.

اخت "نقاء"، اذا سمحتي لي .. وتقبلتي مني ..
ابغى ابدء مشاركتي اليوم، بنقل ومشاركتك ..
الانطباع اللي تكون لدي عنك من كتاباتك

ما هو لغرض معين، اكثر من ..
معرفة هالصورة .. حيساعد في استيعاب وهضم ..
الجوانب اللحقة اللي حاكلمك عنها



فـ ..
ما شاء الله .. تبارك الله .. والحمد لله، ..
واضح ان منَّ الله عليك بجوانب من النضوج،
بلا شك، انتي سابقة فيها عمرك
سواء في ..
الحكمة .. وحسن التصرف،
التفاؤول .. والنظرة الايجابية للحياة،
العقلانية .. وتوازنها مع العاطفة،
ضبط النفس .. من مجاراة التوتر والاهواء
وما انسى طبعا، .. قمة الذوق اللي فيك
الف ما شاء الله .. تبارك الله
الله يزيد ويبارك لك .. ويوفقك ويرضيك

هذا وان دل يا "نقاء"، فلاشك ..
انه مؤشر لصحة وقوة ايمانك بالله سبحانه وتعالى



شوفي، انا حاولت في مشاركاتي السابقة ..
ان ابين لك طبيعة وواقع الامور
عشان بتفهمك لها حيسهل عليك تقبلها والتعامل معها ومعايشتها



اللي احب اتناوله اليوم .. امرين
الاولى، اني اقولك كلمتين في موضوع الثقة بالنفس
والثاني، عن تساؤولك .. كيف تتجنبي تاثير طبيعة زوجك عليك




اما عن الثقة بالنفس ..
فبراي، ..
الله انعم عليك بدرجة من الايمان .. كفيلة بتعزيز ثقتك بنفسك
.. ، ولسه اقول .. الله يزيد ويبارك

لاحظي، انا ربطت بين الايمان .. والثقة بالنفس
لان بقدر ثقتك بالله .. بقدر ما تكون ثقتك بنفسك

فانتي بصدق ايمانك وتوكلك على الله،
تعملي الصح اللي عليك .. وتفوضي الامور لله سبحانه وتعالى
بعد كدا، تريحي بالك وضميرك .. وتتركي النتائج لتقدير العزيز القدير

المصريين عندهم عبارة .. تتكرر في الافلام ..
وقت يخرج الطبيب من غرفة العمليات، ويقول لاهل المريض ..
"احنا عملنا اللي علينا .. والبائي على ربنا" :)
- وان كان حقيقة، ..
حتى ما عمله هو .. انما بالهام وهداية وتوفيق الله، لكن نقدر نقول .. مجازا
فعنه عليه الصلاة والسلام، فيما معناه ..
(ما رميت اذ رميت، ولكن الله رمى) -



الجزئية اللي المس .. انها مؤثرة على كامل ثقتك بنفسك هي ..
جزئية، برضو، انا لما كنت في سنك، كانت تقيدني
لكن لما كبرت ..
اكتشفت حقيقة، اني كنت مخطئ في اعطاءها اكثر واكبر من حجمها

ايش هي هالجزئية؟


احس عندي معلومة بمليون ريال :)


عندك مليون ريال؟ :)

ممكن اراعيك، .. هالايام السوق واقف :)


الجزئية هي ..
انه لقلة تجربتي في الحياة .. وصغر سني حينها - زيك الان، ..
كنت اعتقد اني ما املك المعرفة والعلم الكافيين لاكون متيقن مئة بالمئة من نفسي
كنت اقول في نفسي .. ان اللي اكبر مني اكيد هم افهم وادرى
وانتظرهم يتصرفوا ويتخذوا القرار، .. على ما المس فيهم من تردد وريبة

لما كبرت، اكتشفت ان ما احد عارف شئ :)
وكل واحد يرمي عالتاني، .. ويتهرب من تحمل المسؤولية واتخاذ القرار

القرار الصحيح يا "نقاء"،
اللي تاخذيه وانتي واثقة من نفسك بغض النظر عن عمرك - طالما وصلتي سن التمييز، ..
هو القرار اللي تكوني فيه صادقة مع الله ومخلصة نيتك له وحده
، .. خذية دون اي تردد .. وانتي بكامل ثقة بالله .. وبنفسك

اضمن لك هالكلام لان، ..
وقت تاخذي هالقرار، سيكون بالفطرة السليمة اللي تميز بين الصح والخطاء ..
واللي جبل، وخلق الله سبحانه وتعالى عليها، واوجدها في، كل البشر

لكن زي ما قلتلك، لازم تكون نيتك وجه الله .. واحقاق الحق


اللي يخليني اطيل عليك بـ هالكلام،
لان المس من سبب معاناتك فيما تمر فيه، هو ..
نوع من عدم الاطمئنان .. في تعاملك مع ما انتي فيه . واتخاذ قراراتك
، وهذا مخليك متشوشة ومو مرتاحة


خذيها مني، ما شاء الله .. تبارك الله، ..
انتي ماشية صح باذن الله
فـ اطمئني، وزيادة .. طولي بالك
ان شاء الله، حترتاحي .. وتتغير الامور




اظن طولت عليك، .. وكفاية كدا

خاصة، .. انا نفسي مشغول هاليومين ..
وعندي، والحمد لله، نصيبي .. وحظي من مشاكل الحياة :)







المس كانك غايبة الايام الماضية! .. عسى المانع خير

خليني اشوفك رجعتي، ..
وارجع اكملك، ان شاء الله، عن النقطة الثانية ..
بخصوص كيف ما تتركي الامور تؤثر عليك سلبيا



حتى حين، ..
تقبلي المزيد من ..
التحايا العطرة



.