|
رد : (مميز) زوجة معدد؟ ...... تفضلي
محد بيتعب غيرش يا مهره زوجش باله طويل وبارد
بيرد شغله وانتي ما نلتي لا حق ولا باطل والموضوع بيصير بارد وماسخ من غير اي نتيجه حلي الموضوع وفورا ما دام الظرف والوقت مهيأ لش لا تضيعين الفرصه وتنطرين على حساب اعصابش وانتظارش |
رد : (مميز) زوجة معدد؟ ...... تفضلي
اليوم في الليل اجلسي معاه جلسة صراحه
واحكيلو 1 2 3 اضربي الحديد وهو حامي الفرصة اجت لحد عندك استغليها |
رد : (مميز) زوجة معدد؟ ...... تفضلي
مهرة ,,, ,,, صباح الخير حبيبتي
صار لازم توضحي لزوجك سبب زعلك وطلبك للطلاق هو فاهم انك طالبه الطلاق عشان الزيارة بحد ذاتها مو لانه كسر لكمته واخلف بوعده معاك هو ناسي هالامر ,,,, ذكريه وضحي كلامكم وموقفك السكوت بخسرك كل شي سكزتك بيطلعك قليله عقل لا تتكمي معاه ,, اكتبي كتبتي اول مرة اكتبي الان لكن المهم حطي النقط على الحروف, لان الوضع الان حقا مو بصالحك زوجك قلب الطاولة عليك قلبي معاك وربي يكون بعونك ويجبر بخاطرك |
رد : (مميز) زوجة معدد؟ ...... تفضلي
أنتي دائما يامهرة كنتي تقولين ان زوجك مايناقش ولايتحاور بس يستمع وهو ساكت
لكن اللي اشوفه حاليا من حواركم أنتي اللي ماتناقشينه وماتتحاورين أنتي اللي تسكتين وتنهين الموضوع في بدايته حتى لو قلتي هو يقلب الطاولة هم كذا الرجال أنا زوجي حتى بالمواضيع البسيطه يقلب الطاولة واعتقد اغلب الرجال كذا فما بالك بموضوع خطير مثل موضوعك معقولة ماتبينه يقلب الطاولة ان قلبها رجعيه لموضوعك الأساسي وقوليله خلينا نتناقش في هالموضوع أول واصري عليه مهما حاول يغيره وحتى لو هو قفل الموضوع بعدها وقام اعرفي انه رايح يفكر فيه فانتي خلك على موقفك لين يرجع ويتناقش معك في موضوعكم الرئيسي |
رد : (مميز) زوجة معدد؟ ...... تفضلي
مهره ما سمعت كلامنا من قبل
والحين بعد ما تبي تسمع عنيييييييييده وراسها يابس واجهي تكلمي اقنعي اشرحي هههههههههههه احس اني في الروضه ""gg |
رد : (مميز) زوجة معدد؟ ...... تفضلي
ألسلام عليكم اختي مهرة السكوت ليس بصالحك لازم تتكلمي وتوضحي كل شيئ لكي لا يركبك الغلط او تندمي بعدين حطي النقط عالحروف.الله ييسر امرك و يكتبلك كل خير
|
رد : (مميز) زوجة معدد؟ ...... تفضلي
الله يفرج همك ويكتب لك الخير ويرضيك ..
حبيبتي مهره انتبهي السكوت مو في صالحك .. اذا ما تكلمتي ما بتهدأين .. و هو ما بيفهم اذا ما قلتيله .. وخاصة انج ولا مرة بينتي له انج زعلانه .. حتى الصورة تشيلينها يوم زعلانه لكن يوم يسألج تألفين له عذر.. ليش انزين؟ يختي خليه يعرف عسب يصلح الوضع بعد .. مو تطمنينه وهو ينسى وانتي شايلة الهم في قلبج .. |
رد : (مميز) زوجة معدد؟ ...... تفضلي
وأنا مع الجميع
صار الوقت تطلعين كل اللي بخاطرك ما بقى شي ما سكتتي عليه بنظره سبب الطلاق مو معقول يطلع منك خليه يعرف الأمور الثانية لا تضغطي ع نفسك وصحتك يا الغالية |
رد : (مميز) زوجة معدد؟ ...... تفضلي
مع الاخوات حان الان وقت الكلام ماتدرين يمكن حتى هو شايف اشياء انتي ماتدرين عنها
|
رد : (مميز) زوجة معدد؟ ...... تفضلي
هاللحين زوجك معتبر نفسه مجروح كونك طلبتي الطلاق منه ومنقهر كيف هانت العشره معه ..
بتقولين انا مجروحه اكثر منه ..للاسف هذا تفكير هالرجال يعتبرون ان التعدد موب ذاك الجرح الكبير على المراه كثر الطلاق يعني لو الزوجه تطلب الطلاق من زوجها معناته جرحته وهو اذا تزوج عليها فهي مو ذاك الالم تلقينهم يقولون مصيرها تنسى |
رد : (مميز) زوجة معدد؟ ...... تفضلي
انا اتفق مع الجميع
صار الوقت اللي لازم تتكلمين |
رد : (مميز) زوجة معدد؟ ...... تفضلي
المشكلة زوجك يا مهرة مو عارف شنو بب طلبك للطلاق
الحين يعتبرك انتي المخطأة بحقه تكلميي الله يرض عليك تكلمي انا ضد طلبك للطلاق وفكرة الطلاق لكن اعارض وبشدة انك تبقي صامته اخرجي كل الي بصدرك لاااااااااا تسكتي خليه يعرف كم عانيتي وكم صبرتي لا تجي على اخر المشوار وتضيعي كل تعبكو صبرك بشي هو وكل اهله بيشوفنه من حقه |
رد : (مميز) زوجة معدد؟ ...... تفضلي
مهره الحين اكيد جالسة معاه وبتشرب الشاي وبتحط النقط على الحروف ههه
|
رد : (مميز) زوجة معدد؟ ...... تفضلي
مهره يالسه تنظف المطبخ😑
واحنا اعصابنا تالفه |
رد : (مميز) زوجة معدد؟ ...... تفضلي
يارب تكون بخير
|
رد : (مميز) زوجة معدد؟ ...... تفضلي
كنت يالسة اكتب لكم اللي صار بس ماما يتني تتكلم معاي.
عقب زوجي رجع من صلاة الجمعة. صار بينا كلام وايد قبل الصلاة وعقبها .. بس الحين رايحة مع امي زيارة لاهل عروس ولدها .. ما كنت ناوية اروح واتصلت بها الصبح عشان اعتدر منها .. بس لما يتني صممت اني اسير وياها وما حبيت اكسر خاطرها مرة ثانية ولا ازعلها مثل ما زعلتها في ليلة حق الله. بس مبدئياً زوجي رافض تماماً موضوع الطلاق .. وامي بعد شايفة ان الطلاق مب حل! اتتظروني باجر ان شاء الله لاني بارجع من الزيارة متأخر. |
رد : (مميز) زوجة معدد؟ ...... تفضلي
مهره زوجك يحبك مهمالف ودار انتي الي ملكتي قلبه والله يكتب الي فيه الخيرلكم
|
رد : (مميز) زوجة معدد؟ ...... تفضلي
شو ورانا :) هذا احنا جالسين ومتمسمرين ومنتظرينك dfh
|
رد : (مميز) زوجة معدد؟ ...... تفضلي
الله يصلح لك الأحوال يا مهرة و ينصرك في ساعة العصر الفضيله هذي |
رد : (مميز) زوجة معدد؟ ...... تفضلي
الله يعينك مهرة و يوريك اللي يريح بالك انت و كل الاخوات
|
رد : (مميز) زوجة معدد؟ ...... تفضلي
الله يغير احوالك ويبدلها بسعادة وفرح وسرور ورضا
بس اهم خطوة لازم تقولي لزوجك بدك تعرف ليش طلبت الطلاق لانو ما عاد في ثقة لانك وعدتني واخلفت بالوعد وانا صرت اشك بشو عم تفكر الان او شو عم تخطط للمستقبل وانت بتعرف زيارتها شو بتأثر فيني وانت ضربت مشاعري بعرض الحائط واللي بحب ما بيأذي حبيبو ولا بيحاول يجرحو ولاني ما بعرف شو تخطيطاتك المستقبلية ولانو لي طاقة حبيت اضع حد لكل شي لانو انا هلئ بعز شبابي بحاول شوف حياتي من اول جديد بدل حرق الاعصاب واشكريه على عدم تقصيره بس وضحيله انو المال ما بجيب السعادة ولا بيصنع راحة البال والاستقرار اذا كان الشق العاطفي في خلل خليه يعرف بكل حزنك وبكل المك اللي هو سببو لانو الرجل بشوف اذا ما مقصر بحق بيتو ماديا بيعتبر زوجتو عايشة اميرة وما بفكر اذا علاقاتو وزواجاتو رح تحطم احاسيسها ونفسيتها فالكرة بملعبك بما انو متمسك فيكي خليه يحسب حساب لرضا مهرة وعدم تكرار اللي صار سابقا سواء بالرسائل او احمر الشفاه او الزيارة وغيرها لازم يعرف انو هو مسؤول عن افعاله واخطاؤه ولازم يتحمل جزء من الالم اللي سببو لك اسال الله ان تكون الايام القادمة ايام رائعة ويزداد حبك في قلب زوجك ولا يرى سواك احترامي |
رد : (مميز) زوجة معدد؟ ...... تفضلي
انصحك بأخذ أجازة لمدة شهر بعيداً عن البيت وعنه
وأتركي الأولاد معه وأختلي بنفسك وفكري بحياتك جيداً ستتوصلين حينها للحل الأمثل وستعرفين ماذا تريدين مهرة لاتتسرعي بالطلاق امنحي نفسك فرصة للخلو بها |
رد : (مميز) زوجة معدد؟ ...... تفضلي
ربي يفرج همك ويرشدك للصواب
لكي لا تلومي نفسك او يلومك اطفالك غداً نفّسي .. تحدثي .. فضفضي .. امسكي ورقه واكتبي فيها من يوم زواجك الى يومك كل موقف جرحك .. ضايقك .. عزلتك عن العالم بسببه ولدت لديك ضغطاً مهره اليوم على وشك الانفجار وترغب بالهروب بعيداً !! لا الومك ،، لايكلف الله نفساً الا وسعها ولكن الهروب بصمت خطأ !! واكبر خطأ !! كي لا تلومي نفسك على ضياع اطفالك او يلوموك هم وضحي نفسك لا تدري لعل الله يحدث بعد ذلك أمراً يارب ارشدها للصواب حيثما كان |
رد : (مميز) زوجة معدد؟ ...... تفضلي
ربي يهدي سرك ويجبر بخاطرك ويكتب لك كل خير
|
رد : (مميز) زوجة معدد؟ ...... تفضلي
يسعد صباح الورد يا ريحة الورد..
ويسعد نهار اللي تعنى وشاله. .يسعد صباح العين والرمش والخد ...ويسعد صباحك كاش ما هو حواله. ..يفدونك العدوان جد ورا جد ... وتبقى لنا زهي في كماله..! |
رد : (مميز) زوجة معدد؟ ...... تفضلي
صباح الخير.
نرجع ليوم أمس الجمعة. كنت ناوية أسمع الكلام .. وفعلاً كنت ناوية أكتب له كل شي. اللي صار إنه بعد ما تركني في المطبخ الصبح طلع مع ولدي يشترون خبز وسندويشات للريوق .. وعقب رجعوا. أنا بديت اشتغل في البيت .. ولما بنتي الصغيرة صحت وديتها المطبخ وسويت لها حليب وتركتها معاه .. ورجعت أكمل شغلي. المفروض كان عندنا أمس زيارة لبيت عروس أخو زوجي .. والصداع ماسكني من يومين مب طايع يخف مع اني خذت بندول أكثر من مرة .. فاتصلت بامي عشان اعتذر لها إني ما باسير .. لأنها كانت تباني اسير معاهم. قالت لي: والله يمه شو أقول لج .. هالصداع انا عارفة من شو .. بس يا امي ديري بالج على صحتج ونفسج. المهم زوجي دخل عليّ وأنا اكلمها .. وسكرت معاها وأنا عيوني مدمعة وفيني غصة بكا .. بعد ما سكرت سألني: تكلمين امي؟ .. قلت: هيه .. قال: ليش؟! .. قلت: عشان الزيارة مالت اليوم .. قال: روحي انا باتم مع شما .. قلت: فيني صداع وما اقدر اروح .. قال: روحي غيري جو .. قلت: الصداع تاعبني مب قادرة. جلس وجلّسني يمه .. وفي الواقع كان يبا يجلسني على ريله بس انا ما رضيت. قال: يا ام عيالي ليش هذا كله؟ قلت: شوف يا ولد الناس .. أنت تبا حياتك تكون بشكل معين .. من حقك وعلى كيفك وانت حر .. بس انا خلاص تعبت وما اقدر أتحمل. قال: الله يهديج عقب سنة ونص؟ قلت: هيه عقب سنة ونص .. حاولت وحاولت وحاولت وما قدرت. قال: وانتي بتكونين مرتاحة من الطلاق؟! قلت: ان شاء الله باكون مرتاحة. قال: خلاص عيل مثل ما قلتي .. خلي اليهال وروحي. اول ما قال جذي طلعت شياطيني وعفاريتي كلها .. لأنه دايما يستخدم أسلوب حرق الأعصاب مع أنه ما يكون جاد .. وأنا أكره هالأسلوب فيه .... ضربته ضربته من خاااااااطري .. وعضيته! .. وأظن المكان التهب! مسكني وقال لي: يالمينونة انتي صدقتي؟؟ .. مشكلتك بعدج ما عرفتي قدرج عندي. قلت: فعلاً انا مب عارفة قدري عندك .. واشوف اني مالي قدر أصلاً. قال: يمكن عيبي اني ما عرفت ابين لج قدرج عندي عدل. قلت: انت مب تقول انك تحبني .. خلاص طلقني .. ما تبا تطلقني؟ أوكي أنا أصلاً عارفة إن الطلاق مب هين على اليهال وأنا أكيد مب حابة أبهذل عيالي .. خلاص روح عيش في البيت اللي انت تبنيه .. او روح عيش في الغرفة اللي عند ماما وخلني مع عيالي في حالنا. قال: اهون عليج؟؟ قلت: انت عندك بدايل .. ما راح يقصر عليك شي. قال: من قال ما راح يقصر علي شي .. انا اباج انتي .. أبا حياتي تنتهي معاج .. انا بديت معاج وراح انهي معاج. ما ادري لحظتها شو اللي ياب طاري السيارة على بالي.. قلت له: إذا تبا سيارتك قول لي قبلها بوقت عشان أدبر لي سيارة. ابتسم وقال: وانا من متى اعطيج شي وارجع فيه يا ميرة؟ قلت: حقك يا بابا. قال: انتي تبين تاخذين نفسج كلها من حياتي .. وتبيني أفكر عاد في سيارة والا غيرها؟! قلت: أمورك طيبة إن شاء الله .. عندك بدايل يكفونك وما راح يقصر عليك شي. قال: انا مب فاهم انتي ليش تجمعين؟ .. من قال لج عندي بدايل؟ قلت: عندك بدايل وايد .. وانا شفت بعيني. قال: والله العظيم ما عندي بدايل. <----- هو بالعادة ما يحب يحلف بس انا عارفة انه يكذب. في الحقيقة كنت ناوية أتكلم فعلاً وأقول كل اللي شفته .. وبديت من المسج اللي شفته من سنتين من اللي تطلب منه الطلاق .. لكنه بدا يراوغ ويلصق الموضوع في سالفة قديمة المفروض انها انتهت تماماً قبل هالموقف بسنوات طويلة .. فضعفت عزيمتي في المصارحة وقلت لنفسي: فعلاً ما في فايدة من الكلام. قلت: خلاص الكلام ما منه فايدة عيل. قال: يا ميرة انا صار عمري 43 سنة وما عندي الا ولد واحد!! قلت: خلاص روح تزوج ثنتين وثلاث واربع .. سوي اللي تباه انا ما حاسبتك ولا عاتبتك .. بس انا خلاص ما فيني صبر .. عاد بتقول انا غلطانة .. بتقول شرع الله .. بتقول ما سويت شي حرام .. بكيييييييييفك .. بس انا خلاص تعبت .. انا العمرة اللي طافت رحتها مخصوص عشان ادعي لنفسي الله يفكني من هالهم .. والله اني ما دعيت لعيالي كثر ما دعيت لنفسي .. فاهم يعني شو ما دعيت لعيالي؟! .. انا اموت كل يوم .. اموت كل يوم. تقول انك ما تبا تييبها البيت؟ .. وانت كنت بتييبها من ثلاث شهور يوم كانت حامل وغيرت رايك لما تعبت .. لا تفكر ان ماما ما قالت لي. قال: أصلا هي ما تبا تيي .. تدرين ليش؟ عشانج انتي. عصبت بزيادة .. قلت: لا تكلمني عنها ولا تقول شي .. البيت اللي انت تبنيه الحين ليش؟؟ مب عشان تسكن فيه معاها .. انا ما عندي استعداد اتحمل انك تقعد هني شوي وهناك شوي .. انت ما تعرف انا شو احس يوم انت تطلع من الباب لين ترجع. أنت مخليني بروحي بالأسابيع .. عمرك ما فكرت أنا بشو أحس .. عمرك ما سألت نفسك أنا شو ناقصني. قال: أنا مب مقصر عليكم في شي! قلت: لا تتكلم عن الفلوس .. أنا ناقصني أنت. حضني بشدة وقال: كل هذا في قلبج يا ام عيالي؟؟ قلت: انا وايد في قلبي .. وساكتة .. مرة أقول لازم تكونين عاقلة .. ومرة أقول عشان عيالج .. بس انا اتعذّب. حضني مرة ثانية وقال: باسم الله عليج .. طيب انتي شو اللي يريّح؟! قلت له: لا تفكر اني اباك تطلقها .. انا ما ارضى على نفسي اطلب هالطلب. قال: عيل طلبتيه لنفسج! قلت: عاد انا بكيفي في نفسي .. طلبت شي يخصني وانا حرة في عمري. قال: ما ادري كيف هان عليج تطلبين الطلاق أصلا؟ .. انا ممكن اتخيل أي شي .. نتهاوش نتضارب نزعل .. تخيلت انج ممكن تسوين أي شي لكن ما تخيلت تطلبين الطلاق! قلت: لأني تعبت .. انت كنت مفكر اني بازعل شوي وبعدين الوضع بيكون عادي .. وحتى انا فكرت نفس الشي .. لكن ما صار .. عاد قول غيرة .. قول شيطان ووسواس .. المهم اني ابدا مب مرتاحة. تم يكلم نفسه بصوت واطي: عاد هذا اللي ما حسبت حسابه! قلت: انت ما تدري شو يصير فيني .. الكم ساعة اللي تطلعهم في الليل احس روحي بتطلع. قال: انتي الحين مفكرة اني كل ما طلعت اروح هناك؟ .. ليش ما عندي حياة؟ .. ما عندي ربع؟ .. بعدين أنا طول اليوم عندج يت على الساعتين اللي في الليل؟ قلت: معاي ومب معاي .. معظم الوقت اما ماسك الاي باد .. والا ماسك الموبايل وهالواتس اب ما ينهد .. في البيت ماسكه .. في السيارة ماسكه .. في المول ماسكه .. عند ماما ماسكه .. حتى في الحمام ماسكه!! قال: طيب حتى انتي تمسكين موبايلج ولاب توبج وما أقول لج شي. قلت: بطّل هالأسلوب .. انت عارف عدل اني ما كنت جذي .. وما صرت اسوي جذي الا رد فعل على انت تسويه لاني تعبت وانا أقول لك وانت ولا انت هني!! .. حتى لما أيي اكلمك أو اسولف معاك احسك مب متحمس ولا انت معاي. قال: متى؟ متى ييتي سولفتي وما رديت عليج؟! قلت: أصلا من اللي المفروض يسولف؟؟ .. أنا والا انت اللي تطلع وتروح وتيي وتصير في يومك مواقف وأحداث .. انا طول الوقت يالسة في البيت ما عندي غير عيالك .. حتى صرت أتضايق من نفسي لما اسولف لك عنهم واحس عمري عيوز مملة ما عندي سالفة!!! مسح على راسي وقال: الله يهديج بس! قلت: ولو ييت كلمتك في شي أو سألتك عن شي تستنفر كأن ارتكبت جريمة! قال: أنا اسوي جذي؟ قلت: هيه .. إذا سالتك سؤال ترد بسؤال: ليش تسألين؟ قال: عادي السؤال ما فيه شي! قلت: لا .. سؤالك يكون من باب الاستنكار .. ما ادري ليش تشوف أسئلتي كأنها من باب التحقيق أو الفضول .. طول العشر سنوات وأنا أفهّمك إني أسأل من باب فتح السوالف .. أسأل مع انك المفروض تيي تسولف معاي من نفسك مثل أي زوج وزوجة! قال: صح يمكن معاج حق. رجعت كلمته عن الحريم .. وهو مصمم انه ما في حريم .. قلت له: انا شفت بعيوني. مسك تلفونه يبا يراويني .. قلت له: ما في داعي .. عاد عقب ما حطيت باس وورد؟! .. قال: باشيله عشان خاطرج .. قلت: بتراويني عقب ما مسحت كل شي؟!! حلف انه ما في شي ..... وكل مرة كنا نتكلم في هالنقطة أبا أقول له: انت كذاب .. بس شي يردني وما اقدر اقولها!! كلمته عن موقع الزواج اللي كان يدخله .. واستهبل ولف ودار وقال يمكن حد مطرشه لي!! .. وبعد ما قدرت أقول له: كذاب. كلمته عن الآثار اللي شفتها على ثيابه .. واستهبل كأنه انصدم. قلت له عن المرة اللي رجع فيها وكندورته متكسرة بطريقة غير طبيعية .. واول ما طرا على بالي انه كان مع وحدة! قلت له عن المرة اللي رجع فيها وريحته كلها دخون .. واول ما طرا على بالي انه عرّس. قال: ليش ما قلتي لي هذا كله؟ ليش كتمتي في نفسج كل هذا طول هالوقت؟! قلت له: ما أقول! .. ما اقدر أقول! .. احس اني اهين نفسي!! قال: ما عاش من يهينج الله يهديج .. بس المفروض لما تشوفين شي تيين على طول وتكلميني .. عشانج انتي قبل أي شي ثاني .. عشان ما تكتمين في نفسج وتتعبين هالكثر!! قلت: ولما ايي اكلمك شو بيصير؟! .. انا اعرف اسلوبك! قال: انتي مب تقولين الزوجين المفروض يتكلمون ويقولون كل شي؟ .. عاد انتي تقولين شي وتسوين شي ثاني؟!! ولما تكلمنا في موضوع الثياب قال اني من زمان ما دخّنت ثيابه .. قلت: انا متعمدة ما أدّخن ثيابك .. أقول لنفسي: بعد باعدله واعطره لهن؟!! قال: خلاص لا تدخنينهم اذا هذا بيريحج. وخلال هالحوار اعتذر مني بشكل صريح وقال لي: حقج علي. |
رد : (مميز) زوجة معدد؟ ...... تفضلي
أمس الظهر امي يتني البيت.
قلت لها: يمه ما رضى يطلقني. قالت: أكيد ما راح يطلق .. انتي ما تعرفين انتي شو عنده؟ ما قدرت أمسك نفسي .. وما حسيت إلا اني حاطة راسي على ريلها وأصيح. قالت: يا بنتي حرام عليج اللي تسوينه في نفسج .. صحتج بتهلك وعيالج يبونج .. بس انا أقول لا تتسرعين وفكري عدل .. انتي بنت مثقفة وعاقلة وفاهمة فلا تخلين الشيطان يوسوس لج وايد .... يمه خلاص لو ما تبينه خليه يروح عند حريمه يسوي اللي يباه .. وانتي عيشي مع عيالج وطلعيه من بالج .. ولو تبيني أتدخل وأقول له هالكلام والزمه فيه ما يردج الا لسانج .. واللي تبينه بيصير .. وانتي عيشي حياتج وما عليج منه .. حتى لو تبين تشتغلين او تكملين ماجستير كملي. قلت لها: ما رضا! قالت: يا بنتي انتي لو تاخذينه بالهدوء كل شي بيصير. قلت: يمه انا طول عمري ماخذته بالهدوء .. عمري ما عصبت ولا تهاوشت ولا جبرته على شي ولا عاندته في شي. قالت: ما عليه طولي بالج .. على قد ما انتي الحين زعلانة ومتضايقة ما تعرفين الله شو كاتب لج باجر .. سبحان الله يغير من حال إلى حال .. شوفي فلانة على كثر اللي صار لها في حياتها ومن زوجها لكنها الحين سلمت امرها لله وقالت خلاص محد يستاهل .. وكاهي عايشة حياتها لنفسها وعيالها وبس .. الحمدلله على الأقل ريلج ما سوا ربع اللي سواه ريلها. (فلانة اللي تتكلم عنها زوجها تزوج عليها مرتين وبهذلها معاه .. وطاحت مريضة ودخلت في غيبوبة طويلة وبغت تموت لولا رحمة رب العالمين .. وكانوا شاكين ان زوجة زوجها سوت لها سحر) عقب قالت: قومي الحين تسبحي وتجهزي وتعالي معانا للزيارة .. غيري جو وشوفي الناس وسولفي معاه .. انتي حابسة نفسج بين اربع حيطان أكيد الشيطان بيلعب عليج والتفكير بيهلكج. |
رد : (مميز) زوجة معدد؟ ...... تفضلي
وانتي ياقلبي ارتحتي بعد هالحوارياليتك طلعتي كل الي بخاطرك
الله يسعدك ويسخر لك |
رد : (مميز) زوجة معدد؟ ...... تفضلي
ياني أمس يقول لي انه هالأسبوع بياخذ اليهال لفندق عشان يتسبحون في حمام السباحة.
قلت: اوكي باجهزهم لك. قال: وانتي معانا. قلت: ما له داعي. قال: ما بنسير الا وانتي معانا. . . . عقبها بشوي رجع سألني: شو عن السفر؟ <----- طريقته في السؤال أكدت لي أنه كان يتكلم في الموضوع مع أخته. قلت: ما باسافر .. شما بتم وياي .. وانت خذ سلطان ومهرة. قال: كيف؟ السفرة هذه أصلا عشانج .. ومعظم الأماكن انا مختارها لاني اعرف انج تحبين هالأماكن والأجواء .. واذا انتي ما رحتي محد بيروح. قلت: ماله داعي هالكلام .. حرام مهرة وايد متحمسة للسفر .. ماله داعي تخرب على اليهال وعلى أهلك. قال: محد بيسافر اذا انتي ما ييتي! قلت: راح يكون دمي ثقيل وبانكد عليكم. قال: مب مشكلة .. طول عمرج متحملتني .. ومستعد اتحملج لين اخر لحظة. قلت: خلاص أجل الكلام لين عقب. قال: ما في لين عقب .. الحين تقولين لي انج بتروحين. قلت: يصير خير. قال: يعني بتروحين؟ قلت: ان شاء الله! |
رد : (مميز) زوجة معدد؟ ...... تفضلي
آخر شي تكلمنا فيه هو وضعي معاه .. هذا الحوار اليوم الصبح.
قلت: انت قلت لي ان ما في شي في حياتي بيتغير. قال: وشو اللي تغير في حياتج؟ قلت: حياتي هي انت وعيالي وماما .. واي شي يمس هالأمور يأثر على حياتي .. فإذا انت تبا تروح تبات هناك فروح على طول ولا ترجع لي .. وماما ما يخصكم فيها. قال: طيب الأولى مفهومة .. لكن الثانية كيف؟ ا قلت: هذه امي .. عارف يعني شو امي .. بعدين انتو بديتو سالفتكم بدونها .. ليش تبون تدخلونها الحين بينكم؟!! قال: عجبني انج تقولين انها امج .. بس تراها مب امج بروحج .. تعوذي من الشيطان الظلم مب زين ترا .. هذا بيت الكل ما يصير تقولين محد يدخله .. وما يصير تقولين اذا فلان دخل انا ما بادخل. قلت: مب مهم غلط والا صح .. المهم اني ما أبا اشوفها .. واذا انت ناوي تييبها مرة ثانية فأكيد انا ما باروح. قال: الله يهديج لا تظلمين نفسج قبل ما تظلمين غيرج .. محد بيجبرج تشوفينها وانا عشان جذي قلت لج هذاك اليوم لأني ادري انج كنتي سايرة هناك وما بتحبين الوضع. قلت: ما يخصني. قال: استهدي بالله. المهم ما وصلنا لحل في النقطة الثانية. |
رد : (مميز) زوجة معدد؟ ...... تفضلي
الحمد لله على السلامه
يعني نحكي صافي يا لبن ههه |
رد : (مميز) زوجة معدد؟ ...... تفضلي
شايفة الأمور ماشيه بإتجاه المراضاه يا مهره .
وما أقول لج لأ .. مو غلط تغيري رأيك عن الطلاق لكن مو ببلاش أعرف أنك بتقولي أنا مصممة على الطلاق ... لكن خلي افتراض أنك تغيري رأيك افتراض محتمل ولو 5 بالمية وتجهزي لهذي ال 5 بالميه مو تهدأ الأمور بالتدريج وتنتهي الزوبعة بدون ما تتفقوا على شي حطي تصور لحياتك معاه ... كيف ملامحها ؟ عشان تقولي له عن هذا التصور لما تشوفي نفسك بديتي تنزلقي للتهدئة . الله يفرج همك ويصلح الحال |
رد : (مميز) زوجة معدد؟ ...... تفضلي
ماعليه ام سلطان هو صادق هو مايعلم الغيب كيف بيعرف اللي بقلبك واناي ماتتكلمين؟
من اليوم ورايح لازم تعبرينعن مشاعرك ودامه اعتذر بلغيه مطالبك وانسي موضوع الطلاق. |
رد : (مميز) زوجة معدد؟ ...... تفضلي
اقتباس:
التصور اللي عندي قلته في آخر حوار بينا اليوم الصبح. ما في تقسيم وقت .. وإذا يبا يبات هناك يبات على طول وما ييني أبداً .... وظاهرياً وافقني الرأي! .. والحقيقة أنني تكلمت في هذه النقطة مرتين .. المرة الأولى أمس. بخصوص مجيئها .. ما طاع يعطيني رأي قاطع .. لكن أخته كلمتني اليوم الظهر .. وواضح جداً من كلامها إنه زيارتها كانت بهدف التمهيد لسكنها عندهم .. وهذا أمر نفاه زوجي أمس الصبح لما جاني المطبخ وعمل نفسه مصدوم من رسالتي! .. ونفته هي أيضاً وقالت إنها خلاص ما راح تسكن عندهم .. لكنها للأمانة ما كانت مأيدتني بخصوص تقسيم الوقت وقالت لي: لا تظلمين نفسج وعيالج .. استهدي بالله وعيشي حياتج وخذي حقج من عينه واستانسي .. وخليه يعدل بينكم مثل ما هو مذكور في شرع الله وانتي بترتاحين إن شاء الله. |
رد : (مميز) زوجة معدد؟ ...... تفضلي
الله يسهل أمورك يا مهرة
اضربي الحديد مادام حامي واطلبي كل اللي تبين والعاقبة للمتقين |
رد : (مميز) زوجة معدد؟ ...... تفضلي
باذن الله اللي صار خير لك
مثل مانت شايفه هو مصدوم من ردة فعلك الحين عقب سنه وليه ساكته من زمان وحاطه بقلبك !!! ؟؟؟؟؟؟ احس راسه اليوم افتر مليون فره khh شفتي اشلون الحوار افضل من اي طريقه هو ماكان يدور في باله ربع اللي تحسين فيه ا ان شاء الله يصير تغيير بحياتكم للافضل من بعد هالموقف على فكره زوجك ذكي جداً ماشاء الله 😁 في التعامل مع النساء |
رد : (مميز) زوجة معدد؟ ...... تفضلي
الله ييسر امرج حبيبتي مهرة
والله اللي تمرين فيه مو هين |
رد : (مميز) زوجة معدد؟ ...... تفضلي
مواقف متفرقة حصلت هاليومين..
رجع سألني عن الصورة. قلت له: ليش؟ .. قال: اباها. .. قلت: مب لازم .. قال: صورتي اباها .. قلت: باعطيك إياها بس لا تحطها .. قال: مب كافي تنامين وانت عاطتني ظهرج وما قلت شي .. على الأقل خلي لي الصورة. . . . خلال أحد حواراتنا كنت أشتغل في البيت .. قال: امي تقول انها تعرف وحدة تشتغل بالساعة .. تحبين اييبها لج؟ .. قلت: ما يحتاي انا تعودت على شغل البيت خلاص. <---- كان رافض هالاقتراح لما قلت له عنه قبل. . . . سألني عن التجهيز لعرس أخوه اللي عقب كم شهر .. قلت له: بعدني ما سويت شي .. قال: متى عيل ترا ما في وقت .. قلت: يمكن عقب رمضان .. قال: الحين احسن يبالج وقت لين تختارين وتسوين بروفة وتضبطين ..... بعدين سالني عن فساتين البنات .. قلت له باشتريهم من مكان ثاني .. قال: ليش؟ أحيدج تحبين تطقمين مع البنات .. قلت: المصممة غالية .. ما راح تأخذ اقل عن ألف لكل بنت وحرام ندفع هالمبلغ والفساتين ما بتنلبس الا مرة وحدة .. قال: عادي سوي لهم معاج .. تراها مناسبة وما تغلا عليهم! . . . سألني عن الجمعية .. قلت له: رحت .. قال: ليش ما قلتي لي؟ .. قلت: وليش أقول لك .. طبيعي اروح اشتري أغراض للبيت .. قال: عشان اعطيج الفلوس .. قلت: مب مشكلة .. سألني كم دفعت على أساس يردهم لي.. . . . سألني عن جلسة الـ PRP إذا رحتها والا لا .. بعدين قرب مني عشان يشوف شعري .. ومدح النتيجة اللي وصلت لها! <----- الشهر اللي طاف ييته فرحانة أقول له ان خواته ملاحظات تطور في شعري .. كان رده المحبط: عشان تعرفين انا شو كنت متحمل!! . . . لأنه كان يحاول يفتح مواضيع وسوالف بعد ما تكلمنا في جزئية انه ما يسولف معاي .. سألني عن بيت ابوي الله يرحمه لأن في مشكلة في البلدية بخصوصه .. بعدين سألني عن الإيجار وقلت له ان اخوي عطاني إياه من زمان .. قال: ما قلتي يعني؟ .. قلت: وليش اقول؟ على أساس انك تقول لي كل شي يصير وياك؟ .. ضحك وقال: طيب ما بتعزميني عيل حلاوة الإيجار .. قلت: صرفته! .. قال: في شو صرفتيه؟ على نفسج والا على البيت واليهال؟ .. قلت: ما تفرق عندي .. انا يوم يكون عندي فلوس اصرف وخلاص ما افكر اذا هي فلوس او فلوس المصروف. وعقبها بدا يكلمني عن بعض الأمور المالية والتخطيطات اللي هو مخططها .. وكلمني عن أرض توه مستلم ملكيتها وسالني: شو رايج اكتبها باسم سلطان؟ .. ترددت شوي وقلت ما يصير تعطيه بروحه لازم تعطيهم كلهم .. بعدين قلت له خلني أسال الشيخ أحسن عشان نشوف شو التصرف المناسب. وقتها وسوس لي الشيطان إني أطلب منه يكتب لي البيت باسمي .. بس تذكرت كلامي مع الشيخ السنة اللي طافت وتعوذت من ابليس وما قلت شي. |
رد : (مميز) زوجة معدد؟ ...... تفضلي
حبيبتي ليش مستخسره البيت بأسمك و ايش دخل الشيخ في عطايا الزوج لزوجته ؟؟؟ ترا حتى في الشرع اللي بيطلق و ما يكون دخل على زوجته ليها نص المهر <<< انا اشوف انه كتعويض نفسي و الله اعلم و ترا يعوض <<< لا تقولين ما يعوض عن تقصيره hgh انتي ريحيه و هو يريحك و من اليوم لا تكبتين في نفسك <<< عشان يستفيد و يسعدك و انتي تسعديه hhn |
رد : (مميز) زوجة معدد؟ ...... تفضلي
ماشاءالله مهرة ارى الآتي اجمل واروع ان شاءالله
ومسألة المبيت من حقك صحيح بالشرع مطلوب العدل ولكن ليس على حساب اعصاب المرأة وليست مضطرة تحمل نفسها ما لا تطيق وطلباتك واضحة الآن والنقط توضع على الحروف وكل شيئ لمصلحتك لانك تستاهلين الخير والحياة التي تريدينها فهذه من ابسط حقوقك بانتظار الاخبار الطيبة واسأل الله ان يزيل هذه السحابة عاجلا غير اجلا احترامي |
| الساعة الآن 01:32 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©