|
رد: خطيبتي باردة !
شوف يا ميسر باذن الله فكرت في موضوعك ووجدت
انه الاهل تعمودا ان لا تتواصل مع ابنتهم ... وذلك لانك لم تحدد الزواج ويعرفون ظروفك .. وذلك لخوفهم حتى لا تشبع منها او تاخذ عليها بعدها تتماطل وما تعجل الزواج ... او تمل منها وتتركها .. لانه عارفين انك راح تطول لين ما تتزوجها للعرس ... وها انت اكملت سنين ولم تحدد موعد للزواج .. ولا احد يلموك لظروفك فالكل يعاني من ظروف .. لكن اصبر الى ان يكتب الله العرس ... وهي تسمع كلام اهلها لانه تجد الشي في صالحها .. رد الام عليك اول مره بهذه الاسلوب و الطريقه من خوفها على ابنتهم ..يخافون ان تكون لعاب او غير جاد ... هم يردون تزوج ابنتهم لكن في نفس الوقت يخافون عايها وحافظا عليها ...بدر منهم ما بدر اذا تقدر تحدد موعد للزواج او العرس لهم ..وتفي به جيد جدا |
رد: خطيبتي باردة !
اقتباس:
تفاءل بالخير انت الله يهديك ولكل حادث حديث |
رد: خطيبتي باردة !
ميسر ... سبحان الله كانك تتكلم عن اختي الصغيره17 سنه
متعلقه في امي وابويه ويحذروها ماتكثر كلام في الواتس مع الكل تخيل احنا اخواتها يدوب ترد كلمتين بعد شهر او اسبوعين لكن لما نجلس معاها شي ثاني وتتاثر فينا بقوه وترد في الواتس معانا يعني لما تتزوجها اذا حبتك بتكون مطيعه وحبوبه باذن الله لا تستعجل انا عرفت من بداية موضوعك انه احد قالها لا تردي عليه وهي بحكم انها والدتها اكيد انها تعرف انه امها ادرى منها في ذي الامور بما انك كلمت والدتها ويدوب اقتنعت صدقني كلامها لك تسليك ولا تحط اللوم ع زوجتك ابداً لكن تاكد انها مش بارده |
رد: خطيبتي باردة !
اقتباس:
ان البنت تعطيني حياتي وكأنها عندي في البيت ، في هذه الحاله بعد الزواج بيكون مافي فرق كبير ابداً وبالتالي بيصير بيننا ملل وان مافي شيء جديد ، لكن لما البنت تعطيني نسبة 30% كحد أقصى ستجعلني اشتاق للـ 70 % الباقيه ، وهذه لن تحصل الا بعد الزواج وبالتالي راح اتمسك فيها جداً ، انا صرت احلل حتى على نفسي *_^ ( لكن الكلام الصحيح والمنطقي يجب ان يقال ) |
رد: خطيبتي باردة !
اقتباس:
ويعني غالباً الامور تقاس بالعقل والمنطق ، وانا اللي يغيضني انها مسلمه لامها عقلها بالكامل توديها يمين ويسار على كيفيها . لكن ان شاء الله متيسره |
رد: خطيبتي باردة !
السلام عليكم اخواني خواتي
ارسلت مع البنت على الواتس اب ... ياليتني ماارسلت ! قوة تنقييييييط بالكلام ايه..لا .. كويس بس مافي غيرها ! وانا اسولف عليها واسأل واحاول اني اعودها تدخل معي عااادي لكن ردودها بسيطه للغايه وكانها تسكتني ! بنشوف شيصير معها .؟ |
رد: خطيبتي باردة !
الواضح أنها غير مشتاقه لك او منجذبه لك اسئلها شوف قلها لما نتزوج كذا بيكون أسلوبك بارد ولا
|
رد: خطيبتي باردة !
اقتباس:
الظاهر لنا فعلا وكانها مغصوبه حتى البارح قبل لانام قلت: تصبحين على خير شفت الرساله وطلعت وعلييييييييها وقمت الفجر صباح الخير قالت صباح النور وبس تعرفون اسالة الاختبارات اللي نظامها ( نعم و لا ) ؟ هذا نظامها معي الحين والله اني كرهت البنت او بالاصح امها كرهتني فيها !! بالله اسالكم فيه بنت بهالااسلوب ؟ مهما كان امها تشد عليها ؟! |
رد: خطيبتي باردة !
طيب يا آخي دام البنت شورها بيد امها
كلم الام ، قولها عن تآثير تدخلاتها بينكم وان لمصلحة بنتها تخلي البنت هي الي تقرر حياتها لاان استمرار تدخلات الام بعد الزواج معناه فشل الزواج والبنت قول لها لازم تحطي معي النقاط علي الحروف حياتنا بهالشكل ماراح تمشي ومافي رجال بيرضئ بهالوضع وان كانت حريصه انها تستمر اكيد بتصحي وخلها كم يوم هي وامها يفكرو زين بكلامك روح لهم البيت افضل وتكلم بوجود الثنتين عشان يعرفو انگ جاد بكلامك وان استمر الوضع علي ماهو عليه ( الله يعينك صراحه ) |
رد: خطيبتي باردة !
الحين انت حاولت ومثل يقولون سويت باصلك ومالهم حجة عليك
وتفكير البنات ترا مو مختلف كثير حركاتهم واضحه البنت احس انك انت اخر اهتماماتها شي مو اساسي عندها وسنه مو عذر بالعكس سنها دافع قووي انها تميل لك بس الام بعد لها دخل كبييير بسبب نصايحها الي الله واعلم كيف طريقة سردها وكانهم يبون يحسسونك انك تحمد ربك ماخذ بنتنا !!!! انا مو عاارفه انت ليش راضي على نفسك هاالشي يمكن متعلق بالبنت؟؟؟ وانسان طبعك شريف ونيتك سليمة اكيد هالشي ومن غير اتهام لهم حنا مانعرف اسبابهم الي تخليهم يعاملونك هالمعاملة بسبب تاخرك بتحديد الزواج هذا مو سبب كافي لتصرف البنت وامها وفي اصول وفي كلام منطقي باحترام ممكن ينقال + ان البنت اذا تعلقت بك ابد ماراح تحسسك باي شي مو مقبول من ناحيه حبها اذا كانت تميل لك بيكون تصرفاها مختلف تماما وانتظارها لك بشغف وهذي سنتين كفيله انها تخليها تتعلق بك وتهون كل الامور الصعبه بينكم البنت في خلال هااسنتين ماحبتك وهذا واضح من تصرفاتها وانت مجرد شي اقل من عادي لها والدليل ماتبدي لك اقل اهتمام كلامنا هنا ونصايحنا مو حل جذري بس سبحان الله يمكن ربي يسخرلك حل باي شكل واي سبب حتى حمااسك قل للزواج ممكن واذا انت مستعد تقدم للزواج وتتنظر وعندك وقت تتحمل كل العواقب استمر انا بحكم اني بنت واعرف بالبنات واحساسي يعني مو مرة مختلف لكن تحكمه التربية او السن او الثقافه والعادات والبيئة قبل فترة مو طويلة انخطبت لشخص ماتقبلته واستخرت كثييير عشان انا ماعرف مصلحتي ماحسيت لابميل ولا باي شي ناحيته وكنت الحقيقة اتهرب من اتصالاته ومارد على رساايله الا نادرا وكان عندي اسباب قوووية اني ارفضه واستخرت استخارة نهاائية و وقررت الانفصال وانفصلت والحمدلله نصيحتي لك اترك كل شي جانبا واستخير استخاااارة صحيحة واحسم الامر وبعد الاستخارة لابد ان الله يهيئ لك اسباب ترضيك والله يريح بالك ويلهمك الصواب |
رد: خطيبتي باردة !
مع رد الأخت سمو الورد حفظها الله ،،،
عليك بالاستخاره ،،، بصراحه زوجتك وأمها يرفعن الضغط استغفر الله هذا مو خجل أبدا هذا قلة ذووووق بصراحه وش انت طالب منها عاد ؟؟؟ مجرد تواصل بسيط واهتمام ابسط واضح جدا البنت ماحبتك ولاتعلقت فيك البنت اذا حبت ماتصبر تنتظر اي بادره منه لازم تحط النقط ع الحروف معها وقلها لو مافيه حب عيب عليك تطلعين مانردين علي !!! وامها لازم ماتتدخل بينكم بمجرد ماوافقوا عليك وتملكت عليها خلاص انت احق الناس فيها ولاهو عيب ولاحرام تتواصل معك بالواتس ع الاقل وتبدي شي من اهتمامها ومشاعرها العيب والله تصرفاتها هي وأمها والله يعينك بس ! |
رد: خطيبتي باردة !
ارسل لها ....انت تغيني ولا تبغيني ..
اذا قالت ابيغك قلها انا ما ابييغك ....ولا تتواصل معها نهائيا بعدها وشوف ردة الفعل ...اسبوعين ......اذا ما في ردة فعل اعرف انها ما تبيغك فعلا ... بعدها روح عند امها وابوها ...وقلهم كلام صريح يا ابيض يا اسود .... وهذا اخر شي |
رد: خطيبتي باردة !
اقتباس:
والله يااختي الكريمه ، انا كلمت امها وفهمتها ان تدخلاتك بيني وبينها مالها داعي ابد ، انت ممكن توجهين بنتك ، لكن تمنعينها لا! والبنت فهمتها وعلمتها اكثر من مره ، لكن تعلم من ؟!!! البنت تحس ان ماعندك احد ، او انها فعلاً ماتبيني ! حتى ارسلت لها مقطع مضحك ، تدخل وتطلع من الواتس اب ولا تشوفه !! ياناس بالله بالله هذي وحده شاده عليها امها او حالفه عليها ! وش هالام النفسية !!!! شكلي بخربها معهم واكرش البنت اقتباس:
اشكرك اختي سمو الورد على مشاعرك الجميله تدرين وش المشكله ، اسمع احيانا وليس كثير ابدا ان البنت تبيني ومدري ايش !! والله ثم والله ان تصرفاتها تختلف اختلاف جذري عن اللي اسمع ! يعني انا ارسل لها بالواتس اب وتدخل وتطلع اكثر من مره ولا تشوف رسالتي !! وتشوف ولا تعلق او ترد ، مااحس منها اي معنى للإهتمام والتقدير ، احس ان استغلت حبي وتقديري لها بشكل سيء جداً وأنا يغيضني جدا اللي يتصرف هذا التصرف ! عشان كذا ممكن اجيب فيهم العيد واحوس الدعوة كلها ،! الله يكتب اللي فيه الخير ياناس |
رد: خطيبتي باردة !
اقتباس:
صاحبة السعادة ، والله ماعاد اعرف هي تبيني ولا لا ، اذا جيت اكلمها بالواتس اب احس اني اجر الكلام منها جرر ! وانا امهد لها الطريق وافتح لها الباب من اوسع ابوابه ، وتتهرب كثير ! اقتباس:
الله لايجيب لهذه المرحله ، لكن إذا وصلوها حدها بخربها معهم . |
رد: خطيبتي باردة !
ان شاء الله خير
لايضيق صدرك بعض الناس مازال يعتبر التواصل اثناء الملكه يعيب البنت واهلها وممكن الرجل يسيء الظن فيهم وبترييتهم وبعض الأهل يخشون المشاكل قبل الزواج من كثرة التواصل والاخذ والرد التمس لهم العذر ان كان هذا بس عذروبهم وبتمل منها بعدين ومن ملاحقها لك دايم الرجل بالبدايه مندفع والمره عاااادي عقب تنقلب الآيه سبحان الله ومأدام اختك صديقتها وتعرف منها انها تبيك بس اَهلها رافضين مالك الا تصدق لان فعلا مازال فيه ناس كذا متشددين من هالناحيه الله يسعدك مع زوجتك الان ودوم وكل المملكين والمتزوجين 🌹 |
رد: خطيبتي باردة !
اقتباس:
قلت : بذمتك ليه اجر الكلام منك جر ؟ قالت: مااقصد تجر الكلام ، بس ماعندي شيء اقوله . قلت: شوفي انا لي يومين وانا اسولف معك ، وانت تنقطين علي بالكلام وهذا الامر مايعجبني ولا ارضى اكون كلب عندك تجدعين عظمه لي وتوقعين ارضى ! قالت: لا مااقصد ومدري . قلت: طيب بسألك ، انتي ماتحسين انك مخطيه بحقي ؟ قالت: لا قلت: ابد ؟ قالت: ايه قلت: يعني انا ابالغ ! قالت: مدري والله . ثم سكتت فترة وقالت : ليه انت تشوف مخطيه بإيش ؟ قلت: إذا ماتعرفين اخطاءك ، لا تنتظرين احد يجيك يعلمك فيها ؟ قال: انا مااشوف اني اخطيت بشيء أبداً . قلت: طيب وسكت بعدها .... |
رد: خطيبتي باردة !
صحيح تذكرت
لما سألتها ماتحسين انك مخطيه بحقي ؟ قالت: لا قلت: شلون عرفتي؟ قالت: انا اشوف كذا؟ قلت: لا مو تقولين لي شفت كذا، على اي اساس قلتي هالكلام؟ قالت: الموضوع واضح قلت: طيب خلاص |
رد: خطيبتي باردة !
اقتباس:
واضح ان الامور تراكمت في نفسك ,, وبديت تحقد عليها واعصابك فلتت لا تبدأ تواصلك معاها بأسلوب الهجوم ,,, الي انتهى راح وابدأ معاها بأسلوب ثاني لا تحط الغلط عليك وعطها فرصه ,, اجذبها بأسلوبك وقرب وابعد عشان ما تكون لها حجه اذا الحال ما تغير بعدها ,,, اعرف انكم مختلفين وممكن ما تتفقون وبكذا فعلت ما يمليه عليك ضميرك |
رد: خطيبتي باردة !
لا تدخل الواتساب ولا تتواصل معها
وبعدين كثرة السلام تقل المعرفه انت حاول تقربها منك مو تنفرها عنك حاول تكون اكثر شفافيه يعني ارسلها وردة مثلا واترك الواتساب وبعد فترة اكيد بتسأل عليك اما هذا الشي الي تسويه ملاحقه .... وهي خطيبتك يعني انت المفروض تكون اقرب رجل لها .. مو شرط انك تكلمها كل يوم وكل ساعه وغير اسلوبك معها وارخي الحبل شوي |
رد: خطيبتي باردة !
السلام عليكم ورحمة الله وبركاته
بقول لكم وش الجديد اللي صاير انا الآن لي 5 او 6 ايام ارسل لها ، لكن بالمختصر ( لو ماارسل لها ماارسلت ) عجزت افهم وضعها !! ياناس هل فيه بنات بهذه الطريقه لو كانت فعلا تحب زوجها ؟ اتمنى اجابة شافيه ووافيه لذلك ! تقول انها تبيني وهذا حسب كلام اختي ، ولكن مااشوف تصرفاتها تدل على هالشيء ابداً . |
رد: خطيبتي باردة !
اقتباس:
انا اقول لك : بس مجرد كلام بسييييط لا يمكن تسميه محادثه ، لان ردودها قاتله للكلام ومختصره جداً مثلا: شلونك تقول تمام اقول:توك صاحية من النوم ؟ تقول:ايه اقول:تعشيتي؟ تقول:لا اقول:من متى صاحية ؟ تقول:البارح اقول:ذاك اليوم صار معي كذا وكذا ورحت وجيت وفعلت و و و و و و و و و و و و و و و و و و و تقول:كويس اقول:اي والله الحمدلله تيسرت مافي رد اقول:وانتي علومك؟ تقول: طيبه أقول:تصبحين على خير ( مافي رد ) وانتهى الفلم |
رد: خطيبتي باردة !
وضعك مشابه لوضعي وخطيبتي كانت باااااااردة جدا وأنا الآن على وشك طلاقها عليك بصلاة الاســتــخـــارة وجرب توقف مراسلتها إلى الحج وشوف النتيجة النهائية الأهم أنك إذا استمريت انت بنفس طريقتك ستبقى على ما أنت عليه من معاناة , أوقف كل شئ وسيظهر معدنها إذا تريدك أو لا dgn |
رد: خطيبتي باردة !
اقتباس:
وبالنسبة لكلامك ( اوقف كل شيء وسيظهر معدنها إذا تريدك او لا ) سبق ان توقفت عن مراسلتها شهر ونصف تقريبا ولم ارى منها اي ردة فعل . وبالامس لما كنت اتكلم معها ، حاولت انها تتكلم ، وفي الاخير قالت: بروح انام قلت: مسرعك توك صاحيه ! قالت: عاد فيني نوم ! وانتهى الكلام . الله يكتب اللي فيه الخير |
رد: خطيبتي باردة !
الله يكتب لك ما فيه الخير
- جرب تذهب برفقة والدتك او اختك وتجلسون معها جلسة مصارحة وتضعون النقاط على الحروف. - أو جرب تطلب المهر منهم إذا كنت دفعته لهم وما ذا ستكون ردت فعلهم لك وسيتضح هل هم شارينك وراغبين فيك أو لا يريدونك . تحياتي |
رد: خطيبتي باردة !
بشَّر ي اخي كيف وضعك مع مليكتك الآن ؟
|
رد: خطيبتي باردة !
اقتباس:
انا توقعت ان الام لها يد للأن في الموضوع ، فمسكت الام وكلمتها تقول: انا سامحه للبنت تتكلم براحتها معك فقلت : طيب ليه ردود البنت مختصرة جافه جداً وكأنها تصرفني !! ولا كأني بسولف بعها ؟! قالت: مادري عنها ! قلت: البنت حتى احيانا تدخل رسائلي اكثر من 5 او 6 مرات وبعد ساعه او ساعتين ترد ورد بارد بعد ! قالت: كذا انت معك حق ، بكلمها واشوف ! وبعدها بفترة ارسلت انا للبنت بضحك معها واسولف ، وانا اللي اسولف لحالي للعلم ، وهي بس ( زين - حلو - طيب - مدري ) واذا خربتها جمله او جملتين ويالله يالله ! وقلت يابنت وش فيك ، ليه كلامك كذا ! انا اسولف معك وانت ردودك باردة الله يهديك ! ليه تكلمين كذا ، اخذي راحتك عادي ! قالت: ماعندي شيء اقوله قلت : طيب ، قولي لي نكته او اي شيء ! قالت: ماعندي قلت: شوفي من النت جابت لي نكته بعدها وقعدت اعلق عليها فأرسلت: صورة الوجه اللي مستغرب !! وحاولت اخليها تتفاعل وتاخذ راحتها معي فقالت: بروح انام قلت: توك صاحيه مسرعك ! قالت: عاد فيني نوم قلت: انقلعي وعليها الى وقتك الآن، واخبرت والدتها بهالاسلوب وان انشدي بنتك اذا تبيني ولا لا قالت: البنت تقول: ماعندي شي اقوله ! فسحبت نفسي ، وكيفها ( لعل الله يحدث بعد ذلك امرا ) . |
رد: خطيبتي باردة !
هههه
انقلعي مره وحده !!! طيب يمكن فعلا ماعندها شي تقوله وسع صدرك عليها وان شاء الله بتنطلق بالكلام معك شوي شوي تفائل خير تجده الله يسعدكم ويوفق بينكم التوفبق المبارك |
رد: خطيبتي باردة !
السلام عليكم ورحمة الله وبركاته.
مرحبا أيها الأستاذ الكريم، في مجتمعي لو الخاطب تأخر عن ستة أشهر دون أن يتزوج تكون علاقاته أشد حذر.. ربما أهلها خائفين لأنها سنتين فليست قليلة وقالت لك السبب بنفسها أهلها وفي ظل الظروف كثيرا مانسمع بعد سنوات لم يتزوجا.. لم أقرأ كل الردود إلا البداية فقط لا أعلم هل الزيارة مسموحة لك أم لا إذا نعم اذهب لها وتعرف عليها، وعجل بالزواج مادام الطرق ميسرة لك التأخير أحيانا يعقد الأمور. وفقكما الله لكل خير. |
رد: خطيبتي باردة !
عفكرة أسلوبك معها بكلمة انقلعي غير لائق لا تنفرها منك، اعطيها مساحة تعبر عما في نفسها وأنت كن صامتا فقط، صمتك وهدؤوك سيجعلها تتفاعل معك، إذا أول مشكلة هكذا فكيف بالحياة معا فلابد أن تتحلى بالصبر وعدم العجلة .
|
رد: خطيبتي باردة !
اقتباس:
اقتباس:
اشكرك على كلامك الطيب اخي الغالي واشكرك ايضا على الملاحظات التي أبديتها ،، وبالنسبة لردي ( انقلعي ) فهذا كان بسبب اسلوبها الجاف جدا من وقت طويييييل معي ، وحاولت ان اكون هادئاً معها بقدر المستطاع ، ولكن دون جدوى ! انا حالياً لم ولن ارسل لها ، براحتها . وشكرا لك |
رد: خطيبتي باردة !
خطيبتك نسخ ولصق من طليقتي 100% ..
وأنا أحذرك أن تتزوج الا بعد أن تتأكد أنها فتاة تحبك وعقلها ونفسيتها طبيعية ولا تعمل بالريموت كنترول من أهلها والا ستكون حياتك قبس من الجحيم . والأعجب من ذلك كله ما موقفك كرجل ذو غيرة من متابعة زوجتك لكرة القدم أين غيرتك عليها كرجل عربي مسلم , لا تنسى أنها ستربي بناتك وأولادك ؟ وأخيرا العمر 19 أعتبرها طفله , فتحمل هذا العمل ما دام أخترت هذا العمر |
رد: خطيبتي باردة !
اقتباس:
تقول انه تبيني وانا اشوف عكس ذا كله ، واللي شايل همه انه كما ذكرت تتابع الكورة وتشجع اللعيبه !! اقول لامها لكن تعلم من ! صدق من قال: اذا بغيت تعرف البنت انشد عن امها امها خالتي لكن ماكنت اعرف شخصيتها واسلوبها في الحياة وهذا خطأ لكن الكلام بيبين بعد ماحدد الزواج ان شاء الله اذا البنت تبيني ولا لا لان ماراح ااجل الزواج ابداً . |
رد: خطيبتي باردة !
اقتباس:
مع إحترامي الشديد أيها الأستاذ الكريم علو النفس اتمنى أن لاتسقط تجربتك السابقة مع أي أحد هنا، طليقتك وزوجة الأستاذ تختلفا لا أحد يشبه أحد فهذا ظلم أيها الكريم.. وأقول لصاحب الموضوع تعتبر فتاة ليست ناضجة هي تحبك لكن لا تعرف تعبر ومنضغطة من أهلها المقابلة بينكما أفضل من التليفون ومحادثات الواتس ستعرفها عن قرب وتكون واضحة أمامك أفضل من كل ذلك إقرأ كتاب الصحة النفسية للمرأة فيه كل شيء يخص الأنثى ورائع وسيفيدك في التعامل معها للدكتور محمد المهدي واتمنى أن لا تأخذ من تجارب سلبية فقط السلبية بل لتتعرف كيف تتعامل معها وتكون حياتكما ناجحة أمنياتي لكما بحياة ملئية بالاحترام والحب والسلام. |
رد: خطيبتي باردة !
في بعضهم مايعرفوا يعبروا على الجوال أو وسائل التواصل الأجتماعي
ولكن اذا جلست معاهم وجهاً لوجه اتشوف السواالف والكلام وشخصية غيير تماما جرب تجلس معها, زورها بيت اهلها وشوف .. |
رد: خطيبتي باردة !
انا اميل لرأي الأخت سقيا
انه الأخت يمكن فعلاً ما تعرف تعبر و ركز على نقطة انها صرحت انها تبغاك هذا هو لب الموضوع |
رد: خطيبتي باردة !
ربي يسهل أمورك ....انا اتوقع انها تسمع اللي حولها كثير وطبق عليك وع بالها الرجال واحد
تحتاج حد يوجههاا وينصحها ...فاهمه الحياة غلط ... |
رد: خطيبتي باردة !
اقتباس:
انا الحين مستوي معي الموضوع الين يجي ليلة الدخله والله يكتب اللي فيه الخير |
رد: خطيبتي باردة !
تصرفاتها غريبه. كثير من البنات يتمنون أمنية الإهتمام والدلال والعاطفه والكلام الرومانسي من الزوج. انت قدمت لها كل هالأمور على طبق من ذهب وهذا المفروض. لكن للأسف هي جدا شحيحة وبخيلة في مشاعرها والأغرب انها مع غيرك كريمه جدا بالكلام.
أتمنى يتبدل حالها بعد الزواج. بالتوفيق |
رد: خطيبتي باردة !
اقتباس:
الله يكتب اللي فيه خير |
رد: خطيبتي باردة !
السلام عليكم
لي الآن اكثر من شهر ماكلمتها ، وإلى يومك هذا لم ترسل شيء ابد ! رأيكم يااخوان ... |
| الساعة الآن 09:54 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©