|
رد: ما أعرف ماهي أهداف زوجي ؟
اقتباس:
أعترف ..أنا خطأئي إني تاركته على هواه كله بغرض إني أريحه وأسعده ..لكن هالشيء تسبب في إنه من أول موقف لازم يتحمل فيه مسؤولية يجلس يتذمر ..وأنا مشكلتي ما أحب التذمر خصوصا لما أكون من جهتي أقدم له الأفضل لأني أنتظر الأفضل كمان .. ممتنة جدا لنصائحك ..بإذن الله أطبقها ..الله يوفقك يارب ddg |
رد: ما أعرف ماهي أهداف زوجي ؟
اقتباس:
سبق و عملت الإختبار .. وكان استحقاقي طبيعي fdh لاحظت في ردود كثييرة مركزة على هالنقطة ..أحسكم ما فهمتوا جانب من شخصيتي .. لو إني ما أشوف إني أستحق كان ماكتبت الموضوع هذا ولا سردت لكم المواقف .. بس أنا أحب أحصل ع الأشياء من الآخرين بكل محبة ولطف ومبادرة ..مو بطلب وتصريح وإصرار .. بالعكس أنا أشوف إني أستحق وهذا اللي مستغربته إن اللي أستحقه ما حصلته منه .. والشيء اللي نبهوني له الأعضاء مشكورين أهمية التوضيح و التصريح بالطلب ..والإصرار عليه .. حتى استجد الوضع علي حاليا وصارت المواقف الأخيرة اللي يحتمل فيها إن زوجي جالس يرمي بعض المسؤوليات علي وافر الشكر والتقدير ddg |
رد: ما أعرف ماهي أهداف زوجي ؟
حبيبتي
معاناتك معاناه كل زوجه موظفه |
رد: ما أعرف ماهي أهداف زوجي ؟
مبارك عليكم العشر.. أسأل الله أن يعيينا على الصيام والقيام ويتقبل منا ..ويبدل سيئاتنا حسنات ياب العالمين ..
أعتذر والله على كثرة رفعي للموضوع ..بس لأن في أمور استجدت ..وأعتذر إني استشيركم كل شوي ..لكن كما يقال لا خاب من استشار إضافة إلى إني استصعب إني أقول لأهلي عن هالأشياء أحب مايشوفون إلا الزين .. التحديثات : السنة الماضية زوجي خيرني في الإجازة اللي قبل العيد بين إنه يوديني لأهلي أو اكون عنده لكن أنا اخترت الجلوس معه من باب إننا تونا عرسان و(نأجز سوى ونعيد أول عيد سوى ) لكن كان طووول الوقت طالع مع أصدقائه ....ضايقني ولا أظهرت مضايقتي وقتها ..لكن بعد بفترة قلت له وصارحته إني توقعت إنك رح تكون مهتم على الأقل اسم إنه أول عيد لنا سوى .. حاليا : زوجي طلب يوديني لأهلي في إجازة ماقبل العيد..لأن وده يفلها مع أصدقائه ووجودي في المنزل عنده رح يمنعه من هالراحة ...يقول لو حبيتي تجلسين بكيفك لكن رح اضطر أجبر نفسي على الجلوس في البيت مجاملة لك وأنا ما أحب أغصب نفسي .. شعوري وموقفي : ضايق صدري طبعا , السبب إني أحب الجو الأسري السوي , يعني مفترض الإجازة تخليه يزيد عدد الساعات لنا مو تكون لأصدقائه .. وأيضا أصلا هو يجلس معهم في الأيام العادية أكثر مني ..يعني ماكنت أصلا مانعته أو معبره عن مضايقتي وقتها ..كله لأجل لما يرجع للبيت يكون مستانس ومشتاق .. تمنيت يوم العيد نطلع سوا لصلاة العيد وأكون أول شخص يهنيه ..تمنيت أعيش هالأشياء بس الآن ماعاد أدري ..أصلا كرامتي ماتسمح لي أقوله رح أجلس عندك! لأنه فعليا رح يتركني طول الوقت لحالي .. رجاء لا تقولون لي إني مخليته كل اهتماماتي ..أشوف إن هذي أسس في حياة أسرة ومو جالس يحترمها ولا يكلف على نفسه يتعود عليها حتى .. وفيني صفة إني مع البعد رح أحس بالجفاء تجاهه , لأنه هو اللي طلب البعد مو أنا .. |
رد: ما أعرف ماهي أهداف زوجي ؟
ما اعتقد ان فيه زوج بالدنيا يجلس مع زوجته بالعيد الا اللي يكونون اسرة كبيرة
معروف العيد اجتماعات مع الاهل وزيارات وطلعات .. انبسطي مع اهلك ولا تتدققين .. شخصيا انا زيك اجلس عند اهلي بالعيد واعايدهم ونجلس سوا وبعدها اطلع لاهل زوجي اعايدهم بعدين ارجع لاهلي يعني زوجي ماشوفه بالعيد الا بمشوار السيارة 😂 ومبسوطة وفرحانة .. تدرين ليه ؟ لاني جربت زوجي باول عيد لنا سوا كنا ماخذين اوتيل .. وكنت حاطة ببالي بيجي وبيعيد علي وبنعيش كأسرة ومدري ايش واحلام رومانسية .. بس جاء من صلاة العيد وخبّني بسرعة بسرعة يالله تأخرنا وطلعنا وحنا نركض لاهله وعيدنا معهم ورجع للاوتيل وعطاني ظهره ونام 🙂 ولما صحى المغرب طلع يعايد الباقي من اهله ومن اهله لاصحابه سهر معاهم للفجر..حتى ماشاف ولا لبسي وانا كنت متوقعة انه بيمدح ذوقي ع اختياري للفستان 😑 طبعا كان مالنا متزوجين الا شهر ونص 😂 فانا جدا مبسوطة اني اتعايد مع اهلي يالله من فضلك.. مفروض تنبسطين يختي غيرك حتى اهلها يمنعها عنهم وخلي التدقيق الزايد والرومانسية وجو الأسرة بيوم ثاني العيد أحلى مع لمة الأهل والأخوان والخوات 😻😻 ارسليله مسج حلو صباح العيد وارسليله صورة كشختك وعايديه والحمدلله ❤صدقيني أبرك لك من انك تجلسين عنده .. هذا وانتي عروس وتركك اجل هالعيد وش بيسوي اجل 😂 |
رد: ما أعرف ماهي أهداف زوجي ؟
اقتباس:
معليش يعني بس وش بينفعك التأسيس والحياة المحترمة وأنت محجورة بالبيت وبيوم العيد 😅 خلينا منطقيين ! عن نفسي بحسه سجن مب عيد ! لاعادت من زواج اذا بيقضي العيد بهالكآبة ! ومابين عيوني الا عيد اهلي بالوقت اللي انا اعد الوقت هم مختبين ويتقهوون مجتمعين 💔 وش بستفيد من تأسيس حياتي وهي بهالكآبة 😭 بصراحة فكري بنفسك انتي وش تحبين بعيد عن تأسيس الحياة والحياة بعد 20 سنة ومدري ايش .. فكري بهالعيد وكأنه هو العيد الوحيد لك وش بتسوين عشان تنبسطين ؟ واذا مرة مرة بخاطرك تكونون سوا اطلبي منه تضبطين لك حجز رحلة ع العصر مثلاً اذا صحى من نومة العيد يوديك المطار وتروحين لاهلك .. وبكذا تكسبين كل الاثنين |
رد: ما أعرف ماهي أهداف زوجي ؟
أهلا غادة
حبيبتي افهميني الله يخليك نا زوجي مو بس العيد ...يبغى من الإجازة تخيلي ..يعني مخطط من يوم الخميس هذا إلى نهاية الإجازة و هو متخلص من مسؤوليتي ..حتى الـ(خمس) أيام الأخيرة من رمضان يبغى يستغلها مع أصدقائه .. اقتباس:
اقتباس:
النقطة الثانية ..حتى عيد أهله أصلا في نفس مدينتي ...يعني على الظهر رح يروحون لمدينتي حتى يتعيدون فيها ..يعني مو جالسة حتى أكلفه مشوار .. هو يطلب مني أروح لأهلي من هالأيام إلى أيام العيد .. يعني الناس في أواخر رمضان يتهجدون وهو يبغى يروح لأصدقائه ..أتوقع مخطط حتى النوم ينام عندهم .. اقتباس:
|
رد: ما أعرف ماهي أهداف زوجي ؟
زوجك يقهر الله يصلحه
بس اذا هو معزم ومقرر مالك حل لاتجبرينه ولا تفتعلين معه مشكله حاولي تنبسطي زي ماقالت غاده وعيدي وهيصي مع اهلك جهزي هدايا بسيطه للعيد وصينيه حلا وصوري سنابات وانبسطي ولاتشغلي تفكيرك اذا جانا عيال ومدري ايش عيشي يومك لا تحاتين المستقبل ماتدرين بعدين ايش بيصير الهدايه من رب العالمين |
رد: ما أعرف ماهي أهداف زوجي ؟
طيب وش رديتي عليه
من خلال مواضيعك حسيت انك حساسه وتبغين الشخص الي قدامك يفهمك وانتي ماتكلمتي معاه انتي تقولين ان زوجك ذكي ويفهمك ياحبيبتي كيف بيفهم وانتي لغه الحوار بينكم مقطوعه ومعطيته الضوء الاخضر |
رد: ما أعرف ماهي أهداف زوجي ؟
اقتباس:
شكلاا جزيلا ddg |
رد: ما أعرف ماهي أهداف زوجي ؟
اقتباس:
قلت له إن من بداية الزواج وخروجك طوول الوقت رغم إننا تونا عرسان كان فعلا يحزني وأنا مالي أحد في مدينتك أصلا .. يمكن كنت حاب تعودني على نمط معين؟ ..قلت له إني من البداية لحد الآن وأنت شايف إن ماعمري تذمرت منك ! ماعمري اشتكيت من بعدك وخروجك ! ماعمري حققت معك وين رايح وين جاي ! لما تجي أكون مبتسمة (مع إن مؤخرا الإبتسامة بصعوبة تطلع مني ) , دائما شكلي مرتب وأنيق ولبسي ما أكرره طوال الشهر! يمكن ماعندي هذيك السوالف لكن أحاول أطلع لك سالفة أو استمع لك باهتمام مو ألهى بالجوال مثلك !علاقتي بأهلك زينة ! أحاول دايما أعاملك بالأفضل ! أحاول اهتم بهواياتك من أفلام وسوشيل ميديا ومباريات مع انها فعليا مو اهتمامي لكن من باب المشاركة ! مافرضت عليك أي قيود أو حدود حتى الدخان تدخن من باب إذا ما أخذت راحتك في البيت وين تأخذ راحتك فيه ؟! هذا أسلوبي معك طوال أكثر من سنة وكنت أمني نفسي إني أشوف منك الأفضل والإهتمام لكن للأسف ما أشوف هالشيء معك وهذا اللي يوجع قلبي ! كنت أتوقع إن هالأسلوب يقربك مني لكن ماأشوفه قرب ! ليه تعاملني بنظام التعويد على البعد هذا ؟ ليه تعاملني على إني إظافة في حياتك اللي ثلاث أرباعها الإستراحة وأصدقائك (ياليته على الأقل منشغل بشيء مفيد يخليني أعذره) بعد هالكلام ... زوجي سكت ..وقال أنا أعرف إني لو ألف الدنيا ماألقى أحد مثلك ..وأعرف أصلا إن يضيق صدرك من تركي لك ..والمحبة مو لازم أكون معك أصلا ! (برضو أحسه تبرير ) أحبك حتى وأنا بعيد ..بس أنا كذا أسلوبي وعلاقتي مع الناس ... وبعدين كل اللي أقدر أسويه لك هنا هو إني أدور بك في السيارة وأحسك تقولين ماعندك إلا هالشيء ! موقفي : (شعوري ماصار مثل هالنوع من الكلام العاطفي يأثر فيني :( ) .. .و أكاد أجزم إن المبررات اللي قالها مو صحيحة ..بس مجرد إنه يرد علي ..لأني رديت على نقاطه وقتها ومنها السيارة وإني بالعكس أفرح فيها ! توقعي : أهون سبب اللي أقوله لنفسي إنه غير مسؤول ومو حاب يتحمل المسؤولية ويشعر إنه متزوج ! وأحيانا أقول إن في شيء ناقص في علاقتنا مو عارفته ... شكرا جزيلا ظل الياسمين ddg |
رد: ما أعرف ماهي أهداف زوجي ؟
كلامك معه واضح ومعبر
لكن يفترض لما ذكر العيد رفضتي وقلتي لازم نحط اسس لحياتنا اعيد عندك وعقب ودني لاهلي |
رد: ما أعرف ماهي أهداف زوجي ؟
من ردك الاخير فهمت ايش ناقص علاقتكم
انتي عطيتيه الحب والاهتمام كثييييير لدرجه خنقته وهرب منك حبيتيه اكثر من نفسك اجل تقولي دخن بالبيت حتى تاخذ راحتك!! طيب وصحتك؟ ماسمعتي بالتدخين السلبي؟ المفروض ترفضي يدخن بالبيت وتعملي حساب لنفسك وريحة بيتك عالاقل والاغرب تقولي ماتكرري اللبس بالشهر!! ترى انتي مبااالغه مباااااالغه حلو تكوني نظيفه ومرتبه بس مو لدرجة 30 لبس مختلف بشهر واحد كرري وخلك عفويه وطبيعيه مو لازم تفكري هذا شافه وذا ما شافه كأنه ضيف مو زوج! خلي التميز باللبس لليالي الخاصه البسي شي جديد مره او مرتين بالاسبوع وكثر خييبيرك في نقطه قلتيها بحوارك معه: انت معتبرني اضافة بحياتك ايوه ترى انتي اضافه بحياته مو كل حياته وهو برضو اضافة بحياتك مو كل حياتك وهذا الوضع الطبيعي للعلاقه اعيدي ترتيب افكارك واولوياتك موفقه حبيبتي |
رد: ما أعرف ماهي أهداف زوجي ؟
انتي سهله والسهل للاسف ما ينحسب له حساب ... عشاه مأكول ويبات جوعان :d
حتى يوم اعترضتي اعترضتي بكل حنيه الانسان نساي ويعتبر الخير الي عايش فيه ما بينقطع وبيظل متواصل مثل النهر الجاري وخصوصا اذا كان العطاء بأهدار قللي عطائاتك وابدي تقطرينها:d يمكن يحس بان النعمه زايله |
رد: ما أعرف ماهي أهداف زوجي ؟
مع كوكي
اخذي موقف جاد |
رد: ما أعرف ماهي أهداف زوجي ؟
أهلين بنات ..شاكرة ردودكم فردا فردا ddgfffsg بعض النقاط : _ يدخن في السطح مو داخل البيت , بس مثلا لو راح عند أهله ما يقدر يسوي هالشيء لأنه مخفي موضوع التدخين عنهم , برضو لو طلعنا مكان مفتوح يدخن ..طبعا بيت أهله في قوانين وحدود مايقدر يتجاوزها منها التدخين ومنها البرامج التلفزيونية ..وهالشيء مو ممنوع عندي من باب ياخذ راحته في بيته ..ولا يهرب للإستراحة اللي متاحة فيها هالأشياء .. _هل خنقته ؟ أحس لو خنقته كان مثلا في البداية يجلس في البيت لكن مع الاختناق يهرب ..لكن هو من الأول يحاول يعودني على البعد هذا .. أنا في البداية تفهمت هالبعد إنه توه ماتعود على الزواج وإنه لما يرتاح معي رح يقرب ..لكن الحاصل لا .. الحاصل أفكاره والتعليمات اللي ماخذها قبل هي اللي مخليته يتصرف هالتصرف .. أكون خانقته لو كنت ألاحقه باتصالاتي , أو باسئلتي , أو بتذمري وشكواي , لكن كل هالشيء مابدر مني ..توني بس من يومين صارحته بشعوري هذا أنا في البداية إلى وقت قريب كنت أتصرف إنه عادي والموضوع ما يهمني ..(طبعا هذا عكس شعوري) ..توقعت لما صارحته إنه بيعطيني رد حقيقي ..لكن ما أعطاني .. _ بالنسبة للبس هذا طبعي ويمكن هذا جزء من اهتماماتي , مو لأجله , بس هو يعتبر مستفيد من هالطبع .. وقلته له حتى أفتح عينه و أفهمه إني أحاول أمر على كل الأسباب اللي تنفر الزوج لكني مو محصله جواب .. - صحيح الإضافة ..بس إضافة عن إضافة وإلا ؟ في إضافة يكون الواحد في ألماس وفي إضافة يكون الواحد أبجورة .. _ إذا فكرت بتقليل عطائاتي أحتار كيف ؟ لأن أغلبها جزء من شخصيتي أصلا ..مثلا اللبس أشوف إني ألبس لنفسي مو علشاني ..صح يهمني يلاحظ لكن كذا وإلا كذا رح ألبس ..تقدرون تعتبرونها هواية .. إذا جاء أصير ألهى بالجوال ؟ أصلا خلقة أكون مالة من الجوال أبغى أحد يتكلم معي .. ما أدري كيف أقلل عطائي .. _الكلام تكلمت معاه لدرجة شوي وأصيح ! لأني مرررة محتارة منه ! ماعرفت له ! ويمكن لأني عارفة إن السبب منه وهو قناعاته إن هالشيء هو الصح ومايبغى يكون من نوعية اللي تغيروا بعد الزواج .. _ أنا مرتبة أولوياتي , ومنها إني أستحق رجل مسؤول و فاهم ويعاملني باللي أستحقه ! خلو الحب على جنب ! بس في أصول لكل أسرة سعيدة وأشوفها مختلة عندي ..إني أكون شخص طول الوقت طالع ما أدور زوجتي إلا في حاجتي أتوقع هذا شعور سيء لأي زوجه .. ما أحب أكون كذا كأني جارية .. _ أفكر أحيانا إن عندي جانب السوالف ممكن ضعيف ! بس رح يكون جهد ممل مني أني يوميا أفكر في سالفة أقولها له ! ما أقدر على كذا خصوصا في الوقت الحالي .. أقول لنفسي ليه ؟ _ أفكر إني أنا فعلا أبعد عنه ..مو علشانه أو كعقاب لكن من باب تطوير نفسي لأني من فترة أفكر آخذ دورة في مدينتي .. ما أدري هل هالخطورة رح تكون كويسة أو لا ؟ طبعا إذا شفتها من ناحية نفسي فرح تكون مفيدة ..لكن إذا فكرت في علاقتنا أخاف أكون أتحت له فرصة البعد هذا وقدمتها له على طبق من ذهب .. خصوصا إنه هو اللي يقترح علي إني أروح في الإجازة عند أهلي .. طبعا الدورة بإذن الله لو أخذتها رح تكون بعد العيد .. ايش رايكم ؟ |
رد: ما أعرف ماهي أهداف زوجي ؟
اتوقع البعد طبع بأغلب الرجال
لكن بتفاوت فيه اللي بالمعقول وفيه اللي يزودها انا زوجي عنده هالطبع ورجال كثار وازيدك من الشعر بيت يكون سااااكت معنا طول الوقت والا يهاوش الاطفال ومن يجيه اتصال من صاحبه عطاه ذيك الضحكه اللي اذني ترن من قوتها ياعزيزتي طنشي انتي داخله الزواج وانتي متعطشه للحب والحنان وكل ماعطشتي اكثر كل ماصد زوجك اكثر لكن اذا ارويتي نفسك بترتاحين وبينجذب لك هذا الشي لاحظته وشفته بعيني مع ناس كثار |
رد: ما أعرف ماهي أهداف زوجي ؟
حبيبتي لا تلومي ولا تبحثي بالاسباب
ماسويتي شي ينفره لكن ممكن تحطوا خطوط ترضيكم تقعدوا جلسه وتحطوا النقط على الحروف مثلا لا تقولي انت ماتقعد معاي انت كله طالع بيتنا مو على اسس صحيحه هذا كلام عام ماله جواب عليه الا هذا نمط حياتي وانا شخص اجتماعي ومحبوب وذو عيله اقعدي معاه وقولي خصص لنا يوم بالاسبوع نطلع سوى ويوم العيد الصبح اكون عندك ونعايد اهلك سوى عقب ودني بيت اهلي يوم نطلع نشتري اغراض البيت و الثلاجه وهكذا |
رد: ما أعرف ماهي أهداف زوجي ؟
هو بوجهه نظره بيقول وش فيها متنكده وزعلانه
ماكله شاربه وتروح وظيفتها ومو حارمها من اهلها وراتبها عندي ولها شقه ليه متذمره مو فاهم احتياجكً واذا فهمه يمكن يقول هذي تبغى تربطني عندها وتسمع كلام الحريم هو ابدا مو شايف مشكله بوضعك |
رد: ما أعرف ماهي أهداف زوجي ؟
اقتباس:
ومثل ماقالت كنافة أعلب رجال مجتمعنا كذا .. أقول الاغلب .. حتى لو جلس الرجال في البيت تلاقيه مشغول بالجوال او جالس على التي في وعلى الصامت .. |
رد: ما أعرف ماهي أهداف زوجي ؟
اختي اذا زوجش نمطه جنوبي هالاسلوب مايتماشى معه وراح تخسريه...اسلوبك جذاب جداً للرجل شمالي النمط
|
رد: ما أعرف ماهي أهداف زوجي ؟
أهلين بنات ...كل عام وأنتم بخير ddg
_ قرأت كلامكم وأشوف إنه عين الصواب .. ( حماسي وتوقعاتي / كيف ممكن ينظر لي زوجي إني متوفر لي كل شيء مثل مايشوف مفترض مثل ما يتوقع أكون سعيدة و ساكتة ) .. _ نمط زوجي حسب اللي قرأته شمالي غربي ! أما أنا جنوبي غربي ! في نقاط في الشمالي حلوة ما لاحظتها في زوجي مثل إن الشمالي طموح ويحب الشغل والكرف ! ألاحظ إنه دايما يختار الأريح ! آخرتها أحد الأشخاص كان يثق بزوجي جدا واختاره إنه يمسك واحد من المشاريع ..المشروع ممكن يأخذ منه ساعتين يوميا بس ....ودور زوجي إشرافي ..والمكان قريب من البيت ! طول المدة أحاول معه إنه يوافق لكن كان مو متحمس ومتخوف , تمنيت إنه متخوف من الخسارة , لا صار متخوف إنه مستخسر هالساعتين !! والغريب إنه عنده مشاكل مادية والفرصة جائته على طبق من ذهب ..في النهاية رفض ! أيضا إن الشمالي يكون يبغى الوحدة قوية وتقول أبغى كذا وكذا وتصرح ولا تهتم ! مرة تناقشنا أنا وإياه عن موضوع الشخصيات وكان من ضمن الكلام ...لو كانت شخصيتي غير هذي ..لو كنت مثل بعض البنات اللي أناقش وأرفض ومالي إلا رايي ووو قال إن أكيد تعامله مختلف حيكون و إنه ممكن يصل للضرب <<< استغربت مرة هالشيء ! استغربت طاري الضرب في الموضوع ! ما أتخيل زوجي حتى لو كانت الوحدة سليطة أو شريرة إنه يضربها ! وإذا تذكرت إنه مره كان يسولف وقال إنه ضرب أخوه الصغير ..قلت كل شيء جايز .. |
رد: ما أعرف ماهي أهداف زوجي ؟
ماشاء الله ترى اروع شخصية للرجل شمالي غربي
ماهو راعي تلصق ولا تشره ولا مجاملات انسان عملي ومنطقي وواااااضح وصريح رفضه للعمل طبيعي لانه استخسر وقته عنده ثقه ان وقته ثمين ومايشتغل بشي الا اذا كان يحبه ويتفانى فيه اقول لك قيمه العمل عنده عاااااليه مو تمشيه حال وبنفس الوقت يهتم بالجوده يعني الهاي كواليتي.. معاييره عاليه تلقينه طول الوقت يخطط للمستقبل ووقت الفراغ يشغل نفسه باشياء مفيده واذا جاكم عيال بتلاحظين عياله رقم 1 بيكون حريص جدا على مستقبلهم وتعليمهم ويهمه يكونون حصلوا على تربيه عاليه وممكن يتخانق كثير معك على هالموضوع الشمالي عياله يخليهم امراء وزوجته ملكه مايبي منك الا تنشغلين بنفسك وتطمني انه بيحطك بعيوووونه وغربيته تعطيه طابع الملل وحب التغيير فحاولي تكسري الروتين بين فتره والثانيه احمدي ربك مو جنوبي زعول حساس كسول |
رد: ما أعرف ماهي أهداف زوجي ؟
اقتباس:
يا بنت يا كنافة! خلينا حلوين بكرة العيد أمرض شخصية بالعالم الشمالي |
رد: ما أعرف ماهي أهداف زوجي ؟
كلامك عن الشمالي الشرقي ياكنافة مش الشمالي الغربي
بعدين سالفة ملكة ماملكة كلها كلام تنظيري.. كل شخص فيه ميزات وفي عيوب الشمالي الغربي كسول راعي تخطيط ويحب الشغل لكن مافيه جلد عليه وهو عارف هالشي يتحمس بالبداية ووقت التخطيط بس لما يبدا يشتغل يطفى فجاة هو عارف نفسه وهذا شي يحسب له مو عليه يبدا الشي مايخلصه يحب يصرف على نفسه وعلى ملذاته.. وعلى حبايبه بس اذا حبيبه بيبخل على نفسه ماراح يتكيرم عليه يحب المراة المهتمة بنفسها اللي تحط نفسها قبل كل شي واي شخص يعني اللي تسوينه كله بالنسبة له ماله معنى.. والتضحيات اللي ما انطلبت منك بليها واشربي مويتها اذا جا بيوم قلتي اني سويت كيت وكيت عشانك.. ممكن واقول ممكن تنجرحين لانه الرد بيجي على شاكلة انا ماقلت لك سويه كذا شفتي لما كنتي صريحة وطلبتي؟ يموتون عاللي يتبعون هالاسلوب و مايمشي معهم الا هو اصلا :) انا نموذج تيبيكال شمالية غربية برضو.. والانسان اللي يستضعف نفسه ماله احترام عندي عشان كذا قلت لك قبل افرضيييي نفسك.. مش بالقوة ولا بالهواش بسكات... معاملتك لنفسك مرااااااية |
رد: ما أعرف ماهي أهداف زوجي ؟
اقتباس:
قال إيه يعيشك ملكة اسأل الله العظيم رب العرش العظيم أن يجعل عيده هم وغم. |
رد: ما أعرف ماهي أهداف زوجي ؟
حبيباتي انا كلامي نابع من معايشتي
انا شماليه شرقية والدي شمالي شرقي اخوي وخالي كلهم شمالي غربي وعند اختي برضو شماليه غربيه يعني عيله شماليه بحته هههههه بس اكيد هي مجرد انماط وتحليلات ربطت اللي قريته باللي اشوفه والله يهدي الرجاجيل كلهم ان كان شمالي والا جنوبي عيدكم مبارك |
رد: ما أعرف ماهي أهداف زوجي ؟
لا إله إلا الله..
الله يعينا ويصبرنا و ما نعجز بسبب هالازواج استغفر الله بس مدري شقول.. أختي، زوجي مثل زوجج. مبرمج يومه كله من أجله هو من قبل 6 سنوات و سوري عالاحباط بس الوضع كما هو و اسوء😅 زوجي كل مكان و كل وقت يستكثره علي_كنت أظن أنا المملة طلع هو الممل_على الاقل هو عنده جارج من طلعاته روحاته و رداته/لكن في رجال كثير يعتقدون أن الخارج حرب و ان البيت استراحة كأنه كان يحمل على ظهره جنطة ثقيلة و بمجرد وصل الباب قطاها و صار فظ او صامت جاف و منعزل و مو مستعد يقدم للداخل شي للأسف !.ساعات أفكر أقول باجر راح أشكيه لرب العالمين ؟أو بسامحه؟!🤔😐😆 هذا يسمونه إهماااال،و عدم احترام لنفسية الطرف الآخر.. سوري عالاحباط مرة 2 بس حبيت اكتب ان زوجي ما يهتم لزعلي و لا نقاشي و لا حزني.. عندي صديقة رجولها ع رجول زوجها في أماكن كثيرة: سوبر ماركت_مشوار بترول_مفروشات_خباز_مطعم_.تقول معودتنه من البداية. بس انا اقول ماشاء الله تبارك الرحمن. من قال ان الزوج بس تعويد. الزوج أيضا رزق و ظروف و معطيات شخصية سابقة. |
رد: ما أعرف ماهي أهداف زوجي ؟
اسمحوا لي بمداخله
انا ضد نظريه زوجك على ماتعوديه وشفت هالشي بعيوني لي قريب شمالي كان مايعرف البيت الا وقت النوم والله يسافر يجي 10 مرات بالسنه لحاله او مع اصحابه وياما زوجته بكت ومسكت الباب عشان مايطلع وهو طناااااش ويروح المطار وبالاجازات يحطها عن اهلها (بمدينه ثانيه) وياخذها مع العيال مع عودة المدارس بعد مادخل الاربعين تغير 180 درجة صار بيتوووتي وكل اجازاته مع زوجته وعياله يسفرهم ويمشيهم واذا انعزمت زوجته يطلبها تكنسل وتجلس معه بالعربي طاح اللي براسه وخذوله بعض اصحابه وطيح هم جمع المال والترقيات الخ ترى الشمالي تركيزه كبير على تحقيق اهدافه اذا حققها التفت لك قصه ثانيه على لسان وحده اعرفها برضو متزوجة شمالي حاليا رجلها على رجله بأي مشوار وتنوم العيال ويطلعون يتعشون كل اسبوع وتمشيات وسفرات المهم تقول لي هذا ماجاء بيوم وليله جاء بعد كفاح 13 سنه المرأه تحتاج وقت وصبر حتى تعزز مكانتها اول السنوات الرجال يتحكم ويكابر ويبين ان بيته وزوجته اخر اهتمامته بعد مايطيح اللي براسه يلتفت لاهل بيته ومعظم الرجال معظم الرجال معظم الرجال يتغيرون بعد الاربعين ينضجوووون بينما احنا النساء ننضج بدري صراحة |
رد: ما أعرف ماهي أهداف زوجي ؟
اقتباس:
وقت الفراغ هو ترفيه كله بالنسبة له ..طبعا ما ألومه لأن الترفيه مهم وأنا اشترك معه ..أنا لو يحصل لي ترفيه وإلا شيء مفيد باختار الترفيه .. العيال ..تصدقين مرة خايفة من هالنقطة ..لأن تربتهم كانت كله المسيطرة على الموضوع أمه .. أمه إذا سولفنا عن موضوع العيال تأكد لي إن الأم أهم شيء وإن مو مهم تواجد الأب في الموضوع << أنا عكسها أشوف الأم والأب مهمين ! يمكن قصدهاتعتذر لولدها .. ddg |
رد: ما أعرف ماهي أهداف زوجي ؟
اقتباس:
بس في نقطة صغيرة ع سالفة الطلب يوم المناسبة كنت أطلب منه وأحدد الطلب ماكنت أخلي الخيارات مفتوحة من باب التسهيل عليه وإن يكون الطلب واضح ..وقتها كان يتذمر ويتأفف من المناسبة نفسها وإنه تكلفة .. كنت اتضايق وأسكت وأتجاهل كثيييير ...حتى وصلت لموقف لما جلس يعد العلب اللي ما تتجاوز 12 ريال !! أنا هنا فعلا وصلت حدي ! تكلمت معه وقلت كلام ما أحب أقوله ( لما جلست أقارن له بين اهتمام أهلي فيه واهتمامه بهم ) ..هنا بس وقف التذمر !! وراح يجيب أفضل الموجود ! يعني ما كان ينقصه طلب واضح مني ! كان ينقصه هالأسلوب اللي أقرب للتجريح من الطلب ! ولا أحب هالأسلوب ولا من أخلاقي ..والصدق رغم إن في شيء داخلي ودي أطيب خاطره و أقوله معليش إني قلت لك هالكلام لكني قاومته لأن فعلا ودي يحس ع دمه ! أنا ماحبيت إنه خلاني أصل لهالمرحلة .. وبما إنك شمالية غربية ..ودي بعد إذنك ddgتشوفين بقية المواقف ( مثلا دائما بعيد وحتى يوم تكلمت معه ماتغير / العيد المنفصل / تلميحاته للسفر والفيزا) |
رد: ما أعرف ماهي أهداف زوجي ؟
اقتباس:
و ( إن الله لا يغير مابقوم حتى يغيروا ما بأنفسهم ) مع إني متعاطفة معك كون زوجي بعيد مثلك ويحب يكون بعيد (أنا أحس إنه يحب شعور يعنني بعيد :d ) بس ولو أؤمن إن في حل .. أو ع الأقل تسوية .. مثلا ..ناوية هالمشاوير اللي قلتي عنها ..بدلا ما إذا اتصل يسأل أبغى شيء ..لا أخليها هي وسيلة للخروج فأقوله يلا نجيب أغراض السلطة ..وهكذا جربتي تقوليه له عن طلباتك ؟ |
رد: ما أعرف ماهي أهداف زوجي ؟
اقتباس:
يعني لو فرضا كانوا متزوجين في الثلاثين بعد عشر سنوات ضبط وضعهم .. زوجي أصلا سبق وجائته وضيفه في مدينتي -قبل الزواج - براتب أفضل وخارج دوام أفضل بكثيير و سلم ترقيه أسرع ..ومع ذلك رفضها .. طبعا اللي مايدرون يتوقعون إنه رفضها علشام مايترك أهله :d..لكن الحقيقة علشان تعلقه بالإستراحة |
رد: ما أعرف ماهي أهداف زوجي ؟
انتي متأكدة انه شمالي؟
من كلامك عنه اتوقع جنوبي ارتباطه باصحابه.. تعلقه بالاستراحه والوناسه وشغلات كثيره تذكريها بردودك ليتك تعيدي اختبار بوصله الشخصية |
رد: ما أعرف ماهي أهداف زوجي ؟
ودي تدرون ودي
اقرى مداخله ولا مشاركه لرجل يقول بوصله زوجتي ايش ويرد عليه عضو ثاني يمكن شماليه شرقيه غربيه من جدكم مصدقين بهالبوصلات الله لايشغلنا الا بطاعته تجيك وحده زوجها خاينها وضاربها ومشوهها ومتبلي عليها وتسال وش تهقون بوصلته يختي بوصله الي مو صاحين مو قصدي علي اختي صاحبه اعذريني بس طقت كبدي ...اقروها باللبناني يختي كل واحد معششه في افكار بعضهم يتمسك فيها لاخر رمق عاد التغيير ذكر بالقران داخلي من داخل الشخص ادعي وحاولي باسلوب لطيف وعيشي حياتك انشغل هو بنفسه انشغلي بنفسك وخلي عينك قويه قال عيدي عند اهلك قولي اعيد اهلك اول عقب ودني لاهلي |
رد: ما أعرف ماهي أهداف زوجي ؟
اقتباس:
لي تعليق يامبتعثة من الافضل الله لايشغلنا عن طاعته أفضل من قول الله لايشغلنا إلل بطاعته.. |
رد: ما أعرف ماهي أهداف زوجي ؟
شكرا لست كغيري
مدري وش صحه الدعاء بس وش الفرق عن طاعته الا بطاعته لان حتى الامور الدنيويه فيها طاعه للرحمن |
رد: ما أعرف ماهي أهداف زوجي ؟
اقتباس:
|
رد: ما أعرف ماهي أهداف زوجي ؟
مدري لست كغيري ماوصلت الفكره
حتى هو كدعاء مااعتقد انه ورد عن الرسول صلى الله عليه وسلم او الصحابه |
رد: ما أعرف ماهي أهداف زوجي ؟
اقتباس:
|
| الساعة الآن 11:10 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©