|
رد: ما بعد الصفعة الأولى
احبه يا شوق..
ما اقدر اوجعه بسمعته لو يذبحني.. مشتته جدا .. جدا .. فوق الخيال مشتته عقلي متوقف تماما مو قادرة اتخذ اي موقف خصوصا ان حاليا فيه مشكلة جديدة وسببها زوجته هو عنده حساسية اتجاه الشغالة يخاف ان نظلمها او شيء من هالقبيل هي قعدتها عندي يعني غرفتها و راحتها بس انه ما اخليها تشتغل الا نادرا واقول لها اذا ما عندج شغل روحي قسمهم لا تقعدين هني هو مخصص لها ساعة للراحة اعرضها عليها اذا بغت ترتاح ترتاح اذا ما تبي ترتاح تروح قسمهم وولا مرة قالت انها تبي ترتاح يمكن لان حاسه ان انه ما ابي وجودها بس امس لقوها في قسمهم قاعده جنب الحمام عزكم الله معناته تبي ترتاح ام عياله قامت قالت له وجاني بهدوء يستفسر مني بس انه انفعلت من باب ما لها شغل وما لها حق تقول لك قال لي فيما يتعلق بالشغالة لا من جهتج ولا من جهتها يهمني منو قايل الكلام لكن ابي الشغالة ترتاح هي في دار غربة ولازم نسوي واجباتنا اتجاهها وهو ان نعطيها وقت للراحة... كلمة مني وكلمة منه وولعت بيننا... زوجته حسبي الله ونعم الوكيل فيها بكل الطرق تحاول تستفزني بكل الطرق |
رد: ما بعد الصفعة الأولى
اقتباس:
معظم مشاكلك يا زين سببها الفرااااااغ حتى الوسواس علاجه لو تروحي لطبيبة نفسية رح تقزل لك العمل لازم تشغلي نفسك بالعمل مو بالروايات و العالم الخيالي لا شئ واقعي ملموس الكرة الان في ملعبك شغلي كيد الحريم حتى يتنازل هو شوي عن سقفه العاجي روحي الكطبيبة النفسية و خليه يجي معك و يسمع بنفسه ان علاج وضعك بالعمل لازم تتلهي عنه و تكوني عالم خاص بك بعيد عنه هو معظم الوقت مشغول فمو حاسس باللي تمري فيه |
رد: ما بعد الصفعة الأولى
خذي لك موقف ولا تعدينها وتمررينها مرور الكرام عشان ماتنعاد لاسمح الله
الصفعة الأولى لازم تكون درس والأيام كفيلة انها تنسيك وتداوي جروحك والله يعيينك الصدمة موجعة اكثر من الصفعة نفسها |
رد: ما بعد الصفعة الأولى
رغم اللي صار يعورني قلبي لما احس ان ممكن احد يفكره انه شخص سيئ
اللي صار ما ينسيني انه شخص حنون خصوصا اخر فترة كان يداريني ويراضيني وما يخلي بخاطري ولا شيء... يدخل وابتسامته تسبقه اذا مشغولة بالمطبخ يا يقعد معاي بالمطبخ او يخليني اترك اللي بايدي عشان اقعد معاه غير الهدايا ووو الخ ما يصبحني الا بالكلمة الطيبة وما يمسيني الا بالكلام الزين ما الحق اتكلم عن شغلة الا اشتراها لي حتى لو ضغط ميزانيته ما هان عليه ان دعمت بسيارتي .. تأجر لي سيارة بمبلغ وقدره لفترة مو قصيرة ما يناديني باسمي.. ما يناديني الا حبيبتي هذا بالله شلون اكرهه.. هذا شلون ما ادور رضاه هذا شلون اقدر اشوفه شخص سيئ |
رد: ما بعد الصفعة الأولى
اعتقد و الله اعلم انك في قمة وازع العدالة اللي يميز شخصيتك، حاسه بانه عنده حق في اللي يسويه، اقصد جميع تصرفاته
بس خلينا من هذي النقطة اللي نحتاجه الحين اكثر من الرد على تصرفه نعرف نفسنا احنا وين، اوكي طيب، و لو انك تقولي في العديد من مذاخلاتك انه كبرت في بيئة معددين، الا انك تجدين صعوبة في العيش حياة التعدد فحضرتك، كأي بنت كنتي تتمني الحياة التاليه: - الزواج من رجل يكون ليك لوحدك - بيت واسع عريض مرتب اثاثه يوافق ذوقك احتاج منك تحطي لي المهنه مع النقطتين السابقتين مما سبق و ذكرتي، انه زوجك كان صرح لك بنيته في تطليق زوجته الاولى و كنت على استعداد انك تربي بناته، او على الاقل كنت تساعدينهم، و على هذا الاساس استمريتي في هذا الزواج -ليش استمريتي، حاولي تتذكري الاسباب اللي خلتك تستمري فيه- بعدين احدى المرات كنتم قاربتم على الانفصال ثم تراجعتم، علما انه كلا القرارين اتخذهما زوجك و لم تتخدي ايا منهما انت |
رد: ما بعد الصفعة الأولى
زين سامحيني بس كلام ريماس صحيح 100%
|
رد: ما بعد الصفعة الأولى
لا ما استمريت في الزواج لانه كان بيطلقها
اساسا في فترة الاتفاق على الزواج ما كان بيطلقها كانوا هاجرين بعض قبل زواجنا 5 سنين كل شخص منهم في غرفة منفصلة بس ما كان فيه مشروع الطلاق.. بس بعد زواجنا تضاعفت مشاكلهم .. لدرجة ان الجيران يسمعون صراخها وتفتح باب البيت وتتكلم معاه بقلة ادب تزوجته لاني كنت اتمناه قبل لا يتقدم لي شفت فيه كل المواصفات اللي احلم فيها ... عدا موضوع انه متزوج نعم كنا قاربنا على موضوع الانفصال كان الامر بسبب غيرتي وهو يشوف ان انه مو قادرة استحمل حياة التعدد بس ما فهمت شلون يعني احط مهنة لكل نقطة ؟ |
رد: ما بعد الصفعة الأولى
لا يا اشراقه ... يعورني قلبي لما تقولون جذي
احس بتأنيب ضمير اتجاهه |
رد: ما بعد الصفعة الأولى
اقتباس:
بس المعروف انه الشغاله شغله النسوان ليش هو حاشر نفسه في كل شئ، بالله عليك حاجة ثانيه الشغاله تعبت تجي غرفتها ترتاح ما يجي يعاتبك ما نحتاج نوجع راس جنابه، ما يحتاج انه هو يتدخل بكل شئ نقطه اخيرة ساعود في مداخله على حده لاقولك رايي في شخصيه زوجك لانه هو المفتاح في مشكلتك، و راح اعطيك مساعده في هذي النقطة لاني احب انك انت اللي توصلي للخلاصة في هذا الموقف اللي يوافق زوجك انه لما الشغالة ما كانت تجلس بغرفتها انه حضرتك تخبريه و تقولي له انها ما تبغي ترتاح بغرفتها، و حيث انها بغربه فلازم نساعدها ترتاح، زوجك يحتاج للعظمه و لي اللي ينفخ ريشه يحتاج لجمهور |
رد: ما بعد الصفعة الأولى
اقتباس:
اللي اريده انك تحطي تطلعك المهني و ترتبيها في سلم احلامك قبل الزواج، مثلا: - اتوظف - اتزوج - جيب عيال، هل بتستمري في الشغل او بتتفرغي للاطفال - الحصول على بيت كبير،, تساعدين زوجك في تملكه اي تستمرين في العمل لاجل تحقيق ذلك,,,,, |
رد: ما بعد الصفعة الأولى
نفسي أرد عليك بس تعبك النفسي وحزنك مانعني
لما تصيري أقوى أيغى أفتح عينك على أخطاء زوجك وعيوبه اللي انت مو شايفتها بسبب حبك له لازم تعرفي اللي لك واللي عليك |
رد: ما بعد الصفعة الأولى
كونه يبتسم في وجهك ويهديك ويقوم بتلبية طلباتك هده واجبات يقوم بها تجاهك لا تبرر له مد يده عليك.ما فهمت من مشكلتك انك متزوجة من رجل متزوج وتعيشين انت وزوجته في نفس البيت ادن لن تنتهي مشاكلك ما دمت انت وهي في نفس البيت ولو بشقق منفصلة هادا الامر كان يجب ان يفرضه اباك مند اليوم الاول حتى تتجنبي حرق الاعصاب لا اعلم بقدرة زوجك المادية لكن من الافضل ان يسكنكي بعيدا.
|
رد: ما بعد الصفعة الأولى
اقتباس:
مااقلنا انكري افضاله ولا اجحديه ... بش ضعي زوجك بمكانة المناسب في ( قلبك ).. ليه لما يزعل تسود الدنيا بعيونك .. و لما يبتسم تبتسم لك الحياة استقلي بنفسك وبذاتك عنه .. لما يداعبك ..ولما يضاحكك ولما يدخل البسمه لك علشان نفسه اولا .. علشانه رايق لو كان بمزاج سئ لن يداعبك لن يضحكك ولن يحادثك وهذا واجبه اصلا كزوج انه يحسن التعامل لزوجته ويعاملها بالحسنى .. الله يفرج همك ويصلح زوجك .. |
رد: ما بعد الصفعة الأولى
معلش اخواتي يليت تحصروا كلامكم عن المشكلة الحاليّه فقط
حتى ما تحرضها على زوجها و خراب بيتها و استقرارها زيون حبيبتي قلبي معك والله وحده يعرف معزتك عندي ودعواتي لج اخواتي ،،. زوجها بشهادتها و شاهده كل من يعرفه إنسان تقي و محترم ولا نزكي على الله احد و تصرفه هذا بساعه كان الشيطان حاضر و النفوس مشحونة وهو قادر على ان يعوضها و ينسيها الي صار على فكره ،،، موضوع الشغل ووو مو وقته الحين لانها مو داخله مساومه و اصرارها عليه بيكون حياتها الزوجية الثمن له زيون ،، نصيحتي لج لا تطلعي من بيتك و حاولي تتجنبه و تتجنبي زوجته لا تعطيها فرصه تستغلها و عطية فرصه يراجع نفسه و يصحح خطاه |
رد: ما بعد الصفعة الأولى
حبيبتي يا زين قلبي معاك
من فترة طويلة حاسينك حزينة و متعبة من خلال حروفك حسينا دا كيف بزوجك الي معاشرك و يشوفك كل يوم يمكن حنانه و ابتسامته و هداياه و محاولة ارضائك كلها حتي يساعدك و انفجاره لموقف سخيف مو للموقف نفسه بقدر انه شايف نفسه يقدم و لا يري نتيجة عليك مفتقدك يا زين و مفتقد حلاوة روحك اذا احنا افتقدناها ما ابررله مجرد اوسع المشهد لنشوفه من جميع الزوايا كيف لشخص متعب و مرهق يقدر يعطي ما حدا يقدر يساعدك اذا ما ساعدتي نفسك اذا محتاجة مساعدة لا تكتميها في نفسك قوليها لزوجك و لاهلك لا تسكتي علي حالك يا زين |
رد: ما بعد الصفعة الأولى
لا ما يبحث عن جمهور
ولا من النوع اللي يتدخل بكل شيء بس موضوع الشغالة خط أحمر وقال لها من قبل اي احد يضايقج صغير او كبير قوليلي... لانها بذمتنا على قولته لدرجة ان ولده الصغير ضرب الشغالة وتعورت اذونها .. عطاها مبلغ وقدره قال لها عشان تبرئ ذمتنا.. يعني دية ومو واجبه يعطيني هدايا .. ولا واجبه يساعدني بالمطبخ .. ولا واجبه يحمل عني الغدى .. ولا واجبه يساعدني في غسيل المواعين مع ان فيه شغالة .. مو واجبه يكنسل اجتماعاته عشاني... حتى اذا راد من بره متضايق يكابر ويبتسم عشان ما اتضايق... يمكن ابالغ بحبي له .. اذا ابتسم والله الدنيا كلها تبتسم لي .. واذا فيه شيء مكدر خاطره قلبي يعورني احبه من محبتي لله .. اشوف فيه القدوة اشوف فيه كل شيء حلو لذلك مو قادرة استوعب انه نفسه الشخص اللي رفع ايده علي... انه لو اقدر اخفف حبي له بس! لو اقدر اقلل هالحب... باكون متزنة انه قاعدة اقول لكم كل شيء يدور ببالي يمكن تقدرون تساعدوني اعيش بصراع نفسي .. هو نفسه الرجال اللي اعرفه واللي مد ايده علي! دودو تعرف زوجي.. تعرف اسمه وتعرف اهو منو .. رجال يخاف الله .. بس مو انسان معصوم مو قادرة ابلع له اللي سواه والله مو هامني وظيفة ولا هامني فراغ الله يشهد عادي عندي اموت من القعده بروحي بس حياتي وياه تكون افضل عادي اضغط على نفسي في امور وايد .. عشانه هو ابيه هو ما ابي شيء ابي ارضيه قربة لله .. في نفس الوقت اللي صار ما ابيه يتكرر بعد ما طقني ... انصدم من نفسه قال كلام وايد بس ما سمعته .. لان كنت مصدومة دايما اعيش نفسي في تأنيب ضمير مشاعري متذبذبة ساعات اقول اي انه السبب انه سوا هالشيء بس عقلي يقول مهما كان السبب ما يرفع ايده.. ووين طقني! على خدي لولا ان معانه رجال جان وريتكم صورة يده مطبوعة على خدي.. وهو يعرف بشرتي حساسة وتتلون من اقل ضربة او اقل خدش خجلة.. خجلة جدا .. اشعر بخجل شديد احس بالاهانة احس ان ممكن الكل هني بيستخفون فيني ممكن لما تشوفون معرفي اول شيء بتتذكرونه ... اي هذي اللي طقها زوجها على ويها امس بمثل هالوقت ... كانت لازالت اصابعه على خدي .. لانه قبل ساعة تقريبا من هالوقت صار الحدث الحين احنا كل واحد بصوب.. ما تغدينا .. هو يشوف نفسه فاشل .. وانه اشوف نفسي اكثر فشلا منه ابي انقذ حياتي ونفسي.. امس بهالوقت كنت اصارخ .. اقول يا ليتني مت قبل هذا وكنت نسيا منسيا .. وارجع استغفر واصارخ واقول يا رب اذا كان هذا عقوبة ذنب سويته اغفر لي وارفع عني يمكن تشوفون ابالغ بردة فعلي... بس الالم ما كان الم جسمي ألم في القلب... جرح في القلب جرح في الذاكرة لانه اخر رجل في الدنيا كنت اتوقع منه يضربني . . يا الله 😢 |
رد: ما بعد الصفعة الأولى
اقتباس:
صح كلامج .. قبل بليلة كان يقول لي .. افتقد ايامنا افتقد ايام قبل لما ما كانت ليلتج كنت اقول خسارة الليلة مو ليلتها وكنت انتظر الصبح يطلع عشان يبتدي يومج... انه افتقد نفسي يا هاجر افتقد ليلة الجمعة .. لما اتجهز من العصر وابخر البيت والبس اجمل ثيابي واطلع لبيت اهلي افتقد كل مغربية لما البس واتعطر ويطل علي ويلاقيني مبتسمة وابخره افتقد لما كنت اطبخ بحب .. كل مرة احاول اطلع طبخة جديدة اخاف يمل افتقد لما يقول لي .. لا تحطين اكل وايد لان انسى نفسي وانه اكل واقوم وانه احس بالتخمة افتقد لما كنت اسوي فيه مقالب واضحك افتقد لما اقول له نكت ويتعمد ما يضحك عشان يقهرني بس اقهره واضحك بروحي وهو ينقهر افتقد زين.... في الفترة الاخيرة صرنا اكثر انسجام وتفاهم صار لما يخلص وقتي يقول لي خلينا بعد خمس دقايق ما ودي اقوم عنج يمكن اختبار من رب العالمين عشان اصبر واتحمل ما هي الخطوة القادمة ؟؟؟ |
رد: ما بعد الصفعة الأولى
اقتباس:
هي مو راضية تتركني بحالي ما بطلع من بيتي دودو انتي تعرفينه .. حتى تقدرين تسالين اي احد من بلدنا عنه بيقول لج هو شنو واخلاقه شنو بس متشتتة ابي اتخذ خطوة .. |
رد: ما بعد الصفعة الأولى
زيون الله يعينك انتي الحين شنو تبين من هالموضوع تبين تعرفي كيف بتستمري معه بعد الي صار وان كانت حياتكم بتكون مثل اول ولا بتتغير حبيبتي ... اليوم و باجر و الاسبوع هذا كله بتكون على هذا الحال ... اذا استسلمتي لكن عقبها .. بتكون حياتك زي الاول و احسن بإذن الله تعالى بترجعي تشوفيه هو الاول ما تغير هو الحبيب و الحامي و المدافع و هو الاب و الاخ و الصديق ما تغير شي اعطيه وقت يصحح ... اعطي نفسك وقت حتى ترتاح هو وحده عارف كيف يرضيك المهم لا تطلعي من بيتك ... خليك بغرفتك وهو لحد عندك راح يجي |
رد: ما بعد الصفعة الأولى
بالضبط دودو
ابي اعرف : - شنو لازم اسوي - كيف راح تكون حياتنا بعد اللي صار |
رد: ما بعد الصفعة الأولى
اقتباس:
خلي هاليومين تعدي على خير و بعدها لكل حادث حديث تصافوا اول عن الي صار و بعدها نشوف لها صرفه كيف ممكن تعزلي عنها او تستقلي بسكن ثان .... وعلى فكرة .. كلامه عن الخدامه ومن الي لاموا تدخله هذا ما يدل الا حرصه و مخافته على الامانه الي عنده و من حقه و واجبه يراعي هالخادمه المتغربه عشان لقمه العيش و الحريم ياما تظلم الخدم بحجه وبدونها و هو من خوفه من الله و عملا بقول رسوله الكريم صل الله عليه وسلم كلكم راع وكلكم مسؤول عن رعيته فلا تذموا تدخله .... اخواتي . |
رد: ما بعد الصفعة الأولى
الله يفرج همك
ويسعد قلبك اذا كان احنا من وراء الشاشة وماشفنا الا معرفك حبيناك واحترمناك.. ونعتبرك اخت غالية.. حاولي تحولي كل موقف لايجابي.. والضرب بالذات طبع او سلوك منفصل عن العاطفة.. يعني رجل يمد يده ع اي كائن يثير اعصابه انت بداخلك خوف خوف من فشل او نهاية زواجك وعموما وفي جميع الاحوال لازم نقوي علاقتنا بالله عز وجل وتكون اخلاقنا ارقى واكثر سمو من امور الحياة الروتينية العابرة يعني انظري دائما نظره ابعد اعتبري كل شي ازمة وتعدي ... سحابة صيف الله يوفقك ... |
رد: ما بعد الصفعة الأولى
اقتباس:
حبيبتي الخطوة الأولى بتكون منه و بعدها بكل هدوووووء تقدري توضحي الي صار و تعاتبيه عن الي بدر منه و ايضا تذكريه و تخوفيه من الله على فعلته حبيبتي هو اذا كان خايف لا تنظلم الخادمه في بيته بتخافي انتي منه ... وانتي انتي .....dff توكلي على الله و الزمي الاستغفار ياتيك مسرعاً |
رد: ما بعد الصفعة الأولى
بتتصافوا يا زين قريب و المبادرة بتكون له مهما كان خطأه اكبر و أكيد هو مدرك لهذا
و ما اظن بيكررها اذا هو مراعي ربنا في الخادمة كيف بزوجته الي يحبها في نفس الوقت لا يفوت الموقف و ترجعي طبيعي معاه حتي تناقشيه ليه سوي كدا بيعطي تبريرات اكيد اذا ما اقنعتك فنديها اذا عندك شرط حتي ما يتكرر الي صار اشرطيه اذا الي صار و وصل لمد اليد سببه الغيرة قولي انك مو قادرة تتحكمي فيها و تحتاجي المساعدة يروح معاك و يسمع حلول الدكتور عشان تقدري تنفديها باريحية |
رد: ما بعد الصفعة الأولى
هدوئك استفزني!!
حتى لو كان زوجك ملاك ما يمنع تكون لك ردة فعل بدل البكاء على الاطلال والحزن على حالك وحالة الضعف اللي انت فيها كان غادرتي البيت وخلليتيه يموت من خوفو عليك بالعكس هو ضامن تواجدك بالبيت وضامن كيف رح ينتهي زعلك بعد يوم او يومين استغرب للي تقول اقعدي ببيتك طيب لييه ! مو احسن تبعد حتى يخاف من انو يفتقدها ويحس بقيمتها! ما اقول تروح تحكي لاهلها بس تبعد ممكن ترتاح وممكن هو يراجع نفسو ويحس انو عندها شخصية اذكر اول زواجنا عندما صفعني زوجي نتيجة رفع صوتي عليه قمت ابكي باعلى صوت وهو يراضيني بشتى ما يملك بعدها مسحت دموعي واستجمعت قواي اسمعته كلاما قاسي واعطيته درسا قويا رغم اني كنت بغربة لا املك احدا من اهلي كنت استمد القوة من داخلي وانتقم لنفسي اقل شي بالصراخ بدل ان اكون تلك المسكينة البئيسة التي لاحول ولا قوة لها اكره هذا الشعور يتعبني اكثر مما اتعبتني صفعته |
رد: ما بعد الصفعة الأولى
انا نصحتها تجلس في بيتها .... مو الكل ينفع معه اسلوب اطلع من بيتي و يجي يركض وراي اولا لاني اعرف ظروفها و اعرف زوجها نصحتها ثانيا من كلام زوجها الدائم قبل الي حصل مو من صالحها تطلع من بيتها وايضا وجود زوجته الاولى الي تستغل كل فرصة مو من مصلحه زيون تعطيها مرادها ... و تهد بيتها لها خصوصاً ان ممكن بقائها في بيت اهلها يطوووووووووووووول و طبيعه زيون و نفسيتها ما تقدر على بعد زوجها و فراق بيتها ربي ما يفرق بينهم بعكس بقائها في بيتها و تحت نظره ... بتكون فرصتها اكبر لاخد حقها كاااااامل بعد ما يصالحها ان شاءالله تقدر تستاذن منه تبقى في بيت اهلها كم يوم ترتاح ... اكيد ما راح يعارض و يمكن ان شاءالله يسافروا سوا يجددوا شهر عسل يارب م |
رد: ما بعد الصفعة الأولى
ماقلت تروح تشتكي لهم
ولكن قصدي تبعد كانها راحت زيارة ممكن يراجع نفسو ويخاف يفقدها وهي تحس انها سوت شي غير الدموع وحالة الكآبة لي هي فيها |
رد: ما بعد الصفعة الأولى
زين
انت و زوجك شخصيتان مختلفتان متضادتان لذلك بشيء من فهم احدكما للآخر ستحققان التكامل بإذن الله سأكتب لك عدة نقاط اريدك ان تتفحصيها جيدا و ان تعطيني رأيك فربما اكون مخطئة : 1_ انت شخصية عاطفية و بالتحديد تعبيرية و هذا يبين ميولك الادبية و قلمك الجميل في الكتابة و القدرة على التعبير ماشاء الله في شخصيتك جانب تحليلي و هو سر سؤالك و مناقشتك لزوجك و رغبتك لفهم كل شيء بالتفصيل . زوجك كما يبدو لي شخص عملي عملي وهذه الشخصية معروفة انها منجزة و منجزة في وقت قياسي و انها تكره التفاصيل الصغيرة و تتعامل مع صلب الامور و لبها . 2_ انت جنوبية غربية و زوجك شمالي شرقي لذلك هو رجل لا يحب تداخل الامور او الانشطة مع بعضها فعنده وقت العمل للعمل و وقت الزوجة للزوجة . ايضا هو رجل يحب كل شيء على اصوله يرى انه كزوج مطالب ان يقوم بواجبه و عمله خارج البيت بينما الزوجة تقوم بواجبها و عملها المنزلي . هذه البداية و سأعود لأكمل ان شاء الله |
رد: ما بعد الصفعة الأولى
اقتباس:
زين حبيبتي زوجك غلط وغلطته كبيرة بس هالشيء ما يخليه انسان سيء وما يتعاشر صدقيني الموقف هذا بتنسيه مع الأيام بس انت حاليا مصدومة وافكارك مشتتة لا تخلي غلطة من زوجك تحطم صورته الحلوة بعينك انتي تتعاملي معه بفطرتك وطبيعتك وهو اكيد عارف هالشيء لا تتغيري علشان ساعة غضب من الشيطان ان شاء الله بيعتذر منك وبيندم على مد يده الله يربط على قلبك ويجعل لك من امرك فرجا |
رد: ما بعد الصفعة الأولى
رب ضارة نافعة..
سكتي عنه و خليه هو يتشطر و يراضي زين ❤️ تستاهل زين يراضيها و يأخذ ب خاطرها .. عطيه وقته ووقفي تفكير |
رد: ما بعد الصفعة الأولى
المعذرة لان صحتي الجسمية والنفسية مو مساعديني ارد عليكم وحدة وحدة
بس اقرأ ردودكم وراح ارد بشكل عام.. قلوب.. زوجي ما يجيبه الصوت العالي ولا انه اقدر ارفع صوتي عليه اذا هو غلط .. مو معناته ان انه بعد اغلط و زوجي ما يتفاعل مع حل روحتي حق اهلي.. مو هذي الطريقة اللي تخليه يركض وراي... ولا تنفع معاه دموع ينفع معاه الصمت والهدوء وياريت اقدر اوقف دموعي واسكت.. آنه غلطتي كانت ان خالفت كلامه سبق وطلب مني اوقف عن شغلة وما اسويها ومع الاسف امس كنت مضطرة جدا اسويها لانه مو معاي وقلت حق بنته ابي الشغلة الفلانية قالت ان ما عندها وتخاف تصير لها مشكلة مع امها... المهم بسبب التراكمات هو اعتقد ان انه اراقبه واتبحث وراه... فلما شافني ما تمالك اعصابه عموما ... ايا كان المفروض ما يمد يده |
رد: ما بعد الصفعة الأولى
اقتباس:
وفضلة بعد الله ..نسبة 90%من النساء تنكر كل مواقف زوجها من مجرد موقف واحد وتطيح من عينة بنت ابيها لاتخلين الي حولنا يغيرون افكارك لاني قريت ردود ماهي من صالح حياتك الزوجية ونا متكد انة يحبك ومتحسف على الي صار والله يوفقكم |
رد: ما بعد الصفعة الأولى
اثارني في موضوعك انه منفصل جسديا عن زوجته مند سنوات وانهما زوجان على الورق فقط. ادا كان الامر كدالك لمادا تغارين ومن من انت لم تدخلي حياته الا بعد خروجها منها ادن غيرتك ووساوسك لا مببرر لها انا لو منك اثق في نفسي حد الثمالى واعيش حياتي بطول ولعرض.مع اني اتحفض على فكرة تعدد لكني استغرب ان بعض نساء تعيش زوجها في جحيم وما ان يقرر ان يفلت بجلده يحلى في عينها.ادا هدات اوضاعك فاتحيه في امر سكن مستقل .موفقة
|
رد: ما بعد الصفعة الأولى
اقتباس:
يا بعد عمري الله يجبر بخاطرج وخاطركم كلكم.. شكرا بنات |
رد: ما بعد الصفعة الأولى
هند .. شكرا لسرعة الاستجابة
نعم كل اللي ذكرتيه صحيح آنه نوعي مثل ما يقول المثل : ابي اعرف البيضة من باضها والدياية ( الدجاجة ) من جابها اهتم بالتفاصيل .. احلل كل شيء ممكن تناظريني وتمشين .. وآنه احلل نظرتج هذي شنو وراها الامر متعب .. متعب احب النقاش* احسه امر صحي ومفيد ويقرب وجهات النظر انه انسانه عاطفية جدا زوجي نعم شمالي شرقي انه وهو على طرفي نقيض هو انسان عملي يهتم بالكل ما يهتم بالتفصيل عنده وقت للشغل وقت للعبادة وقت للزوجة وقت للابناء وما يقبل اي تداخل بينهم دقيق في اوقاته .. ما يتكلم الا بعد تفكير حتى في الحوارات العادية اشوفه احيانا يناقش احد الاساتذة لما يصير وقت انه يرد يسكت ثواني يوزن كلامه و يرد وفعلا انسان منجز.. اعماله دايما مرتبة مواعيده.. لما يقول لج باقي دقيقة واوصل البيت فما يزيد عن الدقيقة اذا تأخر عن موعد ما لو لدقايق يحس ان يومه اخترب ومواعيده اختربت انسان عملي.. |
رد: ما بعد الصفعة الأولى
3_ زوجك لما عرفك كما يبدو انه عرفك في بيئة عملك
لذلك هو اعجب بك بالمرأة الذكية المنجزة النشيطة التي تدير الامور بكفاءة عالية فهو لم يعرف شخصيتك العاطفية الا بعد الزواج و بما انه شخص عملي فهو لا يهتم بالجانب العاطفي كثيرا و يتضايق من الانفعالات العاطفية التي تصدر عنك و ربما لا يفهم انها جزء طبيعي في شخصيتك . 4_ زوجك مضغوط في عمله مضغوط من زوجته الاولى فهو يرى انك امله الوحيد للشعور بالحب و الحنان و الاستقرار و الحياة الزوجية الدافئة .. انت بالنسبة له السكن و الحضن الذي يريد العودة اليه في المساء ليحتويه و يزيل عنه عناء يومه و يخفف من ضغوط الحياة التي يعانيها . مازال للحديث بقية |
رد: ما بعد الصفعة الأولى
الله يهدي بالك ويصلح احوالكم ويربط على قلبك يا زين
ترى اللي حصل نعمة من ربنا .. ونقطة تحول بحياتكم للأفضل بإذن الله |
رد: ما بعد الصفعة الأولى
زين
5_ انت المرأة المناسبة لهذا الرجل انت التي تستطيعين ان تدفعيه للنجاح .. انت بقلبك الكبير و حنانك و حبك له ما وجده عندك لم يجده عند زوجته الاولى باختصار هو يحبك و يحب جانبك العاطفي الايجابي و لكنه لا يستطيع التعامل او تقبل جانبك العاطفي السلبي بالنسبة له . 6_ انت مصابة بمرض روحي حسب ما كتبتي لذلك تعانين من كثرة الوساوس و من الاكتئاب و الحزن الشديد و مرات بلا سبب معروف عندك و هذا ما يفعله الشيطان يوسوس و يحزن الانسان و يحاول منعه من عيش حياة طبيعية مستقرة فاكثري من الطاعات و قراءة القرآن و سماعه باستمرار و حاولي طرد الافكار و الوساوس و ايقافها و عدم الاسترسال فيها . بقي جزء اخير يتعلق بمشكلتك في موضوعك هذا . سأعود بإذن الله |
رد: ما بعد الصفعة الأولى
اقتباس:
لو تزوري استشارية نفسية تخرجك من دوامة افكارك وتوريك الامور بمنظار اخر غير عن اللي تشوفين فيه انتي وع فكرة حتى لو كنتي راضية ان مايكون عندك كيان مستقل خاص فيك مايعني ان الوضع صحيح انتي مو مبسوطة وهذا دليل ع ان فيه شي غلط منتي راضية تعترفين فيه لانك شايفه موافقته ف كل شي هي الصح وع فكرة كمان من اخر مشكلة واجهتيها وقررتي تضغطي ع نفسك عشانه كنت عارفه راح تنفجري في يوم الوضع اللي بينكم غلط انتي فاكرة لما هو راضي عنك خلاص كذا الوضع مضبوط وانتي مو مهم رغباتك ومشاعرك اهم شي هو |
رد: ما بعد الصفعة الأولى
اقتباس:
يمكن اللي صار يخليه يحس فيك اكثر وينتبه لما تريدين حاوريه ناقشيه وقوليله كل اللي تحسين فيه خليه يشعر فيك وفي الضغط اللي انتي تحته سمعيه صوتك وصوت افكارك مش صدى صوته هو انتي انسانه راءعة لاتخسري نفسك عشانه او عشان غيره حافظي عالرقية الوسواس متعب جدا شفت قريبة لي قد ايه تعبت منه بس بتمسكها بالله ودعاءها واختلاطها بالناس ربي خلصها منه |
| الساعة الآن 04:11 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©