رد : هل أقبل أن أكون زوجة ثانية دون علم الزوجة الأولى ؟
 

اختي ماختلفنا بالسر عن زوجته وفهمنا ليش
طيب وبالنسبة لاهله
لا اقل من ان ياتي والده واخوانه
لا تقولين كبير في السن وهو يسد عن غيره
الزواج زواج اسرتين
فاهتمي في هالموضوع ولا تتنازلي فتندمي
انت ناضجة
الدنيا مالها امان
والمراة التي تتزوج بدون اهل الرجل يخلون مسؤوليتهم منها في حال صار اي شي

بيحط لج اعذار كثيرة
المفروض ما تقبلينها ولا ترضين بتقليل قدرك

رد : هل أقبل أن أكون زوجة ثانية دون علم الزوجة الأولى ؟
 

الله يبارك فيش اختي
زوجها عاقد النيه على الزواج وانا اشوف انش انسانه طيبه ومقدره للظروف ومراعيه لمشاعر زوجته الله يشفيها
بس ابي اقولش انتي داخله على رجل سيعدد وايضا زوجته مريضه فالوضع هنا يختلف
حقش بيكون مهضوم وبشكل كبير وفي هذه الحاله يجب وضع المراعاه بعين الاعتبار
ليس فقط في المبيت بل في امور كثيره
السؤال ؛ هل عندك استعداد نفسي لتحمل ذلك ؟؟ حتى لا تظلميها او تظلمي الرجل او تظلمي نفسك
هل انتي على درايه كامله بما مقبله عليه
المطالبه بالعدل بينك وبينها سيختلف هنا بسبب وضع زوجته الصحي
هل انتي قادره العيش معظم الوقت لوحدك هل تستطيعي التضحيه في بعض حقوقك ؟؟
واضح انه اراد الزواج فقط ليعف نفسه !
اذا لديك القوه والقدره لذلك الله يوفقكم

رد : هل أقبل أن أكون زوجة ثانية دون علم الزوجة الأولى ؟
 

اللي فهمته ان كل ذي الاخبار جايبتها من عنده
مرض زوجته وموافقة أهله والى الان ماشفتي شي
على أرض الواقع؟
تأكدي من مرض زوجته .. وأهله لازم يحضرون رجال ونساء
مو شرط كلهم بس من ينوب عنهم من الكبار زي الام والاب الاخ والاخت
ولا تطلعين من بيت ابوك الا على بيت جاهز لك..
والله يوفقك

رد : هل أقبل أن أكون زوجة ثانية دون علم الزوجة الأولى ؟
 

مريض السرطان يحتاج دعم نفسي فكيف اذا عرفت زوجته
اللهم اشفها واجعلها تربى اولادها
ومن قالت انه مرض مميت بل كثير تشافو بقدرة الله في حين يموت سكته اصحاء
كتب الله لك اختي لك الخيرة في امرك

رد : هل أقبل أن أكون زوجة ثانية دون علم الزوجة الأولى ؟
 

ان شاء الله بحاول أخلي الوالد يسأل أكثر بهالموضوع .. تسلمين ع الرد

رد : محتاره وأبي مشورتكم لا هنتم
 

مشكوره فديتج وجزاج الله كل خير .. والحمدلله استخرت اكثر من مره مرتاحه له بس هم متردده وخايفه ولين الحيني ع البر ما تزوجته يبي لي اخذ قراري عشان جذي قاعده استشير كل اللي حولي .. هم انا حزينه عليها وع حالها بس هذا شي ربي كاتبه مالي غير الدعاء لها .. وان شاء الله هذا اللي بيصير ولا بلاها من هالزواج اصلا

رد : محتاره وأبي مشورتكم لا هنتم
 

وهذا اللي بيصير فديتج ما راح اتنازل عن هالشرط يكفي اني تنازلت عن موافقة مرته وعلمها بهالزواج خوفا عليها والله .. والله يجيب اللي فيه الخير بشوف شنو يصير هالايام وبقولكم اول بأول .. جزاكم الله كل خير عني خففتوا علي وايد من التفكير

رد : هل أقبل أن أكون زوجة ثانية دون علم الزوجة الأولى ؟
 

وهذا اللي امخليني اوافق عليه لانه عنده سبب مقنع وقوي احسن من غيره من اللي سبق وتقدموا لي اغلبهم يذم بزوجته الأوليه ويبي يتزوج بس عشان التعدد .. وان شاء الله اخوي بأكد ع هالشرط وان شاء الله خير .. تسلم ع الرد والنصيحه جزاك الله كل خير عني .

رد : هل أقبل أن أكون زوجة ثانية دون علم الزوجة الأولى ؟
 

محد يتمنى له هالشي اختي بس كل واحد وضروفه ومدى قدرته ع الصبر والتحمل والتضحيه برغباته عشان شريكه وهو جزاه الله خير يقول صبرت وايد عليها بس المرض له احتمال كبير يرجع كل فتره وهذا مب اول مره تتعب فيه مرته ربي يرزقها الصحه والعافيه فمستحيل عليه بيعيش طول عمره وهو جنه مب متزوج .. الحلال ابرك له من الحرام دامه عارف نفسه بس المهم ما يظلم الطرفين .. وتسلمين ع الرد

رد : هل أقبل أن أكون زوجة ثانية دون علم الزوجة الأولى ؟
 

اكيد اختي مثلما ذكرت في ردوودي القبليه هالشرط لازم بشرطه دامه يبي يعف نفسه بالحلال خل يكون قد هالزواج والله يقدم اللي فيه الخير .. تسلمين ع الرد وجزاج الله كل خير .

رد : هل أقبل أن أكون زوجة ثانية دون علم الزوجة الأولى ؟
 

اكيد اختي امفكره من هالناحيه وما راح يفرق عن وضعي الحالي بشي بس العوض ولا القطيعه مثلما يقولون ومافي وحده ترضى تقبل ع مثل هالحياه والا هي مضطره وشي اكيد اني امفكره بسلبيات وايجابيات ها الزواج بشكل عدل والحمدلله بالنسبه لي الايجابيات اكثر .. وهي مسألة وقت يا انها تشفى وحزتها اكيد بصمم ع انها تدري وهو قابل بهالشي بس حجته انه ما يبي لها تعرف بالوقت الحالي لانها مريضه بس مع الايام بيمهد لها وان شاء الله ما تطلع نسره ع حظي حزتها ههههه وانا اللي قاعده افكر فيها هالكثر وتتقبل قرار زواج زوجها ع خير .. ومع الوقت وشوية صبر ان شاء الله كل شي يتغير ويصير حالها من حالي والعدل مطلوب منه في هالوقت واكيد حزتها ما راح ارضى بالتنازلات الحاليه ما احب الظلم لحد واكيد ما راح ارضاه لنفسي واصلا انا هدفي من هالزواج هي الذريه متنازله عن كل شي الا اني اكون أم بيوم من الايام والحمدلله انا وحده قنوعه وايد وربي بيرزقني ع قد نيتي ومحسنه الظن فيه من يدري يمكن يعوضني عن كل اللي شفته بحياتي ويكون لي نعم الزوج واحسن عن طليقي بوايد .. الله لا يخيب رجا حد فيه بس متفائله ان شاء الله .. ومشكوره ع ردج حبيبتي وان شاء الله ربي يبارك لج بحياتج ويرزقج كل اللي تتمنينه .

رد : هل أقبل أن أكون زوجة ثانية دون علم الزوجة الأولى ؟
 

ايه أختي اتفقنا ع كل شي وقت الشوفه وطبعا ما راح يستمر هالزواج الا لما اشوفه امحقق لي هالمطالب وان شاء الله خير مع الايام راح يبين اكثر وايي اقول لكم .. مشكوره ع ردج فديتج وجزاج الله كل خير .

رد : هل أقبل أن أكون زوجة ثانية دون علم الزوجة الأولى ؟
 

اللهم امين حبيبتي .. مثلما ذكرت اختي هذا مب اول مره تمرض فيه الله يشفيها ويعافيها في احتمال دايم يرد لها السرطان ربي يعينها ع اللي هي فيه بس هذا كتبة رب العالمين لها مالي يد فيه والريال هو اللي جاي لحد عندنا يبي الزواج وهذا شي خاص فيهم مالي النيه اني أتدخل بحياتهم بأي شكل من الاشكال متفهمه لوضعه ولوضعي وياه لو قبلت فيه وهذا المهم عندي اما باقي خصوصياتهم مالي دخل ولا احب اسأله او اتكلم فيه الا لو هو شاركني همومه .. تسلمين ع ردج وجزاج الله كل خير .

رد : هل أقبل أن أكون زوجة ثانية دون علم الزوجة الأولى ؟
 

الله يوفقك ويسعدك وييسر دربك

رد : هل أقبل أن أكون زوجة ثانية دون علم الزوجة الأولى ؟
 

ارجو لك السعاده
وتستاهلين كل خير اختي الله يسعدش

رد : هل أقبل أن أكون زوجة ثانية دون علم الزوجة الأولى ؟
 

رد : هل أقبل أن أكون زوجة ثانية دون علم الزوجة الأولى ؟
 

أختي أم الدانه وجود اهله مهم
كيف الوحده تكتب كتابها ومحد من اهله معه!!
اسرتين لازم يتعرفون على بعض
الموضوع فيه نسل وأحفاد
يزورونها تزورهم .. الزواج تداخل عوايل في بعض
مالها خص المسألة بعمر

رد : هل أقبل أن أكون زوجة ثانية دون علم الزوجة الأولى ؟
 

السلام عليكم ورحمة الله وبركاته ..
أنتِ انسانه طيبة والمهم دوماً أختي العزيزة تكون نيتكِ طيبة كي يُسهل الله أمركِ وتكون حياتكِ هادئة ..
والله يشفيها ويشفي جميع مرضى المسلمين والمسلمات ..

نعم صدقتِ أختي العزيزة العقد فلا بد من وجود والديه ..
وفقها الله لكل خير ورزقها من حيثُ لاتحتسب ..

رد : هل أقبل أن أكون زوجة ثانية دون علم الزوجة الأولى ؟
 

والله أحس الواحد بهالعمر يستحي يجيب أبويه ..
ممكن أخواته أو بنات اخواته ..
الام والاب بعد العقد ياخذها لهم تتعرف عليهم ..
لكن الأم بسن 70 سنة مثلا والأب كذلك يجون يخطبون لولدهم ..
ما اتخيل .. :)

رد : هل أقبل أن أكون زوجة ثانية دون علم الزوجة الأولى ؟
 

موشرط يجيبهم يخطبون بس وقت الملكه لازم يكونوا حاضرين
لو جاء لوحده ماتضمن انه يقولهم
ويمكن يمنعها من زيارتهم

رد : هل أقبل أن أكون زوجة ثانية دون علم الزوجة الأولى ؟
 

مشكوره فديتج ع هالدعوه الحلوه وربي العالم ايشكثر محتاجه هالشي بحياتي في الوقت الحالي .. أسعدتيني وايد ولج بالمثل وأكثر حبيبتي .. للأسف مافي فيس يبوس جان حطيت ههه

رد : هل أقبل أن أكون زوجة ثانية دون علم الزوجة الأولى ؟
 

تسلمين فديتج ولج بالمثل وأكثر يارب .

رد : هل أقبل أن أكون زوجة ثانية دون علم الزوجة الأولى ؟
 

من طيب أصلج حبيبتي اتشوفيني جذي تسلمين .. هم أنا ما أشوف له ضروره وخصوصا انهم عايشين برا فشي أكيد ما راح أجتمع فيهم وايد .. بس الوالد يشوف شي غير جذي ومصر عليه أن حد من هله لازم يحضر حزة الملجه دامنا تنازلنا عن علم مرته بهالزواج وفي عضوات اموافقينه بالراي فأعتقد ان هالشي من مصلحتي ولازم أصر عليه لو أبي هالزواج يستمر معليه لو حد من اخوانه دام امه وابوه اكبار بالعمر وما يقدرون ع السفر .. وبخصوص المبيت انا متفقه وياه اني متنازله عنه بس بالوقت الحالي ليما يمهد موضوع زواجنا ويا مرته بما انها مريضه حاليا فمضطره اسكت عن هالشي وأتحمل غصبا عني بعد ههه بس الشي الزين انه راح يمرني كل يوم وهذا امخفف عني التفكير بالمسأله هذي وبنشوف عقب ايش بيصير .. جزاج الله خير ع ردج واهتمامج فديتج

رد : هل أقبل أن أكون زوجة ثانية دون علم الزوجة الأولى ؟
 

ما أظن اختي مثلما قلت من قبل اهله كلهم عايشين برا الدوحه ونادر ما يجون يمكن بالسنه مره او مرتين .. فيعني جنهم مب موجودين بالصوره .. المهم حزة الملجه يحضر حد من اخوانه وبنكون في السليم مثلما يقولون .. تسلمين ع ردج حبيبتي وجزاج الله كل خير .

رد : هل أقبل أن أكون زوجة ثانية دون علم الزوجة الأولى ؟
 

طيب اختي تأكدتي من مرضها ؟؟

و الله يوفقك حبيبتي انا مو قصدي

انتي نيتك طيبه و الحمدلله

رد : هل أقبل أن أكون زوجة ثانية دون علم الزوجة الأولى ؟
 

وعليكم السلام والرحمه ..

فديتج من ذوقج والله ما عليج زود حبيبتي .. الحمدلله ع كل حال المشكله ان طيبتي الزايده هي اللي اتوديني في ستين داهيه هههه واقع في حياتي فمتخوفه من هالشي ابي اظمن نفسي وحقوقي وسعادتي بهالزواج ما ابي اتنازل عن شي الا وانا مقتنعه انه هو يستاهل وقبل كل شي ربي يكون راضي عني ع طول وهي ربي يشافيها ويعافيها مالي غير الدعاء لها بالصحه والعافيه دووم .. المشكله أن أمه وأبوه اكبار في العمر اخاف يقول هذي ايشفيها حتى ما راعت كبر سنهم وهم اصرت على حضورهم أعتقد حد من اخوانه يكفي .. وتسلمين ع الرد جزاج الله عني كل خير .

رد : هل أقبل أن أكون زوجة ثانية دون علم الزوجة الأولى ؟
 

اتفق وياج بردج حبيبتي أعتقد وجود حد من اخوانه حزة العقد كافي بما أن هله كلهم عايشين برا والام والابو بعمر ما يسمح لهم بالسفر وتعبه .. تسلمين ع ردج فديتج

رد : هل أقبل أن أكون زوجة ثانية دون علم الزوجة الأولى ؟
 

والله خوفتيني انا المشكله قاعده اراعي كبر سن امه وابوه ما ابي يتعبون نفسهم وهو قال بنفسه ان كل هله يدرون بموضوع زواجنا وامباركين له والمشكله انهم عايشين برا .. مرات افكر اهون من الخوف والله شي صعب اللي قاعده امر فيه بسبة هالخطبه بس هم ما ابي اخسر حياه يمكن اقدر اعيشها بسعاده وياه احس كل افكاري املخبطه في الوقت الحالي :24: مشكوره ع ردج فديتج

رد : هل أقبل أن أكون زوجة ثانية دون علم الزوجة الأولى ؟
 

متأكده نص نص من كلامه وكلام اللي سألناهم عنه وعن مرته يأكدون فيها السرطان بس اوراق تثبت او مستشفى لين الحين فما ادري بشكل قاطع .. سامحيني فديتج اذا غلطت عليج بدون ما انتبه بس بروحي فيني خوف مب طبيعي من الزواج الثاني وانتوا اتخرعوني أكثر والمشكله امعدد .. ودي اصيح ع حظي هههه الحمدلله ع كل حال واللهم لا اعتراض .. تسلمين ع الرد وجزاج الله كل خير .

رد : هل أقبل أن أكون زوجة ثانية دون علم الزوجة الأولى ؟
 

الله يكتب لك التوفيق والسعادة ويعوضك خيرا عن مامضى
موضوعك شدني بسبب اني توني معالجة من مرض السرطان شفاني الله وجميع مرضى المسلمين

رد : هل أقبل أن أكون زوجة ثانية دون علم الزوجة الأولى ؟
 

لا لابد من علم الجميع حتى الزوجة

رد : هل أقبل أن أكون زوجة ثانية دون علم الزوجة الأولى ؟
 

أختي قدمتي تنازلات كثير والموضوع ما يسوى
لا عدل ولا يبات ولا ليله ولا اهل يحضرون ويكون
الامر مريح .. انت ماتدرين حتى اذا امه واخواته يدرون
الزواجه ذي واضح انها بتنقلب مسيار... لذلك خذي معدد
من نفس مدينتك وحقوقك كاملة بدل ماتتنازلين وانت
ماتعرفين خير الادمي من شره .. وهو بعد مايساعد نفسه
يعني امه وابوه كبار في السن مايطلعون ولا يدخلون ولا يسافرون
انا اعرف حرمه كبيره في السن درج ماتطلعه ولما خطب ولدها
تحاملت على نفسها وسافرت مشوار طويل وحضرت..
الاصول اصول والواجب واجب .. انت راعيتيه بس مانت قاطه
نفسك لهدرجه .. اقل شي خواته ... اما بس اخوه فأقولك الامر
مقلق للغايه وغير مريح ... اخاف ان الادمي يجرب نفسه فتره
واذا ماعجبه الوضع عطاك ورقتك وماخسر شي ومحد جاب خبره
وحياته ماشيه وانت اللي عفستي نفسك..

رد : هل أقبل أن أكون زوجة ثانية دون علم الزوجة الأولى ؟
 

والله ان كلامها عين العقل
اختي وايد تنازلتي على شوووه مادري !
يبدو ان طول صبرك مخليك مندفعة مجرد ماحقق لك المسكن المستقل
مع ان لو لاحظتي ان اللي كانوا بيسكنونج مع الزوجة الاولى يعني اعلان وحقوق محفوظة على الرغم من الصعوبة ،،
بصراحة مالج اي ضمانات الا كلامه
لا اهله ولا اعلان ومن ديرة غير ديرتج وبدون بيات

بس انا مستغربة كيف تجرا يقول هالكلام قدام اهلج
هو عن طريقج جاء مثل موقع زواج وفهمج هذا كله ولا بطريقة تقليدية ولا في بينكم وسيط

ارجو انج تكونين صريحة
ولا تخادعين نفسج

رد : هل أقبل أن أكون زوجة ثانية دون علم الزوجة الأولى ؟
 

بعدين ترى طبيعي يحطج بمسكن مستقل
ترى الزواجة سرية فالمسكن المستقل يخدم مصلحته ورغبته في الزواج السري
انتبهي انتبهي
ولو هو شاريك بيحقق اللي تبين
لا تقولين لو ما وافقت بيخطب غيري
بسالك انا
المراة وش تبي برجل يتخلى عنها لو طالبت بحق بسيط من حقوقها !
يتركك علشان طلبتي اهله
مو عيب !
ومو دليل تخلي مبدئي !

رد : هل أقبل أن أكون زوجة ثانية دون علم الزوجة الأولى ؟
 

وأكون السبب لمعاناة وحده وهي باﻷصل قاعده اتعاني ويا المرض .. أحس كافي عليها هم المرض وما يندرى ايشلون بتكون حالتها الصحيه عقب ما تسمع شي جذي .. تسلمين ع ردج

رد : هل أقبل أن أكون زوجة ثانية دون علم الزوجة الأولى ؟
 

اذا على العدل هو قال بس بالوقت الحالي ليما مرته اتصير احسن وتقدر تتقبل خبر زواجنا يعني ما راح يخش عنها شي عقب وهم ذكرت انه راح يمرني كل يوم وبيبات متى ما لقى الفرصه ع حد قوله ..واحنا من نفس المدينه والبلد بس هله كلهم اللي عايشين برا .. وهم اتفق ويا أبوي انه بيجيب أخوه حزة الملجه وأخته يمكن تتواجد بالدوحه حزتها فأكيد بتحضر .. انا اللي امشجعني عليه شيئين انه ما خش عني شيء وكان واضح وصريح ع اللي يقدر عليه واللي ما يقدر والسبب الثاني انه بيكون عندي بيت مستقل عن مرته اﻷوليه اهم شي عندي راحتي النفسيه شبي في ليله لي وانا طول اليوم امجابله وحده اكيد بتنغص علي عيشتي ومشاكل وهم أعتقد حزتها راح أنتحر ابرك لي من عيشه بهالشكل .. جزاج الله خير ع ردج واهتمامج فديتج .

رد : هل أقبل أن أكون زوجة ثانية دون علم الزوجة الأولى ؟
 

ما أدري اذا انتوا تقرون كل اللي أكتبه أو بس تقرون بالمختصر وتردون علي .. صراحه ما يهمني يبات عندي او لا كثر اني ما أجابل مرته وعياله في بيت واحد أدري اني ما راح اتحمل حياه بشكل جذي ولا راح اخذ راحتي ابدا غير المشاكل اللي بتصير لو كنا ببيت واحد انا وحده مسالمه لاخر درجه اقعد في بيت أبوي ابرك لي من اني اخذ معدد بيحطني ويا مرته ببيت واحد .. وللمره الالف زواجنا راح يكون معلن من الصوبين الا على مرته واحنا من نفس البلد بس هله اللي عايشين برا وأكدنا عليه يجيب حد من هله بوقت الملجه ورضى .. والله اتحسسوني اني قاعده ارتكب جريمه عوده هههه وتحقيق وسالفه اتخرعون الواحد أكثر من ماهو مخترع .. جا عن طريق خطابه وهالخطابه أعرفها وهي الوسيط بينا وهم قعد ويا أبوي وقابله وشافني الشوفه الشرعيه واتفقنا ع كل شي حزتها يعني أغلب تواصله ويا أبوي والخطابه .. مشكوره ع ردج الله يسعدج ويوفقج .

رد : هل أقبل أن أكون زوجة ثانية دون علم الزوجة الأولى ؟
 

ما طلبت امه وابوه مراعاه لكبر سنهم وهم هو سنه اكبير مب اصغير واللي أشوفه حوالي هالشي عادي الريال يخطب بروحه بس مع ذلك من عقب نصايح العضوات وهم عشان أبوي يرتاح قلت للخطابه يجيب حد من اخوانه حزة الملجه ع اﻷقل .. تسلمين فديتج ع تنبيهج واهتمامج جزاج الله عني كل خير .

رد : هل أقبل أن أكون زوجة ثانية دون علم الزوجة الأولى ؟
 

السلام عليكم ورحمة الله وبركاته ..
أختي الكريمة دانة ، المهم لابد من حضور أهله ..
لاتتزوجي هكذا على غموض لأنكِ أنتِ من ستتعبين وتندمين ..
لاتنسي الإستخارة كذلك ..
وفقكِ الله لكل خير ..