|
الله يسعدك اخي عزوبي على هالموضوع الرااائع شوقتني لأيام الطفولة والدلع وضحكتني ردود الإخوة والأخوات مررة الله يسعدكم جميــعا بالنسبة لي انا مثل ماذكروا الكثير اشوف المذيع في التلفزيون احسبه يطالعني واروح يمين يسار وهو مصر يشوفني لحد ما جات ماما يوم وعلمتني قالت ما يشوفك بس هو يشوف كاميرا قدامه بس وانتي تحسبيه يشوفك اقوم اقولها طيب فينها الكامير وادور ورا التلفزيون:d والصراحة كنت مفترية اقول لأختي انتي جبناكي من المستشفى وماما وبابا حنو عليكي وربوكي عندنا وهي تبكي وانا اضحك عليها:25: وصار لي موقف حقيقي كنا خارجين مع الأهل وانا من فرحتي سبقتهم ونزلت للشارع بس واقفة عند بابا الحوش ووقفت سيارة فيها رجال وحرمة ونزلت الحرمة وكلمتني قالت كيف حالك ورديت عليها انا طيبة اتفضلي كان عمري يمكن 9 او 10 سنوات وفجأة مسكتني بقوة من يدي وصارت تحاول تجرني للسيارة وانا ماسكة في الباب اصرخ ولما طفشت مني حاولت تجر البناجر الذهب من يدي وقطعت السلسة من رقبتي وطلع بابا يسمع صراخي وشردت بسرعة ركبت السيارة وراحوا بس اخذت السلسلة الله يسامحها ومن بعدها وانا اكره الشارع ولا حتى اروح المدرسة وكل بنت اقابلها اقولها الحرمة حتجي وتاخذك وكمان كنت دايما اتمنى اصير اميرة زي ليدي ليدي والبس فستان كبير وتاج:) واتخيل نروح البحر ونضيع في جزيرة زي فلونة واقول لماما يارب يارب نضيع في البحر عشان نروح الجزيرة اللي فيها فلونة واسوي مغامرات:23: كنت احسب الشخصيات الكارتونية حقيقية واتمنى اقابلهم واحبهم بشكل جنوني واسمي نفسي بأساميهم:28: والى الأن اتفرجها :17: أما ولدي لما كنت حامل جاني وقال يا ماما ابغى النونو ولد قلت له ان شاء الله ربي هو اللي يجيبه ولد أو بنت انت لما تروح المسجد مع بابا ادعي في الصلاة يارب ولد صار يفكر ورجع قال يعني الله هو اللي يقدر على كيفو يجيب ولد قلت ايوا هو اللي يقدر بس قال خلاص انا بعطي الله فلوس(استغفر الله) عشان يعطينا ولد:30: طبعا جلسنا انا وابوه نفهمه اننا بالدعاء ربي بيستجيب لنا والحمدلله اقتنع وراح يوم المسجد ورجعوا هو وابوه واشوفه يضحك يضحك واقول اشفيك يقول ولدك فضحنا الناس راكعة وهذا بأعلى صوت يارب اعطينا ولد يارب اعطينا ولد:d وفي موقف كمان كنا زمان في رمضان في بيت جدتي في مكة حارات تعرفو الناس معلقة فوانيس ولمبات وزينة وكانت عمة ماما الله يرحمها ويغفر لها تسويلنا البليلة والبطاطس ونعبيها في علب ونجلس عند الباب نسوي بسطة ونبيع وكنت لما احد يشتري مني العلبة بريال ويقولولي زودي الخل اقولهم 3 ريال:18: ويشتروا المساكين وانا مبسوطة هههههههه وفي لبانة يبيعها ولد خالتي معاية اسمها (شختك بختك) هي اظن تختار لبان ويطلع لك هدية ناسية صراحة وكنت ازيد في الأسعار طبعا:11: وعندنا بابا الله يخليه ويحفظه له حكايات كثييير بذكر موقفين بس عشان ما اطول عليكم:) يقول مرة اعطته جارتهم تمر وكان معاه كثير وشافه عمي الصغير وقاله اعطيني تمر قال تبغى روح اضرب راسك في الجدار ويطلعلك تمر وصار عمي يضرب راسه في الجدار وبابا يرمي تمر من وراه وعمي فرحان تمر تمر وقال ابغى كثير قاله بابا اضرب راسك بقوة ويطلعلك كثيير ومسكين يضرب يضرب وبابا يرميلو هههههه تقول جدتي لحقنا عمك ولا كان انفجر راسه وكمان مرة اتضارب هو عمي الصغير على حبحب (بطيخ) وكانت اخر حبة في الصحن وجدي الله يرحمه كان شديد وجاب وحدة كبيرة وقطعها وقالهم كلو وصاروا ياكلو ياكلو ويبكو يقولو خلاص وجدي يفتح الثانية ويقطعها ويغصبهم وهم ياكلو ويبكوا وما فكهم الا جدتي بعد محاولات ..بابا يقول بعدها حرمنا نتضارب على الأكل واخر موقف لبابا يقول كان جدي الله يرحمه هو الوحيد في الحارة اللي كان يعرف يقرأ ويكتب وكان شديد مرررة وكان مجمع اولاده في الحوش يذاكروا وعيال الحارة في الغرفة ويطل عليهم كل شوي ومرة اتأخر عليهم وصاروا اعمامي يلعبوا ورموا كتبهم ولما سمعوا صوت جدي ارتبكوا وكل واحد اخذ كتاب ورجعوا مكانهم ولما دخل عليهم جا لبابا وقاله انت تذاكر قال ايوا وبابا يطالع في الكتاب قال جدي كيف وكتابك مقلوب وهات يا ضرب بالخيزران وبعدها راح لواحد من اعمامي قال انت بأي صف قال ثاني متوسط وهات ياضرب ليش معاك كتاب اولى متوسط وطبعا في الغرفة عيال الحارة خايفين ويرتجفوا دخل جدي عليهم وواحد منهم من الإرتباك طرح الشيشة حقت جدي برجوله وشرد يقول بابا ما عاد شفناه:22: سامحوني طولت عليكم واذا اتذكرت شي برجع لكم ان شاء الله:d تحيــــــــــــــــــــاتي |
أمس كنا في الطائف وفتحت الموضوع هذا لزوجي وعيالي وأخواني وقلت لهم بعض اللي تذكرته من قصصكم علشان نشع جو من الضحك
والمصيبة ولدي عمره 10 سنوات لما قلت لهم قصة اللي تحط قدر فيه موية وملح في الشمس علشان تبغى مطر قال ولدي .ياسلااااام أنا بسوي هذه التجربة علشان أبغى مطر:23: قلت له : لالالالا هذه كلها تفكيرات غلط وجلست أفهمهم القصد من كلامي والقصص اللي قلتها لهم وبعدها سألته : أنت اش كنت تفكر فيه وانت صغير وطلع غلط قال : ونحن نروح الإستراحة دائماً أشوف الشمس تمشي معاي واقول الشمس تحبني وأعتقد ياجماعة فكرة أن الشمس أو القمر يمشي معانا مسيطرة على الكل:22: وولدي الكبير قال : كنت أظن أن الكافر لما يموت يتحول لكفر.......الظاهر تشابه الاسماء أثر عليه. ووحدة قالت لي : كنت لما أشوف البطل يموت في فيلم أجلس أبكي احسبه مات من جد ولما اشوفه في فيلم ثاني أستغرب وأقول كيف جاء بعد مامات:25: *** وبالنسبة لي تذكرت شيء بعد ماقرأت تعليقاتكم طبعاً أعتقد موضوع انجاب الأطفال كان شاغل الكل والأهل مايقصروا كل واحد يقول لهم من مكان وأنا كنت أظن أن المرأة تحمل بعد مايسلم عليها زوجها وكنت أعتقد انه لازم كل يوم يسلم عليها لأن كل مايسلم عليها يكمل خلق الطفل ومراحل حمله في بطن أمه<<<<<حشى صار بناء عمارة المهم كنت أستغرب جداااااااااااااااااااااااااا لما اسمع أن فلانة زوجها مسافر وهي حامل وأقول ياحراااااام كيف بيكمل تكوين الطفل وزوجها مو عندها ..؟؟!!!.....واتخيله بيولد ناقص رجل أو يد أو بنص جسم:15: ربي يسعدكم الموضوع شيق واقترح تطرحوه على الأهل والاصدقاء وتنبسطوا بإخراج معتقدات الطفولة البريئة والضحك سوياً وألف شكر للجميع |
اقتباس:
|
الماسة
الحمدلله ع السلامة يا اختي نورتي الموضوع أما حكاية عمك وأبوك والتمر هههههههههههههههههههههههههههههههههههههههههه هههههههههههههههههههههههههههههههههه الله يسامحه لو ما لحقوا عليه كانت الذاكرة في الباباي ربي يحفظكم سعدت بعودتك.... |
أم جمانه
الله يسعدك الله يسعدك قال تحمل بعد مايسلم عليها زوجها قال الله يعطيكي العافية.....على الاقل احسن من انو تحمل من فستان العرس وفي اليوم الثاني على طول بس ليش يعني السلام لوو الزواج والانجاب كذا راح يسكر عالم المتزوجين يا ستي وقسم العيادة النساء والولادة ههههههههههههههههههههههههههههههههه الحياة حلوة والله |
موضوع أكثر من رائع أخي عزوبي.....
كنت قبل اقرأه متضايقة مرة...بس الحمدلله ضحكتني الإعتقادات الرائعة.... ابن خالتي...لما كنا صغار كان يعتقد إن إذا طفينا التلفاز ماراح تخلص حلقة الكرتون ....فإذا احتاج الحمام (الله يكرمكم) بنص الحلقة يقول لنا: طفوا التلفزيون بروح الحمام وبرد نكمل الحلقة زين... بالنسبة لي...مرة الوالدة تشرح لي عن الجنة وشنو فيها وغيره....فقالت لي: بالجنة أي شي تبينه بس تتمنيه وتلاقيه بيدك حالا...وكنت اعتقد إن بيتنا تحديدا مطبخ الماما هو الجنة لأنه كثير حلو...رحت جلست هناك وادعي يارب أبي لعبة وأبي كذا...وما حصلت شي ورحت أبكي لماما أقول لها ماما رحت الجنة وماحصل اللي قلتي عليه....ومن يومها والعائلة كلها تسمي مطبخ الماما...الجنة...أكلنا في الجنة ورحنا الجنة... |
والله تذكرت من سنتان وقت نزلنا لبنان
كانت بنتي الصغيره عمرها سبع سنوات دخلنا محل الحلويات ومحل مشهور في طرابلس وطلبنا ولفت نظر البنت ان الصحن مش مزين فسالتنا :اين البهارات الخضره (قصدها الفستق المطحون ) واين الزيت ( قصدها القطر ) ومن وقتها ونحن نقول عن القطر زيت ابيض وبهارات خضره |
هههههههههه...رااائع جداا هالموضوع وبشارككم انا كمان.........
اذكر لما كان عمرري (5) سنوات في الحج انه قلت لامي يا ماما ليه الحجاج يحطون كمامات مي عاجبتهم ريحتنا ريحتنا احسن منهم...:15: ولما اتذكر شي ثاني رح اقولكم... تقبلوا مرووووري...... |
انا يوم كنت صغيرة لسااني طوييييييييييييل وكنت اضرب الياهال برع وينادون امهم لأمي وامي تصطرني :(
كل ماصار شي صطرتني خدي راااح هههههههههههههههههههههههههههه من التصفيق بس الحيين ان شاء الله ماعود اطفالي على الخوف او من الرهبة واخليهم احسن نااااااس يحسون ويبنون مستقبلهم واكون واعية في طلبياتهم مو بالقسوة واعطيهم الحناااااااااااااااان كله عشان مايحتاجون لغيري ويلجأون لي مشكورة على الموضوع الروووووووووووووووووووووعه |
أنا من تسأولاتي و التى والحمد لله وجدت لها حلا وكان هذا السؤال يؤرقني
وهو ويش الملح اللي يكفي البحر واتخيل انوا في ناس تركب القارب ويضعوا الملح في البحر بس المهم وين الملح اللي يكفي؟!! |
| الساعة الآن 08:50 AM. |
Powered by vBulletin® Version 3.8.12 by vBS
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©