|
غيرتي تعبتني اتمنى زوال ما في قلبي مستجد رد22
السلام عليكم ورحمة الله قد اجد من كلامكم مايوعيني لأني والله عجزت من نفسي ماخليت فتاوى التعدد ونصائح لمن تزوج عليها الا وقرأتها لدرجة لما صرت ابحث بقوقل الاقيني قرأت اغلب المواضيع ادعي الله في صلاتي واحاول اقرأ قرآن لأني أصابني احباط مو قادرة أجاهد نفسي ولا قادرة اوقف من جديد ثقتي كانت محطمه وزوجي كمان كان له دور في هذا الشيء والآن ازداد الوضع سوء رغم انه يحاول يحسسني ان ماأحد مثلي طبعا لأني عارفه حقيقة نفسي وحقيقة انتقاداته السابقه لي اعرف ان كلامه كذب
تزوج منذ ثلاثة شهور واخبرتكم بقصتي سابقا انه كان مطلق اكثر من وحدة جاهدت نفسي ببداية حياتي الزوجيه اني اتناسى طليقاته لأن هالشيء كان مسبب لي ازمه خاصه يوم عرفت انه خاصه يوم عرفت انه كان يحب وحدة منهم ولأن ببداية حياتنا كان مشاكل ماأنكر كان بيننا مشاكل بس مو دايما بين فترة وفترة وغيرتي ايضا كان لها دور بس كان محسسني انه يحبني من الله وبعد فترة خصام جلستها اول زواجي عند اهلي بذل كل مايستطيع لإرجاعي واظهر للناس انه العاشق الولهان وكان دايما يقولي لو انتي جيتي زمان كان مصيرك ننطلق زي الأولات بس من الله ماأقدر أحس ماأقدر انطقها عليك حسيت انه فعلا مو قادر يجرحني وانه ان شاءالله بنكون محبين لآخ عمرا والمشاكل ملح الحياة بعد زواجه في البدايه اقنعت نفسي انه فعلا تزوج عشان عياله او يمكن فعلا تم التلميح له بوقت نشوة وحماس وطرت فكرة العرس خاصه انه كان يقول وجاد انا امزح بالزواج وين عقلي اخلف من كل وحدة كم واحد واشتت عيالي خلاص انا يكفيني عيالي الأولين انظلموا والحين ابغى استقر كل هالكلام ماضي صح عارفه انه انتهى لكن آثاره باقيه في نفسي وبدأت الصورة تتضح لي صرت اقوله انت تزوجت عشان تجدد عشان نشوة العرس عشان تتقلب بين الحريم وكل وحدة تدلعك انت تزوجت بعقلك وبرضاك وبختيارك ويكفي تقولي غلطت فكرت بعقلي مافكرت بقلبي زواج كان مفاجيء طرى علي بجلسه احيانا صار يقولي صح انا اللي تزوجت ومافكرت كويس يبغاني ارضى ارجع اعيش معاه حياة سعيدة انا قلبي انكسر والله وماعادت قادرة أشوف حتى عيالي امشي والحزن رفيقي احاول اقنع نفسي خلاص بوجودها بس فجأة الاقيني انهار ابكي بجنون اقوله انا كنت اغار من جوال من مقطع اذا شفت بجوالك من زبونه تتلاين في الكلام ليه مافكرت ايش بيصير فيني لما تجيبلي ضرة فوق راسي انا اكره انحط بمقارنة ومنافسه مع احد كنت عايشه رغم وجود المشاكل بسلام كع نفسي وكنت اشوف اللي اقل مني واقول الحمدالله انا احسن من غيري الدنيا فانيه الدنيا فتن وحروب انتي بنعمه اليوم موقادرة والله اشوف وحدة من قريباتي ابنها متوفي واقرأ كلامها بالواتس واحس بعمق مصيبتها بس مافي فايدة ارجع اقول انا حاسه باافقد مثلها كأنه واحد من عيالي راح علي مشكلتي مو اجتماعيه مرة وابنائي حركيين صعب الخروج معاهم حتى بوجود ابوهم ازعاجهم الله يصلحهم عجزت افهمهم انهم بيسببون نفور لأبوهم من البيت رغم اني عارفه انه صار بينهم ماصار وانهم زوجين خلاص بس يوم خليت عيالي يروحوا قلت وهم صغار يشوفونها احسن ماينصدموا وهم كبار وفعلا لما شافوها سألوها ليش تزوجتي بابا ابوهم رد عليهم انه انا اللي رحت تزوجتها واقنعهم انها ام لعياله الثانيين اللي اصلا مافي غير واحد عنده وقالولي ماما بيتهم نظيف اخونا مايوسخ وتنظف مرة وحدة وتجلس طول الوقت واذا بابا موجود جالسه حاضنته وتسويله معسل طبعا حسيت بالغيرة في صدري ذبحتني ورجعت اقول ايش يعني حاضنته ماهو يصير اللي اكبر من كذا بس ارجع واقول ليش خلى بيتها للوناسه عندي مايسوي كذا أحس انه يشعر بالنشوة والوناسه في بيتها صارحته وتعذر قال بس شتهيت معسل وطلبت مو اني دايما عندها كذا طبعا كذاااااب قلتله خلاص طلقني انا مو قادرة ولاعاد فيني حيل للمنافسه والمجاهدة انا كنت تقول ماأقدر اوديك للديرة الحريم خطيرات وانتي بتضيعين بينهم لأنك طيبه رحت جبت وحدة من الديرة لفوق راسي هي دخلت للحياة مبسوطه ومتحمسه ومالكه الدنيا بزوج عاملها بحب وحنان من اول شيء وماخلاها تخاف منه او تحط حدود بعكس ماكان عاملي حدود وقواعد رافض يطلق ويقول مابتلاقين احد يحبك مثلي واهلي ايضا رافضين يقولون مانقدر نمسك عليه شيء ورجال ينشرى ومحترمنا وانا خايفه من اني اندم لو اتطلقت بس حقيقه انا ماعادني عايشه حياة زوجيه ابغاه بس شايفه زوجته بيني وبينه مو قادرة اتخلص منها رقمها عندي واشوفها في البدايه كاتبه انا مو افضل من غيري لكن مقتنعه اني رافضه اقارن نفسي بأحد ورجعت كتبت بمعنى انه ماأبغى شيء الا ان اكون سبب سعادتك وزرع البسمه على شفاتك كل ماخطرت ببالك كلامها اثار التساؤلات كيف في حريم عارفه ان بحياة زوجها احد غيرها وعايشه عادي وكيف قادرة تتناسى وجودي ومعيشه نفسها الجو والحب ارجع واقول اكيد تعامله معاها من البدايه هو السبب مادري اكتب لكم فضفضه او ابغى حلول او احد يهزأني ماأكذب عليكم شفت صورتها بأحد الأوراق الرسميه في سيارته بدون معرفته اول ماشفتها هدأت ماهي اجمل مني بعد كذا صرت اتخيلها بشكلها الحقيقي كيف تتعامل معاه وانجن وانه جسمها احلى من جسمي وارجع اقول انا في الحقيقه ماأبغى وحدة تشاركني بقلبه ابغاه لي زي ماتعودت يكون جنبي وين ماكنت في البيت في السفر في المستشفى ايش ذنبي ينقص حقي منه وتقاسمني الأيام وحدة ثانيه ادعولي ان ينزل الله عليا الرضى والسكينه هذا اعتقد ماأحتاجه اكثر من اي شيء انا رحت لأهلي وكنت ناويه فعلا اذا هدأت ماأرجع بس الكل خاصمني وقالولي غيري جو وارجعي لبيتك اتصل ومارديت مشكلتي عارفه انه عنده كبرياء جالسه اشوفه متصل هو وياها بالواتس وانا حتى الرسائل بيني وبينه انعدمت ماعاد اتعامل معاه كزوج الغيرة تذبحني واقول ليش مخليته لها جالسه تستغل الوقت اللي فيه فضاوة عنده هي ماتعرف انه رحت لأهلي وقالي بيومك بروح البيت لحالي احسه ساعات مايبغى احد يضحك انه عنده مشاكل وساعات اتوقع خايف يعطيها ايام زيادة ويرجع يبلش بغيرتها اذا تعودت عليه فيبغاها تمشي على نفس النظام عشان تظل مقتنعه ومريحه عليه (مستجدات الرد22) http://66n.com/forums/showpost.php?p...3&postcount=22 |
رد: غيرتي قتلتني والله اتمنى يروح اللي بقلبي
اولا لاتجعليه اكبر همك عيشي و انبسطي و اهم شي ابسطي عيالك لانهم مساكين يتاثرون بنفسيتك
ومن تعلق بغير الله عذب به لان هالمقارنات ماراح تجنين منها الا التعب ،،واستعيني بالله اصبري و خليك على هالمنوال و صدقيني بترتاحين ان شاء الله |
رد: غيرتي قتلتني والله اتمنى يروح اللي بقلبي
اقتباس:
|
رد: غيرتي قتلتني والله اتمنى يروح اللي بقلبي
الفرق واضح بينها وبينك
ومالومه لو فضلها عليك تدرين ليش ؟! لا لا مو عشان جسمها ولا شكلها ولا مقدرتها على امتاعه وجذبه لا الفرق انها تحب نفسها وانتي تحبينه ... مره قريت مقوله وعلقتها ب اذني لان الرجال مو ملك من املاكي ممكن اليوم لي وبكرا لغيري ولكن الشيء اللي امتلكه ولي حرية التصرف فيه هو (نفسي ) ايه نفسي المقوله اللي معلقتها بقلبي واذني تقول ( ايتها الحمقاء انتي لن تكسبي رجلا الا اذا قررتي ان تحبي نفسك اكثر من ما تحبيه وتدليليها اكثر من ما تدلليه انظري حولك .. كم المرأه الانانيه مشتاه ..) فعلا الأنانيه مشتاه جدا والدليل عليها العشيقات انانيات ان مالقت مطمعها وحاجتها عند هذا راحت لذاك .. مانشبه انفسنا بهم الله يعافيهم ولا يبتلينا ولكن نأخذ الشيء اللي ممكن يفيدنا بحياتنا انتي وقفي لحظه خذي شهييييق من انفك وازفريه من فمك سويها ثلاث مرات طلعي السلبيه اللي جواتك والمشاعر الحزبنه الفظيها لبرا لا تبحثين وراها ووش سوا لها وكيف شكلها ووش سوت له تموتين هم وغم من راقب الناس مات هما شوفي نفسك دللي نفسك انتي وش ناقصك وش حابه تعملي وش هدفك بالحياه معقول يكون حب زوجك هدفك ؟؟؟ ماعندك اهداف اخرى ؟؟ اولا حددي اهدافك .. اكمال تعليم وظيفه تربية ابنائك تربيه صالحه هذي اهداف كبيره وفي اهداف اصغر فأصغر تغيير البيت تغيير ديكوراته سفر لتغيير الجو مول لشوية شوبنق يرجعك عروسه طلعه لصحابتك للناس ترى مو فشله انه تزوج ولو اخذ عشر الفشله انو تحبسي نفسك وتنتهي حياتك عشان زوجك تزوج ماحدخل في تفاصيل زواجه وليش تزوج وماتزوج مالنا ولا لك حق خلاص رجال واتخذ قراره وبكيفه المهم عندي انا بس هو انتي اطلعي من جلباب زوجك ومن الحب وذا الخرابيط تراها ماتوكل عيش اللي بيجيب زوجك لك هو حبك لذاتك في هذا المنتدى اطلعت على مشكلتين وحده لرجل يشتكي من لعد زوجته الاولى عنه وهو يحبها ويموت فيها بس هي لاهيع وعايشه حياتها وذا اللي حارق قلبه والثانيه لضره وزوجه ثانيه تشتكي حب زوجها الشديد لزوجته الاولى وجايه تقول كيف اخليه يحبني انا وتدرين ايش سبب حبه للأولى برضو لانها تحب نفسها وعايشه حياتها ومو مخليته محور هالحياه حتى انه ينقهر منها يحب الشعر الطويل وهي تقصه ؟؟؟ فعلا اللي تحب نفسها وتقدرها كلن يحبها قومي اتركي الدموع والبطبطه انتي اقوى صحتي وانقهرتي لين قلتي بس جا دوور التغيير لهنا وقولي لمشاعرك ستوب بقولك شيء يريحك استخدمي زوجك لسعادتك مو لتعاستك احنا نحتاج وجود الرجل لإعتبارات كثيرا نفسيه وعاطفيه وماديه وجنسيه احنا لنا رغبه تماما لوجوده ولازم نحوله اداه للسعاده مو اداه للقهر زوجك وان كنت اكره هالكلمه على قولة بعض النساء المظطهدات اعتبريه الصرافه والرجل اللي تحتاجين لاشباع معه سواء عاطفي او جنسي اذا جاك انسي وجود زوجه له انبسطي وابسطي نفسك معاه تدللي واطلبي واشبعي منه واشبعيه ولا لا تشبعينه بكيفك انتي وضميرك اهم شيء انتي اشبعي منه ماديا ومعنويا لا تبقين شيء بخاطرك ان جا ي هلا به وان راح مع الف سلامه في وقت عدم تواجده ركزي على ابنائك وبيتك ونظافته وتعطيره علمي ابنائك الهدوء والادب والاحترام مافي شيء اسمو هما حركيين لا هما اطفال وبالتربيه الصحيحه يطلعو زي الالف اشتري لهم العاب ذكاء او صبوره واقلام ودفاتر تلرين العاب تعلمهم عالتركيز والهدوء مو العاب مسدسات وركض وركيض واذا فيه ايباد اسحبيه فتره وخليه عقاب للي مايسمع الكلام ينحرم من الايباد علميهم يشكرو ابوهم يبوسوه يحضنونه يقولو له كلام حلو وركزي عليهم هم اكبر عامل جذب لزوجك وانتي تعلمي انك تحبي نفسك وتدلليها وتتعرفي على جارات وصديقات خذي دورات كومبيوتر ولغه وتطوير ذات طوري من نفسك واخلقي لك بيئه اخرى تعزلك عن بيئة الالم اللي تعيشيها وتعرفي على بنات جدد وكوني لك حياه اخرى بعيد عن زوجك ممكن تدخلي جيم تنزلي من وزنك وتنحتي جسمك ويكون فيه مكان مخصص للاطفال اغلب الجيمات اللي بالرياض بكون فيها مكان للبيبي لما تخلص والدته التمرين بيتك غيري اثاثك وجددي جيبي شغلات ميوت لغزفة النوم ورد وتحف جديده وابجورات وايكيا مايقصر بالافكار غيري استايلك شعرك قصته ولونه وملابسك وكل شيء غيريه وحبي نفسك نفسي اولا ومن بعدي الطوفان وتمشي الحياه زي العسل وراح تشوفي تغيير بزوجك بشكل لا يعقل والكلام في هالموضوع يطول لكن حبيت اختصر لك والله يثبت قلبك وينور لك بصرك وبصيرتك ويزيل عنك الهم حبيبتي |
رد: غيرتي قتلتني والله اتمنى يروح اللي بقلبي
لا تدخليّن نفسك في مقارنات مع أحد نهائي ولا تسمحين بهالشي.
منافسة ؟ المنافسة وجهيّها لمسار ثاني، افضل من انك تزجّين نفسك بهالوضع وتنافسينها عليه! انت نسيت نفسك بالكامل ، داخلة في تفاصيل حياتهم وفقدت طعم حياتك ولا عاد يرضيك شي فيها متقوقعة على نفسك وش حادك ، زواج زوجك ألتفت لنفسك وحبيها ، ثقتك مهزوزة ابنيها من جديد روتين حياتك اكسريه ، لا تعزلين نفسك عن الناس ، وكوني علاقات انبسطي وابسطي عيالك وزوجك و أهلك وانسيها ما استطعت. الله يريح قلبك |
رد: غيرتي قتلتني والله اتمنى يروح اللي بقلبي
اقتباس:
الله يجزاك خير المشكله صح داخليا ابغاه واحبه واشتكيلكم بس في الحقيقه انا مو جالسه اركض وراه انا تاركته وهو جالس حاليا يدور علي بس اخاف تتمكن بقوة من قلبه وبعدها يميل عننا انا فترة قبل زواجه انصرفت عنه وقلت ماراح اركض وراه وهو مطنشنا بس حسيت ان جاء الزواج في لحظة بعد بيننا اخاف هالشيء يكون نتائجه عكسيه بالنسبه لها صح هذا كلامها لكن الحقيقه اللي انا شايفتها انها دخلت وامطرته بوابل من العاطفه لدرجة كنت اقول متى امداها كل هالحب احس من اول يوم بدأت غزل وحب وعشق وعشرين رساله في اليوم وانا مبدأي آخذ عشان اعطي طبعا هذا زمان الحين اغلق جواله برمز مش عارفه انا بحيرة ارتاح كم يوم وارجع استعيد حياتي معاه واتواصل بالرسائل وكل شيء او اظل زي ماأنا بعيد وترى انا ماغيرت نفسي عشان تزوج عارفه كل شيء ماله قيمه الحين بس جالسه اهتم بنفسي وانشغل عنه وناويه اخذ دورة لغه بس مادري هو مشكلته يعارض الدراسه والخروج راح اخذ وحدة ماكملت الثانويه هل يحس برجولته كذا او مادري عجزت احلل الوضع هل انعايش مع كلامه عشان اعرف اعيش ولا اعتبره كذاب ولا عاد اصدقه عشان ماانجرح اكثر |
رد: غيرتي قتلتني والله اتمنى يروح اللي بقلبي
اقتباس:
|
رد: غيرتي اتعبتني اتمنى زوال ما في قلبي
انظري لاحتياجاتك بمعزل عنه
ثم وفري وسائل تحقيقها و حققيها لاتقولي تشاركني في زوجي امراه بل قولي انا امراه متزوجه و ساتمتع بهذا الدور ولا تفعين في براثن حديث النفس و الظنون والخيال استمتعي بوقتك ولا تلتفتي لسيمفونيات ابليس التي يعزفها على اوتار الغيرة |
رد: غيرتي اتعبتني اتمنى زوال ما في قلبي
امر اخر احب ان اسلط الضوءعليه
كل ماحدث ان هناك مخاوف لديك وتحققت هذه المخاوف ضخمها الشيطان وكنت منصاعه تماما لها فمن المؤكد ان النتيجة تفقدك سيطرتك على سلوكك لانك السلوك حلة ظاهرية اما في الباطن فانت فاقدة للسيطرة منذ زمن بعيد اسالي نفسك ماسبب وما دافع هذه المخاوف انت فقط تعلمين فقط تفرسي اعماقك وان علمت الدافع وتمكنت منه تخلصت من هذاا الجحيم حتما ودخلت جنة الرضا واسعادة ولاتنسي التوكل على من لا يغيب عنه شيء وبيده الامور كلها |
رد: غيرتي اتعبتني اتمنى زوال ما في قلبي
اسأل الله العظيم ان يربط على قلبك
|
| الساعة الآن 07:50 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©