في البداية بعد ماتتفاهم مع زوجتك أكيد راح تقولهم انها على وشك الطلاق ..
هي بتمهد لهم الموضوع بعدها أنتظر كيف راح يتصرفو !!
لان الانفصـال ماراح يتم بين ليلة وضحاها بالتأكيد بتحصل مهاترات وشد وجذب بين العائلتين وتدخلات لإصلاح الوضع ,,
فإذا بادرو واتصلو فيك تكلم مع والدتها أشرحلها كل شي وان شاء الله راح تتفهم وفي الأخير يهمها سعاده بنتها حتى لو كانت في الطلاق ..

وأرجع اقولك أعطي خبر لأهلك بالتدريج خصوصا كما ذكرت انهم أصحاب امراض - شفاهم الله وعافاهم - لاتنفع لهم الصدمات المفاجئه ..

أسأل الله ان يسهل أمورك ويصلح حالك ويعينك على الخير ..

الله يفرج همك ،، كثيــر مثل قصتك ،،
استخير الله .. الله يكتب لك اللي فيه الخيير

ربي يحفظكم ويرعاكم جميعا المتابعين والللي يردو على الموضوع .,,

اليوم كملت امي وابوي ووقلت لهم بس اكتشتف انهم حاسين فيني وقالو اللي يريحك سوه وانت ابوها وسمها ,, وقلت لهم وصلو لهم الخبر مع العلم اني خالي مسافر هو واهله وزوجتي معهم ,, بس ا حسيت ان ابوي مايحب يقول لهم وامي كذلك ليس خوفا ولكن يدارون الشعور وانا الحين توهقت مدري من اقول له لامها والا لابوها والا هي والمصيبه اليوم ترسل لي كلام حلو يعني ياناس المساله مو مساله اني رجل واتصرف وبطل ,, انا اول مره انحط بالموقف موقف صعب وللمعلوميه انا الوحيد اللي بالعايله اللي بطلق .. يعني حدث بيكون عليهم غريب شوي بس الحين ... انا عادي اقدر اتكلم واقول بس ياناس وربي وربي وربي وربي فيني رحمه لها ,, مدري كيف ابدا وبالي مشغول .. فاللي يقولون رجال وشورك بيدك هذا الامر مايبي له قوه وعنف واثبات رجوله الحمد لله انا رجل ولا فيه شك واعرف وقت المراجل متى يكون ,, بس موقف زي كذا اسمه طلاق يعني انفصال؟ ,, وانا انسان مابي اشطح بالموضوع فجأه لذلك انا مدري هل انتظر لين يجون من السفر والا اكلمهم؟ والا كيف بصراحه احترت واسف والله اشغلتكم معي بس والله انكم شلتي عني هم كبير بردودكم ...

صدمة تكلمهم وهم بالسفر ،،
انتظر لماا يرجعوون وكلم ابووهاا ،، الله ييسر لك
ويجبرهاا بمصابهاا ويعووضكم بالأفضل ....

الله يجزاك خير طيب لو كلمتها هي ؟؟ يعني اعطيها خبر برساله لان بصراحه ماودي ترسل لي وهي مادرت عن الموصوع ... ترا فيني رحمه ولو اتوقع اني اقدر اكمل معها كملت بس الشكوى لله

انا افضل تكلم ابوها ولا تكلمها اهي الافضل ابوها روح لخالك وقله .... هذا رائي والافضل بعد

بالتوفيق لك

مقدرة وضعك واللي مثلك ،،
حتى برسالة صعبه ،، اذا وصلوا ان شاء الله كلمهاا ،، ومهد لها الموضوع ،،
و بعدهاا كلم ابووهاا ،، وان شااء الله يكون متفهم ويقدر وضعك
ولا تنسى الدعاء والاستخاارة لان المووقف جدا صعب ،، وعسى الله يعينك ..

ممكن اقولك شي ولاتزعل مني ..



غير رقم تلفونك .. عشر سنين موب شويه .. بس بقراره نفسك تبا تتخلص من العلاقه ..
البنت ترسلج رسايل عل وعسى قلبك يحن ..
اوكيه رجعتها ؟؟ وبعدين؟؟ بتتقبلها ام عيالك ؟؟ بتعطيها حقها بالحب والحنان وباقي الامور اللي تكون متبادله بين الزوجي؟؟

او راح تستمر بالفراغات بينك وبينها ؟؟

انا بقولك افتح بيتين .. موب مشكله خلها على ذمتك ..
بس انا من وجهة نظري تكون مطلقه ارحم بكثير من انها تكون بذمتك وانت ماخذ الجو كله والحنان والحب والدلع مع الثانيه ...
اهني مربط الفرس اهني بتتاذى مشاعرها اكثر واكثر ويمكن يصيبها الضغط والسكر بعد الشر عنك وعنها وعن القاريين .. من كثره الحزن وكبت المشاعر ..
ولاتنسى محتاج وقت تعيد ترتيب اوراقك

رجع ابوها من السفر ورجعت زوجتك ؟؟؟

خالي انا بطلق؟؟؟ فلانه خلاص بطلقج؟؟ تستأذنه بالطلاق؟؟؟ شو تفرق مادام بطلق بطلق بكل الاحوال ليش تساذنه . ..

بتوقف الدنيااا ..

انا اللي مضايجني أكثر من موضوعك كله الموقف السلبي للبنت يعني ثلاث سنين محرومه من الامومه وهي عارفه السبب وصابره وساكته ؟؟ كيف ترضاها على نفسها؟؟ سؤال يطرح نفسه ويبقى الجواب موب من عندك ولا عند اي عضو ولا بالتخمينات اللي نطرحها الجواب عندها هي وبس ..



انا قلت مادامك بالطلق خلاص بعد هي اطرش مسجات لانها تبااك بس انت من داخلك ماتتقبلها وهذا حققك وهي مؤجورة ان شالله وانت مؤجور بصبرك ان شالله ..

بس دام الموضووع وصل لين اهني
انا اقول اخوي الكريم سكر موضوعك لاتسمع ردود ماتسرك ..
فبالتالي ..
فهمتها انك معزم وانك انت الخسران لكن ماتقدر تستمر معاها واجوفها اخت لك موب زوجه..


خلاص .. لاتعور قلب خالك واهلها .وقلبها اكثر من جي .
اصبر لين مايرجعووون ولاتستأذنهم بالطلاق لانهم راح يفرون يمين عليك انه مايسامحونك ويمكن بيزعلون وساعه الزعل احسب الف حسااااب لاهل
مهما كان هاي بنتهم وصبرت وسكتت وهالشي اللي محيرني ..
ويمكن راح يمسكونك عن الطلاق وبالتالي مابتقدر اطلق
يعني كانك قاعد ادور بنفس الدوار

وقف هني ..

بس تسمع انهم رجعوا طلقها لو غيابي .. لاتروح البيت واطلقها بويها كفايه انها مجروحه على فراقك لاتجرحها اكثر وتقولها بويها
وخل ورقتها توصلها للبيت .. ...
وصدقني انا متاكده راح تقدر هالشي لانها عاشت معاك واشعرت فيك وبانفساك وعرفت انك موب متقبلنها وفوق هذا داست على قلبها واسكتت ..
بس انك تروح تخبر اهلها اهني شوي صعبه لانه احتمال جدتك تهددك بتزعل وغيره وخوالها بيحلفون يقاطعونكم وجي
..فراح تفتح على نفسك باب مطول على بال ماتسكره ولاتنسى انت اول واحد من اهلك بيطلق فهذا الموضوع ماراح يخلون يمر جي بالساهل
وبالمره راح تعفي ابوك من الاحراج
وبدل لاتخلي ابوك وخالك يتقابلون ويصير احراج لابوك طلق بدون لاتخبرهم وبجذي راح تعفي ابوك من الاحراج لانه هالشي صار من وراهم ..

وغير رقمك بدل لاتعور قلب البنت وتقرى رسايلها ولاترد عليها وتتجاهلها فبتتاذى اكثر واكثر ..

وخلاص انتبه لنفسك ورتب امورك من يديد وراجع حساباتك هذا زواج يااخوي زوواااااج استقرارا حب والفه وموده وان شالله الله بيرزقها ويعوضها وبيرزقك ويعوضك
انا قلت راي يااخوي بعد مارديت وعدت وقريت انك ماتنكر انها طيبه ومخلصه لكنك موب راضي تتقبلها مشاعرك موب راضية بالوضع ..

كلامك صح وكلام الاخوات عين العقل بس انا ماهمني جده وخاله وعمه همني موقفها هي وموقفي مع خالها فالاضل زي ماقلتو اكلم ابوها اول مايجي من السفر وهي قبل كل شي بلمح لها بالموضوع او اقول لها قبل لاروح لابوها بساعه او ساعتين .,,

وجزاكم الله كل خير

دور لهآ زوج مناسب لهًآ وأنت طلقهآ وخلها تتزوجه ,
وأنت تزوج وحدا تستآهلك , وأهلك مالهم دخل في زوآجك هذا الناقص بعد