[align=center]أخى الكريم أنا أتكلم عن جزيرة phuket وكما تعلم أن p + h = v

فيمكن أن تقول فوكيت ( الفاء عليها 3 نقط )

ويمكن أن تقول بوكيت ..

وهى جزيرة مشهورة جدا جنوب غرب تايلند ..

كما أنه توجد مدن كثيرة تحمل نفس الاسم ...

ولكن الاختلاف فى أن الاسم دائما تتبعه كلمة مكملة ..

يعنى لازم تقول بوكيت آيسلاند اذا كنت تقصد هذه الجزيرة ..

خالص تحياتى وتقديرى[/align]

مداخلة:

يعطيك العافية أختي "تقوى الله"

ملف شامل عن تايلند

تحياتي

تايلاند عجييييييييييييييييييييييييييييييييييبة لكن بوكيت أنصحكم انه محد يروحها

لان فيها مسخرة وشغلات مو زينة

في النهار تشوفها عادي لكن خل يجي الليل تشوف الدكاكين انقلبت بارات خمرة والعياذ بالله

وما يحتاج اكمل عن مسخرة الشباب والشابات

باختصار بلاها الروحة لبوكيت واسمع نصيحة مجرب

عندك منطقة تشانغماي روعة الصراحة

لكن في النهاية عندي ماليزيا أحسن وأحلى لاني في شهر العسل

رحت ماليزيا وتايلاند بس عجبتني ماليزيا أكثر على الأقل هي دولة مسلمة

مو نفس تايلاند

وفي النهاية القرار بايديك

انت بحاجه الى هذه الاشياء والتي قد تكون بسيطه ولكن فائدتها كبيره :

• احرص علي ان تكون لديك مبالغ بسيطه من البات (عملة تايلند) يعني عشرين بات علي سبيل المثال وذلك لزوم البغشيش لانه الصراحه حصل معاي موقف انه اول ما طلعت من الطياره واتجهت الي الجوازات كانت المسافه بعيده وكان في سيارات لنقل الركاب المهم اول ما ركبت قالي السائق انه لازم ادفع بغشيش في الصندوق الموضوع في السياره وفعلا كان في صندوق زجاج مكتوب عليه " بخشيش " بالانجليزي , طبعا اخوكم ما معاه الا دولارات – وكلها مئات بعد- المهم لما وصلت الي الجوازات قمت وعطيت السائق عمله كويتيه وهي نصف دينار اي ما يعادل 70 بات , طبعا السائق ما عجبه شكل النصف دينار وخذ يا تحلطم ( يمكن بعد سب بالتايلندي ) .... نفس الموقف تكرر مع اللي يشيل الشنط .... المحصله قام اخوكم يشيل ويحط بالشنط وكل ما جاء واحد من العمال يبي يساعد قلت له مشكور ويعطيك العافيه بس فكني من شرك ما عندي بغشيش .... ومن بعدها قمت اجمع العشرين بات واحرص عليها بس علشان البغشيش.

• خذ معاك بوصله علشان تعرف اتجاه الصلاة ... ليش ... انا اقول لكم ... اول ما وصلت الفندق , سالت العامل اللي جاب الشنط هل يوجد مسلمين يعملون في الفندق ؟ قالي فيه اثنين من ربعه مسلمين , شوي ولاهم جايين سالتهم وين اتجاه الصلاة ... يحليلهم كل واحد ياشر بصوب وبعد اخذ ورد بينهم اتفقوا علي اتجاه ثالث وقالوا هذا هو اتجاه الصلاة .....

النصيحه:

1. مكاتب السياحه في المطار اسعارها نوعا ما غاليه وممكن تحصل ارخص بره المطار

2. لا تاخذ بكج كامل من مكاتب المطار احجز ليله في فندق ( ولا ترضي بالسعر الي يعطونك اياه ..

فاصل وراح ينزون السعر ) .. والباقي ممكن تاخذه بره المطار ... وعل فكره اسعار الرحلات معروفه وحتي البقالات ممكن يحجزون لك الرحله اللي تبيها ... وشغلهم كله مضمون لان لهم عموله علي كل رحله يرتبونها

3. اذا عنك حجز فنادق فنصيحه رتب رحلاتك من المكاتب خارج المطار لانهم ارخص وتقدر تختار الرحله اللي تبيها

4. بعد ما تخلص خذ لك تاكسي من مكتب المطار (مكتب خاص للتكسي موجود قبل بوابة الخروج ) ولا تقول بره ارخص , لانك بتحوس من واحد لواحد – وخصوصا اذا معاك عائله – وعقب ما تتفق مع واحد بيقولك تعال معاي ... وتلقي التكسي واقف بآخر المطار وانت وراه قاعد تسحب بالشنط وما توصل الا وانت متحسف مليون مره ...

منقول للفائدة

شكراً أخي محمد الشرقاوي وأعتذر مرة أخرى على إزعاجك 0
والشكر كل الشكر للأخت تقوى الله على مجهودها الرائع في توصيل المعلومة 0
وإنشاء الله بفكر بتايلاند أو بماليزيا على حسب ما نتفق عليه أنا والمدام ويكون مناسب لنا 0