|
انا قريت ردك على الحبيبه ليتني اسلى
وصراحه اقشعر بدني وبغت تنزل الدمعه بس رديتها لاننا نبي نفرح مهما غضبت الزوجه لابد ولها حنين لزوجها يحنن ربي قلبه عليك ونصيحه حطيها على بالك عدل [gdwl] لاتخرجي من بيتك نهائي لو يجرك بشعرك يقول اطلعي قولي لا لاتخرجي ان عدتي لاتخرجي وان قال روحي لااهلك قولي انا طلعت منهم وانا ماسكه ايدك وماارجع لهم الا انا ماسكه ايدكhttp://www.66n.com/forums/images/icons/tongue3.gif[/gdwl] |
اقتباس:
بإنتظار عودتك ... [info]توقيعك ... أثّر فيني كثير .. لدرجة البكاء ![/info] |
اقتباس:
ان شاء الله راح أعمل بنصيحتك أو بالأصح راح احرص عليها (الدعاء والأستغفار) ومتأكده أن زوجي يحبني ... بس للأسف .. حب أناني وعلى طريقته وأنا مافيني أتحمل أكثر من كذا!! لكن الله يكتب اللي فيه خير لي ولعيالي .. الله يوفقك ويسمح دربك ويكتب لك الخير وين مارحتي ... |
اقتباس:
نفسي والله اني اصير مثل ماقلتي حبيبتي ... بس ماأقدر ... ما أق د ر !! عموما ً انا اذا سمعت منه هالكلام أحاول امتص غضبه وأهديه ... بس كله على حساب نفسيتي وأعصابي حاولت اطنش .. او مثل ما يقولون خلي اذن من طين والثانيه من عجين بس صعععععبه!! بعدين ترى زوجي من النوع اللي مايمشي عليه كلام الدلع ! ياااااااماااااا حاولت وحاولت بدون فائده ... دعواتك لي ... |
السلام عليكم ورحمة الله وبركاته شلونك اختي الحبيبه ام فهد وطمنيني عن نفسيتك إن شاء الله مرتاحه ؟ شوفي يالحبيبه أنا لاأملك لك عصى سحريه لكن كلنا ياقلبي متزوجات ونتكلم من خلال تجاربنا وسوف أعطيك نصائح بعد ماتوكلت على الله وإستختره ودعيت لك بساعة الاجابه في يوم فضيل فلو قدر الله لك لم شملكم فالفضل له وحده فقد قال ادعوني أستجب لكم ولن يجيب رجاءنا به يالحبيبه قرأت مشكلتك وتمعنت بردودك واكتشفت إنك ضحيه لطيبتك وحسن نيتك كما أنه ليس لك من يسدل لك النصائح والتوجيه بين أهلك وهذا مايدفعك لطلب الانفصال فشعورك بالوحده مع زوج يتصف بالانانيه أمر مدمر وتحملك لكل هذا العناء وحدك أمر قاتل لكن بالرغم من كل ذلك فأنت رائعه بحق بك كل ما يحلم به الزوج ولن يتخلى عنك من كنت زوجته بكل سهوله لذا دعينا نتفق على أمور ومنها 1 زوجك يحبك 2 طيب جدا 3 عصبي جدا 4 يحب أبناءه 5 لايظلم بينك وبين زوجته الاخرى 6 لايجلس كثيراً بالمنزل ربما لديك الكثير ولا اعلمه جميع تلك المذكوره تساعدك على التعايش المطلوب في كل بيت بالمقابل فأنت أيضاً تحبين زوجك بل وتشتااقين له يالحبيبه تعلمين المراره الحقيقيه ماهي؟ عندما تجتاحنا نسمات الشوق ولكن لامن سبيل تقتال كل لحظه جميله في حياتنا تغرس الاهاات والونات تبدل النور لظلمات حين تشتاق الزوجه لزوجها وهي في صفوف المطلقات كيف هي الحياه بعد ذلك؟ يا لحبيبه والله ليس كل حب ولا عشره يداخلهم الشوق واللهفه وماهذا صدقيني الا رحمه بك من الله عزوجل فأنت بين يدين من تشتاقين له وتتلهفين لرؤيته وكل أمر الان مقدور عليه وكله بيدك فالحقي قبل أن لاتستطيعي أن تلحقي الان يالحبيبه كل ما أطلبه منك وأترجاه أن ترسلين لزوجك رسائل شوق وعتاب حاني عتاب بان كيف تحمل غيابك ولم يشتاق لشوفتك وهكذا وانتهزي الاوقات التي تعرفين أنه رايق ومرتاح فيها طبعاً قبل الارسال إستخيري الله اخيتي بكل ماتنوين فعله ليبارك الله فيه وييسره لك ام فهد عندما قرأت مافعله زوجك لاجلك في الـ 5 سنوات الماضيه تحديداُ دموعه أكبرته وقدرته صدقيني لا أعلم لم أشعر بذلك الرجل السيء وتعاطفت معه رغم أنه بنظرك وبنظر الاخرين متهم ومحكوم عليه بالاعدام تعلمين يالحبيبه لي أكثر من 11 سنه مع زوجي لم أعش معه يوما جميلاً والان بدا يعدل حساباته ويسعى بكل جهده لاسعادي فجميل ان تكوني عشت تلك اللحظات الجميله خلال السنوات القليله تلك والاكيد هناك الكثير لديك من تلك اللحظات لدي الكثير يالحبيبه لكن دعينا نسير بخطوات وكل خطوه لها حديث وتذكر ي الاستغفار ورددي اللهم اجرني بمصيبتي واخلف لي خيراً منها واقري سورة البقره كل ليله بعد كل صلاة خمس صفحات للتمكنين من تختميها قبل النوم فان كانت عين حلت بكم او سؤ فسيصرفه الله عنكم بحوله وقوته الله يوفقك ويكتب لك الخير وين ماكنت ويفرجهمك ويفتح على بصايرك ويهدي زوجك ويفتح على بصايره ويحنن قلبه عليك |
اقتباس:
|
اختي و غاليتي ام فهد قرأت ردك على اختي ليتني اسلى..و اعرف انه لا دخل لي..
و لكن تقطع قلبي لما قرأت... و الله ليس بيدي سوى التخفيف عنك..و الدعاء لك..و السؤال عليك. ان شاء الله تكوني و اولادك بافضل حال... و الله يفرجها عليكم..و يحننه عليكم |
والله ياأم فهد انا حالتي اسوأ من حااالتك بمراحل واعلم معنى الشراب من كأس المر والصبر لكن الله يختار لك الصالح ويكفيك شر الناس ويحفظ لك فهد وأخوه أو أخته..
بانتظار تطمنيني بالفرج.. |
cutiepie >>> الله يسعدك ياقلبي انتي ... وبالعكس يالغاليه تمونين ... أصلا ً أنا أتمنى هالشيء عشان تكونين معاي خطوة ...بخطوة
تقبل الله دعائك ... وفرج همك وهم زوجك انه على ذلك قدير saapna>>>> لله لا يضيع لي ولا لك تعب ... ويجزاك على صبرك كل الخير ... تقبل الله دعائك الطيب ... وبإذن الله ماراح يصير الا كل خير ... مدام انه من رب العالمين .. |
ام فهد انت ودك يرسل ورقتك لك ؟
اذا ودك فخليك على ماانت عليه ياقلبي اذا ماودك فتخيلي دق الباب الان وفتحتي ووجدتي ظرف ابيض وفتحتيه واذا به مكتوب طااااااالق بالثلاث احب اذكرك ان هناك جاره وهي ساس البلا حطيها ببالك عمر الجاره ماتكون اخت مجربه وحده فوقي ووحده تحتي اذا تبين اقص عليك بعض مكرهن تفضلي بالخاص اقهويك هناك ام فهد فتشي عن السبب ليش يصرف على زوجته الاخرى وانت لا ربما سمعك بالهاتف قلتي شي او ربما فتحتي قلبك لوحده توقعتيها اخت وهي الله العالم في جرح بداخل زوجك من خلاله يعاملك بهالطريقه بعدين ذكرت انه يعدل بينكم بمعنى انه كما ضربك فقد ضربها يعني مو هي معززه وانت لا تقولين دمعته نزلت لانكم بالشهور الاولى طب ياقلبي اللي يبكي زوجته باول يوم تدخل بيتها فيه يقوله تزوجتك علشان ابغى الخلفه وحطي الكلام هذا في بالك . انت يا ام فهد ماتبين تستسلمين وتسلمين لكل شي عندك له تفسير مغاير يعني تتعرفين انه يحبك لكن دموعه مو محبه طيب انت استخرتي الله وتستغفرين وتقومين بالثلث الاخير تدعين الله والا لا ؟ سؤال يا حياتي يعني تتوقعين ايش يسوي اذا ارسلتي له مسج ؟ |
اقتباس:
وإحتمل يرد لي برد قوي مثل توك تذكرين لكن أنا راح أوريك ..أو والله لأخليك تندمين على اللي سويتيه ... وخليك عند أهلك وشوفي وش راح يصير ...ومن هالكلام ... (يعني كله حرب نفسيّه) أنا في غنى عنها وعن التوتر الي ممكن يجيني بسببها .. ملاحظه : أمس جتني خبريه(زوجته موصلتها لشغالتي ومعروف السبب!!) انه هالفترة يجدد جوازات زوجته وعياله عشان بيسافرون بالصيف ... طبعا ً هذه ردة فعل معروفه وطبيعيه من قبل زوجي الكريم ...رساله يبي يوضح فيها اني مبسوط ... ويبي يقهرني لما أشوف إهتمامه بزوجته ...مع إني أعرف انه مراح يستانس ولا صفر% ... بس جكارة رجال!! آه بس ... قولي آمين ... الله ينصرك على من عاداك ... الله يجبر بكسرك ويفك لك أي ضيقه ويفرج لك كل هم وييسر لك أمورك كلها ... ويسخر لك زوجك .. ويجعله يشوفك جوهرة بين عيونه.. ولؤلؤة بين سنونه ... كلامي معاك ليتني أسلى يريحني الله يريحك دنيا وآخره .. ويغفر لك ولوالديك |
اختي ام فهد من كلامك لاختي ليتني اسلى..
اكتشفت ان زوجك يحط فيك حرته من زوجته الاولى.. كمثل اسد علىَ و في الحروب نعامة..(اعذريني على المثل لكن هذا الذي ورد الى ذهني) و يمكن من النوع اللي يحب انه تكون فيه مشاكل بينك و بين ضرتك.. و الله اعلم.. و عندي سؤال هل كان غرضة من الزواج بك مادي اي لمساعدة من الناحية المادية ؟؟ (لست مضطرة للاجابة عليه اذا لم تريدي الاجابة) ام هل المادة تلعب دورا اساسيا في حياتكم.. و فرج الله همك..و اسعدك..وحنن قلبه عليكم..و قر عينك بصلاح فهد و اخوه و اسعدك الله اختي ليتني اسلى ..و جعلك قرة عين لزوجك..و يسر لك امرك..و كفاكم شر الحاسدين و اعذريني اذا كانت مشاركتي ثقيله عليك..و لكن و الله حبا فيك..ومحاولة اصلاح ما يمكن اصلاحه..و ايجاد السبل..كي لا يكون للندم طريق.. |
اقتباس:
رغم اني الاولى الان لكن زوجي يحط حرته من زوجته الثانيه فيني وانت يالحبيبه ام فهد حرمته منكده عليه بسبتك واكيد تعايره فيك وحاسه بحبه لك بل وترى الفرق في تعاملك له ولنا باخوة يوسف عليه السلام عبر فيقوم بفعل ما قالت الحبيبه كيوتي عنه كيوتي لك كل التقدير يالحبيبه الله يقر عينك بالذريه الصالحه عاجلا غير اجلا وينولك كل ماتتمنينه ويسعدك دنيا واخره ام فهد ورااااااك والزمن طويل |
اختي الغالية ليتني اسلى شاكرة لك دعمك وجهه نظري..
و بانتظارك غاليتي ام فهد |
اقتباس:
والله لا يجيب ندم ... بس لازم يحس اني ممكن أستغني عنه ...لازم أحسسه بقيمتي وقدري ... لازم أعطيه صفعه قويه تبين له من أم فهد ... |
اقتباس:
|
حبيبتي ام فهد..و الgه اني معك..(مو تقولين لزقة) لكن حاسة فيك..
هل تحسين انه حس بغيابك..و انت في بيت اهلك.. او زي اللي مو فارقة معه ؟؟ و الله يسعدك دنيا و اخره |
أم فهد حبابه استخيري ثم استخيري ثم استخيري.. ادرسي وضعك من والى..واجعلي فتره البعد فتره راحه واسترخاء واعاده لدراسه حياتك معه من جميع الزوايا ..وان شاء الله موفقه فيما تختارين.. ويخلي لك فهد وأخوه..
|
اقتباس:
شوفي حبيبتي ... زوجي فيه كِبر عظيييييم وغرور ماشفته بأحد ... .. يعني هو لو ميت من كثر شوقه لي ... مستحيل يبين شوقه أو ضعفه ...مستحيييل!! وممكن يدوس على قلبه بس ما يبين انه متعلق او يحب احد ... يعني راح يبين انه مو فارقه معاه ... واذا لاحظتي في ردي لـ ليتني أسلى بتعرفين انه قاعد يجهز للسفر في الصيف مع زوجته الأولى ويجدد جوازاتهم ... مع انه مايستانس معاها بالسفر وهذا الأمر متأكده منه مية % بصراحه انا من النوع اللي الواحد يحب يسافر معاه ... هو بنفسه قالها ..ماعندي مشكله بالسكن أهم شيء النظافه ... ما أنام ...يعني 4 ساعات كفايه.. ومن اول السفره لآخرها بس أضحك .. لأني أحب بل أعشق السفر ...هذا غير انه ماعندي الا 2 الله يحفظهم من كل شر ...اما هي ... فعندها خمسه ماشاء الله وأكبرهم مادخل أولى ابتدائي!! يعني قمة الأزعاج ... وانا عارفه هذا كله ليه ؟؟ عشان يأدبني ويعطيني درس ويخليني أتحسف .. بمعنى ثاني اسلوبه قذر ... يقهرني في زوجته .. ويقهرها فيني !!! ياحبيبتي انتِ ... أشكر إحساسك ودعائك الطيب عسى ربي يتقبله منك .. ويفرج لك ولزوجك آمين... |
اقتباس:
ياقلبي انت ِ ... الله يسعدك ويوفقك ... بصراحه وقفت عن الأستخاره ودراسة الموضوع ...لأني من قبل ماأجي لأهلي وانا مستخيره ومستشيره ... وتوكلت على الله .. أنا الآن في طور ... الأنتظار ....والدعاء فقط !! وعشان أوضح لك أكثر .. أنا دائماً أسأل نفسي : أنا وش مستفيده منه كزوج ؟؟؟ بصراحه .... ولا شيء!!!!!! جزاك الله خير والله يتقبل منك ان شاء الله ... |
حبيبتي ام فهد..
اجل على كذا ...تدرين خليه يسافر معها..عشان يحس بالفرق... الدرس هو اللي رح يتعلم منه..مو انت.. و يصير ممن ينطبق عليهم المثل (ما تعرف قديري الا لما تجرب غيري) و ما شاء الله عليك لاقوة الا بالله اصلا مبين من اسلوبك انك من الناس المرحة و البشوشة اللي الواحد ينبسط بالجلسة معهم.. و اللي تعاملهم راقِ و الله يحفظ لك عيالك و يصلحهم..و يخليك لاهلك و يخليك لهم و اذا حصل لك انك تغيرين جو روحي انت و اهلك اي مكان خارج المملكة او داخلها.. عشان تصفين ذهنك..وكمان فهد و اخوه يغيرون جو.. |
اقتباس:
وسفرته معاها والله ماهمتني ... الحمد لله .. مدام أنا بخير وببيت يسوده الحب والأحترام ..وأهم شيء عيالي بحضني كل شيء يهون بعيني .. بعدين حتى أنا بأسافر مع أهلي بالصيف ان شاء الله ...( محدش أحسن من حد :d ) وعسى ربي يتقبل منك ... ويرزقك الذرية الصالحه عاجلا ً غير آجل ... بس وانتي هنا ... بين أهلك وأحبابك.. |
حاسه فيك لأني تماما في مثل وضعك من أشهر... فيه مثل يقول مايحس بالجمره الا اللي مكتوي بها.. بس سؤال أولادك الله يحفظهم كم أعمارهم..بعد ماتقولي لي راح أجاوبك ليه سألتك عنهم...في انتظارك حبوبه..
|
اقتباس:
أولادي حبيبتي وعسي ربي يخليهم لي ويطول بأعمارهم واحد بقى له شهرين ويتم 4 سنوات:18: والثاني عمره سنتين ...:15: والآن أنا اللي في أنتظارك ياقلبي ... |
هلا ام فهد عزيزتي الكبير الله يحفظه يفهم هو في عمر ابني الكبير..طيب اذا لاسمح الله اتخذت قرار الأنفصال لازم تروحين للطبيبه النفسيه وتخلينها تفهمك الخطوات العلميه الصحيحه لمعالجه الوضع مع الأولاد.. لأن الطلاق يكون وضعه أقسى على الطفل من الكبير يعني فجأه كان مع امه وابوه وفجأه يتغير الوضع والحال غير الحال.. انتبهي لهذه النقطه الله يسعدك..
والله يختار لك اللي فيه الصالح لك ولأولادك.. لي عوده للأطمئنان عليك.. |
أم فهد كلامك باللون الازرق كزرقة البحر وصفاء السماء
وكلامي باللون الاخضر كزرعاّ أبى أن يثمر معك [align=center][table1="width:95%;"] [align=center] | [/table1][/align]خليني أقول 70% .... إيه ! والـــ 30% ؟ فتخيلي دق الباب الان وفتحتي ووجدتي ظرف ابيض وفتحتيه واذا به مكتوب طااااااالق بالثلاث قضاء الله وقدره ... وخيره من رب العالمين ... قضاء الله وقدره اذا جاء منه مو بطلب منك ياقلبي أو بتصرف منك يدفعه لذلك يا حبيبتي غزوة أحد هزم الكفار المسلمين فأنزل الله الايات يعاتبهم أنهم لم يستمعوا لنصيحة الرسول عليه السلام وهو قضاء الله وقدره فهل عافاهم الله من العتاب واللوم ناهيك عن ما اصابهم من ضرر وقتل نتيجة عدم سماع النصيحه احب اذكرك ان هناك جاره وهي ساس البلا والله مدري ؟؟ ..... اللي أقدر أقوله الله يعطيها على قد نيتها ان خيرا ً فخير ... وان شرا ً فشر يوووووووه للحين ماتدرين متى ان شاء الله بتدرين يعني لو كان ممكن ان مشاعر الجارات تصير اخويه كان الله ماحرم الجمع بين الاختين والبنت وخالتها وعمتها ولنا في زوجات الرسول الامثال الحيه والادله القرانيه واللاحاديث ام فهد فتشي عن السبب ليش يصرف على زوجته الاخرى وانت لا لأني موظفه وهي لأ ... لأنه طلب مني آخذ له قرض وبدون ضمانات ... ورفضت! والله اثرك قويه ومنتيب بسهله تدرين مو حلو تبينين لزوجك انك قويه ترى يزهد فيك ويحجر عليك ممكن ترفضين باسلوب ماكر وذكي لايشعره انه رفض منك بينما لاتنفذين طلبه ويمكن هذا نقطه تهم زوجك وتزوج لانه يبحث عنها فيك قلت له :أختك لما احتجتوا اخذت لكم قرض ماأخذت لزوجها ... بكل برود قال ليتك تجين ربع أختي ولو سمحتي لاتقارنين نفسك فيها !!!!!!!!!!! لا لا لا وخطيره كمان يا ام فهودي ويلي منك ويل جبتي العيد ياحبي لك ... والله ضحكتيني الله يسعدك ! طيب ولأمور الثانيه ؟؟؟ أغفلتيها؟؟ عموماً ..انا ضربني مرة وحده ... وهي يضربها دائما ً الشهاده لله .... بس مع ذلك ماخذه حقها .. تسبه وتلعن أهله .. وصلت فيها انها تجي من السفر وتمشي قدامهم بدون ماتسلم عليهم ومع ذلك يزعل منها فترة وبعدين يراضيها... لان عندها اسلحه مهيب عندك يمكن انت ماتبكين قدامه وتمكرين مكرها وتستضعفين عنده وأنا اللي عمري ماقلتله لا ... والله وربي يشهد على كلامي ان أمه وخواته حاطتهم فوق راسي وعازتهم ومع ذلك ماأشوف منه تقدير لهالشيء ...!! لان مو هذا اللي يريده زوجك فيه شفرات يمكن ماتمكنتي من فتحها وحقيقه 5 سنوات على مااعتقد عمر زواجكم ليست كفيله للتفاهم والتقارب انت يا ام فهد ماتبين تستسلمين وتسلمين لكل شي عندك له تفسير مغاير يعني تتعرفين انه يحبك لكن دموعه مو محبه كااااااااااانت محبه!! ... هو بنفسه قالي معد أحبك مثل أول وبسبب تصرفاتي اللي في نظره شينه! يعني ليه يسبني وأزعل .. ليه أنسى أحط غرض كان يبيه؟ ..و.. أشياء سخيفه... واللي يشهد علي ربي اني ماسويت شيء كبير .... اذا حقي مقدر أطالب فيه !! يختي يدلل عليك مو حاصله وحده تدلله وتهتم فيه انت شوفي الاطفال طفل اعطيه ملابسه قوليله البس وطفل لبسيه انت بنفسك شوفي الفرق طيب انت استخرتي الله وتستغفرين وتقومين بالثلث الاخير تدعين الله والا لا ؟ انا قبل ماأجي لأهلي كنت أقرأ سورة البقره كامله وبعدها أستخير ... هذا لمدة شهر كامل لما جيت وقفت الأستخاره لأني توكلت على الله وقررت ... يا اهلين والله ايش الحكي هذا ام فهودي يعني الاستخاره مو توكل على الله ؟ انت تستخيرين من ؟مو الله تبارك وتعالى انت تدرين عثمان رضي الله عنه يوم قرر يجمع القران كم مره يوم قعد يستخير الله تعالى نحو اربعين يوم ياقلبي لجمع قران يعني عمل لا مشكوك في نفعه الاستخاره تطرح البركه وتريح قلبك مو بس للاستخاره ذاتها ان شر او خير وتحببك بالشخص اذا خير لك وتنفرك فيه اذا العكس الدعاء ... إي والله أدعي ... بس مو له ولا عليه ! أدعي ان الله يدبرأمري من عنده لأنه هو وحده عالم بضعف قوتي وقلة حيلتي .. أدعي ان الله يكفيني شره بما شاء.. أدعي ان الله يحفظ لي عيالي وما يفرق بينّا أبد ..أبد والحمد لله الوتر من قبل ماأتزوج وأنا حريصه عليه ... زيدي هذا الله يهديه ويفتح على بصايره ويسخره لي ولعيالي وللحق اذا كان كزوج لايعنيك فلا تنسين ان اب لاولادك وصلاحه وطلاحه مردها لاولادك ولاتنسين مو خسرانه لادعيتي لاخو مسلم فالملائكه تقولك ولك مثله يعني تتوقعين ايش يسوي اذا ارسلتي له مسج ؟ إحتمال يطنش... وإحتمل يرد لي برد قوي مثل توك تذكرين لكن أنا راح أوريك ..أو والله لأخليك تندمين على اللي سويتيه ... وخليك عند أهلك وشوفي وش راح يصير ...ومن هالكلام ... طيب مانختلف انا قلت لك قبل لاتسوين شي استخيري الله تعالى ماعندك ثقه بردة فعله ولا بنصحي خلي عندك ثقه بمن استخرتيه ام فهد ترى بزعل اذا ما استخرتي بنية ارسال رساله له وبعدين عادي خليه يطنش يعني مو بيطلق ماراح تكون اعظم مراره من الطلاق (يعني كله حرب نفسيّه) أنا في غنى عنها وعن التوتر الي ممكن يجيني بسببها .. والطلاق وشو حبيبتي ؟ راحه نفسيه من جد راح تعيشين حروب داحس والغبراء تخيلي لااخذهم منك وقت اجازه والا غيره وحرمك صوتهم والا لاكلموك وهم يبكون يا متالمين او مرضانين او معتدين عليهم اخوانهم او ابوهم بالظرب والا لاقالك واحد فيهم ابغى اجيك ياماما وقعد يبكي وطبعا كله بمزاج ابوهم مو بمزاج امهم اللي رفضتني ويبدا ينتقم منك بعيالك وراح ينسى انهم اولاده وماراح يذكر الا جرحك له بطلبك الطلاق و شوفي انت لاعاشوا مع جارتك وخلتهم خدم لعيالها والا لاضاق صدر واحد فيهم وتمنى صدرك يرتمي فيه ولا لقاك والا لالعبوا عليه عيال ابليس وظاعوا وانحرفوا هل بيفكر فيهم الا بيرميهم بالشارع ملاحظه : أمس جتني خبريه(زوجته موصلتها لشغالتي ومعروف السبب!!) انه هالفترة يجدد جوازات زوجته وعياله عشان بيسافرون بالصيف ... طبعا ً هذه ردة فعل معروفه وطبيعيه من قبل زوجي الكريم ...رساله يبي يوضح فيها اني مبسوط ... ويبي يقهرني لما أشوف إهتمامه بزوجته ...مع إني أعرف انه مراح يستانس ولا صفر% ... بس جكارة رجال!! ياقلبي تفكرين فيه اذا بيستانس والا لا شعليك منه خليه شيل هم نفسك ووضعك شفتي يبي يقهرك وطبيعي يقهرك بعد لا اخذ العيال بتشوفين الوان من القهر ترى ردة فعل طبيعيه لانك قهرتيه بجلوسك في بيت اهلك آه بس ... قولي آمين ... الله ينصرك على من عاداك ... الله يجبر بكسرك ويفك لك أي ضيقه ويفرج لك كل هم وييسر لك أمورك كلها ... ويسخر لك زوجك .. ويجعله يشوفك جوهرة بين عيونه.. ولؤلؤة بين سنونه ... كلامي معاك ليتني أسلى يريحني الله يريحك دنيا وآخره .. ويغفر لك ولوالديك [/align] اللهم آمين ياقلبي والله دعواتك الجمتني لكني مانسيتك من دعائي والله ماراح يخذلك ياقلبي وصدقيني لابد تشرق شمسك وتكونين الكل في الكل وسيعزك الله ان شاء عز مابعده عز بس احتسبي لوجهه الكريم |
اقتباس:
وفقك الله لما فيه الخير ... الله يحفظ لك عيالك ويقر عينك بهم .. |
اقتباس:
نصائحك حبيبتي ... على عيني وراسي ... وبجد .. ما تتصورين شكثر ممتنّه وشاكره لك وقفتك ..واصرارك.. الله لا يضيع لك تعب ولا يحرمك الأجر ... شوفي ليتني لسلى ... راح أقولك على سر ! أنا حتى لو طلبت الطلاق من زوجي ماراح يطلقني !! يمكن يتزوج عليّ عشان يأدبني ... يمكن يتركني فترة عند أهلي ... بس راح يرجع ! مدري هو إحساس ...أو معرفه بتركيبة زوجي الغريبه .. وتوقع لردة فعله .. بالأضافه الى ان امه مستحيل تخليه يطلقني !! عشان كذا أنا راح أقوله يطلقني ... بس ودي أعطيه درس ... أبيه يحس ... اذا طلبت الطلاق راح يجي هو وامه ووقتها راح أحط النقط على الحروووف ... وأقول وش اللي أبيه واللي ماأبيه ... بس اني جيتي للحق ....أنا عايفته ... طابت نفسي منه>>(على فكره هذه الجمله دائما ً يقولها لي) يعني أنا راح أجازف ... في كلتا الحالتين انا راضيه بالنتيجه ... ان رجعت فبشروط .... وان تطلقت فبراحه ! اما الأولاد .... فآآآآه منهم ... هم اللي كاسرين ظهري! وعلى قولتك .. متوقعه منه أنواع النذاله ... اذا تذكرين في بداية عرضي للمشكله قلت انه ضربني وطردني من البيت وقفل على عيالي بالغرفه ... وحرمهم انهم يروحون عند أختي وكلم أخوه (زوج أختي) وقال له بالحرف الواحد مالها دخل بعيالي ولو دخلوا شقتكم ماراح تشوفون خير!! وهذا كله لأنه عرف انهم كلموني بالتليفون ... من عندها ! الله المستعان بس ... اما بالنسبه للشفرات ... فكيف ؟؟ ووشلون اتعامل معاه؟ اذا زوجته قويه وترد له الكلمه بكلمتين ... وانا مسالمه وماأرد عليه الا الله يهديك ويصلحك او الله يسامحك ! لا قوه نافعه ولا ضعف نافع!! هو يبي العالم يمشون على كيفه !! يبي يمشيني بريموت كنترول!! إجلسي أجلس.. قومي أقوم ..نامي أنام ... أسكتي أسكت ...أضحكي أضحك لو انا في قمة التعب!! يعني أهم ماعليه راحته وبس ... أما أنا فما فيه أدنى تفكير بإحساسي ولا راحتي!! ياويلي اذا نمت قبله ... قالي بنفسه عندك وقت قبل ماأجي نامي فيه ... نمت ...هزئني!!! أي حياة هذي ؟؟ والله ومالك علي يمين اني اذا سمعت صوته مافيه ذكر ولا قرآن ولا آيه الا أقولها قبل مايدخل!! حياة كلها توتر وخوف!! مدري وش أقول بعد ... وبالنسبه للرفض .. ترى والله رفضت بكل أدب .. بس هو من كثر عنجهيته وغروره مو متعود ان احد يقوله لا أبدا ً ...وهذا اللي جرح كبرياءه مالت عليه !! قلت له بس أخلص من عملية الزراعه حقت أمي من عيوني آخذ لك قرض... واذا مافيك تنتظر راح أدخل جمعيات لعيونك حبيبي ... واذا مو عاجبك بعد أنا كل قرضي مية الف راح أعطيك 40 وامي 60! وكمان رفض!!! مو فاهم انها أمي .... أمي ياناس بين الحياة والموت .. ومع ذلك مو مقدر وانا ماقصرت!!!! والله لو واحد غيره كان قال لا والله امك ابدأ ..أو رضي بالجمعيه او الأربعين ... بس هذا لأ!! ووالله انه مو محتااااج ....اذا البيت اللي ساكنين فيه مكلف تقريبا ً مليونين ريال !!! لكن الله الله على الظالم والمتجبر ... وعشان خاطر عيونك وتعبك ... عشان خاطر وقفتك ... وخجلي منك يالغاليه ... ولأني مااقدر على زعل أخت عزيزة مثلك راح أستخير وراح أدعي ... وراح أدعي له ... وعسى الله يكتب اللي فيه الخير ... الله يوفقك ويرزقك من حيث لا تحتسبين .. ويشرح صدرك ويسعدك دنيا وآخره ومن تحبين ... |
[align=center][table1="width:95%;"]
[align=center]ام فهد يالحبيبه | [/table1][/align]نصيحه من محبه لك الرجال لاتأمنين جانبهم وتقولين انا أعرفه انا أفهمه ماراح يفعل ولا راح يقول لي قريبه كنت دايم احذرها ان تهتم بزوجها فقلت لها ترى بيتزوج عليك كانت تضحك وتسخر منه تقول هذا مسكينه مايقدر يعيش من دوني ولايتجرأ يتزوج علي وهو ابن عمها وبالفعل صكها بوحده وطلقها يا قلبي لو استفزه احد اصحابه من الحساد وقاله انت لست رجال تخليها تسوي كيذا انتبه لاتفكر تراضيها اتركها في بيت اهلها والا لو انك رجال اسحب عيالك منها هذه مو كفو والا لاطعنته زوجته بكلمه ايش تبغى بوحده رمتك وراحت بالله تتوقعين بيفكر يرجعلك واذا رجعك تتوقعين كيف معاملته لك يلي فشلتيه واهنتيه وخليتيه فرجه ولا جبرتيه يراضيك والله يا ام فهد تتمنين انه يرجع بس مثل اول وتقولين ياليت اللي كان ماجرى اذكر زوجي يوم ظربني ورماني بيت اهلي والكل شاهد انه غلطان ماتركوه بحاله واخبرني انهم عرضوا عليه كثير من النساء بشرط يطلقني يعني تخيلي هو معتدي وطاردني لعبوا بحسبته فمابالك انت خرجتي بهواك بصرف النظر عن المسببات بعدين اذا بتربينه وتعطينه درس مو هالوقت وقت دروس ياقلبي انتهزي اذا مد يده اذا سوى مشكله كايده وعلى اثرها خذي عفشك واطلعي بعدها ممكن تعلمينه ترى يا ام فهد الرجل اذا غلط ينصدم من ردة فعل زوجته يتوقعها بتنسى ويتوقع انه ماسوى شي ابد ويفاجا ايش فيها هذه راحت وتركت بيتها وتركتني ماتحمد ربها اني تزوجتها حبيت بس انورك من هالنقطه يالغاليه لتتصرفين بحكمه [/align] |
متابعه لكل تطورات حياتك وأدعو لكى يا حبيبتى بصلاح الأمور
|
الله يفرج همك ويكتب لك الخير وين ماكان ياأم الطاحوس
ماشاء الله مابعد كلام الأخت ليتني أسلى كلام فقد وفت وكفت |
اقتباس:
بس الآن ماعاد فيه مجال للتراجع نهائيا ً ... واذا فيه أحد بيعبي راسه فبيستغل الفرصه سواء زعلانه بشء كايد او لا !! بعدين حياتي كلها (شيء كايد) .... !! والله مدري وش أقولك .. عموماً خط الرجعه مسكر ومليان مطبات ... مافيه الآن الا الدعاء .. والأستخاره كما نصحتيني ... والله يرزقني الخيره من أمري.. جزاك الله كل خير حبيبتي .. فتحتي عيوني على عدة امور اسأل الله ان يجعلها في ميزان حسناتك .. ويرزقك ماتتمنين ويسعدك .. والبيت بيتك انت وام حمودي .. تمونون :d |
sa33 .. شكرا ً لأهتمامك حبيبتي .. وجزاك الله خيرا ً
روز السعودية .. الله يتقبل منك ويرزقك ماتتمنين ,, وكلام ليتني اسلى مابعده كلام الله يوفقها دنيا وآخره |
غاليتي ام فهد...الله يسهل امرك و يرزقك فوق ما تتصورين .و يكتبلك مافيه الخير و الصالح..
|
اقتباس:
نسال الله العظيم ان يخيرك الخيره المباركه يغـــــــــــــلق بانتظار مستجدات تبشرنا بالخير اختي ام فهد |
| الساعة الآن 04:53 AM. |
Powered by vBulletin® Version 3.8.12 by vBS
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©