منتدى عالم الأسرة والمجتمع - اشتكي من سوء معاملة زوجي

اقتباس:

المشاركة الأصلية كتبت بواسطة E7saas10 (المشاركة 2691308)

السلام عليكم ورحمة الله وبركاته

اشتركت فهالمنتدى الرائع من فترة ليست بعيدة لعل وعسى القى حل لمشكلتي من مشاكل وحلول الاخرين لان معظم المشاكل تقريبن نفس الشي الي يعاني من زوجته والي تعاني زوجها عسى الله يسهل أمورنا ويصلحها امين

بشرح لكم مشكلتي انا متزوجة تقريبن من 4 سنوات ولله الحمد لدي ولد سنتين وبنوته قمر ماشاء الله 5 شهور عمري 26 وزوجي يكبرني ب 4 سنين زواجنا كان زواج تقليدي يعني امه اهي الي اختارتني لولدها وهو من الاهل صارت بين مشاكل في فترة الملجة وقررت اني الانفصال بس امي وامه رفضو الفكرة هذي لانه من الاهل والناس شو بيقولوا وفي نفس الفترة اختي اتطلقت.

في فترة الملجة كان وايد يتجاهلني وابد ما بدا لي اي اهتمام كنت اترجاه عشان ايي عندي البيت واشوفه بس دوم كان يرفض حتى يوم كان ايي البيت عندنا كان يقولي لاتين عندي الميلس اذا يتي بطلع وما كنت اروح له طولت فترة الملجة سنتين وماشفته غير مرتين وبس وكان يتصل لي فالاسبوع مرة او مرتين ويكلمني دقيقتين و3 ويسكر ويوم انا اتصله مايرد مع اني والله حبيته بعد الملجه وكنت ابدي له اهتمامي وحبي له وارسل له مسجات واكتب رسايل وارسله مع اهله يوم يجون بيتنا بس مالقيت شي من صوبه مع اني الحمدلله استخرت 7 مرات قبل الملجة والحمدلله ارتحت والناس وايد كانو يمدحونه الين اليوم والله الكل يمدحه اهلي اهله.

بعد الزواج كان اسلوبه معي جدا عادي ومعامله سطحيه ولا كانا معرسين يداد كنت اهتم فيه والبس واكشخ له واشتري له هدايا كان يقولي ليش تخسري فلوسك علي كنت اقوله لاني احبك ومايغلا عليك شي وفلوسي فدا راسك بس للاسف ماتغير حتى شهر العسل مارحته بس طلعني يوم وتمينا نتمشى بالسيارة حتى مانزلنا مكان وبعده ما وداني ولا مكان بس لبيت اهلي اسبوعيا ويوم اقوله ابغي اطلع معاك يقولي مب متفيج والله حتى اغراضي كنت اقول حق امي تشتريهم وتيبهم لي من الجمعيه وبعد سنتين حملت وفي فترة الحمل تغير كثير وكان يهتم فيني وايد والحمدلله شكرت ربي ولكن بعد الولادث رجع نفس قبل لا اهتمام ولا حب ولاشي وانا ذبحت عمري عشانه لكن دون فايدة وانا الحمدلله كنت اقول اصبر عسي الله يفرجها علي وما كلمت احد وماخبرت احد لاني وايد احبه ومابغي اخرب سمعته يدام احد

بس كل يوم يتغير علي اكثر ومعاملته معي جدا سيئة لا يحترمني ولايقدرني والله مب مقصرة معاه فشي وهو فكل شي مقصر معاي من تزوجت الين اليوم ماقالي احبك ولا اهتم فيني الا لما كنت حامل بس من ناحيه المادة مب مقصر يعطيني فلوس لكن مايوديني مايطلعني السوق عشان اشتري اغراض لي ولعيالي كل ما قلت له قالي تعبان ولا مب متفيج وكله يتحرطم علي اني مسرفه ومب مهتمة بالعيال ولا بالبيت مع ان بيتي والله نظيف وعيالي مهتمه فيهم اكلهم اشربهم اغسلهم والحمدلله علا طول نظاف واذل ولدي طاح بالغلط وصار له شي حتى لو بسيط والله يسوي لي سالفه ويعصب علي ويدعي علي وانا ساكته ما اقول شي لاني مرة بس رديت عليه مد ايده علي عشان ما اقول شي يطلع مع اصحابه ويخليني فالبيت مع العيال بروحي ومايرجع الا الساعه 2 باليل والله حتي يسال عني ولا عن عياله واذا اتصلت له مايرد واذا رد يقولي ليش متصله شو تبين ويسكر الخط

حاولت معه كذا مرة وصارحته بس كل مرة يحط الغلط علي وينتقدني فكل شي انا ما اقول انا حلوة ةجميله بس الحمدلله شكلي زين مب خسفه وعيالي ماشاء الله عليهم قمر ساعات اقول يمكن لاني مب حلوة عشان جي ريلي يعاملني كذا بس انا صابرة عليه وما اشتكي عليه وادعي ربي ان يهديه حتى العلاقة الزوجيه مايقيمها في الشهر مرة احيانا ابد يمر شهر كامل ماييني وانا احبه واشتاق له واتوله عليه وايد

اتمنى تساعدوني فحل مشكلتي وانا ادري انكم مابتقصرون معاي والحمدلله ارتحت اول مرة اكتب عن مشكلتي واطلع الي فخاطري عندكم وان شاء الله مايخيب ظني

والسموحة طولت عليكم

ام محمد

*

لو مانتي حلوه وشكلك حلو وجذاب ماكان اهله اختاروك زوجه لولدهم...بس انتي قلتي هاالكلام لانه افقدتك الثقه في نفسك ودمرك..صرتي تشوفين نفسك موب حلوه...الرجال يفقدون المرأه ثقتها في نفسها باهمالهم لها

لكن بعض الرجال فيهم لئم اذا ماحب زوجته مايكرمها ابد ويدور عليها الزله سواء كانت حلوه ولا موب حلوه...اما اذا حبها يكرمها ويدللها سواء كانت حلوه ولا موب حلوه...يعني المساله مو مسالة جمال لا .. كل السالفه ...القلب ومايهوى...
لكن الشي الي الا الان مالقيتله تفسير ليش الرجال او المرأه اذا ماتقبلوا بعض في فترة الملكه ليش ماينهون الموضوع ويفسخون العقد وينفصلون وكل واحد يروح في حاله قبل الزواج...بدال الظلم والاهانات والتقصير في حقوق واحد منهم..ويسبب له التعاسه والتعب النفسي والجسدي...ليش الوحده تشوف زوجها مايبيها ومايهتم فيها ومو متقبلها وتقوم تنجب منه اطفال ورا بعض وبعدها تمل من اهمال زوجها ويمكن تطلب الطلاق وطبعا الضحيه الاطفال في جميع الحالات.....

اختي حاولي تدخلي احد من اهله او اهلك وتشكين لهم حالك معه هو شايفك ساكته وكل ماسكتي راح يتمادى اكثر واكثر..يعني على الاقل يشوف طلباتكم الضروريه انتي واطفالك..

اختي الله يسخرلك زوجك...ويهديه...