتمالين لحالتك .. الاول : ان تكون زوجة المستقبل لا تحبك لأي سبب كان ، وبالتالي تفعل كل هذا حتى تفترقا والحل في هذه الحالة ان تنفصلا عن بعض فالحياة بدون حب وتفاهم تعيسة الثاني : أن تكون تحبك ، ولكن أفعالها تدل على خجلها ، أو إحراج بأن يراها أهلها تحادثك كثيرا ( وإن كان بينكما عقد شرعي ) وبالتالي يبدأ التعليق والكلام ، واحيانا الإنسان من خجلة او خوفه يفعل أشياء لا يريدها ، او انها تحب ان ترى فيك الشوق والوله إليها ، فتمارس الدلال والدلع عليك و(التغلي) على رأيك .. وفي هذه الحالة عليك ان تجلس معها ( واترك الاتصالات بما أنكما عاقدين ) وحاول ان تتكلم معها بشفافية وتفهم الامر منها ، وتتوصلا إلى حل مناسب يرضيكما أسأل الله أن يجمع قلبيكما على الحب ويوفقكما لكل خير أختك ذكريات الطفولة |
بسم الله الرحمن الرحيم
السلام عليكم ورحمة الله وبركاته الأخ:منصور بصراحة والله مشكلتك شغلت بالي ومن قريتها أفكر بالحل بس المهم اولآ أبيك تتعوذ من الشيطان وبعدين حاول تحل أمورك بهدوء وبدون مشاكل ولاتفكر ابد الحل بتلقاه بسهوله في المنتدى صحيح الأعضاء مابيقصرون كعادتهم لكن مافيه أحد بيحس بمشكلتك كإحساسك أنت وزوجتك ولازم تعرف أشياء كثير عن زوجتك يمكن تمر بظروف صعبه نفسيه قاسيه خلتها كذا أو يمكن وأقولها بصدق تمر بظروف الدورة الشهرية لأن المرأة في هالفتره تمر بتعب نفسي أشبه بالاكتئاب أو....أو.... فيه أشياء كثير ممكن تضغط عليها وتخليها بهالشكل وياليت تقرا كلامي وتفكر فيه زيييين أولا لاتفكر بالطلاق علطول خله آخر الحلول لأنه ابغض الحلال ولا تتفاهم معاها بالجوال عن طريق مكالمة او مسجات....هذا مو اسلوب تفاهم بالموضوع بالذات إذا كنت ساكن معاها بنفس المنطقة ياليت تزورها وتتفاهم معاها بأسلوب رااقي ولا تغلط بأي كلمه نهائي خلك هادئ واعصابك مرتاحه عشان ماتتوتر وتخلق مشكله كبيره والكلام اللي بتقوله تنسقه من عندك ولوتبي نساعدك ابشر....والله اكثر المواقف هذي تصير غصب عن البنت نفسها ممكن اهلها مايحبون هالحركات ويمكن صديقاتها يقولون لاتعطينه وجه خليه يطرد وراك عاد بعض البنات الله يهديهم تطبق هالكلام بس بطريقه مزعجه للغايه للطرف الآخر يعني لازم تكبر عقلك وترى ربي يشهد انها دايم تصير ومع الوقت تروح هالأشياء ويصيرون أحلى اثنين.......... ولو كنت بعيد عنها بأقرب فرصه تزورها وخلك هالفتره بعيد شوي يعني لاتكثر اتصالات والرسايل وسط لا تعاتب ولا شي مهما قالت اصبر شوي عشان تلقى الحل وان شاءالله ربي بيفرجها وصلي الإستخاره اكثر من مره والتزم بالدعاء والتمس لها العذر والله والله ياخوي احيانا نمر بظروف قاسييييه على قلوبنا بس نحاول نتجاهلها عشان نعيش بهالحياه وبعضنا يكون صعب نتخطاها بسهوله خلك انسان صبور وواعي وترى المشاكل تكثر بداية التعارف وأنا بنفسي مجربه لازم تعرف ان الحياه تحمل لنا في طياتها الكثير الكثير طولت عليك بس أخاف من الطلاق لأن ماهو الحل لمشكلتك..لازم تشوفها ولا تفتح نقاش هالموضوع بمكالمة جوال ماااينفع اتمنى أكون أفدتك وترى استشرت من هو اكبر وأحكم مني بالأمور ياليت أكون أفدتك وضروري تطمنا على أخبارك وأسأل الله لي ولك التوفيق وان يفرج همك وييسر أمرك ويصلح مابينك أنت وزوجتك................. .الأميره الهادئه |
بصراحه تصرف خطيبتك غريب!!!!!!!!!!!!!!!!!!!!!!!
صارحهااااااااااااااااااااااااا لازم تصارحها لا تظلمها وتظلم نفسك بعدين ترا الزواج عشرة عمر وأسألها وقلها أنتي وافقت علي .. بقناعه تامه ؟؟ وهل انتي مرتاحه معي ؟؟ هل اهلك غاصبينك على الزواج مني وماخذو رايك ؟؟ واضح لها ان الزوج عشرة عمر وحب واذا مب مرتاحه هذا شي راجعلك ومستعد أبتعد والله يوفقك |
اولا اجلس معاها جلسة مصارحه
من غير عصبيه وانفعال زائد لكن حسسها انك مهتم بالموضوع al7olm6وانا معاك بكل كلمه تقولها خاصة كلمتين على بعضها تضيعها واغسل مخها بكلمات الحب والله يكتبلك الخيره |
الثقل صنعه
|
اخوي الكريم ،
اشوف نك تحاول تجلس معها وتصارحها وتشوف اللي عندها ولا تستعجل ان كانت مغصوبه عليك حيبان من الايام اهم شي لاتستعجل بالزواج وشوف ايش يصير معاك . وان كانت مغصوبة من اهلها اشوف احسن تكتشف الامر دحين مو بعد الدخلة والعيال . والله ان يشاء الله يرزقك احسن منها ويعطيها على قد نيتها |
انا مع اخواني بنصايحهم لك لاتستعجل بتأخذ قرار بس اهم شيء تتأكد بانها تبغاك مو مجبورة عليك انت حاول تحسسها بالامان
لازم تحل المشكلة قبل الزوج لاتقول تتغير بعد الزواج إذا ما اقتنعت فيك الآن ماراح تقتنع بعدين راح تصير حياتكم روتين من البداية ماراح تكون بينكم مشاعر وربي يكتب اللي فيه الخير |
يا اخي صارحها وتناقش معها بهذا الموضوع بس على شرط تكون هادى واعصابك بارده الى اقصى درجه
واسالها الاسئله اللي تدور في بالك هل هي تحبك ؟ هل كانت مغصوبه على موضوع الزواج؟ لماذا لا تحب تطول بالمكالمات ؟ وخبرنا عن النتيجه باسرع وقت لو سمحت ربي يوفقك ان شاء الله |
أسمع كلامها أصدقها أشوف أفعالها أستغرب
أشكركم جمعيا على المشاركه وأخذت بنصيحتكم بالمصارحه وكان الرد :- 1) بالنسبه لكثرة المكالمات تقول إنها كانت تحس بحرج كبير من تعليقات أهلها وانها اسفة على هالكلمة وسيل من الإعتذارات 2) حلفت بالله ماهي مغصوبه عليه وانه وافقت بقناعة تامه 3) يااااااااااليت ((((((اللي عمرها ما بنت بيت)))) سكت عنها حتى تكررت وكانت الإجابة إني حساس بزيادة فقلت لها ياليت تفيد التمنى وانا أجمل الحظات عندي وانا اكلمك وإنتي تقولين نفس الشي ليش تتمنين إنها تنتهي وقلت فكري بالكلمه........( مع السلامه) وقفلت أما عدم الإهتمام فالحال كما هو عليه كم تمنيت أصحى من النوم ألقى رساله كم تمنيت لو تسأل لكن للأسف كم تمنيت تفرحيني بوسط يومي بإتصال المشكله===================) طابت النفس وكرهت اليوم اللي قررت الزواج فيه أنا بكر أبووويه وطار من الفرحة يوم قررت الزواج جدي وانا اول احفاده اتزوج رغم إصابة بالجلطة يوم حفلة الملكة أصر على المجئ (((((((((((((((وإستخدم العصا بالمشي ووقف على طوله)))))))))))))))) أربعة من ابناء عمومتي تمت ملكهم بعدي وكلهم يقولون إنت شجعتنا لو قررت الإنفصال وش أقووووووووول؟؟؟؟؟؟؟؟؟؟ الله لا يبلاكم بما ابتليت فيه حسبي الله ونعم الوكيل ولا حول ولاقوة إلا بالله |
انا من رايي تاخر موعد الزواج ... وكمان تبعد عنها حوااالي لفترة اسبووعين شووف كيف تتصرف ...
اذا ما اتغير تصرفها ... استخير وافتح معاها موضوع انك مو مرتاح ... وممكن يحصل انفصال وشووف ردة فعلها .. اذا والله ما اتغيرت .. فكر وشووف اذا تقدر تستمر او لا ... لانه هذي حياة وعشرة وانت لسه على البر ... وحاول تفاتح ابوك في الموضوع ... بالتوفيق ان شاء الله ماتشووف شر .. |
والله مادري وش اقولك ، شكلها بتفقع قلبك .
|
اخوي واضح أنها خجولة ومن النوع اللي يخفي مشاعره بالتظاهر بالامبالاة ,,حاوا أنت تغيرها وساعدها على الافصاح عما يدور في نفسها,,كلمها لما مايكون حولها أحد من اهلها,
حاول التقرب منها ومصارحتها اكثر بدون عصبية ,, |
أخي فيه بنات أعرفهم عندهم جلافة في الطبع وماتعرف كيف تعبر عن اللي بداخلها ويمكن خطيبتك من هذا النوع .... لكن تجاهلها فترة بدون رسايل ولا مكالمات وشوف هل راح تتغير ولا لا .... وأحكم بعد ذلك ......
|
الله يسعدك وييسر أمرك...
تعطافت مع كثيرا.. الله يوفققك.. |
الأخ الفاضل
الزواج أكبر من ذلك وله أهدف أعمق وأقوى وأعلم صعوبة الصدمة التي تعانيها ولكن عليك أن تكون أكثر نضجا ووعيا لحقيقة الزواج حتى ترتقي بالفكرة فلا تعود تمثل لك المنغصات أمورا كبيرة بل ستحاول علاجها عوضا عن كره الزواج كما قلت.. فالزواج جميل ومعناه عظيم وإن شوهه بعض من لم يعوا عمق معناه وأصوله وسلوكياته فلا يجعلك تكره الزواج نهائيا بل تطمح لأن تجعل من حياتك هدفا له ولتحقيق ما وضع من أجله وللحصول على النعمة العظيمة التي به والبركة التي يتخللها..ولا تجعل أي عائق يعيقك عن تحقيق ما تريد.. بالنسبة لزوجتك وما وجدته فيها فبرأيي ما زال الموضوع ببدايته وهناك من الإختلافات الكثير الذي ستواجهه بحياتك وهذا أمر طبيعي ولكن إنظر لما جعلك تتزوج منها حقيقة كيف هو دينها؟ أخلاقها؟ إسلوبها بشكل عام؟ إحترامها ورأيها بالحياة الزوجية؟ طموحاتها في حياتها الزوجية؟ وإنظر إلى ما جعلك تقبل عليها..وإن لم يكن هناك ما جعلك تختارها لذاتها كمرأة بل لأهلها فابدأ بالبحث عن ما فيها من خلاقيات وما يجعلها أما لأولادك... ربما هي عاقلة بشكل أكبر من إقبالك عليها.. دعني أخبرك ببعض أسرار النساء... بعض النساء لا يحببن الرجل الذي يقبل بشكل رهيب عليها، ولكن يحببن الرجل الوسطي أو البعض يحببن بشكل غريب ما يسمونه بالثقيل..!! وبما أنها إعتذرت ووضحت هذا يدل أنه ربما أنك لم تفهم حقيقة طبائعها والآن هي فهمت هي ما تريد لذلك ربما لن تعطيك هو ! للأسف لأنه أحيانا عندما نطلب بشكل توضيحي وصريح نخسر طلبنا وهذا واقع يحدث بالرغم من أنه خاطئ ولكن هذا ما يحدث لذلك تعامل مع هذا الواقع بذكاء ولا تجعله يغلبك فخذ ما تريد ولكن بتوضيح مخفي.. فدعني أقول لك بالمنطق وبشكل عملي حاول أن تنفذ ما اقترحه عليك ربما تجد حلا بإذن الله لا تتواجد بشكل مكثف ولا ترسل ولا تتصل نهائيا بشكل يومي.. جرب أن تتغير كما تريد هي وإنظر ما سيحدث لك من الآن لإسبوعين بالتمام ولكن حاول نفسيا أن تكون هادئ فعلا بداخلك حتى تستطيع أن تكون طبيعيا جدا معها ولا يظهر عليك التقصد بهذه التصرفات. إتصل كل يومين فقط مرة احدة وأنت هادئ ومقبل بحب وحاول أن تتكلم بمدة لا تتجاوز الربع ساعة فقط وإجعل عينك على الساعة وإجعل كلامك كله جميل ومريح وشوق.. وإذا سألتك بما معناه بقولها (لو مشتاق لي ما كنت غبت كذا ) أو شي يلمح لنفس المعنى... تعذر بكلمة واحدة لا أكثر بحب وبطريقة ودية كأن تقول ( والله يا ...... مشاغل بسيطة فاعذريني. ) ولا تقل ( مو هذا إلي تبينه) إنتبه أن توضح أن ما تفعله مقصود... وإستمر على هذا المنوال ولكن إصبر لا تستعجل النتيجة.. وعندما تطلب منك أن تتحدث معها تحدث لا مانع ولكن لا تطيل عن ربع ساعة أخرى وراعي أن تقوم أنت بإلاقفال الخط بالنهاية بمعنى إنظر للساعة لا يسرقك الوقت وبمجرد مرور نصف ساعة قم بالإعتذار بشكل عاطفي وجميل بأنه عليك النهوض باكرا للعمل وأنك ستعوضها.. أما إن تلقيت منها البرود بردة فعلها وأنه عادي جدا لم تهتم فتماسك ولا تستغرب وأقفل بنبرة حب لا تقفل بنبرة غضب.. إنتبه حاول أن تستمر قليلا حتى تتضح الأمور.. إن نفذت كل التفاصيل ولم يحدث شي خلال إسبوعين فسنحتاج إلى تجريب خطوة أخرى ومصارحة بشكل مباشر حتى تتضح الأمور أكثر... وأخبرني بما سيحدث معك إن أغلق الموضع وأردت التواصل بالمشكلة أوإخباري بالنتائج يمكنك الإرسال على عالم الإستشارات الخاصة وسأرد عليك بإذن الله.. وفقك الله وأصلح بينكما وهداها إلى الطريق السليم ويسر لك كل خير.. آآمين |
انا خطيبي قالي انه في بداية الخطوبه كان يحسب اني مغصوبه عليه
لاني ما اتكلم معاه الا كلمتين ولا ادق عليه واحيانا القاه متصل ولا ارجع اكلمه الا بكره وارد على رسايله متأخر بس هو صبر علي وكان ينبهني اني مارديت عليه او طنشته والحمد لله اخذت عليه وصرت ادق وازعجه كمان ولما صار يمون قال انه ما كان مبسوط اول ما كلمني بس كان عارف انه خجل انت اصبر عليها ولا تكثر الزعل وشوي وتصير تزعجك باتصالاتها |
أخوي أنا أعتقدأنه نوع من ألتثيقل والتغلي يمكن وحده من قريباتها أوصديقاتها ناصحتها ماتعطيك وجه لأن صدقني أخي ألفاضل أن مثل هذه ألنصائح متداوله بكثره بين ألنساء (أثقلي لاتعطينه وجه ,خليه هو اللي يتشفقك وكثير من العبارات )وأعتقدأخوي زوجتك تريدمنك أن تجري أنت خلفها وتظهر لها المشاعر أكثر وفيه مثل دارج بين ألنساء وهو(زوجك على ماتطبعينه ولدك على ماتربينه)وصدقني أخوي بتشوف غلاها عندك ولو أنها ما تبيك أصلا ماوافقت تكلمك [بالهاتف أنصحك ماتستعجل بالحكم عليها وبعدين شكلك تكلمها بشوق ولهفه أنا أنصحك أنك تقلل من أتصالك ورسائلك لها وإذا أتصلت أوأرسلت طنش حبتين بس لاتمصخها يعني رد عليها بعد ساعه أوساعتين وإذا كلمتها لاتطول سو نفسك مشغول وصدقني بتشوف إلنتيجه بتركض هي وراك تحياتي لك
|
والله يا أخي الله يهديك مكبّر الموضوع .. وخطيبتك إحدى هؤلاء : إما أنها " رااكدة " عاطفياً .. وهذه تحتاج إلى بعض المجهود ! أو أنها ممن يرينَ " الثقل " يزيد من لهفة الرجل ! طالما قالت بأنها غير مجبرة .. فصااارحها .. لتريح قلبك .. جلسة مصارحة .. صاااادقة كفيلة بحل الموضوع ،، |
| الساعة الآن 08:00 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©