|
تعبت من الإحراجات.. كل واحد يبي أعرس على بنته!!
بسم الله الرحمن الرحيم
بداية أعذروني لأني أر هذا المنتدى محرم على من لم يتزوج (هذا اعتقادي) بس قلنا الله يطرح البركة بآرائكم الجميلة التي والله حتى أقربائي اسمعهم يشيدون بمنتداكم ويقولون انهم استفادو منه أجل استفادة.. صراحة يا آبائي.. من 6 شهور والوالدة تحاول تزوجني:14: وتفرح في ولدها الكبير.وأنا رافض... يعني صحيح الواحد يبي يتزوج ووالله إني أبي أتزوج أحصن نفسي. بس أنا أخاف أظلم البنت معي .. لأني ما أبي أقصر عليها ولو بريال.. وكمان أنا الوالدة مربيتني أحترم بنت الناس وخاصة أهلها.. وبما أن عمري 19 يعني تونا بأول سنة بالجامعة..والحمد لله ملتزم .وأخلاقي تمام نحمد الله الذي احسن تربيتي .. قلت مابي أحتاج للوالد وأتعبه زيادة.. ورفضت أكثر من مرة. المشكلة إن امي وقدرنا عليها .. لكن خالاتي.. عماتي .. الجماعة .. والله حتى الجيران .. أحصلهم في المسجد في العزايم .. كل واحد يلمح للوالد.. ومره يمسكني على جنب.. ويقولها لي بالصراحة.. آخرتها أمس والله حضرت عرس لناس أعزاء علينا.. ومسكني صديق أبوي على العشاء قال لازم آخذ بنته.. والله أحرجني حتى إني قمت وما قد شبعت .. وصرت أرتجف بشكل غير طبيعي.. وجلسنا بعد العشاء وهو ماسك معي إلا يبيني أخذ بنته.. وكل ماجاب طاريها ,, أقوم ارتجف حتى رجولي تصافق.. كأنها جتني أم الركب .. /وأنا أقول له يا عم الله يهديك كل شي قسمة ونصيب وإذا لي فيها نصيب أباخذها بس والله مو وقته اصبر علي 6 سنوات أخلص الطب./ فيا آبائي.. رجعت البيت وانسدحت إلا وأنا أفكر في الزواج. وأقول حرام اكسر بخاطر امي.. لأنها تبي تشوف عيالي ..قبل ما تكبر بالسن زيادة (يارب طول عمرها). بس أنا خايف والله اتسرع.. والحمد لله اسرتي مغتنية .. بس مابي اعتمد على أبوي في كل شي.. ============== المطلوب منكم.. 1- هل تؤيدون فكرة زواجي في هذا السن؟ 2- هل تؤيدون آخذ أكبر مني أو أصغر مني؟ 3- ماهي نصيحتكم إذا كان تأييدكم بـ لا لكي أبتعد عن هذه العروض (لأني والله مابي أمشي في الحرام وما أبي كل ما واحد قالي أقعد أفكر في الحريم عشان ما اخلي للشيطان فرصة).. 4 - ماهي نصائحكم لي بشكل عاااااااام.. وهل الزواج سيؤثر على دراستي. ============== وابشرو إذا تزوجت كلكم معزومين عندي ..:17: وبكون من الأعضاء الفاعلين في هذا المنتدى..:22: لأني جاهل جاهل جاهل بأمور الحياة الزوجية. |
طبعا لا تتزوج حتى تكمل دراستك اولا وتعمل وتكون قادر على الصرف على بيتك
ولا تلتفت لعروض الآخرين اين شخصيتك لو قال لك احد تزوج بنتى قل له انا لا افكر بالزواج الآن وان فكرت سأخبرك |
أنا من رأيي انك تتزوج يا دكتور بس تحسن الاختيار مو شرط تحدد العمر عادي لو اكبر منك بشوي او كبرك.. بما انك مقتدر ولك رغبه ليش لا؟؟ بالعكس حلو يجيك أطفال بدري وحلوو انك تحصن نفسك خاصه بهالوقت وبمجال عملك
|
اسمح لى بدرى جدا على الزواج
واذا قالك احد شي قله ما اقدر احط عيني بعين زوجتي وانا اخذ مصروفي من ابوي, واخاف مسوليه الزواج تاثر على دراستي انا اخوي وصل الثلاثين ومن كان في الجامعه والناس يلمحون له بالزواج زيك وكان يتهرب منهم وبعد ما تخرج واشتغل زاد الالحاح عليه حتى احنا يااخواته وكان يقول لسه ما بعد كونت نفسي وانا ماابي اخطب الا وانا جاهز من كل شيء ما ابي اشوفها في زياراتي لها بعد الملكه الا وانا معاي هديه وانتو تعرفوني ما ارضى باي هديه وابي اسكنها احلى بيت ولسه ماخلص البيت وقتها ما نقدر نرد عليه |
اذا لديك استعداد نفسي وقدره ماديه وبدنيه توكل على الله
الزواج ستر ونصف الدين ويجلب الرزق والبكره وحصن لك كشاااب استخير الله في الزواج وفي اي بنت عرضوها عليك وملا تشوفها شوفه شرعيه تحادث معها والأنسب لك واللي ترتاح لها توكل على الله واخطبها واملكو |
نصيحه نصيحه ......
تزوج مبكرا ........تحصن نفسك..... وإن كانت لديك العزيمه ...... ستكمل دراستك حتى لو كان لديك من الابناء عشره................ واذكر لك اخوزن والدتي .اخوالي كلهم تزوجو والله الهعظيم وهم لايملكون درهما صغار لاكن كانت فيهم الرجوله زوجهم جدي وصرف لهم حتى تملكو اعلى المناصب ويحملون شهادات عليا..... حصن نفسك ..... وراضي نفسك .....وارضي امك ...ترضي ربك... من استطاع منكم الباءة فليتزوج......حديث شريف.. ووفقك الباري دوما ....اختك ام عبدالرحمن... |
اقتباس:
وصغيره او كبيره بصرراحه مادري على حسب النصيب انت أسال في البدايه احدى اخواتك او خالاتك المهم ترتاح لذوقها وأسالها عن البنت عشان مايصير نظره شرعيه وماتعجبك يعني من الافضل استشاره احد من محارمك النساء وتقولها شروط زوجتك والدرراسه بالعكس اذا كنت متزووج ومرتاااااح راح تكمل دراستك على أكمل وجه اعرف بنت كملت المتوسطه واالثانويه والجامعه والماجستير والان تكمل الدكتوراه ماشاءالله وهي امراءه لديها 3 أطفال فما بالك ب الرجل اتمنى لك التوفيق استخير وانا اختك ولاتضيع وقتك اذا اهلك بيتكفلون بكل شيء ومااحد داري وين راحتك ابحث عن راحتك وتوكل على الله تحيتي |
http://www.66n.com/pics/hosted/rceo8...wsdlwui05g.gif
أخي الكريم أنت الذي تحدد مدى احتياجك للزواج .. ومدى قدرتك على الصبر عنه ليس المهم هو العمر .. بقدر ماهو مهم كونك قادر على تحمل مسؤلية بيت واسرة .. لا اقصد المسؤلية المادية فقط !! ثم ان هذا الزمن .. بمايحوي من ابتلاءات .. يجعل صاحب الـ 16 سنة يحتاج لإعفاف نفسه !!! فلا ارى في عمرك مشكلة .. طالما انك ترى من نفسك الرجولة بمعناها الحقيقي ولا ارى ايضا ان في الزواج مايمنع من اكمالك دراستك .. بالعكس .. سمعت عن بعض الزيجات الناجحة بفضل الله ان المرأة هي التي تدفع الرجل لتحقيق النجاحات .. والزواج سكن نفسي وراحة بال تزيد من عطاء الرجل في مجال عمله ودراسته "" أكيد طبعا حسب اختيار الزوجة .. وحسب توفيق الله وبركته بينكم "" بالنسبة لمن يعرض عليك ابنته .. شاور اهلك .. واسأل عنها .. وفكر بجدية في مواصفات عروس المستقبل .. لاتخجل من التفكير .. فهذا مستقبلك !! اعرف بعض الرجال يكره المرأة البيضاء شديدة البياض مثلا ويراه عيبا في جمال المرأة .. والبعض يحب تلك الصفه .. بعض الرجال يحب فتاته بشعر طويل .. والبعض لايهمه ذلك البعض يحب الشعر الناعم مثلا .. وغيره لايهمه !! ابحث مع نفسك .. مالصفات التي تحب وجودها بزوجة المستقبل .. والتي اذا نظرت اليها والى جمالها ومواصفاتها أغنتك عن النظر الحرام .. وكفتك بخَلقها وخُلقها .. فقط اعطِ لنفسك أحقية التفكير "مادامت ظروفك تسمح بزواجك ولله الحمد" وليس لأحد ان يتدخل في المواصفات التي تطلبها .. لأن الغرض من الزواج .. تحقيق العفاف .. وهذا يحصل بتوفر شروطك في الفتاة شكلا واخلاقا .. لذا لا تخجل عند عرض احدهم ابنتك عليه .. بل فكر بإجابة لبقة يفهم منها الرجل ان ابنته مرغوبة .. لكن لك شروطك التي تجعلك تقف .. قبل ان توافق عليها بالنسبة لعمر الفتاة .. فلا ارى انه بتلك الاشكالية .. لكن اكرر .. الكلمة عائدة لك والرأي رأيك انت فقط ان كان العمر يمثل لك نقطة فارقة .. فاخطب اصغر منك وان لم تتوفر شروطك سوى بأكبر منك .. فما المانع !! أكثر من الاستخارة واسأل خالقك ان ييسر لك امرك .. ويغنيك بحلاله عن حرامه .. للبعض وجهة نظر .. بالذات الامهات .. يرون التعجيل في خطبة الابن حتى لو لم يكن قادر ماديا !! حتى اذا غلبته نفسه .. وفكر بالنساء "وهذا امر طبيعي" .. يجد فتاة يفكر فيها بذاتها .. لا ان يفكر في فتاة رءاها بسوق مثلا .. و حتى لو كان مابينهم مجرد خطبة!! وسمعت ان بعضهم ..راودته نفسه للحرام .. فتذكر الفتاة التي بانتظاره .. فترك ما نوى عليه !!! لذا ارى ان العفه بهذا الزمن من اهم الامور التي يجب وضعها بالحسبان .. رغم كل الظروف وان كان مجرد خطبة .. حتى تجد من نفسك قدرة مادية وجسدية وفكرية تؤهلك للزواج بالتوفيق اخي الكــــــــــريم |
نصيحتي لك وللجميع
عندما تتردد في الاختيار فعليك بصلاة الاستخاره اسال الله لك التوفيق |
هناك من يعارض وهناك من يعارض
ونفس الشي تفكيرك مثل الي يعارض ومثل الي يؤيد عزيزي لهفة الزواج والاستقرار هذا امر لابد منه انا تأخرت بالزواج المفروض اني متزوج منذو سبع او ست سنوات ولدي اطفال علماً بأن الذين يكبروني سناً واصغر مني بسنه او سنتين لديهم اطفال الي على طفلين وعلى ثلاثه وعلماً بأني كنت موظف لكن راتبي لم يساعدني والحمد الله ثابرت ودرست وانا موظف وقدرت اني اواصل دراستي واحسن مستواي المعيشي والحمد الله ولكل مجتهد نصيب وتحز بخاطرك عندما تعلم ان فلان رزق بمولود ودك تصير مثله واحسن منه وش ينقصك والان الحمد الله وقفت على رجولي وبستطاعتي ان اتزوج بعرقي وتعبي وشقاي لكي احس بقيمة زوجتي التي تعبت اجني لكي احصل عليها علماً بأن عادتنا تتطلب الزواج المبكر مثل سنك وانت طالع و انصحك بالزواج المكبر ولكن هناك شروط هل فكرت بالمسؤليه ؟ هل انت قادر ان تصرفها دون الحاجه لوالديك؟ والله انها صعبه عندما تكون رب اسره وتطلب من ابوك مصروف ادري تبي تقولي عندك مكافاءه و المكافاءه في وقتنا الحالي ماتجيب لك كيس رز فيه مثل يقولك قيس قبل تغيص وادري ان مافيه احد بيموت من الجوع والحمد الله لكن وانا اخوك الشي بالتفكير وحلات الشي لما تتعب فيه تحس ان له قيمه وانه غالي عليك لانك كدحت وثابرت لكي تحصل عليه من وجهة نظري اوقف على رجولك بالاول وبعدين استعن بالله ويبقى الوضع وجهة نظر وبالتوفيق ولا تنسى الاستخاره لكي يطمئن قلبك |
| الساعة الآن 10:01 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©