شوف من وجة نظري انا شايفة الموضوع عشان انت مريت بظروف سيئة طول حياتك

ومافيش استقرار لا نفسي ولا عاطفي ولا كان في قبول ليك من اقرب الناس ليك وهم والديك

وماحدش (كناس عادية) قرب منك قرب حقيقي الا عشان سبب ما ..

وانت ذات نفسك كنت بتعوض النقص في شكلك او عدم استقرارك العاطفي بإن يكون عندك قوة ما

سواء بالبلطجة وسوء الاخلاق .. وده كان يتبعه انحلال (طبيعي مراهق ومالوش رابط)

او بإلنجاح والمال

وانت تعتقد من جواك ان انت مافيش فيك ميزة حقيقة تخلي حد يحبك لذاتك

شايف نفسك اسود من جوه .. واي حد في الدنيا بيحصله ده من اقرب الناس ليه (ابوه وامه) بيفضل ملازمه حتة ان انا فيا حاجة عشان كدا هما مش بيحبوني .. بيكره نفسه لإنه مش عارف ليه دول بالذات مش بيحبوه.. بيشوف نفسه بعنيهم .. ودي اول بذره بتتولد جوا اي انسان ناحية نفسه

مع ان انت عملت مع زوجتك وحبيبتك حاجة تانية كنت راجل بجد وصبرت عليها وحنون وقدمتلها الخير ولقيته في الاخر .. يبقى ليه القلق

فاكر فيلم الجميلة والوحش بتاع الاطفال .. كانت هي خايفة من الوحش في الاول .. بس لما عاملها حلو وشافت اللي جواه حبته بجد بغض النظر عن شكله

وده اللي لازم تصدقه .. انه طالما انت اتغيرت وبقيت من جوه كويس .. صدقني هتبقى اجمل رجال الارض في عيون زوجتك

اي ست في الدنيا مايهمهاش شكل الراجل قد فعله وتصرفه وحنانه عليها وانه يتقي ربنا فيها ..

وطول الوقت بس استغفر ربنا عن اللي عملته في حياتك طول ما انت بتستغفر حاول تتخيل ان انت بتمسح الحاجات السودة الي فاتت..

واشكر فضله ان انت عايش في نعمه وانه اداك الفرصة انك تتوب وترجع تبقى حد كويس ،، اشكره عشان تدوم لك ..


وربها يهديك ويهدي سرك