|
رد : صفعني
اقتباس:
كسرت بخاطرك ليه انا آسف بس حبيت اهدى الجو المشدود تفسيرك وصل وشكرا لك ولبنت ابو ظبى عساى اكون عند حسن ظنكم |
رد : صفعني
اقتباس:
بعيد عن الشماته والانتقاد الغير موضوعي .. اخ بليغ ماقصر بطرح النقاط بالرغم من انه ضايقتني مبدا المقارنه بين الزوج والاب .. ويليت تواجدي بيساعدني الا انه تواجدي وضعني موضع المذنبه وبدت الشماته والتحاليل من المزاج تنطرح .. |
رد : صفعني
دقيت على الوالد .. وتردد اخبره سمعت صوته فديت حسه الحنون . قالي شو في خاطرج ناقصنج شي خليفه ناقصنه شي سكت ماقدرت اخبره بالسالفه ضيعت السالفه وانا احس في شي واقفلي شرات الغصه خنقتني العبره قمت اصيح من عقب ماسكرت تردد اخبره شو سبب الصياح لااحد يسالني
ليش نفسي جي ماادري انا بطلع الحين بسير المول وبسوي شوبينغ وبدش السينما بمارس هوايتي المفضله ان شالله ااقدر افكر عقبها .. ربي يحفظكم |
رد : صفعني
اذن خذي من حديث هذا الرجل الحكيم مايفيدك ولا تبكي مما اوكىء قلبك منه!
الهواية المعنية تفريغ مشاعر بكتابة خاطرة شعر, تأمل عميق, تمارين الاسترخاء , سباحة,رياضة, او حتى رسم! الهوايات التي بها يحدث الصفو |
رد : صفعني
اقتباس:
لا لو مقرره تحكى للوالد فلا تتراجعى تحملك الهموم وحدك لن يحلها ووجود والدك بجانبك مع مايحمله من رصيد بقلبك يكون دافع لك لاتخاذ القرار السليم وانتى مطمئنه ان سندك وراء ظهرك ولن يخذلك حتى وان لم تكن شكوى ولكن مشوره وهو اكثر الناس ادرى بك |
رد : صفعني
اكبر غلط تسوينه انك ما تخبرين الوالد، كوني قوية واعلمي ان الرجل لا يوقفه عند حده الا رجل مثله
وخطأ خطيبك ليس سهل وبسيط، لا تردين عليه ولا ترسلين خليه في نار ما تنطفي، نوعية خطيبك واضحة بس لو نتكلم بتقولين انتم ما تعرفونه، الله يكتب لك الصالح |
رد : صفعني
اقتباس:
وربنا يعطيك على قد نيتك |
رد : صفعني
بتوكل على الله وبرمس ذياب ... والله يجدم اللي فيه الخير ..كل ماتاخرت موب من مصلحتي
|
رد : صفعني
اقتباس:
|
رد : صفعني
روضة..
أول شي .. ما يصير كل ما حد قال شي ما يعجبج قبضتيه الباب ;) ولا تسيئين الظن فديتج وتفكرين ان في حد يبا يتشمت فيج .... ما حد هني يعرفج وما حد مستفيد لا من زواجج ولا من عدم زواجج إذا كان الله مب كاتب لج تستمرين مع سالم. وعلى كل حال .. من الحين اقول لج اني باقول كلام غالباً ما بيعجبج .. بس تحذري لأن ويهي لوح آند آي وِل نوت كيب ماي بوينت .. آند أي وِل نوت ليف يور سبيس لو شو سويتي :d تبين الصدق .. أنا أول ما قريت موضوعج الصبح كنت ناوية أحط عليج شوية .. كونج غلطتي في بعض التصرفات وردود الفعل .. ولأني لي تحفظ على رايج في بعض الأمور. لكن عقب ما فكرت شوي رجعت في كلامي .. وقلت لنفسي أي شي غلط ممكن تكونين سويتيه ما يستحق أبداً أبداً انج تتصفعين وتنرفسين وينشد شعرج عشانه! ومتى؟ .. في فترة الملجة؟!!!!!! وليش؟ .. عشان سالم مب قادر يمسك نفسه؟!!!!!!! أنا ما أحب التعميم .. وما راح أعمم على كل الرجال أنهم يبون حريمهم في فترة الملجة .. وبنقول بعضهم يبا يدخل قبل الأوان .. وبنقول بعضهم يزعل شوي ويحط في خاطره لأن زوجته ترفض تجاريه .... لكن عمرنا ما سمعنا ان حد عصب لدرجة انه يضربها لأنها رفضت انه يدخل عليها في فترة الملجة .. لأنه ببساطة يعرف عدل أنه ـ عرفاً ـ مب من حقه يطالبها بهالشي أساساً. وإذا سالم هو اللي أوحى لج إن الملائكة بتلعنج إذا رفضتي .. فاسمحي لي هو كان يلعب على وتر الدين رغم انه يعرف عدل حدود هالأمور في فترة الملجة. وبعدين إذا هو كلش كلش مب قادر يمسك نفسه فببساطة كان يقدر يحجز تذكرة ويرجع لحرمته يتصرف معاها .. على الأقل يجبر خاطرها شوي عقب صدمة زواجه .. وعادي كان ممكن يتحجج بأي حجة إذا كان خايف يعني على زعلج! فإذا كان هذا هو السبب الوحيد لكل هالعصبية والضرب .. فهذه مصيبة .... وإن كان في سبب ثاني فالمصيبة أعظم. وبالنسبة لكلامه عنج .. فنعم يا روضة .. الكلام الصدق يطلع وقت الغضب .. وأتمنى يسمح لي كل الإخوة والأخوات السعوديات .. لكن هم هناك لهم نمط محافظ أكثر عنا شوي .. وحياتج وحياتي مثلاً تعتبر متحررة فعلاً وما تعجبهم .. (مرة ثانية أعتذر من الجميع فأنا أقول هذا من باب الإقرار وليس من باب الاستنكار) .. عشان جذي أنا لمحت لج مرة وسألتج شو بتسوين إذا سالم علّق على بعض تفاصيل حياتج وكانت له وجهة نظر غير عن وجهة نظرج. بتقولين ليش تزوجني وهو عارف كل شي عني .. باقول لج ما اعرف هو شو في راسه .. لكن باخبرج عن وحدة من أهل زوجي .. في فترة الملجة زوجها كان شكاك بشكل مب طبيعي لدرجة أنه كان ناوي ياخذها لطبيبة تكشف عليها عشان يتأكد انها عذراء! .. وعقبها اعتذر لها وبكى جدامها وحب ريولها عشان تسامحه .. وفعلاً كسر خاطرها وطوّفت له السالفة وما خبرت أهلها .. والنتيجة ان الشك استمر لين عقب الزواج وصارت مواقف وايد انتهت بالطلاق. ووحدة ثانية ضربها زوجها في أول زواجهم ـ مب في فترة الملجة ـ وقالت لاخوها الكبير ولامها ـ ابوها متوفي ـ ويابو الريال ومسحوا فيه البلاط .. والريال اعتذر وحلف بالله انه ما يعيدها ....... التزم بوعده وحلفانه؟ .. لا والله .. كم مرة عادها .. وآخرها امها من كم يوم تقول لي ضاربها الاسبوع اللي طاف وعلامات على جسمها لدرجة ان اختها كانت ناوية تبلغ الشرطة!! تذكرين يا روضة يوم قلت لج: احنا ما نعرف سالم ولا حتى انتي تعرفينه .. وانج بتعرفينه عدل عقب العشرة والاحتكاك اليومي والمواقف البسيطة .. هذا اللي بيظهر لج حقيقة شخصيته .... وهالموقف اللي صار يوضح جانب مهم من شخصيته ما يصير تتغافلين عنه .... وصدقيني صدقيني .. اللي يضرب مرة فعلاً بيضرب مرات ومرات .... خاصة لو تسترتي عليه وما قلتي لابوج. النقطة الثانية اللي ابا ارمسج فيها هي يوم رديتي عليّ وعلى العزيزة أبغي حل بخصوص الاستغلال المادي: وقلتي انه عمره ما طلب منج شي والمبادرة دايماً منج. ليش يطلب يا روضة مادامج تبادرين؟ .. ليش يطلب ما دام قلبج طيب وحنونة وينكسر خاطرج بسرعة وما تتحملين تشوفين حد محتاج أو معتاز؟ وما دام السالفة وصلت للضرب والتطاول من الحين .. فانا باكون صريحة وياج وباقول لج اللي ما رضيت اقوله أيام الملجة عشان ما تحسين اني ابا اخرب فرحتج .. تذكرين يوم قلتي لنا انه قدم لج 230 ألف؟ .. وقتها سألت نفسي: من وين ياب هالمبلغ وروضة تقول انه مسؤولياته كثيرة وهو على قده؟ .. من وين ياب هالمبلغ وهو ماله سنة والا سنتين معرس يعني أكيد دافع اللي وراه وجدامه وما مداه يجمّع حق زواج ثاني؟ عشان جذي باسألج ـ ولا تردين إذا مب حابة .. بس فكري بينج وبين نفسج ـ لما رجع لج قبل رمضان قلتي انج حطيتي له مبلغ محترم في البنك ... كم حطيتي له؟! وزمان يوم تقدم لج أول مرة .. كنتي تعطينه فلوس والا لا؟ مرة ثانية اكررها .. احنا ما نعرف الريال .. وتحليلاتنا من واقع الكلام اللي انتي تقولينه يا روضة .. عشان جذي فكري عدل في كلامنا وحطي ولو احتمال انه ممكن يكون صح .. وانه سالم مب هو الانسان اللي انتي متخيلته. عشان جذي قلت لج وقفي المبادرات المادية كلها .. كلها .... ومثل ما هو شاطر يطلب حقه قبل العرس اطلبي منه حقج يصرف عليج من الحين ـ حتى لو مب محتاجة فعلاً ـ وشوفي كيف بيكون رد فعله. احنا نختبر الرياييل يا روضة قبل ما ناخذهم .. وانتي لازم تختبرين سالم عشان تتأكدين انه يستاهل كل اللي تسوينه عشانه .... انتي صبرتي وايد .. وحرام عقب هذا كله يي واحد يقص عليج عشان كم فلس والا عشان ليلة والا ليلتين. |
| الساعة الآن 11:21 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©