|
اقتباس:
أخي الفاضل الله يوفقك ويجزيك عني كل خير..ويجعل نصايحك لي في ميزان حسناتك. مسالة زواجي من غير سعودي جات من الله بطبيعتها.. وانا ما اعترضت لأن زوجي من يوم عمره 22 سنة تقريبا وهو هنا بالسعودية...وتطبع بالعادات والتقاليد السعودية..وهو من جنسية عربية.. لو شفته ماتقول إنه غير سعودي.من هذا الجانب نحن متوافقين ماعندنا مشكلة ولله الحمد.. سألنا عنه في مكان عمله لانه من يوم جا السعودية لحد الآن وهو شغال بنفس العمل وهي مؤسسة كبرى معروفة..بالإضافة للزملاء والجيران والأصدقاء.. وبهذا الخصوص عندي تعليق بسيط ((وهو إني متخالعة من زواج سابق من رجل قبيلي له أهل وناس ووالدي الله يغفر له ويرحمه طلع بنفسه لعمله ولجيرانه وسأل عنه الكل أثنى عليه..طلعوا هو وأهله الله لا يبتلي مسلم ولا مسلمة بأمثالهم.. انا وبنتي مازلنا حتى هذه اللحظة نتجرع مرارة ذلك الزواج.. كان قدر ومكتوب والمكتوب ياخوي مامنه هروب... قول لي ياخوي وش أخذت من السعودي اللي تزوجته؟؟؟ الحمد لله.. كل شئ بتقدير الله..الله كله خير ياخوي الله يحفظك..زوجي مصلي مو مدخن أخلاقه طيبة إن شاء الله .الله لا يفجعني فيه .. .لكن فيه بخل وهذه صفة شينة الرسول عليه الصلاة والسلام تعوذ منها..انا كنت ملاحظة هذا الشي عليه وأحد الاخوان أشار لوجود هذه الصفة بزوجي.. أنا ما أقول لك إني إن شاء الله بغيرها فيه لانه مستحيل ..راح أسعى وأبذل جهدي إنه يتحسن.وربي يعطيني أحسن من نيتي.. وموب بس انا اتصور اغلب الرجال نفس الشي، يعني من الطبيعي ان الزوج هو اللي يصرف على زوجته مهما بلغ ثرائها، ففلوس الزوجه لها، وتتصرف فيها على كيفها(طبعا مع رضى الزوج)... عندي مداخلة بسيطة على هذا الكلام وأرجوا تتقبله مني برحابة صدر.. إذا إنت متزوج ياخوي فما يكون مثل هذا الكلام إلا من رجل زوجته غير عاملة.. وغير ذلك حالات نادرة.. ليت تسوي استبانة على النساء العاملات وشوف وين تروح رواتبهن؟؟؟؟ ما أبي افتح هنا موضوع للنقاش غير موضوعي.. أنا على يقين تام تام تام.. لو تزوجت رجل مقتدر ماليا راح أصرف وهذا أمر مفروغ منه. من هذا المنطلق ما مانعت في مساندة رجل يحتاج إلى مساندتي.. بدل ما أصرف من جيبي وزوجي عنده ويبخل علي فيصير القهر قهرين .. لكن المهم والأهم عندي إنه مايستغلني.. هذا تفكيري ..وجهوني وانصحوني.. وطلبك اللي طلبته ياخوي ما أقدر أنفذه اطلاقا والدي الله يغفر له ويرحمه ويسكنه في عليين ملكلي علي زوجي ..وبعدها بأقل من ثلاث أسابيع توفي..أعمامي متوفيين الله يرحمهم وأخوالي بعيييييد .. وما عندي اخوان.. يعني مالي بعد الله غير هذا الرجل في هذه الدنيا.. أنا نفذت وصية احد الاخوان شريت أغراض مالها داعي لي ولبنتي غالية..وماحسيت إنه زعل اطلاقا.. الله يكتب لي ولكم كل خير ويصرف عني وعنكم كل أذى وسوء ومكره... ادعوا لي دعاء المسلم لاخوه السلم مستجاب لعل فيكم احد مجاب الدعوة.. |
اختي الكريمة
سأحدثك كرجل له نفس التجربة تقريباً حيث ان زواجي كان من امرأة عاملة . اتمنى ان لاتقعي في نفس الهفوات التي وقعت انا بها .. وارجوا ان تلاحظي التالي : اولاً /انا في نفس موقف زوجك الكريم تقريباً ..وكنت بحاجة فعلاً الى بعض السيولة المالية للزواج . ثانياً / زوجتي امرأة كريمة النفس وسخية مثلك وتبحث عن السعادة بعد تجربة مريرة . ثالثاً / يدفعنا الحب جميعاً لتذليل العقبات . والآن ارجوا ان تصغي جيداً للنتائج التي حدثت بعد الزواج . - تم بحمد الله زواجنا ولكن بعد (توثيق) لكل قرش اخذته من زوجتي وذلك انطلاقاً من قوله تعالى (ياايها الذين آمنوا اذا تداينتم بدين الى اجل مسمى فأكتبوه) سورة البقرة . - تم تحديد مدة اعادة المبلغ (وتم اعادته جميعاً ولله الحمد) . - ابتعدنا نهائياً عن اي ذكر للموضوع حتى لانثير الحساسيات التي لا داعي لها . - تزوجنا وحققنا مانريد . ولكن لكي اكون صادقاً معك اختي الكريمة ..فأنا قد ندمت اشد الندم على تسرعي بالزواج عن طريق الاستدانة من زوجتي لأن في هذا الامر حساسية بالغة كانت من الممكن ان تؤدي الى مالايحمد عقباه . نصيحتي لك في حالتك التي قراتها بين السطور : - وثقي وسجلي ديونه لك واجعلي ذلك موثقاً ورسمياً وذلك للحفاظ على مالك . - لاتتعجلي بالزواج قبل ان يعود اليك مالك كاملاً .(هام جداً) - خذي وقتاً كافياً لمعرفة هذا الرجل عن كثب . - اكتبي السيارة بأسمك حتى ولو كانت معه. - انتظري قرض عمله .فهو الرجل المسئول عن توفير الحياة الزوجية لك ولإبنتك . - اذا تزوجته ..فأوصيك خيراً في ابنائه. اقول لك هذا عن تجربة وفقك الله |
اقتباس:
سلمت يمناك وجزاك الله كل خير |
اختي الكريمة أصغرهم،
لين قالوا هذا قبيلي وانا رجال قبيلي، ما تعني ان الواحد خالي من العيوب كلنا بشر وكلنا مليانين عيوب، وكل العوائل والقبايل وكل الدول فيهم الصالح والطالح، بعض النظر من اي بلد ينتمون... انا اللي اقصده ومعليش اسمحوا لي على صراحتي، اختي الانسان ما يرده عن الردى(الغلط) الا ثلاث اشياء: - التربية اللي تربي عليها. - مدى تدين الشخص. - اصل الواحد ونسبة. بعدين اختي تقولين لي اني انا ما تزوجت، وهذا صحيح، لكن الحمد لله ما اعرف احد من اقربائي تصرف عليه حرمه، بغض النظر عن مستوى معيشتهم. وانا اختي ما علي من الناس لاننا صرنا في زمان الله لا يبلانا بس، الرجال اللي يخلي زوجته تصرف عليه هذا مع احترامي للجميع مهوب رجال، ما يخالف تساعد في مصروف البيت ما فيها شي، لكن ان المره تصرف عليه وتشتري له كل شي وهو راضي و يتفرج ولا يزعل ولا يتضايق معليش هذا ما انصحكي بالارتباط فيه... بعدين انتي تقولين زوجكي بخيل، ترا البخل عيب كبير، صح بما انكي انت اللي تصرفين عليه بيخف هالعيب شوي، لكن تراه يظل مشكلة كبيرة لازم تفكرين فيها... اختي انتي تقولين ان الوالد الله يرحمه ويغفر له ويسكنه فسيح جناته متوفي، ولا لكي عمان وخوالكي لو اختي والله لا يقوله صارت بينكم مشكلة ترا مالكي ولي، يعني البنت في حالتكي تدور على زوج من عائلة معروفه لو سمح الله قصر في حقوقها ولا ظلمها ترجع لهم ويصيرون لها سند، واختي الناس الاجاويد ما يرضون بالغلط حتى على عيالهم... انصحكي اختي انكي لاتستعجلين، وانا مثل ما قلت لكي انتي ما تعرفين عن الرجال غير اللي يقوله لكي، انتي ما تعرفين وش علاقته باهله ومنهم اهله، ما تدرين هو وش كان يسوي من قبل لا يجي للسعودية... وانا ترا ما رديت عليكي الا والله ابي لكي الخير، وتراني ما اعرف ابن الحلال او تحسبيني جالس ادور له عذاريب، لكن ابي اوضح لكي اشياء يمكن تكونين غافلة عنها.. على العموم اختي الله يوفقي ان شاء الله، ولا يخيب ظنكي في زوجكي، والله يهنيكم ويسخركم لبعض... ------------------------------------------------------------------------------------------------------------------- |
اقتباس:
اقتباس:
الف مبروك الله يارب يكتب لك السعااااده ويووفقك ... لكن ترى الرجل الرجل ماياخذ قرش من حرمته حتى لو كان ماكان لا تستعجلي وتعطي فلوسك بدون مقااابل ... انا اعرف ان الخير فيه ... لكن ترى الرجال يطمعوووون يعنى وحده فاتحه فلوسها سبيل ... ليه ما اخذ منهااا لا تخلينه ياخذك بسهوله ويرميك بسهوله ... هو الرجل مو انتى حلو انكم تتعاونون وتتصافون .. لكن مو حلو يكون كل شي عليك اثاث بيت زواج سيارة ؟؟ ويش خليتي بالله ؟؟؟ ترى الرجل كذاااااااااااا مايحس برجولته ابداً ... ويحس انه طاح في وحده هبلا تصرف عليه بدون مقااابل اذا فيه شي ضروري مرره مرره مررره مررره مررره ادفعي ونسبه بسيطه مو كل شي عليك ترى بكرة يقول لك اكفلي اخواني وعيال عمي .. وسحب من الخيرررر انا مو ضد الخير والعطيه لكن كذا انتى تسحبين رجولته منه .. وتخلينه يحس انه طايح على وحده هبلا .. ماتحسب للقرش حساااب وهالشي تخليه يفكر كيف يتحايل عليك ترى الحياة مو سهله .. واذا يبغا شي لزم يتعب لا تحني عليه ترى انتى كذاا تخلينه عدوو لكي .. اعطيه لكن مو كل شي عليك ... صراحه انا انصدمت اثاث سيارة زواج ... مابقي غير مصروف وتصيري امه مو زوجته الله يووفقك وويسر امرك ... |
اولا ربي يوفقك و يختارلك كل خير اختي الفاضلة لا تزعلي مني بس ممكن من باب المساعدة كل ما سويتيه ولكن النفقة على الزوج هذا اللي اعرفه السيارة هو المفروض يجيبها لو صبرتي عليه حتى ياخذ القرض ولا اديتيه الفلوس الشقة المفروض هو اللي يسويها لانه كذا ممكن يتعود وراح تتعبي معاه ممكن يكون قصده من الزواج زوجه تصرف عليه و ............. لا تزعلي مني لو يحبك ويرتاح لك راح يسوي كل شئ بنفسه لو عودتيه كذا راح تتعبي معاه كلام اخوي ابو فراس النمري عين العقل وصدقيني عندما تسألي عن شخص في ناس لا يخافون الله ولا يتقونه ويمدحون وهو العكس اصبري و وثقي حقوقك حتى تعرفيه عن كثب ربي يوفقكم ويسعدكم ويستر عليه و يرزقك الزوج الصالح اللي يستر عليك |
انا مع كلام الاخ ابو فراس النمري كلامة صحيح 100% فخدي بكلامة والله الموفق
|
دعائي لك بالتوفيق وانا متابعة موضوعك
ان شاءالله يكتب لك كل خير من هذا الزواج ويبعد عنك كل شر منه يرجى كتابة لفظ ( إن شاء الله ) كما بين الأقواس .. الإشراف |
الشكر الجزيل لكل من شارك ونصح.. أبدل الله أحزانكم أفراح,,وجعل لكم من كل هم فرجا ومن كل ضيق مخرجا..وأصلحكم وأصلح ذريتكم ليوم الدين.. كتبني الله وإياكم من المقبولين في هذا الشهر الفضيل.. |
اقتباس:
أخي الفاضل وفقك الله وبارك فيك.. وجزاك عني خير الجزاء واحسنه لذكر تجربتك .. أريد أسال سؤال أرجوا ألا تفهمني غلط.. لم الحساسية من زوجة كريمة نفس سخية؟؟ في الوقت الذي انت بحاجة فيه إلى المال؟؟ الزوجين ستر وغطا على بعض أليس الاستدانة من زوجة بهذه الصفات أكرم وأشرف من الإستدانة من غيرها؟؟؟ مادمت اقتنعت بمبدأ الاستدانة منها وتم ذلك بالفعل..لماذا بدأت الحساسية بعد الزواج..؟ حضرت الفكرة بعد أن ذهبت السكرة؟؟؟ أخي: كان عندي زوجي فطلبت من زوجي توثيق الإتفاق الذي بيننا.. طبعا تفاجأ..واحمر وجهه..طبعا بعد منااااااااااااااااااقشاااااااااااااااااات حااااااااااااااااااااااااادة قال: ما أريد اخرب اللي بينك وبينك عشان الفلوس.. أوقع لك على اللي تبغيه.. ومع استمرار المناقشات اشتدت المعركة و حمي الوطيس ..تراجع فيها عن التوثيق وحجته ان هذا الطلب مو تفكيري وان عقله بدات تشتغل فيه الوساوس... وأنا أذله لأنه ما عنده فلوس وووو............... طبعا عشت حالة نفسية سيئة جدا وبكاء مرير وتحطمت تماما وبدأت تلعب الظنون بي أنا ايضا... المهم بعد أن ذهب من عندي وهدأ اتصل بي وقال لي إن كانت سعادتك تتوقف على هذه الورقة لك ما تريدين.. هذا اتفاقنا...أسأل الله العظيم رب العرش العظيم أن يكتب الخير ويصرف السوء.. هذا ملخص مادار بيني وبينه.. يالنسبة للنصائح الأخرى فلا استطيع تنفيذها لإن كل شي محدد .. أسأل الواحد الأحد ان يكتب لي ولكم سعادة الدارين.. بالنسبة لأبنائه هم في منزلة ابنتي بإذن الله.. |
| الساعة الآن 02:00 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©