|
رد : مشروع خطوبة .. لكن الوضع مختلف وغريب مستجدات بالرد ( 52 ) , ( 86 )
اقتباس:
لاتحكيه عن حبك لها عشان لا يشك با أخته ويبدأ يفكر من فين يعرفهـآ حتى يحبها كذا ويرجع عليها روح عنده أنشششب له هو مـآيعرفك واطلق حكم من رآسه @: روح عنده وكلمــه ..والله معــآك |
رد : مشروع خطوبة .. لكن الوضع مختلف وغريب مستجدات بالرد ( 52 ) , ( 86 )
قسم بالله انقهرررت ياياسر ع قهررك
تراك عديت نص الطريق ياأخوي ولاعاد فيها رجعه ابداً ولاتبكي ترا حزنتني عليك اخوها ((طعس)) ودام عمره 24 سنه ويقول هالكلام صدقني مامنه فايده ولابيتعدل وانت قلت ان ابوها خشيت مزاجه مالك الا ان تتقرب من ابوها وتتم الزواج عن طريقه وكرامتك انتبه لاتنزلها لهالطعس الخايس لانك بتنزل كرامة اهل الجنوب كلهم معك |
رد : مشروع خطوبة .. لكن الوضع مختلف وغريب مستجدات بالرد ( 52 ) , ( 86 )
سجلت في المنتدى عشان هالموضوع ..
أخوي أخواتي .. أهلي .. صديقتي .. أهل صديقتي .. كل ما زرت أحد حكيته .. يوم شوفتك فاتحين الجوال وتحدييييث طول الوقت نحتري رد منك .. ويجينا الرد ونطير ونناقز كأنها لنا وقسم .. وأدعي الله كل ما اتذكرت انك تفرحنا بموافقتهم ويوم أقرأ ردك دمووع وصياح .. ليش كذا ؟ ليش متنكد ؟ ردد معاي .. أستغفر الله أستغفر الله .. يارب اجعلها من نصيبي .. اجعلها قرة عيني واجعلني قرة عين لها حسبي الله لا إله إلا هو رب العرش العظيم .. كثر أدعية تنفرج لك وتفتح لك أبواب ما توقعتها .. أخوها موب ولي أمرها مو ن حقه يرفض .. هيا موافقة وأبوها موافق خلاص .. بيتم الزواج ان شاء الله الان اوقف وقفة رجال .. أثبت لهم إن أهل الجنوب ما مثلهم .. انتببببببببببببه انتبببببببه زي ما قالو اللي فوقي تجيب لهم سالفة انه لك سنة وانت تبحث عنها وكذا .. لا تنسى عليك بالدعاء بالدعااااء .. وحنا من وراك .. شايفتك الآن متصل .. أتمنى أشوف منك شيء يبرد القلب .. |
رد : مشروع خطوبة .. لكن الوضع مختلف وغريب مستجدات بالرد ( 52 ) , ( 86 )
الطبقيه مقيته , فين المشكلة لو قبيلي تزوج من غير قبيليه او العكس فين المشكلة اذا تزوج شخص من غير منطقته و عائلته , عموما , لن نتطور ولن نرتقي للعالم الاول الا من بعد ان ننسلخ من هذه الافكار البشعه التي تضر و لا تنفع .
والنعم فيك يا ياسر , قل لـ اخوها يشرفني هاللقب لاني من اصل العرب , ارى ان الحديث يكون مع الاب افضل , لانه اخوها 24 سنه وربما مازال فيه فتات من مراهقة وفرز للعضلات , الافضل ان تتحدث مع ابوها و والدتك تتحدث مع امها , والله يكتب لك اللي فيه الخير. |
رد : مشروع خطوبة .. لكن الوضع مختلف وغريب مستجدات بالرد ( 52 ) , ( 86 )
جد والله حزنت كثير على هالخبر
كنت متفاءله حيل ودعيت لك لكن لا تيأس اخوي .. روح لهم مرة ثانية وكلمهم يفضل تكلم ابوها لان مثل ما قلت هو ارتاح لك وخبره انك ارتحت للبنت ومن هالكلام .. بس مثل ما قالوا لك الاخوات قبلي لا تجيب طاري القصه او اي شيء يخليهم يشكون انك تعرفها من قبل وخلك وراااااهم لين يوافقون .. والله يكتب لك الخير |
رد : مشروع خطوبة .. لكن الوضع مختلف وغريب مستجدات بالرد ( 52 ) , ( 86 )
ما شا ءالله لا قوة الا بالله
العين حق يا جماعة يا ريت الكل يصلي عالنبي ويقول ما شاء الله ربي ييسرلك امرك ويزوجك البنت اللي ببالك يااا رب نصيحتي ارجع حاول مرة تانية مع اخوها وخلي احد قريب منه يقنعه خلي امك تكلم ام البنت وتقنعها خلي حدا قريب منهم يدخل واسطات مع اخو البنت واهم شي ذكرهم باحاديث الرسول عليه الصلاة والسلام اذا اتاكم من ترضون دينه وخلقه فزوجوه وقول لهم انك ما دقيت بابهم الا لما سمعت عن اخلاقهم ودينهم وتربيتهم وانك شاري البنت وارتحتلها بالشوفة وبالاستخارة ربي ييسرلك موضوعك ويتمملك على خير ويجمعكم تحت سقف واحد |
رد : مشروع خطوبة .. لكن الوضع مختلف وغريب مستجدات بالرد ( 52 ) , ( 86 )
العين حق
رحت فيها يا ياسر الله يصبرك ويكتب لك اللي فيه الخير انت سو اللي عليك والباقي ع الله ولاتفرّط فيها وهذي رسالة لكل شخص يؤمن بالله ورسوله قال الرسول عليه الصلاة والسلام((استعينوا على قضاء حوائجكم بالكتمان)) |
رد : مشروع خطوبة .. لكن الوضع مختلف وغريب مستجدات بالرد ( 52 ) , ( 86 )
ليش من الاساس يوافقون عليك ويخلونك تشوف البنت معليش عذر اقبح من ذنب
نصيحة دخل احد من اقاربائك عنده وسيلة اقناع وحكيم وتفاهموا مع الولد وابوها واخوانها |
رد : مشروع خطوبة .. لكن الوضع مختلف وغريب مستجدات بالرد ( 52 ) , ( 86 )
صراحه ماعندي حل لك مالك ياخوي الا الاستغفار
والله يكتب لك الخير |
رد : مشروع خطوبة .. لكن الوضع مختلف وغريب مستجدات بالرد ( 52 ) , ( 86 )
الله يعينك يااخي
اعتبر هذا أول اختبار من الله ليمحص ايمانك خلك صبور وجسور واطلب من الله العون اولاً،، ورح قابلهم وتفهم منهم سبب الرفض وتناقش معاهم بكل رقي ممكن يكون مجرد اختبار لك لمعرفة معدنك او انه عندهم فكرة مأخوذة عن اهل هذه المنطقه فأنت أثبت لهم الأفضل وأنا أشهد إنكم ناس ترفع الراس رانا شخصيا عاشرت قبائل متعدده من هذه المنطقه والله والنعم فيهم،،زيك سريرتهم طيبه وإللي بقلبهم على لسانهم وإذا ضاقت الحيل لا قدر الله اجتمع مع الوالد ووجهاء القبيلة للتوسط أو ماشابه بصراحه أنا شايفهإن هذا الحب عذريومافيه شي وإنت رحت للبيت من الباب الله ييسر أمرك يفرج همك وينفس كربتك يااارب ننتظر الخبر المفرح "موعد الملكه" : ) |
رد : مشروع خطوبة .. لكن الوضع مختلف وغريب مستجدات بالرد ( 52 ) , ( 86 )
الحل الوحيد .. الصلاه
صل ياخوي واطلب من ربك وانت ساجد ان يسخر لك اخوها الله ييسر امورك .. وكل شي له حكمه لايعلمه الا الله تعالى |
رد : مشروع خطوبة .. لكن الوضع مختلف وغريب مستجدات بالرد ( 52 ) , ( 86 )
الحمدلله ياياسر ابد ان شالله راح تاخذها وانا واثقه من هاشي
اذا ابوها موافق وهي مايهم الباقي رح لخوه وحاوره برزانه وتواضع وحب ووضحله انك حريص ع اخته وراح احطها بعيوني وقوله لاتوقف بين زواجنا واتق الله انتهامك لي بدون دليل واهم شي ياياسر خلك قريب من الله اهم من اخوه هو سبحانه ميسر الامور وراح يكتبلك الي فيه الخير لك تاكد استخير وفرش سجادتك بالليل في الحديث أنَّ الله جلَّ وعلا ينزل في الثلث الأخير من الليل إلى سماء الدنيا فيقول: "من يدعوني فأستجيب له؟ من يسألني فأعطيه؟ من يستغفرني فأغفر له وقول كل شي لله الح بدعا لله وربي راح يسعدك في الي يناسبك علق قلبك بالله وراح تشوف الي يريحك لا اله الا الله محمد الرسول الله |
رد : مشروع خطوبة .. لكن الوضع مختلف وغريب مستجدات بالرد ( 52 ) , ( 86 )
كلمه لا تستسلم حاول وحاول لين يقتنع انك رجال
قل طيب ليه رضيتوا أجي من ابها علشان أشوفها وانتم عارفين من قبل اني من ابها ليه تطلعونها لي انا قلبي تعلق فيها يوم شفتها انا مرتاح لكم وسالت عنكم من قبل وشاريكم نصيحه دخل واحد كفوا بالموضوع وراح يساعدك بإذن الله توكل ع ربك وان شاءالله كل شي بيصير نفس تبي وأحسن الله لا يخيب تعبك يارب |
رد : مشروع خطوبة .. لكن الوضع مختلف وغريب مستجدات بالرد ( 52 ) , ( 86 )
ذكرتني بأخوي يوم شاف زوجته النظرة الشرعيه ودخلت قلبه أبوها غير رايه ورفض بس اخوي ماستسلم وجلس ورى أبوها والحمدلله لهم الأن سنه من تزوجو
كلم أخوها بين له انك شاري البنت وأستخير رب العالمين وأذا ماتم الموضوع فاعلم انه خير لك ثق بأن الله يريد لك الخير |
رد : مشروع خطوبة .. لكن الوضع مختلف وغريب مستجدات بالرد ( 52 ) , ( 86 )
ماشاء الله تبارك الله ..
اخي الصغير ياسر .. اؤيدك بالذهاب لاخيها واقناعه .. بس انتبه تكون انفعالي .. وخليك مقنع ورزين وهادئ ..وقل له انا نصيبي معلق مع اختك .. يااخذها ولا مااتزوج ..<<<<<<<ههههه عجبتني .. وكلمه على قد عقله ..لو عندك كتب نسب لقبيلتك خذها وحطها بين يدينه .. واشرح له ..ووضح له .. بس خلك هااادي ولا تنفعل ..لو سمحت .. انت بس وانا اختك خذ لك فره بالنت عن قبيلتك ومن هالكلام الدسم .. واسرده عليه خله تطير بوهته ..ويكشخ بك عند ربعه ..ورح له وانت سيارتك تلق لق .. وريحة العود تصك الشارع الي باخر الحاره ..والعطر يدخل الخياشيم غصب من زينه وقوته .. لان هالاشكال تنخدع بالمظاهر .. ولو احد من اقاربك ماخذ كباريه مشهورين قل له ..الشكوى لله ..لازم نقنعه باي طريقه .. ولجل عين تكرم مدينه .. المهم حاول تسال الوالده لو عندكم انساب من نجد ..او من عائلة معشوقتك ليلى .. عشان تقول لاخوها .. الا على فكره اخوها كم عمره .. |
رد : مشروع خطوبة .. لكن الوضع مختلف وغريب مستجدات بالرد ( 52 _ 86_115 )
الله يسعدكم ويجزآكم كل خير
المهم اني رحت له بيتهم امس ابوه استقبلني ورحب بي دخلت جلسنآ شوي ثم سألته وين يوسف قال برآ قلت له يآعم ولدك مو موآفق ؟ قال الا قلت وشو الا امس كلمني وعطآني الرد ب الرفض قال وشو ويدق على ولده ويتلاعن هو وآيآه شوي دخل سلم " السلام عليكم " مآمد يده لي بس جلس اقول له كيف حالك ؟ يقول بخير قلت وش فيك مطنقر قال وش عندك قلت جيت ابي اعرف سبب رفضك الي مآ خلاني انام يومين قال قلت لك السبب قلت وش ه ويننا احنا ووينهآ هي وانت تدري بهالشي وانت رفضت بسبب غيره ولا تبي تقول لي اخوانك واختك وامك وابوك حتى كلهم موآفقين من اصغرهم لاأكبرهم الا انت مآلك سبب قال الا قلت له وش هو قال اطلع معي اعلمكك ابووه قال لا يقوله هنا قلت له لا يآعم خل يآخذ رآحته طلعنا ب الحآرة قال مآبي اشوفك عند بيتنآ >> انا صدمه قعدت سآكت ثوآني كذآ قال لي يلا توكل على الله قلت اوكي ركبت السيآرة دقيت على ابوه قلت ولدك طردني > بكل برود طلع لي ابوه ركب معي اخذنآ فرّه ب السيآرة اخذت واعطيت معه وتكلمنآ عن ولده يقول انه متعبه ححيل هالايآم ولا يدري وش فيههه يقول لا تشره علي ووجهه متعفس ومآدري كيف قسم ب الله رحمته وقعدت اتذكر الايآم واتذكر شكل البنت وتحمر عيوني وادمع شآفني قال افاااا ليه تبكي قلت طقيت المسآفة هذي كلهآ من كندا وكنت على وشك اكنسل البعثه بس عشآن افرح بهاليوم ويرد علي ولدك بهالرد وش تبيني اسوي صدمه نفسيه علي قال لا تبكي وانا بتكلم معه واشوف الحل قلت اوكي الله يسعدك ويوفقك شطح بي قال ابوك وينه قلت ب البيت تعبآن قال خذني له وديته سلم عليه 5 دقآيق ثم رجعته بيتهم يوم وصلت والقى يوسف نزلت قلت يوسف ويدخل البيت بسرعه ركبت السيآرة قال لي ابوه لا تخخآف انت رجآل والنعم فيك وموضوع زواجك مآبيوقف عليه قلت كيف يعني > فرحح قال بكلمك بكرة واعلمك قلت اوكي ونزل وانا فيني فرح ممزوج بـ حزن على ابتسآمه تصحبهآ دموع خآيف ومربوك مآبي اتزوجها بدون مآعرف سبب رفض ولده عمره 24 سنه وعآقل ويشتغل في معآرض سيآرآت > اقدر اقول عنه شريطي بس نظيف فكرت قلت يمكن برآسه واحد يبي يزوجه اخته بس مآفي شي يجي غصب ولا اظنها بتوآفق اخته شي يحيررر شي يقهر ويمغصصصص انا اليوم العصر بروح له المعآرض بتكلم معه مآني مخليه ابي اكسبه ب الطيب مآبي شي يجي بقوة ابي دخل قلبه مآبي اتزوج اخته وهو مب رآضي بكرة يجي يسوي معنا مشآكل يمكن يقطع اخته ويمكن تسسسير حآجآت مآلها داعي |
رد : مشروع خطوبة .. لكن الوضع مختلف وغريب مستجدات بالرد ( 52 _ 86_115 )
جبت لهم هديه امس
بسه شآنشيلا اصليه غير مهجنه مستورده من برآ شريتهآ ب 9000 فرح فيهآ الابو والعيآل فرحوآ فيهآآ بس جيت اليوم احس ان الهديه بآيخه |
رد : مشروع خطوبة .. لكن الوضع مختلف وغريب مستجدات بالرد ( 52 ) , ( 86 )
اقتباس:
كلنآ قبيليين والنعم بحآلك اخوها احسه اهبل كذآ مآدري فيه حركآت مهآبيل اشك بوضعه الصرآحه هو يدخن بس الله واعلم اذا فيه حاجات من ورى اقتباس:
بتزوجها بإذن الله محد بيوقف بطريقي لا هو ولا عشره من اشكآله هالبزر ودوآه عندي > مآبتهور واسوي مشآكل بس بخليه يندم على حركته بخليه يرآكض ورآي يعتذر لي الحركه هذي بسويهآ اليوم ترقبوني :22: |
رد : مشروع خطوبة .. لكن الوضع مختلف وغريب مستجدات بالرد ( 52 _ 86_115 )
مادامه يشتغل بمعارض ..
كل مشوار تروح له خله بشياره غير .. مره سيارتك ..مره سياره ابوك ..مره سياره اهلك ..مره اخوك .. المهم تكون تلق وتلمع .. الله ييسر امرك اخ ياسر |
رد : مشروع خطوبة .. لكن الوضع مختلف وغريب مستجدات بالرد ( 52 _ 86_115 )
لا انا بستغل موضوع انه شريطي
قبل فترة خالي اشترى لولده كآبرس من معآرض الشفآ وصآحب هالمعرض عسكري عند خالي انا تو كلمت خآلي قلت له السآلفة ابي هالبنت بس اخوهآ ابيه يرضى قال آمرني وش تبي بس قلت مآ يآمر عليك عدو ابيك تكلم خويك وتعطيه رقم يوسف ويعرض عليه فرصة عمل عنده ب المعرض بدبل رآتبه الي كآن يشتغل فيه هناك قال لي مآيستلمون روآتب ومآدري وشو يآخذون نسب قلت المهم قله كذآ وخل يدبل المكسب وانا كل شهر بعطيه الفلوس يعطيهآ يوسف على اساس انه رآتب قال ابشر وكلمه ورد لي خبر تو يقول هات رقمه عطيته الرقم النيه رآح تكون صدمه ليوسف نآوي اخليه يكتشف هالشي بنفسه هو ابيه يدرري بنفسه ان السآلفة كلهآ ورآهآ يآسر كذآ برتفع بعينه شوي حبه حبه وتمشي الامممور عندي جمس حوض بهبهآني سليم 100% بكلم وآحد من اخويآي يجي للمعرض بالبهبهآني وانا بسيآرتي ونتقآبل هناك كأنه يبي يبيع سيآرته ب المعرض ويروح هناك ويعرضه ويوسف يخق معه ويبي يشتريه بس مآ من فلوس اجي انا اقول عجبني الجمس ابي اشتريه بينصدم فيني وبيحقد علي ثم بسوي نفسي شريته ثم اعطيه اياه اقول حطه عندك وبعه بالسعر الي برآسك وعطني نصه كذآ بيحس اني قآعد اخسر مقآبل اني اكسبه هو يمكن يعآند > نسبة ضئيله ويمكن يلين قلبه بعد فترة ويرتآح لي وكذآ ابي ارائكم |
رد : مشروع خطوبة .. لكن الوضع مختلف وغريب مستجدات بالرد ( 52 _ 86_115 )
الحمدالله وبدايات مبشره ومفرحه
الله يالحب صرت تتكلم مثلهم .. المهم ..اخوها مادامه شريطي فااكيد انه مهايطي ويبغى يثبت وجوده ويفرد عضلاته ... بالنسبه للبسه ماادري ليش تهديهم !!! والله ضحكت ..من جد وش تعني البسه .. الله يوفقك ... |
رد : مشروع خطوبة .. لكن الوضع مختلف وغريب مستجدات بالرد ( 52 _ 86_115 )
لاتسوي حركة فلوس المعرض مرررره موحلوه حسيتها احس لو كتشفها بعدين بيفكر انك تشتريه بالفلوس خلاص انسي الاخ وخلك مع الاب وحاول تملك بسررررعه عشان تكسب البنت
|
رد : مشروع خطوبة .. لكن الوضع مختلف وغريب مستجدات بالرد ( 52 _ 86_115 )
ربي ييسر امرك ياخوي
والحمد لله ترى امورك ماشيه تمام وكل جوزاه لازم فيها من يعارض وانا كثير كان معارض على زواجي من زوجي كذا بدون سبب بس مدام ماما وبابا وانا موافقين خلاص معاد صار لهم كلمه ورايهم مابيقدم ولا بيأخر وخوها بتكسبه مع الوقت لما يشوف كيف تعاملك مع اخته واهله بيطيح اللي براسه هو يمكن الحين متخوف منك لان هذي اخته الوحيييييييييييييده واكيد انها غااااااااليه عنده ويحبهااااااا موووووت ويخااف عليها فما حس بالامان معك لانه بكل بساطه مايعرفك هو اكيد كان نفسه يزوج اخته واحد من الجماعه معروف عندهم وكتاااااابه مفتوح ويعرفون عنه كل شي ترى اخوها امره هين وان شاء الله عن قريب تبشرنااااااا بخبر عقد قرانك |
رد : مشروع خطوبة .. لكن الوضع مختلف وغريب مستجدات بالرد ( 52 _ 86_115 )
الله يكتب لك اللي فيه الخير
|
رد : مشروع خطوبة .. لكن الوضع مختلف وغريب مستجدات بالرد ( 52 _ 86_115 )
الرد 140 ماعجبني وانا اختك مو لهالدرجه تقدر تقنعه بدون هالفه ذي كلها
وصادقه توفي فيصل يوسف وانت واخت وحيده باقي شوي ونحل اللغز :25::25: قد ماتقدر لاتوضح وكمان حسيت برصيدك 10 ميلون ماشاء الله وش البسه الي ب9الاف ماشاء الله عالعموم الله يسهل لك كل صعب ويجمع بينكم على خيرررر |
رد : مشروع خطوبة .. لكن الوضع مختلف وغريب مستجدات بالرد( 52 _ 86_115_136 )
تقول مطوع و أخاف الله و في كل مرة تعتمد في تعاملك على قاعدة الغاية تبرر الوسيلة , فهل التجسس و الاساليب الملتوية من أخلاق المسلم
كن واضحا صريحا أمينا و لا تعلق قلبك بغير الله فمهما بذلت من اسباب لتبلغ مرادك فإن إرادة الله فوق إرادتك و لن يتم إلا ما كتبه الله لك فلا تتصرف إلا بما يرضاه و سيكون لك عونا و نصيرا و لا تتبسط و تتوسع في ذكر التفاصيل و استعن على قضاء حوائجك بالكتمان فأنت تعديت نشر خصوصياتك إلى نشر خصوصيات غيرك و خبايا حياتهم دون إ ذن منهم ثم هل استخرت أخي قبل الإقدام على هذا الموضوع ان كنت قد استخرت فالخيرة فيما سيختاره الله لك فاسع في أمرك بالطرق المعقولة و المشروعة دون ابتذال و ارض بما قدره لك و لا تقل لا اريد عوضا اريدها فقط هي فلربما تندم على هذه الكلمة يوما فما أدراك انت بالغيب وعسى أن تكهرهوا شيئا و هو خير لكم و عسى أن تحبوا شيئا و هو شر لكم اصدق التوكل و ارض بالقضاء و ابذل الاسباب دون تكلف و دع عنك كل مريب ودع علام الغيوب يختار لك فهو أدرى بما فيه خيرك و صلاحك في الدنيا و الآخرة أي نعم اسع بكل ما في وسعك لكن دون إسفاف و ابتذال و التواء و اعلم أخي أن من احترامك للفتاة احترام أهلها و عدم الخروج عن حدود اللياقة و الأدب في الحديث عنهم فهب انها رأت ما تكتب فهل سيرضيها ما تقوله عن أخيها ناهيك عن أن ذلك من الغيبة فعن عائشة رضي الله تعالى عنها أنها قالت لرسول الله صلى الله عليه و سلم : "حسبك من صفية كذا و كذا فقال: لقد قلت كلمة لو امتزجت بماء البحرلمزجته" و في رواية (قالت عائشه -رضي الله عنها-:عن صفيه أنها قصيره،فقال الرسول -صلى الله عليه وسلم-: لقد قلتي كلمة لو أمتزجت بماء البحر لغيرت طعمه من شدة نتنها) هذا و هي لم تذمها و لم تتلفظ عنها بسوء فماذا بشأن كلامك عن أخيها فاتق الله في كلامك عنه ثم لا تظهر اخي الفاضل احتقارك لأهل المعصية و تعاليك عليهم ولا تزهو بما أنت فيه من عافية فالله قادر أن يعافيهم و يبتليك و قلوب العباد بين إصبعين من أصابعه يقلبها كيف يشاء فاحمد الله على ما أنت فيه من نعمة و اسأل الله له الهداية ليس لأنه مدخن فيجب أن تكون له خبايا و بلاوي مخفية أي نعم شخص على معصية نسأل الله له المعافاة و لكن هذا لا يعني أنك أفضل منه منزلة عند الله فالله أعلم بخبايا النفوس والله قادر على أن يغير حاله إلى صلاح فلا يعميك غضبك من موقفه فتسمه بما ليس فيه و تبيح لنفسك الوقوع فيه بما لا يليق طريقة تعاملك مع ما يواجهك من مشاكل توحي بأنك ابن مدلل في عائلة مترفة تعود أن يحصل على كل ما يريده دون ممانعة و كل من حوله في خدمته و رهن إشارته و أخشى أن يكون تمسكك بالبنت أيضا من باب حب تملك كل ما تقع عليه عينك و يعجبك ليس المال حلا لكل شيء و لسنا في سوق نخاسة كل شيء يشترى فيه بالمال حتى البشر أراك و بكل صراحة تتصرف بمراهقة و بلا مسؤولية فراجع نفسك و صحح مسارك فإدارة حياة زوجية ناجحة و سعيدة بحاجة إلى نضج ووعي و مسؤولية و هي بحاجة للنزاهة و الوضوح و لا يكفي فيها الحب المتبادل حاول كبح جماح مشاعرك و لا تطلق لها العنان فتعمي بصرك و بصيرتك آمل أن تتقبل كلامي بصدر رحب فما أردت لك سوى النصح و أسأل الله إن كان في زواجكما خير لكلاكما في الدنيا و الآخرة أن ييسر أمركما و أن يجمع بينكما و أن يبسط لك القبول عند أهلها و أن يرزقكما عيشة هنية |
رد : مشروع خطوبة .. لكن الوضع مختلف وغريب مستجدات بالرد( 52 _ 86_115_136 )
^ جزاك الله خير على هالنصيحه
خن اعلمكم وش حصل امس رحت له المعآرض ابتسمت ابي اسلم رد علي " وش تبي جآي هنا " قلت جآي اسلم قال مآنسلم على كلاب نرفزني لا شعوريآ صكيته كف وبطحته وقعدت ارفس فيه ثم افتك مني وقعدت الحقّه ب الركب لين طردته برآ رجعت اخذت شمآغي ومشيت ما امداني ارجع البيت الا دوريه عند بيتنآ يآسر ؟ قلت ايه خذوني للقسم لقيت الولد هناك اخذما واعطينآ بالكلام صآر جدآل عنيف ب الاخير خلاص بأدخل السجن ويقول لا ويدق صدره هذا ابو نسب وشلون مآ اتنآزل وخذ لك كلام وانا فآقع ضحك طلعت اول مآوصلت البيت دق علي يقول حصل خير ومآدري وشو ونبي نرجع حبآيب زي اول وترآني موآفق بس نبي نأجل الموضوع شهر كذآ ثم ارجع اخطب لاني حآط عيني على بنت وابي اختي تسآعدني ولا تنشغل فيكك قلت اوكي الي تبيه قفلت وقعدت افكر وش ورآه هالولد وش غيره فجأة شكيت بوضعه الصرآحة بس قعدت اريح نفسي واقول اهم شي ضمنت الست والحححمد لله لكن لازلت خآيف من هالولد وش ورآه قلبي نآغزني |
رد : مشروع خطوبة .. لكن الوضع مختلف وغريب مستجدات بالرد( 52 _ 86_115_136 )
اخي الفاضل كنت من متابعي مشكلتك منذ البداية والان هاانت تحتاج النصح فنصيحتي لك ان تطلب منه ان يتم هذا الاتفاق في مسالة تاجيل الخطبة بحضور والده واطلاعه على كافة التفاصيل فقد يكون اراد من هذه المهلة المراوغة كسب الوقت لامر ما في نفسه :::وفقك الله اخي الفاضل
|
رد : مشروع خطوبة .. لكن الوضع مختلف وغريب مستجدات بالرد( 52 _ 86_115_136 )
على ما يبدو أن قصتك أوشكت على النهاية السعيدة خاصة وأن المحبة لا تكون إلا بعد العداوة.. وهذا ما حصل مع أخو البنت.. طول لسانه فنال جزاته وأكثر.. عفارم عليك
|
رد : مشروع خطوبة .. لكن الوضع مختلف وغريب مستجدات بالرد( 52 _ 86_115_136 )
اقتباس:
واعلمه بموآفقة ولده والله يسهل يآرب اقتباس:
اتمنى كل التمني ان القصة تنتهي وارتآآح وافرح بهآ ونزغرط ونسجل هالحدث بتآريخ حيآتنآ يالله يآآرب حقق لي ما اتمنى |
رد : مشروع خطوبة .. لكن الوضع مختلف وغريب مستجدات بالرد( 52 _ 86_115_136 )
حط احتمال كبير ان ماحصل بينك وبينه عند المعارض هو راح يعتبرها اهانه
ويوم دخلت التوقيف انت ,,كان بامكانه ينتقم منك بأنه يخليك كم يوم بالتوقيف ويتنازل لكن دامه يدق ع صدره ويبي يطلعك والله مايسوي هالحركه الا واحد ناوي انه يرد الصاع صاعين احذر وانتبه ماتدري يمكن تكون نهايتك ع يده او نهايته ع يدك ياما ارواح راحت بسبب هالاحتكاكات انتبه وكإجراء إحترازي ,,احاول انك تستأجر بفندق ولحد يعرف مكان سكنك وانتبه اذا في احد يراقبك ويااارب اكون غلطان |
رد : مشروع خطوبة .. لكن الوضع مختلف وغريب مستجدات بالرد( 52 _ 86_115_136 )
صراحة زيارتك له باالمعارض كانت غلط وامس كنت ابي ادخل انبهك لاتروح بس شفتك صامل..
المفروض انك مارحت وخاصه أن والدها وعدك خير،، وموضوعك عنده انت مندفع حيل ياياسر.. ماعلينا وعلى العموم مايبلها فراسه الولد أجل الموضوع لحاجه في نفس يعقوب يعني براسه علم.. عشان كذا مثل ماذكر مارد الجنوب الزق بوالدها وخلي تفاهمك معه والولد هذا لاتعترضه ولاعاد تكلمه خل امورك من راسك لراس الشايب والدها وزي ماقالك والدها أمرها عنده مو عند الولد .. |
رد : مشروع خطوبة .. لكن الوضع مختلف وغريب مستجدات بالرد( 52 _ 86_115_136 )
اقتباس:
يقول انه مدرس في مدرسة في الطايف مدرسه حلوه ورآقيه ثم جو نآس من الوزآرة يزورون المدرسه والمكتبة عندهم مآلهآ آمين رآح الوكيل قال لخالي خلك اليوم بس كمظهر انك امين مكتبة عشآن نفتك منهم قال اوكي دخلوآ عليه المكتبة ينآظرون سألوه عن اسمه قال لهم اسمه ب الكآمل جا اليوم الثآني الا خالي حطوه امين مكتبة رسمي سجلوه ب الوزآرة خآلي مآ يبي هالشي بس كل المدرسين الثآنين نفسهم يسيرون مكآنه هو يبي يطلع بس خلاص تأقلم معها والمدير انصدم مآيبيه يصير الامين حاط برآسه ولد عمه يبي يخليه هو الامين وصآر يعآدي خالي مره صآرت مشآده مع بعض وتجالدوآ وجاه نقل تأديبي في مدرسة بعيده فيهآ حول 1000 طالب وسط قرية كلهآ بدو المهم ان فيه واحد زي نظام يوسف يبي ينرزفه يحآول على قولتنآ " يقآيره " ويهآيط عليه مره خالي كان متضآيق ويجي ذآ يكمل النآقص ويتجآلد معه وتوصل السآلفة للشرطة ونفس النظام الي سوآه يوسف تنآزل عنه وصآر يحط خالي برآسه ويحترمه ويسلم عليه وصآر اخلاق انا مآدري عن نية يوسف لكن الله يسستر والله اني خفت |
رد : مشروع خطوبة .. لكن الوضع مختلف وغريب مستجدات بالرد( 52 _ 86_115_136 )
انت تتكلم عن طالب ثانويه عمره 17 او 18 سنه مراهق
لكن ذا عمره 24 سنه ((ومن خاف سلم)) انتبه ماودك تضيع عمرك عشان بنت |
رد : مشروع خطوبة .. لكن الوضع مختلف وغريب مستجدات بالرد( 52 _ 86_115_136 )
اقتباس:
الله واعلم وش برآسه خوفي يشوه سمعتي ب شي ولا يمسك علي شي او يكره ابوه فيني والله مآدري لكن حسبي الله على ابليس |
رد : مشروع خطوبة .. لكن الوضع مختلف وغريب مستجدات بالرد( 52 _ 86_115_136 )
اقتباس:
بس ياخوي اصبر شوي ليش متسرع والأفكار الخنفشارية الإبداعية اللي تطلع بدماغك خلهآ تهدآ لحد مـآتشوف وش يرد الشـآيب والله يوفقك |
رد : مشروع خطوبة .. لكن الوضع مختلف وغريب مستجدات بالرد( 52 _ 86_115_136 )
اقتباس:
وابو البنت فرح يوم وافق ولده يعني الاب تقريباً يخاف من ولده ****** ولو العلاقه بين الاب والولد صحيحه اول شي خاف الولد من ابوه وخضع لقرار ابوه وثاني شي كان الاب مافرح , يعني كان كرش ولده وقال له غصب عليك بتتزوج البنت ****** المشكله هنا ان الولد الظاهر قيمة قراره مثل قيمة قرار الاب هذا اذا ماكان اقوى من ابوه وبحكم انك في بداية الموضوع تقول ان الاب ينام واجد ومنقطع عن العالم وعن الدنيا معناة ان الولد قايم بالبيت وصار هو هرم السلطة بالبيت الوضع في بيتهم شوي ملخبط الله يعينك يوفقك ولاتنسى تاخذ حذرك |
رد : مشروع خطوبة .. لكن الوضع مختلف وغريب مستجدات بالرد( 52 _ 86_115_136 )
ماله داعي التاجيل
اذاكانوا كلهم موافقين وسألين عنك ومقتنعين فيك خلاص روحلهم انت واهلك واخطب وحدد وقت عقد القران في اقرب وقت ممكن وليش المماطله بسرعه لحق على عمرك قبل لايصير شي وتتعقد الامور مراه احسم الامر خلاص هي مجرد ملكه واخته لاتزال عنده ماهي مفارقته خليها عنده لوسنه حتى ان بغا بس اهم شي تضمنها لك انا ما ابغى اخوفك بس يمكن بهالفتره يدبرلها عريييس من اللي يرتاحلهم ترى كل شي ممكن خليك واعي قول انا بملك والزواج موذحين عشان يكون هناك فرصه لك يايوسف تشوفلك اختك البنت اللي حاط عينك عليها على قولته انا ابيك تكون واعي ياخوي الملكه ماراح تشغلها عن اخوها صراااحه عذر مادخل راسي |
رد : مشروع خطوبة .. لكن الوضع مختلف وغريب مستجدات بالرد( 52 _ 86_115_136 )
انا مظلم اخوها بس كل شي وااارد
|
رد : مشروع خطوبة .. لكن الوضع مختلف وغريب مستجدات بالرد( 52 _ 86_115_136 )
قصتك غريبه شوي
يعني كيف تطلع لك البنت من اول زياره الي اعرفه وموجود عندنا ان يجون الأهل ويسئلون وبعدين النظره الشرعيه ماعلينا المهم من رد اخوها وسالفه التأجيل اشك انه ناوي لك نيه شينه او يمكن البنت جاي لها عريس مابي احطمك بس انتبه زين اخوها مؤ صغير عشان يخاف منك ويغير رأيه بالذات بعد ما صكيته كف و حط ببالك لو هم موافقين عليك كان قالوا لك من البدايه وما جلسوا يماطلون عشان تمل منهم وما تدري يمكن خيره لك |
| الساعة الآن 03:35 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©