اختي ايم المشاكل في بدايت الزواج تافهه الي ابعد درجه لكنها تكبر ليش لن كل واحد عنده افكار معينه متربي عليها وفجأه تتصادم هذي الافكار مع بعض لعدم فهم شخصية كل واحد فيهم مو عيب فيهم لكن كل واحد مافهم الشخص الي قدامه بصوره واضحه في بدايه الزاوج والشي هذا طبيعي جدا
ونا اول ماتزوجت حاط في بالي بتصادفني مشاكل كثيره بالنسبه لتفكير والطباع لكن الذكي الي يحاول يمتص هذي المشاكل لصالحه والمشاكل كثيره ماتنعد

ياليت المشاكل توقف عند السنة الاولى...
لكن مشكلة مشاكل السنة الالوى طريقة التعامل...
مشكلتي الاولى مع زوجي كانت سببها انه ماكان حاس بمسؤولية الزواج وانه لازم يرد البيت بسرعه لان وراه زوجه..فكان السهر اول شهور الزواج لين الفجر..
نتيجتها اني طردته وصكيت بابي علي و رميت شنطته في حوش البيت ( مشكلتي العصبيه الزايده الحمدلله اتحكمت اكثر فيها وبالمقابل بروده وسكوته الزائد بس ماتغير) وهو نام عند خواته ثلاث ايام(ساكنين معاهم بملحق).. طبعا هو غلطان لانه ماهتم لموضوع الرجوع من وقت رغم اني اكثر من مره نبهته وزعلت وانه مايرد على اتصالاتي.. وغلطتي اكبر اني خرجت المشكله من غرفتنا واهله دروا فيها وللحين غلطة عمري اللي ندمانه عليها...لان شرخها موجود ليومكم هذا لانه يشوف فيها اهانه له بين اهله
بس الحمدلله فديته صار يهتم ونسى السهرات وانا غيرت كثير في اسلوبي وبنكمل الحين سنتين على زواجنا واعتبره انجاز...
اهم شي نصيحه للمتزوجات حديثاً .... مشاكلكم لو شو ماكنت قدر المستطاع خلوها بينكم والله قلة العقل شييييينه

بالنسبه لي ما اذكر اول مشكله ايش سببها او مين كان الغلطان فيها
بس اللي اذكره زين اني انصدمت مررررة وحسيت انها نهاية الدنيا خلاااااص
اعتقد انو اللي يخلي المشاكل ماتكبر وتزيد هو انو يكون واحد من الزوجين هادي ويحاول يجاري الثاني شوي
لغاية ما يهدى وبعدها يتفاهمون لانو لو اثنينهم عصبيين اقل شي بيقولها انقلعي بيت اهلك لا اشوف وجهك !!!
والمشاكل ما تقتصر على السنه الاولى بس في نظري .... بالعكس هي تعتمد على مدى العشره بين الزوجين
ومدى تفهم الزوجين لبعض
يعني ممكن تمر سنين عليهم مو سنه بس وهم لسه في المشاكل

وفي الاخير اقول المشاكل الزوجيه >>>>> ملح الحياة

تحياتي ,,,, شووووق

أختي الكريمة..شاكرين لكِ هذا الطرح الهادف..
ومن تجربتي أقول التالي..
تستمر المشاكل والخلافات في بدء الحياة الزوجية مع استمرار سوء الفهم وعدم المراعاة والجهل في طريقة التعامل والتفاهم..
فهذه الحياة الجديدة صعبه بما تحمله من علاقات ومسؤوليات وأمور لم نعتد عليها..
ومع الوقت..يحتاج الزوجين للقيام بالكثير من التنازلات لبعض في سبيل تحقيق التوازن في العلاقه..

فكلما كانا متساهلين ومتعاطفين ومستعدين لما هو قادم..كلما أصبحت مشاكلهما أقل وأقل..

هذا وأسأل الله أن يجعلنا قرة أعين لأزواجنا..

حفظك الله..